Teuteu ʻa e Meʻa ʻAonga Kotoa pē
Tuʻunga Fakapaʻanga ʻa e Fāmilí
Pōpoaki mei he Kau Palesitenisī ʻUluakí
Siʻi Ngaahi Tokoua mo e Tuofāfine:
Kuo taʻu lahi ʻa hono faleʻi e Kāingalotu ʻo e Siasí ke nau teuteu ki ha faingataʻa ʻaki hano fakahū ha paʻanga. ʻOku fakalahi atu ʻa hono fakahoko iá ki heʻete ongoʻi malu mo leleí. ʻOku ʻi ai ha fatongia ʻo e fāmili kotoa pē ke ne tokonaki ʻene ngaahi fie maʻu ʻaʻaná ki he lahi taha ʻe malavá.
ʻOku mau poupouʻi atu kimoutolu, ʻo tatau ai pē pe ko e fē feituʻu ʻoku mou nofo ai he māmaní, ke mou teuteu ki ha faingataʻa ʻaki hano vakaiʻi hoʻomou tuʻunga fakapaʻangá. ʻOku mau tapou atu ke fakafuofua pē hoʻomou ngaahi fakamolé; mapuleʻi kimoutolu ʻi hoʻomou ngaahi fakataú ke mou fakaʻehiʻehi mei he fakamoʻuá. Totongi ke ʻosi homou moʻuá he vave taha te mou lavá pea fakatauʻatāinaʻi kimoutolu mei he pōpula ko ʻení. Fakahū maʻu pē ha kiʻi paʻanga ke mou tātānaki māmālie ai haʻamou talifaki fakapaʻanga.
Kapau kuo ʻosi totongi homou moʻuá pea ʻi ai haʻamou talifaki fakapaʻanga, neongo pe ko e hā ʻene siʻisiʻí, ʻe ongoʻi malu ange ai homou fāmilí pea te mou maʻu ha loto nonga ʻoku lahi angé.
ʻOfa ke faitāpuekina kimoutolu ʻe he ʻEikí ʻi he ngaahi meʻa fakapaʻanga homou fāmilí.
Ko e Kau Palesitenisī ʻUluakí
Ko e Tefitoʻi Faʻunga ʻo e Meʻa Fakapaʻanga ʻa e Fāmilí
Totongi Vahehongofulú mo e Ngaahi Foakí
Ko e ola lelei ʻo e meʻa fakapaʻanga ʻa e fāmilí ʻoku kamata ia mei hono totongi totonu ʻo e vahehongofulú pea mo e fai ʻo ha foaki ʻaukai ʻoku lahí. Kuo talaʻofa mai ʻa e ʻEikí te ne fakaava ʻa e ngaahi matapā ʻo e langí pea lilingi mai ha ngaahi tāpuaki lahi kiate kinautolu ʻoku totongi totonu ʻenau vahehongofulú mo e ngaahi foakí (vakai, Malakai 3:10).
Fakaʻehiʻehi mei he Fakamoʻuá
ʻOku mahuʻinga ki hoʻo malu fakapaʻangá, ʻa e fakamole ʻo siʻi ange he meʻa ʻokú ke maʻú. Fakaʻehiʻehi mei he fakamoʻuá, tukukehe ʻo kapau ko e fakatau mai ʻo ha ʻapi feʻunga pē pe totongi ki he ako fakaʻatamaí pe ngaahi fie maʻu mahuʻinga kehe. Fakahū ha paʻanga ke fakatau ʻaki e meʻa ʻokú ke fie maʻú. Kapau ʻoku ʻi ai hao moʻua, totongi ia ke ʻosi ki he vave taha ʻe lavá.
Fakaʻaongaʻi ha Patiseti
Tauhi ha lekooti ʻo hoʻo ngaahi fakamolé. Lekooti mo toutou vakaiʻi fakamāhina ʻa e paʻanga hū maí mo e ngaahi fakamolé. Fakapapauʻi ha founga ʻe lava ke holoki ʻaki e lahi hoʻo fakamole ki he ngaahi meʻa ʻoku ʻikai fie maʻú.
Fakaʻaongaʻi e fakamatala ko ʻení ke fokotuʻu ʻaki ha patiseti fakafāmili. Palani ʻa e lahi ʻo e paʻanga te mou foaki ki he Siasí, lahi ʻo e paʻanga te mou fakahuú pea mo ia te mou fakaʻaongaʻi ki he meʻakaí, falé, vaí mo e ʻuhilá, fefonongaʻakí, valá, totongi maluʻí mo e alā meʻa pehē. Mapuleʻi koe ke ke moʻui pē ʻo fakatatau mo hoʻo palani patisetí. (Vakai ki he Fakamatala Patiseti he tafaʻaki ʻe taha ʻo e pēsí).
Faʻufaʻu ha Talifaki
Faʻufaʻu māmālie pē ha talifaki fakapaʻanga pea toki fakaʻaongaʻi pē ia ki ha ngaahi meʻa fakatuʻupakē ʻe hoko. Kapau ʻokú ke fakahū maʻu pē ha kiʻi sēniti, te ke ofo ʻi he vave ʻa ʻene tupu he ʻalu pē ki muʻa e taimí.
Akoʻi e Kau Mēmipa ʻo e Fāmilí
Akoʻi ki he kau mēmipa ʻo e fāmilí ʻa e ngaahi tefitoʻi moʻoni ʻo e levaʻi ʻo e paʻangá. Fakakau mai kinautolu ki hono fokotuʻu ʻo ha patisetí pea fokotuʻu ha ngaahi taumuʻa fakafāmili he meʻa fakapaʻangá. Akoʻi ʻa e ngaahi tefitoʻi moʻoni ʻo e ngāue mālohí, moʻui fakapotopotó mo e fakahū paʻangá. Fakamamafaʻi ʻa hono mahuʻinga ke ako ki he taupotu taha ʻe lavá.
FAKAMATALA PATISETÍ
PATISETI KI (māhina/taʻu)
|
Paʻanga hū maí |
Kuo palaní |
Lahi totonú |
|
Vāhengá (hili e toʻo ʻo e tukuhaú) | ||
|
Paʻanga hū mai kehé | ||
|
Fakakātoa ʻo e paʻanga hū maí |
|
Ngaahi Fakamolé |
Kuo palaní |
Lahi totonú |
|
Vahehongofulú mo e ngaahi foakí | ||
|
Fakahuú | ||
|
Meʻakai | ||
|
Totongi ʻapí pe nofo-totongí | ||
|
Vaí, ʻuhila, telefoni, kasa | ||
|
Fefonongaʻakí | ||
|
Totongi moʻuá | ||
|
Maluʻí | ||
|
Meʻa fakafaitoʻó | ||
|
Valá | ||
|
Fakamole fakaakó | ||
|
Meʻa kehe | ||
|
Fakakātoa ʻo e fakamolé | ||
|
Hili hono toʻo e fakamolé mei he paʻanga hū maí |
-
Patiseti ki ha vahaʻa taimi pau (hangē ko e fakauike, fakauike ua, fakamāhina).
-
Vakaiʻi maʻu pē hoʻo patisetí.
Vakai ki he tuʻasila ko e www.providentliving.org ke maʻu mei ai ha fakamatala lahi ange fekauʻaki mo e ngaahi meʻa fakapaʻanga ʻa e fāmilí.