Teuteu ʻa e Meʻa ʻAonga Kotoa pē

Tukuʻanga Koloa ʻa e Fāmilí ʻi ʻApi

Maʻu ʻa e totonu fakalao kotoa pē. Paaki ʻi he USA

Fakangofua he lea faka-Pilitāniá: 3/07

Fakangofua ke liliú: 3/07

Pōpoaki mei he Kau Palesitenisī ʻUluakí

Siʻi Ngaahi Tokoua mo e Tuofāfine:

Naʻe faʻu ʻe heʻetau Tamai Hēvaní ʻa e māmani fakaʻofoʻofa ko ʻení, mo hono mahutafeá ke lelei kiate kitautolu mo tau fakaʻaongaʻi. Ko ʻEne taumuʻá ke tokonaki maʻa ʻetau ngaahi fie maʻú ʻi heʻetau ʻaʻeva ʻi he tuí mo e talangofuá. Kuó Ne fekau mai ʻi he ʻofa ke tau “teuteu ʻa e meʻa ʻaonga kotoa pē” (vakai, T&F 109:8) koeʻuhí ʻo ka hoko mai ʻa e faingataʻá, ʻe lava ke tau tokangaʻi pē kitautolu mo hotau kaungāʻapí mo poupou ki he kau pīsopé ʻi heʻenau tokanga ki he niʻihi kehé.

ʻOku mau poupouʻi atu ʻa e kāingalotu ʻo e Siasí he funga ʻo e māmaní ke nau teuteu ki he ngaahi faingataʻa ʻo e moʻuí ʻaki haʻanau ʻai ha maʻuʻanga meʻatokoni mo e vai pea mo fakahū ha paʻanga.

ʻOku mau kole atu ke mou fakapotopoto ʻi hoʻomou tānaki pe fakatolonga ʻa e meʻakaí mo e vaí mo fakahū ʻo e paʻangá. ʻOua ʻe fai ha meʻa ʻe fuʻu tōtuʻa; hangē ko ʻení, ʻoku ʻikai fakapotopoto ke ke fakamoʻua ke fokotuʻu fakaʻangataha ʻaki pē haʻo koloa meʻakai. ʻO ka palani fakalelei, te ke lava he fakaʻau ki muʻa e taimí, ʻo fokotuʻu ha koloa meʻakai ʻi ʻapi pea mo ha talifaki fakapaʻanga.

ʻOku mau ʻiloʻi pē ʻoku ʻi ai hamou niʻihi ʻoku ʻikai haʻanau maʻuʻanga paʻanga pe feituʻu lahi feʻunga ke tauhi ai ha meʻatokoni pehē. ʻOku ʻi ai hamou niʻihi ʻoku tapu ia he laó ke tauhi ʻo fakatolonga ha meʻakai lahi. ʻOku mau fakalotolahiʻi kimoutolu ke mou tauhi e lahi taha te mou lava ʻo fakatatau mo homou tūkungá.

ʻOku mau fakatauange ke faitāpuekina kimoutolu ʻe he ʻEikí ʻi hoʻomou feinga ke tauhi mo fakatolonga ha meʻakai ʻi ʻapí.

Ko e Kau Palesitenisī ʻUluakí

Ngaahi Tefitoʻi Faʻunga ʻo e Fakatolonga Meʻakai ʻi ʻApí

Meʻakai Feʻunga ki ha Māhina ʻe Tolu

Fokotuʻu ha maʻuʻanga meʻatokoni ke hoko ko ha konga ʻo hoʻo maʻu meʻatokoni angamaheni mo fakaʻahó. Ko e founga ʻe taha ke fakahoko ʻaki ʻení ko hano fakatau mai ke lahi siʻi pē ha fanga kiʻi meʻa he uike taki taha ke fokotuʻu ʻaki ʻa e tukuʻanga meʻakai ʻe feʻunga ki ha uike ʻe tahá. Peá ke toki tātānaki māmālie ai pē ki ai kae ʻoua kuo lahi feʻunga ki ha māhina ʻe tolu. ʻOku totonu ke fetongi maʻu pē ʻa e ʻū meʻa ko ʻení ke ʻoua naʻa maumau.

Vai Inú

Fakatolonga ha vai inu ki ha taimi ʻe ʻuli pe motuhia ai ʻa e maʻuʻanga vaí.

Kapau ʻoku haʻu hangatonu ʻa e vaí mei ha maʻuʻanga vai ʻoku lelei mo ʻosi faitoʻo, ta ʻoku ʻikai fie maʻu ke toe ʻai ia ʻo faitoʻo; kapau ʻoku ʻikai, pea faitoʻo ki muʻa pea toki fakaʻaongaʻí. Fakatolonga e vaí ʻi ha ʻū hina ʻoku mālohi, malu pea ʻikai ke mafoa vavé. Fakakaukau ke ke fakaʻaongaʻi ha ʻū hina pelesitiki, hangē ko ia ʻoku anga-maheni ʻaki hono fakaʻaongaʻi ki he inu melié (juices) mo e inu-kasá (soda).

Tuku e ʻū hina vaí ke mamaʻo mei ha feituʻu ʻoku vevela pe laʻāina.

Talifaki Fakapaʻanga

Fokotuʻu ha talifaki fakapaʻanga ʻaki hano fakahū ha kiʻi sēniti he uike taki taha pea fakalahi māmālie pē ke lahi feʻunga (vakai ki he tohi fakahinohino, Teuteu ʻa e Meʻa ʻAonga Kotoa pē).

Meʻatokoni Feʻunga KI HA VAHAʻA TAIMI LŌLOA

ʻI he ngaahi fie maʻu taimi lōloa angé pea ʻi he ngaahi feituʻu ʻoku ngofua aí, tātānaki māmālie pē ki hoʻo tukuʻanga meʻakaí ʻaki ha meʻakai ʻe lava ʻo tolonga fuoloá pea ʻe lava ke fakaʻaongaʻi ke ke moʻui aí, hangē ko e uité, laise hinehiná mo e pīní.

ʻE lava ke tolonga e ngaahi meʻá ni ʻo aʻu ki ha taʻu ʻe 30 pe lahi ange ai, ʻi he taimi ʻoku faʻo mo tauhi ai ʻi ha feituʻu mokomoko mo mātuʻú. ʻE lava ke fetongi ha niʻihi ʻo e ngaahi meʻá ni ʻi hoʻo maʻuʻanga meʻatokoni feʻunga mo ha māhina ʻe tolú.

“Fokotuʻutuʻu ʻa kimoutolu; teuteu ʻa e meʻa ʻaonga kotoa pē, pea fokotuʻu ha fale, ʻio ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtua” (T&F 109:8).

Vakai ki he tuʻasila ko e www.providentliving.org ke maʻu mei ai ha fakamatala lahi ange fekauʻaki mo e fakatolonga meʻakai ʻi ʻapí.