Pagpangalagad pinaagi sa Gipalig-on nga mga Korum sa Melchizedek Priesthood ug mga Relief Society

Frequently Asked Questions

Pagpangalagad pinaagi sa Gipalig-on nga mga Korum sa Melchizedek Priesthood ug mga Relief Society

Sulat sa Unang Kapangulohan, 2 Abril 2018: Pagpangalagad pinaagi sa Gipalig-on nga mga Korum sa Melchizedek Priesthood ug mga Relief Society

Pagpangalagad pinaagi sa Gipalig-on nga mga Korum sa Melchizedek Priesthood ug mga Relief Society: Dugang nga Mga Kanunayng Ipangutana

Ang kinabuhi ug pagpangalagad ni Jesus maoy ehemplo sa duha ka dako nga sugo: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” ug “higugmaa ang imong silingan sama sa imong kaugalingon” (Mateo 22:37, 39). Isip mga sakop sa Simbahan sa Manluluwas nga tinuorayng nagtinguha nga mahimo Niyang mga disipulo, kinahanglan nga masunod nato ang Iyang pahimangno sa paghigugma ug pagserbisyo sa atong Amahan sa Langit ug sa Iyang mga anak. “Kon kamo nahigugma kanako kamo mag-alagad kanako,” miingon ang Manluluwas (D&P 42:29). Si Haring Benjamin mitudlo, “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Gi-summarize ni Alma ang atong katungdanan pinaagi sa pagsulat nga, “Sila mibantay ibabaw sa ilang mga katawhan, ug nag-amuma kanila sa mga butang kabahin sa pagkamatarung” (Mosiah 23:18).

Aron ang matag usa kanato matabangan sa pagbuhat sa balaang sugo sa pag-atiman ug pagserbisyo sa uban, gipahibalo sa Unang Kapangulohan ang mosunod nga mga kausaban, nga gituyo aron matutukan ang mga paningkamot sa mga korum sa Melchizedek Priesthood ug mga Relief Society diha sa pagpangalagad sama sa gihimo sa Manluluwas. Kini nga mga kausaban naglakip sa mosunod:

Sa ward nga lebel, usa ka korum sa Melchizedek Priesthood.
Sa stake nga lebel, usa ka korum sa mga high priest.
Ang pagpangalagad mopuli sa home teaching ug visiting teaching.
Pagpaapil sa mga batan-on sa pagpangalagad.

Agig suporta niini nga mga kausaban, ang mga ward ug stake dili na maghimo og mga priesthood executive committee nga miting. Kon may espesyal nga problemang motumaw, sama sa seryusong isyu sa pamilya o dili kasarangan nga hagit sa panginahanglan, pwede ra kining mahisgutan sa gipalapdan nga miting sa bishopric. Ang uban nga dili kaayo sensitibong mga butang pwede rang hisgutan sa ward council. Ang gitawag kaniadto og mga “stake priesthood executive committee nga miting” tawagon na og “mga miting sa high council” (tan-awa sa mga pangutana 8 ug 19 sa ubos).

Sa Ward nga Lebel, Usa Ka Korum sa Melchizedek Priesthood

Mitudlo si Presidente Russell M. Nelson nga ang “pagpadayag dili kinahanglang moabut sa usa ka higayon. Mahimong anam-anam kini.”¹ Ang padayong panghitabo kabahin sa mga korum sa priesthood ug ang nagtubo nga panabut kabahin sa mga yawe sa priesthood naghatag og sundanan sa anam-anam nga pagpadayag. Sa tibuok kasaysayan sa Simbahan, sa kasagaran gipadayag sa Ginoo ang Iyang kabubut-on pagtulun-an human sa pagtulun-an, nga mapadayunong manalangin sa Iyang mga anak uban sa dakong panabut kon unsaon paggamit ang mga baruganan sa ebanghelyo sa kasamtangang mga kahimtang (tan-awa sa D&P 46:15–16).

Sulod sa mga katuigan, ang Unang Kapangulohan ug ang Korum sa Napulog Duha ka mga Apostoles mikonsiderar sa mga kausaban nga gihulagway sa ubos. Pinaagi lamang sa daghang pag-ampo, mainampingong pagtuon sa pundasyon sa kasulatan mahitungod sa mga korum sa priesthood, pagkahiusa sa presiding nga mga lider sa Simbahan, ug kumpirmasyon nga mao kini ang kabubut-on sa Ginoo, ang mga lider mipadayon pinaagi sa pag-usab sa estraktura sa mga korum sa ward ug sa lebel sa stake, nga naghimo niini nga usa ka dugang nga lakang aron mapadayon ang pagpahitabo sa Pagpahiuli.

1. Unsa ang mga kausaban sa high priest group ug elders quorum sa ward?

Sa mga ward, ang mga sakop sa mga elders quorum ug mga high priest group karon itipon na sa usa ka korum nga may usa ka presidency. Kini nga korum, nga miuswag sa gidaghanon ug pagkahiusa, tawagon nga “elders quorum,” ug ang high priests group sa ward walaon na.

Ang elders quorum maglakip sa tanang elder ug mga prospective elder [gilauman nga mahimong elder] sa ward ug mga high priest kinsa kasamtangang wala magserbisyo sa bishopric, sa stake presidency, sa high council, o isip mga naglihok nga patriyarka.

2. Unsaon sa pag-organisar ang presidency sa elders quorum?

Ang stake president, inabagan sa iyang mga counselor, mo-release sa kasamtangang mga lider sa high priest group ug mga presidency sa elders quorum. Dayon ang stake president motawag og bag-ong presidente sa elders quorum diha sa matag ward, ug ang stake president, gi-assign nga counselor sa stake presidency, o gi-assign nga high councilor motawag sa mga counselor nga gi-rekomendar nga moserbisyo sa presidency sa elders quorum. Ang bag-ong presidency sa elders quorum mahimong maglakip sa mga elder ug mga high priest, sa managlahing pangidaron ug kasinatian, nga magtinabangay sa pagserbisyo diha sa usa ka presidency sa korum. Ang usa ka elder o high priest pweding moserbisyo isip presidente sa korum o isip counselor.²

3. Kinsa ang modumala sa buluhaton sa presidente sa elders quorum?

Ang presidente sa elders quorum direktang responsable ngadto sa stake president, kinsa maoy mohatag og training ug giya gikan sa stake presidency ug pinaagi sa high council. Ang bishop, isip presiding high priest sa ward, regular usab nga makigkita sa presidente sa elders quorum. Ang bishop makigtambag kaniya ug mohatag og tukmang direksyon kon unsaon nga makaserbisyo ug makapanalangin og maayo sa mga miyembro sa ward, nga magkatambayayong sa tanang organisasyon sa ward. (Tan-awa sa Handbook 2, 7.3.1.)

4. Kini nga mga kausaban sa estraktura sa korum mousab ba sa katungdanan [office] sa priesthood nga gihuptan sa mga sakop sa korum?

Dili. Ang mga elder magpabiling mga elder ug ang mga high priest magpabiling mga high priest kon hisgutan ang ilang katungdanan sa priesthood. Hinoon, ang mga elder padayon nga i-orden sa pagka-high priest kon tawagon sila ngadto sa stake presidency, high council, o bishopric—o sa ubang panahon nga ideterminar sa stake president pinaagi sa mainampuong konsiderasyon ug inspirasyon.

5. Ang usa ka ward pwede bang dunay sobra sa usa ka elders quorum?

Oo. Sigun sa gitudlo sa Doktrina ug mga Pakigsaad 107:89, kon ang usa ka ward may dili kasarangan nga gidaghanon sa mga aktibong naghupot sa Melchizedek Priesthood, mahimo rang moorganisar ang mga lider og sobra sa usa ka elders quorum. Sa ingon niini nga sitwasyon, ang matag korum adunay resonable nga balanse base sa pangidaron, kasinatian, ug katungdanan sa priesthood ug kalig-on.

6. Sa unsa nga korum maapil ang mga sakop sa kapangulohan sa templo, misyon, ug missionary training center?

Kini nga mga kaigsoonan sakop sa elders quorum sa ilang ward.

Sa Stake nga Lebel, Usa Ka High Priest Quorum

7. Unsa ang mga kausaban sa high priest quorum sa stake?

Ang stake presidency padayong magserbisyo isip presidency sa high priest quorum sa stake. Ang mga sakop niana nga korum kadto lang mga high priest nga kasamtangang nagserbisyo sa stake presidency, sa mga bishopric, sa high council, ug isip naglihok nga mga patriyarka. Ang mga ward ug stake clerk ug mga executive secretary dili mga sakop sa high priest quorum.

Ang mga sakop sa high priest quorum sa stake sa kasagaran makigtagbo kauban sa elders quorum kon dili sila ma-assign sa laing dapit.

8. Unsa ang tahas sa high priest quorum sa stake?

Diha sa ilang tahas sa pag-preside, makigtagbo ang stake presidency sa mga sakop sa high priests quorum sa stake kon gikinahanglan aron sa paghatag og training ug pagtabang sa mga sakop sa quorum diha sa ilang mga calling. Ang naa nang daan nga mga miting sa stake nga gipasabut diha sa Handbook 2, seksyon 18.3 magpadayon uban sa mosunod nga mga kausaban:

Ang mga priesthood executive committee nga miting sa stake tawagon na og “mga high council meeting.”
Ang tinuig nga miting sa tanang naorden nga mga high priest sa stake dili na himoon. Hinoon, ang stake presidency mohimo og tinuig nga miting sa high priest quorum sa stake.

9. Unsa ang mga katuyoan sa kausaban sa mga korum sa Melchizedek Priesthood?

Ang pagbaton og usa ka korum sa Melchizedek Priesthood sa ward mohiusa sa tanang naghupot sa priesthood aron matuman ang tanang aspeto sa buhat sa kaluwasan, lakip ang buhat sa templo ug family history nga kaniadto ang lider sa high priest group ang mikoordinar. Nagtugot kini aron ang mga sakop sa korum sa tanang pangidaron ug mga kaagi makabenipisyo gikan sa panglangtaw ug mga kasinatian niadtong anaa sa lahi nga mga ang-ang sa kinabuhi. Makahatag usab kini og dugang nga mga oportunidad nga magiyahan sa eksperyensyado nang mga naghupot sa priesthood ang uban, lakip ang mga prospective elders [gilauman nga mahimong mga elder], bag-ong mga miyembro, mga young adult, ug kadtong mibalik sa pagkaaktibo sa Simbahan.

Kini nga mga kausaban makatabang sa mga elders quorum ug sa mga Relief Society aron magkahiusa sa ilang buhat. Mapasayon usab niini ang koordinasyon sa korum ngadto sa bishopric ug sa ward council. Ug magtugot kini nga madelegar sa bishop ang mas daghang responsibilidad ngadto sa mga presidente sa elders quorum ug sa Relief Society aron siya ug iyang mga counselor makatutok sa nag-una nilang mga katungdanan—ilabi na sa pag-preside sa Aaronic Priesthood ug sa young women.

10. Sa stake, ang mga high priest kinsa nagserbisyo sa kapangulohan sa branch sakop ba sa mga high priest quorum?

Dili. Ang mga high priest nga nagserbisyo sa kapangulohan sa branch sa usa ka stake dili mga sakop sa high priest quorum. Ang mga sakop sa high priest quorum mao lamang kadtong kinsa gitawag sa kapangulohan sa stake, sa bishopric, sa high council, ug isip nag-function nga patriarch kinahanglan nga sila mga high priest.

11. Ang mga elder nga nagserbisyo sa bishopric (sama pananglit, sa young single adult nga stake) sakop ba sa mga high priest quorum?

Dili. Ang mga elder nga nagserbisyo sa bishopric dili mga sakop sa mga high priest quorum.

12. Sa unsang paagi nga ang pagpangalagad magamit ngadto sa mga sakop sa high priest quorum?

Ubos sa direksyon sa ilang bishop, ang nagdumalang high priest sa ward, ang mga sakop sa high priests quorum ug ang ilang mga pamilya adunay tigpangalagad nga mga kaigsoonan nga gi-assign kanila sa ilang elders quorum ug Relief Society.

Tungod kay ang kapangulohan sa stake ug ang bishopric maoy responsable sa tanang miyembro sa stake o ward, kini nga mga kaigsoonan dili kasagaran nga ma-assign isip tigpangalagad nga mga igsoon ngadto sa piho nga mga indibidwal o pamilya. Ang mga high councilor ug nag-function nga mga patriarch mahimong ma-assign, base sa lokal nga mga kahimtang, depende sa stake president. Kon sila i-assign, kini pinaagi sa ilang presidente sa elders quorum ubos sa direksyon sa bishop sa ilang mga ward.

Agig dugang sa ubang importante nga mga responsibilidad sama sa pagka-tigdumalang high priest ug komon nga maghuhukom sa Israel, ang mga bishop adunay piho nga responsibilidad, uban sa ilang mga magtatambag, sa pag-amuma sa mga kabatan-onan. Ang Doktrina ug mga Pakigsaad 107:15 mabasa, “Ang kaobispohan mao ang kapangulohan niini [ang Aaronic] nga pagkapari, ug naghupot sa mga yawe sa sama nga pagtugot.” Handbook 1, 2.2, nag-ingon, “Ang mga sakop sa bishopric magbantay ug mag-amuma sa mga young men ug young women diha sa ward.”

Sa samang paagi, ang stake president, isip nagdumalang high priest sa stake, mao ang “nag-unang espiritwal nga lider diha sa stake” (Handbook 1 1.1.1) ug “magdumala sa buhat sa kaluwasan” (Handbook 1 1.1.2).

Ang Pagpangalagad Mopuli sa Home Teaching ug Visiting Teaching

Sulod sa daghang katuigan, ang mga home teacher ug mga visiting teacher misanong sa mga assignment nga bisitahan ang balay sa matag miyembro kada bulan, mohatag og mensahe, ug motabang kon gikinahanglan. Dili maihap nga oras ang nagahin ug ang walay hinakog nga pagserbisyo nahatag niining talagsaon nga buhat.

Naggikan niana nga debosyon, karon ang mga lider sa Simbahan mohangyo sa mga miyembro nga dugangan ang ilang pagtutok sa Kristohanong pag-alima alang sa uban, sa espirtwal ug sa temporal (tan-awa sa Handbook 2, 3.2.3). Aron mahatagan og gibug-aton kana nga pag-atiman, ang kanhi mga programa sa home teaching ug visiting teaching usa na karon ka komon nga paningkamot nga tawagon og “pagpangalagad,” nga idumala sa mga presidency sa elders quorum ug Relief Society ubos sa direksyon sa bishop.

13. Unsa ang “pagpangalagad”?

Ang Manluluwas mipakita pinaagi sa ehemplo kon unsay ipasabut sa pagpangalagad dihang miserbisyo Siya tungod sa Iyang gugma sa Iyang Amahan ug alang sa matag tawo (tan-awa sa Juan 15:9–10). Gihigugma, gitudloan, giampo, gihupay, ug gipanalanginan Niya kadtong nagpalibut Kaniya, nagdapit sa tanan sa pagsunod Kaniya (tan-awa sa Marcos 8:34). Samtang mangalagad ang mga miyembro sa Simbahan, tinguhaon nila sa mainampuong paagi ang pagserbisyo sama sa Iyang buhaton—sa “paghupay niadto nga nagkinahanglan sa kahupayan,” “pagbantay diha sa simbahan sa kanunay, ug magpaduol ug maglig-on kanila,” “pagduaw sa balay sa matag sakop,” ug tabangan ang matag usa nga mahimong tinuod nga disipulo ni Jesukristo (Mosiah 18:9; D&P 20:51, 53; tan-awa usab sa Juan 13:35).

Samtang mangalagad ang mga miyembro, determinahon nila pinaagi sa komunikasyon ug inspirasyon ang kasagad ug ang matang sa pagkontak nga ilang himoon ngadto sa ilang mga giatiman. Makigtambag sila ug mohimo og report ngadto sa ilang mga lider pinakaminos kausa sa usa ka quarter [tulo ka bulan] bahin sa ilang pagserbisyo ug sa panginahanglan ug kalig-on sa mga tawo nga gipaatiman kanila. I-report sa mga lider kini nga mga interbyu sa pagpangalagad matag quarter; dili na nila i-report ang gidaghanon sa gihimong mga pagbisita o pagkontak sa mga indibidwal ug mga pamilya. Agig dugang, pinaagi sa relasyon [link] sa priesthood ngadto sa matag miyembro, ang mga tigpangalagad nga brother ug sister magporma og usa ka network sa komunikasyon nga magamit sa mga lider panahon sa mga kakuyaw o emerhensya.

14. Unsa man ang itawag niadtong mangalagad?

Ang mga naghupot sa priesthood tawagon og “mga tigpangalagad nga brother,” ug ang mga sister sa Relief Society tawagon og “mga tigpangalagad nga sister.” Sa kinatibuk-an, tawagon lamang sila sa ilang mga ngalan: “Brother Jones” ug “Sister Smith.” Dili sila tawagon nga mga “tigpangalagad.”

15. Unsa ang pagkasusama ug pagkalahi sa pagpangalagad ngadto sa home teaching ug sa visiting teaching?

Ang pagpangalagad susama ra sa home teaching ug sa visiting teaching kay niana ang matag panimalay dunay priesthood nga kaigsoonan—mga tigpangalagad nga brother—nga mangalagad ug moatiman sa pamilya o sa mga indibidwal nga nagpuyo didto (tan-awa sa D&P 20:47, 59). Ang matag hamtong nga sister dunay mga sakop sa Relief Society—tigpangalagad nga sister—aron mangalagad ug moatiman kaniya, nga modugang sa paghatag og gibug-aton ang pagpangalagad nga gipaambit sa Kinatibuk-ang Kapangulohan sa Relief Society sukad niadtong Enero 2018 (tan-awa sa “Kontaka Siya Bisan Unsang Orasa, Bisan Asa, Sa Bisan Unsang Paagi,” Liahona, Ene. 2018, 7).

Agig dugang, ang pipila ka mga rekisito sa home teaching ug sa visiting teaching giusab sa pagtabang sa mga miyembro aron makapangalagad uban sa mas dakong pagtutok nga matubag ang mga panginahanglan. Dili na kinahanglan nga ang mga pagkontak kanunay lang nga pormal nga mga pagbisita. Pweding mahitabo kini sa balay, sa simbahan, o sa bisan unsang kahimtang nga luwas, kombenyente, ug makab-ot. Sama sa gitudlo ni Elder Jeffrey R. Holland: “[Ang] mas importante mao kon giunsa ninyo sa pagpanalangin ug pag-atiman ang mga tawo nga gitugyan kaninyo, nga wala magkinahanglan og piho nga iskedyul o lokasyon. Ang pinakaimportante mao nga inyong gihigugma ang inyong mga tawo ug gituman ang sugo sa ‘pagbantay diha sa simbahan sa kanunay.’”³

Sa ato pa, ang pagpangalagad giniyahan sa Espiritu, mapailin-ilinon kini [flexible], ug gipahaum sa panginahanglan sa matag miyembro.

16. Sa unsang paagi ang pagpangalagad giniyahan sa Espiritu?

Samtang mangalagad ang mga miyembro, magtinguha sila og inspirasyon aron mahibalo sa unsang paagi labing matabangan ang uban ug matubag ang ilang panginahanglan. Ang naka-iskedyul ba nga pagbisita ug regular nga pagpanawag sa gulangon nga sister nga nag-inusara sa pagpuyo makahatag sa koneksyon nga iyang gikinahanglan? Ang pagdapit ba sa usa ka dili aktibong young adult aron mosalmot sa community project maoy mapuslanon kaayong pagkontak? Ang pagsuporta ba sa dula nga soccer sa usa ka batan-on makatabang sa batan-on ug sa iyang ginikanan? Ang pag-text ba og makadasig nga kasulatan ngadto sa tawo makatabang nga mogaan ang iyang palas-anon? Ang mubo nga sulat o card o email makapakita ba og mapuslanong pagpakabana? Unsa kaha ang ipabuhat sa Manluluwas sa Iyang mga sulugoon? Ang pagpangita og dinasig nga mga tubag sa ingon nianang mga pangutana ug ang paggamit sa tanang anaa nga mga pamaagi sa pagkontak ngadto sa gi-assign kanila maoy sentro sa dinasig nga pagpangalagad. Aron mahatag ang Kristohanong pagserbisyo, ang mga tigpangalagad nga brother ug sister dili magsalig sa naka-iskedyul na nga mga pagbisita o sa gitino na nga mga mensahe; mangita sila og inspirasyon ug makigtambag sa mga sakop sa pamilya aron maatiman pag-ayo kadtong gi-assign kanila—gamit ang panahon ug mga kapanguhaan nga anaa kanila.

17. Sa unsang paagi mapailin-ilin [flexible] ang pagpangalagad?

Ang mga tigpangalagad nga brother ug sister dunay oportunidad sa pagbuhat kon unsay mas maayo. Kadtong mga gipaatiman kanila posibling wala magkinahanglan og parehong gidak-on sa atensyon. Sa pakigtambayayong sa bishopric ug sa ward council, ang mga presidency sa elders quorum ug sa Relief Society maghisgot bahin sa mga prayoridad sa mga tigpangalagad nga brother ug sister aron mamatikdan nila kon si kinsa ang nagkinahanglan kaayo kanila. Ang kinatas-ang prayoridad sa kasagaran itutok ngadto sa bag-ong mga miyembro, sa dili kaayo aktibo nga mga miyembro nga tingali ganahang modawat, ug sa uban sama sa mga single parent, mga biyuda, ug mga biyudo. Ang mga lider pwede rang mo-assign og lider sa mga batan-on ngadto sa pamilya nga dunay batan-on nga nagsinati og mga hagit, ug mo-assign dayon sila og mga tigpangalagad nga brother ug sister ngadto sa bag-ong mga kinabig. Mahimo ra silang mo-assign og bisan kinsang sakop sa elders quorum—mga high priest ug mga elders—niana nga pagpangalagad.

Kon angay, usa ka magtiayon ang pweding i-assign ngadto sa pamilya o indibidwal. Agig dugang, ang mga Laurel ug Mia Maid pweding makatampo og dako pinaagi sa pagserbisyo isip mga kompanyon sa mga sister sa Relief Society, mao usab sa mga priest ug mga teacher pinaagi sa pagserbisyo kauban sa mga naghupot sa Melchizedek Priesthood (tan-awa sa ika-22 nga pangutana, sa ubos).

18. Sa unsang paagi ang pagpangalagad gipahaum sa mga panginahanglan sa matag miyembro?

Ang mga tigpangalagad nga brother ug sister magtinguha sa paghimo sa pinakamaayo aron matubag ang indibidwal nga mga panginahanglan. Ang tanang matang sa komunikasyon maanaa alang sa pagsanong sa mga pag-aghat sa Espiritu ug pagtubag sa mga panginahanglan niadtong ilang giserbisyuhan. Ang pagtubag niadto nga mga panginahanglan magsugod sa mainampuong paghunahuna ug pakig-istoryahanay aron makakuha og impormasyon sa mga pamilya ug indibidwal nga gi-assign sa ilaha. Niana nga pagsultihanay ug sa mosunod pang mga pagkontak, maminaw sila sa ilang mga gipangalagaran aron mahibaloan unsay pinakamaayong iserbisyo, ang pagkasagad ug matang sa pagkontak nga ilang gusto, ug ang panginahanglan ug mensahe nga ilang ipaambit. Kadtong mangalagad mosiguro nga tukma ang tanang komunikasyon ngadto sa sakop sa pamilya.

Ang mga tigpangalagad nga brother ug sister magtinguha nga makatabang sa mga indibidwal ug pamilya aron maandam alang sa sunod nilang ordinansa, motuman sa mga pakigsaad nga ilang gihimo, ug makabarug sa ilang kaugalingon. Kini nga tabang maglakip sa pagpaambit og espirituhanong mga mensahe nga ipahaum alang sa indibidwal o pamilya, bisan og ang pagpangalagad sa kasagaran dili usa ka pagpaambit og mensahe nga buluhaton. Ang Liahona dili na magbutang og pihong mga mensahe nga gamiton sa pagpangalagad sa mga kontak.

19. Sa unsang paagi mahiusa sa mga lider sa Melchizedek Priesthood ug Relief Society ang ilang buhat?

Usa ka gipalambo nga abilidad sa pagpangalagad sa uban maoy usa sa tuyo ug natural nga resulta sa gidugang nga kalig-on sa giusab nga estraktura sa mga korum sa priesthood ug sa mosangput nga pakigtambayayong sa Relief Society. Ang pagpangalagad mamahimong usa ka hiniusa nga paningkamot aron matuman ang katungdanan sa priesthood sa “pagduaw sa balay sa matag sakop” ug sa “pagbantay diha sa simbahan sa kanunay, ug magpaduol ug maglig-on kanila” ug sa katuyoan sa Relief Society sa “pagpalambo sa pagtuo ngadto sa Langitnong Amahan ug ni Jesukristo ug sa Iyang Pag-ula; molig-on sa mga indibidwal, mga pamilya, ug mga panimalay pinaagi sa mga ordinansa ug mga pakigsaad; ug molihok nga maghiusa sa pagtabang niadtong nanginahanglan” (D&P 20:47, 53; Handbook 2, 9.1.1).

Sa pagtinabangay ug ubos sa direksyon sa bishop, ang mga presidency sa elders quorum ug Relief Society makabaton og mga oportunidad nga madasig, maorganisar, ug magkahugpong sa pagtinguha nga makabantay ug makaatiman sa matag indibidwal ug pamilya. Ang koordinasyon maglakip sa pagtinabangay sa mosunod nga mga paagi:

Ang mga presidency sa elders quorum morekomendar og mga assignment sa pagpangalagad alang sa mga indibidwal ug mga pamilya sa ward. Ang mga presidency sa Relief Society morekomendar og mga assignment sa pagpangalagad alang sa mga sister sa Relief Society. Kon motumaw ang espesyal nga mga panginahanglan, hisgutan sa mga presidency sa elders quorum ug Relief Society ang pihong mga assignment sa dili pa kini himoong final.
Ang mga presidency sa elders quorum ug Relief Society morekomendar og mga assignment sa pagpangalagad ngadto sa bishop para maaprubahan.
Kon gikinahanglan, ang mga tigpangalagad nga brother ug sister pwede rang maghisgot sa espesyal nga mga kahimtang sa mga indibidwal ug, kon gikinahanglan, mokontak sa ilang mga lider sa quorum o Relief Society alang sa dugang nga tabang ug kapanguhaan.
Ang mga presidency sa elders quorum ug Relief Society mag-abut kada quarter aron hisgutan ang nahibaloang mga panginahanglan sa mga indibidwal ug mga pamilya gikan sa gihimong mga interbyu sa pagpangalagad.
Human niana nga miting, ang mga presidente sa elders quorum ug Relief Society mag-abut kada quarter kauban sa bishop sa paghisgot sa panginahanglan sa mga indibidwal ug mga pamilya.
Sigun sa panginahanglan, ang mga lider sa elders quorum ug Relief Society makigtambag kauban sa ward council bahin sa mga kalig-on ug mga panginahanglan nga nakita atol sa mga interbyu sa pagpangalangad ug maghimo ug lihukon ang mga plano sa pagserbisyo ug pagpanalangin sa mga miyembro sa ward.

Aron mas masayon ang koordinasyon, ang mga ward mag-focus sa mga ward council nga miting ug dili na maghimo og mga priesthood executive committee nga miting. Ang mga butang nga gihisgutan kaniadto sa mga miting sa priesthood executive committe pagahisgutan, kon gikinahanglan, sa gipalapdan nga mga miting sa bishopric, ward council, o sa kada quarter nga miting sa bishop, presidente sa elders quorum, ug presidente sa Relief Society.

20. Unsaon sa pagkadawat sa mga miyembro sa ilang assignment sa pagpangalagad?

Ang mga lider makigtagbo sa mga tigpangalagad nga brother ug sister—mas maayo kon managkompanyon—aron mabahin-bahin ngadto nila ang ilang mga assignment ug matambagan mahitungod sa mga kalig-on, panginahanglan, ug mga hagit niadtong ilang pangalagaran. Kini nga pag-istoryahanay mahitabo atol sa interbyu sa pagpangalagad (tan-awa sa ika-24 nga pangutana, sa ubos) o bisan kanus-a kini gikinahanglan.

21. Unsa ang tahas sa mga pagbisita sa balay?

Tungod sa gidaghanon, distansya, kasiguroan, ug ubang konsiderasyon, ang pagbisita sa matag balay kada bulan posibling dili mahimo o praktikal; hinoon, ang personal nga mga pagbisita mahinungdanon kon kini mahimo man. Sa pagserbisyo sama sa unsay buhaton sa Manluluwas, ang mga tigpangalagad nga brother ug sister mokonsiderar sa tanang posibilidad alang sa pag-atiman ug pagkontak niadtong gi-assign sa ilaha.

22. Ang pagpangalagad ba kanunayng maglakip sa pagpaambit og mensahe?

Dili. Samtang ang mga tigpangalagad nga brother ug sister makaila na sa gi-assign sa ilaha, mahibaloan ra nila ang ilang panginahanglan ug moaghat kanila ang Espiritu Santo sa pagtudlo og usa ka baruganan sa ebanghelyo. Ang usa ka ginikanan pwede usab nga makahangyo og partikular nga hilisgutan alang sa iyang pamilya. Apan ang pinakamaayong “mensahe” mao ang pag-atiman ug kalooy.

23. Sa unsang paagi ma-report sa mga tigpangalagad nga brother ug sister ang ilang mga paningkamot?

Ang mga lider dili na mokolekta og mga report sa nabisitahang mga pamilya ug mga indibidwal sa piho nga bulan. Imbis niini, ang mga tigpangalagad nga brother ug sister dunay oportunidad nga makigtambag sa ilang mga lider sa elders quorum ug Relief Society mahitungod sa mga kahimtang niadtong ilang giserbisyuhan ug sa nagpadayon nilang mga paningkamot sa pagpangalagad. Kini nga pakigtambag mahitabo pinakaminus kada quarter atol sa mga interbyu sa pagpangalagad ug sa bisan unsang dugang nga panahon kon gikinahanglan ang pag-istoryahanay.

24. Unsa ang interbyu sa pagpangalagad?

Ang interbyu sa pagpangalagad himoon (1) alang sa pakigtambag mahitungod sa mga kalig-on, panginahanglan, ug mga hagit sa gi-assign nga mga pamilya ug mga indibidwal, (2) alang sa pagtino unsa nga mga panginahanglan ang makatabang sa quorum, Relief Society, o ward council, (3) alang sa pagkat-on gikan sa mga lider ug madasig sa mga panigkamot sa pagpangalagad.

Pinakaminus kada quarter, makigtagbo sa mga tigpangalagad nga brother ug sister ang mga lider sa elders quorum o Relief Society sa usa ka interbyu sa pagpangalagad, mas maayo kon sa personal ug uban sa ilang kompanyon. Ang magtiayon nga magkaubang mangalagad pweding makigtagbo sa mga lider sa elders quorum o sa Relief Society o sa duha. Taliwala sa mga interbyu, ang mga tigpangalagad nga brother ug sister mosulti sa ubang impormasyon kon gikinahanglan—sa personal o itawag sa telepono, itext, i-email, o sa lahi nga paagi. Isulti nila ang kompidensyal nga impormasyon ngadto lamang sa presidente sa elders quorum o sa Relief Society—o direkta sa bishop.

25. Unsaon sa mga lider sa paghimo og rekord sa mga interbyu sa pagpangalagad?

Ang presidency sa elders quorum ug Relief Society maghimo og rekord sa mga interbyu nga ilang gihimo kauban sa mga tigpangalagad nga brother o sister. Isulat sa mga lider ang bulan sa mga pag-interbyu ug kon si kinsa ang miapil niini. Ireport nila nga nainterbyu na ang usa ka parisan nga kompanyon kon pinakaminus nainterbyu na ang usa ka sakop sa kompanyon atol sa quarter.

Inigka Hulyo 1, 2018, ang mga pag-update sa LDS Tools app ug sa Leader and Clerk Resources diha sa LDS.org magamit na para niana nga pagreport. Ang mga kausaban sa Quarterly Report magamit na usab sa tunga-tunga sa 2018. Ang dugang nga mga detalye alang sa mga lider ug sa mga klerk ipanghatag sa umaabut nga mga pahibalo gikan sa ulohang buhatan sa Simbahan.

26. Unsa ang tahas sa mga tigpangalagad nga mga coordinator ug supervisor [ministering coordinator and supervisor]?

Ang pagtawag og tigpangalagad nga coordinator [ministering coordinator] ug tigpangalagad nga supervisor [ministering supervisor] gihunong na. Kadtong kinsa natawag niini nga mga katungdanan kinahanglan nga i-release.

27. Kinsa ang mopahigayon og mga interbyu sa pagpangalagad?

Ang matag sakop sa kapangulohan sa elders quorum ug Relief Society mopahigayon og mga interbyu sa pagpangalagad. Bisan sa dagko nga ward, makita sa mga lider nga ang mga interbyu madala ra kon ang pipila pagahimuon matag semana sa matag sakop sa kapangulohan. Ang interbyu sa pagpangalagad dili kinahanglan nga dugay aron mahimong epektibo.

28. Kanus-a sa quarter iatol sa mga lider ang pagpahigayon sa mga interbyu sa pagpangalagad?

Ang mga interbyu sa pagpangalagad kinahanglan ipahigayon sa kinatibuk-ang bahin sa matag quarter—ug dili itagana alang sa katapusang semana o katapusang bulan sa quarter. Samtang ang mga lider nagpahigayon og regular nga mga interbyu, ilang makaplagan nga ilang makab-ot ang espiritwal ug temporal nga katuyoan sa pagpangalagad.

Pagpaapil sa mga Batan-on sa Pagpangalagad

29. Unsaon sa pagpaapil sa mga batan-on sa mga buluhaton sa pagpangalagad?

Ang mga lider pweding mopili nga i-assign ang mga Laurel ug mga Mia Maid isip mga kompanyon sa mga sister sa Relief Society, sama nga ang mga priest ug mga teacher karon gi-assign isip mga kompanyon sa mga naghupot sa Melchizedek Priesthood. Ang kabatan-onan makahimo sa pagpaambit sa ilang talagsaong mga gasa ug makatubo sa espirituhanong paagi samtang sila kaubang moserbisyo sa mga hamtong diha sa buhat sa kaluwasan ug samtang makigtambag sila mahitungod niana nga pagserbisyo sa mga interbyu sa pagpangalagad. Agig dugang, ang pagpaapil sa kabatan-onan sa mga buluhaton sa pagpangalagad makadugang nga mahimo ang pag-atiman sa uban pinaagi sa pagpadaghan sa moapil nga mga miyembro. Mapasayon usab ug mapalig-on niini ang mga paningkamot sa mga pamilya samtang ang mga inahan ug mga anak nga babaye—ug mga amahan ug mga anak nga lalaki—magkuyog sa pagserbisyo.

30. Ang usa ba ka batan-on dunay tigpangalagad nga brother ug/o sister nga pihong i-assign diha kaniya?

Dili. Ang batan-ong mga lalaki ug batan-ong mga babaye pangalagaran niadtong kinsa nangalagad sa ilang mga pamilya ug atimanon usab sa ilang mga lider sa Aaronic Priesthood ug Young Women.

31. Mahimo ba nga ang mga young men ug young women ma-assign sa pagpangalagad uban sa hamtong nga mga kompanyon?

Oo. Ang mga sumbanan sa bag-o nga dokumento nga “Paglikay ug Pagresponde sa Pagpang-abuso” nagtugot alang sa tigpangalagad nga mga kompanyon nga ang mga batan-on ma-assign isip mga kompanyon sa mga hamtong. Ang “pagpangalagad” dili makonsiderar nga usa ka “kalihokan” o “klase”, sama sa gipasabot niadto nga mga sumbanan.

Ang lider kinahanglan mogamit sa dinasig nga paghukom sa dihang mag-assign og batan-on isip tigpangalagad nga mga kompanyon. Ang hamtong nga mga kompanyon kinahanglan maglikay og mga sitwasyon nga mahimong masaypan sa pagsabut. Kinahanglan silang magbantay kabahin sa panagsang one-on-one nga mga sitwasyon aron nga ang mga batan-on adunay usa ka luwas ug magantihong kasinatian sa pagpangalagad. Dugang pa, ang kaalam kinahanglan nga gamiton sa dili pag-assign og batan-on sa malisud nga panimalay o mga sitwasyon sa pamilya.

32. Kinahanglan ba nga ang tanang Mia Maid ug Laurel adunay assignment sa pagpangalagad?

Ang mga Mia Maid ug Laurel mahimong dapiton sa pagpangalagad. Ang mga ginikanan ug mga lider makigtinambagay sa matag young woman, ug kon ang iyang mga kahimtang makahimo ug siya andam nga moserbisyo, mahimo siyang mahatagan og assignment sa pagpangalagad. Ang mga young women magsilbing mga kompanyon sa mga sister sa Relief Society.

33. Kinsa ang mohatag sa mga assignment sa pagpangalagad ngadto sa mga batan-on?

Uban sa pagtugot sa bishop, usa ka sakop sa kapangulohan sa Relief Society mopadangat sa mga assignment sa pagpangalagad ngadto sa mga Mia Maid ug Laurel. Ug, uban sa pagtugot sa bishop, usa ka sakop sa kapangulohan sa elders quorum mopadangat sa mga assignment sa pagpangalagad ngadto sa mga teacher ug priest.

Mga Korum ug mga Relief Society

34. Ang pagtutok ba sa elders quorum ug Relief Society makapalig-on sa tahas sa bishop ug sa ward council?

Oo. Ang bishop mao ang nagdumala nga high priest ug “naghatag og giya ug tambag sa ubang mga lider diha sa ward” (Handbook 1, 2.1.1). Siya ang magribyu ug magtugot sa mga assigment sa pagpangalagad. Ubos sa direksyon sa bishop, ang ward council magpadayon sa iyang importanting tahas sa “pagtabang sa mga indibidwal nga makapalig-on sa mga pagpamatuod, makadawat sa makaluwas nga mga ordinansa, maghupot sa mga pakigsaad, ug mahimong mapahinungurong mga sumusunod ni Jesukristo” (Handbook 2, 4.4). Ang gipalig-on nga elders quorum ug Relief Society––girepresentahan sa ilang mga pangulo, kinsa mga sakop sa ward council––makadugang sa kaepiktibo niana nga konseho.

35. Gikinahanglan ba sa kapangulohan sa elders quorum nga mobisita o mo-interbyu sa mga sakop sa korum kausa sa usa ka tuig (tan-awa sa Handbook 2, 7.3.2)––agig dugang sa pagpahigayon og mga interbyu sa pagpangalagad matag-tulo ka bulan?

Oo. Isip kabahin sa ilang kinatibuk-ang mga responsibilidad, ang mga kapangulohan sa elders quorum kinahanglan mo-interbyu sa mga sakop sa korum nga may kalabutan sa tanang katungdanan sa priesthood––lakip na ang kaayohan sa naghupot sa priesthood, iyang asawa, ug iyang pamilya––bisan kausa sa usa ka tuig. Kini nga mga interbyu mahimong pagabuhaton sa tibuok tuig. Kini nga diskusyon kinahanglan dili idungan sa interbyu sa pagpangalagad kon diin ang kompanyon anaa usab.

36. Kinsa ang makatabang sa mga kapangulohan sa elders quorum ug Relief Society nga mapatuman ang buhat sa kaluwasan?

Ang mga kapangulohan sa elders quorum ug Relief Society mahimong mo-organisar og mga sakop aron sa pagtabang nga mapatuman ang buhat kon gikinahanglan. Sama pananglit, sila maghangyo sa mga sakop sa pagpangulo ug pagtabang sa sama nga buhat sa pagserbisyo, temple ug family history, pagpakigbahin sa ebanghelyo, ug welfare.

37. Ang usa ka ward mahimo bang adunay sobra sa usa ka elders quorum o Relief Society?

Oo. Pinasikad sa Doktrina ug mga Pakigsaad 107:89, kon ang usa ka ward may dili kasarangan nga gidaghanon sa mga aktibong naghupot sa Melchizedek Priesthood, mahimo rang moorganisar ang mga lider og sobra sa usa ka elders quorum. Sa ingon niini nga sitwasyon, ang matag korum adunay resonable nga balanse base sa pangidaron, kasinatian, ug katungdanan sa priesthood ug kalig-on. Samang mga baruganan ang magamit ngadto sa Relief Society.

38. Mahimo bang magtawag og dugang mga magtatambag ang elders quorum ug Relief Society aron sa pagtabang sa pagpangalagad?

Dili. Ang presidente adunay duha ka magtatambag. Kon nakita sa mga lider nga ang dugang tabang gikinahanglan, mahimo silang magtinambagay uban sa ilang bishop mahitungod sa pagtawag og usa o mas daghan pang tigpangalagad nga mga secretary. Kining mga tigpangalagad nga mga secretary mahimong ma-assign, sama pananglit, sa pag-iskedyul og mga interbyu sa pagpangalagad ug sa pagtabang sa pag-andam sa quarterly nga report sa mga interbyu.