Auaunaga faatasi ma Korama a le Au Perisitua Mekisateko ma Aualofa ua Faamalosia

O Fesili e Fesiligia Soo

Auaunaga faatasi ma Korama a le Au Perisitua Mekisateko ma Aualofa ua Faamalosia

Tusi a le Au Peresitene Sili, 2 Aperila 2018: Auaunaga faatasi ma Korama a le Au Perisitua Mekisateko ma Aualofa ua Faamalosia

Auaunaga faatasi ma Korama a le Au Perisitua Mekisateko ma Aualofa ua Faamalosia: Fesili Faaopoopo e Fesiligia Soo

Ua faaalia mai i le soifuaga ma le auaunaga a Iesu ia poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” ma “E te alofa atu i lē lua te tuaoi ia pei o oe lava ia te oe” (Mataio 22:37, 39). I le avea ai ma tagata o le Ekalesia a le Faaola o loo mananao moni lava e avea ma Ona soo, e tatau ona tatou mulimuli i Lana apoapoaiga ia alolofa atu ma auauna atu i lo tatou Tama o i le Lagi ma Ana fanau. “Afai e te alofa mai ia te a’u e te auauna mai ia te a’u,” sa fetalai ai le Faaola (MF&F 42:29). Sa aoao mai le Tupu o Peniamina, “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). Sa aoteleina e Alema lo tatou tiute e ala i le tusiaina, “Sa latou leoleo i luga o lo latou nuu, ma fafaga i latou i mea tau i le amiotonu” (Mosaea 23:18).

Ina ia fesoasoani ia i tatou taitoatasi ia tali atu i le tiute paia e tausi ma auauna atu i isi, ua faasilasila atu ai e le Au Peresitene Sili ia fetuunaiga nei, ua mamanuina e taulai atu i taumafaiga a korama a le Au Perisitua Mekisateko ma Aualofa e uiga i le auaunaga e pei ona sa faia e le Faaola. O nei fetuunaiga ua aofia ai mea nei:

I le uarota, e tasi le korama a le au Perisitua Mekisateko.
I le siteki, e tasi le korama a faitaulaga sili.
O le auaunaga (ministering) ua suia ai nei faiaoga o aiga ma faiaoga asiasi.
Ia faaaofia le autalavou i le auaunaga (ministering).

I le lagolagoina o nei fetuunaiga, e le toe faia ai e uarota ma siteki ni fonotaga a komiti a taitai perisitua. Afai e tulai mai ni mataupu faapitoa a uarota, e pei o se mataupu maaleale faaleaiga po o se luitau faaleuelefea e le masani ai, e mafai ona taulimaina i se fonotaga faaumiumi a le au epikopo. O isi mataupu e le maaleale tele e mafai ona taulimaina i le aufono a le uarota. O fonotaga sa ta’ua o “fonotaga a le komiti o taitai perisitua a le siteki” ua ta’ua nei o “fonotaga a aufono maualuga” (tagai i fesili 8 ma le 19 o i lalo).

I le Uarota, e Tasi le Korama a le Au Perisitua Mekisateko

Na aoao mai Peresitene Russell M. Nelson e faapea “e le manaomia ona oo mai faaaliga uma i le taimi e tasi. E mafai ona auaua’i mai.”¹ O mea e faaauau pea ona tutupu e faatatau i korama o le perisitua ma se malamalamaaga faatuputupulaia e uiga i ki o le perisitua e maua ai se mamanu o faaaliga e auaua’i mai pea. I le talafaasolopito atoa o le Ekalesia, e tele lava ina faaali mai e le Alii Lona finagalo i lea fuaiupu ma lea fuaiupu, ma faasolosolo ona faamanuiaina Ana fanau i le malamalamaaga sili atu i le auala e faaaoga ai mataupu faavae o le talalelei i tulaga o loo i ai i le taimi nei (tagai i le MF&F 46:15–16).

I le aluga o se vaitau o tausaga, sa iloiloina ai e le Au Peresitene Sili ma le Korama a Aposetolo e Toasefululua ia fetuunaiga o loo faamatalaina atu i lalo. Ua na o le tele o tatalo, suesuega toto’a o faavae faaletusi paia o korama o le perisitua, finagalo autasi o taitai pulefaamalumalu o le Ekalesia, ma le faamautuuga o le finagalo lea o le Alii, ua agai atu ai nei i luma taitai i le toefaatulagaina o korama i le tulaga faaleuarota ma faalesiteki, i le faia o le isi laasaga lea e tasi i le tupuolaola o le Toefuataiga.

1. O a ni fetuunaiga mo vaega o faitaulaga sili ma korama a toeaina i le uarota?

I uarota, o uso o korama a toeaina ma vaega a faitaulaga sili o le a tuufaatasia nei i le korama e tasi faatasi ai ma le au peresitene e tasi. O lenei korama, o le a faateleina le aofai ma le lotogatasi, o le a faaigoa o le “korama a toeaina,” ma faamutaina ai le vaega a faitaulaga sili.

O le korama a toeaina e aofia ai toeaina uma ma toeaina faaolioli i le uarota faapea ai ma faitaulaga sili o e e le o auauna atu i le au epikopo i le taimi nei, i le au peresitene o le siteki, i fautua maualuga, po o peteriaka o loo galulue.

2. E faapefea ona faatulaga le au peresitene o le korama a toeaina?

O le peresitene o le siteki, e lagolago i ai ona fesoasoani, o le a ia faamaloloina le au taitai vaega o faitaulaga sili o i ai nei ma au peresitene o korama a toeaina. Ona valaauina lea e le peresitene o le siteki se peresitene fou o le korama a toeaina i uarota taitasi, ma o le peresitene o le siteki, se fesoasoani ua tofiaina i le au peresitene o le siteki, po o se fautua maualuga ua toafiaina o le a valaauina fesoasoani ua fautuaina e auauna atu i le au peresitene o le korama a toeaina. O le au peresitene fou o le korama a toeaina e mafai ona aofia ai toeaina ma faitaulaga sili, e eseese le matutua ma le poto masani, e auauna faatasi i le au peresitene e tasi o le korama. E mafai ona auauna atu se toeaina po o se faitaulaga sili e avea ma peresitene o le korama po o se fesoasoani.²

3. O ai e taitaia le galuega a le peresitene o le korama a toeaina?

O le peresitene o le korama a toeaina e tali sa’o i le peresitene o le siteki, o le e tuuina atu aoaoga ma le taitaiga mai le au peresitene o le siteki ma ala mai i fautua maualuga. O le epikopo, i le avea ai ma faitaulaga sili pulefaamalumalu i le uarota, e fono foi e le aunoa ma le peresitene o le korama a toeaina. E fefautuaai le epikopo ma ia ma tuuina atu le taitaiga talafeagai e tusa ai ma le ala sili e auauna atu ai ma faamanuia ia tagata o le uarota, e galulue felagolagoma’i ma faalapotopotoga uma a le uarota. (Tagai i le Tusitaulima 2, 7.3.1.)

4. Pe o lenei fetuunaiga i le faatulagaga o le korama o le a suia ai le tofi o le perisitua o loo umia e uso o le korama?

Leai. E tumau pea toeaiina o toeaiina ma faitaulaga sili o faitaulaga sili e tusa ai ma o latou tofi o le perisitua. Peitai, o le a faaauau pea ona faauuina ia toeaina e avea ma faitaulaga sili pe a valaauina i latou i se au peresitene o le siteki, fautua maualuga, po o le au epikopo—mo isi taimi e fuafuaina ai e le peresitene o le siteki e ala i iloiloga ma le agaga tatalo ma musumusuga.

5. Pe mafai ona sili atu ma le tasi se korama a toeaina i se uarota?

Ioe. I le agaga o le Mataupu Faavae ma Feagaiga 107:89, pe a oo ina i ai se aofaiga tele e le masani ai i se uarota o e umiaina le Perisitua Mekisateko e toaaga, e mafai e taitai ona faatulagaina e sili atu ma le tasi se korama a toeaina. I tulaga faapena, e tatau i korama taitasi ona i ai se paleni talafeagai i tulaga o le matutua, poto masani, ma tofi ma le malosiaga o le perisitua.

6. O le a le korama o lavea ai uso o au peresitene o malumalu, misiona, ma le nofoaga autu e aoaoina ai faifeautalai?

O nei uso o ni sui o korama a toeaina ia latou uarota.

I le Siteki, e Tasi le Korama a Faitaulaga Sili

7. O a fetuunaiga mo se korama a faitaulaga sili i le siteki?

E faaauau pea ona avea le au peresitene o le siteki ma au peresitene o le korama a faitaulaga sili a le siteki. O uso o lena korama ua na o faitaulaga sili o loo auauna atu i le taimi nei i le au peresitene o le siteki, i au epikopo, i fautua maualuga, ma peteriaka o loo galulue. O failautusi ma failautusi faapitoa o uarota ma siteki e le o ni uso o le korama a faitaulaga sili [a le siteki].

O uso o le korama a faitaulaga sili a le siteki o le a fono soo ma le korama a toeaina pe afai e le o tofiaina i nisi valaauga e ese mai ai.

8. O le a le matafaioi a le korama o faitaulaga sili a le siteki?

I lo latou matafaioi pulefaamalumalu, e fono le au peresitene o le siteki ma uso o le korama a faitaulaga sili a le siteki pe a manaomia e tuuina atu aoaoga ma ia fesoasoani i uso o le korama i o latou valaauga. O fonotaga a le siteki o loo i ai i le taimi nei ia o loo faamalamalamaina i le Tusitaulima 2, vaega 18.3 e faaauau pea faatasi ma fetuunaiga nei:

O fonotaga a le komiti taitai o le perisitua a le siteki ua ta’ua o “fonotaga a aufono maualuga.”
O le fonotaga faaletausaga a faitaulaga sili uma ua faauuina i le siteki o le a le toe faia. Peitai, e faia e le au peresitene o le siteki se fonotaga faaletausaga a le korama a faitaulaga sili o le siteki.

9. O a faamoemoega o fetuunaiga i korama o le Perisitua Mekisateko?

O le i ai o se korama se tasi o le Perisitua Mekisateko i se uarota e tuufaatasia ai i latou e umia le perisitua e faataunuu vaega uma o le galuega o le faaolataga, e aofia ai ma galuega o le malumalu ma talafaasolopito o aiga ia na faamaopoopoina talu ai e le taitai vaega o faitaulaga sili. E faatagaina ai uso o le korama o vaitausaga uma ma talaaga ia manuia mai le vaaiga ma aafiaga a i latou i tulaga eseese o le olaga. E maua ai foi avanoa faaopoopo mo e umia le perisitua ua i ai le poto masani e faufautua ai i isi, e aofia ai ma toeaina faaolioli, o uso fou, talavou matutua, ma i latou ua toe toaaga mai i le Lotu.

O nei fetuunaiga o le a fesoasoani i korama a toeaina ma Aualofa e faamaopoopo ai la latou galuega. O le a latou faafaigofieina ai foi le faamaopoopoga a le korama faatasi ma le au epikopo ma le aufono a le uarota. Ma ua mafai ai e le epikopo ona faasafua atu isi mau tiutetauave i peresitene o korama a toeaina ma peresitene o Aualofa ina ia mafai ai ona taulai atu o ia ma ona fesoasoani i o latou tiute autu—aemaise ai le pulefaamalumalu i le Perisitua Arona ma tamaitai talavou.

10. I le siteki, o faitaulaga sili o loo auauna atu i le au peresitene o le paranesi o i latou o ni uso o le korama a faitaulaga sili?

Leai. O faitaulaga sili o loo auauna atu i au peresitene o paranesi i se siteki e le o ni uso o le korama a faitaulaga sili. O uso o le korama a faitaulaga sili ua na o i latou ia o i ai tofiga i le au peresitene o le siteki, i au epikopo, i fautua maualuga, ma o se peteriaka o loo galue lea e manaomia ai i latou e avea ma faitaulaga sili.

11. O toeaina o loo auauna atu i se au epikopo (mo se faataitaiga, i se siteki a talavou nofofua matutua) o ni uso o le korama a faitaulaga sili?

Leai. O toeaiina o loo auauna atu i se au epikopo e le o ni uso o le korama a faitaulaga sili.

12. E faapefea ona faatatau le auaunaga i uso o le korama a faitaulaga sili?

I lalo o le taitaiga a lo latou epikopo, le faitaulaga sili pulefaamalumalu i le uarota, ua tofu uso o le korama a faitaulaga sili ma o latou aiga ma ni uso ma tuafafine o auaunaga ua tofia ia i latou e o latou korama a toeaina ma Aualofa.

Talu ai e nafa au peresitene o siteki ma au epikopo ma tagata uma o le siteki po o uarota, e le mafai ai ona tofia nei uso e avea o ni uso o auaunaga i tagata taitoatasi po o ni aiga patino. O fautua maualuga ma peteriaka o loo galulue e mafai ona tofi, e fua lea i tulaga faalelotoifale, e pei ona fuafuaina e le peresitene o le siteki. Afai e tofia i latou, e faia e lo latou peresitene o le korama i lalo o le taitaiga a le epikopo a lo latou uarota.

E le gata i isi tiutetauave taua e pei o se faitaulaga sili pulefaamalumalu ma se faamasino lautele i Isaraelu, ua i ai i epikopo se tiutetauave faapitoa, faatasi ai ma o latou fesoasoani, e tausia le autalavou. I le Mataupu Faavae ma Feagaiga 107:15 ua faitauina faapea, “O le au epikopo o le au peresitene o lenei perisitua [Arona], ma e umia ki po o le pule o lea lava perisitua.” Tusitaulima 1, 2.2, “O uso o le au epikopo e vaaia ma faafaileleina alii talavou ma tamaitai talavou i totonu o le uarota.”

E faapena foi, o le peresitene o le siteki, i le avea ai ma faitaulaga sili pulefaamalumalu o le siteki, o “le taitai faaleagaga autu i le siteki” (Tusitaulima 1, 1.1.1) ma e “pulefaamalumalu i le galuega o le faaolataga” (Tusitaulima 1, 1.1.2).

Ua Suitulaga e le Auaunaga ia Faiaoga o Aiga ma Faiaoga Asiasi

Mo le tele o tausaga, e tali atu lava faiaoga o aiga ma faiaoga asiasi i tofiga ina ia asiasi atu i le fale o tagata taitoatasi i masina taitasi, tiliva atu se savali, ma fesoasoani i ai pe a manaomia. Ua tuuina atu i ai ni itula le mafaitaulia ma auaunaga le manatu faapito i lenei galuega tele.

I le atiaeina ai i luga o lena tuuto, ua talosagaina ai nei e taitai o le Ekalesia ia tagata o le ekalesia ia faateleina lo latou taulai atu i le tausiga FaaKeriso mo isi, i le faaleagaga ma le faaletino (tagai i le Tusitaulima 2, 3.2.3). Ina ia faamamafaina lena tausiga, o polokalama eseese o faiaoga o aiga ma faiaoga asiasi ua avea nei ma se taumafaiga tuufaatasi ua faasino atu nei i ai o le “auaunaga (ministering),” e vaavaaia e au peresitene o korama a toeaina ma Aualofa i lalo o le taitaiga a le epikopo.

13. O le a le “auaunaga”?

Sa faaali mai e le Faaola e ala i faataitaiga le uiga o le auauna atu a o Ia auauna atu ona o le alofa mo Lona Tama, ma mo tagata taitoatasi (tagai i le Ioane 15:9–10). Sa Ia alofa atu, aoao atu, tatalo mo [isi], faamafanafana atu, ma faamanuia i latou sa siomiaina o Ia, ma valaaulia tagata uma ia mulimuli ia te Ia (tagai i le Mareko 8:34). A auauna atu tagata o le Ekalesia, latou te saili atu ma le agaga tatalo e auauna atu e pei o Ia [faia]—e “faamafanafana atu ia te i latou o e e manaomia le faamafanafanaga,” “leoleo lea i luga o le ekalesia e lē aunoa, ma faatasi ma faamalosi i latou,” “asiasi atu i fale o tagata taitoatasi o le ekalesia,” ma fesoasoani i tagata taitoatasi ia avea ma se soo moni o Iesu Keriso (Mosaea 18:9; MF&F 20:51, 53; tagai foi i le Ioane 13:35).

A auauna atu tagata o le ekalesia, latou te iloiloina e ala i fesootaiga ma musumusuga le tulaga faisoo ma le ituaiga o fesootaiga latou te faia ma i latou o e latou te avatu i ai le tausiga. Latou te fefautuaai ma tuuina atu se tala i o latou taitai ia le itiiti ifo ma le faatasi i le kuata e faatatau i la latou auaunaga ma manaoga ma malosiaga o i latou o e ua valaaulia i latou e tausi. E lipoti mai e taitai nei faatalanoaga faaleauaunaga i kuata taitasi; latou te le toe lipotia maia le aofaiga o asiasiga po o fesootaiga na faia ma tagata taitoatasi ma aiga. Ma le isi, e ala atu i se sootaga faaleperisitua ma tagata taitasi o le ekalesia, e fatu ai e uso ma tuafafine o auaunaga se upega o fesootaiga e mafai e taitai ona faaaoga i se taimi o tulaga lamatia po o faalavelave faafuasei.

14. O le a le ta’uga o i latou e auauna atu?

O e umia le perisitua e faasino i ai o ni “uso o auaunaga,” ma o tuafafine o le Aualofa ua faasino i ai o “tuafafine o auaunaga.” O le tulaga e masani ai, o le a valaauina lava i latou i o latou igoa: “Uso Ioane” ma “Tuafafine Samita.” E le ta’ua i latou o ni “faifeau (ministers).”

15. E faapefea ona tutusa ma eseese foi le auaunaga mai le faiaoga o aiga ma le faiaoga asiasi?

O le auaunaga e tutusa ma faiaoga o aiga ma faiaoga asiasi i na aiga taitasi o le a i ai uso o le perisitua—uso o auaunaga—e auauna atu ma tausi le aiga po o tagata taitoatasi o loo nonofo ai iina (tagai i le MF&F 20:47, 59). O le a i ai tuafafine o le Aualofa mo tuafafine taitasi matutua—tuafafine o auaunaga—e auauna atu ma tausia o ia, ia toe faamalosia ma faamamafa atili i le auaunaga na faasoa mai e le Au Peresitene Aoao o le Aualofa lea na amata mai ia Ianuari 2018 (tagai i le “Fesootai Atu Pea ma Ia i Soo Se Taimi, i Soo Se Nofoaga, i Soo Se Auala,” Ensign po o le Liahona, Ian. 2018, 7).

Ma le isi, o nisi o mea e manaomia mo faiaoga o aiga ma faiaoga asiasi ua fetuunaia e fesoasoani ai i tagata o le ekalesia ia auauna atu ma se taulaiga sili atu i le faafetaia’ia o manaoga. E le tatau ona toe faia ni fesootaiga i taimi uma i ni asiasiga aloaia. E mafai ona faia i le fale, i le falesa, po o se isi lava faatulagaga e saogalemu, talafeagai, ma ausia. E pei ona aoao mai Elder Jeffrey R. Holland: “[O le mea] e sili ona taua, o le auala ua e faamanuiaina ma tausia ai i latou i totonu o lau vaavaaiga, lea e toetoe lava leai ma se fesootaiga na faia i se kalena patino po o se nofoaga patino. O le mea e taua, o lou alofa lea i ou tagata ma lou faataunuuina o le poloaiga ia ‘leoleo i luga o le Ekalesia e le aunoa.’”³

I se faapuupuuga, o le auaunaga e taitaia e le Agaga, e fetuutuunai, ma e fua i manaoga o tagata taitoatasi.

16. E faapefea ona taitaia e le Agaga le auaunaga?

A auauna atu tagata o le ekalesia, latou te saili atu i musumusuga ia iloa po o le a le auala silisili e aapa atu ai i isi ma faafetaia’ia o latou manaoga. Pe o se asiasiga faatulagaina ea ma ni valaau fai soo i le telefoni i se tuafafine matua e nofo na o ia e tuuina atu ai le fesootaiga na te manaomiaina? Pe o se valaaulia ea i se talavou matua ua le toe toaga mai ina ia auai i se galuega fesoasoani i le nuu o se fesootaiga sili lea ona aoga? Pe o le lagolagoina o se taaloga soka a se talavou o le a fesoasoani lea i le talavou ma ona matua? Pe o le tesi atu o se mau e tumu i le faamoemoe i se tasi o le a fesoasoani e faamāmāina ana avega? Pe o le a faaali atu ea e se tusi po o se kata po o se imeli se popolega aoga? O le a le mea e finagalo le Faaola e fai e Ana auauna? O le mauaina o tali musuia i fesili faapena ma le faaaogaina o metotia uma o loo avanoa mo le faia o fesootaiga ma i latou ua tofia i ai i latou, e totonugalemu i aoaoga musuia. Ina ia tuuina atu auaunaga FaaKeriso, e le mafai e uso ma tuafafine o auaunaga ona faalagolago i asiasiga masani po o savali ua muai fuafuaina; latou te sailia musumusuga ma fefautuaai faatasi ma tagata o le aiga ina ia tausia sili i latou ua tofia i ai i latou—e faaaoga ai le taimi ma punaoa ua latou maua.

17. E faapefea ona fetuutuunai le auaunaga?

Ua i ai i uso ma tuafafine o auaunaga le avanoa e fai ai mea e sili ona aoga. O e ua valaauliaina i latou e tausi atonu e le manaomia e i latou taitoatasi se tulaga tutusa o le gauaiga. O le galulue faatasi ai ma le au epikopo ma le aufono a le uarota, au peresitene o le korama a toeaina ma Aualofa e fesootai atua mea faamuamua i uso ma tuafafine o auaunaga ina ia mafai ai ona latou maua se lagona po o ai e sili ona manaomiaina i latou. E tele lava ina tuuina atu le faamuamua aupito maualuga i tagata fou, o tagata ua le toaaga mai o e atonu e sili ona taliaina, ma isi e pei o matua nonofo taitoatasi, fafine ua maliliu tane, po o tane foi ua maliliu ava. E mafai e taitai ona tofia se taitai o le autalavou i se aiga o loo i ai se alii talavou po o se tamaitai talavou o loo oo i ni luitau, ma latou te tofia vave lava uso ma tuafafine o auaunaga i ni tagata fou liliu mai. E mafai ona latou tofia soo se uso o le korama a toeaina—faitaulaga sili po o toeaina—i sea auaunaga.

I nofoaga e talafeagai ai, e mafai ona tofia se ulugalii faaipoipo i se aiga po o se tagata e toatasi. E faaopoopo atu i ai, e mafai foi e Lora ma Maia Maite ona faia ni saofaga taua e ala i le auauna atu o ni soa i tuafafine o le Aualofa, e pei ona faia e ositaulaga ma aoao e ala i le auauna atu faatasi ma e umia le Perisitua Mekisateko (tagai i le fesili 22, o loo i lalo).

18. E faapefea ona fua le auaunaga i manaoga o tagata taitoatasi?

E saili atu uso ma tuafafine o auaunaga e fai mea e sili ona faafetaia’ia ai manaoga o tagata taitoatasi. O loo avanoa ituaiga uma o fesootaiga e tali atu ai i uunaiga a le Agaga ma faafetaia’ia ai manaoga o i latou o loo latou auauna atu i ai. O le faafetaia’ia o na manaoga e amata i iloiloga ma le agaga tatalo atoa ai ma le faia o se talanoaga anoa ma aiga ma tagata taitoatasi ua tofia i ai i latou. I lena talanoaga atoa ai ma fesootaiga e sosoo ai, latou te faalogo atu ai ia i latou o loo latou auauna atu i ai ina ia mafai ona malamalama i le auala sili e auauna atu ai, o le fai soo ma le ituaiga o fesootaiga latou te manaomia, atoa ai ma le manaoga ma le aano o savali latou te faasoa atu. Ia faamautinoa e i latou e auauna atu o fesootaiga uma ma soo se tagata o le aiga, ia talafeagai.

E saili atu uso ma tuafafine o auaunaga e fesoasoani i tagata taitoatasi ma aiga e saunia mo o latou sauniga e sosoo ai, tausi feagaiga ua latou osia, ma ia ola-tutoatasi. O lenei fesoasoani e mafai ona aofia ai ma le faasoaina atu o ni savali faaleagaga ua fetuunaia i se tagata po o le aiga, e ui o le auaunaga e le o se tofiga e faaautu i le faasoa atu o ni savali. O le a le toe aofia ai i le Liahona ma le Ensign ni savali patino ina ia faaaogaina i fesootaiga faaleauaunaga.

19. E faapefea ona tuufaatasia e taitai o le Perisitua Mekisateko ma le Aualofa la latou galuega?

O se tomai ua faaleleia e auauna atu ai i isi o se tasi lea o fua faamoemoeina ma masani ai o le malosiaga faateleina o korama o le perisitua ua toefaatulagaina atoa ai ma le fua mai i le lotogatasi faatasi ma le Aualofa. E avea le auaunaga ma se taumafaiga faamaopoopoina e tasi e faataunuu ai le tiute o le perisitua e “asiasi atu i fale o tagata taitoatasi o le ekalesia” ma ia “leoleo lea i luga o le ekalesia e lē aunoa, ma faatasi ma faamalosi i latou” ma le faamoemoega o le Aualofa ia “faateleina le faatuatua i le Tama Faalelagi ma Iesu Keriso ma Lana Togiola; faamalosia o tagata taitoatasi, aiga, ma auaiga e ala i sauniga ma feagaiga; ma galulue i le lotogatasi e fesoasoani ia i latou e manaomia le fesoasoani” (MF&F 20:47, 53; Tusitaulima 2, 9.1.1).

O le galulue faatasi ma i lalo o le taitaiga a le epikopo, e maua ai e au peresitene o le korama a toeaina ma au peresitene o Aualofa ia avanoa e musuiaina ai, faatulaga ai, ma faamaopoopo ai a o saili atu e leoleo ma tausia tagata taitoatasi ma aiga. O le faamaopoopoga e aofia ai le galulue faatasi i auala nei:

E fautua atu e au peresitene o korama a toeaina ia tofiga faaleauaunaga mo tagata taitoatasi ma aiga o le uarota. E fautua atu e au peresitene o Aualofa ia tofiga faaleauaunaga mo tuafafine o le Aualofa. I nofoaga o loo i ai manaoga faapitoa, e mafai e au peresitene o korama a toeaina ma le au peresitene o Aualofa ona talanoaina ni tofiga patino ae latou te lei faai’ugāfonoina.
E fautua atu e au peresitene o korama a toeaina ma au peresitene o Aualofa ia tofiga faaleauaunaga i le epikopo mo lana faamaoniga.
Pe a manaomia, e mafai e uso ma tuafafine o auaunaga ona talanoaina tulaga faapitoa o tagata taitoatasi ma, pe a talafeagai ai, ia faafesootai o latou taitai faalekorama po o taitai o le Aualofa mo se fesoasoani faaopoopo ma punaoa.
E fono i kuata taitasi le au peresitene o le korama a toeaina ma le au peresitene o le Aualofa e talanoaina manaoga o tagata taitoatasi ma aiga na iloaina e ala i faatalanoaga o auaunaga.
E sosoo ai ma lena fonotaga, e fono faatasi le peresitene o le korama a toeaina ma le peresitene o le Aualofa ma le epikopo e talanoaina manaoga o tagata taitoatasi ma aiga.
Pe a manaomia, e fefautuai faatasi taitai o le korama a toeaina ma le Aualofa faatasi ma le aufono a le uarota e faatatau i malosiaga ma manaoga na faailoaina mai faatalanoaga o auaunaga ma fai ma faamaonia ni fuafuaga e auauna atu ai ma faamanuia tagata o le uarota.

Ina ia faafaigofieina le faamaopoopoga, e taulai atu uarota i fonotaga a le aufono a le uarota ma e le toe faia ni fonotaga a komiti a taitai perisitua. O mea i le lisi o mataupu talanoaina sa taulimaina muamua i fonotaga a le komiti a taitai perisitua o le a talanoaina, pe a manaomia, i fonotaga faaumiumi a le au epikopo, aufono a le uarota, po o fonotaga faalekuata a le epikopo, peresitene o le korama a toeaina, ma le peresitene o le Aualofa.

20. E faapefea ona maua e tagata o le ekalesia a latou tofiga faaleauaunaga?

E fono ia taitai faatasi ma uso ma tuafafine o auaunaga—e sili lava [le fono] o ni soa—e faasoa atu o latou tofiga ma i latou ma fefautuaai e uiga i malosiaga, manaoga, ma luitau o i latou o loo latou auauna atu i ai. O lenei talanoaga e mafai ona faia i se faatalanoaga o auaunaga (tagai i le fesili 24, i lalo ifo) pe i soo se taimi e manaomia ai.

21. O le a le matafaioi o asiasiga i totonu o le aiga?

I le iloaina o le aofaiga, o le mamao, saogalemu, ma isi illoiloga, atonu o le a le mafai pe tino mai foi le faia o se asiasiga i aiga uma i masina uma; ae ui i lea, e taua ia asiasiga patino pe a mafai ona faia. Ina ia auauna atu e pei o le Faaola, e iloilo e uso ma tuafafine o auaunaga ia avanoa uma mo le tausiga ma fesootaiga ma i latou ua tofia i ai i latou.

22. Pe aofia ai i le auaunaga i taimi uma le faasoa atu o se savali?

Leai. A oo ina iloa e uso ma tuafafine o auaunaga i latou ua tofia i ai i latou, latou te iloaina o latou manaoga ma e mafai ona uunaia i latou e le Agaga Paia ia aoao atu se mataupu faavae o le talalelei. E mafai foi e se matua ona talosagaina se autu faapitoa mo lona aiga. Ae o le “savali” aupito silisili lava o le popole ma le agaalofa.

23. E faapefea ona faamaumauina [pe lipoti atu] e uso ma tuafafine o auaunaga a latou taumafaiga?

E le toe aoina e taitai ni lipoti o aiga ma tagata taitoatasi sa asia i se masina faapitoa. Ae, e maua e uso ma tuafafine o auaunaga se avanoa e fefautuaai ai ma o latou taitai o korama a toeaina ma le Aualofa e uiga i tulaga o i latou latou te auauna i ai atoa ai ma a latou taumafaiga faifai pea o auaunaga. O lenei fefautuaaiga faatasi e tupu e le itiiti ifo ma le faakuata i taimi o faatalanoga o auaunaga ma soo se taimi faaopoopo pe a manaomia ai se fesootaiga.

24. O le a le faatalanoaga o auaunaga?

O se faatalanoaga o auaunaga e faia (1) e fefautuaai ai e uiga i malosiaga, manaoga, ma luitau o aiga ma tagata taitoatasi ua tofia i ai, (2) e fuafua ai po o a manaoga e mafai ona fesoasoani i ai le korama, Aualofa, po o le aufono a le uarota, ma le (3) ia aoao mai taitai ma ia faamalosiauina i taumafaiga faaleauaunaga.

Ia le itiiti ifo ma le faakuata, e fono ai uso ma tuafafine o auaunaga faatasi ma se taitai o le korama a toeaina po o le Aualofa i se faatalanoaga o auaunaga, e sili lava le fai ma le tagata, ma faatasi ai ma lana soa. O se ulugalii faaipoipo e auauna atu faatasi e mafai ona fono ma o la taitai o le korama a toeaina po o le Aualofa po o taitai uma e toalua. I le va o faatalanoaga, e fesootai atu e uso ma tuafafine o auaunaga isi faamatalaga pe a manaomia—e faafesagai pe valaau atu i le telefoni, tesi, imeli, po o se isi auala. E na o le peresitene o le korama a toeaina po o le peresitene o le Aualofa e faasoa atu i ai faamatalaga e le faalauaiteleina—pe faasoa sa’o atu i le epikopo.

25. E faapefea ona tausia e taitai se faamaumauga o faatalanoga o auaunaga?

E tausia e le au peresitene o le korama a toeaina ma le au peresitene o le Aualofa se faamaumauga o faatalanoaga latou te faia faatasi ma uso ma tuafafine o auaunaga. E faailoa e taitai le masina e faia ai faatalanoga ma i latou na auai ai. Latou te lipotia se soa na faatalanoaina pe afai e toatasi le sui o le soa na faatalanoaina i le gasologa o le kuata.

E oo atu i le aso 1 o Aokuso, 2018, o faafouga i le polokalama LDS Tools ma i Punaoa mo Taitai ma Failautusi i luga o le LDS.org o le a maua mo ia lipoti. O suiga i le Lipoti Faalekuata o le a maua foi i le ogatotonu o le 2018. O nisi auiliiliga mo taitai ma failautusi o le a tuuina atu i se faasilasilaga o le a aumai mai le laumua o le Ekalesia.

26. O le a le matafaioi o taitai faamaopoopo ma supavaisa o le auaunaga?

O valaauga o taitai faamaopoopo ma supavaisa o le auaunaga ua faamutaina. Ua tatau ona faamaloloina i latou na valaauina i nei tofiga.

27. O ai e faatautaia faatalanoaga o auaunaga?

O sui taitasi o au peresitene o korama a toeaina ma Aualofa e faatautaia faatalanoaga o auaunaga. E oo lava i se uarota tele, o le a iloa e taitai le faigofie o le taulimaina o faatalanoaga pe a faia ni nai [faatalanoaga] i vaiaso taitasi e sui taitasi o le au peresitene. E le manaomia ona faauumi faatalanoaga o auaunaga ina ia lelei ai.

28. O le a le taimi o le kuata e faia ai e taitai ia faatalanoaga o auaunaga?

E mafai ma e tatau ona faia faatalanoaga o auaunaga i le faagasologa o kuata taitasi—ma aua le faapolopoloina mo le vaiaso mulimuli po o le masina mulimuli o le kuata. Ao faia e le aunoa e taitai faatalanoaga, o le a latou iloa ai e mafai ona latou faataunuuina ia faamoemoega faaleagaga ma faaletino o le auaunaga.

Ia Faaaofia le Autalavou i le Auaunaga

29. E faapefea ona faaaofia le autalavou i tofiga faaleauaunaga?

E mafai ona filifili taitai e tofia ia Lora ma Maia Maite e fai ma soa i tuafafine o le Aualofa, e pei ona tofia ia ositaulaga ma aoao i le taimi nei e avea ma soa i e umia le Perisitua Mekisateko. E faasoa mai e le autalavou a latou meaalofa tulagaese ma tuputupu ae faaleagaga a o latou auauna atu faatasi ma tagata matutua i le galuega o le faaolataga a o latou fefautuaai e uiga i lena tautua i faatalanoaga o auaunaga. E faaopoopo atu i ai, o le faaaofiaina o le autalavou i tofiga faaleauaunaga e faateleina ai le aapa atu e tausi isi e ala i le faateleina o le aofai o tagata e auai ai. E mafai foi ona faafaigofieina ai ma faamalosia ai nei taumafaiga i totonu o aiga a o auauna atu faatasi tina ma afafine—ma tama ma atalii.

30. Pe tatau ona tofia faapitoa ni uso ma/po o ni tuafafine o auaunaga i se alii po o se tamaitai talavou?

Leai. O alii talavou ma tamaitai talavou o loo auauna atu i ai i latou o e o loo auauna atu i o latou aiga ma o loo tausia foi e o latou taitai o le Perisitua Arona ma Tamaitai Talavou.

31. E mafai ona tofia alii ma tamaitai talavou e auauna atu ma ni soa matutua?

Ioe. O taiala o loo i le pepa o faamatalaga talu ai nei o le “Puipuia ma le Tali Atu i le Saua” ua faatagaina ai le tofiaina o le autalavou e avea ma soa o auaunaga i tagata matutua. O le “auaunaga” e le o faapea o se “gaoioiga” po o se “vasega,” e pei ona faatatau i ai i na taiala.

E tatau i taitai ona faaaoga le faautautaga musuia pe a tofia le autalavou e avea ma soa o auaunaga. E tatau i soa matutua ona aloese mai tulaga ia e ono ave sese ma le malamalama ai. E tatau ona latou mataalia e faatatau i le mamao i tulaga taitoatasi ina ia maua e le autalavou se aafiaga saogalemu ma tauia i le auaunaga. E le gata i lea, e tatau ona faaaoga le atamai i le aua nei tofia le autalavou i ni aiga faigata po o ni faafitauli faaleaiga.

32. E tatau i Maea Meite ma Lora uma ona maua ni valaauga o le auaunaga?

E mafai ona valaaulia Maea Meite ma Lora e auauna atu. Matua ma taitai ia fefautuaai ma tamaitai talavou taitasi, ma pe a talafeagai ai ma ona tulaga ma ua naunau e auauna atu, e mafai ona tuu atu ia te ia se valaauga o le auaunaga. E auauna atu tamaitai talavou o ni soa i uso o le Aualofa.

33. O ai e faafesootaia valaauga o auaunaga i le autalavou?

Faatasi ai ma se faatagana mai le epikopo, o se uso o le au peresitene o le Aualofa e tuuina atu ia valaauga o auaunaga i Maea Meite ma Lora. Ma, faatasi ai ma le faatagana a le epikopo, e tuuina atu e se uso o le au peresitene o korama a toeaina ni valaauga o auaunaga i aoao ma ositaulaga.

O Korama ma Aualofa

34. Pe o le taulai atu i le korama ma le Aualofa o faamalosia ai le matafaioi a le epikopo ma le aufono a le uarota?

Ioe. O le epikopo o le faitaulaga sili pulefaamalumalu ma e “tuuina atu le taitaiga ma le fautuaga i isi taitai o le uarota” (Tusitaulima 1, 2.1.1). Na te iloiloina ma faamaonia galuega o le auaunaga. I lalo o le taitaiga a le epikopo, e faaauau ai pea e le aufono a le uarota lana matafaioi taua o le “fesoasoani i tagata taitoatasi e fausia a latou molimau, ia maua sauniga faaola, tausia feagaiga, ma avea ma soo faapaiaina o Iesu Keriso” (Tusitaulima 2, 4.4). O le korama a toeaina ma le Aualofa ua faamalosia—lea e fai ai ma sui o latou peresitene, o sui o le aufono a le uarota—o le a faateleina le lelei o lena aufono.

35. E tatau i au peresitene a korama a toeaina ona asiasi atu po o le faatalanoa o uso o le korama e faatasi i le tausaga (tagai Tusitaulima 2, 7.3.2)—e faaopoopo atu i le faia o faatalanoaga o auaunaga faalekuata?

Ioe. I le avea ai ma se vaega o lo latou tiutetauave atoa, e tatau i au peresitene o korama a toeaina ona faatalanoa uso o le korama e faatatau i tiute uma faaleperisitua—e aofia ai le soifua manuia o le e umia le perisitua, lona toalua, ma lona aiga—ia le itiiti ifo ma le faatasi i le tausaga. O nei faatalanoaga e mafai ona faia i le faagasologa o le tausaga. O lenei talanoaga e le tatau ona tuufaatasia ma se faatalanoaga o auaunaga lea e i ai foi ma le soa.

36. O ai e mafai ona fesoasoani i au peresitene o korama a toeaina ma Aualofa e faataunuu le galuega o le faaolataga?

E mafai e au peresitene o korama a toeaina ma le Aualofa ona faatulagaina ni tagata e fesoasoani e faataunuuina le galuega e pei ona manaomiaina. Mo se faataitaiga, e mafai ona latou valaau atu i tagata e taitai ma fesoasoani i sea ituaiga galuega e avea ma se auaunaga, talafaasolopito o le malumalu ma aiga, fefaasoaai o le talalelei, ma le uelefea.

37. Pe mafai ona sili atu ma le tasi se korama a toeaina po o le Aualofa i se uarota?

38. E mafai e peresitene o korama a toeaina ma Aualofa ona valaau ni fesoasoani faaopoopo e fesoasoani i le auaunaga?

Leai. O le peresitene e toalua ona fesoasoani. Afai e silafia e taitai e manaomia se fesoasoani faaopoopo, e mafai ona latou feutagai ma lo latou epikopo e uiga i le valaauina o se tasi po o le sili atu o ni failautusi o le auaunaga. O nei failautusi o le auaunaga e mafai ona tofia, mo se faataitaiga, e faatulaga faatalanoaga o auaunaga ma fesoasoani e saunia se lipoti faalekuata o auaunaga.