Magkinabuhi sa kahayag sa Dios

Mga Taga-Galacia 5:25

Makahimo kamo og mas maayo nga mga pagpili kon klaro ninyong makita ang mga butang. Mao kana nganong importante kaayo ang kahayag: ang kahayag mohimo niining mas sayon nga makita ang husto nga dalan. Ang Langitnong Amahan mihatag kaninyo og paagi nga makadawat sa langitnon nga kahayag—ang gasa sa Espiritu Santo—aron sa pagtabang kaninyo nga klarong makakita sa unsay maayo ug daotan, husto ug sayop.

Mahangtoron nga mga kamatuoran

Sa bunyag mosulod kamo sa usa ka malipayon nga relasyon sa pakigsaad uban sa Langitnong Amahan ug ni Jesukristo. Diha sa templo, mohimo kamo og dugang nga mga pakigsaad nga makapalig-on niana nga relasyon. Matag semana atol sa sakramento, inyong bag-ohon ang inyong mga pakigsaad. Inyong ipahayag ang inyong kaandam sa pagtuman sa mga sugo, ug ang Ginoo mopanalangin kaninyo sa oportunidad nga makabaton sa Espiritu Santo isip inyong kanunay nga kauban. Kini ang usa sa Iyang labing mahinungdanon nga mga gasa kaninyo.

Ang paghimo og maayo nga mga pagpili mopalambo sa inyong abilidad nga mobati sa Espiritu. Adunay daghang maayo ug maanindot nga mga butang dinhi niini nga kalibotan. Sama lang nga ang inyong lawas maapektohan sa unsay inyong kan-on ug imnon, ang inyong hunahuna ug espiritu maapektohan gayod sa unsay inyong basahon, tan-awon, ug paminawon.

Mga pagdapit

Paggahin og panahon alang sa Ginoo kada adlaw. Pagkat-on mahitungod Kaniya. Kanunay nga mohinumdom Kaniya. Pag-ampo ngadto sa inyong Langitnong Amahan. Tun-i ang balaan nga mga kasulatan ug ang mga pulong sa buhi nga mga propeta. Dayon paningkamot nga magpakabuhi sa unsay inyong nakat-onan.

Tinguhaa kana nga makapabayaw, makapadasig, ug makapadapit sa Espiritu. Samtang mohimo kamo og mga pagpili mahitungod kon unsay tan-awon, basahon, paminawon, o apilan, hunahunaa kon sa unsang paagi kini nakaapekto sa inyong pagbati. Nagdapit ba kini og maayo nga mga hunahuna? Palayo sa bisan unsa nga magbugalbugal sa sagrado nga mga butang o kana nga imoral. Ayaw og apil sa bisan unsang makapahinay sa inyong paghukom o sa kasensitibo ngadto sa Espiritu, sama sa kabayolente, ilimnon nga makahubog, ug makadaot nga mga droga. Pagbaton og kaisog sa pagpalong sa usa ka bidyo o dula, pagbiya sa usa ka salida o sayaw, pag-usab sa inyong musika, o pagtalikod gikan sa binsan unsang dili haom sa Espiritu.

Gamita ang social media aron sa pagbayaw. Ang social media mahimong usa ka gamhanan nga himan sa komunikasyon. Kon gamiton ninyo kini, tutoki ang kahayag, hugot nga pagtuo, ug kamatuoran. Ayaw itandi ang inyong kinabuhi sa unsay tingali gisinati sa ubang mga tawo. Hinumdomi nga ang inyong bili naggikan sa pagkahimong usa ka anak sa langitnong mga ginikanan, dili gikan sa social media.

Pagtinguha og maanindot nga mga kasinatian ug tinuod ug malungtaron nga mga relasyon. Pagmabinantayon nga ang inyong paggamit sa teknolohiya ug media dili mohulip sa paggahin og personal nga panahon uban sa pamilya ug mga higala. Ang social media ug ubang teknolohiya mokuha og daghan sa inyong oras nga dili mohatag og dakong bili isip bugti. Pahulay gikan sa birtuwal nga kalibotan, ug pakigkonektar ngado sa mga tawo sa tinuod nga kinabuhi.

Gisaad nga mga panalangin

Mahimo ninyong mabatonan kanunay ang Espiritu uban kaninyo. Ang Espiritu Santo magpamatuod kaninyo bahin sa Langitnong Amahan ug ni Jesukristo. Siya mohupay, mogiya, mopasidaan, ug mobalaan kaninyo. Siya motabang kaninyo nga makaila sa kamatuoran ug makakita sa maayo diha sa kalibotan.

Mga pangutana ug mga tubag

Unsaon nako pagkahibalo kon gibati nako ang Espiritu Santo? Ang pagkat-on nga mahimong makabatyag sa Espiritu nagkinahanglan og praktis, ug pailob. Siya mamulong sa lainlaing tawo sa lainlaing paagi. Ayaw ibaliwala ang yano nga mga butang—ang malinawon nga pagbati nga inyong makuha sa pagpaminaw sa pagpamatuod sa usa ka tawo o ang dili mahimutang nga pagbati nga inyong makuha human makahimo og sayop nga pagpili. Pangitaa sa kasulatan ang lainlaing paagi nga ang Espiritu makig-istorya, pag-ampo mahitungod niini, ug padayon sa pagpangita og mga kahigayonan nga mobati sa Espiritu.

Unsa ang pornograpiya? Nganong kinahanglan nga likayan nako kini? “Ang pornograpiya mao ang paghulagway, gamit ang mga litrato o mga pulong, nga gitumong sa pagpukaw sa sekswal nga mga pagbati. Ang pornograpiya anaa sa daghang matang, lakip ang mga bidyo, mga litrato, mga libro, ug musika. Mahimo usab kini nga mga mensahe o mga imahe nga gipadala tali sa mga higala. Ang pornograpiya motratar sa mga butang nga sagrado—atong pisikal nga mga lawas ug sekswal nga mga pagbati—sa walay pagtahod. Tingali wala tuyoa nga makakita kamo og pornograpiya. Kon makakita kamo og pornograpiya tinuyo man o dili, biya dihadiha dayon. Mahimong makig-istorya kamo sa usa ka ginikanan o sa ubang sinaligan nga hamtong. Ang tinuyo nga pagtan-aw og pornograpiya usa ka pagpakasasala ug makadaot sa inyong abilidad nga mobati sa Espiritu. Kini makapahuyang sa inyong pagkontrolar sa kaugalingon ug motuis sa paagi nga kamo makakita sa inyong kaugalingon ug sa uban. Si Jesukristo adunay gahom sa pagtabang kaninyo sa pagbatok sa pornograpiya ug sa paghinulsol. Dangop ngadto Kaniya; palayo gikan sa kangitngit. Ang inyong bishop makatabang kaninyo nga makadawat og kalig-on ug kapasayloan pinaagi sa Manluluwas.

Tan-awa sa Amos 5:14 (tinguhaa ang maayo); Mga Taga-Galacia 5:22–23 (ang mga bunga sa Espiritu); Moroni 7:18–19 (ang kahayag ni Kristo); Doktrina ug mga Pakigsaad 6:23 (ang Ginoo namulong og kalinaw); 20:77, 79 (ang mga pag-ampo sa sakramento).

Mga pangutana sa rekomend sa templo

Ang Ginoo miingon nga ang tanang butang kinahanglang “himo[on] nga limpyo” sa Iyang atubangan (Doktrina ug mga Pakigsaad 42:41). Ikaw ba naningkamot alang sa moral nga kalimpyo sa imong mga hunahuna ug kinaiya? Ikaw ba nagsunod sa balaod sa kaputli?

Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?

Unsay buhaton diha sa higayon

Kon makaplagan ninyo ang inyong kaugalingon nga natintal sa paggamit sa media o teknolohiya sa dili maayo nga mga paagi—kon kini man nag-abog sa Espiritu o gani nag-usik lang sa inyong oras—sulayi ang mosunod:

1. Isulti kon unsa ang tinuod nga nahitabo. Itug-an kon unsa ang butang nga natintal ka nga buhaton. Mahimo gani nimo kining isulti og kusog—sama pananglit, “Kini nga hulagway pornograpiya,” “Kini dili husto ang pagbati,” o “Kini makapasakit sa mga pagbati sa usa ka tawo.”

2. Ilisi ang unsay imong gibuhat og mas maayo nga pagpili. Palayo; balhin ngadto sa laing lawak o adto sa gawas. Tutoki ang usa ka butang nga maayo.

3. Pakigkonektar ngadto sa usa ka tawo o usa ka butang nga inyong gimahal ug gitahod—tingali usa ka sakop sa pamilya, usa ka mosuporta nga higala, o sa inyong paborito nga kasulatan. Labaw sa tanan, pakigkonektar sa inyong Langitnong Amahan, ug pag-ampo alang sa kalig-on.

Alang sa dugang nga tabang, tan-awa sa “Kasiguroan sa Media” diha sa Gospel Library.