“Loq’ laa junxaqalil,” Choq’ re Xkawilaleb’ li Saaj: Jun tenq’ re xsik’b’al ru laa b’e (2022)
“Loq’ laa junxaqalil,” Choq’ re Xkawilaleb’ li Saaj
Loq’ laa junxaqalil
1 Korintios 6:18–20
Laa junxaqalil a’an jun chaab’il maatan k’eeb’il aawe xb’aan laa Choxahil Yuwa’. Kixk’e aawe re aatenq’ankil chi wulak jo’ a’an. Laa junxaqalil naxnimob’resi laa wankilal chixsik’b’al ru li b’e taawaj xk’amb’al. Lix evangelio li Jesukristo li k’ojob’anb’il wi’chik naru tatxtenq’a chirilb’al laa junxaqalil jo’ ilb’il xb’aan li Dios. Li na’leb’ a’an naxjal li nakasik’ ru xb’aanunkil rik’in laa junxaqalil ut chan ru nakawil.
Li junelikil yaal
Laa junxaqalil yoʼobʼtesinbʼil joʼ chanru xjalam-uuch li Dios—a’an li ani q’axal loq’ ut nim xwankil sa’ chixjunil choxa ch’och’. Li loq’laj hu naxjuntaq’eeta li qajunxaqalil rik’in li santil ochoch, jun na’ajej nawan wi’ li Musiq’ej. Yaal naq moko tz’aqal ta re ru laa junxaqalil anajwan. A’b’an li yookat chixk’ulb’al rik’in laa junxaqalil naru tatxkawob’resi re naq sa’ junaq kutan taak’ul laa xaqalil li tz’aqalaq re ru, waklijenaq chi yo’yo, ut k’eeb’ilaq xloq’al.
Laa waam a’an lix laq’ab’ankil laa xaqalil ut laa musiq’. Jo’kan ut naq laq’lookeb’ ajwi’ li kawilal sa’ tib’elej ut sa’ musiq’ej. Li Kolonel kixk’utb’esi li Aatin re Chaab’il Na’leb’ re xk’utb’al li na’leb’ chirix rilb’al li junxaqalil—ut re xyeechi’inkil li osob’tesink sa’ tib’elej ut sa’ musiq’ej.
Li saqil eek’ahom re sumalil nim xwankil sa’ lix k’uub’anb’il na’leb’ li Dios re xkawresinkil li sahil wank chi sumsu ut li junelikil junkab’al. Moko maak ta li eek’ahom a’an—loq’ b’an. Jwal loq’eb’ ut nim xwankileb’ li saqil eek’ahom re sumalil, jo’kan naq li Dios kixk’e li chaq’rab’ re saq ru ch’oolej re aakawresinkil chiroksinkileb’ li eek’ahom a’an jo’ kixk’uub’ a’an. Li chaq’rab’ re saq ru ch’oolej naxye naq li Dios naraj naq ka’ajwi’ jun li winq ut jun li ixq li sumsuukeb’ te’xnaw rib’ chi jo’kan. Naab’aleb’ sa’ li ruchich’och’ ink’a’ neke’xpaab’ ut wan naq neke’reetz’u lix chaq’rab’ li Dios, a’b’an li Qaawa’ nokoxb’oq chixtaaqenkil ut chixyu’aminkil jun na’leb’ taqenaq chiru li re li ruchich’och’.
Li b’oqok
Il laa junxaqalil—ut xjunxaqalileb’ laa was aawiitz’in—rik’in oxloq’. Naq nakasik’ ru laa waq’, laa wismal, ut chan ru nakat-ilok, patz’ aawib’, “Ma yookin chixk’eeb’al xloq’al lin xaqalil jo’ jun maatan k’eeb’il xb’aan li Dios?” Li qaChoxahil Yuwa’ naraj naq taqil qib’ chiqib’il qib’ jo’ tz’aqal aniho: moko yal ta tib’elej a’b’an ralal xk’ajol raab’il xb’aan rik’in li junelikil eechanihom. Maawoksi li aq’ej li naxk’eheb’ li kristiaan chirilb’al laa junxaqalil xb’een wa chiru aawilb’al jo’ ralal malaj xrab’in li Dios rik’in laa junelikil eechanihom. Kanab’ naq li saq ru ch’oolej ut laa rahom choq’ re li Dios tatxb’eresi. Sik’ aana’leb’ rik’in laa na’ laa yuwa’.
B’aanu li k’a’ru tixkawob’resi laa junxaqalil—maab’aanu li k’a’ru tixrahob’tesi malaj tixtiq’. Oksi ut b’antioxi re li Dios li k’iila usilal naxk’e. A’b’an chijultiko’q aawe naq li uk’a nakaltesin, li may, li kape, li te, ut eb’ li droga ut wan xkomon chik, moko us ta choq’ re laa junxaqalil chi moko laa musiq’. Wan ajwi’ li chaab’il b’an, jo’ li k’eeb’il xb’aan laj b’anonel, li naru tooxsach wi ink’a’ oksinb’il chi tiik.
K’e xloq’al li wank sa’ sumalej ut eb’ li saqil eek’ahom re sumalil. Ink’a’ us li jot’ok ut li sahilank chirix a’an. Naq moko sumsuukeb’ ta jun winq ut jun ixq, moko us ta xtoch’b’al junjunq xcha’al li tib’elej li loq’eb’, us ta toj wan xt’ikr li kristiaan. Sa’ li nakasik’ ru xb’aanunkil, rilb’al, rilb’al ru, rab’inkil, xk’oxlankil, xyeeb’al, malaj xtaqlankil, maab’aanu yalaq k’a’ru nareek’asi li saqil eek’ahom re sumalil sa’ xch’ool jalan chik li kristiaan malaj sa’ aach’ool laa’at. A’in na’aatinak ajwi’ chirix yalaq paay chi pornografia. Wi wankat sa’ jun na’ajej malaj hoonal b’ar wi’ naniman li aaleek, elen aran. Ak nakanaw k’a’ruheb’ li na’ajej ut hoonal a’an. Ut wi ink’a’ nakanaw, li Musiq’ej, laa na’ aayuwa’, ut eb’ laj jolominel naru tate’xtenq’a chixk’eeb’al reetal. K’ut chiru laa Yuwa’ sa’ Choxa naq nakawoxloq’i li loq’laj wankilal re yo’ob’tesink.
Li osob’tesink yeechi’inb’ileb’
Li oxloq’ nakaweek’a choq’ aawe ut choq’ reheb’ laa was aawiitz’in taanimanq naq nakawoxloq’i laa junxaqalil rik’in laa b’aanuhom, laa wilb’al, ut laa tiqib’aal.
Li Qaawa’ naxyeechi’i xninqal ru b’ihomal re nawom reheb’ li neke’paab’ank re li Aatin re Chaab’il Na’leb’. Jun xaqalil kaw rib’, li maak’a’ k’aytesinb’il wi’, naxnimob’resi ajwi’ laa wankilal chixk’ulb’al li k’ub’tesinb’il na’leb’, chi k’oxlak, ut chi k’anjelak chiru li Qaawa’.
Xyu’aminkil li chaq’rab’ re saq ru ch’oolej naxk’e chi saho’k li Dios ut naxk’e laa musiq’ejil metz’ew. Naq sumsuuqat, li chaq’rab’ a’in tixk’e xnimal li rahok ut junajil sa’ laa sumlajik. Xpaab’ankil li chaq’rab’ a’in naxk’e aak’ulub’ chi xik chi uub’ej chi junelik ut chi wulak jo’ chanru laa Choxahil Yuwa’. Taanimanq lix kawil aach’ool naq nakatb’eek jo’ xtzolom li Jesukristo.
Li patz’ok ut li sumenk
K’a’ru naxye li Dios chirix li tiqib’ank-ib’, li saab’esink-ib’, li tatuaje, ut li kob’ink-ib’? Li Qaawa’ naraj naq taawoxloq’i lix santilal laa junxaqalil, us ta jalanaq aab’aanuhom rik’in li re li ruchich’och’. Kanab’ naq li yaal a’in ut li Musiq’ej te’wanq jo’ aj k’amol aab’e naq nakasik’ ru laa b’e—ut jwal wi’chik rik’in li na’leb’ li naru tixjal laa xaqalil chi junajwa. Chaab’ilaq aana’leb’ ut nimaq aapaab’aal, ut sik’ xna’leb’ laa na’ laa yuwa’ ut eb’ laj jolominel.
Chan ru tinq’axeb’ ru li aaleek ut li ink’a’ us aj b’aanuhom? Laa Choxahil Yuwa’ ut li Jesukristo wan xwankileb’ re aatenq’ankil. Nujob’resi laa yu’am rik’in li k’a’ru naxb’oq li wankilal a’an sa’ laa yu’am, jo’ li tijok, xtzolb’aleb’ li loq’laj hu, ut li k’anjelak chiruheb’ laa was aawiitz’in. Sik’ li Jesukristo ut lix evangelio ut taataw naq li k’a’ru q’un naru taa’ok choq’ metz’ew. Sik’ aatenq’ rik’in laa na’ aayuwa’, eb’ laj jolominel, ut eb’ laj k’ehol na’leb’ wankeb’ xtzolb’al wi na’ajman. Choq’ reheb’ li wankeb’ lix adicion, li Iglees wan xk’anjel chirix usaak chiru li adicion. A’ineb’ osob’tesink k’eeb’il xb’aan lix Iglees li Kolonel re aatenq’ankil chixb’eresinkil wi’chik laa yu’am. A’an naraj hoonal, jo’kan naq wanq aakuyum, ut maakanab’ xyalb’al aaq’e.
Nawulak chiwu li wech winqilal malaj wech ixqilal. K’a’ru neke’xye li na’leb’ a’in chiwix? Moko maak ta reek’ankil a’an chirix laa wech winqilal malaj ixqilal. Wi nakaweek’a chi jo’kan a’ut maak’a’ nakab’aanu chirix, yookat chixpaab’ankil lix santil chaq’rab’ li qaChoxahil Yuwa’ chirix li saq ru ch’oolej. Raab’ilat jo’ ralal malaj xrab’in li Dios ut laa’at jun xtzolom li Jesukristo. Chijultiko’q aawe naq li Kolonel naxtaw ru chixjunil li nakak’ul. Xb’aan li sumwank wankat wi’ rik’in a’an, taataw li metz’ew re xpaab’ankileb’ lix taqlahom li Dios ut chixk’ulb’aleb’ li osob’tesink naxyeechi’i. Paab’ a’an ut lix evangelio.
Xink’ul li muxe’k, ut wan inxutaan. Ma wan inmaak? Xk’ulb’al yalaq paay chi muxe’k ink’a’ naraj naxye naq wan aamaak. B’aanu usilal, matxutaanak. Li Qaawa’ nakatxra. A’an naraj aatenq’ankil, aak’irtesinkil, ut xk’eeb’al tuqtuukilal aawe. Eb’ laj k’ehol na’leb’ wankeb’ xtzolb’al, eb’ laa komon sa’ laa junkab’al, ut eb’ laj jolominel naru ajwi’ neke’tenq’an.
Chi’ilmanq Genesis 1:27 (yo’ob’tesinb’ilo jo’ xjalam-uuch li Dios); Jwan 14:18 (li Kolonel naxyeechi’i xk’ojob’ankil qach’ool); Filipenses 4:7 (lix tuqtuukilal li Dios naxq’ax ru li naqataw ru); Tzol’leb’ ut Sumwank 88:15 (li musiq’ej ut li junxaqalil a’aneb’ li aamej); 89 (li Aatin re Chaab’il Na’leb’); 121:45 (li saq ruhil k’oxlahom tixnimob’resi xkawil qach’ool).
Eb’ li patz’om re li recomendacion re li santil ochoch
Li Qaawa’ xye naq chixjunil li k’a’aq re ru tento taab’aanumanq “chi ch’ajch’o” chiru a’an (Tzol’leb’ ut Sumwank 42:41). Ma nakayal aaq’e re naq saqaq ru aak’oxlahom ut aab’aanuhom? Ma nakapaab’ li chaq’rab’ re li saq ru ch’oolej?
Ma nakataw ru ut ma nakat-ab’ink chiru li Aatin re Chaab’il Na’leb’?