M̧ool enaaj kanemkwoj eok

Jon 8:32

Jemedwōj Ilan̄ ej juon Anij in m̧ool. E ejeļā men otemjeļo̧k. Aolep men rej itok jān E im tōl n̄an E. Kwoj kwaļo̧k ke kwoj kaorōk m̧ool ilo am̧ kappukōt ekkatak, mour kōn m̧ool, im jutak pen kōn ta eo kwojeļā em̧ool—men̄e kwoj aikuj jutak make iaam̧.

M̧ool ko indeeo

Jemedwōj Ilan̄ ej kōņaan bwe leddik ro im ļaddik ro nejin ren ekkatak aolep iien. Ewōr ippom̧ jim̧ōr un ko an mour in im ilo jetōb n̄an kapukōt im iakwe ekkatak. Jeļāļo̧kjeņ ejjab wōt n̄an kōm̧m̧an jāān. Ej m̧ōttanļo̧k kōttōpar eo am̧ indeeo n̄an erom āinwōt Jemedwōj Ilan̄.

Mour kōn m̧ool meļeļein bwe kwoj iakwe m̧ool kōn aolepen būruom̧—eļapļo̧k jān am̧ iakwe aenōm̧m̧an am̧ make, bun̄bun̄, ak limo. Ej meļeļein kōm̧m̧ane ta eo ejim̧we kōnke ejim̧we.

Ewōr ippam̧ juon men eaorōk n̄an kwaļo̧k. Gospel eo an Jisōs Kraist ej kabwijer uwaak ko n̄an kajjitōk ko an mour in. Ej iaļ eo n̄an aenōm̧m̧an im m̧ōņōņō? Kwomaron̄ jab jeļā aolep men, ak kwomaron̄ jeļā ebwe n̄an jipan̄ ro jet meļeļe im kaorōk m̧ool, katak ko n̄an indeeo.

Kūr ko

Ekkatak iien otemjej. Kappukōt iien ko rem̧m̧an n̄an kōlapļo̧k kōlmenļo̧kjeņ eo am̧ im kapeel eo am̧. Iien kein rem̧m̧an remaron̄ koba jeļāļo̧kjeņ ilo jikuuļ ak kaminene ko barāinwōt ekkatak ko jān kein jipan̄ ko kwoj lōke. Kobaik Irooj ilo kijejeto ko am̧, im E naaj tōl eok. Ilo am̧ ekkatak kōn laļ eo ipeļaakūm̧, ekkatak barāinwōt kōn Rilo̧mo̧o̧r, eo ekar kōm̧anm̧an laļin. Ekkatak kōn mour im ekkatak ko An. Kōm̧m̧an bwe jemenere, institute, im ekkatak kōn gospel eo ej m̧ōttan ļo̧k am̧ ekkatak ilo aolepān mour eo am̧.

Iakwe m̧ool eo eļap jon̄an kwoban kōņaan koot, riab, anōk, ak po ilo jabdewōt wāween—ilo jikuul, ilo jerbal, online, ak jabdewōt jikin. Kwon ejja rikaļoor eo wōt an Jisōs Kraist etiljek ilo ijoko ewōr armej ie im ilo ittiņo jim̧ōr.

Erom̧ juon meram n̄an ro jet. Kōtļo̧k bwe naan im m̧akūtkūt ko am̧ ren kwaļo̧k tōmak eo am̧ ilo Jisōs Kraist. Kōppopo kiiō n̄an iien ko rem̧m̧an ilju im jekļaj n̄an kwaļo̧k kōn gospel eo An aiboojoj, āinwōt juon mijenede im ilo aolepān mour eo am̧. Im pojak n̄an ba n̄an jabdewōt eo ej kajjitōk ippam̧ kōn kōjatdikdik im m̧ōņōņō eo kwoj en̄jake.

Kōjeraam̧m̧an ko kar kallim̧ur kaki

Jeļāļo̧kjeņ ej kōlapļo̧k maron̄ eo am̧ n̄an jerbal n̄an Irooj. Ej kōkajoor kwe n̄an kōjeraam̧m̧an ro jet, eļaptata baam̧le eo am̧. Jon̄an ļapļo̧k in am̧ ekkatak, enaaj ļapļo̧k am̧ maron̄ kalōk aelon̄ eo an Anij im im̧we laļ in n̄an em̧m̧an eo.

M̧ool ej boktok aenōm̧m̧an im kautiej kōj make. N̄e naan ko am̧ im m̧akūtkūt ko am̧ rej juon wōt ilo m̧ool, kwoj kwaļo̧k ke komaron̄ lōke—jān ro jet im jān Irooj.

N̄e kwoj jutak kōn katak ko an Jisōs Kraist, E ej jutak ippam̧. Ro jet remaron̄ jab errā ippam̧, ak am̧ peran im m̧ool enaaj alikkar. Jekdo̧o̧n n̄e rej ak rejjab ļoore waanjon̄ak ko am̧, naan in kam̧ool ko am̧, lōke, im tōmak ilo Kraist enaaj eddōkļo̧k.

Kajjitōk ko im uwaak ko

Ewōr ke bōd n̄e ej wōr ippād kajjitōk ko kōn Kabun̄ in? Elmen aō maron̄ lo uwaak ko? Kajjitōk ko ad ejjab kōkaļļe in m̧ōjņo̧ ak ejjelo̧k tōmak. Ilo m̧ool, kajjitōk kajjitōk ko remaron̄ jipan̄ kalōk tōmak. Jepļaaktok eo an gospel in ekar jino ke 14 iiō Josep Smith ekar kajiitōk kajjitōk ko kōn tōmak. Kappukot uwaak ko ilo jeje ko rekwojarjar, ilo naan ko an rikanaan ro an Anij, jān ritōl ro am̧, im m̧am̧a im baba ro retiljek, im jān Anij Make. Eļan̄n̄e uwaak ko rejjab kajju itok, lōke bwe kwonaaj ekkatak ļain ioon ļain. Wōnm̧aanļo̧k im mour kōn ta eo em̧ōj am̧ jeļā kadede, im wōnm̧aanļo̧k n̄an kappukot m̧ool.

Elmen aō jutak kōn m̧ool eo ilo aō jab kainepataik ro eoktak tōmak ko aer? Jinoe ilo am̧ lukkuun lale bwe naan ko am̧ im m̧akūtkūt ko am̧ rej im̧we jān iakwe eo an Anij im ajri ro Nejin. Kwaļo̧k kōn gospel ejjab aikuj kōm̧m̧an jān jetōb in akweel ak kōn alikkar, kijenmej, im jouj. Jemaron̄ kwaļo̧k iakwe n̄an ro jet, men̄e kwojjab errā kōn ta ko rej tōmaki.

Lale Matu 5:14–16 (kōtļo̧k bwe meram eo am en romaak); Jon 14:6 (Jisōs ej mool eo); 1 Piter 3:15 (pojak aolep iien n̄an kwaļo̧k kōjatdikdik ilo Kraist); Katak im Bujen ko 88:77–80 (men ko Irooj ekōņaan bwe jān ekkatak); 93:36 (aiboojoj an Anij); 124:15 (mool meļeļein iakwe ta eo ejimwe); 130:18 (jelā eo ad enaaj jerkakpeje ipped n̄e jenaaj jerkakpeje).

Kajjitōk ko ikkijeen mālim n̄an deļon̄e Tampeļ

Kwoj ke kajjieon̄ in m̧ool ilo aolep kōm̧m̧an ko am̧?