O le a faasaolotoina oe e le upumoni

Ioane 8:32

O Le Tama Faalelagi o se Atua o le upumoni. O Ia e silafia mea uma. O upumoni uma e sau mai ia te Ia ma taitai atu ai ia te Ia. Ua e faaalia e te faatauaina le upumoni a o e saili e aoao, ola ma le amiosao, ma tu atu ma le lototoa mo le mea ua e iloa e sao—e tusa lava pe tatau ona e tu na o oe.

Upumoni e Faavavau

E finagalo le Tama Faalelagi i Ona afafine ma atalii ia aoao i taimi uma. Ua ia te oe mafuaaga faaletino ma faaleagaga e saili ai ma fiafia i le aoaoina. O le aotauina e le na o le mauaina o tupe. O se vaega o lau sini e faavavau ia avea atili e faapei o le Tama Faalelagi.

O le ola ma le amiosa’o o lona uiga e te fiafia i le upumoni ma lou loto atoa—e sili atu nai lo lou alofa i le faamafanafanaga faaletagata lava ia, lauiloa, po o le faafaigofieina. O lona uiga o le faia o le mea sao ona e sao.

Ua ia te oe se mea taua e faasoa atu. Ua i ai i le talalelei a Iesu Keriso tali i fesili o le olaga. O le ala i le filemu ma le fiafia. Atonu e te le iloa mea uma, ae ua lava lou iloa e fesoasoani ai i isi ia malamalama ma faatauaina mataupu faavae moni e faavavau.

Valaaulia

Ia aoao i taimi uma. Vaavaai mo avanoa e faalautele ai lou mafaufau ma ou tomai. O nei avanoa e mafai ona aofia ai aoaoga aloaia i le aoga po o aoaoga faalematata faapea foi ma aoaoga le aloaia mai punavai e te faatuatuaina. Faaaofia le Alii i au taumafaiga, ma o le a Ia taialaina oe. A o e aoao e uiga i le lalolagi o siomia ai oe, aoao foi e uiga i le Faaola, o le na foafoaina le lalolagi. Suesue i Lona soifuaga ma aoaoga. Ia avea le seminare, inisitituti, ma suesuega patino o le talalelei o se vaega o lou aoaoina i le olaga atoa.

Ia fiafia tele i le upumoni lea o le a e le manao ai e gaoi, pepelo, kopi, pe taufaasese i soo se itu—i le aoga, i le galuega, i le initoneti, i soo se mea. Ia avea ma soo faamaoni lava e tasi o Iesu Keriso i nofoaga faitele ma faalilolilo.

Ia avea ma malamalama i isi. Ia atagia mai i au upu ma au amioga lou faatuatua ia Iesu Keriso. Saunia nei mo avanoa i le lumanai e faasoa atu ai Lana talalelei mamalu, o se faifeautalai ma i lou olaga atoa. Ma ia saunia e ta’u atu i soo se tasi e fesili atu ia te oe e uiga i le faamoemoe ma le fiafia e te lagonaina.

Faamanuiaga folafolaina

O aoaoga e faateleina ai lou tomai e auauna atu ai i le Alii. E faamalosia ai oe e faamanuia isi, aemaise lava lou aiga. O le tele o lou aoaoina, o le tele foi lena o lou fesoasoani e fausia le malo o le Atua ma tosinaina ai le lalolagi mo le lelei.

O le faamaoni e aumaia ai le filemu ma le faaaloalo o le tagata ia te ia lava. A ogatusa au upu ma faatinoga ma le upumoni, ua e faaalia e mafai ona faatuatuaina oe—e isi tagata ma le Alii.

A e tu atu mo aoaoga a Iesu Keriso, e tu o Ia faatasi ma oe. O isi atonu e le malilie faatasi ma oe, ae o le a matauina lou lototele ma le faamaoni. Pe mulimuli isi pe leai i lau faataitaiga, o le a tuputupu ae lau molimau, talitonuga, ma le faatuatua ia Keriso.

Fesili ma tali

E afaina le i ai o ni fesili e uiga i le Ekalesia? E mafai faapefea ona ou maua ni tali? O le i ai o fesili e le o se faailoga lea o le vaivai po o le leai o se faatuatua. O le mea moni, o le faia o fesili e mafai ona fesoasoani e fausia ai le faatuatua. O le Toefuataiga o le talalelei na amata ina ua fesili atu ma le faatuatua Iosefa Samita e 14 tausaga le matua. Saili tali i tusitusiga paia, i upu a perofeta a le Atua, mai ou taitai ma matua faamaoni, ma mai le Atua lava Ia. Afai e le oo mai tali i le taimi lava lena, ia talitonu o le a e aoaoina lea fuaitau i luga o lea fuaitau. Ola pea i mea ua uma ona e iloa, ma saili pea mo le upumoni.

E mafai faapefea ona ou tu atu mo le mea sa’o e aunoa ma le faatiga ia i latou e ese o latou talitonuga? Amata i le faamautinoaina ua musuia au upu ma faatinoga e ala i le alofa mo le Atua ma Ana fanau. O le faasoaina atu o le talalelei e le tatau ona faia i se agaga o finauga ae ia manino, agamalu, ma le agalelei. E mafai ona e alofa i isi e tusa lava pe e te le ioe i o latou manatu.

Tagai i le Mataio 5:14–16 (ia faasusulu atu lo outou malamalama); Ioane 14:6 (O Iesu o le upumoni); 1 Peteru 3:15 (ia saunia pea lava pea e faasoa atu lou faamoemoe ia Keriso); Mataupu Faavae ma Feagaiga 88:77–80 (o mea e finagalo le Alii tatou te aoaoina); 93:36 (o le mamalu o le Atua o le atamai lea); 124:15 (ao le amiosao o lona uiga o le alofa i le mea sao); 130:18 (o lo tatou atamai o le a tutu faatasi ma i tatou pe a tatou toetutu).

Fesili o le pepa faataga o le malumalu

O e tauivi ina ia faamaoni i mea uma e te faia?