« ឯកសាររៀបចំសម្រាប់សិស្ស មេរៀនទី ២៤ ៖ ព្យាការី យ៉ូសែប ស្ម៊ីធ—អ្នកមើលឆុតជម្រើសម្នាក់ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )
« ឯកសាររៀបចំសម្រាប់សិស្ស មេរៀនទី ២៤ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ
ឯកសាររៀបចំសម្រាប់សិស្ស មេរៀនទី ២៤
ព្យាការី យ៉ូសែប ស្ម៊ីធ—អ្នកមើលឆុតជម្រើសម្នាក់
ព្រះអម្ចាស់បានពិពណ៌នាអំពីយ៉ូសែប ស្ម៊ីធ ថាជា « អ្នកមើលឆុតជម្រើសម្នាក់ » ជាអ្នកដែលនឹងនាំឲ្យមនុស្សមានចំណេះដឹងពីសេចក្តីសញ្ញារបស់ព្រះអម្ចាស់ ( នីហ្វៃទី ៣:៧–៨ ) ។ ប៉ុន្តែ ចាប់តាំងពីការចាប់ផ្តើមនៃការស្តារឡើងវិញ នោះយ៉ូសែប ស្ម៊ីធ បានទទួលស្គាល់អារម្មណ៏របស់លោកថាមិនមានភាពពេញលេញឡើយ ។ នៅពេលអ្នកសិក្សាឯកសារនេះ សូមពិចារណាអំពីរបៀបដែលអ្នកឆ្លើយតបដោយសេចក្តីជំនឿមកពីព្រះអម្ចាស់ ថ្វីបើអ្នកមានភាពទន់ខ្សោយក៏ដោយ ។ ក៏សូមពិចារណាផងដែរអំពីរបៀបដែលអ្នកអាចឆ្លើយតបចំពោះអ្នកទាំងឡាយណាដែលនឹងរិះគន់ដល់យ៉ូសែប ស្ម៊ីធ ដោយសារតែភាពទន់ខ្សោយរបស់លោក ។
ផ្នែកទី ១
តើខ្ញុំអាចរៀនអ្វីខ្លះមកពីយ៉ូសែប ស្ម៊ីធ អំពីសមត្ថភាពរបស់ខ្ញុំដើម្បីបម្រើព្រះអម្ចាស់ ?
កាលពីនៅយុវជនម្នាក់ យ៉ូសែប ស្ម៊ីធ មានអារម្មណ៍ភ័យខ្លាចចំពោះការហៅបម្រើរបស់លោកមកពីព្រះអម្ចាស់ ។ លោកនិយាយពីខ្លួនឯងថា ៖
ខ្ញុំឈរតែម្នាក់ឯង ជាយុវជនដែលមិនបានរៀនសូត្រច្រើន ដើម្បីប្រយុទ្ធនឹងប្រាជ្ញានៃពិភពលោក…ជាមួយនឹងវិវរណៈថ្មីមួយ ។ ( Teachings of Presidents of the Church: Joseph Smith [ឆ្នាំ ២០០៧ ] ទំព័រ ៦០ )
ទោះជាខ្ញុំជាក្មេងម្នាក់ដែលមិនសូវមានគេឯងស្គាល់…ហើយទោះជាកាលៈទេសៈក្នុងជីវិតខ្ញុំ [ គឺ ] ជាយុវវ័យម្នាក់មិនជាអ្វីឲ្យពិភពលោកអើពើ…ជាមនុស្សម្នាក់ដែលត្រូវទ្រាំធ្វើការជារៀងរាល់ថ្ងៃ [ របស់ខ្ញុំ ] ដើម្បីទ្រទ្រង់ជីវិតតិចតួច ។ ( យ៉ូសែប ស្ម៊ីធ—ប្រវត្តិ ១:២២–២៣ )
យ៉ូសែប ស្ម៊ីធ បានគិតថា វា « ចម្លែកណាស់ » ដែល « មនុស្សពីឋានៈខ្ពង់ខ្ពស់បានអើពើ ល្មមនឹងចាក់រុកមនុស្សឲ្យមានគំនិតទាស់នឹងខ្ញុំ ហើយបង្កើតឲ្យមានការបៀតបៀនដ៏ល្វីងជូរចត់ » ( យ៉ូសែប ស្ម៊ីធ—ប្រវត្តិ ១:២២–២៣ ) ។
សូមស្រមៃពីអារម្មណ៍របស់យ៉ូសែប ដែលលោកអាចមាន នៅពេលលោកបកប្រែ នីហ្វៃទី ២ ៣ នៅក្នុងព្រះគម្ពីរមរមន ហើយបានរៀនពីលីហៃថា យ៉ូសែបនៃសាសន៍អេហ្សីបបានព្យាការណ៍ពី « អ្នកមើលឆុតដ៏ជម្រើសម្នាក់ » នៅថ្ងៃចុងក្រោយ ។
សិក្សារៀបចំសម្រាប់ថ្នាក់រៀន
សូមអាន នីហ្វៃទី២ ៣:៧, ១១, ១៣ ។
នៅក្នុងវិវរណៈក្រោយមកទៀត ព្រះអម្ចាស់បានពន្យល់ពីមូលហេតុមួយថា ហេតុអ្វីទ្រង់បានជ្រើសរើស ហើយបានហៅយ៉ូសែបឲ្យធ្វើជាព្យាការីនៃការស្តារឡើងវិញ ៖
ប្រាកដមែន ព្រះអម្ចាស់ទ្រង់មានព្រះបន្ទូលដល់អ្នកគឺ យ៉ូសែប ស៊្មីធ ជាអ្នកបម្រើរបស់យើងថា យើងពេញចិត្តនឹងដង្វាយ…របស់អ្នក…ត្បិតចំពោះការណ៍នេះហើយ ដែលយើងបានលើកអ្នកឡើង ប្រយោជន៍ឲ្យយើងអាចបង្ហាញនូវប្រាជ្ញារបស់យើង តាមរយៈរបស់ដែលខ្សោយនៃផែនដី ។ ( គោលលទ្ធិ និង សេចក្ដីសញ្ញា ១២៤:១ )
ដោយនិយាយអំពីវគ្គបទគម្ពីរចេញពី នីហ្វៃទី ២ ៣ អែលឌើរ ម៉ាកឺស ប៊ី ណាស នៃក្រុមសិបនាក់បានបង្រៀនថា ៖
វាទំនងដូចជាពុំសមហេតុផលសោះដែលព្រះអម្ចាស់តែងតែហៅមនុស្សទន់ខ្សោយឲ្យសម្រេចកិច្ចការមួយដ៏ធំនោះ ។ ប៉ុន្តែអស់អ្នកដែលស្គាល់ពីភាពទន់ខ្សោយរបស់ខ្លួន អាចត្រូវបានជម្រុញដោយភាពទន់ខ្សោយនោះ ដើម្បីស្វែងរកកម្លាំងរបស់ព្រះអម្ចាស់ ។ អស់អ្នកដែលបន្ទាបខ្លួនក្នុងសេចក្តីជំនឿនឹង ត្រូវបានពង្រឹងដោយទ្រង់ ដែលមានអំណាចនៅ លើស្ថានសួគ៌ និងផែនដី ( សូមមើល ម៉ាថាយ ២៨:១៨; ម៉ូសាយ ៤:៩ ) ។
នៅក្នុងយុវវ័យរបស់លោក យ៉ូសែប ស្ម៊ីធ បានទៅរកព្រះអម្ចាស់តាមលក្ខខណ្ឌទាំងនេះ ។…
យ៉ូសែប ស្ម៊ីធ បានពិពណ៌នាខ្លួនឯងជា « ជាក្មេងម្នាក់ដែលមិនសូវមានគេឯងស្គាល់…ជាមនុស្សម្នាក់ដែលត្រូវទ្រាំធ្វើការជារៀងរាល់ថ្ងៃដើម្បីទ្រទ្រង់ជីវិតតិចតួច » ។ ( យ៉ូសែប ស្ម៊ីធ — ប្រវត្តិ ១:២៣ ) ។ លោកបានកើតនៅក្នុងសង្គមថ្នាក់ទាបដែលមានការអប់រំទូទៅមានដែនកំណត់ ។…
យ៉ូសែបបានមានអារម្មណ៍ថា គាត់សោកសៅដែលគាត់ខ្វះខាតការអប់រំខ្លាំងពេក រហូតដល់គ្រាមួយគាត់ធ្លាប់ជាប់នៅក្នុង « គុកតូចង្អៀតដែលវាស្ទើរតែដូច[ ដកស្រង់ពាក្យពិត ]ភាពខ្មៅងងឹតនៃទឹកប៊ិច និងទឹកថ្នាំ ហើយភាសាដែលមិនឥតខ្ចោះ និងខ្ចាត់ខ្ចាយ » ។ ទោះបីជាបែបនេះក្តី ក៏ព្រះអម្ចាស់បានហៅលោកឲ្យបកប្រែព្រះគម្ពីរមរមនដែរ —ទាំងអស់មាន ៥៨៨ ទំព័រដូចដែលបានបោះពុម្ពតាមច្បាប់ដើម—ដែលលោកបានធ្វើមិនដល់ ៩០ ថ្ងៃផង !…
ពិតប្រាកដណាស់ បាវចនានៃព្រះគម្ពីរមរមន—និងជីវិតរបស់ព្យាការី យ៉ូសែប—គឺថា មនុស្សទន់ខ្សោយដែលស្វែងរកព្រះអម្ចាស់ដោយរាបសានៅក្នុងសេចក្តីជំនឿ គឺត្រូវបានធ្វើឲ្យរឹងមាំ ខ្លាំងក្លានៅក្នុងកិច្ចការនៃព្រះអម្ចាស់ ។ ការពង្រឹងនេះនឹងកើតឡើងសូម្បីតែនៅក្នុងរឿងតូចតាចក្តី ។…
…មានមេរៀនផ្ទាល់ខ្លួនផ្សេងជាច្រើនទៀត ៖ ប្រសិនបើយើងនឹងស្គាល់ភាពទន់ខ្សោយរបស់យើង ដូចជាយ៉ូសែបដែរ ហើយទៅរកព្រះអម្ចាស់ក្នុងសេចក្តីជំនឿ អស់ពីដួងចិត្តរបស់យើង ដោយប្តេជ្ញាចិត្តដើម្បីធ្វើតាមព្រះទ័យរបស់ទ្រង់ នោះយើងក៏ត្រូវបានធ្វើឲ្យរឹងមាំចេញពីភាពទន់ខ្សោយរបស់យើងបានដែរ ។ ការណ៍នេះមិនមែនចាំបាច់មានន័យថា ភាពទន់ខ្សោយត្រូវបានលុបចោលពីក្នុងជីវិតរមែងស្លាប់នោះទេ—ប៉ុន្តែវាមានន័យថា បុគ្គលបែបនោះនឹងធ្វើឲ្យរឹងមាំដោយសារព្រះ ។( «Joseph Smith: Strength Out of Weakness » Ensign ខែ ធ្នូ ឆ្នាំ ២០១៧ ទំព័រ ៥៥–៥៦, ៥៨ ) ។
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកអាចរៀនអ្វីខ្លះចេញពីការហៅយ៉ូសែប ស្ម៊ីធ ដោយព្រះអម្ចាស់ ដែលជាជីវិតរមែងស្លាប់មានភាពទន់ខ្សោយ ហើយបន្ទាប់មកពង្រឹងយ៉ូសែបដើម្បីធ្វើកិច្ចការរបស់ទ្រង់ ?
ផ្នែកទី ២
តើអស់អ្នកដែលជិតស្និទ្ធជាមួយយ៉ូសែប ស្ម៊ីធ និយាយអំពីលោក និងបុគ្គលិកលក្ខណៈរបស់លោកថាដូចម្តេចខ្លះ ?
ព្រះអម្ចាស់បានប្រកាសអំពីយ៉ូសែបនៃស្រុកអេហ្សីបថា កូនចៅរបស់លោកនឹងត្រូវបានគេគោរពយ៉ាងខ្លាំងជាព្យាការីនៃការស្តារឡើងវិញ ( សូមមើល នីហ្វៃទី ២:៣–៧ ) ។ ប្រធាន ដាល្លិន អេក អូក នៃគណៈប្រធានទីមួយបានប្រកាសថា ៖
មនុស្សដែលបានស្គាល់យ៉ូសែប ច្បាស់ និងឈរនៅជិតលោកនៅក្នុងការដឹកនាំសាសនាចក្របានស្រឡាញ់ ហើយគាំទ្រលោកជាព្យាការី ។ បងប្រុសរបស់លោក ហៃរុម បានជ្រើសរើសស្លាប់នៅជិតគាត់ ។ យ៉ូហាន ថេលើរ ដែលនៅជាមួយលោកផងដែរនៅពេលលោកត្រូវបានគេធ្វើឃាត បានមានប្រសាសន៍ថា ៖ « ខ្ញុំថ្លែងទីបន្ទាល់នៅចំពោះមុខព្រះ ពួកទេវតា និងមនុស្សទាំងអស់ ថាលោកគឺជាមនុស្សល្អ គួរឲ្យគោរព ជាមនុស្សមានគុណធម៌…— ដែលបុគ្គលិកលក្ខណៈឯកជន និងសាធារណៈរបស់លោកគឺមិនអាចពន្យល់បាន—ហើយថា លោកបានរស់នៅ និងស្លាប់ជាមនុស្សរបស់ព្រះ » ( The Gospel Kingdom [ ឆ្នាំ ១៩៨៧ ] ទំព័រ ៣៥៥, សូមមើលផងដែរ គ.&ស. ១៣៥:៣ ) ។ ព្រិកហាំ យ៉ង់ បានប្រកាសថា « ខ្ញុំគិតថា គ្មានមនុស្សណាម្នាក់ដែលរស់នៅលើផែនដីនេះស្គាល់ [ យ៉ូសែប ស្ម៊ីធ ] ច្បាស់ជាងខ្ញុំនោះទេ លើកលែងតែព្រះយេស៊ូវគ្រីស្ទ ហើយខ្ញុំនិយាយដោយក្លាហានថា គ្មានមនុស្សណាដែលធ្លាប់រស់នៅ ឬកំពុងរស់នៅលើផែនដីនេះល្អជាងយ៉ូសែបនោះឡើយ » ( នៅក្នុង Journal of Discourses ៩:៣៣២ ) ។ ( ដាល្លិន អេក អូក « The Witness: Martin Harris » Ensign ខែ ឧសភា ឆ្នាំ ១៩៩៦ ទំព័រ ៧១ )
ជេន ស្នាឌើរ រីឆាត បានរៀបរាប់ពីបុគ្គលិកលក្ខណៈ និងចរិតលក្ខណៈរបស់យ៉ូសែប ៖
[ យ៉ូសែប ស្ម៊ីធ ] មានចរិតគួរឲ្យស្រឡាញ់បំផុត ដែលជាសំណាងខ្ញុំណាស់ដែលបានជួបលោក ។… ក្នុងនាមជាអ្នកមើលឆុត និងអ្នកទទួលវិវរណៈលោកគ្មានការភ័យខ្លាច និងនិយាយត្រង់ៗ ប៉ុន្តែបន្ទាបខ្លួន គិតថាខ្លួនឯងគ្រាន់តែជាអ្នកនាំពាក្យប៉ុណ្ណោះ ដែលតាមរយៈលោកព្រះបានមានបន្ទូល ។ ក្នុងនាមជាអ្នកដឹកនាំរបស់សមាជិកលោក លោកតែងតែសកម្ម ហើយរីកចម្រើនបំផុត ប៉ុន្តែតែងតែរម្យទម ហើយគិតដល់កាលៈទេសៈ និងការខិតខំរបស់សមាជិកជានិច្ច ។ ( ជេន ស្នាឌើរ រីឆាត នៅក្នុង « Joseph Smith, the Prophet » Young Woman’s Journal ខែ ធ្នូ ឆ្នាំ ១៩០៥ ទំព័រ ៥៥០ )
អ៊ីវីន ហ៊ូលឌីន បានរំលឹកថា ព្យាការីបានពោរពេញដោយសេចក្តីស្រឡាញ់នៃព្រះ ស្រេកឃ្លានដើម្បីលើកតម្កើង និងប្រសិទ្ធពរជ័យដល់អ្នកដទៃ ៖
នៅក្នុងឆ្នាំ ១៨៣៨ យ៉ូសែប និងយុវជនមួយចំនួនបានលេងល្បែងផ្សេងៗនៅខាងក្រៅផ្ទះ ក្នុងនោះក៏មានការលេងបាល់ដែរ ។ អស់មួយស្របក់មក ពួកគេចាប់ផ្តើមហត់ ។ គាត់បានឃើញ ហើយបានហៅពួកគេជុំគ្នា និងនិយាយថា ៖ « តោះ យើងសង់ផ្ទះឈើតូចមួយ » ។ ដូច្នេះពួកគេក៏បានចាប់ផ្តើម យ៉ូសែប និងពួកយុវជនបានសង់ផ្ទះឈើតូចៗឲ្យពួកស្រ្តីមេម៉ាយ ។ នោះគឺជារបៀបរបស់យ៉ូសែបតែងតែជួយគេអស់ពីលទ្ធភាពរបស់ខ្លួន ។។ ( The Juvenile Instructor ថ្ងៃទី ១ ខែ មីនា ឆ្នាំ ១៨៩២ ទំព័រ ១៥៣ )
អេលីស្សា អរ ស្នូ បានសរសេរពីការបន្ទាបខ្លួន និងភាពស្មោះត្រង់របស់ព្យាការី ៖
ខ្ញុំបានស្នាក់នៅជាមួយនឹងគ្រួសារយ៉ូសែប ស្ម៊ីធ ហើយបានបង្រៀននៅសាលាគ្រួសាររបស់លោក ហើយមានឱកាសច្រើនដើម្បីគូសចំណាំ « ដំណើរ និងការសន្ទនាប្រចាំថ្ងៃ » របស់លោក ដែលជាព្យាការីមួយរូបរបស់ព្រះ ហើយពេលខ្ញុំស្គាល់លោកកាន់តែច្បាស់ ខ្ញុំមានអំណរគុណយ៉ាងខ្លាំងចំពោះលោក ។ … នៅក្នុងការប្រជុំធម្មនិដ្ឋានរបស់លោក លោកមានភាពរាបសាដូចជាក្មេងតូចម្នាក់ ។ ( Eliza R. Snow « Sketch of My Life » Relief Society Magazine ខែ មីនា ឆ្នាំ១៩៤៤ ទំព័រ ១៣៦ )
ម៉ារី ហ្វ្រស អ័ដាម បានចាំពីទង្វើល្អមួយរបស់យ៉ូសែប ៖
ពេលយ៉ូសែបធ្វើជាចៅហ្វាយក្រុងណៅវូ មានពួកបរិសុទ្ធម្នាក់ជនជាតិស្បែកខ្មៅឈ្មោះ អាន់ថូនីត្រូវបានគេចាប់ខ្លួនដោយសារលក់សុរានៅថ្ងៃឈប់សម្រាក ដែលខុសនឹងច្បាប់ ។ អាន់ថូនីធ្វើបែបនោះដើម្បីរៃអង្គាសប្រាក់ទិញសេរីភាពរបស់កូនគាត់ដែលជាទាសករនៅភាគខាងត្បូង ។ គាត់បានទិញឥស្សរភាពរបស់ភរិយាគាត់ និងខ្លួនគាត់ ហើយឥឡូវចង់យកកូនមករស់នៅជាមួយនឹងពួកគេ ។ ទោះជាបុព្វហេតុរបស់អាន់ថូនីគឺជាបុព្វហេតុដ៏ស័ក្ដិសមក្ដី ក៏ព្យាការីបានមានប្រសាសន៍ថា « ខ្ញុំសុំទោសអាន់ថូនី ប៉ុន្តែច្បាប់ត្រូវតែគោរព ហើយយើងត្រូវតែធ្វើការពិន័យមួយ » ។ ប៉ុន្តែ « លុះស្អែកឡើង បងប្រុសយ៉ូសែប បានយកសត្វសេះដ៏ល្អមួយទៅឲ្យអាន់ថូនី ដោយប្រាប់គាត់ឲ្យលក់វា ហើយយកប្រាក់ដែលបាននោះទៅលោះយកកូនចុះ » ។ ( « Joseph Smith, the Prophet » Young Woman’s Journal ខែ ធ្នូ ឆ្នាំ ១៩០៦ ទំព័រ ៥៣៨ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នករៀនអ្វីខ្លះអំពីបុគ្គលិកលក្ខណៈរបស់យ៉ូសែប ស្ម៊ីធ មកពីដំណើររឿងរបស់អ្នកដែលស្គាល់លោក ? តើអ្នកមានអារម្មណ៍ និងទីបន្ទាល់យ៉ាងណាខ្លះអំពីព្យាការី យ៉ូសែប ស្ម៊ីធ ?
ផ្នែកទី ៣
តើខ្ញុំគួរតែឆ្លើយតបបែបណា ពេលខ្ញុំជួបនឹងព័ត៌មានអវិជ្ជមានអំពីព្យាការី យ៉ូសែប ស៊្មីធ ?
ទោះជាកិច្ចការរបស់យ៉ូសែប ស្ម៊ីធដើម្បីស្ដារដំណឹងល្អឡើងវិញទើបតែចាប់ផ្ដើមក្ដី ក៏វាត្រូវបានព្យាករថា មនុស្សជាច្រើននឹងនិយាយទាស់នឹងលោក ហើយចោទលោកថាមានទង្វើ និងបំណងអាក្រក់ដែរ ។ យ៉ូសែប ស្ម៊ីធ បានកត់ត្រានៅក្នុងប្រវត្តិរបស់លោកពីការព្យាករមួយដែលបានធ្វើឡើងដោយទេវតាមរ៉ូណៃ ពេលលោកបានលេចមកជួបយ៉ូសែបនៅឆ្នាំ ១៨២៣ ។ នៅគ្រានោះ យ៉ូសែបទើបតែមានអាយុ ១៧ ឆ្នាំប៉ុណ្ណោះ ។
សិក្សារៀបចំសម្រាប់ថ្នាក់រៀន
សូមមើល យ៉ូសែប ស្ម៊ីធ–ប្រវត្តិ ១:៣៣ ។
អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានណែនាំពីវិធីដែលពួកបរិសុទ្ធថ្ងៃចុងក្រោយអាចឆ្លើយតបទៅនឹងការរិះគន់ទាស់នឹងព្យាការី យ៉ូសែប ស៊្មីធ ៖
តើយើងគួរភ្ញាក់ផ្អើលនឹងការនិយាយអាក្រក់ទាស់នឹង [ យ៉ូសែប ស្ម៊ីធ ] ដែរឬទេ ? សាវកប៉ុលត្រូវបានគេហៅថាជាមនុស្សឆ្កួត ហើយឡប់ [ សូមមើល កិច្ចការ ២៦:២៤ ] ។ ព្រះអង្គសង្គ្រោះជាទីស្រឡាញ់របស់យើង ជាព្រះរាជបុត្រានៃព្រះត្រូវបានគេហៅថាជាអ្នកល្មោភស៊ីផឹកច្រើន ហើយមានអារក្សចូល [ សូមមើល ម៉ាថាយ ១១:១៩; យ៉ូហាន ១០:២០ ] ។ …
មនុស្សជាច្រើនដែលបណ្ដេញកិច្ចការនៃការស្ដារឡើងវិញគឺពុំជឿថា តួអង្គសួគ៌ាមានបន្ទូលមកកាន់មនុស្សនៅលើផែនដីនេះឡើយ ។ ពួកគេនិយាយថា វាពុំអាចទៅរួចទេដែលផ្ទាំងចំណារមាសត្រូវបានយកមកឲ្យដោយទេវតាមួយអង្គ ហើយបានបកប្រែដោយព្រះចេស្ដានៃព្រះនោះ ។ ដោយសារតែការពុំជឿនោះហើយ ទើបពួកគេបដិសេធទីបន្ទាល់របស់យ៉ូសែប ស្ម៊ីធភ្លាម ហើយជាអកុសលមានមនុស្សមួយចំនួនតូចបានធ្លាក់ចូលទៅក្នុងការចោទសួរពីជីវិតរបស់ព្យាការី និងពោលពាក្យកុហកពីបុគ្គលិកលក្ខណៈរបស់លោក ។…
ចំពោះសំណួរពីបុគ្គលិកលក្ខណៈរបស់យ៉ូសែប យើងអាចចែកចាយពាក្យរបស់មនុស្សរាប់ពាន់នាក់ដែលបានស្គាល់លោកដោយផ្ទាល់ និងអ្នកដែលបានលះបង់ជីវិតរបស់ពួកគេដើម្បីកិច្ចការដែលលោកបានស្ថាបនាឡើង ។…
យើងអាចរំឭកដល់អ្នកចោទសួរដ៏ស្មោះត្រង់ថា ព័ត៌មានតាមអ៊ិនធើរណែតពុំមានតម្រង« សេចក្ដីពិត » នោះទេ ។ ព័ត៌មានមួយចំនួនគឺពុំពិតឡើយ ទោះជាវាមានភាពគួរឲ្យជឿជាក់ដល់កម្រិតណាក្ដី ។…
យើងអាចរំឭកដល់អ្នកចោទសួរថា ព័ត៌មានមួយចំនួនអំពីយ៉ូសែប ខណៈដែលវាពិត ប្រហែលជាបង្ហាញឡើងចេញពីបរិបទពីជំនាន់ និងស្ថានភាពរបស់លោកផ្ទាល់ ។…
អ្នកជឿម្នាក់ៗត្រូវការការបញ្ជាក់ខាងវិញ្ញាណមួយអំពីបេសកកម្មដ៏ទេវភាព និងបុគ្គលិកលក្ខណៈរបស់ព្យាការីយ៉ូសែប ស្ម៊ីធ ។ រឿងនេះពិតនៅគ្រប់ជំនាន់ ។ សំណួរខាងវិញ្ញាណស័ក្ដិសមនឹងចម្លើយខាងវិញ្ញាណមកពីព្រះ ។
ទីបន្ទាល់មួយអំពីព្យាការីយ៉ូសែប ស្ម៊ីធអាចកើតឡើងចំពោះយើងម្នាក់ៗខុសៗគ្នា ។ វាអាចកើតមក ពេលអ្នកលុតជង្គង់ចុះអធិស្ឋានសូមព្រះឲ្យបញ្ជាក់ថា លោកគឺជាព្យាការីពិត ។ វាអាចកើតមក ពេលអ្នកអានដំណើររឿងនៃការនិមិត្តដំបូងរបស់ព្យាការី ។ ទីបន្ទាល់អាចចាក់ដោតទៅក្នុងព្រលឹងរបស់អ្នក ពេលអ្នកអានព្រះគម្ពីរមរមនម្ដងហើយម្ដងទៀត ។… ដោយមានសេចក្ដីជំនឿ និងចេតនាពិត នោះទីបន្ទាល់របស់អ្នកអំពីព្យាការីយ៉ូសែប ស្ម៊ីធនឹងត្រូវបានពង្រឹងឡើង ។ ( នែល អិល អាន់ឌើរសិន « Joseph Smith » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៨–៣០ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
ហេតុអ្វីអ្នកគិតថា វាមានសារៈសំខាន់ដើម្បីដាក់បញ្ចូលនូវការសិក្សាពីប្រភពមួយដែលគួរឲ្យទុកចិត្តបានជាមួយនឹងការអធិស្ឋាន ពេលស្វែងរកចម្លើយចំពោះសំណួរអំពីយ៉ូសែប ស្ម៊ីធ និងបេសកកម្មជាព្យាការីរបស់លោក ? ហេតុអ្វីក៏អ្នកគិតថា សំណួរអំពីយ៉ូសែប ស្ម៊ីធ និងបេសកកម្មជាព្យាការីរបស់លោកស័ក្ដសិមទទួលចម្លើយខាងវិញ្ញាណមកពីព្រះ ?