Handbooks ac Kunohkohn
1.Placn luhn God ac Ma Kunom nuh ke Orekma in Molwelah ac Ma Pahtpaht

“1. Placn luhn God ac Ma Kunom nuh ke Orekma in Molwelah ac Ma Pahtpaht,” Ma Sulweyucklac ke General Handbook (2023).

“1. Orekma in Molwelah ac Ma Pahtpaht,” Ma Sulweyucklac ke General Handbook

mukul mahsahi lohm se

1.

Placn luhn God ac Ma Kunom nuh ke Orekma in Molwelah ac Ma Pahtpaht

1.0

Ikucslah

Kom pahngonyuck in oruh kuhlwacnsap ke Alu luhn Jisus Kraist luhn Mwet Luhlahlfongi Lal ke Lwen-sahflah. Kuloh nuh sum ke kuhlwacnsap lom. Kom e ahkinsewowoye moul puhs ac puhla engan ke kom kuhlwacnsap ke pwacye.

Handbook se inge e kahsre kom in lutlutkihn ip yohk ke atacl Kraist ac in kahlwem ke ma kunom. Kom e oraclah wo kom fin oracni kuhlwacnsap lom ke Alu uh nuh ke orekma luhn God Pahpah ac Wen Nahtuhl Jisus Kraist.

1.1

Placn in Engan luhn God

Pahpah Inkuhsrao el oraclah placn in engan tuh kuht in eis engankihn mwe insewowo Lal nuhkewa. Luhngse luhn Pahpah pa in sang moul kawihl ac moul ma pahtpaht nuh sin mwet (liye Moses 1:39).

Jisus Kraist el an infulwen placn luhn God. Ke srihpen luhngse pwacye luhn Pahpah Inkuhsrao nuh sesr, El suhpacma Wen Nahtuhl in misac molikuhtlac liki ma koluk ke kihsackuhnlah Lal (liye John 3:16). Ke Iwaclah Lal, Jisus Kraist El oraclah tuh kais sie sesr ma isuslac facluh e tuhfah sifwil moulyak ac eis moul kawihl. Iwaclah Lal oacyacpac oruh in fihsracsr nuh sesr in nwacsnwacslah liki ma koluk ac ekuhlah insiacsr tuh kuht in kuh in eis moul ma pahtpaht ac in sesesslah ke engan.

In eis moul ma pahtpaht, kuht enenuh in “tuhkuh nuh yurin Kraist, ac ahksuwohsyeyucklac Kacl” (Moroni 10:32).

1.2

Orekma in Molwelah ac Ma Pahtpaht

Ke kuht tuhkuh nuh yurin Kraist ac kahsruh sahyac in oruh oacpacna, kuht wi oruh orekma in molwelah ac ma pahpaht luhn God. Orekma se inge kolyuck ke masap fuhlwact luo in luhngse God ac in luhngse mwet tuhlan lasr (liye Matthew 22:37–39).

Orekma in molwelah ac ma pahtpaht siyac kunohkohn muhtahl ahkosr.

Handbook se inge e kahsre kom in kahlwem ke ip yohk srihpac ahkosr ke orekma luhn God inge. Nguhn Muhtahl e kol kom ke kom oruh ma kunom in ahksahfyelah (liye 2 Nephi 32:5).

1.2.1

Moulkihn Wosasuc luhn Jisus Kraist

Moulkihn wosasuc luhn Jisus Kraist pa in:

  • Ahsrosrye luhlahlfongi la ke Kraist, auliyak lwen nuhkewa, oraclah olwelah nuh sin God ke kuht eis akwuck ke molwelah ac ma pahtpaht, ac kampare nuh ke sahflah ke kuht kampare liacng olwelah inge (liye 3.5.1).

  • Eis etack ac lutlutkihn wosasuc luhn Jisus Kraist lohm ah ac ke alu.

  • Muhtacwacack in kuh in sifacna use ma lasr ac sucu lasr, kewana ke nguhn ac mahno.

1.2.2

Kahsruh Elos Suc Enenuh

Kahsruh elos suc enenuh pa nuhke:

  • Kuhlwacnsuhpuh ac muhtwacta nuh yurin kais sie, sucu, kuh u se.

  • Akacsruhi ke kuhfa oasr, pa nuh ke kahsruh luhn Alu, nuh selos suc enenuh.

  • Kahsruh mwet sahyac in kuh in sifacna lac.

1.2.3

Suli Nuhkewa in Eis Wosasuc

Suli nuhkewa in eis wosasuc pa in:

  • Wi oruh orekma luhn misineri ac kuhlwacnsap ekihn misineri.

  • Kahsruh mempucr sasuc kuh tuhfahna fohlohk nuh ke Alu uh in kampare fahsr ke inkacnek in olwelah.

1.2.4

Oracni Sucu Nuh Tok Ma Pahtpaht

Oracni sucu nuh tok ma pahtpaht pa nuhke:

  • Oraclah olwelah ke kuht eis akwuck lasr sifacna.

  • Sokwack mwet misac lasr ac oraclah akwuck kaclos lin tempuhl elos in kuh in oruh olwelah lalos sin God.

  • Fahsr nuh tempuhl pacl nuhkewa, fin kuh, in alu nuh sin God ac oruh akwuck nuh sin tuhlihk Nahtuhl.

1.3

Srihpac luhn Alu uh

Jisus Kraist el akiyac Alu lal in kahsruh kais sie ac sucu in oruh orekma in molwelah ac ma pahtpaht (liye Ephesus 4:11–13; liye pac 2.2 ke handbook se inge). In kahsruh ahkfahsryelah srihpac muhtahl se inge, Alu ac mwet kol kac kahsruh ke:

  • Wal ac ki ke Pristut.

  • Olwelah ac akwuck.

  • Kolyuck luhn Pahluh.

  • Ma Suhmuhslah.

  • Lutlutkihn wosasuc ac kasruh nuh ke luti.

  • Kuhlwacnsap ac inkacnek in kol.

  • U in Mwet Luhlahlfongi.

1.3.1

Wal ac ki ke Pristut.

Ke srihpen pristut, God el ahkfahsryelah orekma in molwelah ac ma pahtpaht. Wal ac ki luhn pristut enenweyuck in kol orekma luhn God fin facluh elos fohlohkihnyuckyak sel Mwet Pahluh Joseph Smith (liye Doctrine and Covenants 110:11–16; 112:30). Ki inge sruokyuck sin mwet kol Alu misenge. Elos pahngon ac sang kuh nuh sin mwet sahyac in kahsruh oruh orekma luhn God (liye Doctrine and Covenants 107:8, 65–67).

1.3.2

Olwelah ac Akwuck

Ke placn luhn Pahpah Inkuhsrao, kuht oraclah olwelah ke kuht eis akwuck ke molwelah ac ma pahtpaht, pa nuh ke pacptais (liye John 3:5; liye pac sapta 18 ke handbook se inge). Olwelah ac akwuck inge yohk srihpac nuh sesr in kuh in oacna God ac in fohlohk weluhl muhta ke acn Sel (liye Doctrine and Covenants 84:19–22).

1.3.3

Kolyuck luhn Pahluh

Yurin mwet pahluh solac Lal, God el fahkwack ma pwacye ac use kolyuck ac mwe sensen (liye Amos 3:7; Doctrine and Covenants 1:4). Mwe kolyuck inge kahsre kuht in utyak ac muhta na ke inkacnek kol nuh ke moul ma pahtpaht.

1.3.4

Ma Suhmuhslah

Ye kol luhn mwet pahluh luhn Leum ac mwet sap, Alu uh kahsruh ac karihngihn kahs luhn God suc oasr ke ma suhmuhslah muhtahl. Ma suhmuhslah fahkwack ke Kraist, luti wosasuc Lal, ac kahsre kuht in asrosrye luhlahlfongi lasr Sel (liye Jacob 7:10–11; Helaman 15:7).

1.3.5

Lutlutkihn Wosasuc ac Kahsruh nuh ke Mwe Luti

Alu uh kahsruh kais sie ac sucu ke ma kunaclos in lutlutkihn ma pwacye ke wosasuc ac luti ma pwacye inge nuh sin mwet in sucu lalos ac mwet sahyac (liye Doctrine and Covenants 88:77–78, 118; liye pac 2.2.3 ke handbook se inge).

1.3.6

Kuhlwacnsap ac Inkacnek in Kol

Ke kunohkohn ac orekma ke Alu uh, God el sang inkacnek in kuhlwacnsap ac kol nuh sin mempucrs. Alu uh kahsruh ke ohiyac puhs in kahsruh mempucrs ma elyah ac sang kahsruh nuh sin mwet enenuh (liye Mosiah 18:27–29).

1.3.7

U in Mwet Luhlahlfongi

Ekihn u in Mwet Luhlahlfongi, mempucrs ke Alu uh kwacna toeni in alu nuh sin God ac ini esam Mwet Lahngo ke eis kuhfa luhn Leum (liye Moroni 6:4–6; Doctrine and Covenants 20:77). Mempucrs oacyacpac karihngihn ac kahsruh sie sin sie (liye Ephesus 2:19).

1.4

Ma Kunom nuh ke Orekma luhn God

In mwet kol se ke Alu uh, kom pahngonyuck in luti ac kahsruh elos suc kom kuhlwacnsuhpuh ke elos wi oruh orekma in molwelah ac ma pahtpaht (liye 1.2). Ma kunom in ahksahfyelah kunokohn lom ac “luti … kahs luhn God ke insiacsr nohfohn” (Jacob 1:19). Wi Leum orekma ke imac Lal usot mwe engan (liye Jacob 5:70–72).

In kahlwem ke orekma luhn God, ke ma El suli kom in oruh, ac ke srihpac luhn Alu Lal e kahsre kom in siyac na kuhiyom in use mwet nuh yurin Kraist.

Som liye pac ke ip yohk ke sapta se inge. Sikalweni in pruhe in etuh in kahsruh use srihpac luhn God nuh ke moul luhn mwet kom kuhlwacnsuhpuh. God elac fah kol kom ke orekma luhn Nguhn Muhtahl.