1.

An Kot Kokkot me Wisom non ewe Angangen Amanaua me Manau mi Tekia

1.0

Nepoputan

En ka koko om kopwe aninis non Ewe Mwichefenin Jises Kraist ren Aramas mi Pin non Fansoun Soponon. Kinisou ren omw aninis. En kopwe efeiochu ekkoch me tonong non pwapwa atun omw nikitu ne aninis.

Ei puken emwen epwe anisuk ne kaeo ussun nongonongun an Kraist angangen aninis me weweiti wisom kewe. Kopwe anapano tufichum nupwen ka awena omw aninis non ewe Mwichefen fiti ewe angangen Kot ewe Sam me Noun we At, Jises Kraist.

1.1

An Kot Kokkotun Pwapwa

Samach Kot won Nang a awora ewe kokkotun pwapwa ne atufichikich ne mefi pwapwan An kewe feioch meinisin. An angang me ning an epwe “efisi ewe manau fochofoch me manau esemuch an aramas” (Moses 1:39).

Jises Kraist a nom nukanapen an Kot kokkot. Pokiten an Semach won Nang tong esemuch fan itach, A tinano Noun we At an epwe angasa kich seni tipis me mano me ren An asoren achasefan (nengeni John 3:16). Me non An Achasefan, Jises Kraist a atufichi emon me emon kich mi uputiw won fonufan ach sipwe manausefan me angei manau fochofoch. An Achasefan a pwan atufichikich ach sipwe nimenimoch seni tipis me ekesiwini netipach pwe sipwe tongeni angei manau esemuch me ew unusochun pwapwa.

Ren ach sipwe angei manau esemuch, sipwe fokkun “feito ren Kraist, me oupwe unusochuno non i” (Moronai 10:32).

1.2

Ewe Angangen Amanaua me Manau mi Tekia

Ren ach feito ngeni Kraist me anisi pwan ekkoch ne fori usun, sia fiti non an Kot angangen amanaua me manau mi tekia. Ei angang a emwen me ren ekkewe ru annuk mi nap ne tongei Kot me tongei chon orum (nengeni Matthew 22:37–39).

Ewe angangen amanaua me manau mi tekia a fot won ruanu kinikinin sekinin seni nang.

Ewe Angangen Amanaua me Manau mi Tekia

Sia feito ngeni Kraist me aninis non an Kot angang ren:

• Manaueni ewe kapas allimen Jises Kraist.

• Tumunu ekkewe ir mi osupwang.

• Etiwa ngeni meinisin ar repwe angei ewe kapas allim.

• Achufengeni famini ren feinfeinno chok.

Ei puken emwen epwe anisuk ne weweiti ekkei ruanu kinikinin an Kot angang. Ewe Ngun mi Fel epwe emwenuk ren omw fori wisom ne apwonueta ir (nengeni 2 Nifai 32:5).

1.2.1

Manaueni ewe Kapas Allimen Jises Kraist

Manaueni ewe Kapas Allimen Jises Kraist a pachenong:

• Anapano nuku non Kraist, aier iteitan ran, fori pwon mi pin ren Kot atun sia angei ekkewe angangepin ren amanaua me manau mi tekia, me nikitu tori nesoponon ren manaueni ekkena pwon mi pin (nengeni 3.5.1).

• Kakaeo me akkaiti ewe kapas allimen Jises Kraist non imwach me non fan.

• Fefeita non om-tufich ne awora fan itom me omw famini, ir me ruu ren pekin ngun me pekin inis.

1.2.2

Tumunu ekkewe Ir mi Osupwang

Tumunun ekkewe ir mi osupwang a pachenong:

• Akkanisi me ikiamwiri emon me emon, ekkewe famini, me kewe neni.

• Aea fengen mettochun aninis, pachenong aninnisin Mwichefen, ngeni ir ekkewe mi osupwang.

• Anisi ekkoch ne fefeita non ar-tufich.

1.2.3

Etiwa Meinisin repwe Angei ewe Kapas Allim

Etiwa meinisin repwe angei ewe kapas allim a pachenong:

• Fifiti non angangen missionari me aninis ussun kewe misineri.

• Akanisi ekkewe minafon memper me ekkewe ra niwin ngeni Mwichefen ne fefeita won ewe aanen pwon mi pin.

1.2.4

Achufengeni Famini ren Fenfeinno chok

Achufengeni famini ren fenfeinno chok a pachenong:

• Fori pwon mi pin atun sia angei pwisin ach kewe angangepinin tempel.

• Kukuta ach kewe neuo ra mano me fori ar angangepin fan iter non ewe tempel pwe ir repwe tongeni fori ar angangen pwon mi pin ngeni Kot.

• Fefeinno ngeni ewe tempel fan chommong, ian mei tufich, ne fen ngeni Kot me fori kewe angangepin fan iten Noun kewe.

1.3

Ewe Popun ewe Mwichefen

Jises Kraist a forata An Mwichefen pokiten epwe atufichi emon me emon me kewe famini ne fori an angangen amanaua me manau mi tekia (nengeni Ephesians 4:11–13; nengeni pwan 2.2 non ei puken emwen). Ren aninisin an epwe fisioch ei ningen popun, ewe Mwichefen me noun kewe chon emwen ra awora:

• Mwumwutan Pristut me kewe kii.

• Pwon mi pin me angangepin.

• Emwenin soufos.

• Pukefel.

• Kaeon Kapas Allim me annisin akkaiti.

• Aninis me emwenin wis mi chommong fansoun.

• Ew mwichen Souneng.

1.3.1

Mwumwutan Pristut me Kii

Me ren ewe pristut, Kot a apwonueta ewe angangen amanaua me manau mi tekia. Ewe mwumwutan pristut me kii a namwot ne emweni an Kot angang won fonufan minne a aniwinato me ren ewe Soufos Joseph Smith (nengeni Doctrine and Covenants 110:11–16; 112:30). Ekkewe kii mi nom ren chon emwenin Mwichefen ikenai. Ir mi kokkori me mutata pwan ekkoch repwe aninnis non an Kot angang (nengeni Doctrine and Covenants 107:8, 65–67).

1.3.2

Pwon mi Pin me Angangepin

Non an Semach won Nang kokkot, sia fori pwon mi pin ren ach fori kewe angangepinin amanaua me manau mi tekia, usun papatais (nengeni John 3:5; nengeni pwan sop 18 non ei puken emwen). Ekkei pwon mi pin me angangepin ra namwot ngenikich ne winiti usun Kot me niwin ngeni nenian me nom ren I (nengeni Doctrine and Covenants 84:19–22).

1.3.3

Emwenin Soufos

Me ren Noun kewe soufos mi finita, Kot a pwarata ennet me awora emwen seni nang me wau esinesinen efeiengau (nengeni Amos 3:7; Doctrine and Covenants 1:4). Ei emwen a anisikich ne tonong me nom won ewe aan minne epwe emwen ngeni manau esemuch.

1.3.4

Pukefel

Fan emwenin noun ewe Samon soufos me aposel, ewe Mwichefen a awora me anommu ewe kapasen Kot usun a mak non ekkewe pukefel mi fel. Ekkewe pukefel ra pwarata usun Kraist, aiti An kapas allim, me anisikich ne anganga nuku non I (nengeni Jacob 7:10–11; Ilaman 15:7).

1.3.5

Kakaeo ewe Kapas Allim me Aninnisin Akkaiti

Ewe Mwichefen a anisi emon me emon me famini ren wiser ne kaeo ekkewe ennet ren ewe kapas allim me aiti ekkei ennet ngeni chon ar kewe famini me pwan ekkoch (nengeni Doctrine and Covenants 88:77–78, 118; nengeni pwan 2.2.3 non ei puken emwen).

1.3.6

Aninis me Emwenin wis mi Chommong Fansoun

Me ren kokon wiis me sekenin non ewe Mwichefen, Kot a awora chommong fansoun ngeni memper ar repwe aninis me chon emwen. Ewe Mwichefen a awora napanapen epwe anisi ne tumunu memper mi osupwang me ineti pisekin aninnis ngeni pwan ekkoch (nengeni Mosaia 18:27–29).

1.3.7

Ew Mwichen Souneng

Ren ew mwichen Souneng, chon ewe Mwichefen ra mwichfengen iteitan ne fen ngeni Kot me repwe chechemeni ewe Chon Amanau ren ar angei ewe sakrament (nengeni Moroni 6:4–6; Doctrine and Covenants 20:77). Memper ra pwan tumunu me iamwir ngeni emon me emon fengen (nengeni Ephesians 2:19).

1.4

Wisom non an Kot Angang

Ussun emon chon emwen non ewe Mwichefen, en ka kokko kopwe aiti me anisata ir ekkewe en mi angang fan iter fansoun ar fiti ewe angangen amanaua me manau mi tekia (nengeni 1.2). Mi auchea kopwe apwonueta wisom me “aiti … ewe kapasen Kot ren unusen non om tongeni” (Jacob 1:19). Angang fengen ren ewe Samon non An Atake epwe awora ngonuk watten pwapwa chapur (nengeni Jacob 5:70–72).

An a or ew fatochun weweochun an Kot angang, ren met A etiwa ngonuk kopwe fori, me popun An Mwichefen epwe anisuk ne ateneki omw achocho ne wato ngun ngeni Kraist.

Feino ngeni iteitan ren ekkewe nongonong non ei sopun. Ikioteki ne kuta om kopwe sinei ifa usun kopwe aninis ne anisata An Kot kewe popun non ekkewe manau ren ekkewe en mi akkanisir. Kot epwe emwenuk me ren memmefin ewe Ngun mi Fel.