Manual General ha Llamamiento-kuéra
1. Tupã Plan ha Ne Funsiõ Salvasiõ ha Exaltasiõ Rembiapópe

“1. Tupã Plan ha Ne Funsiõ Salvasiõ ha Exaltasiõ Rembiapópe,” Manual General-gui Poravopyrekuéra (2023).

“1. Tupã Plan ha Ne Funsiõ Salvasiõ ha Exaltasiõ Rembiapópe,” Manual General-gui Poravopyrekuéra

Imágen – Ta’anga
kuimba’ekuéra omopu’ãvo peteĩ óga

1.

Tupã Plan ha Ne Funsiõ Salvasiõ ha Exaltasiõ Rembiapópe

1.0

Ñepyrũmby

Nde reñehenói reservi hag̃ua Jesucristo Tupao Santokuéra Ára Pahapeguápe. Aguije ndéve nde servicio rehe. Nde rehovasáta tekovekuéra ha reñandúta vy’apavẽ reserviháicha jeroviarekópe.

Ko manual nepytyvõta reñemoarandu hag̃ua pe servicio Cristo oservi haguéicha principio-kuérape ha rentende hag̃ua umi ne rresponsabilida. Rejapo porãvéta rembojojáramo nde servicio Tupaópe Tupã pe Túva ha Ita’ýra Jesucristo rembiapo reheve.

1.1

Tupã Vy’apavẽ Plan

Túva Yvagagua ome’ẽ pe vy’apavẽ plan oheja hag̃ua tajaguerovy’a opaite Ijehovasakuéra. Hembiapo ha iglória ha’e “toiko yvypóra ñemanokuaa’ỹ ha tekove ijapyra’ỹva” (Moisés 1:39).

Jesucristo ha’e Tupã plan mbyte. Túva Yvagagua mborayhu ijapyra’ỹva rupi ñanderehe, Ha’e ombou Ita’ýrape ñanerredimi hag̃ua angaipa ha ñemanógui Ijehasa’asy expiatório rupive (tojehecha Juan 3:16). Iñexpiasiõ rupive, Jesucristo oasegura peteĩteĩ ñande ñanereñóiva ko yvy ári tajaikove jey ha jahupyty ñemanokuaa’ỹ. Iñexpiasiõ avei ojapo tañanepotĩkuaa angaipágui ha ñane korasõ toñemoambue ikatu hag̃uáicha jahupyty tekove ijapyra’ỹva ha peteĩ vy’apavẽ paha.

Jahupyty hag̃ua tekove ijapyra’ỹva, ñande “jajuva’erã Cristo-pe ha ñanerekoporãmbaite ipype” (Moroni 10:32).

1.2

Pe Salvasiõ ha Exaltasiõ rembiapo

Japartisipa Tupã salvasiõ ha exaltasiõ rembiapópe jajúramo Cristo-pe ha ñaipytyvõ ambuekuérape ojapo hag̃ua upéva avei. Ko tembiapo ojegia umi mokõi tembiapoukapy tuichaitéva rupi tajahayhu Tupãme ha tajahayhu ñande rapichakuérape (tojehecha Mateo 22:37–39).

Pe salvasiõ ha exaltasiõ rembiapo oñesentra irundy rresponsabilida ári oñeseñaláva divinamente.

Ko manual nepytyvõta rentende hag̃ua ko’ã irundy Tupã rembiapo aspecto. Espíritu Santo ndegiáta rejapoháicha nde parte rekumplívo umíva (tojehecha 2 Nefi 32:5).

1.2.1

Javivívo Jesucristo evanhélio

Javivi Jesucristo evanhélio he’ise:

  • Ñamomba’apo jerovia Jesucristo-re, ñañearrepenti ára ha ára, jajapo konveniokuéra Tupã ndive jarresivívo umi salvasiõ ha exaltasiõ ordenansakuéra, ha ñañeha’ãmbaite ipahaite peve ñañongatúvo umi konvénio (tojehecha 3.5.1).

  • Ñañemoarandu ha ñambo’e Jesucristo evanhélio óga ha tupaópe.

  • Toiko ñandehegui autosuficiente ñambohupytývo ñandejupe ha ñande familia-kuérape g̃uarã mokõive, espiritual ha temporalmente.

1.2.2

Ñañangarekóvo umi Oikotevẽvare

Ñañangareko umi oikotevẽvarepe oike:

  • Jaservi ha ñaministra tapicha, familia ha komunidakuérape.

  • Ñakomparti rrekursokuéra, jepe Tupao pytyvõ, umi oikotevẽva ndive.

  • Ñaipytyvõ tapichakuérape ha’e hag̃ua autosuficiente.

1.2.3

Ñainvitávo Opavavépe Orresivi hag̃ua pe Evanhélio

Ñainvita opavavépe orresivi hag̃ua pe evanhélio he’ise:

  • Japartisipa obra misional-pe ha jaservi misionero-ramo.

  • Ñaipytyvõ umi Tupaogua miembro pyahu ha umi oujeývape oñemotenonde hag̃ua konvénio rapére.

1.2.4

Ñambojoajúvo Familiakuérape Tapiaite g̃uarã

Ñambojoaju familiakuérape tapiaite g̃uarãme oike:

  • Jajapo konveniokuéra jarresivívo ñane templo ordenansakuéra tee.

  • Jajuhu ñande ypykuéra omanova’ekuépe ha jajapo umi ordenánsa hesekuéra templo-pe ikatu hag̃uáicha ojapo hikuái konveniokuéra Tupã ndive.

  • Jaha meme templo-pe, ikatuhápe, ñatupãitũ hag̃ua Tupãme ha jajapo umi ordenánsa Ita’yrakuérare.

1.3

Tupao Propósito

Jesucristo omoĩ Itupao oheja hag̃ua tapicha ha familiakuérape ojapo salvasiõ ha exaltasiõ rembiapo (tojehecha Efesios 4:11-13; tojehecha avei 2.2 ko Manual-pe). Oporoipytyvõ hag̃ua oñekumplívo ko propósito divíno, Tupao ha iliderkuéra ome’ẽ:

  • Sacerdocio autorida ha llavekuéra.

  • Konvénio ha ordenansakuéra.

  • Sãmbyhy profétiko.

  • Escritura-kuéra.

  • Evanhéliope ñemoarandu ha ñehekombo’e ñepytyvõ.

  • Oportunida servicio ha liderismorã.

  • Peteĩ Santokuéra komunida.

1.3.1

Sacerdocio Autorida ha Llavekuéra

Sacerdocio rupive, Tupã okumpli pe salvasiõ ha exaltasiõ rembiapo. Pe sacerdocio autorida ha llavekuéra oñeikotevẽva oñeisãmbyhy hag̃ua Tupã rembiapo yvy ári ojerrestaura proféta José Smith-pe (tojehecha Doctrina ha Konveniokuéra 110:11–16; 112:30). Tupaogua liderkuéra ko’ag̃agua oreko ko’ã llave. Ha’ekuéra ohenói ha oautorisa ambuekuérape oipytyvõ hag̃ua Tupã rembiapópe (tojehecha Doctrina ha Konveniokuéra 107:8, 65–67).

1.3.2

Konvénio ha Ordenansakuéra

Túva Yvagagua plan-pe, ñande jajapo konveniokuéra jarresivívo umi salvasiõ ha exaltasiõ ordenánsa, ijapytépe bautismo (tojehecha Juan 3:5; tojehecha avei capítulo 18 ko manual-pe). Ko’ã konvénio ha ordenansakuéra mba’eguasueterei ñande ha’eve hag̃ua Tupãicha ha jaiko jey hag̃ua Hendive (tojehecha Doctrina ha Konveniokuéra 84:19–22).

1.3.3

Sãmbyhy Profétiko

Iprofetakuéra poravopyre rupi, Tupã orrevela añetegua ha ome’ẽ gía inspirádo ha ñemomarandu (tojehecha Amós 3:7; Doctrina ha Konveniokuéra 1:4). Ko gía ñanepytyvõ jaike ha japyta hag̃ua pe tape ñandegueraháva tekove ijapyra’ỹvape.

1.3.4

Escritura-kuéra

Ñandejára proféta ha apostol-kuéra sãmbyhy guýpe, Tupao ome’ẽ ha omo’ã Tupã ñe’ẽ oĩháicha umi escritura marangatúpe. Umi escritura otestifika Cristo-gui, ombo’e Iñevanhélio, ha ñanepytyvõ ñamomba’apóvo ñande jerovia Hese (tojehecha Jacob 7:10–11; Helamán 15:7).

1.3.5

Evanhéliope Ñemoarandu ha Ñehekombo’e Ñepytyvõ

Tupao oipytyvõ tapicha ha familiakuérape irresponsabilidápe oñemoarandu hag̃ua umi evanhélio añeteguápe ha ombo’e hag̃ua umi añetegua ifamiliaguakuéra ha ambuévape (tojehecha Doctrina ha Konveniokuéra 88:77–78, 118; tojehecha avei 2.2.3 ko manual-pe).

1.3.6

Oportunida Servicio ha Liderismorã

Umi llamamiento ha asignasiõ Tupaópe rupive, Tupã ome’ẽ miembro-kuérape oportunida oservi ha oisãmbyhy hag̃ua. Tupao ome’ẽ estructura oñeipytyvõ hag̃ua oñeñangarekóvo umi miembro oikotevẽvare ha ome’ẽ hag̃ua pytyvõ humanitario ambuekuérape (tojehecha Mosíah 18:27–29).

1.3.7

Peteĩ Santokuéra Komunida

Peteĩ Santokuéra komunida ramo, Tupaogua miembro-kuéra oñembyaty meme otupãitũ hag̃ua Tupãme ha imandu’a hag̃ua pe Salvador rehe opartisipávo Santa Cena-gui (tojehecha Moroni 6:4–6; Doctrina ha Konveniokuéra 20:77). Miembro-kuéra avei oñoñangareko ha oñoministra ojupe (tojehecha Efesios 2:19).

1.4

Nde Funsiõ Tupã Rembiapópe

Peteĩ líder-ramo Tupaópe, nde reñehenói rembo’e ha reipytyvõ hag̃ua umi reservívape omba’apo aja hikuái pe salvasiõ ha exaltasiõ rembiapópe (tojehecha 1.2). Nde reguereko rresponsabilida rekumplívo ne llamamiento ha “rembo’évo …. Tupã ñeʼẽ opa jesarekópe” (Jacob 1:19). Remba’apóvo Tupã ndive Ivíñape oguerúta ndéve tuichaite vy’apavẽ (tojehecha Jacob 5:70–72).

Rerekóvo peteĩ ñentende hesakãporãva Tupã rembiapógui, mba’épa Ha’e neinvita rejapo hag̃ua ha Itupao propósitogui nepytyvõta resentra hag̃ua ne rembiapo reguerúvo angakuéra Cristo-pe.

Ekonsulta py’ỹi umi pricipio oĩva ko capítulo-pe. Ñembo’epópe eheka reikuaa hag̃ua mba’éichapa reipytyvõkuaa oñekumpli hag̃ua Tupã propósito umi reservíva rekovépe. Tupã neisãmbyhýta Espíritu Santo remiandu rupive.

Toñeimprimi