familia foto

2.

Oñeipytyvõvo Tapicha ha Familiakuérape Salvasiõ ha Exaltasiõ Rembiapópe

2.0

Ñepyrũmby

Líder-ramo Jesucristo Tupaópe, nde reipytyvõ tapicha ha familiakuérape okumplívo Tupã salvasiõ ha exaltasiõ rembiapo (tojehecha 1.2). Ko tembiapo propósito paha ha’e toñeipytyvõ opaite Tupã ta’yrakuérape ohupyty hag̃ua tekove ijapyra’ỹva jehovasakuéra ha peteĩ vy’apavẽ plenitu.

Heta pe salvasiõ ha exaltasiõ rembiapo oiko familia rupive. Opavave Tupaogua miembro-kuérape g̃uarã ko tembiapo oñesentra ógape.

2.1

Pe Familia Funsiõ Tupã Plan-pe

Iplan pehẽramo, Túva Yvagagua omoĩ familiakuéra ko yvy ári. Ha’e oreko intensiõ familiakuéra togueru ñandéve vy’apavẽ. Familiakuéra ome’ẽ oportunida ñemoarandu, jekakuaa, jeservi, ñearrepenti, ha ñeperdonarã. Ha’ekuéra ñanepytyvõkuaa ñañembosako’ívo tekove ijapyra’ỹvape g̃uarã.

Tupã promesa tekove ijapyra’ỹva reheguápe oike ñemenda opave’ỹva, ta’yrakuéra, ha opaite ambue jehovasa oguerúva peteĩ familia ijapyra’ỹva. Ko promésa ojeipyso umi nomendáivape gueteri ko’ag̃aite térã umi ndorekóiva familia Tupaópe.

2.1.1

Familiakuéra Ijapyra’ỹva

Familiakuéra ijapyra’ỹva oñeforma Tupaogua miembro-kuéra ojapo vove konveniokuéra orresivívo sellamiento ordenansakuéra templo-pe. Familia ijapyra’ỹva jehovasakuéra oñekumpli miembro-kuéra oñongatúrõ umi konvénio ha oñearrepentívo ojavýrõ. Tupaogua liderkuéra oipytyvõ miembro-kuérape oñembosako’ívo orresivi hag̃ua ko’ã ordenánsa ha oñongatu ikonveniokuéra.

Peteĩ mba’e adicional oñeformávo familiakuéra ijapyra’ỹva ha’e tojejapo umi ordenánsa templo-pe ohejáva miembro-kuéra tojesella ijypykuéra omanova’ekue ndive.

2.1.2

Ména ha Tembireko

Ñemenda peteĩ kuimba’e peteĩ kuña ndive oñeordena Tupãre (tojehecha Doctrina ha Konveniokuéra 49:15). Peteĩ ména ha tembireko propósito ha’e tokakuaa oñondive tekove ijapyra’ỹva gotyo (tojehecha 1 Corintios 11:11).

Peteĩ umi rrekisíto ojehupyty hag̃ua tekove ijapyra’ỹva ha’e peteĩ kuimba’e ha peteĩ kuñame g̃uarã toike pe ñemenda celestial konvéniope (tojehecha Doctrina ha Konveniokuéra 131:1–4). Peteĩ paréha ojapo ko konvénio orresivívo pe ñemenda sellamiento ordenánsa templo-pe. Ko konvénio ha’e peteĩ familia ijapyra’ỹva pyenda. Oñeñongatúrõ jeroviarekópe, ojapo iñemenda toiko tapiaite g̃uarã.

Pe intimida física ména ha tembireko apytépe iporã ha isagrádo. Oñeordena Tupã rehe ojejapo hag̃ua ta’yrakuéra ha mborayhu techaukaháramo ména ha tembireko apytépe. Kunu’ũ ha rrespéto—egoismo katu nahániri—ha’eva’erã gía irrelasiõ íntimape.

Tupã omanda toñeñongatu intimida sexual kuimba’e ha kuña ñemendápe g̃uarã.

Peteĩ ména ha tembireko ijoja Tupã resa renondépe. Peteĩva nodominaiva’erã ambuévape. Ha katu ojapova’erã idesisiõnguéra joaju ha joayhupópe, opartisipávo mokõivéva.

2.1.3

Túva ha Ta’yrakuéra

Ára Pahapegua profetakuéra ombo’e “Tupã rembiapoukapy Ita’yrakuérape oñemboheta ha omyanyhẽ hag̃ua ko yvy oĩ gueteri vihénte” (“La Familia: una proclamación para el mundo”; tojehecha avei Doctrina ha Konveniokuéra 49:16–17).

Peteĩ ména ha tembireko ojoayhu ha ojoajúva oforma contexto iporãvéva oñemongakuaa ha oñenutri hag̃ua ta’yrakuéra. Umi situasiõ personal ikatu ojoko tuvakuérape omongakuaa hag̃ua ita’yrakuéra oñondive. Upevére, Ñandejára ohovasáta chupekuéra ohekárõ Ipytyvõ ha oñeha’ãrõ oñongatu ikonveniokuéra Hendive.

Tuvakuéra oreko rresponsabilida tuichaite oipytyvõ hag̃ua ita’yrakuérape oñembosako’ívo ohupyty hag̃ua tekove ijapyra’ỹva jehovasakuéra. Ha’ekuéra ombo’e ita’yrakuérape ohayhu ha oservi hag̃ua Tupã ha tapichakuérape (tojehecha Mateo 22:36–40).

“Túva opresidiva’erã ifamilia ári mborayhu ha tekojojápe ha oreko rresponsabilida oproveévo ifamíliape g̃uarã umi mba’e oñeikotevẽva tekoverã ha omo’ã hag̃ua chupekuéra” (“La familia: una proclamación para el mundo”). Ndaipóriramo peteĩ ména térã túva pe ógape, sy opresidi pe familia ári.

Familia jepresidi ha’e rresponsabilida oñeipytyvõ hag̃ua ojegiávo umi familiaguápe oho jey hag̃ua Tupã renondépe. Kóva ojejapo ojeservi ha oñehekombo’évo py’aporã, mansedumbre ha mborayhu potĩ reheve, ojesegívo Jesucristo ehémplo (tojehecha Mateo 20:26–28). Familia jepresidípe oike ojegia familiaguakuérape ñembo’e meme, evanhélio estudio, ha ambue tupãitũ mba’épe. Túva ha sykuéra omba’apo oñondive joajúpe okumpli hag̃ua ko’ã rresponsabilida reheve.

“Sy peteĩháme oreko rresponsabilida oñangarekóvo imembykuérare“ (“La familia: Una proclamación para el mundo”). Ñeñangareko he’ise ñemongakuaa, ñehekombo’e ha ñeipytyvõ osegívo pe Salvador ehémplo (tojehecha 3 Nefi 10:4). Ojoajúvo iména ndive, peteĩ sy oipytyvõ ifamíliape oñemoarandu hag̃ua umi evanhélio añeteguápe ha odesarrolla jerovia Túva Yvagagua ha Jesucristo-re. Oñondive ha’ekuéra omokyre’ỹ peteĩ mborayhu jere ifamíliape.

“Ko’ã rresponsabilida isagrádovape, túva ha sykuéra oĩ obligado oñoipytyvõvo ojupe oñoirũ jojávaramo” (“La familia: Una proclamación para el mundo”). Ha’ekuéra ñembo’epópe okonsulta oñondive ha Ñandejára ndive. Odesidi oñondive joaju ha mborayhúpe, opartisipapaitévo mokõivéva.

2.2

Pe Salvasiõ ha Exaltasiõ Rembiapo Ógape

Primera Presidencia he’i, “Pe óga ha’e peteĩ tekojoja rekove pyenda” (Primera Presidencia kuatiañe’ẽ, Feb. 11, 1999).

Oipytyvõ hag̃ua miembro-kuérape ojapóvo salvasiõ ha exaltasiõ rembiapo hógape, Tupaogua liderkuéra omokyre’ỹ chupekuéra omoĩvo peteĩ óga pe espíritu oĩháme presente. Omokyre’ỹ avei miembro-kuérape osantifika hag̃ua pe día de reposo, oestudia ha oñemoarandu hag̃ua evanhéliope hógape, ha ojapo hag̃ua noche de hogar káda semana.

2.2.3

Evanhélio Estudio ha Ñemoarandu Ógape

Evanhélio ñehekombo’e ha ñemoarandu oĩva’erã sentrádo ógape ha oñembopytyvõvo Tupaóre. Tupaogua liderkuéra omokyre’ỹ opavave miembro-kuérape oestudia hag̃ua pe evanhélio hógape día de reposo ha opa semana árape.

Peteĩ escritura estudio ojehechaukaháicha Eju, Chesegi–Individuo ha familiakuérape g̃uarãme ha’e pe curso ojesuheríva evanhélio estudiorã ógape.

2.2.4

Noche de Hogar ha Ambue Actividakuéra

Ára Pahapegua profetakuéra oakonseha Tupaogua miembro-kuérape tojapo peteĩ noche de hogar káda semana. Kóva ha’e peteĩ tiempo sagrádo individuo ha familiakuéra oñemoaranduhápe evanhéliope, omombarete itestimónio, ojoaju ha ovy’a oñondive.

Noche de hogar oje’adapta miembro-kuéra situasiõre. Ojejapokuaa día de reposo-pe térã ambue ára ha tiempo-pe. Ikatu oike ipype:

• Evanhélio estudio ha ñehekombo’e (ojeiporukuaa Eju, Chesegi material-kuéra ojeipotaháicha).

• Tapichakuérape jeservi.

• Ojepurahéi térã oñembopu umi himno ha Primaria-gua purahéi (tojehecha capítulo 19).

• Ñeipytyvõ familia-guakuérape programa Desarrollo de niños y jóvenes-pe.

• Peteĩ familia konsého oñemoĩ hag̃ua meta-kuéra, ojerresolve hag̃ua problema ha oñekoordina hag̃ua horario.

• Umi activida ojevy’a hag̃ua.

Umi miembro ha’eñóva ha ambue tapichakuéra ijatykuaa grupo-pe ndaha’éiva tupãitũrã servicio normal día de reposo-gua opartisipa hag̃ua noche de hogar-pe ha oñemombarete hag̃ua ojupe evanhélio estudio rupive.

2.2.5

Oñeipytyvõvo Tapichakuérape

Tupaogua liderkuéra oipytyvõ miembro-kuérape ndorekóiva ifamília pytyvõ.

Liderkuéra oipytyvõ ko’ã miembro ha ifamiliakuéra oguereko hag̃ua oportunida oñe’ermana hag̃ua, oguerovy’a umi activida social ha okakuaa espiritualmente.

2.3

Rrelasiõ Oĩva Óga ha Tupao Apytépe

Pe salvasiõ ha exaltasiõ rembiapo oñesentra ógape ha oñeipytyvõ Tupaóre. Ko’ã principio oje’aplika rrelasiõ oĩvape óga ha Tupao apytépe.

• Líder ha mbo’eharakuéra omomorã tuvakuéra funsiõ ha oipytyvõ chupekuéra.

• Oĩ Tupao rreuniõnguéra imba’eguasuetéva káda barrio ha rrámape. Ko’ãvape oike reunión sacramental ha umi clase ha kórum rreuniõnguéra ojejapóva día de reposo-pe. Heta ambue rreuniõ, activida ha programa-kuéra ndaha’éi esencial.

• Servicio ha partisipasiõ Tupaópe ogueraha sakrifisio’imi. Ñandejára ohovasáta miembro-kuérape oserviháicha ha ojapoháicha hikuái sakrifísio Itupaópe. Upevére, pe tiempo oñeme’ẽva Tupao servicio-pe ndoipe’aiva’erã miembro-kuéragui kapasida okumpli hag̃ua rresponsabilida orekóva hóga, omba’apohápe ha ambue tendápe.