2.

Kuambuluisha Bantu ne Mêku mu Mudimu wa Lupandu ne Dizanjikibua

2.0

Tshibangilu

Bu mulombodi mu Ekelezia wa Yezu Kilisto, udi wambuluisha bantu ne mêku mu kuenza mudimu wa Nzambi wa lupandu ne dizanjikibua (tangila 1.2). Kipatshila kanena ka mudimu ewu kadi ka kuambuluisha bana bonsu ba Nzambi bua bapeta mabenesha a moyo wa tshiendelela ne tshiwudi tshia disanka.

Mudimu wa bungi wa lupandu ne dizanjikibua udi wenzekela kupitshila ku dîku. Bua bidimba bionsu bia Ekelezia, mudimu ewu udi munkatshi mua dîku.

2.1

Bujitu bua Dîku mu Dilongolola dia Nzambi

Bu tshitupa tshia dilongolola dienda, Tatu wa mu Diûlu wakenza mêku pa buloba. Mmuindila bua ne mêku atupesha disanka. Mêku adi afila mishindu ya kulonga, kukola, kusadila, kukudimuna mutshima, ne kubuikidila. Adi mua kutuambuluisha bua kulongolola moyo wa tshiendelela.

Mulayi wa Nzambi wa moyo wa tshiendelela udi muikala ne dibaka dia tshiendelela, bana ba tshiendelela, ne mabenesha makuabu onsu a dîku dia tshiendelela. Mulayi ewu udi kabidi bua bantu badi kabayi banji kusela anyi badi kabayi ne dîku mu Ekelezia.

2.1.1

Mêku a Tshiedelela

Mêku a tshiendelela adi enzeka padi bidimba bia Ekelezia bienza bipungidi mu kupeta milulu ya disuika mu ntempelo. Mabenesha a dîku dia tshiendelela adi akumbana padi bidimba bilama bipungidi abi ne bikudimuna mitshima diba didibi bipona. Balombodi ba Ekelezia badi bambuluisha bidimba bua kudilongolola bua kupeta milulu eyi ne kunemeka bipungidi biayi.

Mushindu mukuabu wa kuibaka mêku a tshiendelela udi wa kukumbaja milulu mu ntempelo idi yambuluisha bidimba bua kusuikibua kudi bafua bayi.

2.1.2

Muluma ne Mukaji

Dibaka pankatshi pa muntu muluma ne mukaji didi dijidila kudi Nzambi (tangila Dilongesha ne Bipungidi 49:15). Muluma ne mukaji bindibua bua kutanta pamua ku moyo wa tshiendelela (tangila 1 Kolinto 11:11).

Umua wa ku mikenji ya kupeta moyo wa tshiendelela udi ne, muntu muluma ne mukaji babuela mu tshipungidi tshia dibaka dia mu diûlu (tangila Dilongesha ne Bipungidi 131:1–4). Tatu ne mamu badi benza tshipungidi etshi padibu bapeta mululu wa disuikibua dia dibaka mu ntempelo. Tshipungidi etshi tshidi tshishindamenu tshia dîku dia tshiendelela. Badibu bikala ne lulamatu, tshidi tshiambuluisha dibaka diabu bua kunanuka bua kashidi.

Dimanyangana dia mibidi pankatshi pa muluma ne mukaji didi ne bua kuikala dimpa ne dia tshijila. Didi dijidila kudi Nzambi bua bufuki bua bana ne bua dileja dia dinanga pankatshi pa muluma ne mukaji. Moyo wa dinanga ne kanemu—kakuyi tshibengu—udi ne bua kulombola malanda abu a mibidi.

Nzambi wakela mukenji bua ne mamanyangana a mibidi alamibua mu dibaka pankatshi pa muluma ne mukaji.

Muluma ne mukaji badi momumua ku mesu kua Nzambi. Umua kena ne bua kubatshika mukuabu to. Mapangadika abu adi ne bua kuenzeka mu bobumua ne mu dinanga, ne didibuinka dia bonsu.

2.1.3

Baledi ne Bana

Bambi ba matuku a ku ndekelu bakalongesha ne “mukenji wa Nzambi bua bana Benda bavulangana ne buwuja buloba utshidiku ne bukola buawu.” (“Dîku: Dimanyisha Kudi ba pa Buloba”; tangila kabidi Dilongesha ne Bipungidi 49:16–17).

Muluma ne mukaji badi ne dinanga, bobu pamua badi bafila mushintu muimpa wa kukolesha ne kudisha bana. Malu a umua adi mua kupangisha baledi bua kukolesha bana pamua. Kadi, Mukalenga neababenesha pikalabu bakeba diambuluisha dienda ne badienzeja bua kulama bipungidi biabu nenda.

Baledi badi ne bujitu bunena bua kuambuluisha bana babu bua badilongolola bua kupeta mabenesha a moyo wa tshiendelela. Badi balongesha bana babu bua kunanga ne kusadila Nzambi ne bakuabu (tangila Matayo 22:36–40).

“Batatu badi ne bua kulombola mêku abu mu dinanga ne mu buakana ne badi ne bujitu bua kuandamuna ku majinga ne kukuba mêku abu.” (“Dîku: Dimanyisha Kudi ba pa Buloba”). Padiku kakuyi muluma mu dîku, mamu udi ulombola ku mutu kua dîku.

Kulombola mu dîku kudi kuikala bujitu budi buambuluisha bua kuludika bidimba bia dikû bua kupingana ne kusomba ku mesu kua Nzambi. Etshi tshidi tshienzeka mu kusadila ne kulongesha mu buakana, mu ditudija, ne mu dinanga dikezuka, mu kulonda tshilejilu tshia Yezu Kilisto (tangila Matayo 20:26–28). Kulombola mu dîku kudi kuangata kuludika bidimba bia dîku mu disambila dia tshibidilu, kulonga kua lumu luimpa, ne mishindu mikuabu ya kutendelela. Baledi badi benza mudimu mu bobumua bua kukumbaja majitu â.

“Bamamu badi nangananga ne bujitu bua bundeji bua bana babu.” (“Dîku: Dimanyisha Kudi ba pa Buloba”). Bundeji budi bumvuija ne, kudisha, kulongesha, ne kuambuluisha, mu kulonda tshilejilu tshia Mupandishi (tangila 3 Nefi 10:4). Mu bobumua ne muluma wenda, mamu udi wambuluisha dîku dienda bua kulonga malelela a lumu luimpa ne kutantshisha ditabuija mu Tatu wa mu Diûlu ne mu Yezu Kilisto. Pamua badi benza nyungulukilu wa dinanga mu dîku.

“Mu majitu a tshijila â, batatu ne bamamu badi ne bua kuambuluishangana bu bakuatshishanganyi ba momumua.” (“Dîku: Dimanyisha Kudi ba pa Buloba”). Badi babelangana mu disambila pamua ne ne Mukalenga. Badi benza mapangadika pamua mu bobumua ne mu dinanga, ne didibuinka dia bonsu.

2.2

Mudimu wa Lupandu ne Dizanjikibua mu Dîku

Bulombodi bua Kumpala mbuamba ne, dîku didi tshishikaminu tshia moyo muakana (First Presidency letter, Feb. 11, 1999).

Bua kuambuluisha bidimba bua kuenza mudimu wa lupandu ne dizanjikibua mu dîku, balombodi ba Ekelezia badi babakankamika bua kuibaka dîku didi Nyuma muikalaku. Badi kabidi bakankamika bidimba bua kunemeka dituku dia Sabata, kulongeshangana ne kulonga lumu luimpa mu dîku, ne kuenza tshisangilu tshia dilolo dia dîku ku lumingu.

2.2.3

Kulongeshangana ne Kulonga kua Lumu Luimpa mu Dîku

Kulongesha ne kulonga kua lumu luimpa kudi kuikala kuenzekela mu dîku ne kukuatshishibua kudi Ekelezia. Balombodi ba Ekelezia badi bakankamika bidimba bionsu bia Ekelezia bua kulongeshangana lumu luimpa mu dîku mu dituku dia Sabata ne munkatshi mua lumingu.

Kulonga kua mifundu bu mudibi bifunda mu Come, Follow Me—For Individuals and Families [Luaku, Undonda—Bua Bantu ne Mêku] udi muikala mukanda udi ne ngenyi ya malongesha a lumu luimpa mu dîku.

2.2.4

Dilolo dia mu Dîku ne Bibilu Bikuabu

Bambi ba matuku a ku ndekelu bakabela bidimba bia Ekelezia bua bienza dilolo dia mu dîku ku lumingu. Etshi tshidi tshikondu tshia tshijila tshidi bantu ne mêku balonga lumu luimpa, bakolesha majadiki, bibaka bobumua, ne basankankilangana.

Dilolo dia mu dîku didi dienzeka bilondeshila malu a bidimba. Didi mua kuenjibua mu dituku dia Sabata anyi mu matuku makuabu ne meba makuabu. Didi mua kuangata bitupa ebi:

• Kulongeshangana kua lumu luimpa ne maludiki (mukanda wa Come, Follow Me [Luaku, Undonda] udi mua kubadibua padibi bikengela).

• Kusadila bakuabu.

• Kuimba anyi kunaya misambu ne ya bantu bonsu anyi ya Mbedi (tangila shapita 19).

• Kuambuluisha bidimba bia dîku mu Dilubuluka dia Bana ne Bansonga.

• Tshipangu tshia dîku bua kupangadika bia kuenza, kusolakaja malu, ne kulongolola pamua kabala matuku.

• Bibilu bia Manaya

Bidimba bidi nkaya ne bikuabu, bidi mua kudisangisha mu bisumbu pambelu pa kutendelela kua mu dituku dia Sabata bua kubuela mu dilolo dia mu dîku ne kukankamikangana kupitshila ku lumu luimpa.

2.2.5

Kuambuluisha Bantu

Balombodi ba Ekelezia badi bambuluisha bidimba bidi bipangila diambuluisha dia dîku.

Balombodi badi bambuluisha bidimba ebi ne mêku abi bua bapeta malunda, mamanya a mu nsombelu, ne dilubuluka dia nyuma.

2.3

Malanda Pankatshi pa Dîku ne Ekelezia

Mudimu wa lupandu ne dizanjikibua udi munkatshi mua dîku ne mutuibua mpanda kudi Ekelezia. Malongesha adi alonda â adi atangila malanda pankatshi pa dîku ne Ekelezia.

• Balombodi ne balongeshi badi ne bua kunemeka bujitu bua baledi ne babambuluisha.

• Bimua bisangilu bia Ekelezia bidi ne mushinga mu tshikongu tshionsu ne ditamba. Bu mudi tshisangilu tshia biakudia bia tshijila pamua ne bisangilu bia mu tulasa ne mu mpuilu bidi bienzeka mu dituku dia Sabata. Bikuabu bisangilu, bibilu, ne ndongamu, kabiena ne mushinga to.

• Kusadila kua mu Ekelezia ne didibuinka, kudi kulomba ngenzelu wa mulambu. Mukalenga neabenesha bidimba padibi bisadila ne bilambula mu Ekelezia. Kadi, mutantshi wa diba udi kusadila mu Ekelezia kufila, kawena ne bua kupangisha bidimba bua kuwuja majitu abi a mu dîku, ku mudimu, ne mu miaba mikuabu to.