2.

Akkanisi Emon me Emon me Famini non ewe Angangen Amanaua me Manau mi Tekia

2.0

Nepoputan

Ussun emon sou emwenin ewe Mwichefenin Jises Kraist, ka anisi emon me emon aramas me famini non kawesinon An Kot angangen amanaua me manau mi tekia (nengeni 1.2). Ewe amuchunon popun ei angang an epwe anisi meinisin Noun Kot semirit ar repwe angei ekkewe feiochun manau esemuch me ew pwapwa mi unusoch.

Napengeni ewe angangen amanaua me manau mi tekia a taweno me ren ewe famini. Ren meinisin chon Mwichefen, ei angang a nom nukanapen non ewe imw.

2.1

Ewe Wis an ewe Famini non An Kot Kokkot

Ren kinikinin An kokkot, Samach won Nang a fen forata ekkewe famini won fonufan. I a mochen ren famini an epwe e wato ngeni kich pwapwa. Ekkewe famini ra awora tufichin kaeo, marita, aninis, aier, me omusomus. Ra tongeni anisikich ne moneta ngeni manau esemuch.

An Kot pwonen manau esemuch a pachenong pupunu esemuch, semirit, me meinisin pwan ekkoch feioch ren an ew famini esemuch. Ei pwon a no ngeni ekana resemo pupunu iei ika ese wor ar famini non ewe Mwichefen.

2.1.1

Famini Esemuch

Ekkewe famini esemuch ra foruta nupwen chon Mwichefen ra fori ekkewe pwon mi pin nupwen ra angei ekkewe angangepin ren riri non ewe tempel. Ekkewe feiochun ew famini esemuch ra pwa nupwen ekkewe memper ra aponueta ekkana pwon mi pin me aier nupwen ir ra turutiw. Sou emwenin Mwichefen ra anisi memper ar repwe moneta ngeni ar repwe angei ekkei angangepin me afona ar kewe pwon mi pin.

Ew kapachetan kinikinin forutan famini esemuch ina an epwe fori ekkewe angangepin non ewe tempel ewe mi mut ngeni ekkewe memper ar repwe riri ngeni mwirimwirir kewe ra mano.

2.1.2

Mwan me Fefin mi Pupunu

Pupunu nefinen emon mwan me emon fefin a epinipinino meren Kot (nengeni Doctrine and Covenants 49:15). Emon mwan me fefin ir pupunu ra kokkotono ar repwe chufengen ne fefeita ngeni manau esemuch (nengeni 1 Corinth 11:11).

Ew me nein ekkewe mettoch a auchea ngeni ach sipwe aani manau esemuch ina ren an emon mwan me emon fefin repwe tonong non ewe pwon mi pin ren apupunun non selestial (nengeni Doctrine and Covenants 131:1–4). Ewe pean pupunu a fori ei pwon mi pin nupwen ra angei ewe angangepin ren riri non apupunu non ewe tempel. Ei pwon mi pin ina ewe urenapen ew famini esemuch. Nupwen ra nikitu ne aponueta, a mutata ngeni ar pupunu epwe nikitu tori feinfeino.

Kanefengenin inis nefinen pupunu ren emon mwan me emon fefin a fis pwe ew mettoch mi ningoch me pin. A epinipinino me ren Kot fan iten forutan semirit me mi pupunu repwe pwar fengeni ar memefin tong nefiner. Umoumochun me osufonoch—esap etenekingaw—epwe emweni nefiner uchok me ruemom.

Kot a annuku pwe kanefengenin inis ren nisou epwe utiwitino fan iten pupunu nefinen emon mwan me emon fefin.

Emon mwan me punuwan ra chok nonno me ne mesen Kot. Emon esap pochokun an nemenem ngeni pwan ewe emon. Ar mokutukutun ekiek won mettoch, repwe fori non tipeew me tong, fiti ar unusen angang fengen.

2.1.3

Sam me In me Semirit

Ekkewe soufos non fansoun soponon ra aiti pwe “An Kot annuk fan iten Noun semirit ar repwe chomongono me amasowa ewe fonufan mi chok soposopono pochokunan” (“Ewe Famini: Ew Esinesin ngeni ewe Fonufan”; pwan nengeni Doctrine and Covenants 49:16–17).

Emon mwan me punuwan ir mi uren tong ra chufengen ne awora ewe murinon napanapen amarata me tumunu semirit. Nonnomun emon neir meni epwe epeti semanap me inenap seni tumunun fengeni nour kewe semirit. Iwe nge, ewe Samon epwe efeiochur nupwen ra kutta An aninis me achocho ne aponueta ar kewe pwon mi pin ngeni I.

A wor wisen ekkewe sam me in mi auchea ar repwe anisi nour kewe semirit ne amonata ar repwe angei ekkewe feiochun manau esemuch. Ra aiti nour kewe semirit ar repwe tongei me angang ngeni Kot me ekkoch (nengeni Matthew 22:36–40).

“Ekkewe sam repwe emweni ar kewe famini non tong me wenewen me ra wisen awora met mi namotren manau me tumunun ar kewe famini” (“Ewe Famini: Ew Esinesin ngeni ewe Fonufan”). Ika ese wor mwan ika semenap non ewe imw, ewe inenap a wisen emweni ewe famini.

Emwen non ewe famini ina ewe wis ne anisi ne emweni chon ewe famini ne niwin sefan ne nonnom ren Kot. A fis ei ren angangen aninis me osukun fiti mosonoson, tekisoson, me tong mi unusoch, tapweno mwirin ewe minen appiru an Jises Kraist (nengeni Matthew 20:26–28). Ekkemweni non ewe famini a pachenong emweni chon ewe famini non iotek iteitan, kaeo ekkewe pukefel, me pwan ekkoch angangen fen. Sam me in ra chufengen non tipeewin angang ne aponueta ekkei wis.

“Ekkewe in ra wiseni ewe wisen tumunun nour kewe semirit” (“Ewe Famini: Ew Esinesin ngeni ewe Fonufan”). An epwe tumunu wewen amari, osukuna, me anisi, tapweno mwirin an ewe Chon Amanau minen appiru. (nengeni 3 Nifai 10:4). Non an chufengen me punuwan, emon inenap a anisi an famini ne kaeo ekkewe ennetin kapas allim me amarata nuku non Samach Kot non Nang me Jises Kraist. Ra chufengen ne forata murinonon ew nenien tong non ewe famini.

“Non ekkei wis mi pin, sam me ina ar sekinin ar repwe anisi fengenir ussun ir chok ew mi nonnopok” (“ Ewe Famini: Ew Esinesin ngeni ewe Fonufan”). Ra chufengen ne kapas aninis fengen fiti iotek me fiti ewe Samon. Ra chufengen ne fori pungunon ekiek non tipeew me tong, fiti unusen chiechi fengen me ruemon.

2.2

Ewe Angangen Amanaua me Manau mi Tekia non ewe Imw

Ewe Aewin Presetensi a apasa, “Ewe imw ina ewe nongonong ren ew manau mi tupwon” (First Presidency letter, Feb. 11, 1999).

Ren aninisin ekkewe memper ar repwe fori ewe angangen amanaua me manau mi tekia non imw, Ekkewe sou emwenin Mwichefen repwe apochokuna ar repwe forata ew imw ikewe ewe Ngun epwe nom ie. Ra pwan apochokuna ekkewe memper ar repwe afona ewe ranin Sabbath, statini me kaeo ewe kapas allim non ewe imw, me fori fenin famini iteiten wik.

2.2.3

Statini Kapas Allim me Kakaeo non Imw

Osukuna kapas allim me kakaeo a fifis non-imw me aninisin a feito seni ewe Mwichefen. Sou emwenin Mwichefen repwe apochokuna meinisin memper ar repwe statini ewe kapas allim non imw non ranin Sabbath me non unusen ewe wik.

Ew statin ekkewe pukefel ussun mi affat non Come Follow Me—Ren Emon me Emon me Famini ina ewe nesenin statin ewe kapas allim non imw a finita .

2.2.4

Fenin Famini me Ekkoch Mokutukutun Urumot

Ekkewe soufosun fansoun soponon ra fen ouroura chon Mwichefen pwe repwe awora fenin famini iteiten wik. Ei ew fansoun mi pin fan iten emon me emon me famini ar repwe kaeo ewe kapas allim, apochokuna kapasen pwarata, fori angangen achufengen, me pwapwa fengen.

Fenin famini mi tongeni ekkesiwin anongonong won met an ekkewe memper osukosuk. Mi tongeni epwe fis non ranin Sabbath ika ekkoch ran me fansoun. A tongeni meni pachenong:

• Statin ewe kapas allim me aurouran (ewe Come, Follow Me pisekin osukun meni repwe nounou ika re mochen).

• Anisi ekkoch.

• Konu ika etiki ekkewe kon me konun Kinter (nengeni chapter 19).

• Anisi chon ewe famini non Amarata Ekkewe Semirit me Sarafo.

• Ew mwichen soupungun famini ar repwe forata ekkewe mettoch repwe angang ngeni, atawei ekkewe osukosuk, me fori fansoun me kunokun mettoch epwe fis.

• Mokutukutun urumot.

Ekkewe memper rese pupunu me ekkoch ra tongeni chufengen non kumi nukun ewe fenin Sabbath mi kan fifis ar repwe fiti fenin famini me apochokuna fengenir seni ar stati kapas allim.

2.2.5

Apochokuna emon me emon Aramas

Ekkewe sou emwenin Mwichefen ra anisi ekkewe memper ese wor aninis seni ar famini.

Ekkewe sou emwen ra anisi ekkei memper me ar kewe famini ne awora ewe tufichin fansoun ne echiechi fengen, fansoun pwapwa fengen, me mamarita non pekin ngun.

2.3

Ewe Akoko nefinen ewe Imw me ewe Mwichefen.

Ewe angangen amanaua me manau mi tekia ina urenapen non ewe imw me aninisin a feito seni ewe Mwichefen. Ekkewe nongonong mi affat a fis non ewe akoko nefinen ewe imw me ewe Mwichefen.

• Ekkewe sou emwen me ekkewe sense ra afona wisen ekkewe sam me in me anisir.

• Ekkoch mwichen Mwichefen ra auchea non ew me ew wart me pranch. Ekkei a pachenong mwichen sakrament me ekkewe klas me mwichen ekkewe mwan a fis non ewe Sabbath. Chommong pwan ekkoch mwich, mokutukutun urumot, me prokram ese pwan auchea.

• Aninis seni Mwichefen me pekin fifiti a pachenong ew kaukun asor. Ewe Samon epwe efeiochu ekkewe memper nupwen ra aninis me fangeno ar fansoun non An Mwichefen. Nge, ewe ukukun fansoun mi kawor ngeni aninisin non Mwichefen esap epeti seni an ekkewe memper tufich ne awesano wiser kewe non imw, non angang, me ese nifinifin ian.