3.

Ekkewe Nongonongun Pristut

3.0

Nepoputan

Ewe Pristut ina ewe mumuta me manamanen Kot. Seni ewe pristut, Samach won Nang a awesano An angang, “an epwe wato manau fochofoch me manau esemuch ren aramas” (Moses 1:39). Kot a mutau mumuta me manaman ngeni Noun kewe at me nengin won fonufan ar repwe anisi ne fori ei angang (nengeni chapter 1).

3.2

Ekkewe feiochun ewe Pristut

Seni ekkewe pwon mi pin me angangepinen pristut, Kot a fori wachimuken feioch mi kawor ngeni meinisin Noun kewe semirit. Ekkei efeioch a pachenong:

• Papatais me chon non ewe Mwichefenin Jises Kraist ren Aramas mi Pin non Fansoun Soponon.

• Ewe Nifangen ewe Ngun mi Fel.

• Angei ewe sakramen.

• Mumuta me manaman ne aninis non ekkewe wis me angang non Mwichefen.

• Angei ekkewe efeiochun petriark me ekkoch efeiochun pristut ren echikara, kinamwein netip, me emwen.

• Efeioch fiti an Kot manaman non ewe tempel.

• Riri ngeni chochon an emon famini ren fansoun esemuch.

• Ewe pwonen manau esemuch.

3.3

Melkisetek Pristut me Aaronik Pristut

Non ewe Mwichefen, ewe Pristut a wor ruu kinikin non: ewe Melkisetek Pristut me ewe Aaronik Pristut (nengeni Doctrine and Covenants 107:1).

3.3.1

Melkisetek Pristut

Ewe Melkisetek Pristut ina “ewe Pristut mi Fel, mwirin ewe Annuk an ewe Noun Kot” (Doctrine and Covenants 107:3). Ina ewe manaman minne ekkewe nengin me at noun Kot ra tongeni winiti ussun I (nengeni Doctrine and Covenants 84:19–21; 132:19–20).

Seni ei mumuta, ekkewe sou emwenin Mwichefen ra emweni me anganga meinisin angangen ewe Mwichefen non pekin ngun (nengeni Doctrine and Covenants 107:18).

Ewe presetenin steik i ewe prist mi tekia chon emwen non ewe steik (nengeni Doctrine and Covenants 107:8, 10; pwan nengeni sopun 6 non ei puk). Ewe pisop mi tekia chon emwen non ewe wart (nengeni Doctrine and Covenants 107:17; pwan nengeni sopun 7 non ei puk).

Ren porous ussun ekkewe wis me angang an ewe Melkisetek Pristut, nengeni 8.1.

3.3.2

Aaronik Pristut

Ewe Aaronik Pristut a “ew kapacheta ngeni … ewe Melkisetek Pristut” (Doctrine and Covenants 107:14). A apachanong ekkewe kien:

• Angangen ekkewe chon nang.

• Ewe kapas allimen aier.

• Anisi ngeni ekkewe angangepin seni nukun pachenong papatais ren omusomusen tipis.

(Nengeni Doctrine and Covenants 13:1; 84:26–27; 107:20.)

Ewe pisop i ewe presetenin ewe Aaronik Pristut non ewe wart (nengeni Doctrine and Covenants 107:15).

Ren porousen ekkewe wis me angang ren ewe Aaronik Pristut, nengeni 10.1.3.

3.4

Mumutan Pristut

Mumutan Pristut ina ewe mumuta ar epwe tupuni Kot me anganga non Itan. Non ewe Mwichefen, meinisin mumutan pristut a wor mokutukutun fan ewe emwen an ekkewe a wor rer ekkewe kien pristut.

3.4.1

Ekkewe Kien Pristut

Ekkewe kien pristut ikana kewe mumuta ne emweni ewe aean ewe pristut fan iten Noun Kot semirit.

3.4.1.1

Ekkana Ra Komoch Ekkewe Kien Pristut

Ewe Samon a fen wata won emon me emon Noun kewe Apostel meinisin kewe kii mi akoko ngeni ewe muun Kot won fonufan. Ewe a nap ierin an angangen Aposel mi manau ikenai, ewe Presetenin ewe Mwichefen, i chok ewe emon aramas won fonufan a mumuta an epwe omokutu meinisin ekkana kien pristut (nengeni Doctrine and Covenants 81:1–2; 107:64–67, 91–92; 132:7).

Fan emwenien ewe Presetenin ewe Mwichefen, a kawor ngeni ekkewe sou emwenin pristut ekkewe kii pwe repwe tongeni emweni non kinikinin wiser kewe. Ekkei sou emwen a pachenong:

• Ekkewe steik me tischrik preseten.

• Ekkewe pisop me pranch preseten.

• Ewe mwichen ekkewe Presetenin Melkisetek me Aaronik Pristut.

• Ekkewe presetenin tempel.

• Ekkewe presetenin misin me presetenin nenien an misineri kaeo.

Ekkei sou emwen ra angei ekkewe kien pristut nupwen ra ewisa ngenir wiser kewe.

Ekkewe kien pristut rese kawor ngeni ekkoch, pachenong chon anisi ekkewe presetenin sou emwenin pristut non pusin nenier kewe ika presitenin ekkewe mwicheichen Mwichefel. Ekkewe presetenin ekkewe mwicheichen Mwichefen ra emwen fan emwenien ekkana ra omochu ekkewe kien pristut (nengeni 4.2.4).

3.4.1.2

Tettenoch ngeni an ewe Samon angang

Ekkewe kien pristut ra tumunochu pwe ewe angangen amanaua me manau mi tekia a fis non ew napanap mi tetenoch (nengeni Doctrine and Covenants 42:11; 132:8). Ekkana ra komoch ekkewe kien pristut ra emweni an ewe Samon ewe angang non ar kewe kinikinin nenien wis. Ei mumutan nemenem a chok wor pochokunan ren ekkewe wis mi affat ren an ewe sou emwen kokkon wis. Nupwen ekkewe sou emwenin pristut ra kepichino seni wiser kewe, rese chiwen komoch ekkei kii.

3.4.2

Ewisen me Efeiochun Pristut

Fan emwenien ekkana ra omochu ekkewe kien pristut, ewe Aaronik Pristut me ewe Melkisetek Pristut ra ewis ngeni won ekkewe mwan chon ewe Mwichefen mi nimenimoch (nengeni Doctrine and Covenants 84:14–17). Mwirin ewisen ewe pristut ngeni ururun ion epwe ewis ngeni, ewe aramas a epinipinino ngeni ew wis non ena pristut, ussun tiken ika elter. Emon mi wor ren ewe pristut a omokutu angangen ewe pristut anongonong ngeni ekkewe pung me angangen ena wis (nengeni Doctrine and Covenants 107:99).

Ren soposopun porausen ewisen pristut me efeiochun, nengeni 8.1.1 me 18.10.

3.4.3

Mwichen Pristut mi wor rer ewe Mumuta ar repwe Angang non ewe Mwichefen.

3.4.3.1

Angangen Ewisa

Nupwen ra ewisa ekkewe mwan me fefin fan emwenien ekkana ra omochu ekkewe kien pristut, a kawor ngenir ewe mumuta seni Kot ar repwe omokutu angangen non ena wis. Nupwen ra kepichino seni ew kokkon wis, ese chiwen wor rer ewe mumuta ren ewe wis.

Meinisin chon Mwichefen ra angei wiser ar repwe angang a kawor ngenir ewe mumuta me ren Kot me wis ar repwe omokutu angangen non wiser kewe. Awewe chok:

• Emon fefin a kokko me ewis ngeni wisan seni ewe pisop ussun emon wart Relief Society preseten a kawor ngeni mumuta an epwe emweni ewe angangen Relief Society non ewe wart.

Meinisin ion mi koko me ewisa ngenir wiiser repwe angang fan emweniein ekkana ra emwenir (ngengeni 3.4.1.2).

3.4.3.2

Angang ra okuno ngeni kopwe fori

Meinapen sou emwenin Mwichefen ra tongeni fini ngonuk mumutan ewe angang kopwe fori. Nupwen ekkewe mwan me fefin ra angei ekkei angang repwe fori, a kawor ngenir mumuta seni Kot ar repwe omokutu angangan. Awewe chok:

• Ewe Aewin Presetensi me Mwichen ekkewe Engon me Ruemon Apostel ra ngeni ekkewe Fik ewe mumutan ekkewe ra koko ngeni ar repwe omokutu me anganga ekkewe area me emweni ekkewe mwichen steik.

• Mumuta a kawor ngeni chon Mwichefen ar repwe angang ussun mwan me fefin chon iamwir.

Mumuta mi kawor ren kewe angang ra fin ngonuk kopwe fori mi kouk ngeni ururun ekkewe wis me fansoun ewe angang kopwe fori.

3.4.4

Omokutu Angangen ewe Mumutan Pristut non tupwon

Ei mumuta a tongeni wor aean non chok wenecharan (nengeni Doctrine and Covenants 121:36). A amokut angangan ren pesepes, engino-ngeni, umoumoch, tipetekison, tong, me kirekiroch (nengeni Doctrine and Covenants 121:41–42).

Ekkana ra omokutu angangen mumutan pristut rese echimwa ekkoch ren ar mochen. Rese aea ren ar repwe pusin ekiekir nge esap ren ekkoch.

3.5

Manamanen Pristut

Manamanen pristut ina ewe manaman ren minne Kot a efeiochu Noun semirit. An Kot manamanen pristut a no ngeni meinisin chon ewe Mwichefen—fefin me mwan—nupwen ra aponueta ekkewe pwon mi pin ra fiti I ne fori . Ekkewe memper ra fori ekkewe pwon mi pin nupwen ra angei ekkewe angangepin me ren pristut. (Nengeni Doctrine and Covenants 84:19–20.)

Ekkewe feiochun manamanen pristut ekkewe memper ra tongeni angei a pachenong:

• Emwenin manauer.

• Amemefin ar repwe sinei ifa ussun ar repwe anisi chon famini me ekkoch.

• Pochokun ne nikitu me ngas seni ekkewe sosot.

• Niffangen ewe Ngun ar repwe kunaochu ar kewe nipwakoch.

• Pekin Pwarata ren sinei ifa ussun repwe awesano ewe angang ra efeioch ngeni, ewis ngeni, ika fin ngenir ar repwe fori.

• Aninnis me pochokun om kopwe winiti ussun Jises Kraist me Samach won Nang.

3.5.1

Ekkewe Pwon mi Pin

Ew pwon mi pin a ew etipeew nefinen Kot me Noun kewe semirit. Kot a awora annukun ewe pwon mi pin, me Noun kewe semirit ra tipeew ngeni ar repwe anneasosichi ekkei annuk. Kot a pwon pwe epwe efeiochu Noun kewe semirit nupwen ra aponueta ewe pwon mi pin.

Meinisin ion mi nikitu tori nesoponon ne aponueta ar ekkewe pwon mi pin repwe angei manau esemuch (nengeni 2 Nifai31:17–20; Doctrine and Covenants 14:7).

Ekkewe sam me in, sou emwenin Mwichefen, me ekkoch repwe anisi aramas ne amonata ar repwe fori ekkewe pwon mi pin nupwen ra angei ekkewe angangepinin ewe kapas allim. Repwe tumunochu pwe ewe aramas epwe weweiti ekkewe annuk mi pin i epwe fori. Mwirin an emon aramas fori ew annuk mi pin, ra anisi i an epwe aponueta. (Nengeni Mosaia 18:8–11, 23–26.)

3.5.2

Ekkewe Angangepin

Ew angangepin a ew angang mi pin a for meren ewe mumutan ewe pristut.

Non chommong angangepin, aramas ra fori ekkewe annuk mi pin ngeni Kot. Ekkewe awewe mi pachenong papatais, ewe sakramen, ewe efeioch non tempel, me ewe angangepinen ririn apupunu.

Ekkewe angangepinin amanaua me manau mi tekia ra auchea ren manau esemuch. Ren soposopun poraus nengeni 18.1.

3.6

Ewe pristut me ewe Imw

Meinisin chon Mwichefen kewe ra aponueta ar kewe pwon mi pin—fefin, mwan, me semirit—ra efeioch meren An Kot manamanen pristut non imwer kewe ar repwe apochokuna pusin ir me ar kewe famini (nengeni 3.5). Ei manaman epwe anisi ekkewe memper ne fori An Kot angangen amanaua me manau mi tekia non pusin manauer me ekkewe famini (nengeni 2.2).

Ekkewe mwan mi wor rer ewe Melchizedek Pristut ra tongeni awora ekkewe efeiochun pristut ngeni ekkewe chon famini ar repwe awora emwen, echikara, me kinamwein netip. Nupwen ra mochen, chon Mwichefen ra pwan tongeni kutta ekkei efeioch seni ekkewe ekkoch chon famini, ekkewe mwan chon iamwir, ika ekkewe sou emwenin Mwichefen non nenier kewe.