4.

Wisen sou emwen me mwichen opungupung non ewe Mwichefenin Jises Kraist

4.0

Nepoputan

Ren emon sou emwen non ewe Mwichefen, kafen koko ren memefin nang seni noun Kot kewe chon angang mi mumuta. A wor om ewe tufichin aninis non an Samach won Nang angangen “[wato] ewe manau fochofoch me manau esemuch ngeni aramas” (Moses 1:39).

4.2

Nongonongun Wisen Sou Emwen non ewe Mwichefen

Non fansoun An ewe angangen afanafan won fonufan, ewe Chon Amanau a fori ewe minen apiru ren wisen sou emwen ren An Mwichefen. An auchean popun ina an fori mochenin Saman Kot won Nang me anisi ekkoch ar repwe weweiti me manaueni An kapas allim (nengeni John 5:30; Mosaia 15:7).

Kutta an ewe Samon emwen an epwe anisuk ne kaeo me awesano ekkewe angang ren wisom.

4.2.1

Amoneta non Pekin Ngun

Jises a amonata Inisin non pekin ngun ren An ewe angang won fonufan (nengeni Luke 4:1–2). En kopwe pwan amonakota non pekin ngun ren om kopwe arap ngeni Samach Kot won Nang ren iotek, kaeo ekkewe pukefel, me anneasosich ngeni an kewe annuk.

Kutta om pekin pwarata om kopwe weweiti ewe mochen ren ekkana ka emwenir me ifa ussun kopwe awesano ewe angang Kot a kokoruk om kopwe fori.

Ewe Samon a fen pwan pwonei pwe epwe wato ekkewe nifangen ngun won ekkana ir mi kukuter (nengeni Doctrine and Covenants 46:8).

4.2.2

Iamwiri meinisin Noun Kot Semirit

Tongei ekkewe aramas ka angang ngenir ussun Jises a fori. Iotek “fiti unusen pochokunen netip” pwe oupwe urono ren An tong (Moronai 7:48).

Anisi emon me emon aramas ne anononuono ar siwin me apochokuna ar nuku non Samach won Nang me Jises Kraist. Anisir pwe repwe amonata ar repwe fori ekkewe pwon mi pin nupwen ra angei ar kewe pwan angangepin. Apochokunar repwe aponueta ekkewe pwon mi pin ra fen fori me angei ekkewe feiochun aier sefan.

4.2.3

Osukuna ewe Kapas Allimen Jises Kraist

Meinisin sou emwen ir sense. Achocho ngeni ne apiru An ewe Chon Amanau minen apiru ussun emon sense (nengeni uwokisin 17; Osukun non napanapen an ewe Chon Amanau osukun). Seni om kewe kapas me foffor, osukuna ewe nongonongun Jises Kraist me ekkewe nongonongun An kapas allim (nengeni 3 Nifai 11:32–33; Doctrine and Covenants 42:12–14).

Osukun seni ekkewe pukefel me ekkewe kapas seni ekkewe soufosun fansoun soponon (nengeni Doctrine and Covenants 52:9).

Ika ka kokko ika okuno ngeni om kopwe wisen emweni non ew mwichen Mwichefen ika pekin urumot, tumunu pwe ewe osukun epwe mwirino foforun me pung nongonongun (nengeni Doctrine and Covenants 50:21–23).

4.2.4

Emwen non Wenechar

Emon me emon officer chon nemenem a angang fan emwenien emon aramas a omochu ekkewe pristut kii (nengeni 3.4.1). Ei eteten a awora tetenoch me fatochun kinikinin wis ren sekinin me pekin chon masamas won non An ewe Samon ewe angang.

Officer chon nemenem a tongeni epwe okunou ngeni pwan emon aramas ew angang epwe fori ren chok mochomochen fansoun an epwe emweni.

Emon sou emwen ewe a emweni non ew mwicheichen Mwichefen, mwich, ika pekin urumot epwe tumunu pwe An ewe Samon ekkewe popun epwe fisino. Non an fori ei, ewe sou emwen epwe apiru ekkewe nongonongun ewe kapas allim, annukun Mwichefen, me ewe emwen seni ewe Ngun mi Fel.

Ew kokko ika okuno an epwe nemenem ese fori an ewe aramas ewe a angei epwe kon auchea ika namot mwen ekkoch (nengeni Doctrine and Covenants 84:109–10).

Ese tufich an emon epwe oumwesi emon an epwe emwen non ese nifinifin mwicheich non An ewe Samon ewe Mwichefen (nengegni Doctrine and Covenants 121:34–37).

4.2.5

Ngeni Wiser ren Sekinin me Eteneki Foforun

Ewe Chon Amanau a ngeni Noun kewe chon kaeo ekkewe mwirinon pekin angang me pekin sekinin (nengeni Luke 10:1). I a pwan ngenir ew tufich ar repwe angei niwinin ewe angang a kawor ngenir ar repwe fori. (nengeni Luke 9:10).

Ussun emon sou emwen, ka tongeni anisi ekkoch ar repwe marita ren om okunou ngenir ekkewe angang repwe fori. Achocho ne apachanong meinisin memper ne fori An Kot ewe angang.

Ngeni wiser epwe pwan fori om angang epwe fetanoch. Kutta ewe emwen seni ewe Ngun mi Fel ussun met kopwe awiser non pwe kopwe tongeni anonga om ekiek won met tetenin ekkon auchea.

4.2.6

Amonata Ekkoch ar Repwe Chon Emwen me Sense

Nupwen ka ekieki ion epwe tongeni fori ekkewe wis ika angang non Mwichefen, kopwe iotek. Chemeni pwe ewe Samon epwe etiwer ekkana I a kori. Met a kon auchea pwe repwe mochen repwe fori angang, repwe tekisoson ne kutta an ewe Samon aninis, me achocho ngeni ar repwe nimenimoch.

4.2.7

Ota Ekkewe Mwich, Nesen, me pekin Urumot fiti Fatochun ekkewe Popun

Kutta ewe emwen an ewe Ngun non kokkotun ekkewe mwich, nesen, me pekin urumot ekkewe a wor fatochun popun. Ekkei popun repwe apochokuna emon me emon aramas me famini, uweireto ar repwe arap ngeni Kraist, me aninis ne awesi An Kot angangen amanaua me manau mi tekia (nengeni sopwun 1 and 2).

4.2.8

Cheki Nonnomun Om Tiniken

Nenengen sefani iteitan wisom kewe me maritan non pekin ngun ussun emon sou emwen. Pwan ekieki ewe marita an ekkana ka emwenir.

Om fetanoch ussun emon sou emwen a fen affat ren om nikitu ne anisi noun Kot kewe semirit ne winiti noun Jises Kraist chon kaeo mi uren epinukunuk. Ka tongeni sinei pwe ewe Samon a pwapwa ren om achocho nupwen ka mefi ewe Ngun a angang non en.

4.3

Ekkewe Mwichen opungupung non ewe Mwichefen

Ewe Samon a fen aiti ekkewe sou emwenin An Mwichefen ar repwe ourour fengen ne fori An ewe angang (nengeni Doctrine and Covenants 41:2–3). Ekkewe mwichen opungupung ra awora tufichin ekkewe chon mwichefel ar repwe angei ar pekin pwarata nupwen ra kuta ar weweiti ekkewe mochen an noun Kot kewe semirit me ota ifa ussun repwe anisir ne atawei kewe mettoch.

4.4

Nongonongun Fetanochun ekkewe Mwichen Opungupung

4.4.1

Popun ekkewe Mwichen Opungupung

Mwichen opungupung ra awora auchean popun repwe anisi ekkewe memper ar repwe angei ekkewe angangepin me aponueta ekkewe pwon mi pin mi akoko ngeni.

4.4.2

Pekin ammonata ren Mwichen Opungupung

Ekkewe presetensi me mwichen opungupung repwe chok fori mwich iteitan. Ekkei sou emwen ra kutta an ewe Samon emwen non kokkotun ekkewe mwichen opungupung. Ra pwan kutta met mi katonong seni ekkewe chon mwichen opungupung non ekiekin met repwe porous won.

Ekkewe sou emwen ra mut ngeni chon mwichen opungupung ar repwe sinei met repwe fosun won me mwen ewe chufengen. Chon mwichen opungupung ra amonata ar repwe aporousa mefier ussun ekkei mettoch.

4.4.3

Poporous me Pungunon Ekiek

Atun ew mwich an ewe mwichen opungupung, ewe sou emwen (ika emon ewe souemwen a fini) a awewei ewe mettoch ra ekieki. Iwe ewe souemwen a apochokuna ewe poporaus nefinen meinisin ekkewe chon mwichen opungupung, ra kapaseis me kukuta memefin ekiek.

Ekkewe memper ra aea fengen ekkewe memef me rongorong fengen non sufon. Nupwen ra kukuta ar repwe sinei an ewe Samon mochen, ew memefin ewe ngun me tipechu a tongeni pwano.

Non ew mwichen opungupung minne a pachenong ekkewe fefin me mwan, ewe sou emwen a kuta ewe koukun an epwe weweiti me ekkewe ekiek seni ir me ruepek. Ekkewe fefin me mwan fan chommong a wor ar sokofesenin ekiek ena a awora auchean an epwe anonno pok.

Emon sou emwen a emweni ewe poporaus an ewe mwichen opungupung. Iwe nge, atewe ika neminewe epwe anapa an rongorong nap seni an epwe fos.

Mwirin ewe poporaus, ewe sou emwen epwe ne ew me nein ekiek won ew anen an epwe omokutu ika oururono ew pungunon ekiek nupwen epwe kukuta soposopun poraus me emwen.

4.4.4

Tipechu

Chon ewe mwichen opungupung ra kukuta ar repwe winiti ew non ar mochen me popun fiti Samach Kot won Nang me Jises Kraist. Ra achocho fan iten tipechu non ar poporaus me pungunon ekkewe ekiek.

4.4.5

Anganga me Eteneki Foforun

Napengeni ekkewe chon mwichen opungupung ra fori ar angang me mwen me pwan mwirin ekkewe mwich an ewe mwichen opungupung. Non fansoun ekkewe mwich, ra kuta memef seni nang non forun ekkewe kokkot ar repwe fori ekkewe pungun ekiek. Ewe sou emwenin mwichen opungupung a korato ekkewe memper ar repwe awesano kewe angang mi akoko ngeni ekkei kokkot.

Chon ewe mwichen opungupung ra repotei ar kewe angang a fin ngenir repwe fori. Napengeni fetanochun a anonga won soposoponon ekiek me fansoun cheki-sefani ren ekkewe angang.

4.4.6

Monomon

Ekkewe sou emwen ra tumunoch ne nounou kapas esap awora osukosuk nupwen ra aporousa porousen pusin emon ngeni ew mwichen opungupung. Napengeni ra kuta an ewe emon memper mumuta ren ar repwe aporousa ei porous.

Ekkewe chon mwichen opungupung resap aporousa porausen emon me nukun ewe mwichen opungupung tiwenon chok ika mi auchea an epwe awesano ew angang seni ewe sou emwenin ewe mwichen opungupung.

Ekkoch mettoch ra kon wor meninin ar repwe uweato me mwen mesen unusen ewe mwichen opungupung.