4.

Li b’eresink ut eb’ li jolomil ch’uut sa’ lix Iglees li Jesukristo

4.0

Xtikibʼankil

Jo’ aj jolominel sa’ li Iglees, laa’at b’oqb’ilat chi musiq’anb’il, rik’in xtz’uumaleb’ re lix moos li Kolonel li k’eeb’ileb’ xwankil. K’eeb’il aawe li usilal re tenq’ank sa’ lix k’anjel li qaChoxahil Yuwa’ re “xk’eeb’al chi uxmank lix kolb’al chiru li kamk ut lix yu’am chi junelik li winq” (Moises 1:39).

4.2

Eb’ li na’leb’ chirix b’eresink sa’ li Iglees

Naq kiwan sa’ lix k’anjel sa’ li ruchich’och’, li Kolonel kik’amok b’e sa’ xk’utb’al chan ru taa’uxq li b’eresink sa’ lix Iglees. Li q’axal kiraj a’an, a’an k’anjelak chiru lix Choxahil Yuwa’, ut xtenq’ankileb’ li ras riitz’in chixtawb’al ru ut chixyu’aminkil lix evangelio (chi’ilmanq Jwan 5:30; Mosiah 15:7).

Sik’ lix b’eresihom li Qaawa’ li taatenq’anq aawe chixtzolb’al ut chixb’aanunkil li teneb’anb’il sa’ aab’een sa’ laa b’oqb’al.

4.2.1

Li kawresink-ib’ sa’ musiq’ej

Li Jesus kixkawresi rib’ sa’ musiq’ej choq’ re lix k’anjel sa’ li ruchich’och’ (chi’ilmanq Lukas 4:1–2). Laa’at ajwi’ nakakawresi aawib’ sa’ musiq’ej rik’in jilok rik’in laa Choxahil Yuwa’ rik’in tijok, xtzolb’aleb’ li loq’laj hu, ut xpaab’ankileb’ lix taqlahom.

Sik’ li k’utb’esinb’il na’leb’ re xtawb’al ru li rajomeb’ ru li ani b’eresinb’ileb’ aab’aan, ut chan ru xtz’aqob’resinkil ru li k’anjel li xatxb’oq wi’ li Dios.

Li Qaawa’ kixyeechi’i ajwi’ xk’eeb’al li musiq’ejil maatan reheb’ li neke’sik’ok reheb’ (chi’ilmanq Tzol’leb’ ut Sumwank 46:8).

4.2.2

K’anjelak chiru chixjunileb’ li ralal xk’ajol li Dios

Charaheb’ li ani nakatk’anjelak wi’, jo’ chanru kixb’aanu li Jesus. Chattijoq “chi anchal lix metz’ew aach’ool” re tatnujaq rik’in lix rahom (Moroni 7:48).

Tenq’aheb’ li kristiaan chixchamob’resinkil lix jalajikeb’ xch’ool ut chixkawob’resinkil lix paab’aaleb’ chirix li qaChoxahil Yuwa’ ut chirix li Jesukristo. Tenq’aheb’ chixkawresinkil rib’ chi ok sa’ sumwank rik’in xk’ulb’aleb’ li k’ojob’anb’il k’anjel. Waklesi xch’ooleb’ chixpaab’ankileb’ li sumwank okenaqeb’ wi’, ut chixk’ulb’al li osob’tesink nachal rik’in xjalb’aleb’ xk’a’uxl.

4.2.3

Xk’utb’al lix evangelio li Jesukristo

Chixjunileb’ laj jolominel wankeb’ choq’ aj k’utunel. Yal aaq’e chixb’aanunkil jo’ kixb’aanu li Kolonel jo’ aj k’utunel (chi’ilmanq ch’ol 17; Li K’utuk jo’ li Kolonel). Rik’in laa waatin ut laa b’aanuhom, k’ut li tzol’leb’ chirix li Jesukristo, ut eb’ li na’leb’ chirix lix evangelio (chi’ilmanq 3 Nefi 11:32–33; Tzol’leb’ ut Sumwank 42:12–14).

K’ut li k’a’ru wan sa’eb’ li loq’laj hu, ut li raatineb’ li profeet sa’ roso’jikeb’ li kutan (chi’ilmanq Tzol’leb’ ut Sumwank 52:9).

Wi b’oqb’ilat malaj k’eeb’il aak’anjel chi jolomink sa’ jun ch’utam malaj k’anjel re li Iglees, k’e reetal naq li k’utuk li na’uxman nawaklesin ch’oolej, ut naxk’am rib’ rik’in li yaalil tzol’leb’ (chi’ilmanq Tzol’leb’ ut Sumwank 50:21–23).

4.2.4

Jolomink sa’ tiikilal

Li junjunq jolominel aj k’anjel nak’anjelak rub’el xwankil li ani nak’amok re xlaawil li tijonelil (chi’ilmanq 3.4.1). Li k’ojlajik a’in naxk’e tustuukilal, ut naxk’ut ani tz’aqal wan xwankil ut wan xteneb’ankil chixb’aanunkil lix k’anjel li Qaawa’.

Li jolomil aj k’anjel naru tixk’e re jalan chik kristiaan jun xtaqlankil chi jolomink.

Laj jolominel li najolomink sa’ jun ch’uut, ch’utam, malaj k’anjel re li Iglees naxk’e reetal naq taab’aanumanq li rajom li Qaawa’. Naq tixb’aanu, laj jolominel naxtaaqeheb’ li na’leb’ re li evangelio, eb’ li chaq’rab’ re li Iglees, ut lix b’eresihom li Santil Musiq’ej.

Li b’oqe’k malaj taqlaak chi jolomink ink’a’ naraj naxye naq li ani nak’uluk re nim xwankil chiru yalaq chik ani (chi’ilmanq Tzol’leb’ ut Sumwank 84:109–10).

Moko us ta xrahinkil ru li jolomink sa’ junaq ch’uut sa’ lix Iglees li Qaawa’ (chi’ilmanq Tzol’leb’ ut Sumwank 121:34–37).

4.2.5

Xjek’b’al li wankilal ut xq’axtesinkil resil li k’anjel

Li Qaawa’ kixk’e reheb’ lix tzolom eb’ li k’anjel ut li teneb’ank li aajeleb’ ru (chi’ilmanq Lukas 10:1). Jo’kan ajwi’ kixk’eheb’ xhoonal re te’xq’axtesi resil li k’anjel li k’eeb’il chaq reheb’ (chi’ilmanq Lukas 9:10).

Jo’ aj jolominel, laa’at naru taatenq’aheb’ li komon chi k’iik naq taak’eheb’ xk’anjel. Yal aaq’e re naq chixjunileb’ li komon te’tz’aqonq sa’ xb’aanunkil lix k’anjel li Dios.

Jo’kan ajwi’, rik’in xjek’b’al li k’anjel, q’axal usaq wi’chik laa k’anjel laa’at. Sik’ aab’eresinkil rik’in li Musiq’ej chirix k’a’ru k’anjel taajek’, re taajayali aawib’ rik’in li k’a’ru aajel ru choq’ aawe.

4.2.6

Xkawresinkileb’ li komon chi wank choq’ aj jolominel ut aj k’utunel

Naq yookat chi k’oxlak chirix ani taaruuq taab’oqe’q malaj taak’ehe’q xtaqlankil chixb’aanunkil junaq k’anjel sa’ li Iglees, b’aanu rik’in tijok. Chijultiko’q aawe naq li Qaawa’ naxtenq’a li ani b’oqb’il xb’aan. Li k’a’ru mas aajel ru, a’an naq wanqeb’ xch’ool chi k’anjelak, naq te’xsik’ xtenq’ankil rik’in li Qaawa’, ut naq yalb’ilaqeb’ xq’e chi wank chi k’ulub’ej.

4.2.7

Xk’uub’ankileb’ li ch’utam, li tzolok, ut li k’anjel li te’wanq rajb’al

Chasik’ aab’eresinkil rik’in li Musiq’ej sa’ xk’uub’ankileb’ li ch’utam, li tzolok, ut eb’ li k’anjel, re te’wanq rajb’aleb’ li ch’olch’o ru. Tento naq eb’ li k’anjel a’in te’xk’e xkawilaleb’ li komon ut li junkab’al, te’xjiltesiheb’ rik’in li Kristo, ut te’tenq’anq chixb’aanunkil lix k’anjel li Dios re li kolb’a-ib’ ut li taqenaqil loq’al (chi’ilmanq ch’ol 1 ut 2).

4.2.8

Xk’eeb’al reetal lix yalb’al aaq’e

Chi kok’ aj xsa’ taak’e reetal laa teneb’ankil, ut laa k’iijik jo’ aj jolominel. K’oxla ajwi’ lix k’iijikeb’ li ani b’eresinb’ileb’ aab’aan.

Chan ru nakat-el jo’ aj jolominel nab’ise’ rik’in chan ru naq nakak’e aach’ool chixtenq’ankileb’ li ralal xk’ajol li Dios chi wank choq’ chaab’il xtzolom li Jesukristo. Naru nakanaw naq li Qaawa’ nasaho’ xch’ool rik’in laa k’anjel naq nakaweek’a li Musiq’ej chi k’anjelak aawik’in.

4.3

Eb’ li jolomil ch’uut sa’ li Iglees

Li Qaawa’ xye reheb’ laj jolominel sa’ lix Iglees naq te’xk’uub’ xna’leb’ sa’ komonil sa’ xb’aanunkil lix k’anjel (chi’ilmanq Tzol’leb’ ut Sumwank 41:2–3). Sa’eb’ li jolomil ch’uut, eb’ li komon sa’ li ch’uut neke’ru chixk’ulb’al li k’utb’esinb’il na’leb’ naq neke’xsik’ xtawb’al ru li rajomeb’ ru li ralal xk’ajol li Dios, ut chan ru xk’eeb’al li ajb’il ru xb’aaneb’.

4.4

Eb’ li na’leb’ re te’k’anjelaq chi ch’olch’o li jolomil ch’uut

4.4.1

K’a’ru rajb’aleb’ li jolomil ch’uut

Eb’ li jolomil ch’uut neke’xjayali rib’ rik’in xtenq’ankileb’ li komon chixk’ulb’aleb’ li k’ojob’anb’il k’anjel ut chixpaab’ankileb’ li sumwank li neke’ochb’eenink reheb’.

4.4.2

Li kawresink-ib’ choq’ reheb’ li ch’utam reheb’ li jolomil ch’uut

Tento naq eb’ li awa’b’ejil ut li jolomil ch’uut te’ch’utlaaq chi kok’ aj xsa’. Eb’ laj jolominel a’in neke’xsik’ k’ame’k xb’e xb’aan li Qaawa’ sa’ xk’uub’ankileb’ li ch’utam re li jolomil ch’uut. Neke’xsik’ ajwi’ xna’leb’ rik’ineb’ li komon sa’ li jolomil ch’uut re xnawb’al k’a’ru chi aj-ix te’aatinaq.

Eb’ laj jolominel neke’xye resil chi junxilaj reheb’ li komon sa’ li jolomil ch’uut k’a’ru li te’aatinaq wi’. Eb’ li komon sa’ li jolomil ch’uut neke’xkawresi rib’ chixwotzb’al li k’a’ru neke’xk’oxla chirixeb’ li na’leb’ a’an.

4.4.3

Li aatinak ut li xaqab’ank na’leb’

Sa’ jun ch’utam re li jolomil ch’uut, laj jolominel (malaj anihaq chiq li k’eeb’il xtaqlankil xb’aan laj jolominel) naxch’olob’ k’a’ru li na’leb’ li taak’oxlamanq. Laj jolominel naxwaklesi xch’ooleb’ chixjunil li komon sa’ li ch’uut re te’aatinaq, ut napatz’ok ut naxsik’ li na’leb’ rik’ineb’.

Eb’ li komon neke’xwotz li k’a’ru neke’xk’oxla, ut neke’rab’i rib’ chirib’ileb’ rib’ rik’in oxloq’. Naq neke’xsik’ xnawb’al k’a’ru naraj li Qaawa’, naru nanumta jun musiq’ej re k’utb’esink ut re junajil.

Sa’ jun jolomil ch’uut wankeb’ wi’ li ixq jo’ ajwi’ li winq, laj jolominel naxsik’ xna’leb’ rik’ineb’ li ixq jo’ ajwi’ rik’ineb’ li winq. Eb’ li ixq ut eb’ li winq jalan jalanqeb’ lix na’leb’, li naxk’e chi tz’aqlok ru li tawok na’leb’.

Jun aj jolominel nak’amok b’e sa’ li aatinak. A’ut tento naq laj jolominel mas wi’chik li ab’ink tixb’aanu chiru li aatinak.

Chirix li aatinak, laj jolominel naru naxsik’ ru k’a’ru taab’aanumanq, malaj tixb’ay xsik’b’al ru re tixsik’ xkomon chik li na’leb’ ut li b’eresiik.

4.4.4

Li junajil

Eb’ li komon sa’ li jolomil ch’uut neke’xsik’ wank sa’ junajil rik’in lix Choxahil Yuwa’ ut rik’in li Jesukristo sa’ li rajomeb’ ut lix na’leb’eb’. Neke’xsik’ ajwi’ wank sa’ junajil naq neke’aatinak ut neke’xxaqab’ xna’leb’.

4.4.5

Li k’anjelak ut xq’axtesinkil resil li k’anjel

Eb’ li komon sa’ li jolomil ch’uut neke’xb’aanu xk’ihal lix k’anjel rub’elaj ut chirix li ch’utam re li jolomil ch’uut. Sa’eb’ li ch’utam, neke’xsik’ li Musiq’ej sa’ xk’uub’ankil li na’leb’ re xk’anjelankil li k’a’ru xsik’man ru xb’aanunkil. Laj jolominel re li jolomil ch’uut naxpatz’ reheb’ li komon naq te’xb’aanu li k’a’ru taqlanb’ileb’ wi’ sa’eb’ li k’anjel a’in.

Eb’ li komon sa’ li jolomil ch’uut neke’xq’axtesi resil lix taqlankileb’. Re taaruuq taa’uxq li usaak, aajel ru xk’eeb’al reetal li k’anjel chiru naab’al kutan, ut xpatz’b’al resil li k’a’ru taqlanb’il.

4.4.6

Ink’a’ xyeeb’al resileb’ li komon

Eb’ laj jolominel, naq neke’xwotz li na’leb’ chirix jun komon sa’ jun jolomil ch’uut, tento te’xb’aanu chi k’oxlanb’il. Us naq te’xpatz’ xliceens rik’in li komon re te’xwotz li na’leb’.

Aajel ru naq eb’ li komon sa’ li jolomil ch’uut ink’a’ te’xwotz li na’leb’ chirix jun li kristiaan rik’in anihaq chik li moko wan ta sa’ li jolomil ch’uut, ka’ajwi’ wi na’ajman ru re xb’aanunkil li k’a’ru taqlanb’il xb’aan laj jolominel.

Wan naq wan jun na’leb’ li q’axal ch’a’aj, ut ink’a’ us xyeeb’al chiru chixjunil li jolomil ch’uut.