8.

Li molam reheb’ li xb’eenil

8.1

K’a’ru rajb’al, ut chan ru naq k’uub’anb’il

8.1.1

K’a’ru rajb’al

Eb’ li winq li k’ulub’ejeb’ li ak wankeb’ 18 chihab’ reheb’ naru neke’xk’ul li Tijonelil re Melkisedek ut neke’k’ojob’aak sa’ ropiis li xb’eenil. Jun winq li nak’ojob’aman sa’ li opiis a’in na’ok sa’ jun loq’laj sumwank naq tixtenq’a li Dios sa’ xk’eeb’al chi uxmank lix k’anjel (chi’ilmanq Tzol’leb’ ut Sumwank 84:33–44).

8.1.2

Li wank choq’ komon sa’ lix molameb’ li xb’eenil

Sa’ li junjunq chi teep wan jun xmolameb’ li xb’eenil. Sa’ a’an wankeb’ li winq a’in:

• Chixjunileb’ li xb’eenil sa’ li teep.

• Chixjunileb’ li winq li maji’ neke’ok choq’ xb’eenil (chi’ilmanq 8.4).

• Chixjunileb’ li taqenaqil aj tij sa’ li teep li ink’a’ yookeb’ chi k’anjelak sa’ jun awa’b’ejil re oqech, jun obiispil, jun taqenaqil ch’utam, malaj jo’ yuwa’b’ejil aj k’anjel.

Jun saaj winq naru na’ok chi wulak sa’eb’ li ch’utam re lix molameb’ li xb’eenil naq naxb’aanu 18 chihab’, maak’a’ naxye ma ak xk’ojob’aak choq’ xb’eenil. Naq ak wan 19 chihab’ re, malaj naq na’el chaq sa’ rochoch, jo’ re xik sa’ li universidad malaj re xik sa’ jun li mision, tento naq taak’ojob’aaq choq’ xb’eenil wi k’ulub’ej a’an.

Eb’ li winq li sumsuukeb’ a’ut maji’ wan 18 chihab’ reheb’ wanqeb’ sa’ lix molameb’ li xb’eenil, us ta maji’ neke’k’ojob’aak jo’ xb’eenil.

8.2

Li tz’aqonk sa’ li k’anjel re li kolb’a-ib’ ut li taqenaqil loq’al

8.2.1

Xyu’aminkil lix evangelio li Jesukristo

8.2.1.2

Xtzolb’al li evangelio sa’eb’ li ch’utam re li molam

Neke’b’aanuman li ch’utam sa’ li xkab’ ut li xkaa domingo chiru li jun po. Neke’wan chiru 50 k’asal. Li awa’b’e’jil re lix molameb’ li xb’eenil neke’xkawresi li ch’utam a’in. Jun komon sa’ li awa’b’ejil re li molam nak’amok b’e.

Sa’eb’ li ch’utam re li molam neke’tzolok chirix jun malaj numenaq jun li aatin li xyeeman sa’ li jolomil ch’utub’aj-ib’ li toja’ xnume’.

8.2.1.3

Eb’ li kok’ k’anjel

Eb’ li awa’b’ejil re lix molameb’ li xb’eenil naru neke’xk’uub’eb’ li kok’ k’anjel. Lix k’ihaleb’ li kok’ k’anjel a’in ink’a’ neke’b’aanuman sa’ li domingo, chi moko sa’ lunes ewu.

8.2.2

Xtenq’ankileb’ li wankeb’ rajom ru

8.2.2.1

Li ilok komon

Eb’ li komon sa’ lix molameb’ li xb’eenil neke’k’ehe’ xtaqlankileb’ jo’ aj ilol komon xb’aan li awa’b’ejil re li molam. Re xtawb’al xkomon chik li na’leb’, chi’ilmanq ch’ol 21.

8.2.2.2

Li k’a’ru ajb’il ru chiru jarub’aq kutan

Eb’ li winq aj ilol komon neke’xsik’ xnawb’al k’a’ru rajomeb’ ru li ani neke’k’anjelak wi’, ut xtenq’ankileb’ rik’in a’an. Wan naq eb’ li komon te’wanq rajomeb’ ru chiru jarub’aq kutan, jo’ naq nawan li yajel, li yo’laak, li kamk, xsachik li trab’aaj, ut xkomon chik li k’a’ru nak’ulman.

Naq ajb’il ru, eb’ li winq aj ilol komon neke’xpatz’ xtenq’ankileb’ rik’in li awa’b’ejil re li molam.

8.2.2.3

Li ajb’il ru chiru naab’al kutan, ut li tenq’ank-ib’ xjunes

Chi b’eresinb’il xb’aan li obiisp, eb’ li awa’b’ejil re lix molameb’ li xb’eenil ut li Komonil re Tenq’ank neke’xtenq’aheb’ li komon rik’in li k’a’ru ajb’il ru xb’aaneb’ chiru naab’al kutan, ut rik’in li tenq’ank-ib’ xjuneseb’.

Li awa’b’ej re lix molameb’ li xb’eenil, re li Komonil re Tenq’ank, malaj jalan chik aj jolominel naxtenq’a li komon malaj li junkab’al chixtikib’ankil jun k’uub’anb’il na’leb’ re xtenq’ankil rib’ xjunes. Eb’ laj ilol komon winq malaj ixq naru ajwi’ neke’tenq’an rik’in li k’uub’anb’il na’leb’ a’an.

8.2.2.4

Naq nakam jun komon sa’ li teep

Naq nakam jun komon sa’ li teep, eb’ li awa’b’ejil re lix molameb’ li xb’eenil ut li Komonil re Tenq’ank neke’k’ojob’an ch’oolej ut neke’xyeechi’i li tenq’ank. Chi b’eresinb’il xb’aan li obiisp, naru neke’tenq’an rik’in li muquk.

Re xtawb’al xkomon chik li na’leb’, chi’ilmanq 38.5.8.

8.2.3

Xb’oqb’aleb’ chixjunil chixk’ulb’al li evangelio

Li awa’b’ej re lix molameb’ li xb’eenil naxk’e xtaqlankil jun komon sa’ li awa’b’ejil, re taatenq’anq chixb’eresinkil li k’anjel re xjultikankil li evangelio sa’ li teep. A’an nak’anjelak rochb’een li ani k’eeb’il xtaqlankil sa’ li awa’b’ejil re li Komonil re Tenq’ank, re te’xk’uub’ li k’anjel a’in sa’ komonil.

Chi’ilmanq 23.5.1 ut 23.5.3.

8.2.4

Xk’amb’aleb’ li junkab’al sa’ junajil sa’ li junelik q’e kutan

Li awa’b’ej re lix molameb’ li xb’eenil naxk’e xtaqlankil jun komon sa’ li awa’b’ejil re taatenq’anq chixb’eresinkil li k’anjel re li santil ochoch ut resilal li junkab’al sa’ li teep. A’an nak’anjelak rochb’een li ani k’eeb’il xtaqlankil sa’ li awa’b’ejil re li Komonil re Tenq’ank, re te’xk’uub’ sa’ komonil li k’anjel a’in.

Chi’ilmanq 25.2.2.

8.3

Eb’ laj jolominel sa’ lix molameb’ li xb’eenil

8.3.1

Li awa’b’ejil re oqech ut li obiisp

Li awa’b’ej sa’ lix molameb’ li xb’eenil wan rub’el xwankil li awa’b’ejil re oqech. A’an nach’utla chi kok’ aj xsa’ rik’in jun komon sa’ li awa’b’ejil re xk’ulb’al xb’eresinkil ut re xq’axtesinkil resil li k’a’ru teneb’anb’il sa’ xb’een.

Li awa’b’ej re lix molameb’ li xb’eenil naxk’ul ajwi’ xb’eresinkil rik’in li obiisp, a’an li jolominel aj k’anjenel sa’ li teep. Neke’ch’utla chi kok’ aj xsa’.

8.3.2

Li komon re li taqenaqil ch’utam

Li awa’b’ejil re oqech naxk’e xtaqlankil jun komon re li taqenaqil ch’utam re tixb’aanu ruuchileb’ sa’ li junjunq chi molam reheb’ li xb’eenil. Tusb’il k’a’ru lix teneb’ankil a’an sa’ 6.5.

8.3.3

Li awa’b’ejil re lix molameb’ li xb’eenil

8.3.3.1

Chan ru neke’b’oqman li awa’b’ejil re lix molameb’ li xb’eenil

Chirix aatinak sa’ komonil rik’in li obiisp, li awa’b’ej re oqech naxb’oq jun xb’eenil malaj jun taqenaqil aj tij re taak’anjelaq jo’ awa’b’ej re lix molameb’ li xb’eenil.

Wi nim b’ayaq li teep, li awa’b’ej re lix molameb’ li xb’eenil naxk’e re li awa’b’ej re oqech lix k’ab’a’ jun malaj wiib’ xb’eenil malaj taqenaqil aj tij re te’k’anjelaq choq’ laj tenq’ aj k’ehol na’leb’.

8.3.3.2

Eb’ lix teneb’ankil

A’aneb’ a’in lix teneb’ankil li awa’b’ej re lix molameb’ li xb’eenil. Eb’ laj tenq’ aj k’ehol na’leb’ neke’xtenq’a.

• Wan sa’ li ch’uut re teep.

• Naxjolomi lix molameb’ li xb’eenil sa’ xb’aanunkil li k’anjel re li kolb’a-ib’ ut li taqenaqil loq’al (chi’ilmanq ch’ol 1).

• Naxk’uub’ ut naxjolomi lix k’anjeleb’ li winq aj ilol komon.

• Chi b’eresinb’il xb’aan li obiisp, naxk’uub’ xna’leb’ rik’ineb’ li komon sa’ li teep ak ninqeb’.

• Naxb’eresi lix k’anjel lix molameb’ li xb’eenil re xk’eeb’al xkawilaleb’ li winq sa’ li teep toj saajeb’, li maji’ neke’sumla jo’ ajwi’ li ak sumsuukeb’.

• Nach’utla rik’in li junjunq chi komon sa’ li molam sa’ junesal jun sut chiru li jun chihab’, malaj chi kok’ aj chik xsa’.

• Naxtzoleb’ li komon sa’ li molam chirix lix teneb’ankileb’ sa’ li tijonelil (chi’ilmanq Tzol’leb’ ut Sumwank 107:89). Naxtzoleb’ chirix chan ru xk’anjelankil li tijonelil re xb’aanunkileb’ li k’ojob’anb’il k’anjel re li tijonelil ut re osob’tesink.

• Naxb’eresi li tz’iib’ank hu, li taqlanb’il esil, ut li tumin re li molam (chi’ilmanq LCR.ChurchofJesusChrist.org).

8.3.3.3

Li ch’utam re li awa’b’ejil

Li awa’b’ejil re lix molameb’ li xb’eenil ut laj tz’iib’anel neke’ch’utla chi kok’ aj xsa’. Li awa’b’ej naxb’eresiheb’ li ch’utam a’in. Wan naq li komon re li taqenaqil ch’utam li k’eeb’il xtaqlankil chirix li molam a’an nawulak ajwi’.

Sa’ li ch’utam a’in, naru neke’aatinak chirix li na’leb’ a’in:

• Xk’uub’ankil chan ru xk’eeb’al xkawilaleb’ li komon sa’ li molam (ut jo’kaneb’ ajwi’ li maji’ neke’ok choq’ xb’eenil) ut eb’ lix junkab’aleb’.

• Xb’eresinkil li k’anjel re xjultikankil li evangelio ut li k’anjel re li santil ochoch ut resilal li junkab’al.

• Xb’aanunkil lix taqlankil li k’eeb’il reheb’ sa’ li ch’uut re teep.

• Xk’eeb’al reetal li k’a’ru xyeeman sa’eb’ li tz’ilok-ix reheb’ laj ilol komon.

• Xk’oxlankil ani reheb’ li winq te’k’ehe’q xb’oqb’al malaj xtaqlankileb’.

• Xkawresinkileb’ li ch’utam ut li kok’ k’anjel re li molam.

8.3.4

Laj tz’iib’anel

Wi k’ulub’anb’il xb’aan li obiisp, jun komon sa’ li awa’b’ejil re lix molameb’ li xb’eenil naru naxb’oq jun komon sa’ li molam re taawanq choq’ aj tz’iib’anel sa’ li molam.

8.4

Xtenq’ankileb’ li maji’ neke’ok choq’ xb’eenil re te’xkawresi rib’ chixk’ulb’al li Tijonelil re Melkisedek

Wankeb’ li komon winq sa’ li Iglees li maji’ neke’k’uluk re li Tijonelil re Melkisedek ut (1) ak wan 19 chihab’ re, malaj (2) maji’ wan 19 chihab’ re, a’ut ak sumsuukeb’.

Jun xteneb’ankil li awa’b’ejil re li molam a’an xtenq’ankileb’ li maji’ neke’ok choq’ xb’eenil chixk’ulb’al li Tijonelil re Melkisedek.