11.

Doulul eo an Jiron̄ ro

11.1

Un eo im Doulul eo

11.1.1

Un eo

Doulul eo an Jiron̄ ro ej jipan̄ jiron̄ ro kōm̧m̧an im kōjparok bujen ko rekwojarjar im kam̧wūlaļļo̧k oktak tok eo aer n̄an Jisōs Kraist im gospel eo An.

11.1.2

Unin Tōl eo an Doulul eo an Jiron̄ ro

“N̄aij juon leddik ejitōn bōro nejin Jined im Jemedwōj Ilan̄, kōn juon piktok ekwojarjar im mejān kajjūk indeeo.

“Āinwōt juon rikaļoor an Jisōs Kraist, Ij kajjieon̄ n̄an eromļo̧k āinwōt E. Ij kappukōt im jerbale kean̄ ko im kwaļo̧k n̄an ro jet ilo āt eo ekwojarjar Etan.

“Inaaj jutak āinwōt juon rikam̧ool an Anij ilo aolep iien im ilo aolep men otemjeļo̧k im ilo aolep jikin.

“Ilo aō kajjieon̄ n̄an karbōb n̄an mour ilo aiboojoj eo eutiejtata, Ij kaorōk menin letok eo an ukweļo̧k im kappukōt n̄an em̧m̧anļo̧k kajjojo raan. Kōn tōmak, Inaaj kōkajoorļo̧k m̧weo im̧ō im baam̧le eo aō, kōm̧m̧an im kōjparok bujen ko rekwojarjar, im bōk kain̄i ko im kōjeraam̧m̧an ko an tampeļ eo ekwojarjar.”

11.1.3

Kūlaaj ko

Jiron̄ ro rej erom̧ membōr in juon kūlaaj ilo Doulul eo an Jiron̄ ro jino ilo Jānwōde ilo iiō eo rej 12 aer iiō.

Bisoprik ro im ritōl ro rerūtto ilo Doulul eo an Jiron̄ ro rej lukkuun jar im kāālet wāween n̄an karōk kūlaaj ko ekkar n̄an iiō ko. Kajjojo kūlaaj, jekdo̧o̧n joo̧n̄an, ej aikuj wōr juon an būreejtōn im, ijo ekkar, juon ak ruo rikakpilōklōk im juon rijeje.

11.2

Bōk koņaad ilo Jerbal in Lo̧mo̧o̧r eo an Anij im Mour Ijo Eutiej Tata

11.2.1

Mour kōn Gospel eo an Jisōs Kraist

11.2.1.2

Ekkatak Gospel eo

Kweilo̧k ko kūlaaj eo rej kōm̧m̧an ilo Jabōt ruo im emān ilo kajjojo allōn̄. 50 minit aeitokan. Juon uwaan būreejtōnji eo an kūlaaj eo ej kōjeikiki. Ej tōl kūlaaj eo ilo aer riit unin kōnono eo im ko̧o̧njeļ ippān doon kōn ijjitōn̄ ko im men ko jet raorōk.

Juon uwaan kūlaaj eo ak juon ritōl erūtto ej tōl kōmeļeļe ko an gospel.

11.2.1.3

Jerbal in jipan̄ im M̧akūtkūt ko

Jerbal in jipan̄ im m̧akūtkūt ko rej aikuj kalōk naan in kam̧ool ko, kōkajoorļo̧k baam̧le ko, kōkajoorļo̧k bōro kuk an kūlaaj eo, im leļo̧k iien ko rem̧m̧an n̄an kōjeraam̧m̧an ro jet.

Jet jerbal in jipan̄ im m̧akūtkūt ko rej aikuj koba jim̧or jiron̄ im likao ro, eļaptata jodikdik ro rerūtto.

M̧akūtkūt ko lo Juon Iiō. Ilo kakobaba n̄an m̧akūtkūt ko an jodikdik ro aolep iien, jiron̄ ro remaron̄ barāinwōt bōk koņaer āinwōt kein rej ellaajrak ilo kajjojo iiō:

• Juon kāām an Doulul eo an Jiron̄ ro (lale Young Women Camp Guide

• Juon kweilo̧k eļap an jodikdik ro ilo stake ak juon ward ak N̄an Kōkajoorļo̧k Jodikdik ro (N̄KJ).

11.2.1.4

Eddōkļo̧k An Juon Make

Ilo kijejeto ko aer n̄an erom̧ āinwōt Rilo̧mo̧o̧r, jodikdik ro kar karuwaineneik er n̄an kōm̧m̧ani kōttōpar ko aer n̄an eddōkļo̧k ilo mour in jetōb, iiaio, ānbwin, im jeļāļo̧kjeņ (lale Luk 2:52).

N̄an meļeļe ko reļļapļo̧k, lale ChildrenandYouth.ChurchofJesusChrist.org.

11.2.2

Kea kōn ro Riaikuj

Jiron̄ ro rej aikuj wōr aer iien ko rem̧m̧an aolep iien n̄an jipan̄ ro jet ilo im ippān baam̧le ko aer, ilo iien m̧akūtkūt ko an jodikdik ro, im m̧akūtkūt ko aer make.

11.2.2.1

Jerbal in Karejar

Jiron̄ ro remaron̄ bōk ijjitōn̄ in jerbal in karejar ko jino ilo Jānwōde ilo iiō eo me ej jejjet 14 aer iiō. N̄an meļeļe ko reļļapļo̧k, lale jebta 21.

11.2.3

Karuwaineneik Aolep n̄an Bōk Gospel eo

Jiron̄ ro rej karuwaineneik aolep n̄an bōk gospel eo ilo aer “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9).

Jinen im jemān ajri ro im ritōl ro remaron̄ jipan̄ jiron̄ ro kōppopo n̄an kwaļo̧k gospel eo ilo aolepān mour ko aer.

11.2.4

Kakobaik Baam̧le ko n̄an Mour Indeeo

Jiron̄ ro remaron̄ jipan̄ kakobaik baam̧le ko n̄an mour indeeo ilo elōn̄ wāween ko.

• Kautiej ro jineer im jemāer im kwaļo̧k juon waanjon̄ok in mour āinwōt Kraist ilo m̧ōko m̧ōer.

• Kōppopo n̄an bōk kain̄i ko an tampeļ, ekoba m̧are n̄an indeeo.

• Kile ro jibūn im jim̧m̧an me rej aikuji kain̄i ko an tampeļ (lale FamilySearch.org).

• Bōk koņaer ilo peptaij im kapen ilo etan ro remej en ekutkut pedped wōt ioon jekjek ko.

11.3

Ritōl ro an Doulul eo an Jiron̄ ro ilo Ward

11.3.1

Bisorpik

Eddo eo jinoin tata im eļaptata an bisop eo ej n̄an kea kōn likao ro im jiron̄ ro ilo ward eo an. E im rikakpilōklōk ro an rej ekkatak etaer im meļeļe kōn jekjek ko rej pād ie ilo m̧ōko m̧ōer. Rej intōrpiuik kajjojo jiron̄ diktata ruo kōttan ilo juon iiō (lale 31.3.1).

Bisop eo ewōr juon an eddo ilo Doulul eo an Jiron̄ ro. Ej kweilo̧k emakijkij ippān būreejtōn eo an Doulul eo an Jiron̄ ro.

Bisop eo im rikakpilōklōk ro an emakijkij aer bōk koņaer ilo kweilo̧k ko an Doulul eo an Jiron̄ ro, im m̧akūtkūt ko.

11.3.2

Būreejtōnji eo an Doulul eo an Jiron̄ ro Rerūtto

Bisop eo ej kūr im kōjeno̧lo̧k juon kōrā eo erūtto n̄an jerbal āinwōt juon būreejtōn an Doulul eo an Jiron̄ ro. Eļan̄n̄e doulu eo ebwe an ļap uwaan, ej kōtļo̧k juon ak ruo kōrā ro rerūtto n̄an bōk kūr āinwōt rikakpilōklōk ro an (lale jebta 30

Ilo juon doulul eo edik, būreejtōn eo an Doulul eo an Jiron̄ ro remaron̄ wōt ritōl erūtto kar kūri n̄an Doulul eo an Jiron̄ ro. Ilo jekjek in, ej jerbal ippān jinen im jemān ajri ro n̄an karōk katak ak kōmeļeļe ko im m̧akūtkūt ko n̄an jiron̄ ro.

Eļan̄n̄e juon branch ejjeļo̧k an būreejtōn n̄an Doulul eo an Jiron̄ ro, būreejtōn eo an Doulul eo an Kōrā ro emaron̄ jipan̄ jinen im jemān ajri ro ejaak katak ak kōmeļeļe n̄an jiron̄ ro m̧ae juon būreejtōn an Doulul eo an Jiron̄ ro ej bōk kūr in.

Būreejtōn eo an doulul eo an Jiron̄ ro ewōr aer eddo kein rej ellaajrak. Rikakpilōklōk ro an rej jipan̄ e.

• Jerbal ilo ward ko̧o̧njeļ eo.

• Jerbal āinwōt juon membōr in ward ko̧o̧njeļ eo (lale 29.2.6).

• Jerbal in karejar n̄an kajjojo jiron̄ ro.

• Katakin ritōl ro jet an Doulul eo an Jiron̄ ro im būreejtōn eo an kūlaaj eo kōn eddo ko aer.

• Kapilōk jiron̄ ro kōn apan̄ ko me ejjab menin aikuj bisop eo n̄an pād ak kakkure ko (lale 32.3, 31.3.1, im 38.6.2).

11.3.4

Būreejtōnji eo an Kūlaaj eo im Rijeje eo

11.3.4.1

Kūr, Ekkapit, im Kōjenolo̧k

Kajjojo kūlaaj eo an Doulul eo an Jiron̄ ro ej aikuj wōr juon aer kūlaaj būreejtōnji.

Juon membōr in bisoprik eo ej kūr juon jiron̄ n̄an jerbal āinwōt juon kūlaaj būreejtōn. N̄e ebwe oran jiron̄ ro n̄an jipan̄, ej jar im errā kōn ro uwaan kūlaaj eo n̄an leļo̧k etaer bwe ren jerbal āinwōt rikakpilōklōk im juon rijeje.

Ālkin leļo̧k kūr kein, juon membōr in bisoprik eo ej kwaļo̧k etan jiron̄ ro n̄an kūlaaj eo aer n̄an rejetak. Bisop eo ak rikakpilōklōk eo kar jitōn̄e ej kōjeno̧lo̧k jiron̄ ro.

11.3.4.2

Eddo ko

Būreejtōn ro an kūlaaj eo rej jerbal ilo ko̧o̧njeļ an jodikdik (lale 11.3.4.4). Būreejtōnji ko an kūlaaj ebarāinwōt wōr ippāer eddo kein:

• Tōl kijejeto ko an kūlaaj eo n̄an bōk koņaad ilo jerbal in lo̧mo̧or eo an Anij im mour ijo eutiej tata (lale jebta 1).

• Jeļā kajjien im jebral n̄an kajjojo jiron̄ ro, ekoba ro rejjab pād ilo kweilo̧k ko an kūlaaj eo.

• Karōk im tōl kweilo̧k ko an kūlaaj eo (lale 11.2.1.2).

• Karōk im loloorjake jerbal in jipan̄ im m̧akūtkūt ko an kūlaaj eo (lale 11.2.1.3).

11.3.4.3

Kweilo̧k eo an Būreejtōnji eo an Kūlaaj

Būreejtōnji ro an kūlaaj ko ilo Doulul eo an Jiron̄ ro rej kweilo̧k aolep iien. Būreejtōn eo an kūlaaj eo ej kōjeikik kweilo̧k eo. Ritōl ro rerūtto an Doulul eo an Jiron̄ ro kar jitōn̄ er n̄an jipan̄ būreejtōnji eo an kūlaaj eo rej barāinwōt aikuj pād.

11.3.4.4

Ko̧o̧njeļ an Jodikdik ilo Ward eo

Lale 29.2.6 n̄an meļeļe ko reļļapļo̧k kōn ko̧o̧njeļ eo an jodikdik ro an ward.

11.6

Kakobaba ko Jet kōn Laajrak in Unin tōl im Kakien ko

11.6.1

Kōjparok Jodikdik ro

N̄e rūtto ro rej em̧m̧akūtkūt ippān jodikdik ro ilo karōk ko an Kabun̄ in, ej aikuj wōr ruo rūtto ro rej pād. Emaron̄ menin aikuj n̄an kobaik kūlaaj ko n̄an kakūrm̧ool menin.

Aolep rūtto ro rej jerbal ippān jodikdik ro rej aikuj kadedeikļo̧k kaminene eo n̄an kōjparok ajri ro im jodikdik ro ilowaan juon allōn̄ jān iien eo kar rejtake er (ProtectingChildren.ChurchofJesusChrist.org).