Handbooks ac Kunohkohn
18. Ahkfahsrye Akwuck ac Mwe Insewowo ke Pristut

“18. Ahkfahsrye Akwuck ac Mwe Insewowo ke Pristut,” Ma Suleyucklac ke General Handbook (2023).

“18. Ahkfahsrye Akwuck ac Mwe Insewowo ke Pristut,” Ma Suleyucklac ke General Handbook

sucu se fahsr sisken tempuhl

18.

Ahkfahsrye Akwuck ac Mwe Insewowo ke Pristut

18.0

Ikucslah

Akwuck ac mwe insewowo orekma muhtahl se ahkfahsryeyuck ke wal luhn pristut ac ke inen Jisus Kraist. Akwuck ac mwe insewowo ke pristut ikacslah inkacnek se nuh ke kuh luhn God (liye Doctrine and Covenants 84:20).

Akwuck ac mwe insewowo enenuh in ahkfahsryeyuck wina luhlahlfongi kacl Pahpah Inkuhsrao ac Jisus Kraist fal nuh ke kolyuck luhn Nguhn Muhtahl. Mwet kol elos enenuh in lohacng in wo lah elos ahkfahsrye fal nuh ke lwelah (fin kuh), ke wal fal se luhn pristut, ke inkacnek pwacye, ac nuh sin mwet fal in eis (liye 18.3).

18.1

Akwuck ke Molwelah ac Ma Pahtpaht

Pristut el nwacnwack wal ma ahkfahsrye akwuck ke wosasuc ma som nuh ke molwelah ac ma pahtpaht. Mwet uh oraclah olwelah muhtahl nuh sin God ke elos eis akwuck inge. Akwuck in molwelah ac ma pahtpaht pa tahklac ten inge:

  • Pacptais

  • Ahkkweyeyucklac ke mwe sang luhn Nguhn Muhtahl

  • Eis Melchizedek Pristut ac srihsrngiyucki nuh ke ohfuhs se (nuh sin mukul)

  • Mwe sang muhtahl tempuhl

  • Sil tempuhl

Fin tuhlihk se isuslac ke olwelah ac misac met liki el sun yac 8, wacngihn akwuck enenuh in ahkfahsryeyuck. Fin tuhlihk se tiac isuslac ke olwelah, akwuck se fanna el enenuh uh pa in sil nuh sin pahpah ninac. Ke srihpen Iwaclah luhn Mwet Lahngo, tuhlihk nuhkwewa ma misac met liki yac 8 elos moullac ke tohkohsrahi luhn celestial (Doctrine and Covenants 137:10; liye pac Moroni 8:8–12).

18.3

Wi ahkfahsrye Akwuck kuh Mwe Insewowo

Elos suc ahkfahsrye kuh wi oruh akwuck kuh mwe insewowo enenuh in oasr se ma enenuh nuh ke wal luhn pristut ac in nwacsnwacs. Yohkiyac ah, moul nwacsnwacs se inge pa in kuh in sruok pwepuh in lwelah se nuh tempuhl. Tuhsruhktuh, ke kolyuck luhn Nguhn ac ahkuhtweyac ke sapta se inge, pisap ac prestuhn ke stek kuh in lwelah pahpah kuh mukul tuhma suc sruok ohfuhs luhn pristut in ahkfahsrye kuh wi oruh kuhtuh akwuck ac mwe insewowo finne elos tiac arulacna nwacsnwacs nuh tempuhl. Fin oasr ma upac pristut se oraclah el tiac kuh in wi ahkfahsrye orekma se inge.

Ahkfahsrye kuh eis kuhtuh akwuck ac mwe insewowo enenuh in ahkkweyeyucklac sin mwet kol se ma oasr kwewa ki luhn pristut se (liye 3.4.1). Fin enenweyuck, ahkkweyeyucklac kuh in tuhkuh sin mwet kahsruh ma el srihsrngiyac. Liye chart se ten inge: Ma suhmuhslah nuh sin stek prestuhn el kuh pac in orekmakihnyuck sin misin prestuhn. Ma suhmuhslah kuh kolyuck nuh sin pisap el kuh pac in orekmakihnyuck sin prestuhn luhn pracns.

Suc Mwet Kol ma Sruok Ki ma kuh in Ahokiyac in Ahkfahsryeyuck kuh Eis Akwuck in Molwelah ac Ma Pahtpaht?

Akwuck

Suc Sruok Ki

Akwuck

Pacptais

Suc Sruok Ki

Pisap (nuh sin tuhlihk-yac-alkosr ac mempucr ma sihmlac matwac yac 9 ac mahtuh liki ma kohtlah pacptais la ke srihpen muhnahs luhn nuhnak lalos)

Prestuhn luhn misin (nuh sin mwet mahtuh ma pacptaislac)

Akwuck

Ahkkweyeyucklac ac mwe sang luhn Nguhn Muhtahl

Suc Sruok Ki

Pisap (nuh sin tuhlihk-yac-8 ac nuh ke record luhn tuhlihk yac 9 ac mahtuh liki ma pacptais lalos kohtlah ke srihpen suhkahpahs luhn nuhnak lalos)

Prestuhn luhn misin (nuh sin mwet ma eklac)

Akwuck

Eis Melchizedek Pristut ac srihsrngiyucki nuh ke ohfuhs se (nuh sin mukul)

Suc Sruok Ki

Prestuhn luhn Stek

Akwuck

Mwe sang ke Tempuhl

Suc Sruok Ki

Pisap ac prestuhn luhn stek

Akwuck

Sil Tempuhl

Suc Sruok Ki

Pisap ac prestuhn luhn stek

Suc Mwet Kol ma Sruok Ki ma kuh in Ahokiyac in Ahkfahsryeyuck kuh Eis Akwuck Sahyac ac Mwe Insewowo?

Akwuck ac Mwe Insewowo

Suc Sruok Ki

Akwuck ac Mwe Insewowo

Sang ine ac ahkinsewowoyelah tuhlihk

Suc Sruok Ki

Pisap

Akwuck ac Mwe Insewowo

Kuhfa luhn Leum

Suc Sruok Ki

Pisap

Akwuck ac Mwe Insewowo

Eis Aaronic Pristut ac akmuhsralah nuh ke ohfuhs se (ma nuh sin muhtwacn fuhsr ac mukul)

Suc Sruok Ki

Pisap

Akwuck ac Mwe Insewowo

Suleyucklac nuh ke kunohkohn se in kuhlwacnsap

Suc Sruok Ki

Liye 30.8

Akwuck ac Mwe Insewowo

Akmuhsrai oil

Suc Sruok Ki

Tiac enenuh in ahkkweyeyuck

Akwuck ac Mwe Insewowo

Muhtwacta nuh yurun mwet mas

Suc Sruok Ki

Tiac enenuh in ahkkweyeyuck

Akwuck ac Mwe Insewowo

Mwe ahkinsewowo in ahkwo ac kahs in kahsruh, suc pa nuh ke mwe ahkinsewowo yurun pahpah.

Suc Sruok Ki

Tiac enenuh in ahkkweyeyuck

Akwuck ac Mwe Insewowo

Kihsackuhnlah lohm

Suc Sruok Ki

Tiac enenuh in ahkkweyeyuck

Akwuck ac Mwe Insewowo

Aluelah kuclyuck

Suc Sruok Ki

Mwet kol se ke pristut ma ahkfahsrye kuhlwacnsap sacn

Akwuck ac Mwe Insewowo

Mwe insewowo luhn Patriarch

Suc Sruok Ki

Pisap

18.4

Akwuck nuh sin Tuhlihk soena kuh in Sifacna

Tuhlihk ma soenna kuh in sifacna uh kuh in ahkinsewowoyeyucklac, pacptaislac, ahkkweyeyucklac, akmuhsralah nuh ke ohfuhs luhn pristut, kuh suleyucklac nuh ke kunohkohn se ne kena oasr lwelah se sin (1) pahpah ninac ma oasr kuh la in wi oruh sulwaclah kuh (2) mwet in karihngihn tuhlihk se.

18.6

Sang ine ac Ahkinsewowoyelah Tuhlihk

Kwacna ituckyang inen tuhlihk ac ahkinsewowoyeyucklac elos ke toeni in lalo ac fahkwack luhlahlfongi ke ward ma pahpah ninac wi.

18.6.1

Suc Sang Mwe Ahkinsewowo

Akwuck ke ituckyang ine ac ahkinsewowoye tuhlihk se ahkfahsryeyuck sin mwet sruok Melchizedek Pristut se, in oacna ke Doctrine and Covenants 20:70.

Mwet se kuh sucu se ma luhngse tuhlihk in ituckyang ine ac ahkinsewowoyeyucklac enenuh in fahsr fal nuh ke akwuck luhn pisap. El sruok ki luhn pristut in sang ine ac ahkinsewowoyelah tuhlihk ke ward sacn.

Pisap el sang lwelah nuh sin pahpah se ma sruok Melchizedek Pristut in sang ine ac ahkinsewowoyelah tuhlihk se nahtuhl an finne pahpah sacn tiacna nwacsnwacs in utyak nuh tempuhl (liye 18.3). Pisap el ahkkweye pahpah in ahkoeloslac in kuh in sifacna ahkinsewowoye tuhlihk nahtuhlos.

18.6.2

Ahkuhtweyac

Ye kohkoh luhn pisaprik, mwet ma sruok Melchizedek Pristut tu raunlac in sang ine ac ahkinsewowoyelah tuhlihk se. Elos sang paholos nuh ye ahwowo se, kuh elos sang paholos in te toasr nuh fin tuhlihk mahtuhyak se. Na mwet se ma sramsram ah:

  1. Paing Pahpah Inkuhsrao ke pruhe.

  2. Fahk lah mwe insewowo se inge orek ke wal luhn Melchizedek Pristut.

  3. Sang inen tuhlihk sacn.

  4. Pahngon tuhlihk sacn.

  5. Sang mwe insewowo nuh sin tuhlihk sacn ke kohkoh luhn Nguhn.

  6. Kaliyac ke inen Jisus Kraist.

1:41

18.6.3

Pwepuh ma Sihmlac luhn Tuhlihk ac Certificate in Ahkinsewowoye

Meet liki tuhlihk se ahkinsewowoyeyucklac, mwet karihngihn ma sihmlac ke ohfuhs orekmakihn Leader and Clerk Resources (LCR) in ahkolah Child Record Form [Pwepuh in Ma Sihmlac luhn Tuhlihk]. Tukun mwe insewowo sacn, el suhmuhslah mempucr an ke ma sihmlac nuh ke system ac ahkolah Blessing Certificate[Certificate in Ahkinsewowo]. Certificate se inge sainiyucki sel pisap ac ituckyang nuh sin pahpah ninac kuh mwet karihngihn tuhlihk sacn.

Ine se ke mempucr se ma sihmlac ingacn ac certificate sacn enenuh in oacna sie nuh ke certificate in isuslac, civil birth registry, kuh ine se orekmakihnyuck ingena.

18.7

Pacptais

Pacptais ke tihli utyak ke kof sin el suc oasr wal se in oruh nuh sin sie mwet in mempucrlac ke Alu uh ac eis Nguhn Muhtahl. Elos nuhkwewa suc suk moul ma pahtpaht enenuh in ukwe srihkasrak luhn Mwet Lahngo pa in ukwe akwuck inge.

18.7.1

Lwelah luhn Mwet se in Pacptaislac ac Ahkkweyeyucklac

18.7.1.1

Tuhlihk Ma Mempucr ke Ma sihmlac

Pisap el sruok pristut ki ma kuh in pacptaiselah mempucr ma oasr ke ma sihmlac yac-8-matwac ke ward an. Tuhlihk inge kuh in pacptaislac ac ahkkweyeyucklac na kuh ke pacl se na tukun elos yac 8 (liye Doctrine and Covenants 68:27). Tuhlihk inge oasr ma sihmlac tari lalos ke Alu uh (liye 33.6.2). Ke elos sun yac 8, pisap el enenuh in liye lah oasr kwewa inkacnek lalos in eis wosasuc ac in kuh pacptaislac ac ahkkweyeyucklac.

Pisap kuh mwet kahsruh srihsrngiyucki se ohsun kihsensiyuck sin tuhlihk ma sihmlac ine nuh ke pacptais ac ahkkweyelah. Ahkuhtweyac oasr ke 31.2.3.1.

Nuh ke mwe ahkkahlwemye se nuh ke nwacklah Baptism and Confirmation Record [Ma Sihmlac ke Pacptais ac Ahkkweyeyucklac], liye 18.8.3.

18.7.1.2

Mwet mahtuh pacptaislac

Prestuhn luhn misin el sruok pristut ki ma pacptaiselah mwet mahtuh pacptaislac ke misin se. Ke srihpac se inge, misineri ma luti ke yac luo elos ohsun ac kihsensiyuck sin mwet se ma e pacptais nuh ke pacptais ac ahkkweyeyucklac .

18.7.2

Toeni nuh ke Pacptais

Toeni nuh ke pacptais se enenuh in fihsrwacsr, sa, ac oasr nguhn kac. Enenuh in nwacnwack ma inge:

  1. On met liki muhtwacwacack

  2. Paing sa se yurun tamuhlwel se kol toeni sacn

  3. On in ikucslah ac pruhe

  4. Sie kuh luo pweng fototo ke wosasuc, suc pa nuh ke pacptais ac mwe sang luhn Nguhn Muhtahl.

  5. On sollac se

  6. Pacptais

  7. Pacl mihs se tuhpan mwet pacptaislac ah in ayaolac nuh ke nuknuk paho (on kuh on luhn Tuhlihk Srihsrihk kuh in sritaclkihnyuck kuh onkihnyuck ke pacl se inge)

  8. Ahkkweyeyucklac luhn mempucr yac-8-matwac ma oasr ke ma sihmlac; ahkkweyeyucklac luhn mwet mahtuh pacptaislac fin lwelah sin pisap (liye 18.8)

  9. Fahkwack luhlahlfongi la sin mwet ma mahtuh ma pacptaislac, fin luhngse

  10. On in kaliyac ac pruhe

  11. On in ahksahf

Ke tuhlihk se oasr ke ma sihmlac el ahkolah in pacptais, mempucr se ke pisaprik ac prestuhnsi luhn Tuhlihk Srihsrihk aetuhilac yurun sucu in plwacnelah ac fihliyac sie pacl ah nuh ke toeni in pacptais se inge. Mempucr se ke pisaprik el ahkfahsrye toeni se inge. Fin puhs liki tuhlihk se fana pacptaislac ke mahlwem se, elos kuh in tuhkweni oraclah.

Ke stek se ma puhslac tuhlihk oasr ke ma sihmlac, tuhlihk ke kain in ward, kuh pac in tuhkweni pacptaislac. Mempucr se ke prestuhnsi ke stek kuh mwet in kahsruh fuhlwact se ma suleyucklac kol toeni sacn.

Pacptaislac luhn sie mwet ke sucu tiac enenuh in kohtlah nuh ke pacl se pahpahp se kuh in eis pristut ac sifacna oruh pacptais sacn.

Ye kohkoh luhn pispaprik, mwet kol misin ke ward (fin oasr mwet pahng) kuh sie mwet ke u prestuhnsi ke u luhn elder suc kol orekma luhn misineri ke ward sac plwacnelah ac kol toeni in pacptais luhn mwet se ma e pacptais an. Elos orekma wi misineri orekma.

18.7.3

Suc Oruh Akwuck uh

Akwuck ke pacptais el ahkfahsryeyuck sin prist kuh mwet suc sruok Melchizedek Pristut. Mwet se ma oruh pacptais uh enenuh in ahkkweyeyucklac sin pisap (kuh sin misin prestuhn fin misineri se pa oruh pacptais sacn).

Pisap el sang lwelah nuh sin pahpah se fin el prist kuh sruok Melchizedek Pristut in pacptaiselah tuhlihk se nahtuhl finne pahpah sacn tiac na nwacsnwacs nuh tempuhl (liye 18.3). Pisap elos ahkkweye pahpah in ahkoeloslac in kuh in sifacna pacptaiselah tuhlihk nahtuhlos.

18.7.4

E Ahkfahsryeyuck Oyac Akwuck

Pacptais kuh in orek ke acn in pacptais fin asr acn se. Fin wacngihn acn, inluhluh in kof nwacsnwacs kuh wo se kuh in orekmakihnyuck.

In fahlac wo, mwet mahtuh se enenuh in oasr ke pacl se nwekyuck acn in pacptais sacn ac oasr na ne kena wacngihnlac kof an, ac liye muh wona. Acn in pacptais sacn enenuh in ahksohrohryeyucklac tukun na tari toeni in pacptais sacn. Sruhnguhl nuh ke acn in pacptais sacn enenuh in kaul fin tiac orekmakihnyuck.

18.7.5

Nuknuk

Mwet se ma ahkfahsrye pacptais sacn ac mwet se ma e pacptais an nukum nuknuk fasrfasr ma tiac nguhnnguhn fin sroksroki. Mwet ma eis mwe sang muhtahl nokomwacng nuknuk nuh tempuhl lin nuknuk lal an pacl se el ahkfahsrye pacptais sacn. Acn kom muhta kac an molwelah nuknuk in pacptais ke mani oreklac nuh kac ac tiac ma e moliyuck fin orekmakihnyuck.

18.7.6

Mwet lohoh

Mwet loh luo, ahkkweyeyucklac sin mwet se ma kol an, lohacng nuh ke pacptais in liye lah oreklac pwacye. Mempucr ma pacptaislac ke Alu uh, som nuh sin tuhlihk ac mwet fuhsr, kuh pac in kuhlwacnsap ekihn mwet loh.

Pacptais se kuh in kalweniyuck fin kahs fwacklac kac an tiac oacna ma utuckuh ke Doctrine and Covenants 20:73. Enenuh pac in sifilpac orek fin ip se ke monun mwet se, insifacl, kuh nuknuk lal ah tiacna tihli.

18.7.7

Ahkuhtweyac

In oruh akwuck in pacptais, prist se kuh mwet se ma sruok Melchizedek Pristut an:

  1. Tu lin kof an wi mwet se ma e pacptais an.

  2. Sruokyac foko se ke lacpo lacyot luhn mwet sacn ke lacsac lal (in lango ac safety). Mwet se ma pacptais an sruokyac foko se ke poun pristut se ma pacptaisel an ke lacpo lacsac lal.

  3. Sralwack pahol nuh lucng.

  4. Fahklah ine fohn luhn mwet sacn ac fahk, “Ke wal ma utuckuh nuh sihk sel Jisus Kraist, nga pacptaisikomlac ke inen Pahpah, ac ke Wen, ac ke Nguhn Muhtahl. Amen” (Doctrine and Covenants 20:73).

  5. Lwelah mwet sacn in fonosyac infacl ke lacpo lacyot lal (in lango); na sang lacpo lacyot nuh tukun mwet se pacptais an ac isongilyac nohfohn, wi pacna nuknuk lal an.

  6. Kahsruh mwet sacn in otyak liki kof an.

3:16

18.8

Ahkkweyeyucklac ac Mwe Sang luhn Nguhn Muhtahl

Tukun mwet sacn pacptaislac, el ahkkweyeyucklac ekihn mempucr se ke Alu uh ac eis mwe sang luhn Nguhn Muhtahl ke fihliyac paho fin sifac (liye Doctrine and Covenants 20:41; Orekma 19:1–6). Mwet se ingacn mempucrlac nuh ke Alu uh tukun kwewana akwuck inge oreklac ac sihmihsyucklac in wo (liye John 3:5; Doctrine and Covenants 33:11; 3 Nephi 27:20).

Pisap el karihngihn ma oreklac ac ahkkweyeyucklac inge. Tuhlihk-yac-alkosr elos kwacna ahkkweyeyucklac na ke lwen se elos pacptaislac. Mwet mahtuh pacptaislac elos ahkkweyeyucklac ke toeni in eis kuhfa luhn Leum ke ward se elos wi ingacn, yohk na ke Sacnri se na tukun elos pacptaislac.

Mempucr se ke pisaprik el ukwe mwe ahkuhtweyac inge ke 29.2.1.1 ke pacl oasri mempucr sasuc.

18.8.1

Suc Ahkfahsrye Akwuck

Mwet ma sruok Melchizedek Pristut muhkwena ma nwacsnwacs kuh in utyak nuh tempuhl kuh in wi in pa fahk ma uh ke ahkkweyelah sacn. Tuhsruhktuh, pisap se kuh in lwelah pahpah se ma sruok Melchizedek Pristut in tu raunlac wi ahkkweyelah tuhlihk se nahtuhl an finne pahpah sacn tiac nwacsnwacs in utyak nuh in tempuhl (liye 18.3).

In oasr sie ma mempucr ke pisaprik wi ahkfahsrye akwuck se inge. Ke misineri uh elos luti mwet mahtuh se ne pacptaislac, pisap el solwaclos in wi pac.

18.8.2

Ahkuhtweyac

Ye kohkoh luhn pisaprik, sie kuh puhs liki mwet ma sruok Melchizedek Pristut kuh in wi oruh ahkkweyeyucklac se inge. Elos sang paholos nuh fin sifen mwet sacn. Na mwet se ma sramsram ah:

  1. Pahngon mwet sacn ke ine fohn lal an.

  2. Fahk lah akwuck se inge ahkfahsryeyuck ke wal luhn Melchizedek Pristut.

  3. Ahkkweyelah mwet sacn in mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah

  4. Fahk “eis Nguhn Muhtahl” (tiac “eis mwe sang luhn Nguhn Muhtahl”).

  5. Sang kahs in ahkinsewowo

  6. Kaliyac ke inen Jisus Kraist.

1:54

18.8.3

Ma Sihmlac ke Pacptais ac Ahknweyucklac ac Certificate

Met liki tuhlihk se ma oasr ine ke ma sihmlac el topuk kihsensiyuck nuh ke pacptais, mwet karihngihn ma sihmlac ke ohfuhs orekmakihn LCR in ahkolah nuh ke Baptism and Confirmation Form[Pwepuh in Pacptais ac Ahkkweyeyucklac]. Pisap kuh mwet kahsruh se srihsrngiyucki in kol ahkfahsrye kihsensiyuck inge ac sainiyac pwepuh se. Tukun pacptais ac ahkkweyeyucklac, mwet karihngihn ma sihmlac ke ohfuhs orekmakihn pwepuh se inge in ahksasucyelah membership record luhn tuhlihk sacn ke LCR.

Fin misineri se pa kihsensiyuck nuh sin mwet mahtuh ma e pacptaislac inge, el nwacklah Baptism and Confirmation Record sacn orekmakihn Area Book Planner (ABP) app. Tukun pacptais ac ahkkweyeyucklac, misineri e suhmuhslah mwe ahkkahlwemye nuh ke ABP ac uslah nuh yurun mwet karihngihn ma sihmlac ke ward orekmakihn computer ma. Mwet karihngihn ma sihmlac luhn ward el liye ma mwe ahkkahlwemye inge ke LCR ac oraclah membership record luhn mwet sacn.

Tukun oreklac membership record luhn mwet sacn, mwet ma karihngihn ma sihmlac ahkolah Baptism and Confirmation Certificate[Certificate in Pacptais ac Ahkkweyeyucklac]. Certificate se inge sainiyucki sin pisap ac ituckyang nuh sin mwet sacn.

Ine se ke membership record ac certificate sacn enenuh in oacna ine se ke certificate in isuslac, civil birth registry, kuh ine se orekmakihnyuck ingena uh.

18.9

Kuhfa luhn Leum

Mempucrs ke Alu uh ohsun ke lwen Sabbath in ahkfuhlwactye God ac eis kuhfa luhn Leum (liye Doctrine and Covenants 20:75; 59:9; Moroni 6:5–6). Ke akwuck se inge, elos eis flao ac kof in esam kihsaclah luhn mwet Lahngo ke Mahnol ac Srahl ac in ahksasucye olwelah lalos(liye Matthew 26:26–28; Joseph Smith Translation, Mark 14:20–25; Luke 22:15–20; 3 Nephi 18; Moroni 6:6).

18.9.1

Lwelah in Oruh Kuhfa luhn Leum

Pisap el sruok pristut ki ma karihngihn kuhfa luhn Leum ke ward sacn. Elos nuhkwewa ma wi in ahkolah, ahkinsewowoye, ac pahsi kuhfa sacn enenuh in eis lwelah sel kuh sin mwet se ye kohkoh lal.

18.9.2

Suc Ahkfahsrye Akwuck

  • Titsucr, Prist, mwet ma sruok Melchizedek Pristut ahkolah kuhfa sacn.

  • Prist ac mwet sruok Mechizedek Pristut ahkinsewowoyelah kuhfa sacn.

  • Tikin, titsucr, prist, ac mwet sruok Melchizedek Pristut pahsi kuhfa sacn.

18.9.3

Mwe Ahkuhtweyac nuh ke Kuhfa luhn Leum

Ke srihpen muhtahliyacn kuhfa se inge, mwet kol ke pristut enenuh in ahkolah in wo in muh fahlac wo ac mihs.

Elos suc oruh kuhfa se inge enenuh in oruh ke ohiyac muhtahl se, akihlen lah elos ahol Leum.

Pahsiyacn kuhfa se inge enenuh in nahweyuck ma na fal tiac nahweyuck upaclac.

Finne kuhfa se inge ma na nuh sin mempucr ke Alu uh, wacngihn ma kuh in orek in sruokyac mwet sahyac in wi ipeis.

18.9.4

Mwe Ahkuhtweyac

  1. Elos suc ahkoo, ahkinsewowoye, kuh pahsi kuhfa luhn Leum enenuh in ohlah paholos ke soap kuh mwe ahknwacsnwacs.

  2. Titsucr, prist, kuh mwet sruok Melchizedek Pristut liye in wo lah ahluh in flao sac oasr flao kac, ahluh in kof sac oasr kuhp nwacsnwacs, ac nwacsnwacs mwe lweyuck tepuh sac ahkolah meet liki muhtwacwacack toeni sacn.

  3. Ke mempucr ke ward sacn onkihn on in eis kuhfa, elos suc ma e ahkinsewowoye kuhfa sacn tuyak oruh in mihs, eslah nuknuk se ma sang afihn flao ac ahluh ah, ac mukutkutinyac flao ah nuh ke ip srihsrihk.

  4. Tukun on sacn, mwet se ma e ahkinsewowoye flao sacn sikuck muhtuhnte ac fahk pruhe ke kuhfa nuh ke flao (liye Doctrine and Covenants 20:77).

  5. Pisap el liye lah pruhe nuh ke kuhfa sacn fack kahlwem, pwacye, ac ke insiac. Fin mwet se oraclah tahfonglac ke kahs ingacn ac sifacna ahksuwohsyacllah, tiac enenuh in sifil ahksuwohsyeyuck. Fin mwet sacn tiacna ahksuwohsyacllah, pisap elac siyuck sel in sifil kalweni pruhe sac.

  6. Tukun pruhe sac, mwet ma sruok pristut pahsi flao sac nuh sin mempucr ke mihs. Mwet se ma kol toeni sacn eis emet, na tohkoh wacngihn tahk kac. Pacl se ahluh se ituckyang nuh sin mempucr, elos pahsi nuh sin siepacna mempucr.

  7. Mempucr elos eis ke lacpo lacyot lalos fin kuh.

  8. Fin flao sacn pahsiyuck sun mwet nuhkwewa, elos suc us ahluh in kuhfa sacn fohlohkohnlah nuh ke tepuh in kuhfa ah. Elos suc ahkinsewowoye kuhfa an afihnyac ahluh in flao an ac ikacslah ahluh in kof ah.

  9. Mwet se ma ahkinsewowoye kof an sikuck muhtuhnte ac fahk pruhe in kof nuh ke kof an (liye Doctrine and Covenants 20:79). El ekuhllah kahs ke kof nuh ke wine.

  10. Tukun pruhe sacn, mwet sruok pristut pahsi kof an nuh sin mempucrs an ke mihs. Mwet se ma kol an eis emet, na tohkoh wacngihn tahk kac.

  11. Ke kof sac pahsiyuck sun mwet nuhkwewa, elos suc pahsi kuh us ingacn fohlohkohnlah nuh ke tepuh in kuhfa ah. Elos suc ahkinsewowoye kuhfa sacn sang nuknuk se nuh fin ahluh ingacn, ac elos suc ahkinsewowoye ac pahsi kuhfa fohlohk nuh ke siah lalos ke mihs.

  12. Tukun miting sacn, elos suc ahkolah kuhfa sacn ahknwacsnwacsyelah, lihmihnyac mwe lweyuck tepuh, ac eslah kwewa flao luhlah an.

3:32

18.10

Ahkkweyeyucklac nuh ke Prsitut ac Akmuhsraelah nuh ke Ohfuhs

Oasr ip luo ke pristut: Aaronic ac Melchizedek (liye 3.3; Doctrine and Covenants 107:1, 6). Ke ituckyang pristut se nuh sin mwet se, el oacyacpac akmuhsralah nuh ke ohfuhs se ke pristut. Tukun pristut inge ituckyang, mukul se enenuh in akmuhsralah muhkewna nuh ke ohfuhs sahyac ke pristut.

18.10.1

Melchizedek Pristut

Prestuhn luhn stek el pa sruok ki ke pristut in ahkkweyelah Melchizedek Pristut ac akmuhsraelah nuh ke ohfuhs luhn elder ac prist fuhlwact. Tuhsruhktuh, pisap el kwacna oraclah lwelah nuh ke akwuck inge.

18.10.1.1

Elders

Mukul suwohs kuh in eis Melchizedek Pristut ac akmuhsralah nuh ke elder ke elos sun matwacy yac18 kuh mahtuh liki. Wiwina elyah luhn kais sie, pisap elah fah sulaclah lah mukul fuhsr se kuh in ituckyang akmuhsra lal nuh ke elder tukun el yac 18 kuh elac wi na u luhn prist fuhlwact.

In oraclah sulaclah se inge, pisap el eis kahsruh sin mukul fuhsr ac pahpah ninac kuh mwet karuhnguhnuhl. Mukul nwacsnwacs enenuh in akmuhsralah nuh ke elder ke elos yac 19 kuh met liki elos som liki lohm selos in wi lutlut, kuhlwacnsap yac luo, kuhlwacnsap ke solse, kuh in sruokyac orekma se.

Mukul ma tuhfahna in pacptaislac ma yac 18 ac mahtuh liki elos akmuhsralah nuh ke elder tukun elos:

  • Eis Aaronic Pristut ac kuhlwacnsap ekihn prist

  • Ahkyohkye etwacack ke wosasuc.

  • Oruh in akihlenyuck nwacsnwacsiyacltahl.

Wacngihn pacl se sriyucklac muh enenuh in mempucr ke Alu uh.

18.10.1.2

Prist Fuhlwact

Mukul uh akmuhsralah nuh ke prist fuhlwact ke elos pahng nuh ke prestuhnsi luhn stek, kahsruh fuhlwact, kuh pisaprik.

18.10.1.3

Oruh kihsensiyuck ac Ahkkweyeyucklac

Ke lwelah luhn prestuhnsi ke stek, pisap el ohsun kihsensiyuck i tamuhlwel sacn oacna ke lutiyuck ke Melchizedek Priesthood Ordination Record [Ma sihmlac ke Akmuhsra luhn Melchizedek Pristut] Na mempucr se ke prestuhnsi ke stek sifil oruh kihsensiyuck nuh sel. Ke lwelah luhn prestuhn ke misin, tistrik prestuhn el kuh in oruh lohlngohk lal yurun sie tamuhlwel in akmuhsralah nuh ke elder (liye 6.3).

18.10.2

Aaronic Pristut

Pisap el sruok pristut ki ma kuh in sang Aaronic Pristut ac akmuhsra nuh ke ohfuhs luhn deacon, titsucr, ac prist. Mukul nwacsnwacs uh elos kwacna akmuhsralah nuh ke ohfuhs inge ke yac ekahsr inge, tuhsruhk tiac met liki:

  • Deacon ke elos tuhfahna in yac 12

  • Titsucr ke elos tuhfahna in yac 14

  • Prist ke elos tuhfahna in yac 16

Pisap kuh mwet in kahsruh se el srihsrngiyac ohsun ac lohlngohk sin mwet ma e akmuhsralah nuh ke deacon kuh titsucr inge lah elos nwacsnwacs ac ahkolah. Pisap el ohsun kihsensiyuck sin tamuhlwel ma e akmuhsralah nuh ke prist.

Met liki ohsun nuh sin mukul fuhsr inge in akmuhsraeloslac nuh ke pristut, mempucr se ke pisaprik eis lwelah sin pahpah ninac kuh mwet ma karihngihn tuhlihk mukul fuhsr sacn. Fin pahpah ninac an fahsrwelihk tilac pahyuck, el eis lwelah sin pahpah ninac ma oasr kuh la sin tuhlihk sacn.

18.10.3

Ahkkahlwemye Mempucr se in Ahkkweyeyucklac mwet liki El Ac Akmuhsralah

Tukun sahflah lohlngohk yurun tamuhlwel se ac sukokyak tuh el nwacsnwacs in akmuhsralah nuh ke ohfuhs luhn pristut, e ahkkahlwemyeyuck el (liye Doctrine and Covenants 20:65, 67). Tamuhlwel ma e akmuhsralah nuh ke elder kuh prist fuhlwact uh elos paingyuck sin stek prestuhnsi mempucr ke toeni luhlahp (liye 6.3 mwe ahkuhtweyac nuh sin tistrik prestuhn). Tamuhlwel ma akmuhsralah nuh ke deacon, titsucr, kuh prist uh elos paingyuck sin mempucr ke pisaprik ke toeni in eis kuhfa luhn Leum.

Mwet se ma kol ahkkweye se ingacn e siyuck tamuhlwel sacn in tuyak. Elac fahk lah orekma fuhkah se e ituckyang uh Aaronic kuh Melchizedek Pristut (fin enenweyuck) ac in akmuhsraelah tamuhlwel sacn nuh ke ohfuhs luhn pristut. Na elac suli mempucr in ahkkweye orekma sacn. Sie srihkasrak an pa, in ahkkahlwemye sie tamuhlwel in akmuhsralah nuh ke elder, el kuh in orekmakihn kahs kain ohinge:

“Kuht fahkwack lah [ine] eis Melchizedek Priestut ac akmuhsralah nuh ke elder. Elos suc ma luhngse ahkkahlwemye sralack paho. [Monglac kihtin pacl.] Elos suc tiac insese, fin oasr, ahkkahlwemye pac. [Monglac kihtin pacl.]”

Fin mempucr se tiac insese nuh ke akmuhsra sac, mwet se ma kol toeni sac kuh pristut se el srihsrngiyac ohsun nuh sin mwet sacn tukun toeni an ke sie acn ma elos kuh in muhkwena. Mwet kol sacn suk in etuh lah efuh mempucr sacn tiac insese. Elac soklah lah mempucr se ingacn etuh akwuck ma kuh in tulokihnyac sie mwet in tiac akmuhsra nuh ke ohfuhs luhn pristut.

Ke kuhtuh ohiyac uh, tamuhlwel se enenuh in akmuhsralah nuh ke elder kuh prist fuhlwact meet liki ahkkahlwemyeyuck el ke toeni luhlahp. Fin sikyak ohinge, e ahkkahlwemyeyuck el nuh ke ahkkweyucklac ke pacl in eis kuhfa luhn Leum ke ward lal an. Na el ac fah tuhfah utucklac nuh ke toeni luhlahp in ahkyohkye akmuhsra sacn (ma itucklac ke ohiyac in ahkkweye, ahkuhtweyucki lucng ingacn).

18.10.4

Suc Ahkfahsrye Akwuck se

Stek prestuhn kuh mwet ma sruok Melchizedek Pristut ye kohkoh lal kuh in akmuhsrai tamuhlwel nuh ke ohfuhs luhn elder. Ke lwelah yurun misin prestuh, tisrik prestuhn kuh sie mwet ye kohkoh lal kuh in ahkfahsrye akmuhsra se (liye 6.3). Mwet ma sruok Melchizedek Pristut muhkwena pa kuh in wi tu raunlac uh.

Prestuhn luhn stek kuh prist fuhlwact ye kohkoh lal kuh in oruh akmuhsrai tamuhlwel se nuh ke prist fuhlwact. Prist fuhlwact muhkwena pa kuh in wi tu raunlac uh.

Mwet se ma akmuhsraelah tamuhlwel se nuh ke ohfuhs luhn Melchizedek Pristut enenuh in nwacsnwacs nuh tempuhl. Prestuhn luhn stek kuh sie mwet ma el kunweyac enenuh in oasr.

Prist se kuh mwet sruok Melchizedek Pristut kuh in akmuhsraelah tamuhlwel sacn nuh ke ohfuhs luhn deacon, titsucr, kuh prist. El enenuh in eis kuh sin pisap. Pisap kuh sie mwet ma el kunweyac enenuh in oasr.

In wi oruh akmuhsra nuh ke Aaronic Pristut, mwet se enenuh in prist se kuh mwet ma sruok Melchizedek Pristut.

Pisap el sang lwelah nuh sin pahpah suc prist se kuh mwet suc sruok Melchizedek Pristut in akmuhsrai mukul nahtuhl nuh ke ohfuhs luhn deacon, titsucr, kuh prist finne pahpah tiac kuh in utyak nuh tempuhl (liye 18.3). Pisap el ahkkweye pahpah in ahkoeloslac sifacna in kuh in akmuhsrai tuhlihk nahtuhlos sifacna.

18.10.5

Ahkuhtweyac

In sang pristut ac akmuhsraelah sie mwet nuh ke ohfuhs luhn pristut, sie kuh puhs liki mwet ma sruok pristut sang paholos in te toasr nuh fin sifen mwet se. Na mwet se ma sramsram an:

  1. Fahk ine fohn luhn mwet sacn.

  2. Fahk lah wal fuhkah el sruok in oruh akmuhsra se (siena sin Aaronic kuh Melchizedek Pristut).

  3. Sang Aaronic kuh Melchizedek Pristut, fin sonna ituckyang.

  4. Akmuhsraelah mwet sacn nuh ke ohfuhs luhn Aaronic kuh Melchizedek Pristut ac sang nuh sel suwohs, kuh, ac wal nuh ke ohfuhs sacn.

  5. Sang kahs in ahkinsewowo ma kolyuck sin Nguhn.

  6. Kaliyac ke inen Jisus Kraist.

In akmuhsraelah mwet se nuh ke ohfuhs luhn pristut tukun oasr tari pristut ituckyang nuh sel, mwet se oruh akmuhsra sacn tiac fahk ip ahk 3.

1:58

18.10.6

Ordination Record and Certificate [Ma sihmlac ke Akmuhsra ac Certificate]

Met liki orek lohlngohk nuh sin tamuhlwel se ac akmuhsraiyucklac el nuh ke ohfuhs luhn Aaronic Pristut, mwet karihngihn ma sihmlac ke ohfuhs orekmakihn LCR in ahkolah Aaronic Priesthood Ordination Record [Ma sihmlac ke Akmuhsralah luhn Aaronic Pristut. Pisap kuh mwet in kahsruh se el srihsrngiyac oruh lohlngohk sacn ac sainiyac pwepuh fin ma nuhkwewa wo ac nwacsnwacs.

Tukun akmuhsra sacn, pisap kuh mwet in kahsruh se ma srihsrngiyucki an ahksahfyelah pwepuh an ac fohlohkohnwacng nuh sin mwet karihngihn ma sihmlac ke ohfuhs. El suhmuhslah akmuhsra sacn ke LCR ac ahkolah ordination certificate [certificate in akmuhsra].

Ine se ma mwet se ingacn orekmakihn ingena enenuh in orekmakihnyuck ke certificate in akmuhsra ac record an.

18.11

Sulaclah Mempucr in Kuhlwacnsap ke Kunohkohn

Mempucr ma pahngonyuck ac ahkkweyeyucklac nuh ke inkaiyen kunohkohn ke Alu uh enenuh in sulohsohlah in kuhlwacnsap ke kunohkohn sacn (liye John 15:16; Doctrine and Covenants 42:11; liye pac 3.4.3.1 ke handbook se inge). Ke pacl se orek sulweyuck se inge, mwet se eis (1) wal in oruh orekma ke kunohkohn sacn ac (2) kahs in ahkinsewowo ma kolyuck sin Nguhn.

Prestuhn luhn stek, pisap, ac prestuhn ke u luhn quorum eis prestuhsi ki ke elos sulweyucklac uh (liye 3.4.1.1). Tuhsruhktuh, kahs se inge ki tiac enenuh in orekmakihnyuck ke pacl se orek sulweyuck se nuh sin mempucrs in kuhlwacnsap ke kunohkohn sahyac, som pac nuh ke mwet in kahsruh ke prestuhnsi.

18.11.1

Suc Ahkfahsrye Sulweyuck uh

Sulweyuck nuh ke kunohkohn el ahkfahsryeyuck sin mwet ma sruok Melchizedek Pristut. El enenuh in eis lwelah sin mwet kol ma sruok pristut ki. Elos suc ma oasr kuh se in ahkfahsrye sulweyuck inge fwack oasr ke 30.8. Tiac kuh in elder se pa sramsram uh kuh wi tu raunlac fin mwet se ma sulweyucklac nuh ke ohfuhs an elac prist fuhlwact se.

Ye kohkoh luhn mwet se kol toeni sacn, sie kuh puhs liki mwet ma sruok Melchizedek Pristut enenuh in wi oruh sulohsohl sacn. Prestuhn elos sulohsohlah mwet liki mwet in kahsruh lalos.

Mwet se ma kol toeni sacn kuh in lwelah mukul tuhma kuh pahpah se ma sruok Melchizedek Pristut in wi tu raunlac ke orekma sulohsohl se luhn muhtwacn kiacl kuh tuhlihk se nahtuhl finne el tena nwacsnwacs in utyak nuh tempuhl (liye 18.3).

18.11.2

Ahkuhtweyac

Sie kuh puhs liki mwet ma sruok Melchizedek Pristut sang paholos tuh in tiac toasr nuh fin sifen mwet se. Na mwet se ma sramsram ingacn:

  1. Fahk ine fohn luhn mwet sacn.

  2. Fahk lah el orekma ke wal luhn Melchizedek Pristut.

  3. Sulaclah mwet se ingacn nuh ke kunohkohn se ke stek, ward, u, kuh kuhlahs.

  4. Sang ki fin mwet se ingacn enenuh in eis.

  5. Sang kahs in ahkinsewowo ma kolyuck sin Nguhn.

  6. Kaliyac ke inen Jisus Kraist.

18.12

Akmuhsra ke Oil

Mwet sruok Melchizedek Pristut enenuh in pruhelac ke olive oil sac met liki elos sang ahkkweye mwet mas kuh enenuh (liye James 5:14). Tiac oil sahyac pa orekmakihnyuck uh.

Mempucrs tiac enenuh in moli oil se inge kuh orekmakihn nuh ke acn kihnet ke monin mwet se.

18.12.1

Suc Ahkfahsrye Akmuhsra se

Sie kuh puhs liki mwet ma sruok Melchizedek Pristut kuh in oruh akmuhsra ke oil se. Elos tiac enenuh in eis lwelah sie mwet kol ke pristut.

18.12.2

Ahkuhtweyac

In ahkmuhtahlye oil se, mwet ma sruok Melchizedek Pristut:

  1. Sruokyac suhfah ikack soko ke olive oil.

  2. Paing Pahpah Inkuhsrao ke pruhe.

  3. Fahk lah el orekma ke wal luhn Melchizedek Pristut.

  4. Ahkmuhtahlye oil se (tiac suhfah soko an) ac ahkkweyelah nuh ke akmuhsra ac kahsruh mwet mas ac enenuh.

  5. Kaliyac ke inen Jisus Kraist.

1:12

18.13

Ahkkweyelah Mwet Mas

Ahkkweyelah mwet mas “ke fihliyac paho” oasr ip luo kac: mosrwelah ke oil ac siliyac akmuhsra sac ke mwe insewowo se. Fin oil se inge wacngihn, mwe insewowo se kuh in ituckyang sin sie ma oasr wal in Melchizedek Pristut se ac e tiac akmuhsra.

18.13.1

Suc Sang Mwe Ahkinsewowo se

Mwet nwacsnwacs ma sruok Melchizedek muhkwena pa kuh in ahkkweye mwet mas kuh enenuh. Elos tiac enenuh in eis lwelah sin mwet kol luhn pristut. Fin kuh, pahpah se ma sruok Melchizedek Pristut kuh in kahsruh mwet in sucu lal ma mas an.

Inkaiyen pacl uh, luo kuh puhs liki mwet ma sruok Melchizedek Pristut pa oruh kahsruh se nuh yurin mwet mas inge. Tuhsruhktuh, sie na kuh in oruh akmuhsra ac sil sac.

18.13.2

Ahkuhtweyac

Mosrwelah ke oil el ahkfahsryeyuck sin mwet sruok Melchizedek Prisut. El:

  1. Olweacng sie tul in oil ah nuh fin sifen mwet sacn.

  2. Sang pahol tiac toasr nuh fin sifen mwet sacn ac fahk ine fohn luhn mwet sacn.

  3. Fahk lah el orekma ke wal luhn Melchizedek Pristut.

  4. Fahk lah el akmuhsraeluhl ke oil se ma kihsaclah in sang onwe kuh ahkinsewowoye mwet mas ac mwet muhnahs.

  5. Kaliyac ke inen Jisus Kraist.

In sili akmuhsra sacn, sie kuh puhs liki mwet ma oasr Melchizedek Pristut se fihliyac paholos tiac toasr nuh fin sifen mwet sacn. Na mwet se ma siliyac akmuhsra sacn:

  1. Fahk ine fohn luhn mwet sacn.

  2. Fahk lah el oruh orekma in akmuhsra se ke wal luhn Melchizedek Pristut.

  3. Sang kahs in ahkinsewowo ma kolyuck sin Nguhn.

  4. Kaliyac ke inen Jisus Kraist.

2:3

18.14

Mwe Insewowo nuh ke Ahkwo ac Kahs in Kahsruh, Wi pacna Mwe Ahkinsewowo luhn Pahpah

18.14.1

Suc Ahkinsewowoye

Mwet sruok Melchizedek Pristut kuh in sang kahs in ahkkweye ac kahs in kahsruh nuh in mwet in sucu an ac mwet sahyac ma ngihsre an.

Pahpah se ma sruok Melchizedek Pristut kuh in sang mwe ahkinsewowo luhn pahpah nuh sin tuhlihk nahtuhl. Pahpah ninac ahkkweye tuhlihk nahtuhlos in suk mwet ahkinsewowo luhn pahpah ke pacl enenuh. Mwe ahkinsewowo luhn pahpah kuh in sruokyucki ma na nuhtin mwet sacn.

Mwet sruok Melchizedek Pristut tiac enenuh in eis lwelah yurun mwet kol ke pristut in sang mwe ahkinsewowo in ahkwo ac kahs kuh mwe ahkinsewowo yurun pahpah.

18.14.2

Ahkuhtweyac

In sang mwe ahkinsewowo in ahkwo ac kahs kuh mwe ahkinsewowo se luhn pahpah, sie kuh puhs liki mwet ma sruok Melchizedek Pristut fihliyac paholos tiac toasr fin sifen mwet se. Na mwet se ma sramsram ah:

  1. Pahngon ine fohn luhn mwet sacn.

  2. Fahk lah mwe insewowo se inge orek ke wal luhn Melchizedek Pristut.

  3. Sang kahs in ahkinsewowo, ahkwo, ac kahs in kahsruh ma kolyuck sin Nguhn.

  4. Kaliyac ke inen Jisus Kraist.

18.15

Kihsackuhnlah Lohm

Mempucr ke Alu uh enenuh in kihsackuhnlah lohm selos ke wal luhn Melchizedek Pristut.

18.15.2

Ahkuhtweyac

In kihsaclah lohm se, mwet sruok Melchizedek Pristut:

  1. Paing Pahpah Inkuhsrao ke pruhe.

  2. Fahk lah el orekma orekmakihn wal luhn Melchizedek Pristut.

  3. Kihsackuhnlah lohm se tuh in acn muhtahl se suc Nguhn Muhtahl kuh in muhta kac ac ac sang pac kahs sahyac ma kolyuck sin Nguhn.

  4. Kaliyac ke inen Jisus Kraist.

18.16

Alu i Kuclyuck

18.16.1

Suc Alu Kuclyuck uh

Mwet se ma alui kuclyuck uh enenuh in sruok Melchizedek Pristut ac ituckyang kuh la sin mwet kol ke pristut in ahkfahsrye kuhlwacnsap sacn.

18.16.2

Ahkuhtweyac

In alu i kuclyuck se, mwet sruok Melchizedek Pristut:

  1. Paing Pahpah Inkuhsrao ke pruhe.

  2. Fahk lah el orekma orekmakihn wal luhn Melchizedek Pristut.

  3. Alu elah kuclyuck ac kihsackuhnlah acn in puckpuck sacn in acn in monglac luhn mahno se misac an.

  4. Pruhe lah acn se inge ac fihliyucki ac karihngihnyuck nuh ke Sifilpac Moulyak (fin kuh ke acn orek kac an).

  5. Siyuck sin Pahpah Inkuhsrao in ahkmisye sucu ac fahk nuhnak ma kolyuck sin Nguhn.

  6. Kaliyac ke inen Jisus Kraist.

Fin monun mempucr se ke Alu uh isisyak, mwet kol se ke toeni sacn orekmakihn kuh lal in sulwaclah lah elac alui acn se ma apact ingacn fihli kac.

1:58

18.17

Mwe insewowo luhn Patriarch

Mwet nwacsnwacs nuhkwewa, mempucr pacptais elos enenuh in eis mwe insewowo luhn patriarch, suc ma kohlohlos sin Pahpah Inkuhsrao (liye Genesis 48:14–16; 49; 2 Nephi 4:3–11).

Pisap kuh mwet in kahsruh se el srihsrngiyac ohsun ac lohlngohk sin mempucrs ma luhngse eis mwe insewowo luhn patriarch. Fin mempucr sacn nwacsnwacs, mwet se oruh lohlngohk sacn ahkolah Patriarchal Blessing Recommend [Lwelah in eis Mwe Insewowo ke Patriarch]. El suhpwaclah nuh Patriarchal Blessing System on ChurchofJesusChrist.org.

Mwet se ma oruh Mwe Insewowo luhn Patriarch liye in wo lah mempucr sacn mahtuh kahlwem ke yohk srihpaciyac ac muhtahliyacn mwe insewowo sacn.

18.17.1

Eis Mwe Insewowo luhn Patriarch

Tukun eis lwelah, mempucr se el pahngonwack patriarch in oraclah sie pacl ah in ohsun eis mwe insewowo luhn patriarch. Ke lwen sacn tuhkuh, mempucr sacn enenuh in som ohsun nuh sin patriarch sacn nokomwacng nuknuk Sacnri.

Kais sie mwe insewowo ke patriarch inge muhtahl, tiac enenuh in etweyuck, ac lukme. Ne ohinge, ahkfahsryeyuck in lukmac sahyacn na fin oasr mwet ke ekahsr sucu ma luhngse wi lohng.

Mwet se ma eis mwe insewowo luhn patriarch enenuh in karuhnguhnwacng kahs kac an, nuhnkuh kac, ac moul in suwohs in eis olwelah ke mwe insewowo se inge nuh ke moul se ac moul ma pahtpaht.

Mempucr ke Alu uh tiac enenuh in kapsra mwe insewowo inge ac tiac enenuh in akacsruhi kac sahyacn na nuh sin mwet fototo ke sucu lom ah. Mwe insewowo luhn Patriarch tiac enenuh in ritiyuck ke toeni ke Alu ah kuh ke kuhtuh toeni sahyac.