18.

Fori Angangepin me Efeioch an Pristut

18.0

Nepoputan

Angangepin me efeioch ir foffor mi pin ra fis me ren ewe mumutan ewe pristut me non iten Jises Kraist. Angangepin me efeioch an pristut ra awora ewe mumuta ngeni an Kot manaman (nengeni Doctrine and Covenants 84:20).

Angangepin me efeioch repwe fis ren nuku non Sam won Nang me Jises Kraist me anongonong won emwenien ewe Ngun mi Fel. Souemwen repwe tumunuoch pwe ra fori fiti ewe mumuta mi pung (nupwen epwe namot), ren ewe mwumwutan pristut, non ewe napanap mi pung, me seni chon fiti mi nimenimoch (nengeni 18.3).

18.1

Angangepin ren Amanaua me Manau mi tekia

Ewe pristut mi pachenong ewe mumuta ne fori angangepin ren ewe kapas allim minne ir mi namot ngeni amanaua me manau mi tekia. Aramas ra fori pwon mi pin ngeni Kot nupwen ra angei ekkei angangepin. Ekkewe angangepinin manau ese much me manau mi tekia mi tettenitiw fan:

• Papatais

• Kapunguno me niffangen ewe Ngun mi Fel

• Kaworen ewe Melkisetek Pristut me seikita ngeni eu ofes (ren mwan)

• Tempel Endowment

• Riri fengen non tempel

Ika emon semirit mi uputiw non ewe pwon mi pin a mano me mwen ier 8, ese namot epwe wor ika fis angangepin. Ika ewe semirit ese uputiw non ewe pwon mi pin, ewe chok angangepin mi namot ngeni i an epwe riri ngeni saman me inan. Pokiten an ewe Chon Amanau Achasefan, meinisin semirit mi mano me mwen ier 8 ir mi “manau non ewe muun Selestial non nang” (Doctrine and Covenants 137:10; pwan nengeni Moronai 8:8–12).

18.3

Pachonong non eu Angangepin ika Efeioch

Ekkewe ir ra fori ika pachenong non eu angangepin ika efeioch mi auchea epwe wor rer ewe mwumwutan pristut me repwe nimenimoch. Napengeni, ewe nongonongen nimenimoch mi wewengeni an emon amwochu echo toropwen mumutan tonong non tempel. Iwe nge, nupwen a emwen me ren ewe Ngun me ekkewe ourour mi nom non ei sopwun, ekkewe pisop me presetenin steik mi tongeni mutata sam ika mwan mi pupunu kewe ir mi amwochu ewe ofesin pristut mi namot ar repwe fori ika fiti ekkoch angangepin me efeioch ina mwo ika rese mwo unusen fich ngeni tempel. Emon chon amwochu pristut ewe ese mwo atawei an watten tipis esap fiti.

Fori ika angei ekkoch angangepin me efeioch a auchea epwe wor mumuta seni emon souemwen a wisen nemenem ewe mi amwochu ekkewe kiien pristut mi auchea ngeni (nengeni 3.4.1). Ika mi namot, mumuta mi tongeni kawor me ren emon chon aninis i a mutata. Nengeni ekkewe chart mi nom fan. Ekkewe porousen onukunuk ngeni presetenin steik repwe pwan nounou ngeni presetenin misin. Ekkewe porousen onukunuk ngeni pisop repwe pwan nounou ngeni presetenin pranch.

Menni Souemwen a Amwochu ekkewe Kii an epwe Awora Mumuta ne Fori ika Angei Ekkoch Angangepinen Manau ese much me Manau mi tekia?

Angangepin	Ion a Amwochu ekkewe Kii
Angangepin Papatais	Ion a Amwochu ekkewe Kii Pisop (ren 8-ier semirit me chon mwichefen mi wor rekotur ier 9 me watte seni ekkewe ar papatais mi witiwitino pokiten mi ter. Presetenin misin (ren chon ekkesiwin minafo chon mwichefen)
Angangepin Kapunguno me niffangen ewe Ngun mi Fel	Ion a Amwochu ekkewe Kii Pisop (ren 8-ier semirit me chon mwichefen mi wor rekotur ier 9 me watte seni ekkewe ar papatais mi witiwitino pokiten mi ter. Presetenin misin (ren chon ekkesiwin minafo chon mwichefen)
Angangepin Kaworen ewe Melkisetek Pristut me seikita ngeni eu ofes (ren mwan)	Ion a Amwochu ekkewe Kii Presetenin steik
Angangepin Tempel endowment	Ion a Amwochu ekkewe Kii Pisop me presetenin steik
Angangepin Riri fengen non tempel	Ion a Amwochu ekkewe Kii Pisop me presetenin steik

Menni Souemwen ra Amwochu ekkewe Kii an epwe Awora Mumutan ar repwe Fori ika Angei Ekoch Angangepin me Efeioch?

Angangepin ika Efeioch	Ion a Amwochu ekkewe Kii
Angangepin ika Efeioch Eita me efeiochu semirit	Ion a Amwochu ekkewe Kii Pisop
Angangepin ika Efeioch Ewe sakrament	Ion a Amwochu ekkewe Kii Pisop
Angangepin ika Efeioch Kaworen ewe Aaronik Pristut me seikita ngeni eu ofes (ren anuon me mwan)	Ion a Amwochu ekkewe Kii Pisop
Angangepin ika Efeioch Ewisa chon mwichefen an epwe angang non ekkoch wis	Ion a Amwochu ekkewe Kii Nengeni 30.8
Angangepin ika Efeioch Epinano oil	Ion a Amwochu ekkewe Kii Mumuta ese namot
Angangepin ika Efeioch Angang ngeni ekkewe mi semwen	Ion a Amwochu ekkewe Kii Mumuta ese namot
Angangepin ika Efeioch Efeiochun kinamwe me Aurour, mi pachenong an sam efeioch	Ion a Amwochu ekkewe Kii Mumuta ese namot
Angangepin ika Efeioch Epinipinin imw	Ion a Amwochu ekkewe Kii Mumuta ese namot
Angangepin ika Efeioch Epinipinin peias	Ion a Amwochu ekkewe Kii Ewe souemwenin pristut ewe a nemeni ewe mwich
Angangepin ika Efeioch Efeiochun petriark	Ion a Amwochu ekkewe Kii Pisop

18.4

Angangepin ren Kukkun Semirit

Emon kukkun semirit mi tongeni epwe efeioch, papatais, kapunguno, epinipinino ngeni eu ofesin pristut, ika ewis ngeni eu kokko ren chok ewe mumuta seni (1) sam me in kewe mi wor ar pung ne fiti ewe pekin finata ika (2) chon tumunu mi mumuta.

18.6

Eita me Efeiochu Semirit

Napengeni ra eita me efeiochu semirit fansoun mwichen kapasen pwarata me echikipin non ewe wart ikewe semer me iner ra nom ie.

18.6.1

Ion a wisen Ngeni ewe Efeioch

Ewe angangepinen eita me efeiochu emon semirit a fis me ren chon amwochu ewe Melkisetek Pristut, mi etipew ngeni Doctrine and Covenants 20:70.

Emon aramas ika famini a mochen pwe emon semirit epwe angei eu it me eu efeioch epwe ota ewe angangepin ngeni ewe pisop I a amwochu ekkewe kiien pristut ren eita me efeiochu semirit non ewe wart.

Emon pisop mi tongeni mutata emon sam ewe mi amwochu ewe Melkisetek Pristut an epwe eita me efeiochu noun semirit ika mwo ewe sam ese mwo unusen fich ngeni tempel (nengeni 18.3). Pisop ra pesei sam ar repwe pwisin amonnereta ne efeiochu pwisin nour semirit.

18.6.2

Ourour

Fan emwenien ewe pisoprik, chon amwochu ewe Melkisetek Pristut ra chufengen non eu kukumos ar repwe eita me efeiochu emon semirit. Ra watiw pour fan ewe mwonukon, ika watiw pour epwe pwetetetiw won mwokuren emon semirit a ekis watte. Iwe ewe emon a wisen kapas:

1. Kapas ngeni Sam won Nang usun non iotek.

2. Apasa pwe ewe feioch a fis ren ewe mumuta seni ewe Melkisetek Pristut.

3. Ngeni ewe semirit eu it.

4. Kapas ngeni ewe semirit.

5. Ngeni ewe semirit eu feioch usun mi emwen me ren ewe Ngun.

6. Osopwano non iten Jises Kraist.

18.6.3

Toropwen Rekotun Semirit me Setifiketin Efeioch

Me mwen emon semirit epwe efeioch, emon sou mak a aea Leader and Clerk Resources (LCR) an epwe amonnata echo Toropwen Rekotun Semirit. Mwirin ewe efeioch, i a fori rekotun an choni mwichefen non ena system me amonnata echo Setifiketin Efeioch. Ei setifiket a mak ren fanen poun ewe pisop me kawor ngeni semen me inen ewe semirit ika chon tumunu.

Ewe it won ewe rekotun choni mwichefen me setifiket repwe nonno ngeni ewe setifiketin uputiw, registerin uputiw non fonu, ika ewe wesewesen it iei.

18.7

Papatais

Papatais ren mwono non konik seni emon mi wor ren mumuta mi namot ren an emon aramas epwe winiti emon chon ewe Mwichefen me angei ewe Ngun mi Fel. Meinisin ekkewe mi kutta manau mi tekia repwe tapweno mwirin ewe nenien appiru an ewe Chon Amanau ren ar angei ekkei angangepin.

18.7.1

Mumuta ren an emon Aramas Epwe Papatais me kopunguno

18.7.1.1

Semirit Ekkewe Ir Chon Mwichefen mi wor Rekotur

Ewe pisop a amwochu ekkewe kiien pristut ren papataisen 8-ier chon mwichefen mi wor rekotur non eu wart. Ekkei semirit repwe papatais me kopunguno won ika mwirin chok awanuwen uputiwer ika epwe taweoch (nengeni Doctrine and Covenants 68:27). Ekkei ir semirit ekkewe ar rekotun Choni mwichefen ra fen nom (nengeni 33.6.2). Nupwen ra tori ier 8, ewe pisop epwe tumunochu pwe mi wor ar tufich ne etiwa ewe kapas allim me papatais me kopunguno.

Ewe pisop ika emon chon aninis mi kefinita a interfiuni semirit mi wor rekotur ar repwe papatais me kapunguno. Ekkewe ourour ra nom non 31.2.3.1.

Ren porous usun amwosowen ewe Rekotun Papatais me Kapunguno, nengeni 18.8.3.

18.7.1.2

Chon ekkesiwin

Ewe presetenin misin a amwochu ekkewe kiien pristut ren papataisen chon ekkesiwin. Ren ei popun misineri ra angang non ruu ier ra interfiuni chon ekkesiwin ar repwe papatais me kapunguno.

18.7.2

Mwichen Papatais

Eu mwichen papatais epwe chok mecheres, mwitir, me ur ren ewe ngun mi fel. Mi tongeni pachenong ekkei makketiw fan:

1. Konun mwen nepoputan

2. Eu mwitirin etiwetiw seni ewe brother ewe a wisen etetteni ewe mwich

3. Eu konun nepoputan me iotek

4. Eu ika ru mwochomwochen porous won itenapen kapas allim, usun ren papatais me ewe niffangen ewe Ngun mi Fel

5. Echo kon mi finita

6. Ewe papatais

7. Eu fansoun fanafaneno nupwen ekkewe ra fiti ewe angangen papatais ra siwininong non uf mi pwas (kon mi fen ika konun Primary mi tongeni ettik ika kon non ei fansoun)

8. Ewe kapungunon 8-ier chon mwichefen mi wor rekotun; ewe kapungunon chon ekkesiwin ika mi punguno me ren ewe pisop (nengeni 18.8)

9. Apasa kapasen pwarata me ren emon minafo chon ekkesiwin, ika a mochen.

10. Eu konun nesoponon me iotek

11. Konun mwirinon

Nupwen emon semirit mi wor rekotun a monneta an epwe papatais, emon chon ewe pisoprik me presetensin Kinter a ourour fengen me ewe famini ar repwe kokkot me otano eu mwichen papatais. Emon chon ewe pisoprik a etetteni ewe mwich. Ika mi nap seni emon semirit epwe papatais non ewe chok pwan maram, ir mi tongeni ani fengeni eu mwichen papatais.

Non ekkewe steik mi chommong semirit mi wor rekotur, semirit seni chommong wart mi tongeni ani fengeni eu mwichen papatais. Emon chon ewe presetenin steik ika chon mwich mi nap mi finita a etetteni ewe mwich.

Papataisen emon chon eu famini esap witiwitino tori an emon sam a tongeni angei ewe pristut me fori ewe papatais won winikapan.

Fan emwenien ewe pisoprik, ewe souemwenin misin non ewe wart (ika mi wor emon mi kokko) ika ewe chon ewe presetensin mwichen elter ewe a emweni angangen misineri non ewe wart a ota me etetteni mwichen papataisen chon ekkesiwin. Ra angang fengen me ekkewe misineri ra angangen misineri ruu ier.

18.7.3

Ion a Fori ewe Angangepin

Ewe angangepinen papatais a fis me ren emon prist ika emon mi amwochu ewe Melkisetek Pristut Ewe aramas a wisen fori eu papatais epwe mumuta me ren ewe pisop (ika me ren ewe presetenin misin ika emon misineri mi full-time a wisen fori ewe papatais.

Emon pisop mi tongeni mutata emon sam ewe i emon prist ika emon mi amwochu ewe Melchizedek Pristut an epwe papataisei noun semirit ika mwo ewe sam ese mwo unusen fich ngeni tempel (nengeni 18.3). Pisop ra pesei sam ar repwe pwisin amonnereta ne papataisi pwisin nour semirit.

18.7.4

Ian epwe Fori ewe Angangepin

Papatais repwe fis non eu nenien papatais ika mi wor eu. Ika ese wor eu nenien papatais, eu unusen konik mi tumun mi tongeni aea.

Ren pekin tumun, emon mi mwukono mi atamatam epwe nom nupwen ewe nenien papatais a anene me epwe nom tori an a kokusuno, nimoch, me kesipino. Ewe nenien papatais epwe mwitir kokusuno mwirin eu me eu mwichen papatais. Ekkewe asam ngeni ewe nenien papatais repwe nok nupwen esap wor chon aea.

18.7.5

Uf

Emon aramas ewe a fori eu papatais me emon aramas ewe epwe papatais ra ufouf uf mi pwech esap menenen nupwen a chechen. Emon aramas mi endow a ufouf ewe ufoufen non tempel fan ei uf nupwen a fori eu papatais. Kinikin non ewe neni repwe kamo ufoufen papatais ren monien ar kewe kinikin me resap amomo ar repwe ufouf.

Ufoufen papatais mi tongeni chumwong seni store.ChurchofJesusChrist.org.

18.7.6

Chon Pwarata

Ruemon chon pwarta, ra mumuta me ren ewe souemwen mi nemenem, ra attona eu me eu papatais ne tumunochu pwe mi fisioch. Chon ewe mwichefen mi papatais, mi pachenong semirit me serafo, ir mi tongeni repwe chon pwarata.

Eu papatais epwe enniwin sefan ika ewe chon fori ese apasa ekkewe wesewesen foufoun usun mi mak non Doctrine and Covenants 20:73. Epwe pwan enniwin sefan ika kinkinin inisin ewe aramas, mokur, ika ufan ese unusen mwono.

18.7.7

Ourour

An epwe fori ewe angangepinen papatais, emon prist ika emon mi amwochu ewe Melkisetek Pristut:

1. A uta non ewe konik fiti ewe aramas epwe papatais.

2. Kamwoch peniemwanin kumuchuno ewe aramas ren peniefefinen poun (ren an epwe tamoch me pekin tumun). Ewe aramas epwe papatais a kamwoch peniefefinen kumuchun ewe chon peniefefinen poun ewe chom amochu ewe pristut .

3. Eitieta peniemwanin poun ngeni ewe sukea.

4. Apasa unusen iten ewe aramas me apasa, “Seni ewe mumuta me ren Jises Kraist a nom rei, ua papataisek fan iten ewe Sam, me ewe Nau, me ewe Ngun mi Fel. Amen” (Doctrine and Covenants 20:73).

5. Fori ewe aramas epwe kamwoch pwotun ren peniemwanin poun (ren taweoch); iwe a wata peniemwanin poun won asetan nukunupen ewe aramas me akokano unusen ewe aramas, mi pachenong ufan kewe.

6. Anisi ewe aramas epwe tuta sefan seni ewe konik.

18.8

Kapunguno me Niffangen ewe Ngun mi Fel

Mwirin emon aramas a papataiseno, i epwe kapunguno emon chon ewe Mwichefen me ngeni ewe Ngun mi Fel ren ewe iseta pau won mokur (nengeni Doctrine and Covenants 20:41; Foffor 19:1–6). Ewe aramas a winiti emon chon ewe Mwichefen mwirin ir me ru ekkei angangepin ra wesochuno me rekotuno (nengeni John 3:5; Doctrine and Covenants 33:11; 3 Nifai 27:20).

Ewe pisop a emweni ewe angangen kapunguno. Wanu-ier semirit napengeni ra kapunguo non ewe ran ra papatais. Chon ekkesiwin napengeni ra kapunguno non eu mwichen sakrament non ewe wart ikewe ra nom ie, ika epwe tufich non ewe Raninfel mwirin ar papatais.

Emon chon ewe pisoprik a opuru ekkewe emwen non 29.2.1.1 nupwen a introduce emon minafo chon mwichefen.

18.8.1

Ion a Fori ewe Angangepin

Emon chok mi amwochu ewe Melkisetek Pristut ewe mi nimenimoch ngeni tempel epwe wisen tupuni ne kapas ren eu kapunguno. Nge inamo, emon pisop mi tongeni mutata emon sam ewe mi amwochu ewe Melkisetek Pristut an epwe uta non ewe kukumos ren kapungunon noun we semirit ika mwo ewe sam ese mwo unusen fich ngeni tempel (nengeni 18.3).

Mwaren emon chon ewe pisoprik a fiti ei angangepin. Nupwen elter misineri ra aiti emon chon ekkesiwin, ewe pisop a tingorer repwe fiti.

18.8.2

Ourour

Fan emwenien ewe pisoprik, emon ika napeseni mi amwochu ewe Melkisetek Pristut ra fiti ei kapunguno. Ra apena ne watiw pour won mokuren ewe aramas. Iwe ewe emon a wisen tupuni ne kapas:

1. A kokkori ewe aramas ren itan ika unusen itan.

2. Apasa pwe ewe angangepin a fis ren ewe mumuta seni ewe Melkisetek Pristut.

3. Apungano ewe aramas pwe emon chon ewe Mwichefenin Jises Kraist ren Aramas mi Pin non Fansoun Soponon.

4. Apasa “angei ewe Ngul mi Fel” (esap “angei ewe niffangen ewe Ngun mi Fel”).

5. Ngeni ekkoch kapasen efeioch usun mi emwen me ren ewe Ngun.

6. Osopwano non iten Jises Kraist.

18.8.3

Rekotun Papatais me Kopunguno me Setifiket

Me mwen emon semirit ewe i emon chon mwichefen mi wor rekotun a interfiu ren papatais, emon sou mak a aea LCR an epwe amonnata echo Toropwen Papatais me Kapunguno. Ewe pisop ika emon chon aninis mi finita a etetteni ewe interfiun me sainei ewe toropwe. Mwirin ewe papatais me kapunguno emon sou mak a nounou ei toropwe an epwe forsefani rekotun an ewe semirit choni mwichefen non LCR.

Nupwen emon misineri mi angang ru ier a interfiuni emon chon ekkesiwin ren papatai, i a amwosowa ewe Rekotun Papatais me Kapunguno ren an nounou ewe Area Book Planner (ABP) app. Mwirin ewe papatais me kapunguno, ekkewe misineri ra rekotuni ewe porous non ABP me wanong ngeni ewe sou mak non ewe wart me non kampiuter. Ewe sou mak non ewe wart a attonaochu ewe porous non LCR me fori ewe rekotun choni Mwichefen.

Mwirin an rekotun chon choni mwichefen a for, emon sou mak a amonnata ewe Setifiketin Papatais me Kapunguno. Ei setifiket a sain seni ewe pisop me kawor ngeni ewe aramas.

Ewe it won ewe rekotun choni mwichefen me setifiket repwe nonno ngeni ewe setifiketin uputiw, registerin uputiw non fonu, ika wesewesen ewe it iei.

18.9

Ewe sakrament

Chon Mwichefen ra chufengen non ewe ranin Sabbath ar repwe fen ngeni Kot me angei ewe sakrament (nengeni Doctrine and Covenants 20:75; 59:9; Moronai 6:5–6).6). Fansoun ei angangepin, ra angei ewe pinewa me konik ar repwe chechemeni an ewe Chon Amanau fangeno Inisin me chan me ar repwe asofosefani ar kewe pwon mi pin (nengeni Matthew 26:26–28; Joseph Smith Translation, Mark 14:20–25; Luke 22:15–20; 3 Nifai 18; Moronai 6:6).

18.9.1

Mumuta ne Fori ewe Sakrament

Ewe pisop a amwochu ekkewe kiien pristut ren ewe angangen ewe sakrament non ewe wart. Meinisin ekkewe ra fiti amonnetan, efeiochun, me assawan ewe sakrament repwe angei mumuta seni i ika emon mi nom fan an emwen.

18.9.2

Ion a Fori ewe Angangepin

• Sense, prist, me ekkewe mi amwochu ewe Melkisetek Pristut mi tongeni amonnata ewe sakrament.

• Prist me ekkewe mi amwochu ewe Melkisetekek Pristut mi tongeni efeiochu ewe sakrament.

• Tiken, sense, prist, me ekkewe mi amwochu ewe Melkisetek Pristut mi tongeni passini ewe sakrament.

18.9.3

Ekkewe Emwen ren ewe Sakrament

Pokiten nonnomun ewe sakrament mi pin, souemwenin pristut repwe amonnafichieta pwe epwe tettenoch me mosonson.

Pisekin sakrament mi tongeni chumwong seni store.ChurchofJesusChrist.org.

Ekkewe ir ra fori ewe sakrament repwe fori non sufonochun napanap, repwe esinna pwe ra tupuni ewe Samon.

Ewe passin ewe sakrament epwe chok fis non pusin foforun esap nununo seni pusin foforun.

Inamo ika ewe sakrament epwe fis fan iten chon ewe Mwichefen, esap wor mettoch epwe fis an epwe eppeti seni ekkoch ar repwe angei.

18.9.4

Ourour

1. Ekkewe ir ra amonnata, efeiochu, ika passini ewe sakrament repwe akkom tonu pour ren sopw ika ekkoch enimenim.

2. Sense, prist, ika ekkewe mi amwochu ewe Melkisetek Pristut repwe tumunochu pwe ekkewe nenien pinewa fiti pinewa ese kinikinitiw, nenien konik fiti kapen konik mi nimoch, me chechen chepen mi nimoch repwe nom nenier me mwen ewe mwich.

3. Nupwen chon mwichefenin ewe wart ra konun sakrament, ekkewe ir repwe efeiochu ewe sakrament repwe uta non sufon, sarisi ewe mwangaku mi pwonueno ekkewe nenien pinewa, me kinietiw ewe pinewa non kukkunun kinikinin.

4. Mwirin ewe kon mi fen, ewe aramas a efeiochu ewe pinewa a fotopukutiw me apasa ewe iotekin sakrament ren ewe pinewa (nengeni Doctrine and Covenants 20:77).

5. Ewe pisop a tumunochu pwe ekkewe iotekin sakrament ra kapas non fatafatoch, repwe wesewesen pung, me non sufon. Ika emon a mwanino non kapasan me a pwisin apungu, esap pwan chiwen namot epwe wor kapungun. Ika ewe aramas ese apungu an mwanino, ewe pisop epwe umoumoch ne eisini epwe enniwini sefani ewe iotek.

6. Mwirin ewe iotek, ekkewe chon amwochu ewe pristut repwe mosonoson ne passini ewe pinewa ngeni ekkewe chon mwichefen. Ewe souemwen mi nemenem epwe akkom angei, iwe mwirin ese wor tettenin. Nupwen eu nenien ewe sakrament a kawor ngeni chon mwichefen, ir mi tongeni passini ngeni pwan emon.

7. Chon mwichefen repwe angei ren peniemwanin pour nupwen mi tufich.

8. Nupwen ewe pinewa a fen pass ngeni meinisin chon mwichefen, ekkewe ra passini ewe sakrament ra eniwini ekkewe sepien sakrament ngeni ewe chepenin sakrament. Ekkewe ra efeiochu ewe sakrament ra wata echo mwangaku won ekkewe nenien pinewa me sukano ekkewe nenien konik.

9. Ewe aramas a efeiochu ewe konik a fotopukutiw me apasa ewe iotekin sakrament ren ewe konik (nengeni Doctrine and Covenants 20:79). A siwinanong ewe kapas konik ren wine.

10. Mwirin ewe iotek, ekkewe chon amwochu ewe pristut repwe mosonoson ne passini ewe konik ngeni ekkewe chon mwichefen. Ewe souemwen mi nemenem epwe akkom angei, iwe mwirin ese wor tettenin.

11. Nupwen ewe konik a fen pass ngeni meinisin chon mwichefen, ekkewe ra passini ewe sakrament ra eniwini ekkewe sepien sakrament ngeni ewe chepenin sakrament. Ekkewe ir ra efeiochu ewe sakrament ra wata echo mwangaku won ekkewe sepien sakrament, me ekkewe ir ra efeiochu me passini ewe sakrament ra mosonoson ne mwotiw won ar kewe sea.

12. Mwirin ewe mwich, ekkewe ir ra amonnata ewe sakrament ra enimenim, annu ekkewe chechen chepen, me nimetano pinewa rese aea.

18.10

Kaworen ewe Pristut me Seikita ngeni eu Ofes

Mi wor ru kinikinin ewe pristut: ewe Aaronik me Melkisetek (nengeni 3.3; Doctrine and Covenants 107:1, 6). Nupwen ewe pristut a kawor ngeni won emon aramas, i a pwan seikita ngeni eu ofes non ena pristut. Mwirin eu me nein ekkei pristut a fen kawor ngeni emon, a namot emon mwan epwe chok seikita ngeni ekkoch pwan ofes non ena pristut.

18.10.1

Melkisetek Pristut

Ewe presetenin steik a amwochu ekkewe kiien pristut ren kaworen ewe Melkisetek Pristut me seikita ngeni ekkewe ofesin elter me prist mi nap. Nge inamo, napengeni ewe pisop a awora ekkoch ir mi tongeni angei ekkei angangepin.

18.10.1.1

Elter

Ekkewe mwan mi nimenimoch mi tongeni angei ewe Melkisetek Pristut me seikita ngeni elter nupwen ir 18 ier ika watte seni. Anongonong won nonnomun emon, ewe pisop a finata ika emon anuon epwe seikita ngeni elter mwirin chon 18 wen uputiwan ika epwe chok nomwetiw ren ekkewe prist.

Non an fori ei pekin finata, ewe pisop a eisini akkom ewe anuon me saman me inan ika chon tumunu. Mwan mi nimenimoch repwe seikita ngeni elter atun ier 19 ika me mwen ra no seni imwer ar repwe fiti college, anganga eu misin non ru ier, angang non pekin sounfiu, ika etiwa angang mi angangatam.

Mwan mi keran chok papatais ier 18 me watte seni ra seikita ngeni elter mwirin ar:

• Angei ewe Aaronik Pristut me angangen prist.

• Awatteno weweochun ewe kapas allim.

• Pwarano ar nimenimoch.

Ese wor fansoun mi affateno ren an emon chon Mwichefen epwe fori.

18.10.1.2

Prist mi Nap

Mwan ra seikita ngeni prist mi nap nupwen ra kokkot ngeni eu presetensin steik, mwich mi nap, ika pisoprik.

18.10.1.3

Interfiu me Etiwa ach sipwe Anisi

Ren ewe mumuta seni ewe presetensin steik, ewe pisop a interfiuni ewe brother usun mi makketiw won ewe Rekotun Seikitan Melkisetek Pristut. Iwe emon chon ewe presetensin steik a pwan interfiuni i. Ren mumuta seni ewe presetenin misin, ewe presetenin tischrik mi tongeni interfiuni emon brother an epwe seikita ngeni elter (nengeni 6.3).

18.10.2

Aaronik Pristut

Ewe pisop mi amwochu ekkewe kiien pristut ren kaworen ewe Aaronik Pristut me seikita ngeni ekkewe ofesin tiken, sense, me prist. Mwan mi nimenimoch napengeni ra seikita ngeni ekkei ofes ren ekkewe ier mi makketiw fan, nge esap me mwan:

• Tiken nepoputan ewe ier repwene 12.

• Sense nepoputan ewe ier repwene 14.

• Prist nepoputan ewe ier repwene 16.

Ewe pisop ika emon chon aninis mi finita a interfiuni ekkewe ir repwe seikita ngeni tiken ika sense ar repwe katon ika ir mi monneta non pekin ngun. Ewe pisop a interfiuni mwan ekkewe ir repwe epinipin ngeni prist.

Me mwen an epwe iterfiuni emon anuon ren seikitan pristut, emon chon ewe pisoprik epwe angei mumuta seni saman me inan ika chon tumunu ewe anuon. Ika ekkewe sam me in mi mwufesen, i a angei mumuta seni ewe sam ika mi wor an nemenen mi kawor ngeni.

18.10.3

Awora emon Chon Mwichefen an Epwe Ketiw ach sipwe Anisi me mwen I epwe Epinipin

Mwirin an emon brother a fen wes me interfiu me pwa pwe mi nimenimoch an epwe seikita ngeni eu ofesin pristut, i a kawor ren ar repwe etiwa ne anisi (nengeni Doctrine and Covenants 20:65, 67). Mwan repwe seikita ngeni elter ika prist mi nap ra kawor me ren emon chon ewe presetensin steik non ewe mwichenapen steik (nengeni 6.3 ren ourour ren presetenin tischrik). Mwan repwe seikita ngeni tiken, sense, ika prist ra kawor me ren emon chon ewe pisoprik non mwichen sakrament.

Ewe aramas a etetteni ewe ketiw ren ar repwe anisi a tingor ewe mwan epwe uta. A esinei ewe kokkoten awora ewe Aaronic ika Melkisetek Pristut (ika mi namot) me seikata ewe brother ngeni ewe ofesin pristut. Mwirin i a etiwa ekkewe chon mwichefen repwe etiwa ar repwe anisi ewe tingor. Ren awewe, ren an epwe affatano emon brother an epwe seikita ngeni elter, i mi tongeni nounou kapas usun ekkei:

“Sia kokkot pwe [it] epwe angei ewe Melckisetek Pristut me epwe seikita ngeni elter. Ekkewe ir mi tipeew repwe pwari ren ewe eitieta pau. [Ekis kouno.] Ekkewe rese tipeew, ika mi wor, repwe pwan pwari. [Ekis kouno.]”

Ika emon chon mwichefen mi murinno ese tipeew ngeni ewe seikita, ewe souemwen mi nemenem ika pwan emon souemwenin pristut mi finita epwe chufengen me atewe ika neminewe non monomon mwirin ewe mwich. Ewe souemwen epwe kuttan an epwe weweiti pwata ewe chon mwichefen ese tipeew. A sinei ika ewe chon mwichefen mi sinei och mwokutukut minne mi tongeni eppeti ewe aramas seni an epwe seikita ngeni ewe ofesin pristut.

Non ekkoch napanap, mi namot emon brother epwe seikita ngeni elter ika prist mi nap me mwen i mi tongeni kawor ngeni ewe mwichen steik. Nupwen ei a fis, i a kawor ngeni an we wart non mwichen sakrament ren ar repwe etiwa ne anisi. I mwirin epwe kawor ngeni chon mwichefen me non ewe mwichenapen steik mwirin ar repwe apungano ewe seikita (siwini ewe foffor ren etiwa ne anisi emon, mi awewetiw asan).

18.10.4

Ion a Fori ewe Angangepin

Ewe presetenin steik ika emon mi amwochu Melkisetek Pristut mi nom fan emwenian mi tongeni seikata emon mwan ngeni ewe ofesin elter. Fiti mumuta seni ewe presetenin misin, ewe presetenin tischrik ika emon mi nom fan emwenian mi tongeni fori ewe seikita (nengeni 6.3). Ekkewe chon ra amwochu Melkisetek Pristut mi tongeni uta non ewe kukumos.

Ewe presetenin steik ika emon prist mi nom fan emwenian mi tongeni seikata emon mwan ngeni ewe ofesin prist mi nap. Ekkewe chok prist mi nap mi tongeni uta non ewe kukumos.

Emon aramas a seikata emon mwan ngeni eu ofesin Melkisetek Pristut epwe fich ngeni tempel. Ewe presetenin steik ika emon i a finata epwe nom.

Emon prist ika emon mi amwochu Melkisetek Pristut mi tongeni seikata emon brother ngeni ewe ofesin tiken, sense, ika prist. I epwe mumuta me ren ewe pisop. Ewe pisop ika emon i a finata epwe nom.

An epwe fiti eu seikitan Aaronik Pristut, emon aramas epwe emon prist ika epwe amwochu ewe Melkisetek Pristut.

Emon pisop mi tongeni mutata emon sam ewe i emon prist ika emon mi amwochu ewe Melkisetek Pristut an epwe seikata noun att ngeni ewe ofesin tiken, sense, ika prist inamo ika ewe sam ese mwo unusen fich ngeni tempel (nengeni 18.3). Pisop ra pesei sam ar repwe pwisin amonnereta ne seikata pwisin nour att.

18.10.5

Ourour

An epwe awora ewe pristut me seikata emon aramas ngeni eu ofesin pristut, emon ika mi napeseni chon amwochu ewe pristut mi mumuta ra wata pour epwe pwetetetiw won mokuren ewe aramas. Iwe ewe emon a wisen tupuni ne kapas:

1. A kokkori ewe aramas ren unusen itan.

2. Apasa ewe mumuta i mi pwisin amwochu an epwe fori ewe angangepin (epwe ewe Aaronik ika Melkisetek Pristut).

3. Ngeni ewe Aaronik ika Melkisetek Pristut, tiwenon chok ika a fen kawor ngeni.

4. Seikata ewe aramas ngeni eu ofes non ewe Aaronik ika Melckisetek Pristut me ngeni ekkewe pung, manaman, me mumutan ena ofes.

5. Ngeni ekkoch kapasen efeioch usun mi emwen me ren ewe Ngun.

6. Osopwano non iten Jises Kraist.

Ren seikitan emon aramas ngeni eu ofesin pristut mwirin i a fen kawor ngeni ewe pristut mi fich ngeni, ewe aramas a fori ewe seikita epwe nikitau tetten 3.

18.10.6

Rekotun Seikita me Setifiket

Me mwen emon brother a interfiu ren an epwe seikita ngeni eu ofes non ewe Aaronik Pristut, emon sou mak a aea LCR an epwe amonnata echo Rekotun Seikitan Aaroniik Pristut. Ewe pisop ika emon chon aninis mi finita a etetteni ewe interfiuni me sainei ewe toropwe ika nonnomun nimenimoch meinisin mi och.

Mwirin ewe seikita, ewe pisop ika emon chon aninis mi finita a awesano ewe toropwe me ngeni emon sou mak. I a rekotei ewe seikita non LCR me amonnata echo setifiketin seikita.

Wesewesen iten emon aramas epwe nom won ewe rekotun seikita me setifiket.

18.11

Efeiochu Chon Mwichefen ngeni Wis ar Repwe Angang non Wis

Chon mwichefen ekkewe ra kokko me ketiw ach sipwe etiwer ngeni napengeni wisen Mwichefen repwe efeioch ngeni wis ar repwe angang non ena wis (nengeni John 15:16; Doctrine and Covenants 42:11; nengeni pwan 3.4.3.1 non ei pukenap). Fansoun ewe efeioch ngeni wis, ewe aramas a kawor ngeni (1)mumuta ne mokutukut non ewe wis me (2) kapasen efeioch usun mi emwen me ren ewe Ngun.

Presetenin steik, pisop, me presetenin mwich ra angei kiien presetensi nupwen ra efeioch ngeni wis (ngeni 3.4.1.1. Iwe nge, ewe kapas kii esap aea nupwen ra efeiochu chon mwichefen ngeni wis ar repwe angang non ekkoch kokko, mi pachenong chon aninnis non presetensi.

18.11.1

Ion a Fori ewe Ewis

Ewe angangepinin ewis a fis me ren emon mi amwochu ewe Melkisetek Pristut. Mi auchea an epwe angei mumuta seni ewe souemwen mi amwochu ekkewe kiien pristut mi fich ngeni. Ekkewe ir ra mumuta ar repwe fori eu ewis ra affatetiw non 30.8. Emon elter esap tupuni ne kapas ika uta non ewe kukumos nupwen emon mwan a ewis ngeni eu ofes minne mi namot ngeni i an epwe emon prist mi nap.

Fan emwenien ewe souemwen mi nemenem, emon ika napeseni mi amwochu ewe Melkisetek Pristut ra fiti ei ewis. Preseten ra ewis me mwen nour chon aninis.

Emon souemwen mi nemenem mi tongeni mutata emon mwan mi pupunu ika sam ewe mi amwochu ewe Melkisetek Pristut an epwe uta non ewe kukumos ren ewisan punuwan ika noun semirit ika mwo ewe i ese mwo unusen fich ngeni tempel (nengeni 18.3).

18.11.2

Ourour

Emon ika mi napeseni mi amwochu ewe Melkisetek Pristut ra wata pour epwe pwetetetiw won mwokuren ewe aramas. Iwe ewe emon a wisen tupuni ne kapas:

1. A kokkori ewe aramas ren itan ika unusen itan.

2. Apasa pwe i a foffor me ren ewe mumuta seni ewe Melkisetek Pristut.

3. A ewisa ewe aramas ngeni ewe kokko non ewe steik, wart, mwich, ika klass.

4. Ngeni ewe aramas ekkewe kii ika i epwe angeir.

5. Ngeni ekkoch kapasen efeioch usun mi emwen me ren ewe Ngun.

6. Osopwano non iten Jises Kraist.

18.12

Epinano Oil

Ekkewe mi amwochu Melkisetek Pristut repwe epinano olif oil me mwen a aea ne epiti ewe mi semwen ika riaffou (nengeni James 5:14). Esap pwan wor ekkoch oil epwe aea.

Ekkewe nenien oil ra wor won store.ChurchofJesusChrist.org.

Chon mwichefen resap unumi oil mi epinipinino ika aea won kinikinin inisir mi feiengaw.

18.12.1

Ion a Fori ewe Angangepin

Emon ika napeseni mi amwochu ewe Melkisetek Pristut mi tongeni epinano ewe oil. Ese namot ar repwe angei mumuta seni emon souemwenin pristut.

18.12.2

Ourour

Ren epinanon ewe oil, emon mi amwochu ewe Melkisetek Pristut:

1. A kamwoch eu nenien olif oil mi suk.

2. A kapas ngeni Sam won Nang usun non iotek.

3. Apasa pwe i a foffor me ren ewe mumuta seni ewe Melkisetek Pristut.

4. A epinano ewe oil (esap ewe nenian) me ewisano fan iten kepiten me efeiochun ekkewe mi semwen me riaffou.

5. Osopwano non iten Jises Kraist.

18.13

Angang ngeni ekkewe mi Semwen

Angang ngeni ekkewe mi semwen “ren ewe iseta pau won mokur” a wor ru kinikinin: epiti ren oil me apungano ewe kepit ren eu feioch. Ika ese wor oil mi epinipin, eu efeioch mi tongeni kawor me ren ewe mumuta seni ewe Melkisetek Pristut me nukun eu kepit.

18.13.1

Ion a wisen Ngeni ewe Efeioch

Ekkewe chok mi amwochu Melkisetek Pristut mi nimenimoch mi tongeni angang ne efeiochu ewe mi semwen ika riaffou. Ese namot ar repwe angei mumuta seni emon souemwenin pristut. Ika mi tufich, emon sam mi amwochu ewe Melchizedek Pristut mi tongeni angang ne efeiochu chon an famini mi semwen.

Napengeni, ruemon ika napeseni mi amwochu ewe Melchizedek Pristut mi tongeni angang ne efeiochu ekkewe mi semwen. Iwe nge, emon mi tongeni fori me ru ewe epiti me riri.

18.13.2

Ourour

Epiti ren oil a fis me ren emon mi amwochu ewe Melkisetek Pristut. I:

1. A ennichatiw och ewe oil mi epinipinino won mokuren ewe aramas.

2. Wata poun kewe ne appanatiw won mokuren ewe aramas me kokkori ewe aramas ren unusen itan.

3. Apasa pwe i a foffor me ren ewe mumuta seni ewe Melkisetek Pristut.

4. Apasa pwe i epiti ren ewe oil minne a fen epinipinino ren epitin me efeiochun ewe mi semwen me riaffou.

5. Osopwano non iten Jises Kraist.

Ren ririn ewe kepit, emon ika napeseni mi amwochu ewe Melkisetek Pristut ra wata pour ne appanatiw won mokuren ewe aramas. Iwe ewe emon a wisen apungano ewe kepit:

1. A kokkori ewe aramas ren itan ika unusen itan.

2. Apasa pwe i a apungano ewe kepit me ren ewe mumuta seni ewe Melkisetek Pristut.

3. Ngeni ekkoch kapasen efeioch usun mi emwen me ren ewe Ngun.

4. Osopwano non iten Jises Kraist.

18.14

Efeiochun Kinamwe me Aurour, mi pachenong an Sam Efeioch

18.14.1

Ion a wisen Ngeni ewe Efeioch

Ekkewe mi amwochu ewe Melkisetek Pristut mi tongeni awora efeiochun kinamwe me ourour ngeni chochon famini me ekkoch ekkewe ra tingor.

Emon sam mi amwochu ewe Melkisetek Pristut mi tongeni ngeni noun kewe semirit efeiochun sam. Sam me in ra pesei nour semirit ar repwe kutta efeiochun sam fansoun mi namot. Efeiochun sam mi tongeni rekotutiw ren nour pwisin won winikaper.

Emon mi amwochu ewe Melkisetek Pristut ese namot an epwe angei mumuta seni emon souemwenin pristut an epwe awora efeiochun kinamwe me ourour ika eu efeiochun sam.

18.14.2

Ourour

Ren kaworen eu efeiochun kinamwe me ourour ika eu efeiochun sam, emon ika epwe napeseni mi amwochu ewe Melkisetek Pristut ra wata pour ne appenatiw won mokuren ewe aramas. Iwe ewe emon a wisen tupuni ne kapas:

1. A kokkori ewe aramas ren itan ika unusen itan.

2. Apasa pwe ewe feioch a fis ren ewe mumuta seni ewe Melkisetek Pristut.

3. Ngeni ekkoch kapasen efeioch, kinamwe, me ourour usun mi emwen me ren ewe Ngun.

4. Osopwano non iten Jises Kraist.

18.15

Epinipinin Imw

Chon ewe Mwichefen ir mi tongeni mina imwer kewe repwe epinipin me ren ewe mumuta seni ewe Melkisetek Pristut.

18.15.2

Ourour

Ren epinipinin eu imw, emon mi amwochu ewe Melkisetek Pristut:

1. A kapas ngeni Sam won Nang usun non iotek.

2. Apasa pwe i a foffor me ren ewe mumuta seni ewe Melkisetek Pristut.

3. Epinano ewe imw ussun eu imw mi pin ikewe ewe Ngun mi Fel mi tongeni nonnom ie me awora ekkoch kapas usun mi emwen me ren ewe Ngun.

4. Osopwano non iten Jises Kraist.

18.16

Epinipinin Peias

18.16.1

Ion a Epinano ewe Peias

Emon aramas ewe a epinano eu peias epwe amwochu ewe Melkissetek Pristut me epwe mumuta me ren ewe souemwenin pristut ewe a etetteni ewe mwich.

18.16.2

Ourour

Ren epinipinin eu peias, emon mi amwochu ewe Melkisetek Pristut:

1. A kapas ngeni Sam won Nang usun non iotek.

2. Apasa pwe i a chon nikinikitiw non wis seni ewe mumuta meren ewe Melkisetek Pristut.

3. A efeiochu me epinano ewe nenian peias pwe epwe nenien asoso ren inisin ewe mi mano.

4. A iotek pwe ewe neni epwe pin me tumun tori ewe Niwinsefanito (ika epwe fich ngeni).

5. A tingor Sam won Nang epwe oururu ewe famini me apasa ekkoch ekiek usun mi emwen me ren ewe Ngun.

6. Osopwano non iten Jises Kraist.

Ika inisin emon chon Mwichefen mi kek, ewe souemwen mi nemenem epwe aea an pung ne finata ika epwe epini ewe neni ikewe fanangen ewe mi mano a nom ie.

18.17

Efeiochun Petriark

Meinisin chon mwichefen mi nimenimoch me papatais mi fich ngeni an epwe angei eu efeiochun petriark, minne a awora ourouren emwen seni Sam won Nang (nengeni Genesis 48:14–16; 49; 2 Nifai 4:3–11).

Ewe pisop ika emon chon aninis mi finita a interfiuni chon mwichefen ekkewe ra mochen angei eu efeiochun petriark. Ika ewe chon mwichefen mi nimenimoch, ewe chon interfiu a amonnata eu Toropwen Efeiochun Petriark. A tinanong me non ewe Patriarchal Blessing System won ChurchofJesusChrist.org.

Ewe aramas a wau echo Toropwen Efeiochun Petriark a tumunochu pwe ewe chon mwichefen a naf an mirit ne weweiti auchean me pinin ewe efeioch.

18.17.1

Angei eu Efeiochun Petriark

Mwirin an angei eu toropwen mumuta, ewe chon mwichefen a kokkori ewe petriark an epwe ota eu fansoun an epwe angei eu efeiochun petriark. Non ewe ranin ewe kokkon chuno, ewe chon mwichefen epwe no ren ewe petriark fiti ew napanap fiti iotek me non ufoufen Raninfen.

Eu me eu efeiochun petriark mi pin, monomon, me an emon won winikapan. Ina minne, a kawor non monomon tiwenon chok ren ekkoch aukukun chochon famini ir mi tongeni nom.

Emon aramas ewe a angei eu efeiochun petriark epwe aucheani kapasan kewe, ekipwichir, me manau epwe nimenimoch an epwe angei ekkewe feioch mi pwon ngeni non ei manau me non fansoun esemuch.

Chon mwichefen resap anonno fengeni ar efeioch me resap ngeni ekkoch tiwenon chok ngeni chochon ar famini. Efeiochun petriark resap anneanir me non mwichen Mwichefen ika ekkoch ochufengenin aramas.