ol man oli stap leftemap ston

21.

Wok blong Givhan

21.0

Fas Toktok

Blong givhan, hem i minim blong givim seves long ol narawan semmak olsem we Sevya i bin mekem (luk long Matiu 20:26–28).

Lod i wantem blong evri memba blong Jos blong Hem blong oli gat semfala kea ia. From risen ia, olgeta we oli kasem prishud, oli kasem wok ia blong stap olsem ol givhan brata long wanwan haos we i gat memba long hem. Ol givhan sista, oli kasem wok blong lukaot long wanwan adalt sista.

21.1

Ol Responsabiliti blong Ol Givhan Sista mo Ol Givhan Brata

Ol givhan brata mo sista oli gat olgeta responsabiliti ia blong mekem long wanwan man, woman mo famli we oli gat blong lukaotem:

• Oli helpem ol memba blong mekem fet blong olgeta long Papa long Heven mo long Jisas Kraes i kam strong moa.

• Oli helpem ol memba blong oli mekem mo kipim ol tabu kavenan wetem God taem we oli kasem olgeta odinens ia.

• Oli luksave ol nid we oli haed, mo oli givim lav, kea mo seves olsem hemia blong Kraes.

• Oli helpem olgeta long fasin blong kam indipenden long saed blong spirit mo long laef long wol ia.

21.2

Stap Oganaesem Wok blong Givhan

21.2.1

Stap Givimaot Ol Wok

Presidensi blong kworom mo hemia blong Rilif Sosaeti oli prea mo tingting long huia blong givimaot wok olsem ol givhan brata mo sista. Long nomol wei, oli givim wok long tufala brata, o tufala sista blong stap olsem kompanion. Oli askem apruvol blong bisop long saed blong ol givhan kompanionsip mo ol brata mo sista we bae oli go visitim.

Oli save givim wok long wan kapol blong tufala i givhan long wan man, wan woman, o wan famli.

Oli no stap singaotem, sastenem, o setem apat ol givhan brata mo sista.

21.2.2

Ol Wok blong Givhan blong Givimaot long Ol Yut

Wan yang woman i save givim seves olsem wan givhan kompanion long wan Rilif Sosaeti sista taem we yang woman ia i glad blong mekem wok ia mo taem hem i save mekem wok ia. Hem i save stat blong givim seves long yia ia we bae hem i kasem 14 yia.

Wan yang man i stap olsem givhan kompanion blong wan we i kasem Melkesedek Prishud taem we oli odenem hem i go long ofis blong tija o pris.

21.3

Ol Givhan Intaviu

Presiden blong kworom blong ol elda mo ol kaonsela blong hem oli mekem intaviu blong ol givhan brata. Presiden blong Rilif Sosaeti mo ol kaonsela blong hem oli intaviu long ol givhan sista.

Ol intaviu ia, oli stap holem wan taem o moa long wan taem long wanwan kwota.

Stamba tingting blong ol givhan intaviu ia, oli blong:

• Kaonsel tugeta abaot wanem wanwan man, woman mo famli we oli gat wok blong lukaotem, oli save mekem gud, oli nidim, mo fesem olsem jalenj.

• Toktok raon long ol wei blong helpem olgeta blong rere blong kasem ol odinens sapos i gat nid from.

• Faenemaot olsem wanem kworom blong ol elda, Rilif Sosaeti, mo wod kaonsel mo ol narawan oli save help.

• Tijim mo leftemap tingting blong ol givhan brata mo sista.

21.4

Stap Kodinetem Ol Wok blong Givhan

Ol presidensi blong Rilif Sosaeti mo kworom blong ol elda, oli mit wan taem o moa long wan kwota. Oli luklukbak long wanem we oli bin lanem long taem blong ol givhan intaviu (luk long 21.3). Mo tu, oli kodinetem ol wok blong givhan we oli givimaot.

Long ol yunit we i gat samfala memba nomo, ol presidensi blong Rilif Sosaeti mo kworom blong ol elda oli save disaed blong i no gat sam givhan brata mo sista we bae oli lukaot long sam memba.