21.

Li ilok komon

21.0

Xtikibʼankil

Li ilok komon naraj naxye k’anjelak chiruheb’ li qas qiitz’in jo’ kixb’aanu li Kolonel (chi’ilmanq Mateo 20:26–28).

Li Qaawa’ naraj naq chixjunileb’ li komon sa’ lix Iglees te’wanq chi ilb’il chi jo’kan. Xb’aan a’in, eb’ li xe’k’uluk re li tijonelil neke’k’ehe’ xtaqlankil jo’ aj ilol komon choq’ re li junjunq chi junkab’al wankeb’ wi’ li komon. Eb’ li ixq aj ilol komon neke’k’ehe’ xtaqlankil choq’ re li junjunq chi komon ixq.

21.1

Lix teneb’ankileb’ li ixq ut winq aj ilol komon

A’aneb’ a’in xteneb’ankileb’ li ixq ut winq aj ilol komon, choq’ reheb’ li komon ut junkab’al li k’eeb’ileb’ wi’ xtaqlankil:

• Neke’xtenq’aheb’ chixkawob’resinkil lix paab’aaleb’ chirix li qaChoxahil Yuwa’ ut li Jesukristo.

• Neke’xtenq’aheb’ re te’xb’aanuheb’ ut te’xpaab’eb’ li loq’laj sumwank rik’in li Dios naq neke’xk’uleb’ li k’ojob’anb’il k’anjel.

• Neke’xk’e reetal li k’a’ru neke’raj ru li komon ut neke’xraheb’, neke’rileb’, ut neke’k’anjelak chiruheb’ jo’ chanru li Kristo.

• Neke’xtenq’aheb’ re te’ruuq chixtenq’ankil rib’ sa’ musiq’ej ut sa’ li k’a’ru re li yu’am a’in.

21.2

Xk’uub’ankil li k’anjel re rilb’aleb’ li komon

21.2.1

Xk’eeb’aleb’ xtaqlankil

Eb’ li awa’b’ejil re lix molameb’ li xb’eenil ut li Komonil re Tenq’ank neke’xk’oxla rik’in tijok aniheb’ li te’ile’q xb’aaneb’ li winq ut ixq aj ilol komon. Us naq te’xk’e xtaqlankil wiib’ komon winq malaj wiib’ komon ixq re te’xik sa’ wiib’al. Neke’xye re li obiisp ani te’xk’e xtaqlankil, re naq a’an tixk’ulub’a.

Jun winq ut jun ixq sumsuukeb’ naru neke’k’ehe’ xtaqlankil sa’ wiib’al jo’ aj ilol komon choq’ re jun komon malaj junkab’al.

Eb’ li winq ut ixq aj ilol komon ink’a’ neke’b’oqe’, chi moko neke’xaqab’aak xwankil, chi moko neke’xaqab’aak sa’ xk’anjel.

21.2.2

Lix taqlankileb’ li saaj jo’ aj ilol komon

Jun saaj ixq naru nak’anjelak jo’ aj ilol komon rochb’een jun ixq sa’ li Komonil re Tenq’ank, wi li saaj ixq naraj ut wi naru chiru. Naru na’ok chi k’anjelak sa’ xtiklajik li chihab’ tixket wi’ 14 chihab’.

Jun saaj winq nak’anjelak jo’ aj ilol komon rochb’een jun aj k’amol re li Tijonelil re Melkisedek chirix naq k’ojob’anb’il sa’ li opiis re aj tzolonel malaj aj tij.

21.3

Li tz’ilok-ix choq’ reheb’ laj ilol komon

Li awa’b’ej re lix molameb’ li xb’eenil ut eb’ laj tenq’ aj k’ehol na’leb’ neke’xb’aanu li tz’ilok-ix rikineb’ li winq aj ilol komon. Li awa’b’ej re li Komonil re Tenq’ank ut eb’ laj tenq’ aj k’ehol na’leb’ neke’xb’aanu li tz’ilok-ix rik’ineb’ li ixq aj ilol komon.

Neke’b’aanuman li tz’ilok-ix a’in rajlal oxib’ po, malaj chi kok’ chik aj xsa’.

A’an a’in rajb’aleb’ li tz’ilok-ix:

• Aatinak chirix lix kawilaleb’, li rajomeb’ ru, ut lix ch’a’ajkilaleb’ li komon ut li junkab’al li ilb’il xb’aaneb’.

• Xtz’ilb’al rix chan ru xtenq’ankileb’ li komon chixkawresinkil rib’ re te’xk’uleb’ li k’ojob’anb’il k’anjel wi na’ajman ru.

• Xk’oxlankil chan ru naq lix molameb’ li xb’eenil, li Komonil re Tenq’ank, li ch’uut re teep, ut xkomoneb’ chik te’ruuq chi tenq’ank.

• Xtzolb’aleb’ ut xwaklesinkil xch’ooleb’ li winq ut ixq aj ilol komon.

21.4

Xb’eresinkil li k’anjel re rilb’aleb’ li komon

Eb’ li awa’b’ejil re li Komonil re Tenq’ank ut lix molameb’ li xb’eenil neke’ch’utla sa’ komonil rajlal oxib’ po, malaj chi kok’ chik aj xsa’. Neke’aatinak chirix li k’a’ru xe’xtzol sa’eb’ li tz’ilok-ix reheb’ laj ilol komon (chi’ilmanq 21.3). Jo’kan ajwi’ neke’xk’am rib’ sa’ aatin chirix ani taak’ehe’q xtaqlankil jo’ aj ilol komon.

Sa’eb’ li teep b’ar wi’ moko k’iheb’ ta li komon li neke’wulak sa’ li iglees, eb’ li awa’b’ejil re li Komonil re Tenq’ank ut re lix molameb’ li xb’eenil naru neke’xk’e xch’ool naq ink’a’ te’k’ehe’q xtaqlankil li ixq jo’ ajwi’ li winq aj ilol komon choq’ re junjunqeb’ li komon.