23.

Xwotzb’al li evangelio, ut xk’eeb’al xkawilaleb’ li ak’ komon ut li yookeb’ chi sutq’iik

23.0

Xtikibʼankil

Xb’oqb’aleb’ chixjunil chixk’ulb’al li evangelio a’an jun xcha’al li k’anjel re li kolb’a-ib’ ut li taqenaqil loq’al (chi’ilmanq 1.2 sa’ li hu a’in; Mateo 28:19–20). A’in naraj naxye:

• Tz’aqonk sa’ li k’anjel re xjultikankil li evangelio, ut k’anjelak jo’ misioneer.

• Xtenq’ankileb’ li ak’ komon ut li ani yookeb’ chi sutq’iik sa’ li Iglees re te’xik chi uub’ej sa’ xb’ehil li sumwank.

23.1

Xwotzb’al li evangelio

23.1.1

Li rahok

Jun na’leb’ chan ru naru taqak’ut li qarahom chiru li Dios, a’an xraab’aleb’ ut k’anjelak chiruheb’ li ralal xk’ajol (chi’ilmanq Mateo 22:36–39; 25:40). Naqayal qaq’e chi rahok ut chi k’anjelak chiru li qas qiitz’in jo’ kixb’aanu li Jesukristo. Li rahok a’in naxwaklesi qach’ool re taqaraheb’ chixjunil li kristiaan, maak’a’ naxye k’a’ru xpaab’aaleb’, k’a’ru xb’onol lix tib’eleb’, ut k’a’ru lix na’leb’eb’ (chi’ilmanq Hechos 10:34; 2 Nefi 26:33).

23.1.2

Li wotzok

Rik’in naq naqara li Dios ut eb’ li ralal xk’ajol, ch’olch’o ru naq naqaj xwotzb’al li k’a’ru xoorosob’tesi wi’ laa’o (chi’ilmanq Jwan 13:34–35) ut naqaj tenq’ank chixch’utub’ankil Israel. Naqasik’ xtenq’ankileb’ li kristiaan chireek’ankil li sahil ch’oolejil naqeek’a laa’o (chi’ilmanq Alma 36:24). Noko’aatinak chi k’utk’u chirix li Kolonel, ut lix wankilal sa’ li qayu’am (chi’ilmanq Tzol’leb’ ut Sumwank 60:2). Naqawotzeb’ li na’leb’ a’in naq yooko chiraatinankileb’ li qas qiitz’in rik’in aatin, saʼ li ulul ch’iich’, malaj chi jalan chik.

23.1.3

Li b’oqok

Nokotijok re naq taqak’ul qamusiq’ankil ut qab’eresinkil re taqanaw chan ru xb’oqb’aleb’ li qas qiitz’in re naq eb’ a’an:

• Te’chalq ut te’ril li osob’tesink naru neke’xk’ul sa’ xk’ab’a’ li Jesukristo, lix evangelio, ut lix Iglees (chi’ilmanq Jwan 1:37–39, 45–46).

• Te’chalq chi tenq’ank qochb’een chi k’anjelak chiruheb’ li wankeb’ rajom ru.

• Te’chalq chi tz’aqonk sa’ lix Iglees li Jesukristo li k’ojob’anb’il wi’chik.

Chi kok’ aj xsa’, li b’oqok naraj naxye xkanab’ankileb’ li qajunkab’al, li qamiiw ut eb’ li qech kab’al chi tz’aqonk sa’ li k’a’ru ak yooko chixb’aanunkil.

23.2

Xk’eeb’al xkawilaleb’ li ak’ komon

Chixjunilebʼ li ak’ komon aajel ru junaq li ramiiw, xkanabʼankil chi k’anjelak chiru as iitz’inb’ej, ut xchʼoolaninkil saʼ musiqʼej. Jo’ komon sa’ li Iglees, naqaraheb’ ut naqawaklesiheb’ xch’ool li ak’ komon (chi’ilmanq Mosiah 18:8–10). Naqatenq’aheb’ re te’reek’a naq wankeb’ xna’aj sa’ li Iglees. Naqatenq’aheb’ re te’xik chi uub’ej sa’ xb’ehil li sumwank, ut re naq mas wi’chik “te’jale’q xch’ool choq’ re li Qaawa’” (Alma 23:6).

23.3

Xk’eeb’al xkawilaleb’ li komon li yookeb’ chi sutq’iik

Wankeb’ li komon li neke’xkanab’ tz’aqonk sa’ li Iglees. “Toj texk’anjelaq chiru xkomoneb’ a’an,” chan li Kolonel, “xb’aan naq moko nekenaw ta ma ink’a’ te’sutq’iiq ut te’xjal xk’a’uxl, ut te’chalq wik’in chi anchal rajomeb’ xch’ool, ut laa’in teb’ink’irtesi, ut laa’aqex k’anjeleb’aal re xk’amb’al li kolb’a-ib’ rik’ineb’” (3 Nefi 18:32).

Eb’ li komon li ink’a’ yookeb’ chi tz’aqonk, mas wi’chik naq te’sutq’iiq wi wankeb’ li komon sa’ li Iglees neke’xnaweb’ ru chi us. Jo’eb’ li ak’ komon, neke’raj ru li amiiw, neke’raj ru k’anjelak chiru as iitz’inb’ej, ut neke’raj ru xk’ulb’al li musiq’ejil ch’oolanink.

23.4

Eb’ laj jolominel re oqech

23.4.1

Li awa’b’ejil re oqech

Li awa’b’ej re oqech naxk’am xlaawil li oqech re xwotzb’al li evangelio ut xk’eeb’al xkawilaleb’ li ak’ komon ut li yookeb’ chi sutq’iik. A’an ut eb’ laj tenq’ aj k’ehol na’leb’ neke’xjolomi li k’anjel a’in.

Rajlal po, li awa’b’ej re oqech nach’utla rik’in li awa’b’ej re mision re naq lix k’anjeleb’ laj jolominel re oqech ut re teep tixk’am rib’ rik’in lix k’anjeleb’ li misioneer.

23.4.3

Eb’ li komon re li taqenaqil ch’utam

Li awa’b’ejil re oqech naru neke’xk’e xtaqlankileb’ li komon re li taqenaqil ch’utam re te’xtzoleb’ ut te’xtenq’aheb’ li awa’b’ejil re lix molameb’ li xb’eenil ut eb’ laj jolominel re li k’anjel re jultikank re li teep. Jun malaj numenaq jun komon re li taqenaqil ch’utam naru nak’ehe’ xtaqlankil re xb’eresinkil li k’anjel a’in. A’ut chixjunileb’ li komon re li taqenaqil ch’utam neke’xk’ul xteneb’ankileb’ chi jo’kan choq’ reheb’ li teep ut li molam li k’eeb’il wi’ xtaqlankileb’.

23.4.4

Li awa’b’ejil re li Komonil re Tenq’ank re oqech

Chi b’eresinb’il xb’aan li awa’b’ej re oqech, li awa’b’ejil re li Komonil re Tenq’ank re oqech neke’xtzoleb’ ut neke’xtenq’aheb’ li awa’b’ejil re li Komonil re Tenq’ank re teep sa’ lix teneb’ankileb’ re xwotzb’al li evangelio ut xk’eeb’al xkawilaleb’ li ak’ komon ut li yookeb’ chi sutq’iik.

23.5

Eb’ laj jolominel re teep

23.5.1

Li obiispil

Li obiispil naxk’uub’ xna’leb’ rik’ineb’ li awa’b’ejil re lix molameb’ li xb’eenil ut li Komonil re Tenq’ank naq yookeb’ chixb’eresinkil lix k’anjel li teep re xwotzb’al li evangelio ut xk’eeb’al xkawilaleb’ li ak’ komon ut li yookeb’ chi sutq’iik. Eb’ laj jolominel a’in neke’xk’uub’ xna’leb’ sa’ komonil chi kok’ aj xsa’.

Eb’ li wankeb’ sa’ li obiispil neke’xk’e reetal naq te’aatinaq ut te’xk’uub’ xna’leb’ chirix li k’anjel a’in sa’ li ch’uut re teep ut sa’ li ch’uut reheb’ li saaj re teep.

Li obiisp naxb’aanu li tz’ilok-ix rik’ineb’ li ak’ komon li tz’aqaleb’ xchihab’ re xk’ulb’al li recomendacion re li santil ochoch re xb’aanunkil chi uuchilej li kub’iha ut li k’ojob’aak choq’ komon (chi’ilmanq 26.4.2). A’an naxb’aanu ajwi’ li tz’ilok-ix rik’ineb’ li komon winq li tz’aqaleb’ xchihab’ re xk’ulb’al li Tijonelil re Aaron. A’an naxb’aanu li tz’ilok-ix sa’ li xamaan ajwi’ naq xk’ojob’aak li komon sa’ li Iglees.

23.5.2

Eb’ li awa’b’ejil re lix molameb’ li xb’eenil ut li Komonil re Tenq’ank

Eb’ li awa’b’ejil re lix molameb’ li xb’eenil ut li Komonil re Tenq’ank neke’xb’eresi li k’anjel li na’ux wulaj wulaj sa’ li teep re xwotzb’al li evangelio ut xk’eeb’al xkawilaleb’ li ak’ komon ut li yookeb’ chi sutq’iik (chi’ilmanq 8.2.3 ut 9.2.3).

A’aneb’ a’in xteneb’ankileb’ laj jolominel a’in:

• Neke’tenq’an chixwaklesinkileb’ xch’ool li komon re te’xraheb’ li ralal xk’ajol li Dios, re te’xwotz li evangelio, ut re te’xk’e xb’oqb’aleb’ li ras riitz’in chixk’ulb’al li rosob’tesihom li Kolonel.

• Neke’xk’e xtaqlankileb’ li winq ut ixq aj ilol komon rik’ineb’ li ak’ komon ut li ani yookeb’ chi sutq’iik (chi’ilmanq 21.2.1).

• Neke’xb’eresi lix k’anjel laj jolominel re li k’anjel re jultikank re li teep.

Li awa’b’ej re lix molameb’ li xb’eenil ut li awa’b’ejil re li Komonil re Tenq’ank neke’xk’e xtaqlankil jun komon sa’ lix awa’b’ejil re xjolominkil li k’anjel a’in. Eb’ li komon a’in sa’eb’ li awa’b’ejil neke’k’anjelak sa’ komonil. Neke’wulak sa’eb’ li kok’ ch’utam rajlal xamaan (chi’ilmanq 23.5.7).

23.5.3

Laj jolominel re li k’anjel re jultikank re li teep

Li obiispil naxsik’ xna’leb’ rik’in li awa’b’ej re oqech re xnawb’al ma tixb’oq jun aj jolominel re li k’anjel re jultikank re li teep. Aajel ru naq a’anaq aj k’amol re li Tijonelil re Melkisedek. Wi ink’a’ nab’oqe’ laj jolominel a’in, jun komon sa’ li awa’b’ejil re lix molameb’ li xb’eenil naxb’aanu li k’anjel a’in.

Laj jolominel re li k’anjel re jultikank re li teep naxtenq’a li awa’b’ejil re lix molameb’ li xb’eenil ut li awa’b’ejil re li Komonil re Tenq’ank sa’ lix teneb’ankileb’ chirix li k’anjel re xjultikankil li evangelio. Jo’kan ajwi’ naxb’aanuheb’ li k’anjel a’in:

• Naxb’eresi lix k’anjeleb’ li komon ut eb’ laj jolominel sa’ li teep, eb’ li misioneer re li teep, ut eb’ li misioneer.

• Naxb’eresiheb’ li kok’ ch’utam rajlal xamaan (chi’ilmanq 23.5.7).

23.5.4

Eb’ li misioneer re li teep

Eb’ li misioneer re li teep neke’xtenq’aheb’ li komon sa’ li teep re te’reek’a li sahil ch’oolejil rik’in xwotzb’al li evangelio, jo’ ch’olob’anb’il sa’ 23.1. Eb’ a’an neke’k’anjelak rub’el xwankil laj jolominel re li k’anjel re jultikank re li teep, malaj li komon sa’ li awa’b’ejil re lix molameb’ li xb’eenil li nab’aanunk re li k’anjel a’in.

23.5.5

Li ch’uut re teep ut li ch’uut reheb’ li saaj re teep

Sa’eb’ li ch’utam re li ch’uut re teep, aajel ru naq te’aatinaq chi kok’ aj xsa’ chirix xk’eeb’al xkawilaleb’ li komon li ak’eb’ ut li yookeb’ chi sutq’iik. Li obiisp naru naxpatz’ re laj jolominel re li k’anjel re jultikank re li teep naq taawulaq sa’eb’ li ch’utam re li ch’uut re teep.

Sa’ li seraq’ a’in naru neke’k’anjelak li perel hu a’in:

• Registro de progreso de misioneros.

• Progreso de miembros nuevos y de miembros que se hayan vuelto a activar.

Sa’ aatinak chirix li rajomeb’ ru li saaj sa’ li teep, li ch’uut reheb’ li saaj re teep k’a’jo’ naq neke’xk’e reetaleb’ li komon li ak’eb’ ut li yookeb’ chi sutq’iik, ut eb’ li saaj li yookeb’ chi tzole’k xb’aaneb’ li misioneer.

23.5.7

Eb’ li kok’ ch’utam chirix li k’anjel

Rajlal xamaan na’uxman jun ch’ina ch’utam re xk’amb’aleb’ rib’ sa’ komonil chirix xwotzb’al li evangelio ut xk’eeb’al xkawilaleb’ li ak’ komon ut li yookeb’ chi sutq’iik. Wi b’oqb’il jun aj jolominel re li k’anjel re jultikank re li teep, a’an naxjolomi li ch’ina ch’utam a’in. Wi ink’a’, najolomin li komon re lix molamebʼ li xbʼeenil li wan xtaqlankil.

B’oqb’ileb’ ajwi’ li kristiaan a’in:

• Li ani k’eeb’il xtaqlankil sa’eb’ li awa’b’ejil re lix molameb’ li xb’eenil ut li Komonil re Tenq’ank.

• Eb’ li misioneer re li teep.

• Jun reheb’ laj tenq’ sa’ lix molameb’ laj tij (malaj li awa’b’ej re lix molameb’ laj tzolonel malaj lix molameb’ laj tenq’anel wi maak’a’eb’ laj tij sa’ li teep).

• Jun komon sa’ li awa’b’ejil re li tzoleb’aal reheb’ li saaj ixq li mas nim xchihab’.

• Eb’ li misioneer.