24.

Ourouren Kefinitan Misineri me Angangan

24.0

Nepoputan

Non fansoun nom, ewe Samon a wau ewe aurour ne ionfengeni Israel me nein “muu meinisin, papataisir non iten ewe Sam, me ewe Nau, me ewe Ngun mi Fel” (Matthew 28:19; nengeni pwan uwokisin 20). Ewe Samon a eminefosefani ena aurour non ekkewe ranin soponon (nengeni Doctrine and Covenants 39:11; 68:6–8; 112:28–30).

Ach sipwe angang ngeni ewe Samon ina eu tufich mi pin. A wato feioch esemuch ngeni ewe aramas me ekkewe i a angang ngenir (nengeni Doctrine and Covenants 18:14–16).

Ewe Samon a tingorei meinisin mi nimenimoch, anuon mi tufichin amonneta ngeni me anganga eu misin.

Ewe Samon a pwan etiwa mi nimenimoch, fopun mi tufichin angangen misineri ika ir mi mochen.

Senior misineri ir mi pwan namot ngeni me ra pesepes ar repwe monneta ne angang.

24.1

Ewe Kokko ngeni Angang

Misineri ra tupuni ewe Samon me repwe kokko me ren pungun mumuta (nengeni Doctrine and Covenants 42:11; Nongonongen Achifoua 1:5). Ewe kokko ngeni angangen misin napengeni a katou me ren ewe Presetenin ewe Mwichefen. Ren senior misineri chon angang, ewe kokko mi kawor me ren ewe presetenin steik.

24.2

Ekkewe Angang an Misineri

Ewe Kokko ngeni angangen misin mi pachenong eu wis mi affateno. Ekkei wis ir mi watte sokopater.

24.2.1

Serafo Misineri Chon Afanafan

Napengeni serafo misineri ra ewis ngeni ar repwe afanafana ewe kapas allim ren ar no seni imwer. Ekkei angang ra kawor me ren pwarata ngeni ekkewe Aposel. Ekkei misineri ra angang fan emwenien emon presetenin misin.

24.2.2

Serafo Misineri Chon Angang

Ekkoch serafo misineri ra ewis ngeni ar repwe angang non ewe Mwichefen me ewe community nupwen ra nom non imwer. Ekkei angang ra kawor ren pwarata ngeni ekkewe Aposel me ra kawor ngeni chon mochen fori ekkewe nonnomur a murino ngeni eu misin ren pekin angang (nengeni 24.3.3).

24.2.3

Senior Misineri

Meinisin senior misineri ra pesepes ar repwe kutta aramas ar repwe aitir me anisir ne monneta ngeni papatais. Senior misineri ir mi tongeni pwan ewis ngeni ar repwe pekin apochokuna:

• Chon mwichefen me area me souemwen non pusin ewe neni.

• Kinikinin Mwichefen me ekkoch neni.

• Mwicheichen aninnisin mi osupwang.

Senior misineri resap pesepes ar repwe anganga ekkewe pwan chok awa, fori meinisin ekkewe pwan chok mwokutukut, ika apwonueta ekkewe pwan chok esukusuk usun serafo misineri.

Ekkewe angang fan iten senior misineri ra kawor me ren pwarata ngeni ekkewe Aposel. Chon mochen repwe misineri mi tongeni affata met ra mochen ren eu angang nge repwe chengen ne etiwa pwan och sokkun angang.

24.2.4

Senior Misineri ren Pekin Angang

Kapacheta ngeni kokko non ar kewe wart non nenien imwer ika steik, chon mwichefen mi tongeni angang ngeni ewe Samon ren senior misineri chon angang. Ekkei misineri ra awora auchean angang non kinikinin Mwichefen, ekkoch neni, me misin (nengeni 24.7.1). Ra nom non imwer.

Senor misineri ren pekin angang ra kokko me ren ewe presetenin steik. Ra angang fan an emwen. Ewe ukukun fansoun ra angang non eu me eu wiik a anongonong won ar tongeni, tufichin angang non ar area, me emwen seni ewe Presetensin Area.

24.2.5

Mennapen Ekkewe Angang an Misineri

Ewe tetten fan a mennapei ekkewe sokkun angang an misineri.

	Serafo Misineri Chon Afanafan (Nengeni 24.2. 1)	Serafo Misineri Chon Angang (Nengeni 24.2. 2)	Senior Misineri ( nengeni 24.2. 3)	Senior Misineri Chon Angang (Nengeni 24.2. 4)
A kokko me ren	Serafo Misineri Chon Afanafan (Nengeni 24.2. 1) Presetenin ewe Mwichefen	Serafo Misineri Chon Angang (Nengeni 24.2. 2) Presetenin ewe Mwichefen	Senior Misineri ( nengeni 24.2. 3) Presetenin ewe Mwichefen	Senior Misineri Chon Angang (Nengeni 24.2. 4) Presetenin steik
A ewis me ren	Serafo Misineri Chon Afanafan (Nengeni 24.2. 1) Emon Aposel	Serafo Misineri Chon Angang (Nengeni 24.2. 2) Emon Aposel	Senior Misineri ( nengeni 24.2. 3) Emon Aposel	Senior Misineri Chon Angang (Nengeni 24.2. 4) Presetenin steik
A efeioch ngeni wis me ren	Serafo Misineri Chon Afanafan (Nengeni 24.2. 1) Presetenin steik	Serafo Misineri Chon Angang (Nengeni 24.2. 2) Presetenin steik	Senior Misineri ( nengeni 24.2. 3) Presetenin steik	Senior Misineri Chon Angang (Nengeni 24.2. 4) Presetenin steik ika chon aninis
Nom	Serafo Misineri Chon Afanafan (Nengeni 24.2. 1) Towaw seni neimw	Serafo Misineri Chon Angang (Nengeni 24.2. 2) Nom neimw	Senior Misineri ( nengeni 24.2. 3) Towaw seni neimw ika nom neimw	Senior Misineri Chon Angang (Nengeni 24.2. 4) Nom neimw
Souemwenin Ecclesiastic	Serafo Misineri Chon Afanafan (Nengeni 24.2. 1) Presetenin misin ika presetenin nenien uruo	Serafo Misineri Chon Angang (Nengeni 24.2. 2) Presetenin steik	Senior Misineri ( nengeni 24.2. 3) Misin, tempel, ika presetenin nenien uruo; ika Presetenin Area	Senior Misineri Chon Angang (Nengeni 24.2. 4) Presetenin steik
A repot ngeni	Serafo Misineri Chon Afanafan (Nengeni 24.2. 1) Presetenin misin ika presetenin fonuen nenien uruo	Serafo Misineri Chon Angang (Nengeni 24.2. 2) Souemwenin angangen misin	Senior Misineri ( nengeni 24.2. 3) Misin, tempel, ika presetenin fonuen nenien uruo; Presetenin Area; chon nemeni visitor center; ika eu kinikinin Mwichefen ika meinapen ekkoch neni.	Senior Misineri Chon Angang (Nengeni 24.2. 4) Meinapen ewe wis repwe angang ngeni
Ier mi namot repwe fiti	Serafo Misineri Chon Afanafan (Nengeni 24.2. 1) 18–25 (mwan) 19–29 (fefin)	Serafo Misineri Chon Angang (Nengeni 24.2. 2) 18–25 (mwan) 19–29 (fefin)	Senior Misineri ( nengeni 24.2. 3) 40 ika watte seni ika mi pupunu are ika emon fefin ese pupunu	Senior Misineri Chon Angang (Nengeni 24.2. 4) 26 ika watte seni

24.3

Monneta me Fich ngeni Angangen eu Misin

Ekkewe repwe misineri ra pesepes ar repwe anganga eu misin pokiten ar tong fan iten ewe Samon me Noun semirit. Repwe sineochu ekkewe kapaseisen interfiu ren ourouren kefinitan misineri.

24.3.1

Siwin ngeni Jises Kraist

Ekkewe repwe misineri ra achocho ne apochokuna ar siwin ngeni Jises Kraist me An kapas allim mi niwinsefan.

24.3.2

Apwonueta ekkewe Nongonongen Nimenimoch

Ekkewe repwe misineri ra achocho ar repwe nimenimoch ne fich ngeni chiechien ewe Ngun. Ei mi namot ren fetanochun angangen misineri (nengeni Doctrine and Covenants 42:13–14).

24.3.2.1

Aier

Aier a auchea ngeni epwe wor an nuku non Jises, epwe wor ennetin mochen, me apwonueta ekkewe annuk. Mi pachenong pwarata tipis me ponnukano tipis. Ren watten tipis, aier a namot epwe wor pwaratan tipis ngeni ewe pisop ika presetenin steik.

Emon aramas ewe a aier a musuno me nimenimoch me ren ewe Achasefan me chenin Jises Kraist. Ewe Samon esap chiwen chechemeni ewe tipis. (Nengeni Isaiah 43:25; Jacob 6:5; Alma 34:15–17; Ilaman 5:10–11; Doctrine and Covenants 58:42–43. Nengeni pwan 32.1 non ei pukenap.)

Emon a mochen epwe misineri epwe fen aier seni watten tipis me mwen ewe presetenin steik epwe wanong itan an epwe finita (nengeni 32.6; nengeni pwan 24.4.4). Ewe tettenin aier mi pachenong fansoun epwe naf ren an ewe aramas epwe pwari non manau tupwon pwe i a fen angei ewe ngunun Kraist ngeni omusomusen tipis.

24.3.3

Pochokunen Inis, Ekiek, me Tumunun Netip

Angangen misineri mi weires. Serafo misineri chon afanafan repwe nikitu me tufich non pekin inis, ekiek, me netip ar repwe anganga ewe unusen kokkotun misineri.

24.3.4

Pekin moni

24.3.4.1

Pekin Mwini faniten Serafo Misineri ekkewe ra Angang Towaw seni Imwer

Ekkewe serafo ra mochen misineri ekkewe ra fen monneta anongonong won ar tufich resap ammangano seni ar repwe feino angang pokiten osukosuken mwoni. Ekkewe ra mochen pekin aninnisin mwoni ar repwe apwonueta ar pwonen aninis won mwoni ir mi tongeni angei seni tettenin ar famini me chiechier.

Ika mi chiwen aucheani ei aninis, ewe pisop ika presetenin steik mi tongeni tingorei chon ewe wart ika steik ar repwe aninnis ngeni ewe mwonien misineri non ewe wart.

An ewe wart kokkoten nounoun mwoni me mwonien asoren echikipin resap nounou.

Pwonen aninisin mwoni iteiten maram. Serafo misineri chon afanafan me ar famini ra aninis won och aukukun mwoni iteiten maram ar repwe anisi ne meni niwinin prokramin misineri.

Pekin aninis ren mwoni a fis ngeni ewe mwonien misineri non ewe wart. Pisop ra apungano pwe ewe mwonien misineri mi kawor iteiten maram. Mwonian mi nap seni ewe aukukun iteiten maram esap kaworetiw me mwan. Mwonian mi kawor me mwan ese tongeni angei sefani ika emon misineri a niwin ngeni imwan.

Mwonien kamo non ewe nenien misin. Iteiten maram, serafo misineri ra angei mwoni seni ewe misin ar repwe awora mwongo, pekin sai fetan, me ekkoch niwinin mettochun nonnom. Ekkei mwoni ir mi pin. Misineri ra nounou ren chok kewe popun mi wewe ngeni-misin. Resap nounou ren kamon ar pwisin mettoch, isonano, ika tinano ngeni chon ar famini me ekkoch. Misineri repwe eniwini ngeni ewe misin mwoni rese nounono.

Misineri repwe nounou pwisin nour mwoni ren niwinin pekin kamon ekkoch mettoch. Ekkei pekin mwonien kamo ar pwisin epwe kisikis. (Nengeni Missionary Standards for Disciples of Jesus Christ, 4.8.)

24.3.4.2

Awora Mwonien Senior Misineri ekkewe ra Angang Towaw seni Imwer

Pwonen aninis ren moni iteiten maram. Senior misineri kewe ra angang towaw seni imwer ra aninis ngeni ewe mwonien wart misineri non nenien imwer iteiten maram. Ekkei mwonien aninis ra anisi ne meni pekin imw me taraku.

Pisop ra apungano pwe ewe mwonien misineri mi kawor iteiten maram. Mwonian mi nap seni ewe aukukun iteiten maram esap kaworetiw me mwan.

Pwan ekkoch pekin mwonien kamotiw. Kapachetan ngeni ewe pwonen aninis ren mwoni iteiten maram, minne a anisi ne meni pekin imw me taraku, senior misineri repwe unusen awora niwinin pwan ekkoch mwonien kamotiw, mi pachenong mwongo.

24.3.4.3

Awora Mwonien Misineri ekkewe ra Angang Towaw seni Imwer

Misineri ra angang kewe mi nometiw non imwer repwe wisen nikinik won mwonien met mi namot ngenir.

24.3.4.4

Insurance ren Safei me Mwonien Kamo

Meinisin misineri ra pochokun ne pesepes ar repwe annomu nour insurance ren pekin safei ika mi tufich, mi pachenong ekkewe serafo misineri chon afanafan.

Misineri kewe ra angang non nenien imwer repwe awora pusin nour insurance ren pekin safei me pwan ekkoch insurance. Senior misineri kewe ra angang towaw seni imwer repwe pwan awora pusin ei insurance. Senior misineri ekkewe repwe angang nukun fonuer ir mi tongeni angei insurance seni ewe Senior Service Medical Plan.

24.3.5

Wisen Chochon Famini me Souemwen ne Amonnata Misineri

Chochon famini, pisop, me ekkoch souemwen ra anisi serafo ne monneta ngeni ne anganga eu misin.

Chon famini me souemwen ra pesei meinisin chon mochen repwe misineri ne kaeo:

• Ewe Puken Mormon me ekkoch pukefel.

• Afanafana Ai Kapas allim.

• Tumunun Nounoun Technology.

Chon famini me souemwen ra anisi meinisin chon mochen repwe misineri ar repwe nikitu ne tapweno mwirin nongonongen misineri. Ra pesei chon mochen repwe misineri ne kaeo pukenapen nongonongen misineri ewe mi wewengeni ar we assignment:

• Ren serafo misineri chon afanafan: Missionary Standards for Disciples of Jesus Christ

24.4

Ourouren Kefinitan Misineri

24.4.1

Chekin Pochokunen Inis

Meinisin chon repwe misineri a namot ngenir an ekkewe mi sinenap non pekin safei repwe cheki monnetan pochokunen inisir.

24.4.2

Toropwen Interfiu me Ourouren Kefinita

Ewe pisop me presetenin steik ra efisi interfiu mi unusoch, kutten pekin ngun, me ourouroch ren emon me emon a mochen epwe misineri. Repwe aea ekkewe kapaseisen interfiu ren ourouren kefinitan misineri.

Ewe pisop me presetenin steik ra pwan ottona sefani porous usun nongonongen nimenimoch me monnetan pochokunen inis non ewe Missionary Online Recommendation System. Ewe pisop me presetenin steik resap apachata pwan och nongonongen ketiw. Resap pwan siwini ekkewe kapaseisen interfiu.

Ika ewe pisop me presetenin steik a wor ar aurek usun an emon a mochen epwe misineri apwonueta ekkewe nongonongen nimenimoch ika usun monnetan pochokunen inisin, ra ourour fengen me ngeni ewe aramas. Ren an emon serafo mumuta ewe a mochen epwe misineri, ir mi tongeni pwan ourour fengen ngeni saman me inan. Ewe pisop me presetenin steik resap wanong eu ourouren kefinita tori an ewe aramas a aier seni watten tipis (nengeni 24.3.2.1). Anongonong won an ewe aramas pochokunen inis, ekiek, ika netip, ir mi tongeni oporous fengen usun ewe tufichin ar repwe ewis ngeni an epwe emon misineri chon angang.

Non fansoun weiweita nupwen ewe pisop ika presetenin steik ese nom, i mi tongeni mutata emon me nein noun kewe chon aninis an epwe efisi ekkei interfiu.

Non tischrik, ewe presetenin misin ika emon chon aninis mi finita a interfiu me awora iten ekkewe ra mochen repwe misineri ar repwe ourour ne finireta. Presetenin tischrik resap efisi ekkei interfiu.

24.4.4

Ekkewe Rese Tufichin Angangen Misineri non ruu ier

Fan ekkoch emon chon mwichefen ewe a mochen angangen misin meni ese tongeni kokko ngeni an epwe emon misineri an epwe angang non ruu ier. Ei meni pokiten osukosuken pochokunen inis, ese apwonueta ekkewe nongonongen nimenimoch, osukosuken pung, me ekkoch nonnomur. Ewe presetenin steik a tongeni etiwano atewe ika neminewe seni an angangen misineri non ruu ier.

24.5

Mwirin Ar Angei Eu Kokkon Misin

Minafo misineri ir mi kokko ra pesepes ar repwe anneani ika anneasefani ewe Puken Mormon me mwen poputan ar misin. Ra tapweno mwirin an King Benjamin ourour ne “mammasa inisimi, me ami ekiek, me ami kapas, me ami foffor” (Mosaia 4:30).

24.5.1

Tempel Endowment me Angangen non Tempel

Ika minafo misineri mi kokko resamo angei ewe angangepin tempel endowment, repwe fori me mwen poputan angangen misineri ian epwe tufich (nengeni Doctrine and Covenants 43:15–16; 105:33). Ei mi pachenong misineri chon angang ika mi fich ngeni nonnomur.

Minafo misineri ra kokko ekkewe ra endow mi tongeni angang ren angangepin tempel me mwen ra poputani angangen misineri usun mi fich (nengeni 25.5).

24.5.2

Mwichen Sakrament

Ewe pisoprik a etiwa minafo misineri mi kokko ar repwe kapas non mwichen sakrament me mwen poputan ar misin. Ei eu chok mwichen sakrament. Epwe nongonong won ewe sakrament me ewe Chon Amanau.

24.5.3

Efeiochu Misineri ngeni Wiser

Ewe presetenin steik non nenien imwer we a efeiochu emon me emon misineri ngeni wisan epwe chok arap ngeni pwinin maramen poputan an misin. Non fansoun weiweita nupwen ewe presetenin steik ese nom, i mi tongeni mutata emon me nein noun kewe chon aninis an epwe efeiochu misineri ngeni wiser.

Ewe presetenin misin ika emon me nein noun kewe chon aninis ra efeiochu misineri ngeni wiser ekkewe ra kokko seni tischrik non an we misin. Ewe presetenin tischrik esap efeiochu misineri ngeni wiser.

Emon mwan ewe epwe angang towaw seni imwan epwe fokun chok angei ewe Melkisetek Pristut me mwen a efeioch ngeni wisan misineri. Emon mwan ewe epwe misineri chon angang epwe amwochu ewe Melkiseteek Pristut ika mi tufich ngeni nonnomun.

24.6

Angang Towaw seni Neimw

24.6.2

Non ewe Nenien Misin

24.6.2.5

Tingor ne Anisi Ekkoch ren Pekin Mwoni ika ren Sukun ika Mwokutuno Non ekis

Misineri me ar famini resap awora mwonien aninnis ngeni ir ekkewe mi nonom ikewe ekkewe misineri ra angang ia, mi pachenong mwonien aninnis ren sukun. Misineri me ar famini resap pwan awora mwoni ngeni ekkewe aramas ra mochen no nom non pwan ekkoch fonu (nengeni 38.8.19).

24.6.2.8

Rekoten Chon Mwichefen Me Eu-ne-engon

An emon misineri wart non nenien imwan epwe annomu ewe rekotun choni mwichefen. Ewe wart non nenien imwan epwe pwan rekotuni nonomun an eu-ne-engon. Misineri resap meni eu-ne-engon won mwonien aninnis ra angei seni ewe misin. Nge inamo, ra meni eu-ne-engon ika mi pusin wor ar mwoni tonong.

24.6.3

Niwin ngeni Imwer seni eu Misin

24.6.3.1

Niwin ngeni Imwer usun mi Wesewesen Kokkotono

Misineri me chochon ar famini resap tingor niwinikai seni ika atamenon angang pokiten a pusin murino ngenir.

Serafo misineri repwe sai wenewen ngeni imwer seni ar misin. Och pwan sai epwe mumuta chok ika ewe misineri mi fiti mwaren emon sam ika in ika emon chon tumunu.

Misineri rese kepichino tori ar ra repot ngeni nour presetenin steik. Ra aponueta nongonongun misineri tori ena fansoun.

24.6.3.2

Niwinikai ngeni Imwer

Ekkoch misineri ra kepichinokai ren osukosuken inis, nimenimoch, ika ekkoch pwan popun. Pisop me presetenin steik ra awora auchean aninnis ngeni ekkei misineri mi niwinsefan. Souemwen ra anisir repwe angang ar repwe pochokun sefan ika niwin ngeni angangen misineri ika epwe tufich.

24.7

Misin ren Pekin Angang

24.7.1

Esinnata Ekkewe Tufich ren Misineri chon Angang

Ewe pisop, presetenin steik, me misineri chon angang ra ourour fengen ne esinna tufichin angang non ewe neni. Ren serafo misineri chon angang, emon souemwenin misin ren pekin angang me saman me inen ewe misinieri ika chon tumunu ra fiti ewe oporous fengen.

24.8

Mwirin Angangen Misineri

24.8.2

Interfiun Kepichinon Misineri

Ewe presetenin steik a epichano misineri me efisi eu interfiun kepichino. Non tischrik, napengeni ewe presetenin misin ika emon chon aninis mi finita a epichano misineri.

Ekkewe pekin emwen mi mak fan ren ei interfiu epwe aninnis.

• Peser repwe soposopono non eu manauetamen chon kuno noun Jises Kraist.

• Ourourer repwe awatteno oreni mi och ra fen amari nupwen ir misineri.

• Peser repwe ekieki me monneta ngeni ewe fansoun mwach, mi pachenong pekin sukun me angang ren serafo misineri.

• Peser repwe manau nimenimoch pwe repwe fich ngeni echo toropwen mumuta ne tonong non tempel.

24.8.4

Kokko

Souemwen repwe mwitir awora wisen iamwir me wis ngeni misineri ra keran kepichino. Ei mi pachenong ar repwe ekieki ika repwe chon angangen tempel ika epwe tufich (nengeni 25.5).

24.9

Pekin Aninnis ren Ourouren Kefinitan Misineri me Angangan

24.9.2

Websites

• MissionaryRecommendations.ChurchofJesusChrist.org (kawor ngeni chok souemwen non ewe neni me ekkewe repwe kokko ngeni misineri)