“24. Li k’a’ru tz’aamanb’il re xik sa’ li mision, ut li k’anjelak sa’ li mision,” Li na’leb’ isinb’il chaq sa’ li Jolomil K’anjenel Hu (2023).
“24. Li k’a’ru tz’aamanb’il re xik sa’ li mision, ut li k’anjelak sa’ li mision,” Li na’leb’ isinb’il chaq sa’ li Jolomil K’anjenel Hu
24.
Li k’a’ru tz’aamanb’il re xik sa’ li mision, ut li k’anjelak sa’ li mision
24.0
Xtikibʼankil
Sa’ najter kutan, li Qaawa’ kixk’e li taqlahom naq taach’utub’amanq chaq Israel sa’ xyanqeb’ “chixjunileb’ li tenamit, rik’in xkub’sinkileb’ xha’ sa’ lix k’ab’a’ li Yuwa’b’ej, ut li K’ajolb’ej, ut li Santil Musiq’ej” (Mateo 28:19; chi’ilmanq ajwi’ raqal 20). Li Qaawa’ xk’e chi ak’il li taqlahom a’an sa’ roso’jikeb’ li kutan (chi’ilmanq Tzol’leb’ ut Sumwank 39:11; 68:6–8; 112:28–30).
Li k’anjelak chiru li Qaawa’ jo’ misioneer a’an jun li loq’laj chaab’ilal. Naxk’am chaq li junelikil osob’tesink choq’ re li kristiaan, ut choq’ re li ani nak’anjelak wiʼ (chi’ilmanq Tzol’leb’ ut Sumwank 18:14–16).
Li Qaawa’ naraj naq li junjunq chi saaj winq li wan xk’ulub’ ut li kaw rib’ tixkawresi rib’ chi k’anjelak sa’ jun mision.
Li Qaawa’ naxk’uleb’ ajwi’ li saaj ixq li wan xk’ulub’eb’ ut li kaweb’ rib’ chi k’anjelak sa’ jun mision, wi neke’raj.
Ajb’ileb’ ajwi’ ru li komon ak ninqeb’ xchihab’, ut us naq te’xkawresi rib’ chi k’anjelak.
24.1
Li b’oqe’k chi k’anjelak
Eb’ li misioneer neke’xb’aanu ruuchil li Qaawa’, ut tento te’b’oqmanq rik’in tz’aqal li wankilal (chi’ilmanq Tzol’leb’ ut Sumwank 42:11; Eb’ lix Raqalil li Paab’aal 1:5). Lix k’ihaleb’ li b’oqok chi xik sa’ jun li mision neke’chal chaq rik’in li Awa’b’ej re li Iglees. Choq’ reheb’ li komon ak ninqeb’ li te’xik sa’ jun mision re k’anjelak, li b’oqok nachal chaq rik’in li awa’b’ej re oqech.
24.2
Li k’anjel sa’ li mision
Sa’ li b’oqok chi xik sa’ li mision, nak’eeman jun xtaqlankil li misioneer. Jalan jalanq li taqlahom naru nak’eeman.
24.2.1
Eb’ li saaj misioneer aj k’utunel
Lix k’ihaleb’ li saaj misioneer neke’k’ehe’ xtaqlankil chixk’utb’al li evangelio chi najt rik’in rochocheb’. Neke’k’ehe’ li taqlahom a’in chi k’utb’esinb’il chiruheb’ li apostol. Eb’ li misioneer a’in neke’k’anjelak chi b’eresinb’il xb’aan jun awa’b’ej re mision.
24.2.2
Eb’ li saaj misioneer aj k’anjenel
Wankeb’ li saaj misioneer li k’eeb’il xtaqlankileb’ chi k’anjelak sa’ li Iglees ut sa’ li tenamit chi toj wankeb’ sa’ rochoch. Eb’ li taqlahom a’in neke’k’ehe’ chi k’utb’esinb’il reheb’ li apostol, ut neke’k’ehe’ reheb’ li ani mas us wi’chik choq’ reheb’ ok sa’ jun mision re k’anjelak (chi’ilmanq 24.3.3).
24.2.3
Eb’ li misioneer li ninqeb’ xchihab’
Chixjunileb’ li misioneer li ninqeb’ xchihab’ us naq te’xtaweb’ li kristiaan re xtzolb’al, ut naq te’xtenq’aheb’ chixkawresinkil rib’ choq’ re li kub’iha’. Eb’ li misioneer li ninq’eb’ xchihab’ naru ajwi’ neke’k’ehe’ xtaqlankil chi tenq’ank sa’eb’ li k’anjel a’in:
-
Rik’ineb’ li komon ut eb’ laj jolominel sa’ li area ut sa’ li junjunq chi na’ajej.
-
Rik’ineb’ li k’anjeleb’aal ut eb’ lix kab’lal li Iglees.
-
Rik’ineb’ li ch’utam li neke’k’anjelak chiru as iitz’inb’ej.
Eb’ li misioneer li ninqeb’ xchihab’ ink’a’ napatz’man reheb’ naq te’k’anjelaq chiru xk’ihal li hoonal neke’k’anjelak wi’ li saaj misioneer, chi moko naq te’xb’aanu li k’anjel neke’xb’aanu ut te’wanq jo’eb’ a’an.
Eb’ lix taqlankileb’ li misioneer li ninqeb’ xchihab’ neke’k’ehe’ jo’ k’utb’esinb’il chiruheb’ li apostol. Eb’ li te’ok sa’ li mision naru neke’xye k’a’ru li k’anjel neke’raj, a’ut aajel ru naq te’wanq xch’ool chixk’ulb’al yalaq paay chi k’anjel li nak’eeman reheb’.
24.2.4
Eb’ li misioneer aj k’anjenel li ninqeb’ xchihab’
Rochb’een lix b’oqb’aleb’ sa’ li teep malaj li oqech wankeb’ wi’, eb’ li komon neke’ru chi k’anjelak chiru li Qaawa’ jo’ misioneer aj k’anjenel li ninqeb’ xchihab’. Eb’ li misioneer neke’xb’aanu li chaab’il k’anjel sa’eb’ li k’anjeleb’aal ut lix kab’lal li Iglees, ut sa’eb’ li mision (chi’ilmanq 24.7.1). Neke’wan sa’ rochocheb’.
Eb’ li misioneer aj k’anjenel li ninqeb’ xchihab’ neke’b’oqe’ xb’aan li awa’b’ej re oqech. Neke’k’anjelak chi b’eresinb’il xb’aan a’an. Na’eetaliman jarub’ oor neke’k’anjelak chiru li junjunq xamaan a’ yaal jo’ li naru chiruheb’, a’ yaal k’a’ru li k’anjel wan sa’ li na’ajej wankeb’ wi’, ut a’ yaal li na’leb’ k’eeb’il xb’aan li Awa’b’ejil re Area.
24.2.5
Xtusulaleb’ lix taqlankileb’ li misioneer
Sa’ li tusleb’aal a’in ch’olob’anb’il li jar paay xtaqlankileb’ li misioneer.
|
Saaj misioneer aj k’utunel |
Saaj misioneer aj k’anjenel |
Misioneer ninq xchihab’ |
Misioneer aj k’anjenel li ninq xchihab’ | |
|---|---|---|---|---|
|
B’oqb’il xb’aan | Saaj misioneer aj k’utunel Awa’b’ej re li Iglees | Saaj misioneer aj k’anjenel Awa’b’ej re li Iglees | Misioneer ninq xchihab’ Awa’b’ej re li Iglees | Misioneer aj k’anjenel li ninq xchihab’ Awa’b’ej re oqech |
|
K’eeb’il xtaqlankil xb’aan | Saaj misioneer aj k’utunel Jun apostol | Saaj misioneer aj k’anjenel Jun apostol | Misioneer ninq xchihab’ Jun apostol | Misioneer aj k’anjenel li ninq xchihab’ Awa’b’ej re oqech |
|
Xaqab’anb’il sa’ xk’anjel xb’aan | Saaj misioneer aj k’utunel Awa’b’ej re oqech | Saaj misioneer aj k’anjenel Awa’b’ej re oqech | Misioneer ninq xchihab’ Awa’b’ej re oqech | Misioneer aj k’anjenel li ninq xchihab’ Awa’b’ej re oqech malaj jun laj tenq’ aj k’ehol na’leb’ |
|
B’ar nawan | Saaj misioneer aj k’utunel Najt rik’in rochoch | Saaj misioneer aj k’anjenel Sa’ rochoch | Misioneer ninq xchihab’ Najt rik’in rochoch, malaj sa’ rochoch | Misioneer aj k’anjenel li ninq xchihab’ Sa’ rochoch |
|
Ani nab’eresink re | Saaj misioneer aj k’utunel Awa’b’ej re mision malaj awa’b’ej re jun na’ajej sa’ resilal li Iglees | Saaj misioneer aj k’anjenel Awa’b’ej re oqech | Misioneer ninq xchihab’ Awa’b’ej re mision, re santil ochoch, malaj re jun na’ajej sa’ resilal li Iglees; malaj Awa’b’ej re Area | Misioneer aj k’anjenel li ninq xchihab’ Awa’b’ej re oqech |
|
Ani aj-e naxq’axtesi resil lix k’anjel | Saaj misioneer aj k’utunel Awa’b’ej re mision malaj awa’b’ej re jun na’ajej sa’ resilal li Iglees | Saaj misioneer aj k’anjenel Aj jolominel re mision re k’anjelak | Misioneer ninq xchihab’ Awa’b’ej re mision, re santil ochoch, malaj re jun na’ajej sa’ resilal li Iglees; Awa’b’ej re Area, aj jolominel re jun centro de visitantes, malaj jun aj jolominel re jun k’anjeleb’aal malaj jun kab’l re li Iglees | Misioneer aj k’anjenel li ninq xchihab’ Aj jolominel re li k’anjel k’eeb’il re |
|
Jarub’ chihab’ wan re | Saaj misioneer aj k’utunel 18–25 (winq) | Saaj misioneer aj k’anjenel 18–25 (winq) | Misioneer ninq xchihab’ Numenaq 40 chihab’ wi sumsu, malaj wi ixq moko sumsu ta | Misioneer aj k’anjenel li ninq xchihab’ Numenaq 26 chihab’ |
24.3
Li kawresink-ib’ ut li k’ulub’aak chi k’anjelak sa’ jun mision
Eb’ li te’ruuq chi wank choq’ misioneer neke’waklesiik xch’ool re te’ok sa’ jun li mision xb’aan lix rahomeb’ choq’ re li Qaawa’ ut choq’ reheb’ li ralal xk’ajol. Aajel ru naq te’xnaw k’a’ruheb’ li patz’om sa’ li tz’ilok-ix reheb’ li misioneer.
24.3.1
Xjalajik xch’ooleb’ rik’in li Jesukristo
Eb’ li te’ok sa’ li mision neke’xyal xq’e chikawob’resinkil lix jalajik xch’ooleb’ rik’in li Jesukristo ut lix evangelio li k’ojob’anb’il wi’chik.
24.3.2
Li wank chi k’ulub’ej
Eb’ li te’ok sa’ li mision neke’xyal xq’e re naq k’ulub’ejaqeb’ chi ochb’eeniik xb’aan li Musiq’ej. Aajel ru a’in re xb’aanunkil chi us lix k’anjeleb’ li misioneer (chi’ilmanq Tzol’leb’ ut Sumwank 42:13–14).
24.3.2.1
Li jalb’a-k’a’uxlej
Re jalok k’a’uxlej, na’ajman ru xk’anjelankil li paab’aal chirix li Jesukristo, wank chi tiik li rajom ch’oolej, ut xpaab’ankileb’ li taqlahom. Na’ajman ru xjultikankil resil ut xkanab’ankil li maak. Choq’ re li ninqi maak, na’ajman ru xjultikankil resil li maak chiru li obiisp malaj li awa’b’ej re oqech.
Li ani naxjal xk’a’uxl nakuye’ xmaak ut nach’ajob’resiik xb’aan lix tojb’al rix li maak ut li rusilal li Jesukristo. Li Qaawa’ ink’a’ chik naxjultika li maak. (Chi’ilmanq Isaias 43:25; Jakob 6:5; Alma 34:15–17; Helaman 5:10–11; Tzol’leb’ ut Sumwank 58:42–43. Chi’ilmanq ajwi’ 32.1 sa’ li hu a’in.)
Li ani taaraj ok sa’ li mision tento naq akaq xjal xk’a’uxl chirixeb’ li ninqi maak rub’elaj naq li awa’b’ej re oqech tixtaqla li tz’aam choq’ re lix mision (chi’ilmanq 32.6; chi’ilmanq ajwi’ 24.4.4). Re xnumsinkil li jalb’a-k’a’uxlej, aajel ru naq taanume’q tz’aqal li kutan re naq tixk’ut li kristiaan rik’in li tiikil wank naq a’an xk’ul lix musiq’ li Kristo re risinkil lix maak.
24.3.3
Xkawilal li tz’ejwalej, li k’a’uxlej, ut li ch’oolej
Ch’a’aj li k’anjelak sa’ li mision. Eb’ li saaj misioneer aj k’utunel aajel ru naq k’eek’ooqeb’ xch’ool ut naq tz’aqal xkawilaleb’ lix tib’el, lix k’a’uxl, ut lix ch’ool re te’k’anjelaq k’iila hoonal, jo’ li teneb’anb’il sa’ xb’eeneb’ li misioneer.
24.3.4
Li tumin
24.3.4.1
Li tumin choq’ reheb’ li saaj misioneer li te’k’anjelaq chi najt rik’in rochocheb’
Eb’ li saaj misioneer li xe’xkawresi rib’ a’ yaal li xru chiruheb’ ink’a’ us naq taab’aymanq rokikeb’ sa’ li mision xb’aan xmaak’a’il li tumin. Eb’ li moko tz’aqal ta xtumineb’ re xtojb’al li jo’ nimal ajb’il ru naru neke’xk’ul rik’ineb’ lix junkab’al ut rik’ineb’ li ramiiw.
Wi toj na’ajman ru li tumin, li obiisp malaj li awa’b’ej re oqech naru naxpatz’ reheb’ li komon sa’ li teep malaj li oqech naq te’xkub’si li tumin choq’ re li fondo misional re teep.
Lix tuminal li teep ut xtuminal li mayej re li kuyuk sa’ ink’a’ naru neke’oksiman.
Li tumin natojman rajlal po. Eb’ li saaj misioneer aj k’utunel ut eb’ lix junkab’al neke’tojok tumin rajlal po re xtojb’al xtz’aq li k’anjelak sa’ li mision.
Nak’eeman li tumin sa’ li fondo misional re teep. Eb’ li obiisp neke’xk’e reetal naq taatojmanq li tumin rajlal po. Ink’a’ us xtojb’al chi junajwa, ka’ajwi’ li patz’b’il sa’ li junjunq chi po. Li tumin li tojb’il chi junxilaj ink’a’ naru taaq’ajsimanq wi li misioneer nasutq’i chi maji’ nanume’ xkutankil lix mision.
Li tumin na’ajman ru naq wan sa’ li mision. Rajlal po, eb’ li saaj misioneer neke’xk’ul li tumin rik’in li mision re xtojb’al li tzakemq, li pasaaj, ut xkomon chik xtz’aq li mision. Li tumin a’in loq’. Eb’ li misioneer neke’roksi ka’ajwi’ re xb’aanunkil lix k’anjel sa’ li mision. Ink’a’ naru na’oksiman re xloq’b’al k’a’aq re ru, re xk’uulankil, malaj re xtaqlankil rik’in lix junkab’al li misioneer malaj re anihaq chik. Eb’ li misioneer neke’xsutq’isi xtuminal li mision li ink’a’ xe’roksi.
Eb’ li misioneer neke’roksi tz’aqal lix tumin re xloq’b’al k’a’aq chik ru na’ajman ru. Aajel ru naq yal ka’ch’inaq li tumin taasachmanq. (Chi’ilmanq Normas misionales para los discípulos de Jesucristo, 4.8.)
24.3.4.2
Li tumin choq’ reheb’ li misioneer ak ninqeb’ xchihab’ li yookeb’ chi k’anjelak chi najt rik’in rochocheb’
Li tumin natojman rajlal po. Eb’ li misioneer ak ninqeb’ xchihab’ li yookeb’ chi k’anjelak chi najt rik’in rochocheb’ neke’xtoj li tumin rajlal po sa’ li fondo misional re teep wan wi’ rochocheb’. Li tumin a’in na’oksiman re xtojb’al xtz’aq li muheb’aal ut li b’eleb’aal.
Eb’ li obiisp neke’xk’e reetal naq taatojmanq li tumin rajlal po. Ink’a’ us xtojb’al chi junajwa, ka’ajwi’ li patz’b’il sa’ li junjunq chi po.
Xkomon chik li tumin taasachmanq. Rochb’een li tumin re rajlal po, li natojok re xtz’aq li muheb’aal ut li b’eleb’aal, eb’ li misioneer ninqeb’ xchihab’ tento te’xtoj chixjunil chik li taasachmanq, jo’ li tzakemq.
24.3.4.3
Li tumin choq’ reheb’ li misioneer li yookeb’ chi k’anjelak sa’ rochoch
Eb’ li misioneer li yookeb’ chi k’anjelak sa’ rochoch neke’xtoj xtz’aq chixjunil li nasachman.
24.3.4.4
Li aseguranza medica, ut xtojb’al li b’an
Wi eb’ li misioneer ak wan x’aseguranza medica, tz’aamanb’il naq toj taakanaaq rik’ineb’, jo’kan ajwi’ choq’ reheb’ li saaj misioneer aj k’utunel.
Eb’ li misioneer li yookeb’ chi k’anjelak sa’ rochoch tento te’xtoj xtz’aq li b’an ut li aseguranza medica. Eb’ li misioneer ninqeb’ xchihab’ li yookeb’ chi k’anjelak chi najt rik’in li rochocheb’ tento ajwi’ sa’ xb’eeneb’ xtojb’al xtz’aq a’in. Eb’ li misioneer ninqeb’ xchihab’ li yookeb’ chi k’anjelak sa’ jalan chik tenamit chiru li wan wi’ rochoch naru neke’xloq’ li aseguranza rik’in li Senior Service Medical Plan [Plan médico para el servicio de personas mayores].
24.3.5
Lix k’anjeleb’ li komon sa’ li junkab’al ut eb’ laj jolominel re xkawresinkileb’ li misioneer
Eb’ li komon sa’ li junkab’al, eb’ li obiisp, ut eb’ laj jolominel neke’xtenq’aheb’ li saaj chixkawresinkil rib’ re te’k’anjelaq sa’ li mision.
Eb’ li komon sa’ li junkab’al ut eb’ laj jolominel neke’xwaklesi xch’ooleb’ chixjunileb’ li te’ok sa’ li mision re te’xtzol:
-
Lix Hu laj Mormon ut xkomoneb’ chik li loq’laj hu.
-
Predicad mi Evangelio.
-
Medidas de protección en el uso de tecnología.
Eb’ li komon sa’ li junkab’al ut eb’ laj jolominel neke’xtenq’aheb’ chixjunileb’ li te’ok sa’ li mision re te’xk’e xch’ool chixpaab’ankileb’ lix chaq’rab’il li mision. Neke’xwaklesi xch’ooleb’ re te’xtzol li ch’ina hu li na’oksiman sa’ li mision te’ok wi’:
-
Choq’ reheb’ li saaj misioneer aj k’utunel: Normas misionales para los discípulos de Jesucristo
24.4
Xtaqlankil li tz’aam re ok sa’ li mision
24.4.1
Xkeeb’al reetal lix kawilal li roq ruq’
Chixjunileb’ li ani te’ok sa’ li mision tento naq jun aj b’anonel tixk’e reetal ma tz’aqal xkawilaleb’.
24.4.2
Li tz’ilok-ix, ut xhuhil li tz’aam re ok sa’ li mision
Li obiisp ut li awa’b’ej re oqech neke’xb’aanu li tz’ilok-ix li b’ayb’il, choq’ re li junjunq chi komon li taaraj ok sa’ li mision, li natz’ilman wi’ rix li musiq’ejil wank, ut li nawaklesin ch’oolej. Neke’roksiheb’ li patz’om sa’ li tz’ilok-ix reheb’ li misioneer.
Li obiisp ut li awa’b’ej re oqech neke’ril ajwi’ li na’leb’ chirix li k’ulub’ejil ut li kawilal li oq uq’ej sa’ li Sistema en Línea de Recomendación para Misioneros. Li obiisp ut li awa’b’ej re oqech ink’a’ neke’xtiq ru li k’a’ru teneb’anb’il re k’anjelak. Chi moko neke’xjal li patz’om sa’ li tz’ilok-ix.
Wi li obiisp ut li awa’b’ej re oqech wankeb’ xk’a’uxl chirix ma k’ulub’ej li komon malaj ma tz’aqal xkawilal li roq ruq’, neke’xk’uub’ xna’leb’ sa’ wiib’al, ut rik’in li ani taaraj ok sa’ li mision. Wi li komon naxk’e xliceens, naru ajwi’ neke’aatinak rik’in xna’ xyuwa’. Li obiisp ut li awa’b’ej re oqech ink’a’ neke’xtaqla li tz’aam toj reetal naq li kristiaan ak xjal xk’a’uxl chirixeb’ li ninqi maak (chi’ilmanq 24.3.2.1). Wi wan xmajelal lix kawilal lix tz’ejwal, lix k’a’uxl, malaj lix ch’ool, naru neke’aatinak chirix ma us naq taab’oqe’q jo’ misioneer aj k’anjenel.
Wi wan x’aajelil ru ut maa’ani li obiisp malaj li awa’b’ej re oqech, a’an naru naxk’e xliceens jun reheb’ laj tenq’ aj k’ehol na’leb’ re tixb’aanu li tz’ilok-ix a’in.
Sa’eb’ li distrito, li awa’b’ej re mision malaj jun laj tenq’ aj k’ehol na’leb’ naxb’aanu li tz’ilok-ix ut naxtaqla li tz’aam choq’ re li ani taa’ok sa’ li mision. Eb’ li awa’b’ej re distrito ink’a’ neke’xb’aanu li tz’ilok-ix a’in.
24.4.4
Eb’ li ink’a’ naru neke’xik chi k’anjelak choq’ misioneer
Wan naq jun komon li naraj k’anjelak ink’a’ nab’oqe’ jo’ misioneer. Naru nak’ulman a’in xmaak xmajelal li roq ruq’, xb’aan naq ink’a’ k’ulub’ej, xb’aan li ch’a’ajkilal chiru chaq’rab’, malaj jalan chik k’a’aq re ru. Li awa’b’ej re oqech naru naxye naq ach’ab’anb’il chiru li k’anjelak jo’ misioneer.
24.5
Chirix li b’oqe’k sa’ li mision
Nawaklesiman xch’ooleb’ li ani ak xe’b’oqe’ re ok sa’ li mision naq te’ril ru chixjunil lix Hu laj Mormon, malaj wi ak xe’xb’aanu, naq te’xb’aanu wi’chik rub’elaj naq te’xtikib’ lix mision. Neke’xtaaqe li na’leb’ k’eeb’il xb’aan li rey aj Benjamin, naq “te’ril rib’eb’, ut lix k’a’uxleb’, ut li raatineb’, ut lix b’aanuhomeb’” (Mosiah 4:30).
24.5.1
Li loq’laj tiqib’aak sa’ li santil ochoch, ut li k’anjelak sa’ li santil ochoch
Wi eb’ li toja’ xe’b’oqe’ sa’ li mision maji’ neke’xk’ul li loq’laj tiqib’aak sa’ li santil ochoch, tento te’xb’aanu naq toj maji’ natikla lix k’anjel jo’ misioneer wi naru chiruheb’ (chi’ilmanq Tzol’leb’ ut Sumwank 43:15–16; 105:33). A’in tento ajwi’ choq’ reheb’ li misioneer aj k’anjenel wi tz’aqaleb’ xna’leb’.
Eb’ li toja’ xe’b’oqe’ sa’ li mision ut ak xe’xk’ul li loq’laj tiqib’aak naru neke’k’anjelak jo’ aj k’anjenel sa’ li santil ochoch naq maji’ neke’xtikib’ lix k’anjel sa’ li mision, wi nak’oxlaman naq us a’an (chi’ilmanq 25.5).
24.5.2
Li ch’utam re li loq’laj wa’ak
Li obiispil neke’xpatz’ reheb’ li toja’ xe’b’oqe’ sa’ li mision naq te’aatinaq sa’ li ch’utam re li loq’laj wa’ak rub’elaj naq te’ok sa’ li mision. Nab’aanuman li ch’utam re li loq’laj wa’ak jo’ junelik nab’aanuman. Tento naq jayalinb’ilaq rik’in li loq’laj wa’ak ut rik’in li Kolonel.
24.5.3
Xxaqab’ankileb’ li misioneer sa’ xk’anjel
Li awa’b’ej re oqech sa’ li oqech wan wi’ rochoch li misioneer naxxaqab’ li junjunq chi misioneer sa’ xk’anjel ka’ch’in rub’elaj li kutan taatiklaaq wi’ lix mision. Naq aajel ru ut maa’ani wan li awa’b’ej re oqech, naru naxk’e xtaqlankil jun reheb’ laj tenq’ aj k’ehol na’leb’ re tixxaqab’ li misioneer sa’ xk’anjel.
Li awa’b’ej re mision malaj jun reheb’ laj tenq’ aj k’ehol na’leb’ naxxaqab’eb’ sa’ xk’anjel eb’ li misioneer li b’oqb’ileb’ sa’eb’ li distrito sa’ lix mision. Li awa’b’ej re distrito ink’a’ naxxaqab’eb’ li misioneer sa’ xk’anjeleb’.
Jun winq li taak’anjelaq chi najt rik’in li rochoch tento naq akaq xk’ul li Tijonelil re Melkisedek rub’elaj naq taaxaqab’amanq sa’ xk’anjel jo’ misioneer. Jun winq li taak’anjelaq jo’ misioneer aj k’anjenel tento tixk’ul li Tijonelil re Melkisedek wi k’oxlanb’il naq tz’aqal xna’leb’ re xk’ulb’al.
24.6
Li k’anjelak chi najt rik’in li ochoch
24.6.2
B’ar te’k’anjelaq li misioneer
24.6.2.5
Li tz’aam re tenq’ank rik’in tumin, li tzolok, malaj li q’axonk sa’ jalan chik tenamit
Eb’ li misioneer ut eb’ lix junkab’al tento naq ink’a’ te’xk’e li tumin choq’ reheb’ li komon sa’ li tenamit yookebʼ wi’ chi k’anjelak li misioneer, jo’ li tumin choq’ re li tzolok. Ink’a’ ajwi’ naru naq eb’ li misioneer malaj lix junkab’al te’xtenq’aheb’ li kristiaan li te’raj q’axonq sa’ jalan chik tenamit (chi’ilmanq 38.8.19).
24.6.2.8
Xhuhil li komonil ut li lajetqil
Lix huhil li komonil choq’ re li misioneer nakana sa’ li teep wan wi’ li rochoch. Sa’ li teep li wan wi’ rochoch natz’iib’aman resil lix lajetqil li misioneer. Eb’ li misioneer ink’a’ neke’xtoj xlajetqil li tumin neke’xk’ul re wank sa’ li mision. A’ut wi wan chik li tumin neke’xk’ul, neke’xtoj xlajetqil a’an.
24.6.3
Li sutq’iik sa’ kab’l chirix li mision
24.6.3.1
Eb’ li neke’sutq’i sa’ li kutan xaqab’anb’il
Eb’ li misioneer ut eb’ lix junkab’al tento naq ink’a’ te’xpatz’ naq taak’osmanq ru malaj taatiqmanq ru lix mision xb’aan naq chaab’il choq’ reheb’.
Eb’ li saaj misioneer tento te’xik chi tiik sa’ rochocheb’ naq neke’el chaq sa’ li mision. Ka’ajwi’ naru naxik sa’ jalan chik na’ajej wi ochb’eeninb’il xb’aan xna’, xyuwa’, malaj li ani nak’iiresink re.
Eb’ li misioneer ink’a’ neke’raqe’ xk’anjel toj te’xq’axtesi resil lix mision re li awa’b’ej re oqech. Tento te’xpaab’ xchaq’rab’il li mision toj sa’ li hoonal a’an.
24.6.3.2
Li sutq’iik sa’ kab’l naq maji’ naraqe’ li mision
Wan naq eb’ li misioneer neke’ach’ab’aak naq maji’ naraqe’ lix mision, xb’aan xmajelal li roq’ ruq’, xb’aan naq moko k’ulub’ejeb’ ta, malaj xb’aan jalan chik na’leb’. Eb’ li obiisp ut li awa’b’ej re oqech neke’xyal xq’e chixtenq’ankileb’ li misioneer a’in. Eb’ laj jolominel neke’xtenq’aheb’ re te’xtaw wi’chik xkawilaleb’ li roq ruq’, ut naq te’sutq’iiq sa’ li mision wi naru.
24.7
Li mision re k’anjelak
24.7.1
Xk’eeb’al reetal b’ar naru nak’anjelak jun misioneer aj k’anjenel
Li obiisp, li awa’b’ej re oqech, ut li misioneer aj k’anjenel neke’xk’uub’ xna’leb’ sa’ komonil re xtawb’al b’ar naru nak’anjelak li misioneer sa’ li tenamit wan wi’. Choq’ reheb’ li saaj misioneer aj k’anjenel, jun aj jolominel re li mision re k’anjelak ut eb’ lix na’ xyuwa’ li misioneer neke’tz’aqon sa’ li aatinak a’in.
24.8
Chirix li k’anjelak sa’ li mision
24.8.2
Li tz’ilok-ix re xraqbʼal xkʼanjel jun li misioneer
Li awa’b’ej re oqech naxraq xk’anjel li misioneer ut naxb’aanu jun tz’ilok-ix re raqok k’anjel. Sa’eb’ li distrito, a’an li awa’b’ej re mision malaj jun laj tenq’ aj k’ehol na’leb’ li k’eeb’il xtaqlankil li naraqok xk’anjeleb’ li misioneer.
A’an a’in li na’leb’ li naru natenq’an choq’ re li tz’ilok-ix a’in.
-
Waklesi xch’ooleb’ re te’kanaaq choq’ xtzolom li Jesukristo chiru chixjunil lix yu’am.
-
K’eheb’ xna’leb’ re naq te’xik chi uub’ej rik’in li chaab’il b’aanuhom li xe’k’ay wi’ jo’ misioneer.
-
Waklesi xch’ooleb’ re te’xk’oxla ut te’xkawresi rib’eb’ choq’ re li k’a’ru chalel, jo’ li tzolok ut li trab’aaj choq’ reheb’ li saaj misioneer.
-
Waklesi xch’ooleb’ re naq junelik te’wanq chi k’ulub’ej re xk’ulb’al li recomendacion re li santil ochoch.
24.8.4
Li b’oqok sa’ li k’anjel
Eb’ laj jolominel sa’ junpaat neke’xk’e xb’oqb’aleb’ ut xk’anjeleb’ li misioneer li toja’ xe’raqe’ xk’anjel. Naru ajwi’ neke’k’anjelak jo’ aj k’anjenel sa’ li santil ochoch, wi us a’an (chi’ilmanq 25.5).
24.9
Eb’ li k’anjeleb’aal chirix xk’eeb’al li tz’aam choq’ reheb’ li te’ok sa’ li mision, ut choq’ re li k’anjel
24.9.2
Eb’ li perel sa’ internet
-
MissionaryRecommendations.ChurchofJesusChrist.org (a’in ka’ajwi’ choq’ reheb’ laj jolominel sa’ li junjunq chi na’ajej, ut choq’ reheb’ li ani te’ok sa’ li mision)