25.

Li k’anjel re li santil ochoch ut resilal li junkab’al sa’ li teep ut li oqech

25.0

Xtikibʼankil

Rik’in li k’anjel re li santil ochoch ut resilal li junkab’al neke’k’ame’ sa’ junajil li junkab’al ut neke’tz’ape’ sa’ junajil sa’ li junelik q’e kutan (chi’ilmanq Mateo 16:19). A’aneb’ a’in xcha’al li k’anjel a’in:

• Ok sa’ sumwank rik’in xk’ulb’aleb’ li k’ojob’anb’il k’anjel sa’ li santil ochoch choq’ qe laa’o (chi’ilmanq Isaias 55:3; Tzol’leb’ ut Sumwank 84:19–23).

• Xtawb’aleb’ resil li qaxe’ qatoon kamenaqeb’, ut xb’aanunkileb’ li k’ojob’anb’il k’anjel choq’ reheb’ sa’ li santil ochoch, re te’ruuq chixk’uub’ankileb’ li sumwank rik’in li Dios (chi’ilmanq Malakias 4:5–6; 1 Korintios 15:29; Tzol’leb’ ut Sumwank 128:15–18).

• Xik sa’ li santil ochoch chi kok’ aj xsa’, wi naru, re xloq’oninkil li Dios ut re xb’aanunkileb’ li k’ojob’anb’il k’anjel choq’ reheb’ li ralal xk’ajol (chi’ilmanq Lukas 24:52–53; Tzol’leb’ ut Sumwank 109:13–14).

Naru natawman chik li na’leb’ sa’ “Templos” ut “Historia Familiar” (Temas del Evangelio, topics.ChurchofJesusChrist.org).

25.1

Lix tz’aqonikeb’ li komon ut eb’ laj jolominel sa’ li k’anjel re li santil ochoch ut li resilal li junkab’al

K’eeb’il reheb’ li komon sa’ li Iglees li usilal ut li teneb’ank re te’tenq’anq chixk’amb’aleb’ lix junkab’al sa’ junajil sa’ li junelik q’e kutan. Neke’xkawresi rib’eb’ chixb’aanunkileb’ li sumwank naq neke’xk’uleb’ li k’ojob’anb’il k’anjel re li santil ochoch ut neke’xyal xq’e chixpaab’ankileb’ li sumwank a’an.

Eb’ li komon sa’ li Iglees neke’waklesiik xch’ool re te’xsik’ xk’ab’a’eb’ li rech alal kamenaqeb’ li maji’ neke’k’uluk re li k’ojob’anb’il k’anjel re li santil ochoch. Chirix a’an, eb’ li komon neke’xb’aanuheb’ li k’ojob’anb’il k’anjel sa’ xk’ab’a’eb’ li rech alal a’an (chi’ilmanq Tzol’leb’ ut Sumwank 128:18). Sa’ li ruchich’och’ reheb’ li musiq’ej, eb’ li ani kamenaqeb’ kanab’anb’ileb’ chixk’ulb’al malaj chixtz’eqtaanankileb’ li k’ojob’anb’il k’anjel li b’aanunb’il choq’ reheb’.

25.1.1

Lix teneb’ankil li junjunq re xik sa’ li santil ochoch

A’ yaal reheb’ li komon jo’q’e ut jo’ k’ihal sut neke’loq’onin sa’ li santil ochoch. Eb’ laj jolominel ink’a’ neke’reetali jo’ k’ihal sut te’xik, chi moko neke’xpatz’ naq te’xq’axtesi resil lix xikikeb’ sa’ li santil ochoch.

25.2

Chan ru naq k’uub’anb’il li k’anjel re li santil ochoch ut resilal li junkab’al sa’ li teep

25.2.1

Li obiispil

Li obiispil nak’anjelak sa’ komonil rik’ineb’ li awa’b’ejil re lix molameb’ li xb’eenil ut li Komonil re Tenq’ank sa’ xb’eresinkil li k’anjel re li santil ochoch ut resilal li junkab’al sa’ li teep. Eb’ laj jolominel a’in neke’xk’uub’ xna’leb’ sa’ komonil chi kok’ aj xsa’.

Jo’kan ajwi’, a’aneb’ a’in xteneb’ankileb’ li obiispil sa’ li k’anjel re li santil ochoch ut li resilal li junkab’al sa’ li teep:

• Neke’xk’e reetal naq nak’utman sa’eb’ li ch’utam re li iglees li tzol’leb’ chirix li k’anjel re li santil ochoch ut resilal li junkab’al, ut li osob’tesink nachal rik’in.

• Neke’xk’e reetal naq li k’anjel re li santil ochoch ut resilal li junkab’al wan chi b’eresinb’il sa’eb’ li ch’utam re li ch’uut re teep ut li ch’uut reheb’ li saaj re teep.

• Neke’ril naq te’wanq li tzoleb’aal re kawresink-ib’ choq’ re li santil ochoch (chi’ilmanq 25.2.8).

• Neke’xk’e li recomendacion re li santil ochoch (chi’ilmanq ch’ol 26).

25.2.2

Eb’ li awa’b’ejil re lix molameb’ li xb’eenil ut li Komonil re Tenq’ank

Eb’ li awa’b’ejil re lix molameb’ li xb’eenil ut li Komonil re Tenq’ank neke’xb’eresi li k’anjel re li santil ochoch ut resilal li junkab’al li na’uxman wulaj wulaj sa’ li teep (chi’ilmanq 8.2.4 ut 9.2.4). Eb’ a’an neke’k’anjelak sa’ komonil re xb’eresinkil li k’anjel a’in, rochb’een li ch’uut re teep, chi b’eresinb’il xb’aan li obiisp.

A’aneb’ a’in xteneb’ankileb’ laj jolominel a’in:

• Neke’xtenq’aheb’ li komon chixkawresinkil rib’ re te’xk’uleb’ li k’ojob’anb’il k’anjel re li santil ochoch ut re te’ok sa’eb’ li sumwank re li santil ochoch.

• Neke’xwaklesi xch’ooleb’ li komon re te’loq’oninq sa’ li santil ochoch a’ yaal chi kok’ aj xsa’ jo’ naru chiruheb’.

• Neke’xwaklesi xch’ooleb’ li komon re te’tzoloq chirixeb’ lix xe’ xtooneb’ ut re te’xb’aanuheb’ li k’ojob’anb’il k’anjel sa’ li santil ochoch choq’ reheb’.

• Neke’xb’eresi lix k’anjel laj jolominel re li santil ochoch ut li resilal li junkab’al re li teep. Wi moko b’oqb’il ta laj jolominel a’in, jun komon sa’ li awa’b’ejil re lix molameb’ li xb’eenil naxb’aanu li k’anjel a’in (chi’ilmanq 25.2.3).

Li awa’b’ej re lix molameb’ li xb’eenil ut li Komonil re Tenq’ank neke’xk’e xtaqlankil jun komon sa’ lix awa’b’ejileb’ re taatenq’anq chixb’eresinkil li k’anjel re li santil ochoch ut resilal li junkab’al sa’ li teep. Eb’ li komon a’in sa’ li wiib’ chi awa’b’ejil neke’k’anjelak sa’ komonil. Neke’wulak sa’eb’ li kok’ ch’utam re li k’anjel re li santil ochoch ut resilal li junkab’al (chi’ilmanq 25.2.7).

25.2.3

Laj jolominel re li santil ochoch ut li resilal li junkab’al re li teep

Li obiispil neke’xk’uub’ xna’leb’ rik’in li awa’b’ej re oqech re xk’oxlankil ma us xb’oqb’al jun aj jolominel re li santil ochoch ut li resilal li junkab’al re li teep. Tento naq li kristiaan a’in a’anaq aj k’amol re li Tijonelil re Melkisedek.

Laj jolominel re li santil ochoch ut li resilal li junkab’al re li teep naxtenq’aheb’ li awa’b’ejil re lix molameb’ li xb’eenil ut li Komonil re Tenq’ank sa’eb’ lix k’anjel chirix li santil ochoch ut resilal li junkab’al. A’aneb’ a’in lix teneb’ankil:

• Naxb’eresiheb’ li kok’ ch’utam re li santil ochoch ut resilal li junkab’al re li teep (chi’ilmanq 25.2.7).

• Naxk’e xna’leb’eb’ laj tenq’anel re li santil ochoch ut resilal li junkab’al re li teep. Naxb’eresi lix k’anjeleb’ sa’ xtenq’ankileb’ li komon rik’in li k’anjel re li santil ochoch ut resilal li junkab’al.

• Nak’anjelak rochb’een laj jolominel re li k’anjel re jultikank re li teep ut eb’ li misioneer re xtenq’ankileb’ li ani yookeb’ chixtzolb’al li evangelio, eb’ li ak’ komon, ut eb’ li yookeb’ chi sutq’iik, re te’tz’aqonq sa’ li k’anjel re li santil ochoch ut resilal li junkab’al.

25.2.4

Eb’ laj tenq’anel re li santil ochoch ut resilal li junkab’al re li teep

Eb’ laj tenq’anel re li santil ochoch ut resilal li junkab’al re li teep neke’k’anjelak chi b’eresinb’il xb’aan laj jolominel re li santil ochoch ut li resilal li junkab’al re li teep, malaj xb’aan li komon sa’ li awa’b’ejil re lix molameb’ li xb’eenil li nab’aanunk re li k’anjel a’an. Li obiispil neke’xb’oqeb’ li komon a’in chi k’anjelak. Eb’ li ninq jo’kebʼ ajwiʼ li saaj naru nekeʼbʼoqeʼ.

A’aneb’ a’in xteneb’ankileb’ laj tenq’anel:

• Neke’xtenq’aheb’ li komon chixk’ulb’al rosob’tesinkileb’ rik’in xtawb’al li na’leb’ chirixeb’ lix xe’ xtooneb’ ut xb’aanunkil li k’ojob’anb’il k’anjel sa’ li santil ochoch choq’ reheb’.

• Neke’xtenq’aheb’ li komon re te’xkawresi rib’ chixk’ulb’aleb’ li k’ojob’anb’il k’anjel re li santil ochoch ut re te’xb’aanuheb’ li sumwank re li santil ochoch.

• Neke’tz’aqon sa’eb’ li kok’ ch’utam re li santil ochoch ut resilal li junkab’al (chi’ilmanq 25.2.7).

25.2.7

Eb’ li kok’ ch’utam re li santil ochoch ut resilal li junkab’al

Neke’b’aanuman chi kok’ aj xsa’ li kok’ ch’utam re xb’aanunkil sa’ komonil li k’anjel re li santil ochoch ut resilal li junkab’al. Wi b’oqb’il jun aj jolominel re li santil ochoch ut li resilal li junkab’al re li teep, a’an naxb’eresiheb’ li ch’utam a’in. Wi ink’a’ b’oqb’il, li komon sa’ li awab’ejil re lix molameb’ li xb’eenil li nab’aanunk re li k’anjel a’in naxb’eresiheb’ li kok’ ch’utam.

A’aneb’ a’in li b’oqb’ileb’ chi tz’aqonk:

• Li komon sa’ li awa’b’ejil re li Komonil re Tenq’ank ut lix molameb’ li xb’eenil li k’eeb’ileb’ xtaqlankil.

• Jun aj tenq’ re lix molameb’ laj tij.

• Jun komon sa’ li awa’b’ejil re li tzoleb’aal reheb’ li saaj ixq li ninqeb’ xchihab’.

• Eb’ laj tenq’anel re li santil ochoch ut resilal li junkab’al.

A’an a’in rajb’aleb’ li kok’ ch’utam a’in:

• Xk’oxlankil chan ru xtenq’ankileb’ li komon sa’ li teep chixb’aanunkil lix k’anjel sa’ li santil ochoch ut resilal lix xe’ xtooneb’, naq tz’aamanb’il.

Naru neke’b’aanuman li kok’ ch’utam a’in chi ch’utch’u malaj sa’ ulul ch’iich’. Naru ajwi’ na’ux li k’anjelak sa’ komonil a’ yaal chan ru, jo’ rik’in li b’oqok sa’ celular, li texto, ut li correo electronico.

25.2.8

Li tzoleb’aal re kawresink-ib’ choq’ re li santil ochoch

Chi b’eresinb’il xb’aan li obiisp, naru nak’uub’aman jun tzoleb’aal re kawresink-ib’ choq’ re li santil ochoch, re xtenq’ankileb’ li komon chixkawresinkil rib’ re te’ok sa’eb’ li sumwank naq te’xk’uleb’ li k’ojob’anb’il k’anjel re li santil ochoch. Ink’a’ neke’b’aanuman li tzoleb’aal a’in sa’eb’ li ch’utam re domingo, ut neke’b’aanuman sa’ jun hoonal li chaab’il choq’ reheb’ li komon. Naru neke’b’aanuman sa’ li ch’utleb’aal kab’l, malaj sa’ jun ochoch.

Natawman li na’leb’ re xk’uub’ankil ut xk’utb’al li tzoleb’aal sa’ li hu Investidos de lo alto: Seminario de preparación para el templo, Manual del maestro. Eb’ li neke’tz’aqon nak’ehe’ reheb’ li ch’ina hu Cómo prepararse para entrar en el santo templo. Re xtawb’al li na’leb’ ut li k’anjeleb’aal, chi’ilmanq temples.ChurchofJesusChrist.org.

25.4

Li k’a’aq re ru nak’anjelak choq’ re resilal li junkab’al

25.4.1

Mi familia: Historias que nos unen

Li hu Mi familia: Historias que nos unen naxtenq’aheb’ li kristiaan chixtawb’aleb’ li rech’alal ut lix xe’ xtooneb’ ut chixtawb’al li resileb’ li tz’iib’anb’il. Li ch’ina hu a’in naru ajwi’ naxtenq’aheb’ li komon chixkawresinkil xk’ab’a’eb’ lix xe’ xtooneb’ choq’ reheb’ li k’ojob’anb’il k’anjel re li santil ochoch.

Naru natawman li ch’ina hu a’in sa’ internet sa’ ChurchofJesusChrist.org. Naru napatz’man li hu chi tz’iib’anb’il sa’ store.ChurchofJesusChrist.org.

25.4.2

FamilySearch.org ut eb’ li aplicacion re FamilySearch

FamilySearch.org a’an lix perel li Iglees sa’ internet choq’ re li k’anjel re li santil ochoch ut resilal li junkab’al. A’in naxtenq’aheb’ li ani neke’oksink re, re te’xb’aanu li k’anjel a’in:

• Te’xk’uub’ reetalil lix xe’toonaleb’ ut b’ar xna’aj li junjunq sa’ li junkab’al.

• Te’xtaweb’ lix xe’ xtooneb’ ut li resilal lix yu’ameb’.

• Te’xwotz ut te’xk’uulaheb’ li esilal, eb’ li jalam-uuch, ut eb’ li tz’iib’anb’il esil.

• Te’xkawresiheb’ xk’ab’a’ lix xe’ xtooneb’ re te’xk’uleb’ li k’ojob’anb’il k’anjel sa’ li santil ochoch.

Eb’ li aplicacion Árbol Familiar de FamilySearch ut Recuerdos de FamilySearch neke’xtenq’aheb’ li kristiaan chi tz’aqonk sa’ li k’anjel re li santil ochoch ut resilal li xe’ toonal rik’ineb’ lix celular.

25.5

Reetalinkileb’ ut xb’oqb’aleb’ laj k’anjenel sa’ li santil ochoch

25.5.1

Reetalinkileb’ laj k’anjenel sa’ li santil ochoch

Naru natawman ani naru chi k’anjelak jo’ aj k’anjenel sa’ li santil ochoch chi jo’ka’in:

• Naru na’eetaliik li komon xb’aan li obiisp malaj jalan chik aj jolominel re li teep

• Wan naq eb’ li komon neke’aatinak rik’in li obiisp chirix k’anjelak aran

• Naru neke’k’ehe’ xk’ab’a’ li komon xb’aan li awa’b’ej re santil ochoch, rixaqil li awa’b’ej re li santil ochoch, malaj jalan chik aj jolominel sa’ li santil ochoch

• Eb’ li komon li yookeb’ chixkawresinkil rib’ chi xik sa’ jun mision malaj toja’ xe’sutq’i chaq sa’ jun mision (chi’ilmanq ch’ol 24)

Naru na’eetaliman ani taaruuq chi k’anjelak jo’ aj k’anjenel sa’ li santil ochoch rik’in li k’anjeleb’aal Recomendar obrero del templo. Eb’ li obiisp, eb’ li awa’b’ej re oqech, ut eb’ li awa’b’ejil re li santil ochoch naru neke’roksi li k’anjeleb’aal a’in.