26.

Eb’ li recomendacion re li santil ochoch

26.0

Xtikibʼankil

Li ok sa’ li santil ochoch a’an jun loq’laj chaab’ilal. Eb’ laj jolominel re teep ut re oqech neke’xwaklesi xch’ooleb’ chixjunileb’ li komon re naq k’ulub’ejaqeb’ chixk’ulb’al li recomendacion re li santil ochoch, us ta maare najt wankeb’ rik’in li santil ochoch.

Eb’ laj jolominel sa’ li Iglees neke’xyal xq’e chirilb’al naq chixjunileb’ li neke’ok sa’ li santil ochoch, k’ulub’ejeb’ chixb’aanunkil (chi’ilmanq Salmos 24:3–5).

Eb’ li komon tento naq te’xk’am jun recomendacion re li santil ochoch li wan xwankil re taaruuq te’ok sa’ li santil ochoch.

Jun obiisp naru napatz’ok rik’in lix awa’b’ejil re oqech wi wan xpatz’om chirixeb’ li recomendacion re li santil ochoch li ink’a’ sumenb’il sa’ li ch’ol a’in. Li awa’b’ej re oqech naru naxb’oq li oficiin re li Xb’eenil Awa’b’ejil wi wan xpatz’om.

26.1

Eb’ li jar paay chi recomendacion re li santil ochoch

Oxib’ paay li recomendacion re li santil ochoch wan:

1. Li recomendacion choq’ reheb’ li komon li maji’ neke’xk’ul lix loq’laj tiqib’ankil. Nak’anjelak li recomendacion a’in choq’ reheb’ li komon li maji’ neke’xk’ul lix loq’laj tiqib’ankil, li te’tz’ape’q sa’ junajil rik’ineb’ lix na’ xyuwa’, malaj li te’xb’aanu li kub’iha’ ut li k’ojob’aak sa’ li Iglees choq’ reheb’ li kamenaq. Nak’eeman rik’in li k’anjeleb’aal Fuentes de recursos para líderes y secretarios (LCR). Re xtawb’al xkomon chik li na’leb’, chi’ilmanq 26.4.

2. Li recomendacion re xk’ulb’al li k’ojob’anb’il k’anjel re li yu’am a’in. Na’oksiman li recomendacion a’in choq’ reheb’ li komon li te’xk’ul tz’aqal lix loq’laj tiqib’ankil, li te’tz’ape’q sa’ junajil rik’in lix sum aatin. Li recomendacion re xk’ulb’al li k’ojob’anb’il k’anjel re li yu’am a’in wan chi laq’lo rik’in jun recomendacion re li santil ochoch li junelik nak’eeman (li yeeb’il resil arin taq’a).

3. Li recomendacion choq’ reheb’ li komon li ak xe’xk’ul lix loq’laj tiqib’ankil. Na’oksiman li recomendacion a’in choq’ reheb’ li komon li ak’ xe’xk’ul lix loq’laj tiqib’ankileb’. Nak’eeman rik’in li k’anjeleb’aal LCR. Rik’in li recomendacion a’in, li komon naru chi tz’aqonk sa’ chixjunileb’ li k’ojob’anb’il k’anjel choq’ reheb’ li kamenaq. Na’oksiman ajwi’ li recomendacion a’in naq jun li komon li ak xk’ul xloq’laj tiqib’ankil natz’ape’ sa’ junajil rik’in lix na’ xyuwa’ malaj li ralal xk’ajol, li yo’yookeb’ malaj li kamenaqeb’. Re xtawb’al xkomon chik li na’leb’, chi’ilmanq 26.3.

26.2

Xkolb’al rix li recomendacion re li santil ochoch

26.2.1

Xkolb’al rix li recomendacion re li santil ochoch xb’aaneb’ laj jolominel re li tijonelil

Eb’ laj jolominel re li tijonelil li k’eeb’ileb’ xwankil chiroksinkil xhuhil li recomendacion re li santil ochoch tento naq te’xk’uula chi us li hu a’an.

Eb’ laj jolominel re li tijonelil neke’xk’e ajwi’ reetal naq maajun li maak’a’ xliceens taaril li na’leb’ chirixeb’ li recomendacion re li santil ochoch sa’ li k’anjeleb’aal LCR.

26.2.3

Naq nasach malaj na’elq’aman li recomendacion

Li obiisp naxye reheb’ li komon naq te’xye resil sa’ junpaat wi nasach malaj na’elq’aman lix recomendacion. A’an malaj jun laj tenq’ aj k’ehol na’leb’, malaj laj tz’iib’ wi k’eeb’il xtaqlankil, sa’ junpaat naroksi LCR re xsachb’al xwankil li recomendacion. Wi maak’a’ li k’anjeleb’aal, li obiisp nab’oqok sa’ li oficiin sa’ li santil ochoch re taasachmanq xwankil li recomendacion.

26.2.4

Eb’ li neke’k’amok re li recomendacion re li santil ochoch ut ink’a’ k’ulub’ejeb’ chixk’amb’al

Wi li obiisp naxk’e reetal naq jun komon li wan rik’in jun recomendacion re li santil ochoch moko k’ulub’ej ta chixk’amb’al (chi’ilmanq 26.3), naxpatz’ naq li komon tixk’e li recomendacion re. Naroksi LCR re xsachb’al xwankil li recomendacion. Wi maak’a’ li k’anjeleb’aal, li obiisp nab’oqok sa’ li oficiin sa’ li santil ochoch re taasachmanq xwankil li recomendacion.

26.3

Li na’leb’ chirix xk’eeb’al li recomendacion re li santil ochoch

Tento naq eb’ laj jolominel re li tijonelil ka’ajwi’ te’xk’e li recomendacion re li santil ochoch wi li komon naxsume chi us eb’ li patz’om re xk’ulb’al li recomendacion re li santil ochoch.

Aajel ru naq eb’ li tz’ilok-ix re li recomendacion re li santil ochoch ink’a’ sa’ junpaat te’b’aanumanq. Tento te’b’aanumanq sa’ junesal. A’ut li ani yoo chixk’ulb’al li tz’ilok-ix naru naxpatz’ re jun chik komon li ak nim re taawanq aran.

Tento naq eb’ laj jolominel re li tijonelil ink’a’ te’xtiq ru li k’a’ru teneb’anb’il jo’ tz’iib’anb’il sa’ xhuhil li recomendacion re li santil ochoch. Tento ajwi’ naq ink’a’ te’xk’os ru li k’a’ru teneb’anb’il.

Sa’eb’ li oqech, jun komon sa’ li awa’b’ejil re li oqech malaj laj tz’iib’ re oqech naxk’e xwankil li recomendacion re li santil ochoch sa’ li k’anjeleb’aal LCR chirix naq k’eeb’il. Sa’eb’ li distrito, jun komon sa’ li awa’b’ejil re li mision malaj jun laj tz’iib’ re li mision naxk’e xwankil li recomendacion. Eb’ li recomendacion choq’ reheb’ li kub’iha’ ut li k’ojob’aak sa’ li Iglees choq’ reheb’ li kamenaq, wankeb’ chi k’eeb’ileb’ xwankil naq nak’uub’aak li hu xb’aan jun komon sa’ li obiispil malaj xb’aan li awa’b’ej re uq’ej.

26.3.1

Li tz’ilok-ix re li recomendacion re li santil ochoch choq’ reheb’ li komon sa’eb’ li teep ut li uq’ej

Sa’ jun teep, li obiisp malaj jun laj tenq’ aj k’ehol na’leb’ li k’eeb’il xtaqlankil naxb’aanu li tz’ilok-ix re li santil ochoch ut naxk’eheb’ li recomendacion reheb’ li komon li k’ulub’ejeb’. Sa’ jun uq’ej, ka’ajwi’ li awa’b’ej re uq’ej naxb’aanu li tz’ilok-ix re li recomendacion re li santil ochoch ut naxk’eheb’ li recomendacion.

Sa’ jun teep, xjunes li obiisp naxb’aanu li tz’ilok-ix choq’ reheb’ li komon a’in:

• Li yookeb’ chixk’ulb’al tz’aqal lix loq’laj tiqib’ankil (chi’ilmanq 27.1 ut 27.2).

• Li yookeb’ chi tz’ape’k sa’ junajil rik’in xsum aatin (chi’ilmanq 27.3).

Naq wan x’aajelil ru ut ink’a’ naru nawan li obiisp, a’an naru naxk’e xtaqlankil jun reheb’ laj tenq’ aj k’ehol na’leb’ re tixb’aanuheb’ li tz’ilok-ix a’in.

Rub’elaj naq tixk’e jun recomendacion re taab’aanumanq jun reheb’ li k’ojob’anb’il k’anjel a’in, li obiisp naril xhuhil li komonil re li komon re xk’eeb’al reetal naq maak’a’ li tz’iib’ahom chirix xramb’al ru lix komonil. Choq’ reheb’ li komon li yookeb’ chixk’ulb’al tz’aqal lix loq’laj tiqib’ankil malaj li te’tz’ape’q sa’ junajil rik’in lix sum aatin, naxk’e reetal naq:

• Tz’iib’anb’il resil sa’ xhuhil li komonil jo’q’e xkub’e xha’ ut xk’ojob’aak li komon sa’ li Iglees.

• Eb’ li komon winq ak xe’xk’ul li Tijonelil re Melkisedek.

Chirix li tz’ilok-ix xb’aan jun komon sa’ li obiispil malaj li awa’b’ej re uq’ej, jun komon sa’ li awa’b’ejil re oqech naxb’aanu li tz’ilok-ix choq’ reheb’ li komon li wankeb’ sa’ jun li oqech. Jun komon sa’ li awa’b’ejil re mision naxb’aanu li xkab’ tz’ilok-ix choq’ reheb’ li komon li wankeb’ rochoch sa’ jun distrito. Li awa’b’ej re distrito ink’a’ naxb’aanuheb’ li tz’ilok-ix re li recomendacion re li santil ochoch, ka’ajwi’ wi k’eeb’il xtaqlankil xb’aan li Xb’eenil Awa’b’ejil.

26.3.2

Li tz’ilok-ix re li recomendacion re li santil ochoch choq’ reheb’ li komon li wankeb’ sa’ najtil na’ajej

Wan naq eb’ li komon wankeb’ rochoch sa’ jun na’ajej b’ar wi’ terto malaj mas ch’a’aj li xik re taawulaq b’ar wi’ wan jun komon sa’ li awa’b’ejil re oqech malaj re mision. Naq nak’ulman a’in, jun awa’b’ej re li santil ochoch naru naxb’aanu li tz’ilok-ix ut naxk’e xjuch’ chiru li recomendacion. Rub’elaj naq naxb’aanu li tz’ilok-ix, na’aatinak rik’in li awa’b’ej re oqech malaj re mision. Tento naq li obiisp, jun laj tenq’ aj k’ehol na’leb’ li k’eeb’il xtaqlankil, malaj li awa’b’ej re uq’ej akaq xb’aanu li tz’ilok-ix rik’in li komon ut xk’e xjuch’ sa’ li recomendacion.

26.4

Xk’eeb’al li recomendacion re li santil ochoch reheb’ li komon maji’ xe’xk’ul lix loq’laj tiqib’ankil

26.4.1

Eb’ li na’leb’ li junelik neke’taaqeman

Naru nak’ehe’ li recomendacion re li santil ochoch reheb’ li komon a’in wi maji’ neke’xk’ul lix loq’laj tiqib’ankileb’:

• Eb’ li komon li numenaq 11 chihab’ xyu’ameb’ li te’kub’siiq xha’ ut te’k’ojob’aaq sa’ li Iglees choq’ reheb’ li kamenaq. (Eb’ li saaj ixq ut eb’ li saaj winq li k’ojob’anb’ileb’ sa’ li tijonelil naru neke’xk’ul lix recomendacion re li santil ochoch chirix xtiklajik li enero sa’ li chihab’ te’xket wi’ 12 chihab’.)

• Eb’ li komon moko sumsuukeb’ ta li 8 toj 20 chihab’ xyu’ameb’, li te’tz’ape’q sa’ junajil rik’ineb’ lix na’ xyuwa’. Ink’a’ na’ajman ru li recomendacion choq’ reheb’ li kok’al li maji’ neke’xket 8 chihab’ re te’tz’ape’q sa’ junajil rik’ineb’ lix na’ xyuwa’ (chi’ilmanq 26.4.4).

• Eb’ li komon li 8 toj 20 chihab’ xyu’ameb’, li te’iloq re naq te’tz’ape’q sa’ junajil li ras malaj riitz’ineb’ rik’in lix na’ xyuwa’, ka’ajwi’ wi yo’yookeb’ li ras ut riitz’ineb’.

Eb’ li komon li ak xe’xk’ul lix loq’laj tiqib’ankil ink’a’ nak’ehe’ reheb’ li recomendacion li ch’olob’anb’ileb’ sa’ li tasal a’in.

Jun komon winq li tz’aqal xchihab’ re tixk’ul li tijonelil tento naq taak’ojob’aaq sa’ jun opiis re li tijonelil rub’elaj naq tixk’ul lix recomendacion re li santil ochoch.

26.4.2

Li recomendacion re li santil ochoch choq’ reheb’ li komon li toja’ xe’kub’e xha’

Li obiisp naxb’aanu li tz’ilok-ix rik’ineb’ li ak’ komon li tz’aqaleb’ xchihab’ re xk’ulb’al jun recomendacion re li santil ochoch, re te’xb’aanu li kub’iha’ ut li k’ojob’aak sa’ li Iglees choq’ reheb’ li kamenaq. Naxb’aanu li tz’ilok-ix ka’ch’in chirix naq xe’k’ojob’aak choq’ komon sa’ li Iglees, ut us naq sa’ li xamaan ajwi’ a’an (chi’ilmanq 26.4.1). Choq’ reheb’ li komon winq, naru nab’aanuman li tz’ilok-ix a’in naq nab’aanuman li tz’ilok-ix re xk’ulb’al li Tijonelil re Aaron.

26.4.3

Li recomendacion re li santil ochoch choq’ reheb’ li kub’iha’ ut li k’ojob’aak sa’ li Iglees choq’ reheb’ li kamenaq

Eb’ li recomendacion re li santil ochoch, li neke’k’ehe’ re xb’aanunkileb’ li kub’iha’ ut li k’ojob’aak sa’ li Iglees choq’ reheb’ li kamenaq, ka’ajwi’ naru neke’oksiman choq’ re a’an.

26.4.4

Li recomendacion re li santil ochoch re xtz’apb’al sa’ junajil li alal k’ajolb’ej li yo’yookeb’ rik’ineb’ lix na’ xyuwa’

Eb’ li komon li numenaq 21 chihab’ xyu’ameb’ ka’ajwi’ naru neke’tz’ape’ sa’ junajil rik’in lix na’ xyuwa’ malaj te’ril li tz’ape’k sa’ junajil wi (1) ak xe’xk’ul lix loq’laj tiqib’ankil ut (2) wan rik’ineb’ li recomendacion re li santil ochoch.

26.5

Xk’eeb’al li recomendacion re li santil ochoch sa’ jalan jalanq hoonal

26.5.1

Eb’ li komon li te’xk’ul tz’aqal lix loq’laj tiqib’ankil

Eb’ li komon li k’ulub’ejeb’ ut li neke’raj xk’ulb’al tz’aqal lix loq’laj tiqib’ankil naru te’xb’aanu chirix naq yaal a’in:

• Ak xe’xket 18 chihab’.

• Ak xe’xchoy malaj ink’a’ chik yookeb’ chi tz’aqonk sa’ jun eskweel secundaria.

• Ak xnume’ jun chihab’ tz’aqal chirix naq xe’k’ojob’aak choq’ komon sa’ li Iglees.

• Neke’raj xk’ulb’al ut roxloq’inkileb’ li sumwank re li santil ochoch chiru chixjunil lix yu’ameb’.

Jo’kan ajwi’, jun winq tento naq naxk’am li Tijonelil re Melkisedek rub’elaj naq naxk’ul lix loq’laj tiqib’ankil. Re xtawb’al li na’leb’ chirixeb’ li komon li yookeb’ chixkawresinkil rib’ re xk’ulb’al tz’aqal lix loq’laj tiqib’ankil, chi’ilmanq 25.2.8. Re xtawb’al li na’leb’ chirix ani naru chixk’ulb’al lix loq’laj tiqib’ankil, chi’ilmanq 27.2.1.

26.5.3

Eb’ li saaj misioneer li yookeb’ chi sutq’iik chaq sa’ jun mision chi najt rik’in li rochoch

Li awa’b’ej re mision naxk’e reetalil li kutan ut naxk’e xwankil li recomendacion re taachoymanq xwankil oxib’ po chirix naq nasutq’i li misioneer sa’ kab’l.

Li obiisp naxb’aanu li tz’ilok-ix rik’ineb’ li misioneer li ak xe’sutq’i re xk’eeb’al li ak’ recomendacion re li santil ochoch naq maji’ naraqe’ li oxib’ po.

26.5.4

Eb’ li komon li maji’ wanjenaqeb’ sa’ li teep chiru jun chihab’ tz’aqal

Li obiisp malaj jun laj tenq’ aj k’ehol na’leb’ li k’eeb’il xtaqlankil naxb’oq li obiisp sa’ li teep xwan wi’ chaq junxil, rub’elaj naq naxb’aanu li tz’ilok-ix re li recomendacion re li santil ochoch.

26.5.7

Eb’ li komon winq li neke’xk’oxla naq ixqeb’, ut li komon ixq li neke’xk’oxla naq winqeb’

Li awa’b’ej re oqech naru naxpatz’ xna’leb’ rik’in li Awa’b’ejil re Area wi na’ajman ru xtenq’ankil jun komon li wan chi jo’kan, chi b’aanunb’il rik’in rahok jo’ tixb’aanu raj li Kristo (chi’ilmanq 38.6.23).

26.5.8

Eb’ li komon li xe’xb’aanu jun nimla maak

Jun komon li xb’aanunk re jun nimla maak ink’a’ naru naxk’ul li recomendacion re li santil ochoch toj tixjal xk’a’uxl (chi’ilmanq 32.6).

26.5.9

Eb’ li komon li xe’kanab’aak chi ok wi’chik sa’ li Iglees chirix naq x’isiman malaj xkanab’aman lix komonil sa’ li Iglees

26.5.9.1

Eb’ li komon li ink’a’ xe’xk’ul lix loq’laj tiqib’ankileb’

Eb’ li komon a’in ink’a’ naru nak’ehe’ reheb’ li recomendacion re xk’ulb’al tz’aqal lix loq’laj tiqib’ankil toj taanume’q jun chihab’ tz’aqal chirix li kutan naq xe’oksiik wi’chik sa’ li Iglees rik’in li kub’iha’ ut li k’ojob’aak choq’ komon.

26.5.9.2

Eb’ li komon li ak xe’xk’ul lix loq’laj tiqib’ankil junxil

Eb’ li komon li xe’xk’ul junxil lix loq’laj tiqib’ankil ink’a’ naru neke’xk’ul li recomendacion re li santil ochoch toj te’k’ojob’aaq wi’chik li rosob’tesinkileb’ re li santil ochoch rik’in li k’ojob’anb’il k’anjel re xk’ojob’ankileb’ wi’chik li osob’tesink.