27.

Milulu ya Ntempelo bua Bantu Badi ne Moyo

27.0

Tshibangilu

Ntempelo udi nzubu wa Mukalenga. Udi utuludika kudi Mukalenga, Yezu Kilisto. Mu ntempelo, tudi tubuela mu milulu ya tshijila ne tudi tuenza bipungidi ne Tatu wa mu Diulu bidi bitulamakaja nenda ne Mukalenga wetu. Bipungidi ne milulu ebi bidi bitulongolola bua tupingana kumpala kua Tatu wa mu Diulu ne kusuikibua pamua mu mêku bua tshiendelela.

Mu bipungidi ne milulu ya ntempelo, bukola bua lusa budi dileja (Dilongesha ne Bipungidi 84:20).

Bipungidi ne milulu ya ntempelo bidi bia tshijila. Bimanyishilu bidi bilamikibua ku bipungidi bia ntempelo kabiena mua kuyukidibua pambelu pa ntempelo. Katuena mua kuyukila bua ngumu ya tshijila itudi balaya mu ntempelo bua kubenga kubuluila to. Kadi tudi mua kuyukila pa tuipatshila tua nshindamenu ne dilongesha dia bipungidi mu ntempelo ne ngumvuilu wa nyuma utudi tupeta mu ntempelo.

Balombodi ba bikongu ne ba dikunji badi bayukila ne bidimba pa malu adi mu shapita ewu ne bidimba bidi bilongolola bua kupeta milulu ya diambika ne disuika.

27.1

Kupeta Milulu ya Ntempelo

27.1.1

Kudilongolola bua Kupeta Milulu ya Ntempelo

Bidimba bidi bidilongolola mu nyuma bua kupeta milulu ya ntempelo ne kuenza ne kunemeka bipungidi bia ntempelo.

Baledi badi ne bujitu bua kumpala bua kuambuluisha bana babu bua kudilongolola bua kupeta milulu ya ntempelo. Balombodi ba tshikongu ne ba dikunji, banabetu baluma ne bakaji bakubi, ne bidimba bia dîku dinena bidi bikuatshisha baledi mu mudimu eu.

Mishindu ya kuambuluisha bidimba bua kudilongolola bua kupeta milulu ya ntempelo idi ku temples.ChurchofJesusChrist.org.

Bidimba bidi bidilongolola bua kupeta diambika diabi anyi kudisuika ne mubaki bidi bikankamikibua bua kubuela mu kalasa ka kudilongolola bua kuya ku ntempelo (tangila 25.2.8).

27.1.3

Bidimba Bidi ne Bulema bua Mubidi

Bidimba biakana bidi ne bulema bua mubidi bidi bipeta milulu yonsu ya ntempelo. Bidimba ebi mbikankamikibua bua kuya ku ntempelo ne badiambika balela anyi balunda ba bumuntu bumua nabu bua kubambuluisha. Pikala bidimba kabiyi mua kushindikijibua kudi bidimba bia mêku abu anyi balunda, badi mua kubikila ntempelo kumpala kua diba bua ndongoluelu mukuabu.

27.1.4

Diambuluisha dia Dikudimuna anyi Diandamuna

Pikala bidimba ne dijinga dia diambuluisha bua dikudimuna anyi diandamuna, badi mua kuleja ntempelo kumpala kua diba padibi ne bidi mua kukumbana.

27.1.5

Bilamba bia Kuvuala ku Ntempelo

Padi bidimba biya ku ntempelo bidi mua kuvuala bilamba bitubu bavuala diba dia tshisangilu tshia biakudia bia tshijila.

Tangila 27.3.2.6 bua ngumu pa bilamba bia kuvuala bua dibaka anyi disuika mu ntempelo.

Tangila 38.5 bua ngumu pa:

• Bilamba bia kuvuala diba dia milulu ya diambika ne disuika.

• Dipeta, divuala, ne dikuba dia bilamba bia mîshinga ya mu ntempelo ne bilulu.

27.1.6

Dilama dia Muana

Bana badi ne bua kuikala ne butangidi bua bakulumpa padibu mu lupangu lua ntempelo. Bena mudimu ba ntempelo badiku bua kukuba bana anu mu mishindu idi ilonda eyi:

• Padibu bakadi basuikibua kudi baledi

• Padibu batangila disuika dia bana babu badi ne moyo, bana ba baledi babu baluma ne bakaji kudi baledi babu

27.1.7

Kumonangana ne Bidimba panyima pa Bipeta Milulu ya mu Ntempelo

Bidimba bitu nangananga ne nkonku panyima pa kupeta milulu ya ntempelo. Bidimba bidi bidiambika bia mu dîku, muepiskopo anyi balombodi bakuabu ba tshikongu ne banabetu baluma ne bakaji bqkubi badi mua kumonangana ne bidimba bua kuyukila pa dimanya dia ntempelo.

Mishindu ya diambuluisha bua kuandamuna ku nkoku idiku ku temples.ChurchofJesusChrist.org.

27.2

Diambika

Muaku diambika udi umvuija “dipa.” Diambika dia mu ntempelo didi diumvuija dipa dia kua Nzambi didi dibenesha bana benda. Mapa makuabu adi bidimba bipeta kupitshila ku diambika dia ntempelo adi angata:

• Dimanya dinena dia tuipatshila tua Mukalenga ne malongesha enda.

• Bukola bua kuenza bidi Tatu wa mu Diulu musua bua bana benda benza.

• Diludika dia buzambi patudi tusadila Mukalenga, mêku abu, ne bikuabu.

• Didiundisha dia ditekemena, dikolakana, ne ditalala.

Diwujibua dia mabenesha â didi dilonda lulamatu ku lumu luimpa lua Yezu Kilisto.

Diambika didi dipetshibua mu bitupa bibidi. mu tshitupa tshia kumpala, muntu udi upeta milulu ya ntuadijilu ibikidibua ne ya dilongolola. Ya dilongolola idi kabidi mimanyika bu kowesha ne kulaba (tangila Ekesode 29:4–9). Idi yangata mabenesha masunguluka malamata ku bumpianyi bua mu diulu bua muntu.

Padibu mu ya dilongolola, tshidimba ntshianyishibua bua kuvuala bilulu bia ntempelo. Bilulu bidi bileja dipetangana dia muntu ne Nzambi ne dilaya dia kutumikila bipungidi bienza mu ntempelo. Pikala bidimba ne lulamatu ku bipungidi biabu ne kuvuala bilulu bilenga mu matuku abu onsu a moyo, tshidi kabidi tshienza bu bukubi. Bua ngumu ya pa divuala ne disukula dia bilulu, tangila 38.5.5.

Mu tshitupa tshibidi tshia diambika, dilongolola dia lupandu didi dilongeshibua, biangata Bufuki, Dipona dia Adama ne Eva, Bupikudi bua Yezu Kilisto, Dipambuka ne Dibakulula. Bidimba bidi bipeta kabidi diludika pa dialukila kumpala kua Mukalenga.

Mu diambika, bidimba mbilombibua bua kuenza bipungidi bia tshijila bu mudibi bilonda:

• Kunemeka mukenji wa ditumikila ne kudienzeja bua kulama mikenji ya Tatu wa mu Diulu.

• Kutumikila ku mukenji wa mulambu, tshidi tshiumvuija kufila bua kutua mpanda ku mudimu wa Mukalenga ne ku dikudimuna dia mutshima ne mutshima mutshiubuluka ne nyuma munyingalala.

• Kutumikila ku mukenji wa lumu luimpa lua Yezu Kilisto, udi muikala mukenji munena wakalongeshaye pavuaye pa buloba.

• Kutumikila mukenji wa bunonoka, tshidi tshiumvuija ne tshidimba tshidi ne dipetangana dia buntu anu ne muntu udibu baselangana nenda ku mbulamatadi ne mu dipetangana ne mukenji wa Nzambi.

• Kutumikila mukenji wa kujidila, tshidi tshiumvuija ne bidimba bidi bifila diba diabi ne tshintu tshionsu tshidi Mukalenga mu mubenesha bua kuibaka Ekelezia wa Yezu Kilisto pa buloba.

Mu dialuja, Tatu wa mu Diulu udi ulaya ne aba bonsu badi balama lulamatu ku bipungidi bia ku ntempelo, ne bambikibua “ne bukola bua kulu” (Dilongesha ne Bipungidi 38:32, 38; tangila kabidi Luka 24:49; Dilongesha ne Bipungidi 43:16).

27.2.1

Nganyi udi mua Kupeta Diambika

Bidimba bionsu bikola bia mu Ekelezia bidi bibikidibua bua kudilongolola bua kupeta diambika diabi. Milulu yonsu idi ne bua kuenzejibua ne kuandikibua kumpala kua bidimba kupeta diambika (tangila 26.3.1).

27.2.1.1

Bidimba Bipiabipia Bitambula

Bidimba bipiatshipia bikulumpa biakana bidi mua kupeta diambika diabi mu tshidimu tshimua kubangila dituku dia dijadika diabu.

27.2.1.2

Bidimba bidi ne mubaka kayi mudiambika

Tshidimba tshiakana tshidi ne mubaka kayi mudiambika tshidi mua kupeta diambika diatshi pikala mabangu adi alonda â akumbana:

• Mubaka udi kayi muambikibua udi ufila dianyisha dienda.

• Tshidimba, muepiskopo, ne mulombodi mukulu wa dikunji badi batuishibua ne bujitu bua ne bipungidi bia ntempelo kabifidi lutatu mu dibaka to.

Mabangu â adi abuela mu tshienzedi padi mubaka muikala tshidimba anyi kayi muikala to.

27.2.1.3

Bidimba Bidi ne Bulema mu Lungenyi

Bidimba bidi ne bulema mu lungenyi bidi mua kupeta diambika diabi bu:

• Biobi bipeta milulu idi midianjidila yonsu (tangila 26.3.1).

• Biobi bikala ne lungenyi lua kumvua, kuenza, kutumikila bidi bilamika ku bipungidi.

Muepiskopo udi uyukilangana ne tshidimba, ne muledi wenda, padibi bitabuja. Udi kabidi ukeba buludiki bua Nyuma. Udi mua kuyukila ne mulombodi mukulu wa dikunji.

27.2.2

Kupangadika Diba dia Kupeta Diambika

Kupangadika diba dia kupeta diambika didi dia nkaya ne didi mua kuenzeka mu disambila. Diambika didi dibenesha dia bukola ne dibuluila kudi yonsu udi udilongolola bua kudipeta. Bidimba bidi mua kusungula bua kupeta diambika diabi, diba didibu bakumbaja mabangu adi alonda â:

• Biobi ne bidimu bikesa 18.

• Bidi mua kuikala bijikija tulasa tubandila, batulonda anyi tudi tufuanangana natu.

• Tshidimu tshimua tshipita kubangila ku dijadika diabu.

• Bikala bumvua dijinga dia kupeta ne kutumikila bipungidi bia tshijila bia ntempelo mu matuku abu onsu a moyo.

Bidimba bidi bipeta dibikila dia bukenji anyi bidilongolola bua kusuikibua mu ntempelo bidi mua kupeta diambika.

Kumpala kua kufila dianyisha dia kubuela mu ntempelo kudi tshidimba, bua tshipeta diambika, muepiskopo ne mulombodi mukulu wa dikunji badi bumvua ne muntu mmulongolodibua bua kumvua ne kunemeka bipungidi bia mu ntempelo. Tshiotshi tshisungudibua tshidi tshilondeshila ku muntu ne ku mukuabu.

27.2.3

Kulongolola ne Kuenza Ndongamu wa Diambika

27.2.3.1

Kupeta Dianyisha dia Milulu ya Bantu badi ne Moyo

Tshidimba tshidi ne bua kupeta dianyisha dia milulu ya bantu badi ne moyo bua kubuela mu ntempelo ne kupeta diambika. Bua ngumu pa manyisha â, tangila 26.5.1.

27.2.3.2

Kubikila ku Ntempelo

Bidimba bidi bilongolola bua kupeta diambika bidi mua kupetangana ne ntempelo kumpala bua kuakaja kabala matuku ka milulu.

27.2.3.3

Bashindikiji bua Bidimba bidi Bipeta Diambika Diabi

Bidimba bidi bipeta diambika diabi nkayabi bidi mua kubikila bidimba bidiambika bia bumuntu bumua nabi bua kubashindikija ne kubambuluisha mu tshipangu tshia diambika. Bushindikiji budi ne bua kuikala ne dianyisha dia kubuela mu ntempelo kadiyi dijikila matuku. Ntempelo udi mua kufila bashindikiji biobi bikengedibua.

27.3

Disuika dia Muluma ne Mukaji

Disuika dia mu ntempelo didi dituikakaja muluma ne mukaji bua tshikondu ne bua tshiendelela. Nebapeta mabenesha â pikalabu ne lulamatu ku bipungidi bidibu benza mu ntempelo. Kupitshila ku mululu eu, bana babu badi mua kuikala ba dîku diabu bua tshiendelela.

Balombodi ba Ekelezia badi bakankamika bidimba bua bidilongolola bua biselangana ne bisuikibua mu ntempelo. Muaba udi dibaka dia ntempelo kadiyi dimanyika kudi mbulamatadi, balombodi ba Ekelezia mbitabujibua anyi bakuabu bua kuenzeja dibaka dia mbulamatadi dikala dilonda kudi disuika dia ntempelo (tangila 38.3). Mushindu ewu udi kabidi mua kulondibua padi dibaka dia mu ntempelo mua kubengela baledi ne bidimba bia dîku bualu kabiena mua kubuela mu mushînga ewu wa ntempelo.

27.3.1

Nganyi udi mua Kusuikibua mu Ntempelo

Bidimba bionsu bidi kabiyi bisela bia Ekelezia mbibikidibua bua ku dilongolola bua kusuikibua mu ntempelo. Aba bonsu badi baselangana ku mbulamatadi mbakankamikibua bua kusuikibua bua tshikondu ne tshiendelela mu ntempelo padibu badilongolola. Bidimba bidi ne bua kuambikibua kumpala kua kusuikibua (tangila 27.2).

Muluma ne mukaji badi basuikibua badi ne bua kuanji kuikala (1) baselangana ku mbulamatadi kumpala kua kusuikibua anyi (2) kuselangana ne kusuikibua mu mushinga wa momumua mu ntempelo. Tangila 27.3.2.

27.3.1.2

Bidimba Bidi ne Bulema mu Lungenyi

Bidimba bidi ne bulema mu lungenyi bidi mua kusuikibua kudi babaka babu anyi babangila babu pikalabu:

• Bavua bapeta milulu midianjidila, bu mudi diambika (tangila 27.2.1.3).

• Bobu bikala ne lungenyi lua kumvua, kuenza, kutumikila bidi bilamika ku bipungidi.

Muepiskopo udi uyukila ne tshidimba ne mubaka watshi, anyi mubangila watshi. Udi kabidi ukeba buludiki bua Nyuma. Udi mua kuyukila ne mulombodi mukulu wa dikunji.

27.3.2

Kulongolola ne Kuenza Ndongamu wa Disuika anyi Dibaka dia mu Ntempelo

27.3.2.1

Kupeta Dianyisha dia Milulu ya Bantu badi ne Moyo

Tshidimba tshidi ne bua kupeta dianyisha bua milulu ya bantu badi ne moyo bua kusuikibua kudi mubaka wenda. Bua ngumu pa manyisha â, tangila 26.3.

27.3.2.2

Kubikila ku Ntempelo

Bidimba bidi bidilongolola bua kuselangana anyi kusuikibua kudi mubaka badi mua kupetangana ne ntempelo kumpala bua kuakaja kabala matuku ka mululu.

27.3.2.3

Dipeta Mukanda wa Dibaka

Kumpala kua kuselangana, muluma ne mukaji badi ne bua kupeta mukanda wa dibaka dia mbulamatadi ne muaba wenzekela dibaka. Padi muluma ne mukaji balongolola bua kuselangana ne kusuikibua mu tshipolu tshimua tshia mushînga, badi ne bua kuya ne mukanda wa dibaka ku ntempelo.

Muluma ne mukaji badi basuikibua panyima pa dibaka dia mbulamatadi kabena baya ne mukanda wa dibaka ku ntempelo. Bua atshi, badi bafila muaba ne dituku dia dibaka diabu bu tshitupa tshia dikenketa dia miandiku.

27.3.2.4

Dishindikija bua mubaka ne mubaki

Muanetu mukaji udi mudiambika udi mua kushindikija mubaka bua kumuambuluisha mu tshibambalu tshia divuadila. Muanetu muluma udi mudiambika udi mua kuenza bia momumua bua mubaki. Bushindikiji budi ne bua kuikala ne dianyisha dia ku buela mu ntempelo kadiyi dijikila matuku. Ntempelo udi mua kufila bashindikiji biobi bikengedibua.

27.3.2.5

Nganyi udi Wenzeja Dibaka anyi Disuika

Dibaka anyi disuika mu ntempelo didi dienzejibua misangu yonsu kudi musuiki udi mutumibua ku ntempelo kudi muluma ne mukaji bua kuselangana anyi kusuikibua. Pikala tshidimba tshia dîku anyi muntu mumanya muikala ne bukôkeshi bua kusuika ne muteka ku ntempelo kudi muluma ne mukaji mua kuselangana anyi kusuikibua, badi mua kumubikila bua kukumbaja dibaka anyi disuika.

27.3.2.6

Bilamba Bikumana bia Dibaka anyi Disuika mu Ntempelo

Nkanzu wa mubaka. Nkanzu wa mubaka wakuvuala mu ntempelo udi ne bua kuikala mutoka, uleja bupuekela ku ditela ne kayi bilengejilu. Udi kabidi ne bua kubuikila bilulu bia ntempelo. Tshilamba tshia lumuenu tshidi ne bua kuambakajibua.

Bua kuikalaye dia tshiumua ne nkanzu mikuabu idi ivuadibua mu ntempelo, nkanzu wa mubaka udi ne bua kuikala ne maboku malepa. Nkanzu kena mua kuikala ulamba to, udi mua kukangibua mpengela anyi kumuvunga bua mushînga wa disuika mu ntempelo.

Ntempelo udi mua kufila nkanzu biobi bikengedibua.

Bilamba bia Mubaki Mubaki udi uvuala yeya bilamba bia mu ntempelo mu mushînga wa dibaka anyi disuika (tangila 38.5.1 ne 38.5.2).

Bilamba bia benyi Aba badi babuela ku mushînga wa dibaka anyi disuika badi bavuala bilamba bifuanangana ne bidibu bavuala mu tshisangilu tshia biakudia bia tshijila. Bidimba bidi bifuma ku tshisangilu tshia diambika bidi mua kuvuala bilamba bia mishînga bia ntempelo.

Bilongu Muluma ne mukaji ne benyi babu kabena mua kulua ne bilongu mu mushînga wa dibaka anyi disuika.

27.3.2.7

Dishintakaja Mpeta Panyima pa Dibaka anyi Disuika mu ntempelo

Dishintakaja mpeta ke ntshitupa tshia mushînga wa disuika mu ntempelo to. Kadi, muluma ne mukaji badi mua kushintakaja mpeta panyima pa mushînga mu tshibambalu tshia disuika. Muluma ne mukaji kabena mua kushintakaja mpeta mu diba dîku abu anyi muaba mukuabu mu ntempelo anyi mu lupangu lua ntempelo to.

Baluma ne bakaji badi baselangana ne basuikibua mu mushînga umua ewu badi mua kushintakaja mpeta pashisha bua kusanka ne bidimba bia dîku bivua kabiyi bibuela mu dibaka dia ntempelo. Dishintulula dia mpeta kadiena mu kuenzulula tshitupa nansha tshimua tshia mushînga wa dibaka anyi disuika mu ntempelo. Muluma ne mukaji kabena mua kushintakaja malaya panyima pa bikala baselangana anyi basuikibua mu ntempelo.

Baluma ne bakaji badi baselana ku mbulamatadi kumpala kua disuika mu ntempelo badi mua kushintulula mpeta diba dia mushînga wa ku mbulamatadi, disuika ku ntempelo, anyi dia mishînga yonsu ibidi.

27.3.4

Nganyi Udi Mua Kubuela mu Disuika anyi Dibaka dia ku Ntempelo

Muluma ne mukaji badi babikila anu bidimba bia dîku bia pabuipi ne balunda ku dibaka anyi disuika mu ntempelo. Bidimba bikola bidi ne bua kuikala biambika ne bikala ne dianyisha dia kubuela mu ntempelo kadiyi dijikila matuku.

Mulombodi mukulu wa dikunji udi mua kuangishila muntu udi kayi mutambula anyi muambika bua bulema bua meji enda bua kumona dibaka anyi disuika mu ntempelo dia bana babu badi ne moyo. Muntu udi ne bua:

• Kuikala ne bidimu biobi bikesa 18.

• Kuikala ne kanemu padi mushînga upita.

Mulombodi mukulu wa dikunji udi ufunda mukanda uleja ne muntu ewu muanyishibua bua kumona disuika. Mukanda ewu udi ulejibua ku ntempelo.

27.4

Disuika dia Bana Badi ne Moyo ku Baledi

Bana badi baledibua panyima pa mamu mumana kusuikibua kudi muluma wenda mu ntempelo badi baledibua mu tshipungidi tshia disuika. Kabena dijinga ne kupeta mululu wa disuika kudi baledi to.

Bana badi kabayi balela mu tshipungidi badi mua kulua tshitupa tshia dîku dia tshiendelela ku disuikibua kudi baledi babu anyi babakebi. Bana aba badi ne mabenesha a momumua ne aba badi balela mu tshipungidi.

27.4.2

Kubikila ku Ntempelo

Muluma ne mukaji badi dijinga ne kusuika bana babu kudibu, anyi bana badi dijinga ne kusuikibua kudi baledi babu bafua, badi mua kupetangana ne ntempelo kumpala kua diba bua kulongolola matuku a mululu.