27.

Ekkewe Angangepin fan iten ekkewe Mi Manau

27.0

Nepoputan

Ewe tempel ina ewe imwen ewe Samol. A awena kich ngeni ach Chon Amanau, Jises Kraist. Non ekkewe tempel, sia fiti Samach Kot won Nang non ekkewe angangepin me fori ekkewe pwon mi pin ena a ochufengenikich ngeni I me ngeni ach Chon Amanau. Ekkei pwon mi pin me angangepin ra amonakicheta ach sipwe niwin ngeni mwen mesen Samach Kot won Nang me riri fengen ussun ekkewe famini fochofoch.

Non tempel ren ekkewe pwon mi pin me angangepin, “ewe manaman ussun Kot a pwanno” (Doctrine and Covenants 84:20).

Ekkewe pwonepin me angangepin non tempel ir mi pin. Ekkewe esisin ra akoko fengen me ekkewe pwon pi pin non tempel esap wor aporous won me nukun ewe tempel. Me sisap porous ussun ewe porous mi pin sia pwon non ewe tempel ach sisap pwarano. Iwe nge, sia tongeni poporous won ekkewe auchean popun me nongonongun ekkewe pon mi pin me ekkewe angangepin me ekkewe memefin ewe ngun a wor rech me non ewe tempel.

Ekkewe sou emwenin wart me steik repwe poporous won ekkewe porous non ei sopun fiti ekkewe memper ekkewe ra amonata ar repwe angei ewe endowment ika angangepin ren riri fengen.

27.1

Angei Ekkewe Angangepin non Tempel

27.1.1

Amonata ne Angei Ekkewe Angangepin non Tempel

Ekkewe memper repwe amonata inisir non pekin ngun ar repwe angei ekkewe angangepin non tempel me repwe fori me afona ekkewe pwon mi pin non tempel.

Ekkewe sam me in a wor rer ewe popunapen wis ar repwe anisi nour kewe semirit ne amonereta ar repwe angei ekkewe angangepin non tempel. Ekkewe sou emwenin steik me wart, ekkewe fefin me mwan chon iamwir, me ekkewe pwan ekkoch famini repwe anisi sam me in non ei angang.

Ekkewe nenien awora aninis an epwe anisi ekkewe memper ar repwe angei ekkewe angangepin mi wor non tempel a or temples.ChurchofJesusChrist.org.

Ekkewe memper ra amonata ar repwe angei ar pusin endowment ika repwe riri ngeni punuwer a wor pesepes ngeni ar repwe fiti ew sukunen amonetan non tempel (nengeni 25.2.8).

27.1.3

Ekkewe Memper Ion mi Wor Terin Inisir

Ekkewe memper mi nimenimoch mi wor terin inisir repwe angei meinisin angangepin non tempel. A wor pesepes ngeni ekkei memper ar repwe fiti mararir ika chiener epwe fefin ngeni fefin mwan ngeni mwan ion mi tongeni anisir. Ika ekkewe memper rese tongeni fiti emon chon ewe famini ika chienan, ra tongeni kori ewe tempel me mwen ita ewe ran repwe no ar repwe nengeni met kokkot epwe tongeni for.

27.1.4

Aninisin Chiaku ika Awewe

Ika ekkewe memper ra mochen aninis ren chiaku ika awewen, repwe kori ewe tempel me mwen ena fansoun ar repwe nengeni ika mi wor.

27.1.5

Uf kopwe Ufouf ngeni ew Tempel

Nupwen feino ngeni ew tempel, memper repwe ufouf ewe sokkun uf ra ufouf ngeni mwichen sakramen.

Nengeni27.3.2.6 ren porous ussun uf kopwe ufouf ngeni ew apupunu non tempel ika riri fengen.

Nengeni 38.5 ren porousan:

• Uf kopwe ufouf nupwen ewe endowment me angangepin ren riri fengen.

• Angei, ufouf, me tumunu ren ufen ceremonial me uf mi pin non tempel.

27.1.6

Tumunun Semirit

Mi och epwe wor mei mukono repwe wisen tumunu kewe semirit ika re nom won punun ewe tempel. A wor chon angangen ewe tempel ar repwe anisi ekkewe chok semirit non ekkewe sokkun mokutukut mi affat:

• Ika repwe riri ngeni semer me iner kewe

• Ika repwe katon ewe riri fengenin pwir ika fefiner kewe mi manau, ika pwir ika fefiner kewe nonno chok semer ika iner ika sokofesen won iner ika semer

27.1.7

Chufengen me ekewe Memper mwirin Ar angei Ekkewe Angangepin non Tempel

Fan chommong a wor an ekkewe memper kapaseis mwirin ar angei ekkewe angangepin non tempel. Ekkewe memper non famini ra fen efeioch non tempel, ekkoch ekkewe sou emwenin wart, me mwan me fefin chon iamwir repwe chufengen me ekkewe memper ar repwe porous won met ar sinei me mefi ren ewe tempel.

Nenien awora aninis ne anisi ponuwen ekkewe kapaseis a nom temples.ChurchofJesusChrist.org.

27.2

Ewe Endowment

Ewe kapas endowment wewen “ew niffang.” Ewe endowment non tempel a ew niffang seni Kot seni minne I a efeiochu Noun kewe semirit. Ekkoch me nein ekkewe niffang ekkewe memper ra angei seni ewe endowment non tempel pachenong:

• Wachimuken weweiti an ewe Samon ekkewe popun me afanafan.

• Manaman ne fori meinisin minne Samach won Nang a mochen Noun kewe semirit repwe fori.

• Emwen seni Kot nupwen angang ngeni ewe Samon, ar ekkewe famini, me ekkoch.

• Anapano epinukunuk, netipoch , me kinamwe.

Ewe kawesinon ekkei efeioch, a anongonong won an aramas nikitu ngeni ewe kapas allimen Jises Kraist.

Sia angei ewe endowment non ruu kinikin. Non ewe aewin kinikin, emon aramas a angei ew poputan angangepin me mwen epwe fori ewe endowment, a iteni initiatory. Ewe initiatory a pwan iteni ewe enimenim me epinipinino (nengeni Exodus 29:4–9). A pachanong ekkewe efeioch mi auchea a akoko ngeni wisen ewe aramas meren Kot me an tongeni.

Non fansoun ewe initiatory, a mumuta ngeni ewe memper an epwe ufouf ekkewe ufoufen non tempel mi pin. Ewe uf mi pin a wewe ngeni nefinen pusin ewe aramas ngeni Kot me ewe pwon an epwe anneasosich ekkewe pwon mi pin a fori non ewe tempel. Nupwen ekkewe memper ra nikitu ngeni ar kewe pwon mi pin me ufouf ewe uf mi pin non unusen manauer, a pwan aninis ren pekin ew tumun. Ren porousan ufoufen ewe uf mi pin me tumunun, nengeni 38.5.5.

Non ewe ourwen kinikinin ewe endowment, a wor afanafanen ewe kokotun manau esemuch, pachenong ewe Forutan Fonufan, ewe Turutiwen Adam me Eve, ewe Achasefan an Jises Kraist, ewe Fansoun Rochopwak, me ewe Niwinsefanito. Ekkewe memper ra pwan angei kapasen ourour won ifa ussun ar repwe niwinsefan ngeni mwen mesen Kot.

Non ewe endowment, ekkewe memper ra koko ngeni ar repwe fori ekkewe pwon mi pin ussun mi tetenitiw:

• Manaueni ewe annukun anneasosich me achocho ne aponueta ekkewe annuk an samach Kot won Nang.

• Anneasosich ewe annukun asor minne a wewen asor an epwe anisi an ewe Samon angang me aier fiti ew netipeta me niamamen ngun.

• Anneasosichi ewe annukun ewe kapas allimen Jises Kraist ina ewe annuk mi tekia ewe a afanafana nupwen I a nom won fonufan.

• Aponueta ewe annukun nimenimoch, minne a wewen pwe emon memper a wor an foforun tong ngeni chok ewe aramas i epwe apupunu ngeni anongonong ngeni an Kot annuk.

• Aponueta ewe annukun epinipin, ewe a wewen pwe ekkewe memper repwe fangeno ar fansoun, ekkewe sinenap, me ese nifinifin minne ewe Samon a fen efeiochu ngenir ar repwe ouweta an Jises Kraisat ewe Mwichefen won fonufan.

Niwinin, Samach won Nang a pwon pwe ekkana ra chok nonnom non ar nikitu ngeni ar ekkewe pwon mi pin non tempel repwe angei “fiti manaman seni asan” (Doctrine and Covenants 38:32, 38; pwan nengeni Luke 24:49; Doctrine and Covenants 43:16).

27.2.1

Ion Epwe Angei ewe Endowment

Meinisin mi mukono mi mirit chon ewe Mwichefen ra koko ngeni ar repwe amonata me angei ar pusin endowment. Meinisin mettoch mi auchea me mwen ekkewe angangepin epwe fis me rekot me mwen ekkewe memper ra tongeni angei ewe endowment (nengeni 26.3.1).

27.2.1.1

Ekkewe Minefon Memper ra Papatais

Minefon memper mi mukono ir mi nimenimoch ra tongeni angei ar endowment ew ier seni ewe fansoun ra kapunguno.

27.2.1.2

Ekkewe Memper Punuwer ese Wor An Endowment

Emon memper mi nimenimoch minne punuwan ewe ese angei an endowment a tongeni pusin angei an endowment nupwen a aponueta nonomun ekkei mettoch mi affatetiw:

• Punuwan ewe ese angei an endowment epwe ngeni mumutan.

• Ewe memper, pisop, me presetenin steik ra nukunuk pwe ewe wis epwene ina fiti ekkewe pwon mi pin non tempel esap awosukosuka ewe pupunu.

Ekkei nonomun ekkei mettoch a fis ika mo punuwan ewe i emon chon ewe Mwichefen ika esap.

27.2.1.3

Ekkewe Memper A Wor Terir ren pekin Weweiti

Ekkewe memper a wor terir ren pekin weweiti ra tongeni pusin angei ar endowment ika:

• Ra fen angei meinisin mettoch mi auchea me mwen ekkewe angangepin (nengeni 26.3.1).

• A wor ar ewe tufichin ar repwe weweiti, fori, me aponueta ekkewe pwon mi pin mi akoko ngeni.

Ewe pisop a awora kapasen ourour ngeni ewe memper me, ikewe mi tufich ngeni inan me saman ewe. I a pwan kukuta ewe emwen seni ewe Ngun. I a tongeni angei kapas ourour meren ewe presetenin steik.

27.2.2

Ekieki Inet kopwe Angei ewe Endowment

Ewe pungun ekiek ne angei ewe endowment a pusin an emon won winikapan me epwe fiti iotek. Ewe endowment ew efeiochun manaman me pwarata ngeni meinisin mi amonata an epwe angei. Ekkewe memper meni repwe fini ar repwe angei pusin ar endowment nupwen ra aponueta meinisin ekkewe mettoch mi affatetiw:

• Repwe 18 ierir.

• Ra fen awesi ika rese chiwen fiti high, skun ika ekkewe sukun mwirin high skun, ika kewe mi chok nonno fengen.

• Ew unus ier a pasino seni ar ewe fansoun epinepinino.

• Ra mefi ew mochen ar repwe angei me ofono ekkewe pwon non tempel mi pin non unusen manauer.

Ekkewe memper ra fen angei ew kokon angangen misin ika ra amonata ar repwe riri non ewe tempel repwe angei ewe endowment.

Mwen forun echo taropwen mumutan tonong non tempel a finita ren an emon memper epwe angei ewe endowment, ewe pisop me presetenin steik repwe mefi pwe ewe aramas a moneta an epwe weweiti me aponueta ekkewe pwon non tempel mi pin. Ei tufich a wor pochokunen ekiek won ren emon me emon aramas.

27.2.3

Ota me Eteteni Fansoun Ranin ewe Endowment

27.2.3.1

Angei ew Mumuta fan iten Ekkewe Angangepin ren mi Manau

Emon memper epwe angei ew mumuta fan iten ekkewe angangepin ren mi manau an epwe tonong non ew tempel me angei ewe endowment. Ren porous ussun ekkei mumuta, nengeni 26.5.1.

27.2.3.2

Kokori ewe Tempel

Ekkewe memper ra kokotun repwe angei ewe endowment repwe kori ewe tempel me mwan ar repwe eteteni fansoun me ranin ewe angangepin.

27.2.3.3

Chon Emwen fan iten Ekkewe Memper Repwe Angei ewe Endowment

Ekkewe memper repwe angei ar endowment ra tongeni kokori emon member a fen wes an endowment epwe chok ussun nikinikin ren fefin ika mwan me epwe anisi ir non ewe fansoun endowment. Emon chon emwen epwe wor noun taropwen mumutan tonong non tempel. Ewe tempel a tongeni awora emon chon emwen ika ir mi osupang won.

27.3

Riri fengenin Ruemon Pupunu

Ew riri fengen non tempel a ochu fengeni emon mwan me fefin ir pupunu ren fansoun me feinfeino. Repwe angei ekkei efeioch ika ra nikitu ngeni ekkewe pwon mi pin ra fori non ewe tempel. Seni ei angangepin, nour kewe semirit repwene pwan kinikinin ar ewe famini fochofoch.

Sou emwenin Mwichefen repwe pesei ekkewe memper ar repwe amonata ar repwe pupunu me riri fengen non ew tempel. Ikewe apupunu non tempel rese affat non pekin annuk, ekkewe sou emwenin Mwichefen mi wor rer ewe mumuta ika ekkoch ra tongeni fori ew apupunu non pekin muun me mwirin epwap tapweto ewe riri fengen non tempel (nengeni 38.3). Ei napanap a pwan tongeni tapw mwirin nupwen ew apupunu non tempel a tongeni forata an ekkewe sam me in ika chon ewe famini repwe mefi pwe ir mi ketiweu pokiten rese tongeni fiti ewe foforun apupunu non tempel.

27.3.1

Ion Epwe Tongeni Riri non ew Tempel

Meinisin ekkewe rese pupunu chon ewe Mwichefen mi mirit ra koko ngeni ar repwe amonereta ren ew riri fengen non tempel. Ekkana ra apupunu non imwen kapung a wor pesepes ngenir ar repwe mwitir riri fengen non ewe tempel inet chok ra moneta ren fansoun me feinfeino. Ekkewe memper repwe angei ar endowment non tempel me mwen repwe riri fengen (nengeni 27.2).

Ekkewe pean pupun ra riri fengen non ewe tempel repwe ew me nein (1) apupunu non imwen kapung me mwen repwe riri fengen ika (2) apupunu me riri fengen non ewe chok pwan napanapen apupunu non tempel. Nengeni27.3.2.

27.3.1.2

Ekkewe memper mi Wor ar Terin Weweiti

Ekkewe memper mi wor ar terin weweiti ra tongeni riri ngeni punuwer, kofotur ika:

• Ra fen angei meinisin met ekkewe mi auchea ren ekkewe angangepin, pachenong ewe endowment (nengeni 27.2.1.3).

• A wor rer ewe kaukun tufichin ar repwe weweiti, fori, me aponueta ekkewe pwon mi pin mi akoko ngeni.

Ewe pisop a awora kapasen aurour ngeni ewe memper ika punuwan, ika kofotun, I a pwan kukuta ewe emwen seni ewe Ngun. I a tongeni epwe churi ewe presetenin steik ren kapasen ourour.

27.3.2

Ota me Eteteni Fansoun me Ranin ew Apupunu ika Riri Fengen non Tempel

27.3.2.1

Angei ew Taropwen Mumuta ren Ekkewe Angangepin ren mi Manau

Emon memper epwe angei ew taropwen mumuta fan iten ekkewe angangepin mi manau an epwe riri ngeni punuwan. Ren porousen ekkei taropwen mumuta, nengeni 26.3.

27.3.2.2

Kokori ewe Tempel

Ekkewe memper ra okkota ar repwe apupunu ika riri ngeni punuwer repwe kokori ewe tempel me mwen ena ran ar repwe fori tetenin fansoun me ranin ewe angangepin.

27.3.2.3

Angei echo Naisinin Apupunu

Me mwen apupunu, ew pean pupunu repwe angei echo naisinin apupunu mi fiti punguoch ewe mi ketiw ikewe ewe apupunu epwe fis ia. Ika ewe pean pupunu a ota ar repwe apupunu me ruemon me riri fengen non ewe chok fansoun ceremony, repwe wato echo naisinin apupunu mi ketiw ngeni ewe tempel.

Ekkewe pean pupunu ra riri fengen mwirin ew apupunu non imwen kapung ese pwan namot repwe wato echo naisinin apupunu ngeni ewe tempel. Nge, repwe awora ewe ranin me nenien ar ewe apupunu non imwen kapung pwe a fis pwe ewe foforun anetata rekot.

27.3.2.4

Ekkewe chon Emwen ren ewe Mwan me Fefin chon apupunu

Emon fefin a fen angei an endowment a tongeni fiti ewe fefin epwe apupunu an epwe anisi non ewe rumwen ufouf. Emon mwan a fen angei an endowment a tongeni pwan ussun chok ren ewe mwan epwe apupunu. Emon chon emwen epwe wor noun taropwen mumutan tonong non tempel iei. Ewe tempel a tongeni awora emon chon emwen ika mi namot.

27.3.2.5

Ion a Fori Angangen ew Apupunu ika Riri Fengen

Ew apupunu ika riri fengen non tempel a fis angangan seni emon chon fori riri fengen ewe a finita ngeni ewe tempel ikewe ewe pean pupunu repwe apupunu ika riri fengen. Ika emon chon ewe famini ika emon a wor an weweiti me nipwakoch a wor ren ewe mumutan riri fengen a finita ngeni ewe tempel ikewe pean pupunu repwe apupunu ika riri fengen, iwe repwe kori i an epwe fori ewe angangen apupunu ika riri fengen.

27.3.2.6

Uf mi Murino ren ew Apupunu ika Riri Fengen non Tempel

Ufen ewe Fefin Epwe Apupunu. Ufen ewe fefin epwe apupunu non ewe tempel epwe pwech, tekisoson non foforun me mangakun, esap tekarara ofoutan. Epwe pwan pwonuono ewe uf mi pin. Ewe mangaku mi chachak, epwe or chechin non.

An epwe chok ussun nikinikin ekkewe ekkoch ufoufen non temepel, ufen ewe fefin epwe apupunu epwe tam poun eketik me nefinen kumuchun me epinpinin poun. Ekkewe uf esap wor nepunin epwe nakatatameno nukun sokur tiwenon chok ika mi tongeni epwe pineta ika etatiw ren ewe angangen riri fengen.

Ewe tempel a tongeni awowra echo uf ika mi auchea ika mochen.

Ufen ewe Mwan Epwe Apupunu. Ewe mwan epwe apupunu a ufouf ewe ufoufen non tempel nupwen ewe apupunu ika riri fengen (nengeni38.5.1 me 38.5.2).

Ufen Chon Fiti. Ekkana ra fiti ew apupunu ika riri fengen repwe ufouf mi nonno ngeni met repwe ufouf ngeni ewe mwichen sakramen. Ekkewe memper ra feitto ngeni ew riri fengen seni ewe chok fansoun endowment a tongeni ufouf ufoufen met ekkewe a fis mokutukutun non tempel.

Ekkewe ponira. Ewe pean pupunu me nour kewe chon fiti resap nounou ponira fansoun angangen ewe apupunu ika riri fengen,

27.3.2.7

Keit Fengenin Ekkewe Ring mwirin ew Apupunu ika Riri Fengen

Keit fengen ekkewe ring esap pwan ew kinikinin ewe angangen riri fengen non tempel. Iwe nge, ekkewe pean pupunu ra tongeni eiti fengeni ekkewe ring mwirin ewe angangenn apupunu non ewe rumwen riri fengen. Ekkewee pean pupunu resap keit fengen ekkewe ring non pwan ew fansoun ika neni non ew tempel ika won punun ewe tempel.

Ekkewe pean pupunu ra apupunu me riri fengen non ewe pwan chok napanap ra tongeni keit fengen ekkewe ring non ew fansoun mwirin an epwe awora an ekkewe chon famini fansoun ngenir ekkewe rese tufichin fiti ew apupunu non tempel. Ewe keit fengen esap nikapuru kinikinin ewe apupunu ika riri fengen non tempel. Ewe pean pupunu resap ekesiwin fengen ar kewe pwon mwirin ar ra fen apupunu ika riri fengen non ewe tempel.

Ekkewe pean pupunu ekkewe ra apupunu non imwen kapung me mwen ar repwe riri fengen ra tongeni keit fengen ekkewe ring ren ar ewe angangen apupunu non imwen kapung, ren ar ewe riri fengen no tempel, ika ren ir me ruu angangen apupunu.

27.3.4

Ion Epwe Tongeni Fiti ew Apupunu ika Riri Fengen

Ekkewe pean pupunu repwe chok korato ekkewe chon ar famini mei kanengenir me chiener ngeni ew apupunu ika riri fengen non tempel. Ekkewe memper mi wewe repwe efeioch me awora echo taropwen mumutan tonong non tempel ar repwe fiti.

Ewe presetenin steik epwe mutata an emon aramas ewe ese fen papatais ika efeioch pokiten osukosuken an ekiek an epwe katon ewe apupunu ika riri fengen non tempel an pwin ika fefinan kewe mi manau. Ewe aramas epwe:

• Ukukun 18 ierin.

• Epwe tongeni an epwe chok mosonoson non fansoun ewe angangen apupunu ika riri fengen.

Ewe presetenin steik a makkei echo taropwe a apasa pwe ewe aramas a mumuta an epwe katon ewe riri fengen. Ewe taropwe a katou seni non ewe tempel.

27.4

Riri Fengenin Ekkew Semirit mi Manau ngeni Semer me Iner

Ekkewe semirit ra uputiw mwirin iner ewe a fen riri ngeni punuwan ewe non ew tempel ra uputiw non ewe pwon mi pin ren ena riri fengen. Ese pwan auchea ar repwe angei ewe angangepin ren riri ngeni iner me semer kewe.

Ekkewe semirit rese uputiw non ewe pwon mi pin ra tongeni winiti kinikinin ew famini fochofoch ren ar riri fengen ngeni pukupukun semer me iner kewe ika ekkewe sam me in ra mutir. Ekkei semirit ra pwan angei pwan ekkewe efeioch mi chok nonno ngeni ekkewe ren ekkewe ra uputiw nonn ewe pwon mi pin.

27.4.2

Kokori ewe Tempel

Ew pean pupunu ewe a mochen an nour kewe repwe riri ngenir, ika ekkewe semirit ra mochen repwe riri ngeni iner me semer kewe ra mano, repwe kokori ewe tempel me mwen ena fansoun ar repwe eteteni fansoun me ranin ewe angangepin.