27.

Kain̄i ko an Tampeļ n̄an Ro Remour

27.0

Kadkad in

Tampeļ eo ej m̧weo im̧ōn Irooj. Ej kajitļo̧k kōj n̄an ad Rilo̧mo̧o̧r, Jisōs Kraist. Ilo tampeļ ko, jej bōk koņaad ilo kain̄i ko rekwojarjar im kōm̧m̧ani bujen ko ippān Jemedwōj Ilan̄ me ej liāpe kōj n̄an Ippān im n̄an ad Rilo̧mo̧o̧r. Bujen im kain̄i kein rej kōpooj kōj n̄an jepļaakļo̧k n̄an ippān Jemedwōj Ilan̄ im n̄an liāp āinwōt baam̧le ko n̄an indeeo.

Ilo bujen im kain̄i ko ilo tampeļ, “kajoor in āinwōt anij ej waļo̧k” (Katak im Bujen Ko 84:20

Bujen ko im kain̄i ko ilo tampeļ rekwojarjar. Kōkaļļe ko me rej m̧ōttanļo̧k bujen ko ilo tampeļ rej aikuj jab kōnono kaki ilo nabōj in tampeļ. Barāinwōt rejjab aikuj kōnono kaki meļeļe ko rekwojarjar me jej kallim̧ur kaki ilo tampeļ bwe jeban kwaļo̧ki. Ijoke, jemaron̄ kōnono kōn un dikdik ko katak ko ikkijeen bujen ko ilo tampeļ im en̄jake ko an jetōb me jej en̄jaki ilo tampeļ.

Ritōl ro an ward im stake rej kōnono kōn meļeļe ko ilo jebta in ippān membōr ro me rej kōppopo n̄an bōk menin letok kwojarjar eo ak kain̄i in liāp ko.

27.1

Bōk Kain̄i ko ilo Tampeļ

27.1.1

M̧aanjabpopo n̄an Bōk Kain̄i ko ilo Tampeļ

Membōr ro ej aikuj kōpooj er make n̄an bōk kain̄i ko an tampeļ im n̄an kōm̧m̧an im kautiej bujen ko ilo tampeļ.

Jinen im jemān ajri ro ewōr juon aer eddo eaorōk n̄an jipan̄ ajri ro nejier kōppopo n̄an bōk kain̄i ko ilo tampeļ. Ritōl ro an stake im ward eo, rikarejar m̧aan im kōrā ro, im ro uwaan baam̧le nokon ko rej rie jinen im jemān ajri ro ilo eddo in.

Bok ko n̄an jipan̄ membōr ro kōpooj er n̄an bōk kain̄i ko an tampeļ me rej pojak ilo temples.ChurchofJesusChrist.org

Membōr ro me rej kōppopo n̄an bōk menin letok kwojarjar eo aer make ak n̄an liāp n̄an eo pāleen rej rōjan̄ er n̄an bōk koņaer ilo juon kūlaaj in kōppopo n̄an tampeļ (lale 25.2.8).

27.1.3

Membōr ro im Ewōr Utam̧we ilo Ānbwin

Membōr ro rej mour erreo ro ewōr wōtame ilo ānbwinnier remaron̄ bōk kain̄i ko ilo tampeļ. Membōr rein kar kapilōk er n̄an pād ilo tampeļ ippān ro nukuer me em̧ōj aer bōk menin letok kwojarjar ak ro m̧ōttāer ro remaron̄ jipan̄ er. N̄e membōr ro rejjab maron̄ wōr juon nukun ak m̧ōttan, remaron̄ kūrļo̧k tampeļ eo m̧okta n̄an lale ta eo remaron̄ kōm̧m̧ane.

27.1.4

Rijipan̄ Ukook ak Ukōt Ainikien

N̄e membōr ro rej aikuj rijipan̄ ukook ak ukot ainikien, rej aikuj kepaak tampeļ eo m̧okta n̄an lale n̄e elōn̄ emaron̄ jipan̄.

27.1.5

Nuknuk ko n̄an Kōņaki n̄an juon Tampeļ

N̄e jej etal n̄an juon tampeļ, membōr ro rej aikuj kanōk kain nuknuk ko me rej kaņōki n̄an etal im jar ak kweilo̧k in kwojkwoj eo.

Lale 27.3.2.6 n̄an meļeļe ko kōn nuknuk ko me jej kaņōki n̄an pād ilo juon m̧are ilo tampeļ ak liāp.

Lale 38.5 n̄an meļeļe ko kōn:

• Nuknuk ko jej kaņōki ilo iien bōk kain̄i ko an menin letok kwojarjar eo ak endowment im liāp.

• Bōki, kaņōki, im kōjparoki nuknuk in ceremony ko ilo tampeļ ak kaarmen ko.

27.1.6

Kōjparok Ajri

Rūtto ro rej aikuj jipan̄ lale ajri ro eļan̄n̄e rej pād ilo meļan ko an tampeļ. Rijerbal ro ilo tampeļ rej aikuj pojak im lale ajri ro ilo iien ko wōt me jekjek kein rej elaajrak rej bōk jikier:

• Eļan̄n̄e ro jinen im jemān ajri ro rej liāp

• Eļan̄n̄e rej pād lale liāp an ro jeier im jatier remour, step sister ak brother ro, ak half sister ak brother ro n̄an ro jineer im jemāer.

27.1.7

Kweilo̧k ippān Membōr ro Ālkin Aer Bōk Kain̄i ko an Tampeļ

Membōr ro ekkā an wōr aer kajjitōk ālkin aer bōk kain̄i ko ilo tampeļ. Ro uwaan baam̧le eo me em̧ōj aer bōk menin letok kwojarjar ak endowment, ritōl ro jet an ward eo, im rikarejar m̧aan im kōrā ro remaron̄ ioon membōr ro n̄an kōnono kōn en̄jake ko aer ilo tampeļ.

Bok ko ak kein jipan̄ ko n̄an jipan̄ uwaake kajjitōk ko me rej pād ilo temples.ChurchofJesusChrist.org.

27.2

Menin Letok Kwojarjar Eo

Naan eo menin letok kwojarjar ej meļeļein “juon menin letok.” Menin letok kwojarjar eo ilo tampeļ ej lukkuun juon menin letok jān Anij ilo An kōjeraam̧m̧an ajri ro Nejin. Jet iaan menin letok ko me membōr ro ej bōke ilo aer bōk menin letok kwojarjar eo ilo tampeļ ekoba:

• Jeļāļo̧kjeņ eo eļapļo̧k kōn jibadbad im katak ko an Irooj.

• Kajoor n̄an kōm̧m̧ane aolep men ko me Jemedwōj Ilan̄ ej kōņaan bwe ajri ro Nejin ren kōm̧m̧ane.

• Tōl eo ekwojarjar n̄e jerbal n̄an Irooj, baam̧le ko aer, im ro jet.

• Kōļapļo̧k kōjatdikdik, kaeņōm̧m̧an, im aeņōm̧m̧an.

Kūrm̧ool in kōjeraam̧m̧an kein rej pedped wōt ioon ad tiljek ilo gospel eo an Jisōs Kraist.

Menin letok kwojarjar eo ej itok im jej bōke ilo ruo m̧ōttan ko. Ilo m̧ōttan eo kein kajuon, juon armej ej bōk kain̄i ko m̧oktata ņae etan initiatory. Initiatory eo ekitbuuj jilu kain̄i ko: karreeo, ekkapit, im kanuknuk (lale Exodus 29:4–9). Ekoba kōjeraam̧m̧an ko rejeņoļo̧k me rej iookļo̧k jolet eo ekwojarjar an juon armej im ta ko me emaron̄ kōm̧m̧ani ak erom̧.

Ilo iien initiatory eo, membōr eo ej bujen n̄an kōņak tampeļ kaarmen eo. Kaarmen ko rej bōk jikin jem̧jera eo an juon armej ippān Anij im kallim̧ur ko n̄an pokake bujen ko me rekar kōm̧m̧ani ilo tampeļ. N̄e membōr ro rej tiljek n̄an bujen ko aer im kaņōk kaarmen ko rekkar ilo jejjetin ilo aolepān mour ko aer, ej barāinwōt jerbal āinwōt juon kein kōjparok. N̄an meļeļe ko reļļapļo̧k kōn kaņōk im kōjparok kaarmen ko, lale 38.5.5.

Ilo m̧ōttan eo kein karuo ilo menin letok kwojarjar eo, rej katakin kōn karōk in lo̧mo̧o̧r, ekoba Kōm̧anm̧an eo, Wōtļo̧k eo an Adam im Iv, Pinmuur eo an Jisōs Kraist, Bun̄ jān Tōmak eo, im Jepļaaktok eo. Membōr ro rej barāinwōt bōk kōmeļeļe ko kōn wāween n̄an jepļaaktok n̄an im̧aan mejān Irooj.

Ilo bōk menin letok kwojarjar eo, membōr ro rej karuwaineneik er n̄an kōm̧m̧ani bujen ko rekwojarjar āinwōt kein ilaļ:

• Mour kōn kien pokae im kajjieon̄ jon̄an ad maron̄ n̄an kōjparok kien ko an Jemedwōj Ilan̄.

• Pokake kien wūjlepļo̧k ak kaarmejet, eo me ej meļeļein wūjlepļo̧k n̄an rie jerbal eo an Irooj im ukweļo̧k kōn juon bōro erub im jetōb ettā.

• Pokake kien eo an gospel eo an Jisōs Kraist.

• Kōjparok kein erreo, eo ej meļeļe in bōjrak jān jemerā ko an m̧ōm̧ aan kanniōk itulikin m̧are eo kōmālim ikōtaan juon em̧m̧aan im juon kōrā, eo ej ekkar n̄an kien an Anij.

• Kōjparok kien wūjlepļo̧k, eo ej meļeļe bwe membōr ro rej ajeļo̧k iien ko aer, taļōn ko, im aolep men otemjeļo̧k me Irooj ekar kōjeraam̧m̧an er n̄an kalōk Kabun̄ eo an Jisōs Kraist ioon laļ in.

Ilo kōro̧o̧ltok, Jemedwōj Ilan̄ ej kallim̧ur bwe ro rej pād wōt ilo tiljek n̄an bujen tampeļ ko aer renaaj bōk menin letok kwojarjar “kōn kajoor jān ijo eutiej”(Katak im Bujen Ko 38:32, 38; bar lale Luk 24:49; Katak im Bujen Ko 43:16).

27.2.1

Wōn ro Remaron̄ Bōk Menin Letok Kwojarjar Eo

Aolep membōr ro rerūtto an Kabun̄ in me rej bōk eddo rej ruwainene n̄an kōppopo n̄an im bōk bōk menin letok kwojarjar eo aer make. Aolep kain̄i ko me remenin aikuj bwe ren kōm̧m̧an m̧okta rej aikuj kōm̧m̧an im rekoot m̧okta jān an membōr ro maron̄ bōk menin letok kwojarjar eo (lale 26.3.1).

27.2.1.1

Membōr Kāāl ro im Rejkab Peptaij

Membōr ro rekāāl me rej mour erreo remaron̄ bōk menin letok kwojarjar eo diktata juon iiō jān iien eo kar kapene.

27.2.1.2

Membōr ro me Ro Pāleer Rejjan̄in Bōk Menin Letok Kwojarjar

Juon membōr eo ej mour erreo eo me eo pāleen ejjan̄in bōk menin letok kwojarjar emaron̄ bōk menin letok kwojarjar eo an make n̄e jekjek kein rej elaajrak rej iooni:

• Eo pāleen me ejjan̄in bōk menin letok kwojarjar eo ej leļo̧k n̄an e mālim.

• Membōr eo, bisop eo, im stake būreejtōn eo rej lōke bwe eddo eo ej itok ippān bujen ko ilo tampeļ reban juon menin katarpok m̧are eo aer.

Jekjek kein rekkar wōt n̄e eo pālele ej juon membōr in Kabun̄ in ak ejjab.

27.2.1.3

Membōr ro me Ewōr Utam̧we ko ilo Kōļmenļo̧kjen

Membōr ro im ewōr utam̧we ko ilo kōļmenļo̧kjeņ remaron̄ bōk menin letok kwojarjar eo aer make eļan̄n̄e:

• Em̧ōj aer bōk aolep kain̄i ko m̧okta ko remenin aikuj (lale 26.3.1).

• Ewōr aer maron̄ ilo kōļmenļo̧kjeņ n̄an meļeļe, kōm̧m̧an, im kōjparok bujen ko remenin aikuj.

Bisop eo ej kapilōk membōr im, n̄e emaron̄, ro jinen im jemān. Ej barāinwōt kappukot tōl an Jetōb. Bisop ro rej bōk kapilōk ippān stake būreejtōn eo.

27.2.2

Kāālet N̄aat eo n̄an Bōk Menin Letok Kwojarjar Eo

Kāālet eo n̄an bōk menin letok kwojarjar eo ej an juon make im ej kōm̧m̧an ilo lukkun an armej eo jar kake. Menin letok kwojarjar eo ej jon kōjeraam̧m̧an kōn kajoor im revelesōn n̄an aolep ro rej kōppopo n̄an bōke. Membōr ro remaron̄ kāālet n̄an bōk menin letok kwojarjar eo aer make n̄e rej pād ilo jekjek kein rej elaajrak:

• Er rej 18 iiō dettaer.

• Em̧ōj aer kar kadedeļo̧k ak rejjab pād ilo high school, college, ak GED.

• Juon iiō likio in jān iien eo kar kapene er.

• Rej en̄jake juon ikdeleel n̄an bōk im kautiej bujen ko ilo tampeļ rekwojarjar ilo aolep mour ko aer.

Membōr ro me em̧ōj kūr er n̄an juon mijen ak rej kōppopo n̄an liāp ilo tampeļ rej aikuj bōk menin letok kwojarjar.

Mokta jān kōm̧m̧an juon mālim n̄an deļo̧n̄e tampeļ an juon membōr n̄an bōk menin letok kwojarjar eo, bisop eo im stake būreejtōn rej aikuj en̄jake bwe armej eo ej kōppopo n̄an meļeļe im kōjparok bujen ko ilo tampeļ me rekwojarjar. Kōmaron̄ in ej ļōme kajjojo n̄an kajjojo armej.

27.2.3

Karōk im Jikejuuļi Iien Bōk Menin Letok Kwojarjar Eo

27.2.3.1

Bōk juon Mālim n̄an Kain̄i ko an ro Remour

Juon membōr ej aikuj bōk juon mālim n̄an kain̄i ko an ro remour n̄an deļon̄e juon tampeļ im bōk menin letok kwojarjar eo. N̄an meļeļe ko reļļapļo̧k kōn mālim kein, lale 26.5.1.

27.2.3.2

Kūrļo̧k ak kepaakeļo̧k Tampeļ eo

Membōr ro rej karōk n̄an bōk menin letok kwojarjar eo rej aikuj kepaakeļo̧k tampeļ eo m̧okta n̄an jikejuuļi kain̄i eo.

27.2.3.3

Rikajineet ro n̄an Membōr ro rej Bōk Menin Letok Kwojarjar eo

Membōr ro rej bōk menin letok kwojarjar eo aer make remaron̄ karuwaineneik juon membōr em̧ōj an bōk menin letok kwojarjar eo ak en leddik n̄e leddik men en ej bōk menin letok kwojarjar eo ak n̄e ļaddik en bar ļaddik n̄an jerbal āinwōt juon rikajineet im jipan̄ er ilo m̧wen̄an in bōk menin letok kwojarjar. Rikajineet eo ej aikuj wōr juon an peba in mālim ekāāl n̄an deļon̄e tampeļ. Tampeļ emaron̄ letok juon rikajineet eļan̄n̄e emenin aikuj.

27.3

Liāp eo an Ļeo im Lio Pālele

Juon liāp an tampeļ ej kobaik ļeo im lio pālelel ippān doon n̄an iien im aolep indeeo. Renaaj bōk kōjeraam̧m̧an kein eļan̄n̄e rej tiljek n̄an bujen ko raar kōm̧m̧ani ilo tampeļ eo. Kōn kain̄i in, ajri ro nejier remaron̄ barāinwōt m̧ōttan baam̧le eo aer indeeo.

Ritōl ro an Kabun̄ in rej rōjan̄ membōr ro n̄an kōppopo n̄an m̧are im liāp ilo juon tampeļ. Ijoko m̧are ko an tampeļ jab maron̄ kūli jān kien eo, ritōl ro remaron̄ kōm̧m̧an m̧are ko ilo kien m̧okta im ālkin wōt ej kōm̧m̧an liāp ko ilo tampeļ (lale 38.3). Jon̄ak in emaron̄ bar kōm̧m̧an n̄e ro jineer im jemeer ak lukkuun baam̧le ko aer repaak tata rej en̄jake aer jab ruwainene ak m̧ōttan ļo̧k m̧are ko ilo tampeļ.

27.3.1

Wōn Ro Remaron̄ Liāp ilo juon Tampeļ

Aolep membōr ro an Kabun̄ in me ribōk eddo ro rejjan̄in membōr rej ruwainene n̄an kōppopo n̄an juon liāp an tampeļ. Ro rekar m̧are ilo kien rej rōjan̄ er n̄an liāp n̄an iien im n̄an mour indeeo ilo tampeļ ilo iien eo rej pojak. Membōr ro rej aikuj bōk menin letok kwojarjar m̧okta jān aer maron̄n liāp (lale 27.2).

Ripālele ro rekar liāp ilo tampeļ eo rej aikuj in (1) kar m̧are ilo kien m̧okta jān aer liāp ak (2) kar m̧are im liāp ilo ejja iien kōm̧are eo ilo tampeļ eo. Lale 27.3.2

27.3.1.2

Būratōr ro im Ewōr M̧ōjno in Kōļmenļo̧kijen ko ippāer

Membōr ro me ewōr utam̧we ko ilo kōļmenļo̧kjen ko remaron̄ liāp n̄an ro pālāer, ro jeraer eļan̄n̄e:

• Rej kōm̧m̧ani ak bōk aolep kain̄i ko remenin aikuj m̧okta, ekoba menin letok kwojarjar eo (lale 27.2.1.3).

• Ewōr aer maron̄ ilo kōļmenļo̧kjeņ n̄an meļeļe, kōm̧m̧an, im kōjparok bujen ko remenin aikuj.

Bisop eo ej kapilōk membōr eo im eo pāleen, ak eo jeran. Ej jerbal ium̧win karōk eo an bisoprik eo. Bisop ro rej bōk kapilōk ippān stake būreejtōn eo.

27.3.2

Karōk im Jikejuuļ n̄an juon Mare im Liāp ilo Tampeļ

27.3.2.1

Bōk juon Peba in Mālim N̄an Deļo̧n̄e Tampeļ eo n̄an Kain̄i ko an ro Remour

Juon membōr ej aikuj bōk juon mālim n̄an kain̄i ko an ro remour n̄an liāp ippān eo pālele. N̄an meļeļe kōn mālim kein, lale 26.3.

27.3.2.2

Kūrļo̧k ak kepaakeļo̧k Tampeļ eo

Membōr ro rej karōk n̄an m̧are ak liāp n̄an eo pālele ej aikuj kepaak tampeļ eo m̧okta n̄an jikejuuļi kain̄i eo.

27.3.2.3

Bōk juon License in Mare

Mokta jān m̧are, ripālele ro rej aikuj kōm̧m̧ane juon m̧are eo emālim ilo kien ijo mare eo enaaj kōm̧m̧an. Eļan̄n̄e ripālele ro rej karōk n̄an jim̧or m̧are im liāp ilo iien kōm̧m̧ane ejja kōjeraam̧m̧an eo, rej aikuj bōktok juon aer license in m̧are ekāāl n̄an tampeļ eo.

Ripālele ro rej liāp ālkin juon m̧are ilo kien rejjab aikuj boktok juon license in m̧are n̄an tampeļ eo. Ijjeļo̧kin, rej letok raan eo im n̄āāt eo rekar kōm̧m̧an m̧are eo aer ilo kien āinwōt m̧ōttan ļo̧k rekoot in kam̧ool ko.

27.3.2.4

Rikajineet ro an Lio Ej Mare im Ļeo ej Mare

Juon sister eo em̧ōj an bōk menin letok kwojarjar emaron̄ jipan̄ lio ej m̧are n̄an jipan̄ e ilo ruum in jikin jānij nuknuk. Juon brother eo em̧ōj an bōk menin letok kwojarjar emaron̄ kōm̧m̧an ejja menin wōt n̄an ļeo ej m̧are. Rikajineet eo ej aikuj wōr juon an peba in mālim ekāāl n̄an deļon̄e tampeļ. Tampeļ emaron̄ letok juon rikajineet eļan̄n̄e emenin aikuj.

27.3.2.5

Wōn Eo Ej kōm̧m̧ane M̧are eo Ilo tampeļ ak Liāp eo

Juon m̧are ak liāp ilo tampeļ ekkā an kōm̧m̧an jān ri liāp eo eo em̧ōj jitōn̄ n̄an tampeļ eo ijo ripālele ro renaaj m̧are ak liāp ie. Eļan̄n̄e juon uwaan baam̧le eo ak m̧ōttam̧ ej kabwijer mālim in liāp eo im kar kappeik n̄an tampeļ eo ijo ripālele eo enaaj m̧are ie ak liāp, remaron̄ kajjitōk ippān n̄an kōm̧m̧ane m̧are eo ak liāp eo.

27.3.2.6

Nuknuk ko Rekkar n̄an Mare ak Liāp ilo Tampeļ

Nuknuk an Lio ej Mare. Aolep nuknuk in m̧are ko an kōrā me naaj kōņaki ilowaan tampeļ eo ej aikuj in mouj, mejo̧kunkun ilo aer kōm̧m̧ane im ed eo, im ejjeļo̧k kainōknōk ko ie. Ej barāinwōt aikuj pinej kaarmen in tampeļ ko. Ed ko remeni ej aikuj wōr m̧ōttan ko kiji ium̧wier.

N̄an kajjejet n̄an nuknuk ko jet me rej kaņōki ilo tampeļ, nuknuk an lio ej m̧are ej aikuj aitok pein ak kaduļo̧k jidik pein. Nuknuk eo an kōrā eo ejjab aikuj in wōr mōttan ko rej ellaak ippān nuknuk ak wutikļo̧k ilo iien jar in m̧are eo ilo tampel.

Tampeļ eo emaron̄ leļo̧k juon nuknuk n̄e emenin aikuj ak n̄e rekōņaan.

Nuknuk an Ļeo ej Mare. Ļeo ej m̧are ej kaņōk nuknuk in tampeļ eo ilo iien m̧are im liāp eo (lale 38.5.1 and 38.5.2).

Nuknuk an Rutiej ro. Ro rej pād ilo juon iien kam̧are ak liāp ilo tampeļ rej aikuj ekkaņōk nuknuk ko me rej kaņōki ilo iien kweilo̧k in kwojkwoj eo. Membōr ro im rej itok n̄an iien m̧are ko kaju jān juon m̧wen̄an in endowment maron̄ kōņak nuknuk in tampeļ ko rekar kōņaki m̧oktaļo̧k.

Ut ko. Ripālele ro im rutiej ro aer rejjab aikuj kaņōk ut ko ilo iien m̧are ak liāp eo.

27.3.2.7

Kōļaak Riin̄ ālikin juon M̧are an Tampeļ

Kōļaak riin̄ ejjab laajrak in m̧ōttan būrookraam̧ in m̧are eo ilo tampeļ. Ijoke, rim̧are ro remaron̄ jāniji riin̄ ko ālikin iien m̧are eo ilowaan ruum in liāp eo. Ripālele ro rejjab aikuj kōļaak riin̄ ilo jabdewōt iien ak jikin ilo juon tampeļ ak ilo melan ko an tampeļ.

Ripālele ro em̧ōj aer m̧are ak liāp ilo ejja iien in wōt emaron̄ kōļaaki riin̄ ko aer tokālik n̄an karōke n̄an ro uwaan baam̧le eo me rekar jab maron̄ pād ilo m̧are eo ilo tampeļ. Kōļāāk riin̄ ejjab aikuj ukot jabdewōt m̧ōttan ko ilo iien kōm̧are ak liāp ilo tampeļ. Ripālele ro rej jab aikuj ukot ak jānij kallim̧ur ko ālkin aer kar m̧are ak liāp ilo tampeļ.

Ripālele ro me rekar m̧are ilo kien m̧okta jān aer mare ilo tampeļ me rej liāp remaron̄ kōļaak riin̄ ilo iien m̧are eo aer ilo kien, ak juon iien m̧are kein.

27.3.4

Wōn Ro Remaron̄ Pād ilo juon Kōm̧are an Tampeļ

Ripālele ro rej aikuj karuwaineneik ro nukuier repaaktata im ro m̧ōttaer n̄an m̧are ak liāp ko aer ilo tampeļ. Membōr ro rej bōk eddo 8 iiō im rūttoļo̧k rej aikuj juon mālim n̄an liāp n̄an ro jineer im jemāer.

Stake būreejtōn eo emaron̄ kōmālim juon armej eo ekar jab peptaij ak bōk menin letok kwojarjar n̄an ro rej wutam̧we ilo kōļmenļo̧kjeņ n̄an pād ilo liāp an ro jeier ak jatier ro remour. Armej eo ej aikuj:

• Diktata rej aikuj 18 iiō dettaer.

• Maron̄ kōjparok ao̧o̧ eo ilo iien kōjeraam̧m̧an ak jar eo.

Stake būreejtōn eo ej je juon leta kwaļo̧k bwe armej eo emālim n̄an lale liāp eo. Leta in ej waļo̧k ilo tampeļ.

27.4

Liāpe Ajri ro Nejier Remour ippān Ro Jineer im Jemāer

Ajri ro raar ļotak ālikin an jiner liāp ippān juon em̧m̧aan ilo tampel rej barāinwōt ļotak ilo bujen ko an liāp eo. Rejjab aikūj in ekkapit in liāp ñan ippān jinen im jemen.

Ajri ro im raar jab ļotak ilo bujen eo remaron̄ m̧ōttan ļo̧k juon baam̧le indeeo ilo aer liāp n̄an m̧ool in jineer im jemāer ak ro rekar kōkaajririiki er. Ajri rein me rekkar n̄an ejja kōjeram̧m̧an kein āinwōt ro rekar ļotak ilo bujen eo.

27.4.2

Kūrļo̧k ak kepaakeļo̧k Tampeļ eo

Juon ripālele eo ekōņaan liāp ippān ajri ro nejier, ak ajri ro rej ikdeleel n̄an liāp n̄an ro jineer im jemeer me em̧ōj aer mej, rej aikuj kepaake tampeļ eo m̧okta n̄an jikejuuļi kain̄i eo.