tembirekorã ha menarã

27.

Templo Ordenansakuéra Oikovévare

27.0

Ñepyrũmby

Templo ha’e Ñandejára róga. Ohechauka ñandéve ñande Salvador, Jesucristo-pe. Témplope japartisipa umi ordenánsa sagrádope ha jajapo konveniokuéra Túva Yvagagua ndive ñanembojoajúva Hendive ha ñande Salvador ndive. Ko’ã konvénio ha ordenánsa ñanembosako’i jahajey hag̃ua ñande Ru Yvagagua rendápe ha jajesella hag̃ua oñondive familia-icha tapiaite g̃uarã.

Templo konvénio ha ordenansakuérape, “ojehechauka divinida pokatu” (Doctrina ha Konveniokuéra 84:20).

Templo konvénio ha ordenansakuéra isagrádo. Noñeñe’ẽiva’erã umi símbolo ohóva templo konveniokuéra rehe okápe templo-gui. Upéicha avei nañañe’ẽiva’erã umi marandu marangatúgui ñaprometeva’ekue templo-pe ndajaikuaaukamo’ãiha. Upevére, ñañe’ẽkuaa umi templo konvénio ha ordenansakuéra propósito ha doctrina básico rehe ha umi temiandu espiritual jarekóva templo-pe.

Barrio ha estakagua liderkuéra oñe’ẽ marandúgui oĩva ko capítulo-pe miembro-kuéra oñembosako’íva hína ndive orresivi hag̃ua investidura térã sellamiento ordenansakuéra.

27.1

Ojerresivívo Templo Ordenansakuéra

27.1.1

Oñeñembosako’ívo Ojerresivi hag̃ua Templo Ordenansakuéra

Miembro-kuéra oñembosako’iva’erã ijupe espiritualmente orresivi hag̃ua templo ordenansakuéra ha ojapo ha oñongatu hag̃ua templo konveniokuéra.

Tuvakuéra oreko rresponsabilida peteĩha oipytyvõ hag̃ua ita’yrakuérape oñembosako’ívo orresivi hag̃ua templo ordenansakuéra. Estáka ha barrio-gua liderkuéra, hermano ha hermana-kuéra ministrante, familia guasu miembro-kuéra ombojepytaso tuvakuérape upe funsiõme.

Umi rrekúrso oñeipytyvõ hag̃ua miembro-kuérape orresivi hag̃ua templo ordenansakuéra oĩ disponible … pe temples.ChurchofJesusChrist.org.

Umi miembro oñembosako’íva hína orresivi hag̃ua iñinvestidúra tee térã ojesella hag̃ua peteĩ ména/tembireko ndive oñemokyre’ỹ oparisipa hag̃ua curso de preparación para el templo-pe (tojehecha 25.2.8).

27.1.3

Miembro-kuéra Orekóva Diskapasida Físico

Umi miembro rekomarangatu orekóva diskapasida físico orresivikuaa opaite templo ordenansakuéra. Ko’ã miembro-pe oñemokyre’ỹ oho hag̃ua templo-pe umi hogaygua térã angirũnguéra oñeinvestíva isexoichagua ndive ikatúva oipytyvõ chupekuéra. Umi miembro ndaikatúirõ oasisti ifamiliagua miembro-kuéra térã angirũ ndive, ohenoiva’ẽrã templo-pe ohecha hag̃ua mba’e arreglo-pa ikatu ojejapo.

27.1.4

Umi Ñembohasa térã Interpretasiõ Servicio

Miembro-kuéra oikotevẽrõ ñembohasa térã interpretasiõ servicio, ha’ekuéra oñe’ẽraẽva’erã templo ndive ohecha hag̃ua orekópa umíva disponible.

27.1.5

Ao Oñemondeva’erã Templo-pe Ojeho hag̃ua

Ojeho vove templo-pe, miembro-kuéra omondeva’erã umi ao omondéva oho hag̃uáicha reunión sacramental-pe.

Ojehupytyve hag̃ua marandu ao oñemondeva’erã templo-pe ñemenda térã jesellarã rehegua tojehecha 27.3.2.6-pe.

Tojehecha 38.5 ojehupytyve hag̃ua marandu ko’ã rehegua:

• Ao oñemondeva’erã investidura ha sellamiento ordenansakuérape g̃uarã.

• Mba’éicha ojehupyty, oñemonde ha oñeñangareko templo ao ha umi gárment-re.

27.1.6

Mitãnguérare Ñeñangareko

Mitãnguéra oĩva’erã kakuaáva supervisiõ guýpe oĩrõ templo korapýpe. Templo obrero-kuéra oĩ disponible osupervisa hag̃ua mitãnguérape ko’ã situasiõ añómente:

• Ha’ekuéra ojesellárõ hína ituvakuéra ndive

• Ha’ekuéra omañátarõ hína iñermano/a, hermanastro/a térã medio-hermano/a sellamiento ituvakuéra ndive.

27.1.7

Ñembyaty Miembro-kuéra ndive Ha’ekuéra Orresivi Rire Templo Ordenansakuéra

Miembro-kuéra py’ỹi oreko umi porandu orresivi rire templo ordenansakuéra. Hogayguakuéra oñeinvestímava, obispo, ambue barrio-gua liderkuéra ha hermano ha hermana-kuéra ministrante ikatu oñembyaty umi miembro ndive oñe’ẽ hag̃ua ohasava’ekue templo-pe rehe.

Umi rrekúrso oñeipytyvõ hag̃ua oñembohováivo umi porandu oĩ disponible … pe temples.ChurchofJesusChrist.org.

27.2

Pe Investidura

Pe ñe’ẽ investidura he’ise “peteĩ don“. Pe templo-gua investidura ha’evoi peteĩ Tupã don ohovasáva rupi Ita’yrakuérape. Umi don apytépe miembro-kuéra ohupytýva templo-gua investidura rupive oĩ ko’ãva:

• Jeikuaa porãve Ñandejára propósito ha mbo’epykuéra.

• Pu’aka ojapo hag̃ua opa mba’e Túva Yvagagua oipotáva Ita’yrakuéra ojapo.

• Sãmbyhy divíno oservívo Ñandejára, ifamília ha tapichakuérape.

• Ñeha’arõkuaa tuichave, moangapyhy ha py’aguapy.

Ko’ã jehovasa jehupyty odepende jeroviarekógui Jesucristo evanhéliore.

Pe investidura ojehupyty mokõi pehẽme. Peteĩha pehẽme, peteĩ tapicha orresivi peteĩ ordenánsa ñepyrũrã hérava iniciatoria. Pe iniciatoria ojeikuaa avei jejohéi ha ñeunhíramo (tojehecha Exodo 29:4–9). Oike ipype jehovasakuéra hechapyrãva ohóva pe tapicha erénsia ha potencial divíno rehe.

Pe iniciatoria aja, ojeautorisa upe miembro-pe omonde hag̃ua templo-gua gárment. Pe gárment omoha’anga ijoaju personal Tupã ndive ha pe kompromíso oñeñe’ẽrendutaha konveniokuérare ojejapóva templo-pe. Miembro-kuéra ijeroviarekórõ ikonveniokuérare ha omonde hekopete pe gárment hekovekuéra pukukue aja, ha’e avei peteĩ mo’ãha. Ojehupytyve hag̃ua marandu gárment ñemonde ha ñeñangareko rehegua tojehecha 38.5.5.

Investidura mokõiha pehẽme, oñembo’e pe salvasiõ plan, oikehápe pe Creación, Adán ha Eva Je’a, Jesucristo Expiasiõ, pe Apostasía ha pe Rrestaurasiõ. Miembro-kuéra avei orresivi tekombo’e mba’éicha ojeho jey Ñandejára rendápe.

Investidura-pe, miembro-kuéra oñeinvita ojapo hag̃ua konveniokuéra isagrádova ko’ãichagua:

• Obediencia léi jevivi ha ñeha’ã oñeñongatu hag̃ua Túva Yvagagua rembiapoukapykuéra.

• Sacrificio léire ñe’ẽrendu, he’iséva jesakrifika oñeipytyvõ hag̃ua Tupã rembiapo ha ñearrepenti korasõ mirĩ ha espíritu ñembyasy reheve.

• Jesucristo evanhélio léire ñe’ẽrendu, ha’éva pe léi ijyvatevéva Ha’e ombo’eva’ekue oĩ aja yvy ári.

• Kastida léi ñeñongatu, he’iséva peteĩ miembro orekova’erã joaju sexual pe tapicha legítima ha legalmente omendáva ndive añónte Tupã léipe he’iháicha.

• Konsagrasiõ léi ñeñongatu, he’iséva miembro-kuéra odedikaha itiémpo, italénto ha opa mba’e Ñandejára ohovasáva reheve chupekuéra oñemopu’ã hag̃ua Jesucristo Tupao ko yvy ári.

Hekovia, Túva Yvagagua opromete umi opytáva jeroviarekópe itémplo konveniokuérape oñeinvestíta “yvategua pu’aka reheve” (Doctrina ha Konveniokuéra 38:32, 38; tojehecha avei Lucas 24:49; Doctrina ha Konveniokuéra 43:16).

27.2.1

Mávapa Ikatu Orresivi pe Investidura

Opavave Tupaogua miembro kakuaa rresponsáblevape oñeinvita oñembosako’i ha orresivi hag̃ua iñinvestidúra tee. Orresivi mboyve pe investidura miembro-kuéra ojapo ha orrehistrava’erã opa umi ordenánsa upemboyve oñeikotevẽva (tojehecha 26.3.1).

27.2.1.1

Miembro-kuéra Ojebautisa Ramóva

Umi miembro pyahu kakuaa hekomarangatúva orresivikuaa iñinvestidúra ohasapa porã rire peteĩ ary jepe ikonfirmasiõ rire.

27.2.1.2

Miembro-kuéra Orekóva Ména térã Tembireko Noñeivestíriva

Peteĩ miembro hekomarangatúva iména/hembireko noñeinvestíriva ikatu orresivi iñinvestidúra oñeme’ẽrõ ko’ã situasiõ:

• Pe ména/tembireko noñeivestíriva ome’ẽrõ ikonsentimiento.

• Pe miembro, obispo ha estakagua presidente ojeroviárõ pe rresponsabilida ojejagarráva templo konveniokuéra reheve nombyaimo’ãiha pe ñemenda.

Umi situasiõ oje’aplika pe ména/tembireko ha’érõ Tupaogua miembro térã nahániri.

27.2.1.3

Miembro-kuéra Orekóva Diskapasida Intelectual

Miembro-kuéra orekóva diskapasida intelectual orresivikuaa iñinvestidura oikórõ ko’ã mba’e:

• Ha’ekuéra orresivírõkuri opa umi ordenánsa upemboyvegua oñeikotevẽva (tojehecha 26.3.1).

• Ha’ekuéra orekórõ katupyry intelectual ontende, ojapo ha oñongatu hag̃ua umi konvénio ohóva investidura rehe.

Pe obispo oñemongeta upe miembro ndive, ha oñeikotevẽhápe, ituvakuéra ndive. Ha’e oheka avei Espíritu gía. Ha okonsultakuaa estakagua presidente ndive.

27.2.2

Ojedesidívo Araka’épa Ojerresiviva’erã pe Investidura

Desisiõ ojerresivi hag̃ua pe investidura oĩ peteĩteĩme ha ojejapova’erã ñembo’epópe. Pe investidúra ha’e peteĩ pu’aka ha rrevelasiõ jehovasa opavave oñembosako’ívape orresivi hag̃ua upéva. Miembro-kuéra ikatu oiporavo orresivi iñinvestidúra tee okumpli vove ko’ã kondisiõ:

• Orekórõ 18 áño jepe.

• Ojapopa vove térã ndohovéimarõ escuela secundaria-pe, térã ojojáva upévape.

• Ohasapávo peteĩ ary ikonfirmasiõ rire.

• Oñandúrõ orresiviseha ha omomba’eguasutaha templo-gua konveniokuéra sagrádo opa hekove pukukue aja.

Miembro-kuéra orresivíva peteĩ llamamiento misional térã oñembosako’íva hína ojesella hag̃ua templo-pe orresiviva’erã pe investidura.

Ome’ẽ mboyve peteĩ templo recomendación peteĩ miembro-pe orresivi hag̃ua pe investidura, obispo ha estakagua presidente oñanduva’erã pe tapicha oĩporãha ontende ha oñangatu hag̃ua umi templo-gua konvénio sagrádo. Upe ñeime porã oñedetermina individualmente peteĩteĩ tapichápe g̃uarã.

27.2.3

Oñeplaneávo ha Oñeprogramávo pe Cita Investidurarã

27.2.3.1

Ojerresivívo peteĩ Recomendación umi Ordenansarã Oikovévare

Peteĩ miembro orresiviva’erã peteĩ recomendación ordenansarã oikovévare oike hag̃ua templo-pe ha orresivi pe investidura. Ojehupytyve hag̃ua marandu ko’ã recomendación-rã, tojehecha 26.5.1.

27.2.3.2

Oñekontactávo Templo ndive

Miembro-kuéra oplaneáva hína orresivi investidura oñemotenondeva’erã okontactávo templo ndive oñeprograma hag̃ua pe ordenánsa.

27.2.3.3

Umi Omoirũva Miembro-kuérape Orresivítava Investidura

Miembro-kuéra orresivítava iñinvestidúra tee ikatu oinvita peteĩ miembro isexoguáva oñeivestímava omoirũ ha oipytyvõ hag̃ua chupekuéra investidura sesiõ aja. Peteĩ omoirũva orekova’erã peteĩ templo recomendación vihénte. Oñeikotevẽrõ templo omoĩkuaa peteĩ moirũha.

27.3

Ména ha Tembireko Jesella

Peteĩ templo sellamiento ombojoaju oñondive peteĩ ména ha tembirekópe tiempo ha apyra’ỹre. Ha’ekuéra ohupytýta ko’ã jehovasa ijeroviarekóramo umi konvéniore ojapóva templo-pe. Ko’ã ordenánsa rupive, ita’yrakuéra ha’ekuaa avei ifamília ijapyra’ỹva pehẽ.

Tupaogua liderkuéra omokyre’ỹ miembro-kuérape oñembosako’i hag̃ua omenda ha ojesella hag̃ua templo-pe. Umi tenda templo ñemenda noñerrekonoseihápe legalmente, Tupaogua liderkuéra oĩva autorisádo térã ambue tapicha orekóva autorida ojapokuaa ñemenda civil osegívape peteĩ templo sellamiento (tojehecha 38.3). Ikatu avei ojejapo upeichaite pe templo-pe ñemenda oñandukátarõ tuvakuéra térã umi familia ag̃uíme oñemboykeha chupekuéra ndaikatúigui opartisipa hikuái pe templo ceremonia-pe.

27.3.1

Mávapa Ikatu Ojesella Templo-pe

Oñeinvita opavave miembro-kuéra omenda’ỹvape ha’éva responsable oñembosako’i hag̃ua ojesella hag̃ua templo-pe. Umi omendávape civilmente oñemokyre’ỹ ojesella hag̃ua tiempo ha apyra’ỹre templo-pe. Miembro-kuéra oñeinvestiva’erã ikatu mboyve ojesella (tojehecha 27.2).

Umi paréha ojeselláva templo-pe (1) omendava’erã civilmente ojesella mboyve térã (2) omenda ha ojesellava’erã pe templo ceremonia-itépe. Tojehecha 27.3.2.

27.3.1.2

Miembro-kuéra Orekóva Diskapasida Intelectual

Miembro-kuéra orekóva diskapasida intelectual ikatu ojesella iména/hembireko, iprometído térã iprometída ndive:

• Orresivíramokuri hikuái opa umi ordenánsa upemboyve oñeikotevẽva, oikehápe investidura (tojehecha 27.2.1.3).

• Orekórõ hikuái katupyry intelectual ontende, ojapo ha oñongatu hag̃ua umi konvénio ohóva hendive.

Obispo oñemongeta pe miembro ha iména/hembireko, iprometído térã iprometída ndive. Avei ha’e oheka Espíritu gía. Ha oñemongetakuaa estakagua presidente ndive.

27.3.2

Oñeplaneávo ha Oñeprogramávo peteĩ Templo-pe Ñemenda térã Sellamiento

27.3.2.1

Ojerresivívo peteĩ Recomendación Ordenansarã Oikovévare

Peteĩ miembro orresiviva’erã peteĩ recomendación ordenansarã oikovévare ojesella hag̃ua iména/hembireko ndive. Ojehupytyve hag̃ua marandu ko’ã recomendación rehegua, tojehecha 26.3.

27.3.2.2

Oñekontactávo Templo ndive

Miembro-kuéra oplaneáva hína omenda térã ojesella iména/hembireko ndive oñemotenondeva’erã okontactávo templo ndive oñeprograma hag̃ua pe ordenánsa.

27.3.2.3

Ojehupytývo peteĩ Licencia Ñemendarã

Omenda mboyve, peteĩ paréha ohupytyva’erã peteĩ licencia legal ñemendarã ovaléva tenda ojejapotahápe pe ñemenda. Pe paréha oplaneávo omenda ha ojesella pe ceremonia-itépe, ha’ekuéra ogueruva’erã templo-pe peteĩ licencia ñemendarã ovaléva.

Umi paréha ojesellátava ñemenda civil rire noikotevẽi ogueru templo-pe upe licencia ñemendarã. Upéva rangue, ha’ekuéra ome’ẽ pe fecha ha moõpa oiko iñemenda civil pe verificación proceso parte-ramo.

27.3.2.4

Umi Omoirũva Tembirekorã ha Menarãme

Peteĩ hermana oñeinvestíva ikatu omoirũ pe novia-pe oipytyvõ hag̃ua chupe novia kotýpe. Peteĩ hermano oñeinvestíva ikatu ojapo upevaite avei novio-pe g̃uarã. Peteĩ omoirũva orekova’erã peteĩ templo recomendación vihénte. Oñeikotevẽrõ templo omoĩkuaa peteĩ moirũha.

27.3.2.5

Mávapa Ojapo peteĩ Templo Ñemenda térã Sellamiento

Peteĩ templo ñemenda térã sellamiento ojejapo jepi peteĩ sellador rupi oñeasignáva templo-pe upe paréha omendáta térã ojesellatahápe. Peteĩ pe paréha familiagua térã oikuaáva chupekuéra orekórõ autorida osella hag̃ua ha oĩ asignado upe templo pe paréha omenda térã ojesellatahápe, ha’ekuéra oinvitakuaa chupe ojapo hag̃ua pe ñemenda térã sellamiento.

27.3.2.6

Ao Oĩporãva Templo Ñemenda térã Sellamientorã

Novia Ao. Peteĩ ao novia omondétava templo-pe morotĩva’erã, imodestova’erã idiséño ha ipyahapýpe, ha ndorekoiva’erã jeguaka ijeguaitereíva. Avei omo’ãva’erã pe templo-gua gárment. Umi pyahapy hesakãva ojeforrava’erã.

Ohoporã hag̃ua umi ambue ao oñemondévare templo-pe, pe novia ao imanga pukuva’erã térã imanga trescuartova’erã. Umi ao ndahuguairiva’erã ikatu’ỹrõ ojejoko peteĩ prendedor reheve térã ojeipe’a pe sellamiento ceremonia-rã.

Oñeikotevẽrõ térã ojeipotárõ templo ikatu ome’ẽ peteĩ ao.

Novio Ao. Pe novio omonde templo ao jepiguáva pe ñemenda térã sellamiento ceremonia aja (tojehecha 38.5.1 ha 38.5.2).

Invitado-kuéra Ao. Umi oasistíva peteĩ ñemenda térã sellamiento ceremonia-pe omondeva’erã ao ojoguáva umi aópe omondéva peteĩ reunión sacramental-rã. Miembro-kuéra oúva peteĩ sellamiento-pe peteĩ investidura sesiõgui ikatu omonde pe templo-gua ao ceremonial.

Yvotykuéra. Pe paréha ha iñinvitadokuéra ndoguerahaiva’erã yvotykuéra pe ñemenda térã sellamiento ceremonia aja.

27.3.2.7

Kuairũ Ñeinterkambia Templo Ñemenda térã Sellamiento Rire

Kuairũ ñeinterkambia ndaha’éi templo ñemenda térã sellamiento ceremonia parte. Upevére, parehakuéra ikatu ointerkambia kuairũ pe ceremonia rire pe sellamiento kotýpe. Umi paréha nointerkambiaiva’erã kuairũ ni peteĩ ambue ára ni tendápe peteĩ templo-pe ni templo korapýpe.

Parehakuéra omenda ha ojeselláva pe ceremonia-itépe ikatu ointerkambia kuairũ ára uperirevépe omoĩporã hag̃ua familiaguakuérape ndaikatúiva oasisti templo ñemendápe. Pe interkambio nombojojaiva’erã ni peteĩ templo ñemenda térã sellamiento ceremonia pehẽngue. Pe paréha nointerkambiaiva’erã umi vóto omenda térã ojesella rire templo-pe.

Parehakuéra omendáva civilmente itémplo sellamiento mboyve ikatu ointerkambia kuairũ iceremonia civil-pe, isellamiento templo-pe, térã mokõive ceremonia-pe.

27.3.4

Máva Ikatu Oasisti peteĩ Templo Ñemenda térã Sellamiento-pe

Parehakuéra oinvitava’erã ifamiliagua miembro ha angirũnguéra hi’ag̃uíva añónte peteĩ templo ñemenda térã sellamiento-pe. Miembro-kuéra rresponsable oĩva’erã investido ha orekova’erã peteĩ templo recomendación vihénte oasisti hag̃ua.

Estakagua presidente ikatu oautorisa peteĩ tapicha ndojebautisáiva térã noñeinvestíriva orekógui diskapasida intelectual omaña hag̃ua pe iñermanokuéra oikovéva templo ñemenda térã sellamiento. Pe tapicha:

• Orekova’erã 18 áño jepe.

• Ikatuva’erã oĩ rreverénte pe ceremonia aja.

Estakagua presidente ohai peteĩ kuatia he’ihápe pe tapicha oĩha autorisádo omaña hag̃ua pe sellamiento rehe. Ko kuatiajehaipyre oñepresenta templo-pe.

27.4

Ojesellávo Mitãnguéra Oikovéva Tuvakuéra ndive

Mitãnguéra onaséva isy ojesella rire peteĩ ménare templo-pe onase pe sellamiento kovéniope. Ha’ekuéra natekotevẽi orresivi pe ordenánsa jesella tuvakuérare.

Mitãnguéra nonaséiva konvéniope ikatu ha’e peteĩ familia ijapyra’ỹva pehẽ ojesellávo ituvakuéra de nacimiento térã adoptívova ndive. Ko’ã mitãnguéra oreko avei derécho umi jehovasaitépe umi onasévaicha konvéniope.

27.4.2

Oñekontactávo Templo ndive

Peteĩ paréha oipotáva ita’yrakuéra tojesella hendivekuéra, térã mitãnguéra ojesellaséva ituvakuéra omanova’ekue ndive, oñemotenondeva’erã okontactávo templo ndive oñeprograma hag̃ua pe ordenánsa.