mama mo gel long wan sakramen miting

29.

Ol Miting Insaed long Jos

29.0

Fas Toktok

Ol Lata-dei Sent oli mit tugeta blong wosip, mekem olgeta oli kam antap moa, mo blong tijim mo lanem gospel (luk long Alma 6:6; Moronae 6:5–6). Sevya i bin promesem se: “From we long weaples we tu o tri man oli joen wanples long nem blong mi, mi mi stap wetem olgeta” (Matiu 18:20 Blong mit tugeta i wan wei we “hat blong [yumi] oli joen tugeta blong kam wan long lav” (Mosaea 18:21).

Be, blong stap holem wan miting i no mas tekem ples blong fasin blong givim seves mo givhan olsem we Jisas Kraes i bin mekem.

29.1

Stap Mekem Plan mo Lidim Ol Miting

Ol lida oli mekem plan mo oli lidim ol miting “olsem we Tabu Spirit i stap lidim olgeta, folem ol komanmen mo ol revelesen blong God” (Doktrin mo Ol Kavenan 20:45; luk tu long Moronae 6:9; Doktrin mo Ol Kavenan 46:2). Oli lukaotem ol wei blong stap invaetem paoa blong Spirit i kam insaed long ol miting blong olgeta.

Ol lida oli meksua se namba blong ol miting, mo hamas minit blong holem wan miting, oli no mas putum hevi trabol long ol memba o long famli blong olgeta.

29.2

Ol Miting blong Wod

29.2.1

Sakramen Miting

Ol Stamba Tingting

Tingbaot Jisas Kraes taem wan i tekem mo kakae sakramen. Ol nara stamba tingting we oli stap, i gat: blong stap wosip, stap bildimap fet mo testemoni, mo blong lidim bisnis long wod.

Olgeta we Oli Tekpat

Evriwan i gat invitesen ia blong kam.

Hamas Taem

Wanwan Sandei.

29.2.1.1

Stap Mekem Plan blong Sakramen Miting

Bisoprik i mekem ol plan mo i lidim ol miting ia. Oli meksua se stamba lukluk blong miting ia, i stap long sakramen mo bildimap fet long Jisas Kraes.

Sakramen miting, hem i blong wan aoa taem nomo. Insaed i save gat olgeta samting ia:

1. Fas miusik (luk long 19.3.2 blong kasem ol gaedlaen).

2. Griting mo welkam.

3. Luksave ol prisaeding atoriti o ol nara lida we oli visit, we oli stap long miting.

4. Ol Anaonsmen. Ol anaonsmen ia, oli no mas fulap.

5. Fas hym mo prea. Luk long 19.3.2 mo 29.6.

6. Wod mo stek bisnis, olsem we i stap ia:

   • Stap sastenem mo rilisim ol ofisa mo ol tija (luk long 30.3 mo 30.6).

   • Presentem ol nem blong ol brata we bae oli odenem olgeta long wan ofis long Aronik Prishud (luk long 18.10.3).

   • Luksave ol niu memba blong wod, wetem ol niu konvet.

7. Stap givim ol nem mo blesing long ol pikinini (luk long 18.6). Plante taem, oli mekem hemia long fas mo testemoni miting (luk long 29.2.2).

8. Konfemem ol niu konvet (luk long 18.8).

9. Sakramen hym mo blesem mo pasem sakramen. Sakramen i ol stamba lukluk blong miting. Odinens ia, hem i wan janis blong ol memba blong daerektem ol tingting blong olgeta i go long Sevya mo sakrifaes blong Hem from olgeta.

   Blong luk moa long saed blong stap rere, stap blesem mo stap pasem sakramen, luk long 18.9

10. Ol mesej blong gospel mo singsing blong kongregesen, mo ol nara miusik.

11. Las hym mo prea.

12. Las miusik.

29.2.1.4

Stap Jusum Ol Spika

Bisoprik nao i jusum ol spika blong toktok long sakramen miting. Plante taem, oli save invaetem ol memba blong wod, we i tekem tu ol yut.

Ol spika oli talem testemoni blong olgeta abaot Jisas Kraes mo oli tijim gospel blong Hem taem oli yusum ol skripja (luk long Doktrin mo Ol Kavenan 42:12; 52:9).

29.2.2

Fast mo Testemoni Miting

Stamba Tingting

Blong oli tekem mo kakae sakramen, mo blong oli mekem wanwan long olgeta oli kam strong moa taem oli testifae abaot Jisas Kraes mo Gospel blong Hem. Oli leftemap tingting blong ol memba, blong oli livim kakae mo go long miting ia, sapos oli save livim kakae.

Olgeta we Oli Tekpat

Evriwan i gat invitesen ia blong kam.

Hamas Taem

Wan taem long manis, sakramen miting ia, hem i wan fast mo testemoni miting. Plante taem, hem i hapen long fasfala Sandei blong manis.

Long wan fast mo testemoni miting, oli no givim wok long ol spika blong givim toktok, mo i no gat wan spesel miusik namba. Be, hem we i lidim miting, i talem wan sot testemoni. Afta long hemia, hem i invaetem ol memba blong kongregesen blong oli talem testemoni blong olgeta. Blong talem testemoni, hem i minim blong talemaot ol trutok blong gospel olsem we Tabu Spirit i givim insperesen long yu.

29.2.3

Wod Konfrens

Stamba Tingting

Long wod konfrens, ol lida blong stek oli givim instraksen, oli sapotem, mo oli givhan long ol lida mo ol memba blong wod. Ol memba blong wod oli sastenem ol jeneral mo ol lokol lida.

Olgeta we Oli Tekpat

Evriwan i gat invitesen ia blong kam.

Hamas Taem

Wan taem long wan yia, mo i hapen long wan Sandei we i no Sandei blong livim kakae.

29.2.4

Bisoprik Miting

Stamba Tingting

Blong kaonsel tugeta mo mekem ol desisen abaot ol mata blong wod.

Olgeta we Oli Tekpat

Bisoprik, wod klak, mo eksekutiv sekretari.

Hamas Taem

Plante taem, hem i evri wik.

Ol poen blong lukluk long ol, i save gat:

• Kodinetem wok blong fasin blong sevem man mo blong fasin blong kam olsem wan god, we i stap hapen insaed long wod.

• Stap mekem wanwan man, woman mo famli insaed long wod oli kam strong moa—speseli ol yut mo ol pikinini.

• Faenemaot ol memba we oli save rere blong kasem ol odinens, mo tu, ol prishud odinesen.

• Faenemaot nem blong ol memba blong singaotem blong holem ol posisen insaed long wod.

29.2.5

Wod Kaonsel Miting

Stamba Tingting

Helpem blong mekem wok blong God blong fasin blong sevem man mo fasin blong kam olsem wan god i hapen insaed long wod (luk long 1.2).

Olgeta we Oli Tekpat

• Bisoprik, klak blong wod, mo wod eksekutiv sekretari.

• Presiden blong kworom blong ol elda, hemia blong Rilif Sosaeti, hemia blong Ol Yang Woman, hemia blong Praemeri, mo hemia blong Sandei Skul.

Hamas Taem

Plante taem, hem i hapen wan taem long wan wik (be samtaem i no oltaem olsem).

Bisop i mekem plan blong holem, i prisaed, mo i lidim ol wod kaonsel miting. Kaonsel i no save tekem ol bigfala desisen sapos i no gat bisop.

Ol lida blong ol oganaesesen blong wod oli go long ol wod kaonsel miting anda long tufala hat ia:

1. Olsem ol memba blong wod kaonsel we oli help blong blesem evri memba blong wod.

2. Olsem ol ripresentativ blong oganaesesen blong olgeta.

Taem we oli mit tugeta, ol memba blong wod kaonsel oli toktok raon long ol poen we bae i blong gud blong wan kombaen wok blong ful kaonsel. Oli leftemap tingting blong wanwan memba blong kaonsel blong serem ol tingting blong olgeta, mo blong tekem insperesen blong olgeta long saed blong ol poen ia.

Ol wod kaonsel miting, oli no sapos blong stap ova long wan aoa. Oli stat wetem wan prea, mo ol sot ripot long saed blong ol wok we oli bin givimaot long las miting. Bisop i givim taem i go long ol poen we i rili nid blong toktok raon long olgeta blong blesem wanwan man, woman mo famli.

• Stap laef folem gospel blong Jisas Kraes. Stap helpem ol memba blong oli rere blong bildimap fet, kasem ol odinens blong tempol we i sevem man, mo blong oli kipim ol kavenan blong olgeta.

• Stap kea long olgeta we oli stap long nid. Stap serem ol risos mo ol skil blong blesem wanwan man, woman, famli mo komuniti. Stap helpem ol memba blong wod blong oli dipen long olgetawan. (Luk long japta 22.)

• Stap invaetem evriwan blong akseptem gospel. Stap luklukbak long progres blong olgeta we oli stap lanem abaot gospel, mo tu, ol memba we oli niu mo stap kambak long jos. Stap toktok raon long ol wei we ol memba oli save serem gospel wetem ol narawan. (Luk long japta 23.)

• Stap joenem ol famli blong taem we i no save finis. Luklukbak long progres blong ol memba we oli stap rere blong kasem ol odinens blong tempol. Stap mekem plan blong ol wei blong helpem moa memba blong stap klin inaf blong holem wan tempol rekomen. Blong toktok raon long ol wei we ol memba oli save tekpat long tempol famli histri wok. (Luk long japta 25.)

Ol memba blong kaonsel oli mas kipim konfidensiol eni praevet infomesen, o eni infomesen we i no blong serem (luk long 4.4.6

29.2.6

Wod Yut Kaonsel Miting

Stamba Tingting

Mekem ol yut insaed long wod oli kam strong moa. Helpem olgeta blong oli tekpat long wok ia blong fasin blong sevem man, mo fasin blong kam olsem wan god (luk long 1.2).

Olgeta we Oli Tekpat

• Bisoprik.

• Wan long ol asisten blong bisop insaed long kworom blong ol pris mo presiden blong kworom blong ol tija mo hemia blong kworom blong ol dikon.

• Ol presiden blong Ol Klas blong Ol Yang Woman (o ful klas presidensi sapos wod i gat wan Yang Woman klas nomo).

• Presiden blong Ol Yang Woman.

Hamas Taem

Plante taem i wan taem long manis.

Bifo long wanwan miting, bisop mo hem we i stap lidim miting, i luklukbak long ol poen blong toktok raon long olgeta.

• Wok ia blong fasin blong sevem man mo fasin blong oli kam olsem wan god.

• Ol nid blong ol yut insaed long wod mo ol wei blong lukluk long olgeta.

• Ol efot blong go faenem o lukaotem ol yut we oli lesaktiv, o ol niu memba.

• Ol aktiviti, wetem ol janis blong givim seves long olgeta we oli stap long nid. Plante long ol wok blong mekem plan, oli mekem insaed long presidensi miting blong kworom o klas (luk long japta 20).

• Wok blong Givhan (luk long japta 21).

• Blong stap trenem ol niu presidensi blong kworom o blong klas.

29.2.8

Program blong Ol Sandei Miting

Ol wod oli yusum wan long ol taemtebol ia, blong tu (2) aoa blong yusum long ol miting long Sandei.

Plan 1

60 minit	Sakramen miting
10 minit	Muv i go long ol klas mo ol miting
50 minit	Evri Sandei: Praemeri, we i tekem tu neseri Fas mo nambatri Sandei blong manis: Sandei Skul Nambatu mo Nambafo Sandei: ol miting blong kworom blong prishud, ol miting blong Rilif Sosaeti, mo ol miting blong Ol Yang Woman Nambafaef Sandei: miting blong ol yut mo ol adalt. Bisoprik i disaed long topik, mo i givimaot wok ia long ol tija.

Plan 2

50 minit	Evri Sandei: Praemeri, we i tekem tu neseri Fas mo nambatri Sandei blong manis: Sandei Skul Nambatu mo Nambafo Sandei: ol miting blong kworom blong prishud, ol miting blong Rilif Sosaeti, mo ol miting blong Ol Yang Woman Nambafaef Sandei: miting blong ol yut mo ol adalt. Bisoprik i disaed long topik, mo i givimaot wok ia long ol tija.
10 minit	Muv i go long sakramen miting
60 minit	Sakramen miting

29.3

Ol Miting blong Stek

29.3.1

Stek Konfrens

Stamba Tingting

Fas stamba tingting blong wan stek konfrens, hem i blong mekem fet blong ol memba long Jisas Kraes, i kam strong moa.

Olgeta we Oli Tekpat

Evriwan i gat invitesen ia blong kam blong jeneral sesen. Ol nara sesen oli blong ol spesifik pipol blong oli tekpat long ol, olsem we oli soem daon ia.

Hamas Taem

Tu (2) taem long wan yia.

29.3.2

Stek Jeneral Prishud Miting

Stamba Tingting

Givim instraksen mo insperesen long olgeta we oli holem prishud long saed blong diuti blong olgeta.

Olgeta we Oli Tekpat

Evri man we i holem prishud insaed long stek.

Hamas Taem

Wan taem long wan yia.

29.3.3

Stek Prishud Lidasip Miting

Stamba Tingting

Tijim ol prishud lida long saed blong diuti blong olgeta, blong givim moa paoa long wanem oli save mekem, mo blong mekem fet blong olgeta i kam strong moa.

Olgeta we Oli Tekpat

• Stek presidensi

• Hae kaonsel.

• Ol Stek mo klak blong wod (mo ol asisten klak olsem we i nid).

• Ol stek mo wod eksekutiv sekretari.

• Stek Yang Man presidensi (mo sekretari, sapos oli singaotem wan).

• Ol Bisoprik.

• Ol presidensi mo ol sekretari blong kworom blong ol elda oli tekpat tu long miting ia.

• Ol Advaesa blong Aronik Prishud Kworom.

Hamas Taem

Oli holem wan prishud lidasip miting olsem pat blong wanwan stek konfrens.

29.3.4

Ol Stek Okseleri Lidasip Miting

Stamba Tingting

Blong tijim ol oganaesesen lida long saed blong diuti blong olgeta, blong helpem olgeta blong kam antap olsem ol lida mo tija, mo blong mekem fet blong olgeta long Jisas Kraes, i kam strong moa. Long ol miting ia, ol lida oli kaonsel tugeta mo oli serem ol aedia.

Olgeta we Oli Tekpat

Evri presidensi mo sekretari blong wod Rilif Sosaeti, Yang Woman, Praemeri, mo Sandei Skul. Wan memba blong stek presidensi, o wan hae kaonsela we i kasem wok ia, i atendem mo i prisaed long miting ia. Oli save invaetem ol tija, ol advaesa, ol hae kaonsela, mo memba blong bisoprik we oli givim wok long hem blong lukaot long ol oganaesesen ia, blong kam long miting ia.

Hamas Taem

Wan taem long wan yia.

29.3.5

Stek Hae Pris Kworom Miting

Stamba Tingting

Blong stap tijim ol memba blong kworom long saed blong ol diuti blong olgeta mo long saed blong doktrin we i go wetem prishud.

Olgeta we Oli Tekpat

Evri memba blong stek hae pris kworom.

Hamas Taem

Wan taem long wan yia.

29.3.6

Stek Presidensi Miting

Stamba Tingting

Blong kaonsel tugeta mo mekem ol desisen abaot ol mata blong stek.

Olgeta we Oli Tekpat

Stek presidensi, stek klak, mo eksekutiv sekretari.

Hamas Taem

Oltaem (plante taem, hem i evri wik).

29.3.7

Hae Kaonsel Miting

Stamba Tingting

Kaonsel tugeta abaot wok blong God blong fasin blong sevem man mo fasin blong kam olsem wan god, insaed long stek (luk long 1.2).

Olgeta we Oli Tekpat

• Stek presidensi

• Hae kaonsel.

• Stek klak mo eksekutiv sekretari.

Hamas Taem

Tu (2) taem long wan manis, sapos i posibol.

29.3.8

Stek Kaonsel Miting

Stamba Tingting

Kaonsel tugeta abaot wok blong God blong fasin blong sevem man mo fasin blong kam olsem wan god, insaed long stek (luk long 1.2).

Olgeta we Oli Tekpat

• Stek presidensi

• Hae kaonsel.

• Stek klak mo eksekutiv sekretari.

• Ol Stek Rilif Sosaeti, Ol Yang Woman, mo Praemeri presiden.

• Ol Stek lida blong yang singgel adalt mo ol singgel adalt lida (sapos oli singaotem olgeta).

Hamas Taem

Wan taem long wan manis, sapos i posibol.

29.3.9

Stek Adalt Lidasip Komiti Miting

Stamba Tingting

Kaonsel tugeta abaot ol wei blong sapotem ol wod lida taem oli help long wok blong God blong fasin blong sevem man mo fasin blong kam olsem wan god. Mekem ol plan blong ol wei blong mekem visen blong ol lida blong stek i hapen, hemia long saed blong wok ia insaed long stek.

Olgeta we Oli Tekpat

• Stek presidensi.

• Stek Rilif Sosaeti presidensi (mo sekretari, sapos oli singaotem wan).

• Ol hae kaonsela we oli givimaot ol wok ia long olgeta blong wok wetem ol kworom blong ol elda.

Hamas Taem

Olsem we i nid.

29.3.10

Stek Yut Lidasip Komiti Miting

Stamba Tingting

Ol stek lida mo yut (1) oli kaonsel tugeta abaot mekem ol yut blong stek oli kam moa strong mo (2) mekem plan blong ol seves mo aktiviti.

Antap long hemia, ol stek lida oli kaonsel tugeta abaot olsem wanem blong instraktem mo sapotem ol lida blong wod long saed blong yusum ol yut insaed long wok blong God blong fasin blong sevem man mo fasin blong kam olsem wan god. Oli mekem ol plan blong ol wei blong help blong mekem ol visen blong ol lida blong stek oli hapen, hemia long saed blong ol yut insaed long stek.

Olgeta we Oli Tekpat

• Wan memba blong stek presidensi.

• Stek Yang Man presidensi (mo sekretari, sapos oli singaotem wan).

• Stek Yang Woman presidensi (mo sekretari, sapos oli singaotem wan).

• Yut blong wanwan wod insaed long stek, taem ol miting o ol pat blong ol miting i tekem ol samting we bae oli kam moa gud sapos ol yut ia oli pat long hem.

Hamas Taem

Olsem we i nid.

29.3.11

Stek Kaonsel Miting blong Ol Bisop

Stamba Tingting

Serem ol eksperiens, tokbaot ol kwestin mo givim instraksen we oli blong ol bisop nomo.

Olgeta we Oli Tekpat

Stek presiden mo evri bisop mo ol branj presiden insaed long stek, oli memba blong kaonsel ia. Wan klak blong stek i stap tu long miting blong kipim wan rekod blong ol wok we oli givimaot mo ol desisen we oli tekem.

Hamas Taem

Wan taem long kwota.

29.5

Ol Fenerol Seves mo Ol Nara Seves blong Wan Ded

29.5.1

Ol Jeneral Prinsipol

Wan impoten stamba tingting blong ol seves blong Jos long saed blong ol dedman, i blong testifae abaot plan blong fasin blong sevem man, speseli Atonmen mo Laef Bakegen long Ded blong Sevya. Ol seves ia, oli mas gat bigfala respek long hem, mo ol eksperiens long saed blong spirit.

Ol lida blong Jos oli no mas putum ol seremoni blong ol nara relijin o ol nara grup i kam insaed long ol seves blong Jos we oli holem blong ol memba we oli ded.

29.5.2

Givim Help long Famli

Olsem ol disaepol blong Jisas Kraes, ol lida mo ol memba blong Jos oli “krae sore wetem olgeta we oli krae sore, … oli leftemap tingting blong olgeta we oli nidim fasin blong leftemap tingting” (Mosaea 18:9). Taem wan memba i ded, bisop i visitim famli blong dedman, blong leftemap tingting blong olgeta.

Bisop i save talem se ol memba blong wod oli save help, mo kworom blong ol elda mo Rilif Sosaeti tu oli save help.

29.5.4

Fenerol Seves (long ol ples we hemia i kastom)

Taem we bisop i stap lidim wan fenerol, i nomata se i stap long bilding blong Jos o long wan narafala ples, hem i wan miting blong Jos mo i wan seves blong relijin. Hem i wan taem blong filim Spirit.

Ol fenerol oli mas stat long taem. Plante taem, oli no mas stap moa long 1 aoa haf, hemia blong respektem olgeta we oli kam atendem fenerol.

Ol fenerol seves ia, oli no save holem long Sandei.

29.6

Ol Prea insaed long Ol Miting blong Jos

Ol prea long ol miting blong Jos oli mas sot, simpol, mo olsem we Spirit i talem. Eni memba blong Jos we i baptaes, i save givim fas mo las prea. Ol pikinini we oli no baptaes yet oli save prea long Praemeri.

29.7

Soem Ol Miting tru long Intanet o Holem Ol Onlaen Miting

Bisop i save, olsem wan eksepsen, givim raet blong oli soem wan sakramen miting, mo ol fenerol, mo ol mared we oli holem insaed long mitinghaos, tru long intanet.

Taem oli soem wan sakramen miting tru long intanet, bae oli no soem taem ia we oli blesem mo pasem sakramen.

Blong sam miting, bisop o stek presiden i save givim raet long ol memba we oli no save kam long mitinghaos, blong oli save tekpat onlaen. Ol miting ia, insaed i save gat:

• Ol lidasip miting, olsem presidensi o kaonsel miting.

• Kworom, Rilif Sosaeti, mo Yang Woman miting.

• Ol Sandei Skul klas.

• Ol praemeri klas mo singsing taem.

29.8

Ol Foto mo Vidio Rekoding blong Ol Miting

Blong kipim tabu fasin blong ol miting blong Jos, i no mas gat wan i tekem ol foto, o mekem ol vidio rekoding blong ol sakramen miting o ol stek konfrens.

Blong kasem moa infomesen abaot ol laef rekoding blong ol miting, luk long 29.7.