32.

Ukweļo̧k im Ko̧o̧njel ko an Ro Uwaan an Kabun̄ in

32.0

Kadkad In

Enan̄in aolep ukweļo̧k rej bōk jikier ikōtaan juon armej, Anij, im ro me armej eo ekar kōm̧m̧an bōd ak jerawiwi ņae. Ijoke, jet iien juon bisop ak stake būreejtōn ej aikuj jipan̄ ro uwaan Kabun̄ in ilo kijejeto ko aer n̄an ukweļo̧k.

N̄e ej itok n̄an jipan̄ membōr ro ikkijeen ukweļo̧k, bisop ro im stake būreejtōn ro rej aikuj kwaļo̧k aer iakwe im kea. Rej ļoor waanjon̄o̧k eo an Rilo̧mo̧o̧r, eo ekar ļōn̄aj lōn̄ļo̧k kajjojo armej im ekar jipan̄ er eļļo̧k jān jerawiwi im oktakļo̧k n̄an Anij (lale Matu 9:10–13; Jon 8:3–11).

32.1

Ukweļo̧k im Jeorļo̧k Bōd

N̄an kakūrm̧ool karōk in tūriam̧o eo An, Jemedwōj Ilan̄ ekar jilkintok Nejin Emake Wōt, Jisōs Kraist, n̄an pinmuur kōn jerawiwi ko ad (lale Alma 42:15). Jisōs ekar en̄taan n̄an kōļļā wōņeen jerawiwi me kien jim̧we eo ej aikuji n̄an jerawiwi ko ad (lale Katak im Bujen Ko 19:15–19; lale barāinwōt Alma 42:24–25). Kōn katok in, jim̧or Jemād im Eo Nejin rekar kwaļo̧k iakwe eo Aer ejjelo̧k jem̧ļo̧kin n̄an kōj (lale Jon 3:16).

N̄e jej kōmouruuri “tōmak n̄an ukeļo̧k,” Jemedwōj Ilan̄ ej jeorļo̧k ad bōd, ej kwaļo̧k an tūriam̧o kōn Pinmuur eo an Jisōs Kraist (Alma 34:15; lale barāinwōt Alma 42:13). N̄e jej erreo jān jerawiwi im em̧ōj jeorļo̧k ad bōd, āliktata jemaron̄ jolete aelōn̄ in Anij (lale Aiseia 1:18; Katak im Bujen Ko 58:42).

Ukweļo̧k eļapļo̧k jān ukōt wōt mour ko ad. Ej eļļo̧k jān jerawiwi im oktakļo̧k n̄an Jemedwōj Ilan̄ im Jisōs Kraist. Ej tōl n̄an juon oktak ilo bōro im ilo ļōmņak (lale Mosaia 5:2; Alma 5:12–14; Hilamōn 15:7). Kōn ukweļo̧k, jej erom̧ armej ro rekāāl, erom̧ juon wōt ippān Anij (lale 2 Korint 5:17–18; Mosaia 27:25–26).

Iien em̧m̧an n̄an ukweļo̧k ej juon iaan kōjeraam̧m̧an ko reļļap Jemedwōj Ilan̄ ekar letok n̄an kōj kōn menin letok eo an Eo Nejin.

32.2

Wūn ko kōn Mo̧ ko ak Bukweļo̧k n̄an Juon eo Uwaan Kabun̄ in

Eļan̄n̄e juon membōr ej kōm̧m̧an juon jerawiwi eļap, bisop eo ak stake būreejtōn eo ej jipan̄ e ukweļo̧k. Āinwōt m̧ōttanļo̧k jerbal in, emaron̄ aikuj kamo̧ik jet iaan eddo ko an juon eo uwaan Kabun̄ in ium̧win juon tōre. Ilo jekjek ko jet, emaron̄ aikuj bukweļo̧k etan membōr eo ilo ium̧win juon tōre.

Kamo̧ik ak bukweļo̧k juon armej eo uwaan Kabun̄ in ejjab kōttōpar eo ņe n̄an kaje. Ijjeļo̧kin, kōm̧m̧an kein rej jet iien menin aikuj n̄an jipan̄ juon armej ukweļo̧k im en̄jake juon oktak in buruōn. Rej barāinwōt leļo̧k an armej eo iien n̄an kōppopo ilo jetōb n̄an kōkāāl im kōjparok bujen ko an bar juon alen.

Wūn ko jilu in mo̧ ko ak bukweļo̧k eo an juon eo ej uwaan Kabun̄ in rej āinwōt in ej elaajrak.

Jilu wūn ko n̄an Mo̧ ko ak Bukweļo̧k n̄an Eo Uwaan Kabun̄ in

1. Jipan̄ kōjparok ro jet

2. Jipan̄ juon armej en̄jake kajoor in pinmuur eo an Jisōs Kraist kōn ukweļo̧k

3. Kōjparok m̧ool eo an Kabun̄ in

32.2.1

Jipan̄ Kōjparok ro Jet

Wūn eo m̧oktata ej n̄an jipan̄ kōjparok ro jet. Jet iien juon armej ej kwaļo̧k ko̧kkure ilo mour in kanniōk ak jetōb. M̧wilin riko̧kkure ro, kōmetak ko an ānbwin, ko̧kkure an m̧ōm̧ in kanniōk, ko̧o̧t, im bun̄ jān tōmak rej jet iaan wāween ko remaron̄ waļo̧k. Kōn im̧we, juon bisop ak stake būreejtōn eo ej jerbal n̄an kōjparok ro jet n̄e juon armej ej kaamijak ilo wāween kein ak wāween ko jet reļļap (lale Alma 5:59–60).

32.2.2

Jipan̄ juon Armej Bōk Kajoor in Pinmuur eo an Jisōs Kraist kōn Ukweļo̧k

Wūn eo kein karuo ej n̄an jipan̄ juon armej bōk kajoor in pinmuur eo an Jisōs Kraist kōn ukweļo̧k. Ilo wāween in, emaron̄ bar erreo im wāppen n̄an bōk aolep kōjeraam̧m̧an ko an Anij.

32.2.3

Kōjparok M̧ool eo an Kabun̄ in

Wūn eo kein kajilu ej n̄an kōjparok m̧ool eo an Kabun̄ in. Kamo̧ik ak bukweļo̧k etan juon membōr in Kabun̄ in emaron̄ ekkar n̄e armej eo ekar lukkuun ko̧kkure etan Kabun̄ in (lale Alma 39:11). M̧ool eo an Kabun̄ in ejjab pād ilo kōjparok ilo aer ņoje ak kadikļo̧k jerawiwi ko reļļap—ak ilo aer kwaļo̧ki.

32.3

Jerbal eo an Riekajet ro ilo Israel

Bisop ro im stake būreejtōn ro kar kūr im kōjeņolo̧k er n̄an erom̧ riekajet ro ilo Israel (lale Katak im Bujen Ko 107:72–74). Rej kabwijer kii ko n̄an bōk jikin Irooj ilo aer jipan̄ ro uwaan Kabun̄ in ukweļo̧k (lale Katak im Bujen Ko 13:1; 107:16–18).

Ekkā an bisop ro im stake būreejtōn ro jipan̄ ilo ukweļo̧k ilo aer kapilōk kajjojo armej. Jipan̄ in emaron̄ kobatok kamo̧ik jet eddo ko an juon membōr ilo juon tōre.

N̄an jet jerawiwi ko reļļap, ritōl ro rej jipan̄ kōn ukweļo̧k ilo aer kōm̧m̧ane juon ko̧o̧njeļ in kajim̧we (lale 32.6). Jipan̄ in emaron̄ koba kamo̧ ko rekkar n̄an jet iaan eddo ko an membōr in Kabun̄ in ak bukweļo̧ke etan an juon armej membōr ilo juon tōre.

Bisop ro im stake būreejtōn ro rej iakwe im kea ilo aer jipan̄ membōr ro ukweļo̧k. Jem̧jerā eo an Rilo̧mo̧o̧r ippān kōrā eo me ekar kakkure kien erreo ej juon waanjon̄o̧k (lale Jon 8:3–11). Men̄e E ekar jab ba jerawiwi ko an em̧ōj jeorļo̧ki, Ekar jab kajeiki. Ijjeļo̧kin, Ekar ba “jab bar jero̧wiwi”—n̄an ukweļo̧k im ukōt mour eo an.

Ritōl rein rej katakin bwe ewōr “lan̄lōn̄… i lan̄ kōn juon ri jero̧wiwi eo ej ukeļo̧k” (Luk 15:7). Rej kijenmej, rie, im m̧ōņōņō. Rej im̧we kōjatdikdik. Rej katakin im kam̧ool bwe kōnke katok in pinmuur eo an Rilo̧mo̧o̧r, aolep remaron̄ ukweļo̧k im erreo.

Bisop ro im stake būreejtōn ro rej kappukot tōl jān Jetōb n̄an jeļā wāween n̄an jipan̄ kajjojo armej ukweļo̧k. N̄an wōt jerawiwi ko reļļap me Kabun̄ in ewōr juon an jon̄ak em̧ōj karōke n̄an ta ko ritōl ro rej aikuj kōm̧m̧ani (lale 32.6) Ejjeļo̧k ruo jekjek rej jon̄an wōt juon. Kapilōk ko me ritōl ro rej letok im jerbal in ukweļo̧k rej kōm̧m̧ane rej aikuj im̧we im bōlen enej oktak n̄an kajjojo armej.

32.4

Kwaļo̧k Ruōm̧, Dāpij ilo Ittino, Riboot n̄an Ritōl ro an Kien eo

32.4.1

Kwaļo̧k Ruōm̧

Ukweļo̧k ej aikuj bwe aolep jerawiwi ko ren kwaļo̧ki n̄an Jemedwōj Ilan̄. Jisōs Kraist ekar ba, “Jān men in kom̧ maron̄ jeļā eļan̄n̄e juon armej ej ukeļo̧k jān jero̧wiwi ko an—lo, enaaj kwaļo̧ki im eļļo̧k jāni” (Katak im Bujen Ko 58:43; barāinwōt lale Mosaia 26:29).

N̄e ro uwaan Kabun̄ in rej kōm̧m̧ani jerawiwi ko reļļap, aer ukweļo̧k ej barāinwōt koba kwaļo̧k ruōer n̄an bisop ro ak stake būreejtōn ro. Innām ej kiiō maron̄ kōjerbal kii ko an gospel in ukweļo̧k ilo etāer (lale Katak im Bujen Ko 13:1; 84:26–27; 107:18, 20). Menin ej jipan̄ er kōmour im jepļaak n̄an iaļan gospel eo kōn kajoor in Pinmuur eo an Rilo̧mo̧o̧r.

Wūn in kwaļo̧k ruōer ej n̄an kōketak membōr ro n̄an kōmerāik eddo ko aer make bwe ren maron̄ lukkuun kappukot jipan̄ eo an Irooj ilo aer oktak im bōk kōmour. Ejaake juon “bōro erup im jetōb ettā” ej jipan̄ ilo aer kwaļo̧k ruōer (2 Nipai 2:7). Make kwaļo̧k ruōn ej kwaļo̧k bwe armej eo ej ikdeleel n̄an ukweļo̧k.

N̄e juon membōr ej kwaļo̧k ruōn, bisop ak stake būreejtōn eo ej ļoor unin tōl ko n̄an kapilōk ilo 32.8. E ej lukkuun jar ilo an kappukot unin tōl eo kōn jekjek eo ekkar n̄an jipan̄ membōr eo ukweļo̧k . E ej ļōmņak n̄e juon ko̧o̧njeļ in kajim̧we enaaj lukkuun jipan̄. Eļan̄n̄e kakien ko an Kabun̄ in ej aikuj ko̧o̧njeļ in kajim̧we an juon eo ej uwaan Kabun̄ in, e ej kōmeļeļeik menin (lale 32.6).

Jet iien juon membōr ej bōd ņae eo pāleen ak bar juon rūtto. Āinwōt m̧ōttanļo̧k ukweļo̧k, e ekkā an aikuj kwaļo̧k ruōn n̄an armej eņ im kappukot jeorļo̧k bōd. Juon jodikdik eo ej kōm̧m̧ane juon jerawiwi kileplep ekkā rojan̄ e bwe en kapilōk ippān ro jinen im jemān.

32.4.4

Ittiņo̧

Bisop ro, stake būreejtōn ro, im rikakpilōklōk ro aer ewōr juon aer eddo eo eļap n̄an dāpij meļeļe ko ilo ittiņo̧ ko rej kwaļo̧ki n̄an er. Meļeļe in emaron̄ in itok ilo iien itōrpiu, iien kapilōk, im iien kwaļo̧k ruōn. Ejja wāween dāpij ittiņo̧ ej jerbal n̄an aolep ro rej bōk koņaer ilo ko̧o̧njeļ in kajim̧we ko an ro rej uwaan Kabun̄ in. Dāpij ilo ittiņo̧ emenin aikuj kōnke membōr ro remaron̄ jab kwaļo̧k jerawiwi ko aer ak kappukot tōl eļan̄n̄e ta ko rej kwaļo̧ki reban dāpij ilo ittiņo̧. Kwaļo̧k men ko rettiņo̧ ej kakkure lōke an membōr ro im kōm̧m̧an bwe ren jako lōke eo aer ilo ritōl ro.

Emakijkij ilo eddo ko aer n̄an dāpij ilo ittiņo̧, juon bisop, stake būreejtōn, ak rikakpilōklōk ro aer remaron̄ kwaļo̧k kain meļeļe rōt in āinwōt an ellaajrak:

• Rej aikuj ekōnono kake ippān stake būreejtōn, mijen būreejtōn, ak bisop eo an membōr eo n̄an kōm̧m̧ane juon ko̧o̧njeļ in kajim̧we an eo ej uwaan Kabun̄ in ak men ko jet me rej iookļo̧k jekjek in.

• Armej eo ej em̧m̧akūt n̄an juon ward kāāl (ak ritōl eo an priesthood em̧ōj kōtļo̧ke) ilo an jerbal in kajim̧we ak abōņōņō ko jet reļļap rej pād wōt ilo kōttar.

• Juon bisop ak stake būreejtōn ejeļā bwe juon membōr in Kabun̄ in eo ej jokwe ilikin ward eo ak stake eo emaron̄ bar pād ilo kain jerawiwi in eļap.

• Ej juon men ekkar n̄an kwaļo̧k meļeļe ko ilo juon iien ko̧o̧njeļ in kajim̧we an juon eo ej uwaan Kabun̄ in.

• Juon membōr ej kāālet n̄an leļo̧k mālim n̄an ritōl eo n̄an kwaļo̧k meļeļe eo ippān armej ro ej ba.

• Emaron̄ ekkar n̄an kwaļo̧k meļeļe ko elōn̄ jon̄āer kōn kāālet eo n̄an ko̧o̧njel in kajim̧we eo an eo ej uwaan Kabun̄ in.

N̄an jipan̄ ritōl ro kōjparok ro jet im jerbal ekkar n̄an kien eo, Kabun̄ in ej letok jipan̄ jān ro retijem̧ļo̧k. N̄an bōk tōl in, ritōl ro rej im̧we n̄an ko̧o̧leabuse help line eo an Kabun̄ in ijo ewōr ie (lale 38.6.2.1). Ijo ejjeļo̧k ie, stake būreejtōn eo ej kepaake opiij eo an legal ko̧o̧njeļ ilo eria opiij eo.

Ilo jekjek eo wōt ej aikuj juon bisop ak stake būreejtōn n̄an kwaļo̧k meļeļe ko rettiņo̧ ilo an jab m̧oktata kappukot tōl rōt kein. Men in ej n̄e kwaļo̧k m̧ool ekkar n̄an bōbrae mour an armej eo jān jorrāān im kaamijak ak jorrāān ko reļļap im ejjeļo̧k iien n̄an kappukot tōl. Ilo jekjek rōt in, jerbal eo n̄an kōjparok ro jet eļapļo̧k an aorōk jān jerbal in kattiņo̧. Ritōl ro rej aikuj kepaak ro ilo kien eo ilo iien eo em̧ōkajtata.

32.6

Jekjek in Jerawiwi eo im Kakien eo an Kabun̄ in

Jekjek in juon jerawiwi ej juon ļōmņak eaorōk n̄an kāālet jekjek eo me enaaj (1) jipan̄ kōjparok ro jet im (2) jipan̄ juon armej ukweļo̧k. Irooj ekar ba bwe E “[ejjab] maron̄ kalimejek jabdewōt jero̧wiwi n̄an jidik” (Katak im Bujen Ko 1:31; barāinwōt lale Mosaia 26:29). Rikarejar ro An rejjab aikuj kōjekdo̧o̧n kam̧ool ko an jerawiwi eo eļap.

Jerawiwi ko reļļap rej aikuj kōm̧m̧an ilo jejjet im jerbal ņae kien ko an Anij. Waanjon̄ak in jerbal ko rej ellaajrak ijin ilaļ:

• Jerbal ko renana ak kko̧kkure

• Jab erreo an m̧ōm̧ an kanniōk

• Jerbal in ko̧o̧t jāān

• Ko̧kkure lōke

• Jerbal nana ko jet

N̄e juon Doulul in Jerbal in Kajim̧we Aikuj Kōm̧m̧an ak Emaron̄ In Aikuj

Wāween ko in Jerawiwi	Ko̧o̧njeļ an Uwaan Ej Menin Aikuj	Ko̧o̧njeļ an Uwaan Maron̄ Menin Aikuj
Wāween ko in Jerawiwi Jerbal in Ko̧kkure ak Ko̧kkure	Ko̧o̧njeļ an Uwaan Ej Menin Aikuj M̧ōrō Ļatipn̄ōl Kālet eo em̧ōj kōm̧m̧ane bwe juon armej ekar ko̧kkure juon armej ilo kanniōk Ko̧kkure ņae ajri ak jo̧dikdik Mwil in kokkure ko renana	Ko̧o̧njeļ an Uwaan Maron̄ Menin Aikuj Kōm̧m̧an Jerbal in Mōrō. Ko̧kkure ilo m̧ōm̧ an kanniōk, ekoba ire im ko̧kkuret (lale 38.6.18 n̄e juon ko̧o̧njel ej aikuj kōm̧m̧an) Ko̧kkure juon eo pāleen ak bar juon rūtto. (lale 38.6.2.4 n̄e juon ko̧o̧njeļ ej aikuj kōm̧m̧an)
Wāween ko in Jerawiwi M̧ōm̧ ilo Kanniōk	Ko̧o̧njeļ an Uwaan Ej Menin Aikuj Kōpa Pija nana ko an ajri pālele ruo ak elōn̄ļo̧k jān juon Mwil in ko̧kkure ilo m̧ōm̧ in kanniōk	Ko̧o̧njeļ an Uwaan Maron̄ Menin Aikuj Ļōn̄, lejen, jemjerā ko an ļeo n̄an ļeo ak lio n̄an lio, im aolep jemjerā ko an m̧ōm̧ an kanniōk ilutlikin juon m̧are kar kōmālim ikōtaan juon em̧m̧aan im juon kōrā, ekoba jekjek ko an m̧ōm̧ an kanniōk ilo online ak ilo talboon (sexual encounter) Jokwe ippān doon itulikin m̧are, civil unionim partnership ko, im m̧are ikōtaan em̧m̧aan n̄an em̧maan im kōrā n̄an kōrā. Ļap im ikutkut in kōjerbal pija ko renana me ekar kōm̧m̧an jorrāān n̄an juon m̧are an membōr ak baam̧le.
Wāween ko in Jerawiwi Jerbal in Ko̧o̧t Jāān	Ko̧o̧njeļ an Uwaan Ej Menin Aikuj M̧wil ilo kakkure jāān, āinwōt koot im m̧akūtkūt ko eierļo̧k wōt (lale 32.6.3.3 n̄e membōr eo ekar bōk kuņaan ilo koot jāān an Kabun̄ in ak men ko m̧weien.	Ko̧o̧njeļ an Uwaan Maron̄ Menin Aikuj Ko̧o̧t, deļo̧n̄e juon em̧ ilo ejjeļo̧k mālim, m̧akutkut in ko̧o̧t, ak jab kōjerbale jāān ilo jim̧we, (lale 32.6.3.3 n̄e membōr eo ekar bōk kuņaan ilo koot jāān an Kabun̄ in ak men ko m̧weien) Riab kallim̧ūr ilo jikin ekajet
Wāween ko in Jerawiwi Ko̧kkure Lōke	Ko̧o̧njeļ an Uwaan Ej Menin Aikuj Jerawiwi eo eļap ilo an kabwijer kūr eo eaorōk an Kabun̄ in	Ko̧o̧njeļ an Uwaan Maron̄ Menin Aikuj Jerawiwi ko reļļap ilo iien eo kabwijer juon mālim in jerbal ak lōke ilo Kabun̄ in ak jukjukin pād eo (lale 32.6.3.3 n̄e membōr eo ekar bōk kuņaan ilo koot jāān an Kabun̄ in ak men ko m̧weien) Jerawiwi eo eļap me eļap jeļā kake
Wāween ko in Jerawiwi Makūtkūt ko Jet	Ko̧o̧njeļ an Uwaan Ej Menin Aikuj Liakeļo̧k in ko̧kkure ko rellōn̄	Ko̧o̧njeļ an Uwaan Maron̄ Menin Aikuj Man Lo̧jen (ijello̧kin n̄e oktak ilo 38.6.1 ej jerbal) Laajrak in jerawiwi ko reļļap Kōjekdo̧o̧n eddo ko an baam̧le, ekoba jab kōļļāik jāān in jipan̄ n̄an ajri ro nejim im leļo̧k kōļļāik jāān ko karōk jān jikin ekajet. Wiakake uno ko rekajoor im rejjab mālim Jerbal in kakkure ko jet reļļap

32.6.3

N̄e Stake Būreejtōn ej Kapilōk ippān Eria Būreejtōnji eo kōn Eļan̄n̄e juon Ko̧o̧njeļ in kajim̧we ak Jerbal ko Rekkar ak Remenin Aikuj

Jet jekjek ko rej aikuj kōļapļo̧k kōkm̧anm̧an im tōl. N̄an jeļā wāween eo em̧m̧antata n̄an jipan̄, stake būreejtōn eo ej aikuj kapilōk ippān Eria Būreejtōnji eo kōn jekjek ko ilo jekjōn in.

32.6.3.2

Bun̄ jān tōmak

Jorrāān ko an juon eo ej bun̄ jān tōmak ekkā an jelōt ilōn̄ļo̧k ward ak stake. Rej aikuj bwe ren kwaļo̧k ilo iien eo em̧ōkajtata n̄an kōjparok ro jet.

Bisop eo ej bōk kapilōk ippān stake būreejtōn eo eļan̄n̄e ej en̄jake bwe jerbal eo an membōr eo emaron̄ m̧ōttanļo̧k bun̄ jān tōmak.

Āinwōt kōjerbale ijin, bun̄ jān tōmak ej n̄an juon membōr eo ej kobaļo̧k ilo jabdewōt men ko ilo laajrak in:

• Ālijlij aer kōm̧m̧an ilo alikkar, peļļo̧k, im lukkuun ilo lo̧bwilej jum̧ae n̄an Kabun̄ in, katak ko an, kakien ko an, ak ritōl ro an.

• Wōnm̧aanļo̧k ilo katakin āinwōt meļeļe in katak an Kabun̄ me ejjab katak eo an Kabun̄ ālikin aer kar kajim̧we er jān ippān bisop eo ak stake būreejtōn.

• Kwaļo̧k juon jon̄o̧k in m̧ool in jerbal n̄an kam̧ōjņoikļo̧k tōmak im m̧akūtkūt ko an membōr ro ilo Kabun̄ in

• Wōnm̧aanļo̧k in ļoore katak ko an kabun̄ ko rebun̄ jān tōmak ālkin kar kajim̧we er jān ippān bisop eo ak stake būreejtōn

• Lukkuun in deļo̧n̄e ļo̧k bar juon kabun̄ im kōketak katak ko an

32.6.3.3

Bōd in Kōjerbal Jāān ko an Kabun̄ in

Eļan̄n̄e membōr eo ejjab m̧ool ilo an kōjerbal jāān ko an Kabun̄ in ak ko̧o̧te men ko raorōk m̧weien Kabun̄ in, stake būreejtōn eo ej kapilōk ippān Eria Būreejtōnji eo eļan̄n̄e emenin aikuj bwe juon ko̧o̧njeļ in kajim̧we ak m̧akūtkūt ko jet ren bōk jikier.

Kāālet ko jān Bok in Bōk Meļeļe Eļap ejjab kitbuuj aolepān naan in kōmeļeļe ko im unin tōl ko n̄an ko̧o̧njeļe juon armej eo me ekar bōk koņaan ilo juon jerawiwi eļap, eļan̄n̄e emenin aikuj, kōm̧m̧ane juon ko̧o̧njeļ an uwaan.

Eļan̄n̄e juon bisop ak branch būreejtōn ewōr an kajjitōk ko kōn ekōjkan jipan̄ juon eo me ekar kōm̧m̧ane juon jerawiwi eļap (āinwōt an kar kōmeļeļeik ilo 32.6), ej aikuj m̧okta etale n̄an lale eļan̄n̄e aolepān jebta 32 ilo Bok in Bōk Meļeļe Eļap em̧ōj an kar ukook ilo kajin eo emaron̄ kōjerbale. Eļan̄n̄e ejjan̄ de kar ukok, ej aikuj kepaak ritōl eo an emālim ilo iien eo em̧ōkaj tata kōn unin tōl.