33.

Eb’ li tz’iib’anb’il esil, ut li q’axtesink esil

33.0

Xtikibʼankil

Aajel ru li tzʼiibʼank esil chalen chaq xtiklajik lix Iglees li Qaawaʼ. Joʼ eetalil:

Rik’in laj Adan kiwan “jun xhuhil li jultikaak” (Moises 6:5).

Laj Moroni kixkʼut naq keʼtzʼiibʼaman xkʼabʼaʼebʼ li ani keʼkubʼe xhaʼ saʼ lix Iglees li Kristo “re naq teʼjultikamanq ut teʼchʼoolaniiq xbʼaan lix chaabʼil aatin li Dios” (Moroni 6:4).

Laj Jose Smith kixye naq jun aj tzʼiibʼanel esil tento taabʼoqmanq saʼ li junjunq chi teep re “taaruuq chixtzʼiibʼankil resil chi tzʼaqal yaal chiru li Qaawaʼ” (Tzolʼlebʼ ut Sumwank 128:2).

33.1

Li jolomil na’leb’ chirix li tz’iib’anb’il esil sa’ li Iglees

Loqʼebʼ li tzʼiibʼanbʼil esil re li Iglees. Tento naq oxloqʼinb’ilaq ut k’olb’ilaq rix li na’leb’ li tz’iib’anb’il. Eb’ li k’anjeleb’aal choq’ reheb’ li tz’iib’anb’il esil re li Iglees neke’k’ehok wankilal re te’oksimanq xhuhileb’ li komon a’ yaal lix b’oqb’al li ani naroksiheb’.

Eb’ li tz’iib’anb’il esil naru neke’xtenq’aheb’ laj jolominel re te’xb’aanu a’in:

• Te’xk’e reetal ani naraj xtenq’ankil.

• Te’xk’e reetal k’a’ruheb’ li k’ojob’anb’il k’anjel re li kolb’a-ib’ li ak xk’ul jun li komon, malaj li tento tixk’ul.

• Te’xtaw b’ar wankeb’ li komon.

A’aneb’ a’in li tz’iib’anb’il esil li k’uulanb’ileb’ sa’eb’ li teep ut oqech re li Iglees:

• Resil lix tz’aqonik li komon (chi’ilmanq 33.5)

• Xhuhil li komonil (chi’ilmanq 33.6)

• Resil li xk’ulman (chi’ilmanq 33.7)

• Resil li tumin (chi’ilmanq ch’ol 34)

33.2

Li jolomil na’leb’ choq’ reheb’ laj tz’iib’

Tento naq wanq lix recomendacion re li santil ochoch li wan xwankil.

Eb’ laj tz’iib’ neke’xtaaqe chi tz’aqal li chaq’rab’ink chirix xkolb’al rix lix tuminal li Iglees ut re xk’eeb’al reetal naq tz’aqaleb’ ru li tz’iib’anb’il esil re li Iglees. Eb’ laj tz’iib’ neke’aatinak chi tikto rik’in jun aj jolominel re li tijonelil chirix yalaq k’a’ru ink’a’ us xk’ulman. Wi taach’a’ajko’q lix tuqub’ankil a’an, tento naq laj tz’iib’ taa’aatinaq rik’in li Oficina de Registros Confidenciales sa’ xjolomil li Iglees.

A’in rajlil li linea: 1-801-240-2053 malaj 1-800-453-3860, extension 2-2053

Li bʼoqok chi maajoʼ nimal xtzʼaq (linea re CSM): 855-537-4357

Correo electronico: [e-mail]

Aajel ru naq eb’ laj tz’iib’ te’kanab’aaq sa’ xk’anjeleb’ chiru xk’ihaleb’ li kutan re te’ruuq chixtzolb’al lix k’anjeleb’, chixb’aanunkil, ut re naq ink’a’ taaxaqliiq li k’anjel. Rik’in naq eb’ a’an moko wankeb’ ta sa’ li awa’b’ejil re oqech malaj li obiispil, ink’a’ na’ajman ru naq te’raqe’q xk’anjel naq taak’uub’amanq chi ak’il li awa’b’ejil re oqech malaj li obiispil.

33.4

Li tz’iib’anb’il esil ut li q’axtesink esil sa’ li teep

33.4.1

Li obiispil

Li obiisp naxjolomi li tz’iib’ank esil sa’ li teep.

33.4.2

Laj tz’iib’ re teep

Tento naq sa’ li junjunq chi teep taawanq jun laj tz’iib’ li naxnaw chan ru xb’aanunkil li k’anjel. A’an na’eetaliik xb’aan li obiispil, ut nab’oqe’ ut naxaqab’aak xb’aan jun komon sa’ li awa’b’ejil re oqech malaj jun komon re li taqenaqil ch’utam li k’eeb’il xtaqlankil. Tento naq a’an aj k’amol re li Tijonelil re Melkisedek ut naq wan xrecomendacion re li santil ochoch li wan xwankil. A’an jun komon sa’ li ch’uut re teep. A’an nawulak sa’eb’ li ch’utam re li teep jo’ ch’olob’anb’il sa’ 29.2.

Laj tz’iib’ re teep naxk’ul xtaqlankil xb’aan li obiispil ut eb’ laj tz’iib’ re oqech. Naru neke’b’oqman laj tenq’ re laj tz’iib’ re teep.

33.4.2.1

Eb’ li teneb’ank chirix xk’uulankileb’ li tz’iib’anb’il esil

A’aneb’ a’in lix teneb’ankil laj tz’iib’ re teep, malaj jun laj tenq’ re laj tz’iib’ re teep li k’eeb’il xtaqlankil:

• Naxtz’iib’a resileb’ li k’anjel taqlanb’il ut li na’leb’ sik’b’il ru sa’eb’ li ch’utam reheb’ laj jolominel sa’ li teep.

• Naxk’e reetal naq tz’aqaleb’ ru li tz’iib’anb’il esil ut naq ink’a’ neke’b’ay xtz’aqob’resinkileb’ ru.

Tento naq laj tz’iib’ re teep tixnaw chan ru roksinkileb’ li k’anjeleb’aal re li Iglees choq’ reheb’ li tz’iib’anb’il esil (chi’ilmanq 33.0). A’an naru naroksiheb’ li k’anjeleb’aal a’an re xtenq’ankileb’ laj jolominel re te’xk’e reetal:

• Li neke’raj ru li komon ut li k’anjenel ch’uut.

• K’a’ru wan li nak’anjelak re li teep, jo’ li tumin.

Eb’ laj tz’iib’ re teep neke’xpatz’ reheb’ li komon naq te’xye resil yalaq k’a’ru ink’a’ us sa’ xhuhileb’ lix komonil.

Neke’teneb’aak ajwi’ chixb’aanunkil a’in:

• Neke’xk’e reetal naq tz’iib’anb’il resileb’ li k’ojob’anb’il k’anjel chi tz’aqal ru ut sa’ junpaat.

• Neke’xkawresi li hu Sostenimiento de oficiales choq’ re li ch’utub’aj-ib’ re teep.

• Neke’xtz’iib’a li k’a’ru na’ux sa’ li ch’uut re komonil re teep.

• Neke’xk’uulaheb’ li tz’iib’anb’il esil chirix li tumin (chi’ilmanq 34.2.2).

33.5

Li q’axtesink esil chirixeb’ lix tz’aqonikeb’ li komon

Eb’ li resil lix tz’aqonik li komon neke’xtenq’aheb’ laj jolominel chixk’eeb’al reetal chan ru wankeb’ ut k’a’ru neke’raj ru li komon.

33.5.1

Eb’ li jar paay chi tz’iib’anb’il esil

33.5.1.1

Resil lix wulajikeb’ li komon

Tz’iib’anb’il resil jarub’eb’ li xe’wulak sa’ li ch’utam re li loq’laj wa’ak ut eb’ li ch’utam reheb’ li molam ut li k’anjenel ch’uut re domingo rik’in li k’anjeleb’aal LCR malaj rik’in Herramientas para miembros.

Li loq’laj wa’ak. Tz’iib’anb’il resil jarub’eb’ li xe’wulak sa’ li ch’utam re li loq’laj wa’ak rajlal xamaan xb’aan laj tz’iib’ re teep malaj laj tenq’ re laj tz’iib’ re teep. Neke’ajlaman chixjunileb’ li neke’wulak sa’ li ch’utam ut li neke’tz’aqon sa’ internet, jo’eb’ ajwi’ laj ula’.

Eb’ li ch’utam reheb’ li molam ut li k’anjenel ch’uut re domingo. Tz’iib’anb’il resil jarub’eb’ li xe’wulak rajlal xamaan xb’aan laj tz’iib’ ut laj jolominel re li molam malaj k’anjenel ch’uut. Eb’ laj jolominel reheb’ li saaj naru ajwi’ neke’tenq’an. Neke’ajlaman chixjunileb’ li neke’wulak sa’ li ch’utam ut li neke’tz’aqon sa’ internet, jo’eb’ ajwi’ laj ula’. Neke’ajlaman ajwi’ li komon li yookeb’ chi k’anjelak sa’ li Tzoleb’aal reheb’ li Kok’al malaj jo’ aj jolominel reheb’ li saaj sa’ li teep.

Laj tz’iib’ re pleet naru naxtz’iib’a resil li rajlankileb’ li xe’wulak choq’ re yalaq k’anjenel ch’uut.

33.5.1.2

Resil li tz’ilok-ix choq’ reheb’ laj ilol komon

Chi’ilmanq 21.3.

33.5.1.3

Li informe trimestral

Li junjunq chi ajl sa’ junaq li esil a’an reetalil jun tz’aqal kristiaan li wan rajom ru (chi’ilmanq Helaman 15:13).

Sa’ li informe trimestral wankeb’ li na’leb’ li naru neke’tenq’an reheb’ laj jolominel naq neke’xsik’ lix musiq’anb’il na’leb’ chirix lix k’anjeleb’ re rilb’aleb’ li komon.

Eb’ laj jolominel re oqech ut teep neke’roksi li informe trimestral chi kok’ aj xsa’ re rilb’al b’ar wankeb’ li kristiaan.

Chixjunileb’ li teep neke’xtz’aqob’resi ru ut neke’xtaqla jun informe trimestral re xjolomil li Iglees. Laj tz’iib’ naxtz’il rix li esil rochb’een li obiisp ut naxtaqla rub’elaj li 15 xb’e li po chirix xraqik li junjunq chi trimestre.

33.5.2

Xtusulal xk’ab’a’eb’ li komon

Rik’ineb’ li k’anjeleb’aal re li Iglees choq’ reheb’ li tz’iib’anb’il esil, eb’ laj jolominel neke’ru chirilb’aleb’ lix tusulal xk’ab’a’eb’ li komon. Eb’ li tusulal a’in naru neke’xtenq’aheb’ laj jolominel re te’xk’e reetal:

• Aniheb’ li komon li maji’ neke’k’uluk reheb’ li k’ojob’anb’il k’anjel li neke’ruhan chixk’ulb’al.

• Aniheb’ li saaj winq ut ixq li neke’ru chi b’oqe’k chi k’anjelak sa’ mision.

• Aniheb’ li saaj li moko wan ta xrecomendacion re li santil ochoch li wan xwankil.

• Aniheb’ li saaj li tento te’aatinaq rik’in jun komon sa’ li obiispil.

Eb’ laj jolominel reheb’ li molam ut li k’anjenel ch’uut naru ajwi’ neke’roksiheb’ xtusulal li ani wankeb’ sa’ lix molam malaj k’anjenel ch’uut.

33.6

Xhuhil li komonil

Sa’ lix huhil li komonil natawman xk’ab’a’ li komon, rajlil lix telefono malaj lix correo electronico, resileb’ li k’ojob’anb’il k’anjel ak xk’ul, ut xkomon chik li aajel ruhil na’leb’.

Tento naq k’uulanb’il xhuhil li komonil sa’ li teep wan wi’ li rochoch li komon. Re taak’uulamanq sa’ jalan chik li teep, li ink’a’ mas nak’ulman, tento naq li obiisp ut li awa’b’ej re oqech te’xk’e xliceens. Re xtz’aamankil naq taab’aanumanq a’an, li awa’b’ej re oqech naroksi li k’anjeleb’aal LCR re xtaqlankil li tz’aam re li oficiin re li Xb’eenil Awa’b’ejil.

Aajel ru naq te’b’aanumanq sa’ junpaat li k’anjel a’in:

• Xtz’iib’ankil resil jun k’ojob’anb’il k’anjel xb’aanuman.

• Xtaqlankileb’ malaj xtz’aamankileb’ xhuhil li komonil reheb’ li neke’ok malaj neke’el chaq sa’ li teep.

• Xk’uub’ankil xhuhileb’ li ak’ komon ut li ak’ kok’al reheb’ li na’b’ej yuwa’b’ej li komoneb’.

• Xtz’iib’ankil resil lix kamik jun komon.

• Xtz’iib’ankil resil li sumlaak ut li junkab’al.

Li obiisp malaj awa’b’ej re oqech naxk’e reetal naq wan xhuhil lix komonil sa’ li teep tento taawanq wi’ rub’elaj naq li komon naxk’ul li tz’ilok-ix re xk’ulb’al:

• Jun xb’oqb’al sa’ li Iglees.

• Jun recomendacion re li santil ochoch.

• Li Tijonelil re Melkisedek malaj re k’ojob’aak sa’ jun opiis re li tijonelil a’an.

Naxk’e ajwi’ reetal naq:

• Ink’a’ xk’eeman jun esil sa’ xhuhil

• Ink’a’ naxye naq risinkil xwankil chirix li tz’ape’k sa’ junajil malaj k’ojob’anb’il k’anjel

• Ink’a’ isinb’il xwankil lix komonil

Maajo’q’e taak’eemanq re malaj taak’utmanq chiru yalaq chik ani xhuhil li komonil, ka’ajwi’ li obiisp malaj laj tz’iib’.

Eb’ li komon naru neke’ril li tz’iib’anb’il sa’ xhuhileb’ a’an malaj sa’ xhuhileb’ lix kok’aleb’ li toj wankeb’ sa’ rochocheb’ sa’ li aplicacion Herramientas para miembros. Naru ajwi’ te’xtz’aama re laj tz’iib’ naq taarisi chiru perel hu resileb’ li k’ojob’anb’il k’anjel xe’xk’ul. Wi wan k’a’ru tz’iib’anb’il chi ink’a’ us, laj tz’iib’ naxk’e reetal naq tuqub’anb’ilaq sa’ xhuhil li komonil.

33.6.1

Eb’ li k’ab’a’ej li neke’oksiman sa’eb’ li tz’iib’anb’il esil re li Iglees

Tento taa’oksimanq lix tz’aqal k’ab’a’ jun kristiaan chiru chaq’rab’, a’ yaal jo’ taqlanb’il xb’aan xchaq’rab’il malaj xna’leb’il li tenamit, sa’ xhuhil li komonil ut sa’eb’ li hu k’eeb’ileb’ reheb’ li komon naq neke’xb’aanu jun k’ojob’anb’il k’anjel.

33.6.2

Eb’ li komon li ak tz’iib’anb’il xk’ab’a’eb’ sa’ xhuhil li Iglees

Eb’ li komon a’in ak tz’iib’anb’il xk’ab’a’eb’ sa’ xhuhil li Iglees ut wankeb’ xhuhil li komonil:

• Eb’ li ak xe’kub’e xha’ ut xe’k’ojob’aak choq’ komon

• Eb’ li ani maji’ wankeb’ 9 chihab’ reheb’ ut li xe’osob’tesiik a’b’an ink’a’ xe’kub’e xha’

• Eb’ li moko wankebʼ ta chi tenebʼanbʼil xb’aan xmajelal xjolom, maak’a’ naxye jarub’ chihab’ wan reheb’.

• Eb’ li kok’al li maji’ wankeb’ 9 chihab’ reheb’ ut li ink’a’ xe’osob’tesiik, naq yaal jun reheb’ a’in:

  • Jun reheb’ xna’ xyuwa’, malaj xmama’ rixa’an a’an komon sa’ li Iglees.

  • Xkab’ichaleb’ xna’ xyuwa’ neke’xk’e xliceens re taak’uub’amanq xhuhil. (Wi ka’ajwi’ jun reheb’ k’eeb’il xwankil xb’aan li chaq’rab’ chixk’iiresinkil li ch’ina al, ka’ajwi’ na’ajman ru xliceens a’an.)

Jun komon li ak wan 9 chihab’ re ut wan xhuhil lix komonil a’b’an maji’ nakub’e xha’ ut nak’ojob’aak choq’ komon ut moko tz’iib’anb’il ta xk’ab’a’ sa’ xhuhil li Iglees. A’ut, li teep wan wi’ li rochoch li kristiaan naxk’uula xhuhil lix komonil toj reetal naq li kristiaan naxket 18 chihab’. Sa’ li kutan a’an, wi li kristiaan ink’a’ naraj xkub’sinkil xha’, li obiisp narisi xhuhil lix komonil. Tento naq li awa’b’ej re oqech tixk’e xliceens.

Moko neke’isiman ta xhuhileb’ li ani ink’a’ neke’kub’e xha’ xb’aan xmajelal xk’a’uxleb’aal, ka’ajwi’ wi tz’aamanb’il naq taa’isimanq xb’aan li kristiaan a’an, malaj li ani k’eeb’il xwankil xb’aan li chaq’rab’ chixk’iiresinkil, jo’ xna’ malaj xyuwa’.

33.6.3

Xhuhileb’ li ak’ komon sa’ li teep

Laj tz’iib’ re teep malaj jun laj tenq’ re laj tz’iib’ re teep na’aatinak rik’ineb’ li ak’ komon sa’ li teep ka’ch’in chik chirix naq neke’wulak xhuhil lix komonil re te’xtz’il rix naq tz’aqal ru li na’leb’ sa’ li resileb’ li k’ojob’anb’il k’anjel xe’xk’ul.

33.6.6

Xhuhileb’ li komon li yookeb’ chi k’anjelak chi najt rik’in li teep wan wi’ rochocheb’

33.6.6.2

Xhuhileb’ li misioneer

Chi’ilmanq 24.6.2.8.

33.6.13

Xhuhileb’ li ralal xk’ajoleb’ li na’b’ej yuwa’b’ej li xe’xjach rib’

Chixjunileb’ xhuhil li komonil neke’roksi lix tz’aqal k’ab’a’ jun kristiaan chiru li chaq’rab’, a’ yaal jo’ taqlanb’il xb’aan xchaq’rab’il malaj xna’leb’il li tenamit. Yaal ajwi’ a’an choq’ reheb’ li alal k’ajolb’ej reheb’ li na’b’ej yuwa’b’ej li xe’xjach rib’.

K’iila sut, eb’ li ralal xk’ajoleb’ li na’b’ej yuwa’b’ej li xe’xjach rib’ neke’wulak sa’eb’ li ch’utam re li Iglees sa’ xteep xna’ jo’ ajwi’ xyuwa’. Us ta jun ajwi’ li teep li naru chixk’uulankil ut chix’ak’ob’resinkil li tz’aqal xhuhil lix komonil jun alalb’ej malaj rab’inb’ej, naru taak’uub’amanq jun xhuhil li komonil re jun komon li moko wan ta sa’ li teep sa’ li teep jun chik nawulak wi’. Chi jo’kan naq lix k’ab’a’ ut lix numeril ut correo naru neke’tawman sa’eb’ li tusulal re li teep a’an.

Eb’ li kok’al li wankeb’ xhuhil li komonil re jun komon li moko wan ta sa’ li teep naru te’xk’ul xb’oqb’al sa’ li teep a’an.

33.6.15

Xramb’al ru xtaqlankil ut xtz’aamankil xhuhil li komonil

Wi jun komon naxjal xna’aj naq toj isinb’il xwankil lix komonil malaj wan jalan chik li ch’a’ajkilal, li obiisp malaj jun aj tz’iib’ li k’eeb’il xwankil naru tixram naq taataqlamanq ut taatz’aamanq xhuhil li komonil. A’an naroksi li k’anjeleb’aal LCR re xb’aanunkil a’in.

Jun xhuhil li komonil li ramb’il lix taqlankil ut lix tz’aamankil ink’a’ nataqlaman sa’ li ak’ teep toj reetal naq laj jolominel re li tijonelil li xk’ehok re xramb’al naxk’e xliceens.

33.6.16

Xhuhil li ani “ink’a’ nawb’il b’ar wan rochoch”

Wan naq natawman jun li komon chirix naq wanjenaq xhuhil lix komonil sa’ li “ch’uut reheb’ li ink’a’ nawb’il b’ar wan rochocheb’” sa’ xjolomil li Iglees. Naq nak’ulman a’in, laj tz’iib’ re teep naxtz’aama xhuhil rik’in li k’anjeleb’aal LCR.

33.6.17

Xtz’iib’ankil resil ut xtuqub’ankil li na’leb’ chirixeb’ li k’ojob’anb’il k’anjel

Chi’ilmanq ch’ol 18.

33.6.19

Li tz’ilok-ix reheb’ xhuhil li komonil

Rajlal chihab’ laj tz’iib’ re oqech malaj laj tenq’ re laj tz’iib’ re oqech naxk’e reetal naq tz’ilb’ilaqeb’ rix lix huhil li komonil sa’ li junjunq chi teep, ut naxb’aanu a’an rik’in li k’anjeleb’aal LCR. Tento naq taab’aanumanq li tz’ilok-ix rub’elaj li 30 xb’e li po junio rajlal chihab’.

33.7

Xhuhileb’ resilal li nak’ulman

33.7.1

Resilal li nak’ulman sa’ li teep ut li oqech

Li Qaawa’ kixtaqla naq tz’iib’anb’ilaq ut k’uulanb’ilaq “jun esil chirix chixjunil li kʼaʼaq re ru nim xwankil” nak’ulman sa’ lix Iglees (Tzol’leb’ ut Sumwank 69:3; chi’ilmanq ajwi’ raqal 5; Alma 37:2).

Li junjunq chi ch’uut re li Iglees tento tixtz’iib’a resil chixjunil li k’a’aq re ru nim xwankil li nak’ulman sa’ li ch’uut a’an.

Xk’uulankil jun esilal a’an jun musiq’ejil k’anjel li tixkawob’resi lix paab’aaleb’ li neke’tz’iib’ank re ut li neke’ilok re.

Laj tz’iib’ re oqech malaj jun laj tenq’ re laj tz’iib’ re oqech naxkawresi li resilal li oqech. Li obiispil naxb’aanu ajwi’ a’an choq’ re li teep. Naru natawman li na’leb’ chirix xb’aanunkil a’in sa’ Historias anuales de estaca, distrito y misión sa’ ChurchofJesusChrist.org.

33.8

Ink’a’ xyeeb’al resileb’ li tz’iib’anb’il hu

Ink’a’ naru xyeeb’al resileb’ li tz’iib’anb’il esil re li Iglees, maak’a’ naxye ma tz’iib’anb’ileb’ chiru hu malaj sa’ ulul ch’iich’. A’aneb’ a’in li tz’iib’anb’il na’leb’ a’an:

• Xhuhil li komonil.

• Resil li tumin.

• Eb’ li kok’ raqalil reheb’ li ch’utam.

• Eb’ li jar paay chi hu ut esil (jo’eb’ li esil chirix li ch’uut re komonil).

Eb’ laj jolominel neke’xk’e reetal naq li na’leb’ li k’eeb’il xb’aaneb’ li komon:

• Ink’a’ naxq’ax ru li ajb’il ru xb’aan li Iglees.

• Na’oksiman ka’ajwi’ re xb’aanunkil lix k’ulub’anb’il k’anjel li Iglees.

• Nak’eeman ka’ajwi’ reheb’ li ani k’eeb’ileb’ xwankil chiroksinkil.

Li na’leb’ li k’uulanb’il sa’ ulul ch’iich’ tento naq kolb’ilaq rix chi us (chi’ilmanq 33.9.1).

33.9

Xk’uulankileb’ li tz’iib’anb’il esil

33.9.1

Li kolok-ix

Chixjunileb’ li tz’iib’anb’il esil ut k’uulanb’il na’leb’ re li Iglees tento naq kolb’ilaqeb’ rix re naq ink’a’ te’oksimanq, te’jalmanq, te’sachmanq, malaj te’wotzmanq chi maak’a’ li liceens. Tento naq k’uulanb’ilaq chixjunil a’an sa’ jun na’ajej kolb’il rix.

Wi nasachman malaj na’elq’aman jun ulul ch’iich’ malaj k’uuleb’aal li eechaninb’il xb’aan li Iglees, tento naq taayeemanq resil chi tikto sa’ incidents.ChurchofJesusChrist.org. Tento ajwi’ naq taayeemanq resil naq x’oksiman li na’leb’ re li Iglees chi ink’a’ tiik ru.

33.9.1.1

Eb’ li nombre de usuario ut contraseña

Tento naq eb’ li awa’b’ej re oqech, li obiisp, ut xkomoneb’ chik aj jolominel maajo’q’e te’xwotz lix nombre de usario chi moko eb’ lix contraseña re xk’anjeleb’aal li Iglees rik’ineb’ laj tenq’ aj k’ehol na’leb’, eb’ laj tz’iib’, eb’ li jolomil aj tenq’anel, malaj yalaq ani chik.

33.9.1.3

Li privacidad de datos

Wankeb’ naab’al li tenamit li wankeb’ xchaq’rab’ chirix li privacidad de datos li neke’xye chan ru naru na’oksiman li na’leb’ chirixeb’ li kristiaan. A’an a’in yoo chi aatinak chirix li k’a’ru tz’iib’anb’il sa’eb’ lix huhil li komonil ut xkomoneb’ chik li tz’iib’anb’il esil re li Iglees natawman wi’ li na’leb’ chirixeb’ li kristiaan. Eb’ laj jolominel li wankeb’ xpatz’om chirix lix k’anjelankileb’ li chaq’rab’ chirix li privacidad de datos sa’ xk’uulankileb’ li tz’iib’anb’il esil re li Iglees sa’ li na’ajej wankeb’ wi’ naru neke’aatinak rik’in li oficiin re privacidad de datos de la Iglesia sa’ [e-mail].