38.

Kakien ko im Unin Tōl ko an Kabun̄ in

38.1

Bōk Koņaan ilo Kabun̄ in

Jemedwōj ilo Ilan̄ ej iakwe ajri ro Nejin. “Aolep rej āinwōt juon n̄an Anij,” im Ej kūr aolep “n̄an itok n̄an Ippān im bōk leen em̧m̧an eo An” (2 Nipai 26:33).

38.1.1

Etal n̄an Kweilo̧k ko an Kabun̄ in

Aolep rej ruwainene n̄an etal n̄an kweilo̧k in kwojkwoj eo, kweilo̧k ko ilo Jabōt ko jet, im m̧akūtkūt in iiaio ippān doon ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ritōl eo ej tōl ej eddoik n̄an kanooj lale bwe aolep ro rej pād ren kautiej jikin ko rekwojarjar.

Ro rej pād rej aikuj in jab kōm̧m̧an kauwaron̄ron̄ ko ak kōm̧ad ko rejjab jetjet n̄an kabun̄ jar ak jibadbad ko jet an kweilo̧k eo. Aolep iiō dettan im m̧wil ko remenin aikuj an kweilo̧k ko rokoktaktak an Kabun̄ in im m̧akūtkūt ko rej aikuj in kautieji. Ej menin aikuj n̄an bōjrak jān m̧wil in jekjek ko an juon ripālele ak rijera me rejekkar ilobōlej im jān nuknuk ko jej kaņōki ak wāween m̧wijbar ko reletok lon̄iin̄ armej. Ej barainwōt bōbrae an waļo̧k naan in politic ko ak ekōnono kōn kajineet ko ilo m̧ōm̧ an kanniōk ak paaktok ko jet an juon make ilo juon wāween eo me ej kam̧ad ak kappel armej jān kweilo̧k ko me rej mije wōt Rilo̧mo̧o̧r.

Eļan̄n̄e ewōr m̧wil ko rejekkar, bisop eo ak stake būreejtōn eo rej kōm̧m̧ani ko̧o̧njeļ ko reņojak ak ittino̧ ilo juon jitbōn iakwe. Ej kōketak ro me m̧wil eo aer ejekkar n̄an m̧akūtkūt eo n̄an jibadbad eo n̄an jipan̄ dāpij wōt kwojarjar eo an jikin eo n̄an aolep ro rej pād kōn juon kōmejaja aorōk ilo kabun̄ jar n̄an Jemedwōj Ilan̄ im Rilo̧mo̧o̧r.

Im̧ōnjar ko an Kabun̄ in rej m̧weien Kabun̄ in rej lokjak n̄an kakien ko an Kabun̄ in. Armej ro rej m̧akoko n̄an ļoor unin tōl kein naaj kajjitōk ippāer ilo juon wāween kautiej n̄an jab etal n̄an kweilo̧k ko im m̧akūtkūt ko an Kabun̄ in.

38.2

Kakien ko an Kain̄i ko im Kōjeraam̧m̧an ko

N̄an meļeļe ko kōn kain̄i ko im kōjeraam̧m̧an ko lale jebta 18. N̄an meļeļe ko kōn kain̄i ko an tampeļ lale jebta 27 im 28. Bisop eo emaron̄ kepaak stake būreejtōn eo eļan̄n̄e ewōr aer kajjitōk ko. Stake būreejtōn ro remaron̄ kepaake Eria Būreejtōnji eo eļan̄n̄e elōn̄ aer kajjitōk ko.

38.3

M̧are an Kien

Ritōl ro an Kabun̄ in rej rōjan̄ membōr ro bwe ren karbab n̄an m̧are ilo tampeļ im maron̄ m̧are im liāp ilo tampeļ eo. Eļan̄n̄e kōtļo̧k jān kakien ko an ijo jokwe ie, ritōl ro an Kabun̄ in remaron̄, ijoke, kōm̧m̧ani m̧are ko ilo kien.

M̧are in kien ko rej aikūj in loore laajrak ko an kien eo ilo jikin eo rej bed ie im m̧are eo ej kōm̧m̧an.

38.3.1

Wōn Eo Emaron̄ Kōm̧m̧ane M̧are An Kien

N̄e emālim jān kien eo an jikin eo, opija ro an Kabun̄ kiiō remaron̄ jerbale ilo kūr eo aer n̄an kōm̧mane juon m̧are an kien:

• Mijen būreejtōn

• Stake būreejtōn

• District būreejtōn

• Bisop eo

• Branch būreejtōn

Opija rein wōt remaron̄ kōm̧m̧an m̧are ilo kien ikōtaan juon em̧m̧aan im juon kōrā. N̄e aolep jekjek kein rej jerbal:

• Ļeo ak lio pālele rej juon membōr in Kabun̄ in ak wōr raan/allōn̄/iiō in peptaij.

• Jim̧or lio ak ļeo pālele rekoot in membōr eo an ej ak naaj ālkin peptaij, ilo iunit an Kabun̄ in me opija eo ej tōl.

• Opija eo an Kabun̄ in ewōr an mālim in kōm̧m̧an m̧are ko ilo kien ijo m̧are eo ej bōk jikin ie.

38.3.4

Kōm̧m̧an M̧are in Kien ilo Im̧ōnjar ko

Iien kōm̧are eo emaron̄ kōm̧m̧an ilo m̧ōnjar eo an Kabun̄ in eļan̄n̄e ejjab kōm̧m̧an menin apan̄ ko ilo iien m̧akūtkūt ko an Kabun̄ ko. Iien kōm̧are ko raikuj jab kōm̧m̧an ilo raan in Jabōt ak ilo jotanin M̧ande. Kōm̧are ko kōm̧m̧ani ilo Im̧ōnjar ko an Kabun̄ in raikuj kadu im polel. Al ko raikuj kwojarjar, kautiej, im kalōn̄lōn̄.

M̧are ko remaron̄ kōm̧m̧an ilo jikin jar eo, cultural hall eo, ak bar juon ruum̧ em̧m̧an. M̧are ko rej aikuj ļoor unin tōl ko n̄an jejjet in kōjerbal im̧ōnjar eo.

38.3.6

M̧are ko an Kien

N̄an kōm̧m̧ane juon kōm̧are an kien, opija eo an Kabun̄ in ej ba n̄an ripālele ro im ba, “Jouj im jibwe anbwijmaron̄ in pein doon.” Innām ej ba, “[Likieo in etan em̧m̧aan eo] im [likieo in ettan kōrā eo], kom̧ro ej bōk anbwijm̧aron̄ in pein doon āinwōt juōn kōkaļļe in bujen eo kom̧iro naaj kōm̧m̧ane kiiō im̧aan Anij im rikam̧ool rein.” (Ripālele ro remaron̄ kālet ak kile rikam̧ool ro m̧okta jān iien eo.)

Innām ritōl eo ej kūr em̧m̧aan eo im ba, “[Likieo in etan], kwōj ke bōk [likieo in etan kōrā eo] bwe en pāleem̧, jen kwe make im kar kālet ilo kallim̧ur āinwōt naaj m̧ōttam̧ im ejjāmin bar wōr ijjelo̧kin. Bwe kwonaaj kam̧ool aolepān kien ko im kallim̧ur ko ikkijien am̧ pālele, im kwonaaj ke pād wōt ippān āinwōt ļeo pāleen, im kwonaaj kautiej e im iakwe e, im kōjparok e toon wōt amiro mour?”

Ļeo ej uwaak im ba, “Aaet” ak “Inaaj.”

Innām opija eo an Kabun̄ in ej kūr lieo im ba, “[likieo in etan lieo], kwōj bōk ke [likieo in etan ļeo] bwe en pāleem̧, jen kwe make im kar kālet ilo kallim̧ur āinwōt naaj m̧ōttam̧ im ejjāmin bar wōr ijjelo̧kin. Bwe kwonaaj kam̧ool aolepān kien ko im kallim̧ur ko ikkijien am̧ pālele, im kwonaaj ke pād wōt ippān āinwōt lieo pāleen, im kwonaaj kautiej e im iakwe e, im kōjparok e toon wōt amiro mour?”

Kōrā eo ej uwaak im ba, “Aaet” ak “Inaaj.”

Innām opija eo an Kabun̄ in ej kōnono n̄an ripālele ro im ba: “Kōn maron̄ eo letok ioō āinwōt juon elder an Kabun̄ eo an Jisōs Kraist im Armej ro Rekwojarjar ilo Raan Ko Āliktata, ij kūr komiro [etan ļeo] im [etan lio], ļeo im lio pālele, ekkar n̄an kien im kabun̄ toon wōt amiro pād im mour.”

(Bar juon naan nan juon ritol jar ejjab jerbal ainwot opija in tol an Kabun in: “Kōn mālim in letok ioō ainwōt chaplain ilo [branch ko ilo jikin tariņae ak doulul ko an kien], ij kūr komiro, [etan ļeo] im [etan ļieo] ļeo im lieo pālele, ekkar n̄an kien im kabun̄ toon wōt amiro pād im mour.”)

“Anij en kōjeram̧m̧an kom̧ro bwe en juon pālele eo elem̧ōnōnō ippān doon, im En kōjeraam̧m̧an n̄an kōjparok kallim̧ur in ekwojarjar komiro ekar kōm̧m̧ane. Kōjeram̧m̧an in likūt ioomir ilo etan Jisōs Kraist, amen.”

Kūr in n̄an um̧aik doon āinwōt ļeo pālele im lio pālele ej amiro wōt pepe, pedped wōt ioon m̧anit im imminene.

38.4

Kakien ko kōn Liāp

Kain̄i in liāp ko an tampeļ rej kobaik baam̧le ko n̄an indeeo āinwōt membōr ro rej kajjieon̄ in kōjparok bujen ko rej kōm̧m̧an n̄e rej būki kain̄i ko. Kain̄i ko an liāp ekoba:

• Liāp an ļeo im lio pālele

• Liāpe an ajri ro n̄an ro jineer im jemeer

Ro rej kōjparok bujen ko renaaj dāpdep wōt kōn kōjeraam̧m̧an ko an kajjojo letok ilo iien liāp eo. En̄in ej jekjek eo men̄e eo pāleer ekar rube bujen ko ak joļo̧k e make jān m̧are eo.

Ajri ro retiljek ro rej liāp n̄an pāāren ro aer ak ļotak ilo bujen rej dāpdep wōt ilo kōjeraam̧m̧an ko indeeo an ro jineer im jemāer. En̄in ej jekjek eo n̄e ro jineer im jemāer rej kāānjōļe m̧are in liāp eo aer, joļo̧k rekoot in membōr eo aer jān Kabun̄ in, ak make bukweļo̧k etāer jān Kabun̄ in.

Membōr ro rej aikuj ko̧o̧njeļ ippān bisop eo aer eļan̄n̄e ewōr aer kajjitōk ko kōn kakien ko an liāp. Bisop eo ej kūrļo̧k stake būreejtōn eo n̄e ewōr an kajjitōk. Stake būreejtōn eo emaron̄ kūrļo̧k tampeļ būreejtōnji eo ilo tampeļ district eo aer, Eria Būreejtōnji eo, ak Opiij eo an Būreejtōnji eo Kein Kajuon n̄e ewōr aer kajjitōk.

38.5

Nuknuk in Tampeļ im Kaarmen ko

38.5.1

Nuknuk in Tampeļ

Ilo iien bōk menin letok kwojarjar im kain̄i ko an liāp ilo tampeļ eo, membōr ro an Kabun̄ in rej ekōņak nuknuk mouj. Ānbwinin kōrā eo aikuj kōkaņōk kōn kaarmen ko an tampeļ im nuknuk mouj kein rej elaajrak ijin: juon nuknuk (ak juon likko im jiln̄ij), jitokin, im juuj mour ko ak jodi ko.

Em̧m̧aan ro rej kōņak nuknuk mouj kein: juon jōōt aetokpā, nektae ak tae, jedo̧jij, jitokin, im juuj ak jodik.

Ilo iien menin letok kwojarjar eo im kain̄i ko an liāp, membōr ro rej bar kōņak jet nuknuk kōjeraam̧m̧an ilkin nuknuk mouj eo aer.

38.5.2

Ebbōk Nuknuk in Tampeļ im Kaarmen ko

Ritōl ro an stake im ward rej rōjan̄ membōr ro em̧ōj aer bōk menin letok kwojarjar eo n̄an ebbōk aer make nuknuk in tampeļ. Nuknuk in tampeļ im kaarmen ko maron̄ wiaiki jān Church Distribution store ak ilo store.ChurchofJesusChrist.org. Stake im ward kūļōk ro remaron̄ bar jipan̄ wia nuknuk ko n̄an membōr ro.

38.5.5

Ekkōņak im Kōjparok Kaarmen eo

Membōr ro rej bōk menin letok kwojarjar eo rej kōm̧m̧ane juon bujen n̄an kōņak nuknuk in tampeļ ko (kaarmen) ilo aolepen mour ko aer.

Tampeļ kaarmen ko ej juon menin kakememej bujen ko kar kōm̧m̧ani ilo tampeļ eo im, n̄e ejim̧we kōņaki ilo aolepān ad mour, renaaj jerbal āinwōt juon kein kōjparok ņae kapo im nana. Kaarmen ko aikuj in kōņaki tulowaan nuknuk ko. Rejjab aikuj in utiki jān ānbwinnūm̧ n̄an ikkure ko me kwojeļā ke komaron̄ kōm̧m̧ani ilo am̧ kōņaki kaarmen ko, im rejjab aikuj in ukōt jekjek ko aer n̄an kōttōbrak jabdewōt kain mej im ed in nuknuk ko. Membōr ro em̧ōj aer bōk mennin letok kwojarjar eo rej aikuj in pukot tōl eo an Jetōb Kwojarjar n̄an bōk uwaak in kajjitōk ko aer make kōn ekkōņak kaarmen ko.

Ej juon kōjeraam̧m̧an ekwojarjar n̄an kōņak kaarmen ko im kōm̧m̧ane āindein ej kwaļo̧k juon paaktokin in kallim̧ur eo itulowa n̄an ļoore Rilo̧mo̧o̧r Jisōs Kraist.

Ej juon men eaorōk n̄an an juon armej pepe men̄e lowa ko rej ekkaņōk ilaļ tok kaarmen ak ilōn̄in kaarmen ko an tampeļ.

Lale 26.3.3.

38.5.7

Kakkuri Kaarmen ko Remo̧r im Nuknuk in Tampeļ Kōņaki ilo Iien ko Reļļap

Wāween kakkure kaarmen ko im remor, membōr ro rej aikūj in m̧wijjit im kakkure m̧aak ko ie. Innem membōr ro ren m̧wijjit ed eo bwe en jab allikar ke āinwōt juon kaarmen. Nuknuk ko jet remaron̄ kakkuri.

Membōr ro raikuj in leļo̧k kaarmen ko im nuknuk in tampeļ ko ilo wāweein eo em̧m̧an n̄an membōr ro jet me rekar bōk menin letok kwojarjar eo.

38.5.8

Nuknuk in Tampeļ n̄an Kallib

N̄e emaron̄, membōr ro ri-mej im raar bōk kaiñi eo aer rej aikūj in kallib kōn nuknuk tampel ko. Eļan̄n̄e m̧anit eo ilo jikin eo kwoj itok jene ak pen, innām nuknuk ko remaron̄ lemlem im likūti iturin wōt rimej eo ilowaan bo̧o̧k eo an rimej eo.

Ānbwinin em̧m̧aan aikuj kōkaņōk kōn kaarmen ko an tampeļ im nuknuk ko mouj kein rej elaajrak ijin: jōōt aitok pā mour, necktie, aitok ņe, im juju ak jodi ko. Ānbwinin kōrā eo aikuj kōkaņōk kōn kaarmen ko an tampeļ im nuknuk mouj kein rej elaajrak ijin: juon nuknuk (ak juon likko im jiln̄ij), jitokin, im juuj mour ko ak jodi ko.

Iien ekkaņōk nuknuk ko ilowaan tampeļ rej ekkaņōk āinwōt kōmeļeļeik ilo iien bōk menin letok kwojarjar eo. Robe eo ej pād ilo aeram̧ tuaņōm̧oon im ej loklok ilo to jidikdik eo ilo tuanmiin̄ ilo katim̧. Eprōn eo ej loklok im jepooļ lukom̧ To eo emouj ej bar lo̧klo̧k ilo lukom̧ im lukwoje ilo tuanmiin̄ ilo katim̧. At eo an em̧m̧aan ekkā likūt ilo turin ānbwinnin m̧ae iien iien kilōk bo̧o̧k eo. Innām at eo ituanmiin̄ in lo̧jilin̄in. Kōbare in mej eo an kōrā emaron̄ pād ilo pet eo ilo tulōn̄in bōran. Likūt kōbar in mej eo an kōrā eo m̧okta jen kallib ak kattil ej kōtmene, n̄e baam̧le eo ej ļōmņake.

38.6

Kakien ko kōn Jekjek ko Rejelet Mour Erreo

38.6.1

M̧an Loje

Irooj eaar kakien, “Kwōn jab…uror, ak kōm̧m̧an jabdewōt āinwōt men” (Katak im Bujen Ko 59:6). Kabun̄ in ej kamo̧ m̧an lo̧je kōn wōt an armej eo kōņaan limo im iiaio im jab inepata kōn bōroro̧ ak ajri eo. Membōr ro rej aikuj in jab leļo̧k er n̄an, kōm̧m̧ane, karōk er n̄an, kōļļāik n̄an, ļōmņake n̄an, ak rōjan̄ juon eo ej m̧an lo̧jeen. Jōkjōk ko wōt remaron̄ ekkar rej eļan̄n̄e:

• An waļo̧k Bōroro jān kōmakoko in rāip ak kōpa.

• Juon taktō eo ej lo bwe mour ak ājmour eo an mama eo ej pād ilo kauwōtata.

• Juon taktō eo ej lo bwe ewōr an ajriieo me ejjan̄in ļotak jipikpik ilo ānbwin ak wōtam̧we im eban mour ajri eo ālkin an nej ļotak tok.

Jekdoon ak jekjek kein rejjab kajju kōm̧m̧an bwe armej eo en wōnm̧aanļo̧k wōt im m̧an lo̧jien. M̧an lo̧jen ej juon men eļap. Ej aikuj watōke ālkin wōt an armej eo ej bōk edd in kar bōk kape kōn jar. Membōr ro rej aikuj kōnono ippān bisop ro aer āinwōt m̧ōttan jerbal in.

38.6.2

Kakkure

Kakkure ej juon jerbal enana ak kowaan ro jet ilo juon wāween me ej kōmetak armej ilo ānbwin, m̧ōm̧ an kanniōk, en̄jake, ak ikkijeen jāān. Kabun̄ in ej katakin bwe kakkure ejjab maron̄ bōk jikin ilo jabdewōt wāween ko. Ro im rej kowaan ak kakkure ro pāleer, ajri ro, ro jet uwaan baam̧le eo, ak jabdewōt eo im ej kakkure kien ko an Anij im armej.

Aolep membōr ro, eļaptata ro jinen im jemen im ritōl ro, em̧ōj rōjan̄ er n̄an aer jeļā im tiljek im kōm̧m̧ani aolep aer maron̄ n̄an kōjparok ajri ro im ro jet ņae kakkure. N̄e membōr ro rej jeļā kōn jabdewōt kakkure, ren riboote n̄an kien eo tōllo̧kin ak kōnono ippān bisop eo. Ritōl ro an Kabun̄ in rej aikuj būki riboot in kakkure ko im jab kowaani.

Aolep rūtto ro me rej jerbal ippān ajri ro ak jodikdik ro rej aikuj kadedeļo̧k kaminene in kōjparok eo an ajri ro im jodikdik ro ilowaan juon allōn̄ ālkin kar rejtake er (lale ProtectingChildren.ChurchofJesusChrist.org). Rej aikuj āliji kaminene eo ļo̧kin aolep jilu iiō.

N̄e kakkure ej waļo̧k, eddo eo m̧oktata im em̧ōkajtata an ritōl ro an Kabun̄ in ej n̄an jipan̄ ro rekar kowaane er ak kakkure er im n̄an kōjparok armej ro jān kowaan ak kakkure. Ritōl ro rej aikuj jab kōketak juon armej n̄an pād wōt ilo juon em̧ ak jekjek me ej kakkure ak ejjab em̧m̧an.

38.6.2.1

Abuse Help Line eo

Ilo jet laļ ko, Kabun̄ in ekar ejaake juon abuse help line eo eņojak ak ettino̧ n̄an jipan̄ stake būreejtōn ro im bisop ro. Ritōl rein rej aikuj ilo iien eo em̧ōkaj kūrļo̧k help line eo kōn aolep jekjek ko me juon armej emaron̄ kar m̧ōj aer kakkure—ak ej pād ilo kauwōtata kōn kar kakkure. Rej aikuj barāinwōt kooļ eļan̄n̄e rejeļā kōn juon membōr eo rej alooje, wiaiki, ak litok litak pija nana ko kōn ajri.

Ilo laļ ko me ejjjeļo̧k aer help line, juon bisop eo lo im jeļā kōn jekjek in kakkure ko ej aikuj in kepaak stake būreejtōn eo an. E enaaj kappukot tōl jān kapilōk ko em̧ōj kōmālimi jān kien eo an eria ilo eria opij eo.

38.6.2.2

Kapilōk ikkijeen Jekjek in Kakkure ko

Ro rej lanwōtwōt jen kakkure ekkā aer en̄taan kōn nan̄inmej in trauma. Stake būreejtōn ro im bisop ro rej lale kōn būruwōn tiriam̧o im iakwe. Rej leļo̧k kapilōk ilo jetōb im rie n̄an jipan̄ ro raar lanwōtwōt n̄an anjo̧ jen jorrāān ko an kakkure.

Jet iien ro raar lanwōtwōt kōn jorrāān rej en̄jake āliklik ak bōd. Armej rein kar kakkure er rejjab ņa ruweer kōn jerawiwi. Ritōl ro rej jipan̄ er im baam̧le ko aer jeļā kōn iakwe eo an Anij im kōmour eo me ej itok kōn Pinmuur eo an Jisōs Kraist (lale Alma 15:8; 3 Nipai 17:9).

Stake būreejtōn ro im bisop ro rej aikuj jipan̄ ro me raar kōm̧m̧ane kakkure eo n̄an ukweļo̧k im n̄an bōjrak jān m̧wil in kakkure ko aer. Eļan̄n̄e juon rūtto ekar kōm̧m̧ane juon jerawiwi in m̧ōm̧ an kanniōk ņae juon ajri, m̧wil ak iminene in emaron̄ in lukkuun in pen n̄an ukōte. Wāween eo an ukweļo̧k emaron̄ in lukkuun in aitok. Lale 38.6.2.3.

Ilo kakobaba wōt n̄an kar im̧ōk in jipan̄ eo an ritōl ro an Kabun̄, armej ro rejelet er, rikōm̧m̧an jorrāān ro, im baam̧le ko aer remaron̄ aikuj kapilōk eo etijem̧ļo̧k. N̄an meļeļe ko reļļapļo̧k, lale 31.2.6.

38.6.2.3

Kakkure Juon Ajri ak Jodikdik

Kakkure juon ajri ak jodikdik ej juon jerawiwi ekanooj in ļap (lale Luk 17:2). Āinwōt kar kōjerbale ijin, kakkure juon ajri ak jodikdik ekitbuuj men kein:

• Kakkure ilo ānbwin: Kōm̧m̧an kakkure ekanooj in ļap ilo kakkure ak kōjorrāān ānbwin. Jet kakkure ko maron̄ jab loi.

• Kakkure an m̧ōm̧ an kanniōk ak ājļor: Kōm̧m̧ane jabdewōt m̧akūtkūt an m̧ōm̧ an kanniōk ippān juon ajri ak jodikdik ak ļōmņak wōt in kar kōm̧m̧ane ak jipan̄ ro jet n̄an kōm̧m̧an kain m̧akūtkūt in. Āinwōt kar kōjerbale ijin, kakkure an m̧ōm̧ an kanniōk ejjab kitbuuj m̧akūtkūt in m̧ōm̧ an kanniōk errā kake ikōtaan ruo jodikdik ro me dettāer repaake doon.

• Kakkure ilo en̄jake: Kōjerbal jekjek ko ak naan ko n̄an lukkuun in kakkure en̄jake in kautie juon make ak aorōk an juon make ajri ak juon jodikdik. Menin ekkā an kitbuuj kakkure ko āliji im rej wōnm̧aanļo̧k wōt, iṇoṇooj, im kōmattōr ko me rej kajook im kōjaorōk. Emaron̄ in barāinwōt kitbuuj kajej tokjān en̄jake.

• Pija nana kōn ajri: lale 38.6.6.

Eļan̄n̄e juon bisop ak stake būreejtōn ej jeļā kōn ak ej eņo̧ik kakkure an juon ajri ak jodikdik, en m̧ōkaj an ļoor naan in kōmeļeļe ko ilo 38.6.2.1. E ej barāinwōt kōm̧m̧ani men ko n̄an jipan̄ kōjparok ņae eļapļo̧k kakkure eo.

Juon ko̧o̧njeļ in kajim̧we im kōkaļļe ko ilo rekoot ko remenin aikuj eļan̄n̄e juon membōr erūtto ej kakkure juon ajri ak jodikdik āinwōt kar kōmeļeļeik ilo jekjōn in. Lale barāinwōt 38.6.2.5.

38.6.2.4

Kakkure an juon RiPālele ak Bar Juon Rūtto

Emakijkij an ejjeļo̧k juon meļeļe kōn kakkure me emaron̄ jerbal ilo aolep jekjek ko. Ijello̧kin, ewōr juon men ej kwaļo̧k ekanooj in ļap ilo m̧wil in kakkure. Kakōļļe in eļap jān jet iien ilo kōjerbal naan ko rellāj n̄an kōm̧m̧ani kakkure ko reļļap.

Eļan̄n̄e juon bisop ak stake būreejtōn ej jeļā kōn kakkure an juon ripālele ak bar juon rūtto, en m̧ōkaj an ļoor naan in kōmeļeļe ko ilo 38.6.2.1. E ej barāinwōt kōm̧m̧ani men ko n̄an jipan̄ kōjparok ņae eļapļo̧k kakkure eo.

Ritōl ro rej kappukōt tōl eo an Jetōb n̄an kōmlet eļan̄n̄e kapilōk an juon make ak juon ko̧o̧njeļ in kajim̧we ej juon jekjek eo ekkar taa n̄an ņa mejļan kakkure eo. Rej maron̄ barāinwōt kapilōk ippān ritōl priesthood eo aer kōn jekjek eo. Ijo wōt ke, jabdewōt kakkure an juon pālele ak bar juon rūtto me kar kōllaajrak ilo m̧wil ko kōnono kaki tok ālik ej menin aikuj n̄an kōm̧m̧ane juon ko̧o̧njeļ in kajim̧we.

• Kakkure ilo ānbwin: Kōm̧m̧an kakkure ekanooj in ļap ilo kakkure ak kōjorrāān ānbwin. Jet kakkure ko maron̄ jab loi.

• Kakkure an m̧ōm̧ an kanniōk: Lale jekjek ko rejeņolo̧k ilo 38.6.18.3.

• Kakkure an en̄jake: Kōjerbal jekjek ko ak naan ko n̄an lukkuun in kakkure en̄jake in kautiej juon make ak aorōk an juon make an juon ajri ak juon jodikdik. Menin ekkā an kitbuuj kakkure ko āliji im rej wōnm̧aanļo̧k wōt, iṇoṇooj, im kōmattōr ko me rej kajook im kōjaorōk.

• Kakkure ikkijeen jāān: Kōjerbali jāān ko an bar juon armej. Menin emaron̄ kitbuuj jab jetjet n̄an kien ak mālim kōjerbal men ko m̧weien, jāān ko, ak men ko jet raorōk an juon armej. Emaron̄ barāinwōt kitbuuj ko̧o̧t ilo an wōr kajoor ikkijeen jāān jān bar juon armej. Emaron̄ in kitbuuj kajoor ikkijeen jāān n̄an kamijak armej.

38.6.2.5

Kūr ko an Kabun̄ in, peba in mālim n̄an deļo̧n̄e tampeļ, im Rekoot in Membōr Ewōr Naan in Kōmeļeļe ko ie

Membōr ro me rekar kakkure ro jet raikuj in jab leļo̧k n̄an aer kūr ko an Kabun̄ in im maron̄ jab wōr juon aer peba in mālim n̄an deļo̧n̄e tampeļ m̧ae iien eo em̧ōj aer ukweļo̧k im mo̧ ko an membōr eo em̧ōj julo̧ki.

Eļan̄n̄e juon armej ekar kakkure juon ajri ak jodikdik ilo m̧ōm̧ an kanniōk ak lukkuun in kar kakkure juon ajri ak jodikdik ilo en̄jake ak kanniōk, rekoot in membōr eo an naaj wōr naan in kōmeļeļe ie ak kōkaļļe. Ļeo ak lio aikuj in jab leļo̧k jabdewōt kūr ak kappe n̄an jerbal ippān ajri ak jodikdik ie. Menin ekitbuuj jab leļo̧k juon ijjitōn̄ an jerbal in karejar n̄an juon baam̧le eo ewōr jodikdik ro ak ajri ro ilo m̧weo. Ebar āinwōt aikuj jab wōr juon jodikdik āinwōt m̧ōttan ilo jerbal in karejar eo. Mo̧ kein rej aikuj pād wōt ijello̧kin n̄e Būreejtōnji eo Kein Kajuon rej kōmālim kōm̧akūt naan in kōmeļeļe ko ilo rekoot eo an.

38.6.2.6

Stake im Ward Ko̧o̧njeļ ko

Ilo kweilo̧k in ko̧o̧njeļ ko an stake im ward, stake būreejtōnji ro im bisoprik ro rej aolep etale kakien ko an Kabun̄ in im unin tōl ko ņan bōbrae im uwaak n̄ae kōwaane ak kakkure. Ritōl ro im ro uwaan ko̧o̧njeļ eo rej aikuj pukot tōl an Jetōb ilo aer katakin im kōnono kōn unin kōnono raorōk.

Membōr in Ko̧o̧njeļ eo rej barāinwōt aikuj kadedeikļo̧k kaminenen ko an ajri im jodikdik ro (lale 38.6.2

38.6.2.7

Kōm̧m̧an ko Rejelet Kien Ņae Kakkure

Eļan̄n̄e m̧akūtkūt ko rekakkure an juon membōr raar kakkure kien ko kar kōm̧m̧ani, bisop eo ak stake būreejtōn eo rej aikuj kōketak membōr eo n̄an riboote m̧akūtkūt kein n̄an rijerbal in būlijmāān ro ak rijerbal ro jet remālim an kien.

Ritōl ro an Kabun̄ in im membōr ro rej aikuj in kakūrm̧ool aolep eddo ko an kien n̄an riboote kowaane ak kakkure eo n̄an rijerbal ro remālim.

38.6.4

Bōbrae Nāje

En̄iin ej iien eo em̧m̧an kōn an ripālele ro im raar maron̄ in kieotok ajiri ro jan aer bōktok ānbwinin wabaņbaņ n̄an ajiri in jetōb ro nejin Anij, ro im rej naaj bōk eddo in n̄an kaajiriri im karutoļo̧k (lale 2.1.3). Jokālet eo n̄an jon̄an jete ajri ro im n̄aat n̄an neji ej aerro wōt im en kōtaer wōt. Ej aikuj kōtaan wōt ripālele ro im Irooj.

38.6.5

Erreo im M̧ool

Kien eo an Irooj kōn erreo ej:

• Bōjrak jān jemjerā ko an m̧ōm̧ an kanniōk itulikin juon m̧are an juon em̧m̧aan im juon kōrā.

• M̧ool ilowaan m̧are eo.

Bwilbwil in iakwe eo ilo kanniōk ikōtaan ļeo im lio pālele ej aikuj in kar aiboojoj im kwojarjar. Ej ekkapit jān Anij n̄an ejaaki ajri ro im n̄an kwaļo̧k iakwe ikōtaan ļeo im lio pālele.

38.6.6

Pija Nana n̄an Ajri ro

Kabun̄ in ejjab errā ilo jabdewōt jekjek an pija nana ko n̄an ajri. Eļan̄n̄e bisop eo ak stake būreejtōn eo rej jeļā bwe juon membōr ej bōk kōņaan ilo pija nana kōn ajri, en m̧ōkaj an ļoor naan in kōmeļeļe ko ilo 38.6.2.1.

38.6.8

Joļo̧k Jikin Nejnej an Kōrā ro

Kabun̄ in ejjab errā ilo joļo̧k jikin nejnej ko an kōrā ro.

38.6.10

Kōpa

Kabun̄ in ejjab errā ilo jabdewōt jekjek in kōpa. Āinwōt kar kōjerbal ijin, kōpa ej jemjerā ko an m̧ōm̧ an kanniōk ikōtaan:

• Juon iaan m̧am̧a ak baba im ajri eo nejin.

• Juon iaan būbū ak jim̧m̧a im ajri eo jibūn.

• Jemjān jemjati ro.

• Nej jemān ak nej jinen im eo nej nejin.

Āinwōt kar kōjerbal ijin, ajri,lajibūbū,jemjān jemjati ko,nej nejin leddik, im nej nejin ļaddik ekoba lukkun nejiū, kōkajriri, nej nejiū, ri-bōk eddo n̄an ajiri ro ejelok rilale er

N̄e juon ajri ak juon jodikdik eo kar kakkure kōn kōpa, bisop eo ak stake būreejtōn eo ej kūrļo̧k abuse help line eo an Kabun̄ in ilo laļ ko ijo ewōr ie (lale 38.6.2.1). Ilo laļ ko jet, stake būreejtōn eo ej kappukot tōl jān eria legal ko̧o̧njeļ eo ilo eria opij eo. Ej barāinwōt rōjan̄ n̄an kōnono ippān rijerbal ro an Family Service ak menija eo an welfare im self-reliance ilo eria opiij.

Juon ko̧o̧njeļ in kajim̧we im rekoot eo ewōr ie kōmeļeļe ak kōkaļļe ko remenin aikuj eļan̄n̄e juon membōr ej kōm̧m̧an kōpa. Kōpa enan̄in aolep iien ej aikuj bwe Kabun̄ in ej joļo̧k rekoot ko an membōr eo.

Eļan̄n̄e juon ajri ak juon jodikdik ej kōpa, stake būreejtōn eo ej kepaak Opij eo an Būreejtōnji eo Kein Kajuon n̄an tōl.

Ro rej lanwōtwōt jen kōpa ekkā aer en̄taan kōn trauma. Ritōl ro rej jipan̄ kōn būruwōn tiriam̧o im iakwe. Rej leļo̧k kapilōk ilo jetōb im rei n̄an jipan̄ ro raar lanwōtwōt n̄an anjo̧ jen jorrāān ko an kōpa.

Jet iin ro raar lanwōtwōt kōn jorrāān rej en̄jake āliklik ak bōd. Armej rein kar kakkure er rejjab ņa ruweer kōn jerawiwi. Ritōl ro rej jipan̄ er im baam̧le ko aer meļeļe kōn iakwe eo an Anij im kōmour me ej itok kōn Pinmuur eo an Jisōs Kraist (lale Alma 15:8; 3 Nipai 17:9).

Ilo kakobaba wōt n̄an kar im̧we in jipan̄ eo an ritōl ro an Kabun̄, armej ro rejelet er, rikōm̧m̧an jorrāān ro, im baam̧le ko aer remaron̄ aikuj kapilōk eo etijem̧ļo̧k. N̄an meļeļe, lale 38.6.18.2

38.6.12

Ekkapel

Ekkapel rej jerbal ko remarok im rej tōlļo̧k n̄an m̧ōņ. Ej kakkure tōmak ilo Kraist.

Ekkapel rej kabun̄jar n̄an Setan. Ej bar kakkure m̧akūtkūt ko me rejjab ekkeijeļo̧k ippān gospel eo an Jisōs Kraist. Makūtkūt rot kein ekoba (ak rejjab limit) riab, kaje, im kamminene in kamour ko me rej kowaan kajoor in priesthood eo an Anij (lale Moronai 7:11–17).

Ro uwaan Kabun̄ rej aikuj in jab kobaļo̧k ilo jab jōkjōk kabun̄ jar n̄an Setan ak bōk koņaer ilo jabdewōt wāween ekkapel. Rej aikuj in jab kappukot jerbal ilo marok kōn bwebwenato ilo kweilo̧k ko an Kabun̄ in.

38.6.13

Pija ko Renana

Kabun̄ in ej kamo̧ pija nana ilo jabdewōt jekjek. Kōjerbal pija nana an jabdewōt kain ej kakkure mour ko an kajjojo armej, baam̧le ko, im jukjuk in pād. Ej barāinwōt kadiwōjļo̧k Jetōb eo an Irooj. Membōr ro an Kabun̄ in reaikuj bōbare aolep wāween ko an pija nana ko im jum̧aeik an waļo̧k, kajeded, im kōjerbal.

Ko̧o̧njeļ in kajim̧we an juon make im mo ko reddik an ro rej uwaan rej eiten aolep iien bwe n̄an jipan̄ juon armej ukweļo̧k jān kōjerbal pija nana ko. Ko̧o̧njeļ in kajim̧we rejjab ekkā aer kōm̧man. Ijo wōt ke, juon ko̧o̧njeļ emaron̄ menin aikuj n̄e ej ļapļo̧k ak kanooj po ilo kōjerbal pija nana ko me ekar kōm̧m̧an eļap kakkure n̄an m̧are an juon membōr ak baam̧le (lale 38.6.5). Juon ko̧o̧njeļ in kajim̧we emenin aikuj eļan̄n̄e juon membōr ej kōm̧m̧an, kwaļo̧k, bōke, ak āliji an alooje pija nana ko kōn ajri (lale 38.6.6).

38.6.14

Kalijōkļo̧k

Aolep armej rej ro nejin Anij. Aolep rej būratōr im sister ro ro rej m̧ōttan baam̧le eo ekwojarjar an Anij (lale “Baam̧le Eo: Juon Naan in Kean̄ n̄an Laļin”). Anij “eaar kōm̧anm̧an jān juon wōt” (Jerbal 17:26). “Aolep rej āinwōt juon” n̄an E (2 Nipai 26:33). Kajjojo armej rej “aorōk ilo im̧aan mejān āinwōt bar juon” (Jekab 2:21).

Kalijōkļo̧k eban jejjet ippān naan eo an Anij. Em̧m̧an im jab em̧m̧an ippān Anij ej pedped ioon wujlepļo̧k n̄an E im kien ko An, ejjab kōn kōļar in armej ak m̧wiļ ko jet.

Kabun̄ in ej kūr ioon aolep armej n̄an kabōjrak m̧wiļ im m̧akūtkūt in kalijōkļo̧k n̄an jabdewōt doulul ak armej. Membōr ro an Kabun̄ in rej aikuj tōl ilo karelleel n̄an kwaļo̧k kautiej kōn aolep ajri ro nejin Anij. Membōr ro rej ļoore kien ko an Rilo̧mo̧o̧r eo n̄an iakwe ro jet (lale Matu 22:35-39). Rej kajjieon̄ in kōm̧m̧an em̧m̧an n̄an aolep armej, joļo̧k kalijōkļo̧k an jabdewōt men. Ekoba kalijōkļo̧k jekdo̧o̧n armej, m̧wiļ, laļ, bwij, m̧aan ak kōrā, dettan, utam̧we, paoktokier, tōmak ak jab tōmak, im m̧wiļ.

38.6.15

Ikdeelel ko Ikijeen Em̧m̧aan ej Pālele Em̧m̧aan im Kōrā ej Pālele Kōrā im Mwil ko Aer

Kabun̄ in ej rōjan̄ baam̧le ko im membōr ro n̄an tōpar im jipan̄ ļo̧k, iakwe, im kautiej armej ro me rej kōņaan ro jet me kadkad eo aer wōt juon. Kabun̄ in ej kōļapļo̧k meļeļe eo ilo an ļap ilo jukjukin pād eo me ej kwaļo̧k katak ko kōn jouj, en̄jake karuwainene, iakwe n̄an ro jet, im kautiej aolep armej. Kabun̄ in ejjeļo̧k an ļo̧k ilo men ko rej kōm̧m̧an an ro ewōr same-sex attraction ippāer.

Kien ko an Anij ej kam̧o aolep m̧wil ko rettoon, emaron̄ kōņaan an ruo em̧m̧aan ak ruo kōrā. Ritōl ro an Kabun̄ in rej leļo̧k kapilōk n̄an membōr ro me rej kakkure kien erreo. Ritōl ro rej jipan̄ er bōk juon meļeļe ealikkar kōn tōmak ilo Jisōs Kraist im Pinmuur eo An, jerbal in ukweļo̧k, im kōttōpar eo aer ilo mour in.

En̄jake eo an kōņak juon eo kōjellin wōt (same-sex) ejjab juon jerawiwi. Membōr ro ewōr ippāer en̄jake kein im ejjab kappukōt ak kōm̧m̧ani rej mour ekkar n̄an karōk eo an Jemedwōj Ilan̄ n̄an ajri ro Nejin im kōn katak ko an Kabun̄ in. Ritōl ro rej rie im kōketak er ilo aer ņa mejeļan n̄an mour ekkar n̄an kien ko an Irooj. Membōr ro ewōr ippāer en̄jake kein maron̄ bōk kūr ko an Kabun̄ in, bōk peba in mālim an tampeļ, im bōk kain̄i ko an tampeļ eļan̄n̄e rej erreo. Em̧m̧aan membōr ro an Kabun̄ in remaron̄ bōk im kōjerbal priesthood eo.

Aolep membōr ro rej kōjparok bujen ko aer naaj bōk aolep kōjeraam̧m̧an ko kar kallim̧ur ilo indeeo men̄e ak jekjek ko aer rej kōm̧m̧an bwe ren būki kōjeraam̧m̧an ko an m̧are indeeo im priesthood eo ilo mour in (lale Mosaia 2:41).

38.6.16

M̧are an Ruo Em̧m̧aan ak Ruo Kōrā

Āinwōt juon pedpedin katak, pedped wōt ioon jeje ko rekwojarjar, Kabun̄ eo kapene bwe m̧are ikōtaan juon em̧aan im juōn kōrā eaorōk n̄an karōk eo an eo Rikōm̧anm̧an n̄an mour indeeo eo an Ajiri ro Nejin. Kabun̄ in ej barāinwōt kapene bwe kien eo an Anij ej kalikkar m̧are āinwōt jim̧we im mālim ikōtaan juon em̧maan im juon kōrā.

38.6.17

Jeļāļo̧kijeņ ilo Nāmemein Armej

Ro jinen im jemāer epād ippāer eddo in n̄an jeļāļo̧kijeņ eo kōn nāmemein armej. Ro jinen im jemen rej aikuj m̧ool, meļeļe, n̄an kōnono ippān ro nejier kōn ājmour, mour kwojarjar.

38.6.18

Kakkure ilo Mōm̧ an Kanniōk, Kakkure, im Kakkure ko Jet An Mōm an Kanniōk

Kabun̄ in ej kamo̧ kakkure in m̧ōm̧ an kanniōk Āinwōt kar kōjerbal ijin, kakkure in m̧ōm̧ an kanniōk ej kōmeļeļeik āinwōt kōm̧m̧an jabdewōt kain m̧akūtkūt in m̧ōm̧ an kanniōk ilo an armej eo jab kōņaan. M̧akūtkūt in m̧ōm̧ an kanniōk ippān juon armej me ejjab leļo̧k maron̄ eo n̄an kōm̧m̧ane ej watōke kakkure in m̧ōm̧ an kanniōk. Kakkure ilo m̧ōm̧ an kanniōk emaron̄ waļo̧k ippān ļeo ak lieo pālele ak jemjerā ko. N̄an meļeļe ko kōn kakkure in m̧ōm̧ an kanniōk an juon ajri ak jodikdik, lale 38.6.2.3.

Kakkure in m̧ōm̧ an kanniōk ekitbuuj elōn̄ jekjek in m̧akūtkūt ko, jān jerbal nana (harassment) n̄an kakkure (assault). Emaron̄ in waļo̧k ilo jibwe ānbwin, kōnono, im ilo bar wāween ko jet. N̄an meļeļe n̄an ko̧o̧njeļ e membōr ro ro raar en̄jake kakkure in m̧ōm̧ an kanniōk, kakkure, ak kakkure ko jet kōn m̧ōm an kanniōk, lale 38.6.18.2.

Eļan̄n̄e membōr ro rej jeļā kōn kakkure in m̧ōm̧ an kanniōk, rej bōk bun̄tōn eo n̄an bōbrae armej ro kar kakkure er im ro jet ilo iien eo em̧ōkaj tata. Menin ekitbuuj kōnaanōkļo̧k rikien ro ewōr aer maron̄ ilo wāween eo im bisop eo ak stake būreejtōn eo. Eļan̄n̄e iien ak jikin ko rettoļo̧k rej bōbrae e jān kōm̧m̧ane menin, ej ļoor kōmeļeļe ko ilo 38.6.2.

38.6.18.2

Ko̧o̧njeļ kōn ro raar lanwōtwōt kōn kakkure ilo m̧ōm̧ an kanniōk, kakkure, im kakkure ko jet an m̧ōm an kanniōk

Ro raar lanwōtwōt kōn kakkure ilo m̧ōm̧ an kanniōk, kakkure, im kakkure ko jet an m̧ōm an kanniōk jorrāān kōn trauma. N̄e rej kōnono ippān juon bisop ak stake būreejtōn, ej jipan̄ kōn būruwōn tiriam̧o kake im iakwe. Ej leļo̧k kapilōk ilo jetōb im rie n̄an jipan̄ ro raar lanwōtwōt n̄an anjo̧ jen jorrāān ko an kakkure. Ej bar kūr Church abuse help line eo n̄an tōl ijo ekkar.

Jet iin ro raar lanwōtwōt kōn jorrāān rej en̄jake āliklik ak bōd. Armej rein kar kakkure er rejjab ņa ruweer kōn jerawiwi. Ritōl ro ren jab jekpen ņae rijorrāān eo. Rej jipan̄ rijorrāān ro im baam̧le ko aer meļeļe kōn iakwe eo an Anij im kōmour eo ej waļo̧k jān Pinmuur eo an Jisōs Kraist (lale Alma 15:8; 3 Nipai 17:9).

Ilo an membōr ro kālet n̄an kwaļo̧k meļeļe kōn jorrāān eo ak kakkure eo, ritōl ro raikuj jab kwaļo̧k jabdewōt meļeļe. Menin emaron̄ kakkur eo eaar lanwōtwōt.

Ilo kakobaba wōt n̄an kar im̧ōk in jipan̄ eo an ritōl ro an Kabun̄, armej ro rejelet er, rikōm̧m̧an jorrāān ro, im baam̧le ko aer remaron̄ aikuj kapilōk eo etijem̧ļo̧k. N̄an meļeļe ko reļļapļo̧k, lale 31.3.6.

38.6.18.3

Ro Uwaan Ko̧o̧njeļ ko

Ko̧o̧njeļ in kajim̧we emaron̄ menin aikuj n̄an juon armej eo me em̧ōj ko̧kkure ak m̧an e n̄an kōm̧m̧ani m̧ōm̧ ko an kanniōk. Juon ko̧o̧njeļ in kajim̧we emenin aikuj eļan̄n̄e membōr eo ekar reep ak kar ņa ruōn kōn bar juon jekjek in kakkure an m̧ōm̧ an kanniōk.

38.6.20

Bōk Mour

Mour wabanban ej juon menin letok eo eaiboojoj jān Anij—juon menin letok me eaikuj in aorōk im kōjparok. Kabun̄ eo ej lukkuun jum̧ae im bōbrae kilaba.

Armej ro raar ļōmņak in bōk mour raar kōņaan pukot jen jipan̄ an ānbwin, kōļmenļo̧kjeņ, en̄jake, ak jetōb. Armej rot in eaikuj iakwe, jipan̄, im jipan̄ jen baam̧le, ritōl ro an Kabun̄, im ro retijem̧ļo̧k.

Bisop eo ej leļo̧k jipan̄ an ritōl n̄e membōr eo ej ļōmņak in bōk mour ak kajjieon̄. Ej m̧ōkaj in jipan̄ membōr ro bōk jipan̄ ko retijem̧ļo̧k.

Leļo̧k iakwe em̧m̧antata ro rejitenbōro, ritōl ro, im ro retijem̧ļo̧k, bōk mour ejjab aolep iien uwaak eo. Ebōk metak ob, en̄jake, im kajjitōk ko ejjeļo̧k uwakier n̄an ro rejitenbōro im ro jet. Ritōl ro reaikuj ko̧o̧njeļ im kōnono ippān baam̧le eo. Rej leļo̧k iakwe im jipan̄.

Ejjab jim̧we bwe juon armej en bōk make mour eo an. Ijoke, Anij wōt eo emaron̄ ekajete ļōmņak ko an armej eo, kōm̧m̧an ko, im jon̄an eddo ko an (lale 1 Samuel 16:7; Katak im Bujen Ko 137:9).

Ro ekar jako juon eo ejitenbōro juon eo ekar bōk make mour remaron̄ lo kōjatdikdik im kōmour ilo Pinmuur eo an Jisōs Kraist.

38.6.23

Kajjojo Armej ro Rej Ukōt M̧ōraer jān M̧aan n̄an Kōrā ak Kōrā n̄an M̧aan

Kajjojo armej ro rej ukōt m̧ōraer jān m̧aan n̄an kōrā ak kōrā n̄an m̧aan rej jelm̧ae kapan̄pan̄ ko reppen. Ro rej membōr ak ro rejjab membōr me kile er āinwōt eo em̧ōj ukōt m̧ōrān jān m̧aan n̄an kōrā ak kōrā n̄an m̧aan—im baam̧le ko aer im ro m̧ōttaer—raikuj kōm̧m̧an n̄an er kōn mejmejkaruo, jouj, meanwōd, im juon iakwe eo eļap āinwōt eo an Kraist. Aolep rej ruwainene n̄an etal n̄an kweilo̧k in kwojkwoj eo, kweilo̧k ko jet ilo Jabōt, im iien iiaio in ippān doon ko an Kabun̄ in (lale 38.1.1).

Kōjellin (gender) ej juon kadkad emenin aikuj an karōk in m̧ōņōņō eo an Jemādwōj Ilan̄. Meļeļe eo kar ļōmņak wōt an kadkadin (gender) ilo kean̄ eo an baam̧le ej lukkuun iien ļotak. Jet armej rej en̄jake en̄jake ko an jab bab laļ in ikōtaan lukkuun kōjellin (biological sex) im kadkad eo aer (gender indentity). Āinwōt juon tōprak, remaron̄ in kile er āinwōt jet ro em̧ōj ukōt m̧ōraer. Kabun̄ in ejjeļo̧k an ļo̧k ilo men ko rej kōm̧m̧an an armej ro watōk er make āinwōt ro em̧ōj ukōt m̧ōran.

Men ko remaron̄ bōk koņaer ilo Kabun̄ in im kain̄i ko jet an priesthood rej n̄an jabdewōt kain armej (gender neutral). Armej ro em̧ōj ukōt m̧ōraer remaron̄ in peptaj im kapen āinwōt elaajrak ilo 38.2.8.10. Rej maron̄ barāinwōt bōk kwojkwoj eo im bōk kōjeraam̧m̧an ko an priesthood eo. Ijo wōt ke, kain̄i an priesthood im kain̄i ko an tampeļ rej būki ekkar n̄an kōjellin eo ilo iien ļotak (birth sex).

Ritōl ro an Kabun̄ in rej kapilōk ņae kōjerbal kein taktō ko ak m̧wijm̧wij n̄an un ko n̄an kajjieōn̄ ukōt m̧ōraer jān ta ak kōjellin armej eo me ekar ļotaktok kake (“sex reassignment”). Ritōl ro rej kapilōk bwe kōm̧m̧ani jekjek kein renaaj kōm̧m̧an an wōr mo̧ ko an membōr eo ilo Kabun̄ in.

Ritōl ro rej barāinwōt kapilōk ņae ukōt paaktok im kadkad. Ukōt paaktok im kadkad ej ukukōt wāween ekkaņōk nuknuk ak piktok, ak ukōt et ak wāween ān̄ūnn̄ūn, n̄an kwaļo̧k kadkad ak kōjellin bar juon ijjeļo̧kin lukkuun kadkadin ak kōjellin ke ekar ļotak kake. Ritōl ro rej kapilōk bwe ro me rej ukōt paaktok im kadkadier renaaj jelm̧ae jet iaan mo̧ ko an membōr ilo Kabun̄ in ilo iien eo.

Mo̧ ko ekoba bōk ak kōjerbal priesthood eo, bōk ak kōjerbal juon peba in mālim n̄an deļo̧n̄e tampeļ, im bōk jet kūr ko ilo Kabun̄ in. Mekarta jet elōn̄ men ko Kabun̄ in ej kamo̧ aer kōm̧m̧ani, jerbal ko je an Kabun̄ in rej ruwainene in kōm̧m̧ani.

Eļan̄n̄e juon membōr ej kāālet n̄an ukōt āt eo ān̄ūnn̄ūn e kake ak wāween kūr e, āt eo ekōņaan emaron̄ in likūti ilo rekoot ko an. Armej eo maron̄ ān̄ūnn̄ūn e kōn āt eo kōņaan ilo ward eo.

Jekjek ko rekanooj in okkōtaktak jān iunit n̄an iunt im armej n̄an armej. Membōr ro im ritōl ro rej kapilōk ippān doon im ippān Irooj. Eria Būreejtōnji ro renaaj jipan̄ ritōl ro ijo jokwe ie ilo aer lukkuun lale im ņa mejļan jekjek ko an kajjojo armej. Bisop ro rej bōk kapilōk ippān stake būreejtōn eo. Stake būreejtōn ro im mijen būreejtōn ro rej aikuj pukot kapilōk jān Eria Būreejtōnji eo (lale 32.6.3).

38.7

Kakien ko ikkijien Taktō im Ājmour

38.7.2

Kallip ak Kattil Āinbwin

Baam̧le eo an armej eo emej ej kālet n̄e ekkar bwe ānbwin eo en kallib ak katttil. Rej kautiej kālet eo an kajjojo.

Ilo jet laļ ko reļļap, kakien eo ej aikuji bwe tile. Ilo jekjek ko jet, kallib ej juon juon imminene ak an wōt baam̧le eo pepe. Ilo aolep jekjek, ānbwin eo eaikuj in kōm̧m̧an ilo kautiej. Membōr ro raikuj in lale bwe kajoor in Jerkakpeje eo en aolep iien jerbal (lale Alma 11:42–45).

Jabdewōt ia im ekkar, ānbwinin juon eo uwaan im emej eo im eaar bōk mennin letok kwojarjar eo ej aikuj in kar kanūknūki kōn nūknūkin tampeļ ilo tōre eo im menin ej til (lale 3.4.9

38.7.3

Ajri ro Raar Mej Mokta jān Ļotak (Ajri in Jibun̄ im Mej Loje)

Ro jinen im jemen rej kālet n̄an kōm̧m̧ane juon ilomej ak ilo iturin lōb eo.

Kain̄i ko an tampeļ rejjab aikuji ak kōm̧m̧an n̄an ajri ro me remej m̧okta jān ļotak. Mekarta, menin ejjab kariab m̧ool eo bwe juon ajri jibun̄ eo im eaar lotak tok im mej en maron̄ in kar m̧ōttan wōt baam̧le n̄an indeeo. Ro jinen im jemen kar rōjan̄ n̄an leke Irooj im kappukot kaenōm̧m̧an eo An.

38.7.4

Unokan Kamejmej

Mour in ej juon menin letok aorōk jān Anij. Unokan kamejmej ej kōjemļo̧k an juon armej mour eo ej en̄taan jān juon nan̄inmej ak jekjek ko jet. Juon armej eo im bōk unokan kamejmej, ekobaļo̧k ilo jipan̄ juon eo im ej bōk make mour eo an, ej kakureļo̧k kien ko an Anij.

Kabōjrak ak lem̧aanļo̧k mour ej jon̄an an juon armej kōjemļo̧k mour im jab ļōmņak in bōk unokan kamejmej (lale 38.7.11).

38.7.5

Anilen in HIV im AIDS

Ro uwaan im rej anilen kōn HIV (Human Immunodeficiency Virus) ak eo im ewōr AIDS (Acquired Immunodeficiency Syndrome) aikuj in kar bōk uno kōn an utiej im tiriam̧o aikuj ruwainene ilo kweilo̧k ko an Kabun̄ in im m̧akūtkūt ko. Aer kobatok ejjab pād ilo kauwōtata n̄an ro jet.

38.7.8

Kamminene ko an Taktō im Ājmour

Kappukot jipan̄ an taktō, kōjerbal tōmak, im bōk kōjeraam̧m̧an ko an priesthood rej jerbal ippān doon n̄an kōmour, ekkar n̄an ankilaan Irooj.

Ro uwaan rej aikuj in jab kōjerbal ak kaminene ājmour ko im rej katakin, jetōb, ak ejjab mo̧ kajjitōk kaki. Ro ewōr jorrāān in ājmour ippāer n̄an kōnono ippān ro remaron̄ im ņakņōk ilo iminene im remālim ilo laļ ko reļļap ijo im raar kamminene ie.

38.7.9

Uno Maruwana

Kabun̄ in ej jum̧ae kōjerbal maruwana n̄an jabdewōt uno. Lale 38.7.14.

38.7.11

Kaetokļo̧k Mour (Ekoba Jipan̄ Mour)

Membōr ro rej aikuj in jab en̄jakeļo̧k aer koņaan leļo̧k mour in wabaņbaņ kōn wōt meļele ko im ejjeļo̧k unin. Kālet kein rej kōm̧m̧an jen armej eo, n̄e ekkar, ak jen ro uwaan baam̧le eo. Rej aikuj kappukot jipan̄ jen taktō im tōl jen jar.

38.7.13

Wā ko

Wā ko litok jen jikin taktō ko retijem̧ļk rej n̄an kōjparok ājmour im dāpij mour Membōr ro an Kabun̄ in kar rōjan̄ n̄an kōjparok er make, ajri ro nejier, im jukjukinpād ko aer kōn wā.

Ilo m̧ool, kajjojo armej ej aer eddo n̄an kōm̧m̧ani kālet kein kōn wā. N̄e elōn̄ an membōr ro kajjitōk, rej aikuj ko̧o̧njeļ ippān taktō ro retijem̧ļo̧k im bar kappukot tōl jen Jetōb Kwojarjar.

38.7.14

Naan in Mālōtlōt im Ājmour

Naan in Mālōtlōt ej juon kien an Anij. Rikanaan eo ekar bar kameejļo̧k bwe katak ko ilo Katak im Bujen Ko 89 ekoba bōjrak jān jikka, dān ko rekajoor (arkooļ), im dān ko rebwiļ (ti im kobe).

Ewōr bar jet uno ko rekajoor im imminene ko rejjab alikkar ilo Naan in Mālōtlōt ak jen ritōl ro an Kabun̄ in. Membōr ro raikuj kōjerbal mālōtlōt im ekajet jim̧we n̄an kōm̧m̧ani kālet ko n̄an kōkm̧anm̧anļo̧k ānbwinier, jetōb, im en̄jake.

38.8

Kakien ko kōn Wāween Jerbal in Tōl

38.8.1

Kōkaajriri im Jikin Lale Riatijinemjen

Kōkaajriri ajri ro im leļo̧k jkin lale riatijinemjen emaron̄ kōjeraam̧man ajri ro im baam̧le ko. Baam̧le eo, eļap iakwe im rej n̄an indeeo remaron̄ ejaake itok jān kōkaajriri. Men̄e ajri ro rej itok n̄an juon baam̧le kōn kōkaajriri ak ļotak, rej aolep juon kōjeraam̧m̧an jon̄an wōt juon ilo aorōk.

Membōr ro me rej pukōt n̄an kōkkaajiriri ak leļok jikin lale riatajinemjen n̄an ajri ro rej aikuj pokake aolep kien ko rej pād an laļ ko im kien ko rej bōk jikin.

38.8.4

Jain im Pija ko an Ritōl ro Routiej an Kabun̄ in, Opija ro Routiej, im Eria Jiljilimjuonn̄oul ro

Ro uwaan Kabun̄ in rejjab aikuj kappukot jain ko an Ritōl ro Routiej an Kabun̄ in, Opija ro Routiej, ak Eria Jiljilimjuonn̄oul ro. Ilo kōm̧m̧ane innām enaaj m̧ad jān kūr ko aer rekwojarjar im jetōbin kweiļo̧k ko. En̄in ebarāinwōt maron̄ bōbrae er jān io̧k io̧kweiki membōr ro jet.

Membōr ro rej aikuj jab bōk pija ko an Ritōl ro Routiej an Kabun̄ in, Opija ro Routiej, ak Eria Jiljilimjuonn̄oul ro ilo jikin jar ko.

38.8.7

Māākijiin ko an Kabun̄ in

Māākijiin ko an Kabun̄ in ekoba:

• Eo Jera n̄an ajri ro.

• N̄an Kōkajoorļo̧k n̄an Jodikdik ro n̄an jodikdik.

• Im Liaona n̄an rūtto ro.

Būreejtōnji eo Kein Kajuon ej rōjan̄ aolep membōr ro n̄an riiti Māākijiin ko an Kabun̄ in. Māākjiin ko remaron̄ jipan̄ membōr ro jeļā kōn gospel in an Jisōs Kraist, ekkatak katak ko kōn rikanaan ro remour, en̄jake ekkeijeļo̧k ippān baam̧le eo an Kabun̄ in peļakin laļin, dipuk apan̄ ko kōn tōmak, n̄an epaakeļo̧k Anij.

38.8.8

Etan Kabun̄ in, Ļōmān Jeje ko, im Kōkaļļe ko

Etan Kabun̄ in, ļōmān jeje ko, im kakōļļe eo rej aorōk ko ilo kwaļo̧k Kabun̄ in.

Ļōmān Jeje im kakōļļe eo. Ļōmān jeje ko an etan Kabun̄ in im kakkōlļe eo ( lale ilo pija eo itulōn̄) rej aikuj kōjerbali wōt āinwōt an kar mālim jān Būreejtōnji eo Kein Kajuon im Doulul eo an Jon̄oulruo Rijilōk ro. Rejjab maron̄ kōjerbali āinwōt kein kainōknōk ko. Ak maron̄ jab kōjerbali ilo jabdewōt wāween an juon make, kein wia, ak kōkōm̧anm̧anļo̧k.

38.8.10

Kamputōr

Kamputōr ko im software ko kōjerbali ilo m̧ōn kweilo̧k ko an Kabun̄ in rekar letok im bōk eddoier jān Church headquarter ko ak eria opij eo. Ritōl ro im membōr ro rej kōjerbal kein jipan̄ kein n̄an jipan̄ jibadbad ko an Kabun̄ in ekoba jerbal in menmenbwij an baam̧le.

Aolep software ko ilo kamputōr kein rej aikuj jetjet license n̄an Kabun̄ in.

38.8.12

Kein Katakin ko

Kabun̄ in ej kōpooj kein katak ko n̄an jipan̄ membōr ro ekkatak im mour kōn gospel eo an Jisōs Kraist. Men kein ekoba jeje ko rekwojarjar, ennaan ko an kweilo̧k eo eļap, māākjiin, bok in ekkatak ko, bok ko, im kein jipan̄ ko jet ikkijeen kein ekkatak. Ritōl ro rej rōjan̄ membōr ro n̄an kōjerbal jeje ko rekwojarjar im kein jipan̄ ko jet āinwōt aikuji n̄an ekkatak kōn gospel eo ilo m̧weo.

38.8.14

Nuknuk im Paaktokim

Membōr ro an Kabun̄ in kar rōjan̄ n̄an kōjparok ānbwinier n̄an kālet kōn nuknuk in paoktokier. Ta eo ekkar ilo m̧anit ilo iien ko raorōk.

38.8.16

Raan in Jitlo̧k

Membōr remaron̄ jitlo̧k jabdewōt iien. Ijoke, ekkā an membōr ro kōm̧m̧ane ilo Jabōt eo jinointata ilo kajjojo allōn̄ āinwōt raan in jitlo̧k.

Raan in jitlo̧k ekkā kobaiki jar, jab m̧ōn̄ā im idaak ium̧win 24 awa (n̄e ekkar), im leļo̧k jitlo̧k in joortak ko. Jitlo̧k in joortak ko ej juon jipan̄ n̄an jipan̄ ro rej pād ilo aikuj 22.2.2).

Jet iien Kabun̄ in peļakin laļin ak kweilo̧k ko ijo jokwe ie rej kōm̧m̧ane ilo Jabōt eo jinointata ilo allōn̄. N̄e ej waļo̧k, stake būreejtōnj eo rej lale Jabōt eo ekkar n̄an jitlo̧k.

38.8.17

Kāāmbōļ im Ļaatōre ko

Kabun̄ in ej jumae im kapilōk ņae kāām̧bōļ ilo jabdewōt jekjek. Menin ekoba sports betting ko im ļaatōre ko bōk eddoier jān kien.

38.8.19

Em̧m̧akūt n̄an bar Juon laļ (immigration)

Membōr ro rej pād wōt ilo ļam̧orāān ko aer ekkā an wōr aer iien em̧m̧an n̄an kalōk im kōkajoorļo̧k Kabun̄ in ijo. Ijoke, em̧m̧akūt n̄an bar juon laļ ej an juon make kāālet.

Membōr ro rej em̧m̧akūt n̄an bar juon laļ rej aikuj pokake aolep kakien ko em̧ōj kōmālim (lale Katak im Bujen Ko 58:21).

Mijenede ro rejjab aikuj kwaļo̧k n̄an bōk eddo in em̧m̧akūt n̄an bar juon laļ an ro jet.

38.8.22

Kien ko an Āne eo

Membōr ro rej aikuj pokake, kautiej, im rie kakien ko ilo jabdewōt laļ ijo rej mour ie ak ito itak ie (lale Katak im Bujen ko 58:21; Laajrakin Tōmak 1:12 Menin ekakobaiktok kakien ko im rej kamo̧ik etetal im kwaļo̧k.

38.8.25

Kōnono in ro Uwaan ippān Jikin kweilo̧k ko reļļap an Kabun̄

Ro uwaan Kabun̄ in rej kabōjrak er jān ikkūrļo̧k ko (caling), email, ak jeje leta ko n̄an Ritōl ro Routiej an Kabun̄ in kōn kajjitōk ko kōn katak, apan̄ ko an juon make, ak kajjitōk ko. Membōr ro kar rōjan̄ er n̄an kepaak ritōl ro aer ijo jokwe ie, ekoba būreejtōn eo an Doulul eo an Kōrā ro ak doulul eo an elder ro, n̄e pukōt tōl eo an jetōb (lale 31.3

38.8.27

Membōr ro ewōr Utam̧we ko ilo ānbwin

Ritōl ro im membōr ro kar rōjan̄ n̄an kōnono kōn aikuj ko an aolep ro rej jokwe ilo iunit eo aer. Membōr ro ewōr utam̧we ko ilo ānbwin raorōk im remaron̄ jipan̄ ilo elōn̄ wāween ko. Ro ewōr utam̧we ko ilo ānbwin remaron̄ in utam̧we ilo jeļāļo̧kjeņ, iiaio, en̄jake, ak ānbwin.

38.8.29

Tōmak ko Jet

Eo eļap im ej im̧we, eutiej, im erreo in katuiej eo eutiejtata im ej waļo̧k ilo elōn̄ iaan tōmak ko jet. Mijenede ro im membōr ro jet rej aikuj in jeļā im kautiej tōmak ko im iminene ko an ro jet.

38.8.30

M̧akūtkūt im Jepelļo̧kin Kien

Membōr ro an Kabun̄ in rej kōketak er n̄an bōk koņaer ilo jerbal in political im kien. Ilo elōn̄ laļ ko, menin emaron̄ koba:

• Bout.

• Kobaļo̧k ak jerbal ilo bade in politic ko.

• Leļo̧k jipan̄ ikkijeen jāān.

• Ekōnono ippān rijerbal ro an bade eo im rijibadōk ro.

• Jerbal ilo opiij ko kāālet n̄an e ak kappeik ilo kien ko ijo jokwe ie ak kien eo ioļap.

Membōr ro rej barāinwōt kōketak er n̄an bōk koņaer ilo jerbal ko rem̧m̧an n̄an kōm̧m̧an bwe jukjuk in pād ko aer rej jikin ko rem̧m̧an n̄an mour im karūttoļo̧k baam̧le ko.

Ritōl ro an Kabun̄ in ijo jokwe ie rejjab aikuj aiin membōr ro n̄an bōk koņaer ilo jerbal in politic ko. Ak ritōl ro rejjab aikuj in kajjieon̄ kareel ekōjkan an membōr ro bōk koņaer.

Ritōl ro im membōr ro rej aikuj barāinwōt bōbrae ennaan ko ak kōm̧m̧an bwe en ļōmņak kake āinwōt rie an Kabun̄ in aj jabdewōt political bade, jibadbad, kakien, ak rijibadōk.

38.8.31

Ņojak an Membōr ro

Ritōl ro an Kabun̄ rej aikuj in kōjparok ņojak ko an mem̧bōr ro. Rekoot ko an Kabun̄, directory ko, im kein jerbal ko reinļo̧k wōt remaron̄ in jab kar kōjerbali n̄an kajjojo, koortokjen, ak wun ko an kien.

38.8.35

Rijipo̧kwe ro

Āinwōt m̧ōttanļo̧k eddo ko aer n̄an kea kōn ro rej aikuj (lale Mosaia 4:26), membōr ro an Kabun̄ in rej leļo̧k aer iien, talōn, im jeļā m̧ōttā n̄an karuwaineneik rijipokwe ro āinwōt membōr ro an jukjuk in pād ko aer.

38.8.36

Kajjitōk ko kōn Jipan̄ in Jāān an Kabun̄ in

Membōr ro rej pād ilo aikuj rej kōketak er n̄an kōnono ippān bisop eo aer ijello̧kin kepaak opiij ko reļlap an Kabun̄ in ak kajjitōk jāān jān ritōl ro jet ak membōr ro an Kabun̄ in.