0.

Tusulal sa’ xtiklajik

0.0

Xtikibʼankil

Li Qaawa’ kixk’ut, “Li junjunq chi winq chixtzolaq li tenebʼanbʼil wiʼ, ut chixtzolaq kʼanjelak saʼ li opiis li xaqabʼanbʼil wiʼ, chi yalbʼil anchal xqʼe” (Tzol’leb’ ut Sumwank 107:99). Jo’ aj b’eresinel sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, tento taasik’ li choxahil k’utb’esinb’il na’leb’ re aatenq’ankil chixtzolb’al ut chixb’aanunkil li teneb’anb’il sa’ laa b’oqb’al.

Xtzolb’aleb’ li loq’laj hu ut li raatineb’ li profeet sa’ roso’jikeb’ li kutan tate’xtenq’a chixtawb’al ru ut chixb’aanunkil laa teneb’ankil. Wi nakatzol li raatin li Dios, k’a’jo’ wi’chik naq tatruuq chixk’ulb’al lix wankil li Musiq’ej (chi’ilmanq Tzol’leb’ ut Sumwank 84:85).

Taatzol ajwi’ laa teneb’ankil rik’in rilb’al li b’eresinel na’leb’ sa’ li k’anjenel hu a’in. Eb’ li na’leb’ a’in tate’xtenq’a chixk’ulb’al li k’utb’esinb’il na’leb’ wi nakawoksiheb’ re xtawb’aleb’ li na’leb’, li taqlahom, ut li k’anjenel na’leb’ li taak’anjela naq yookat chixsik’b’al aab’eresinkil rik’in li Musiq’ej.

0.1

Li k’anjenel hu a’in

Li Jolomil K’anjenel Hu: Li k’anjelak sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naxk’e xb’eresinkileb’ laj b’eresinel re li Iglees sa’ xjolomil ut sa’ li junjunq na’ajej. K’uub’anb’il ru sa’ kaahib’ jachal:

• Eb’ li K’ojaril Na’leb’: Eb’ li ch’ol a’in neke’xk’ut li tzol’leb’ ut li na’leb’ li aajeleb’ ru re k’anjelak sa’ li Iglees. Neke’xk’ut:

  • Lix k’uub’anb’il na’leb’ li Dios re sahil ch’oolejil, li k’anjel re li kolb’a-ib’ ut li taqenaqil loq’al, ut li rajb’al li Iglees.

  • Lix k’anjel li junkab’al sa’ lix k’uub’anb’il na’leb’ li Dios, li k’anjel re li kolb’a-ib’ ut li taqenaqil loq’al sa’ li ochoch, ut chan ru naq wan li junkab’al sa’ komonil rik’in li Iglees.

  • Eb’ li na’leb’ chirix li tijonelil.

  • Eb’ li na’leb’ chirix b’eresink sa’ lix Iglees li Kolonel.

• Chan ru naq K’uub’anb’il li Iglees: Sa’eb’ li ch’ol a’in wan li b’eresinel na’leb’ choq’ reheb’ li awa’b’ejil re oqech ut eb’ li obispil, choq’ reheb’ laj jolominel reheb’ li jar molam re li tijonelil, eb’ laj jolominel reheb’ li jar k’anjenel ch’uut re li oqech ut re li teep, ut xkomoneb’ chik li neke’k’anjelak sa’ li Iglees.

• Li K’anjel re li Kolb’a-ib’ ut li Taqenaqil Loq’al: Eb’ li ch’ol a’in neke’xk’e li na’leb’ chirix li aajel ruhil k’anjel li nab’aanuman sa’ li Iglees:

  • Xyu’aminkil lix evangelio li Jesukristo

  • Rilb’aleb’ li wankeb’ rajb’aleb’ ru

  • Xb’oqb’al chixjunileb’ chixk’ulb’al li evangelio

  • Xk’amb’aleb’ li junkab’al sa’ junajil sa’ li junelik q’e kutan

• Xk’anjelankil li Iglees: Eb’ li ch’ol a’in neke’xk’ut xkomoneb’ chik li b’eresinel na’leb’ chirix xk’anjelankil li Iglees. Wankeb’ li na’leb’ chirixeb’ li ch’utam, li b’oqom, eb’ li hu, li tumin, ut eb’ li taqlanb’il na’leb.

Eb’ li jolomil aatin ut li kok’ jolomil aatin sa’ li hu a’in wankeb’ rajlil re naq ink’a’ taach’a’ajko’q xtawb’aleb’ ut aatinak chirixeb’. Qayehaq, li b’eresink chirix li sumlaak sa’ li santil ochoch natawman sa’ 27.3.1. Li ajl 27 a’an li ch’ol wan wi’, li ajl 3 a’an li jolomil aatin sa’ li ch’ol a’an, ut li ajl 1 a’an jun ch’ina raqal.

0.2

Li jalok-u ut eb’ li k’anjeleb’aal li naru neke’oksiman

Moko juntaq’eet ta li k’a’ru ajb’il ru xb’aan chixjunqaleb’ li oqech ut li teep. Sa’ li k’anjenel hu a’in, wan b’eresinel na’leb’ chirix chan ru xjalb’aleb’ ru li na’leb’ ut chirixeb’ chik li k’anjeleb’aal li naru neke’oksiman.

• Li b’eresinel na’leb’ chirix li jalok-u () naxk’ut chan ru xjalb’aleb’ ru lix ch’uut ut eb’ li k’anjel sa’eb’ li jar paay chi na’ajej a’ yaal li rajomeb’ ru ut li k’a’ru wan reheb’.

• Sa’ Xkomon chik li k’anjeleb’aal () wankeb’ chik li na’leb’ ut li b’eresink li naru neke’tenq’ank reheb’ laj b’eresinel sa’ li oqech ut li teep.

Eb’ laj b’eresinel neke’xsik’ xmusiq’ankileb’ chirix b’arwan reheb’ li b’eresinel na’leb’ ut li k’anjeleb’aal taak’anjelaq reheb’, a’ yaal jo’ li ajb’il ru xb’aaneb’ li komon.

0.3

Li k’a’ru toj ak’

Chi jo’q’ehatq taa’ak’ob’resiiq li na’leb’ sa’ li k’anjenel hu a’in. Natawman jun xtusulal li jalok xb’aanuman sa’ “Xtusulal li ak’ob’resiik xb’aanuman.”

0.4

Eb’ li patz’om chirix li b’eresink

Wi neke’wakli li patz’om li ink’a’ sumenb’il sa’eb’ li loq’laj hu, li raatineb’ li yo’yookil profeet, ut li k’anjenel hu a’in, eb’ li komon sa’ li Iglees tento te’xkanab’ rib’ chiruheb’ li sumwank xe’ok wi’ rik’in li Dios, li na’leb’ te’xk’e laj b’eresinel sa’ li na’ajej wankeb’ wi’, ut lix musiq’ahom li Musiq’ej re xk’amb’aleb’ xb’e.

Wi eb’ laj b’eresinel wankeb’ xpatz’om chirix li na’leb’ sa’ li k’anjenel hu a’in, malaj chirix junaq na’leb’ li ink’a’ yeeb’il resil chi sa’, naru te’xsik’ xna’leb’ rik’in laj b’eresinel li wan xwankil sa’ xb’eeneb’.

0.5

Eb’ li aatin

Us ta wan junjunq na’ajej b’ar wi’ yeeb’il chi jalan:

• Li aatin obiisp ut obispil sa’ li k’anjenel hu a’in na’aatinak ajwi’ chirixeb’ li awa’b’ej re uq’ej ut eb’ li awa’b’ejil re uq’ej. Li aatin awa’b’ej re oqech ut awa’b’ejil re oqech na’aatinak ajwi’ chirixeb’ li awa’b’ej re distrito ut eb’ li awa’b’ejil re distrito. Re rilb’al chan ru naq jalan wi’ xwankil li awa’b’ej re distrito rik’in xwankil li awa’b’ej re oqech, chi’ilmanq 6.3.

• Li aatin chirixeb’ li teep ut li oqech neke’k’anjelak ajwi’ choq’ reheb’ li uq’ej, eb’ li distrito, ut eb’ li mision.

• Li aatin chirix li kutan domingo na’aatinak ajwi’ chirix li kutan li nak’anjelak choq’ hilob’aal kutan sa’ li na’ajej wankat wi’.

• Li aatin na’ajej a’aneb’ li teep ut li uq’ej.

• Li aatin chirixeb’ li na’b’ej yuwa’b’ej neke’aatinak ajwi’ chirixeb’ li ani wan xwankil li na’b’ejil yuwa’b’ejil chiru li chaq’rab’.

Lix b’oqb’al li obiisp moko juntaq’eet ta rik’in lix b’oqb’al li awa’b’ej re uq’ej sa’ lix wankilal ut lix teneb’ankil, chi moko lix b’oqb’al li awa’b’ej re oqech juntaq’eet rik’in lix b’oqb’al li awa’b’ej re distrito. Li wank choq’ obiisp a’an jun opiis sa’ li tijonelil, ut ka’ajwi’ naru nak’ojob’aman junaq chi k’eeb’il liceens xb’aan li Xb’eenil Awa’b’ejil. Eb’ li awa’b’ej re oqech b’oqb’ileb’ xb’aaneb’ li jolomil aj b’eresinel ut xb’aaneb’ li Setenta re Area.

0.6

Chan ru xtaqlankil jun esil rik’in lix Jolomil li Iglees, malaj li k’anjeleb’aal re Area

Sa’ junjunq ch’ol sa’ li hu a’in wan li b’eresink chirix aatinak rik’in xjolomil li Iglees, malaj rik’in li k’anjeleb’aal re Area. Li na’leb’ chirix raatinankil lix jolomil li Iglees nak’anjelak reheb’ li wankeb’ sa’ Estados Unidos ut sa’ Canada. Li na’leb’ chirix raatinankil li k’anjeleb’aal re Area nak’anjelak reheb’ li moko wankeb’ ta sa’ Estados Unidos ut sa’ Canada.