10.

Kooram n te Nakoanibonga ae te Aaron

10.1

Te Kantaninga ao Baireana

Te Nakoanibonga ae te Aaron e buokiia natin te Atua ni katauraoi n oki Nakoina. E taui “kiingin aia mwakuri n ibuobuoki anera, ao te euangkerio n rairannano, ao te bwabetito” (Reirei ao Berita aika Tabu 13; taraa naba 3.3.2 inanon te aeniboki aei).

10.1.1

Te Kantaninga

Kooram n te Nakoanibonga ae te Aaron a buokiia ataeinimwaane ni karaoi ao ni kawakini berita aika tabu ao ni kamatoai rairakiia nakon Iesu Kristo ao Ana euangkerio.

Te kooram bon te kurubu ae barongaaki are kaainaki irouia aomata aika iai irouia te nakoanibonga. Te kantaninga n te kooram bwa e na buokiia naake iai irouia te nakoanibonga bwa a na bootaki ni mwakuri n ibuobuoki n ana mwakuri te Atua ibukin te kamaiuaki ao te karietataaki. N aia kooram, naake iai irouia te Nakoanibonga a beku ibukiia tabeman, a karaoi tibwangaia n te nakoanibonga, a karekea te inanoi, ao a reiakini reirei aika tabu ao a maiuakin.

10.1.2

Ana Kibunikoora te Kooram n te Nakoanibonga ae te Aaron

Te kibunikoora ibukin te kooram n te nakoanibonga ae te Aaron e kona ni buokiia ataeinimwaane n tatabemaniia n ataa rikiia mai ieta ao tibwangaia ngkai iai irouia te nakoanibonga. Ataenimwaane ao aia taan kairiiri a na tataekina te botoniango anne ni moan bowin aia kooram ao n aia bwabwaro riki ake tabeua. Aio kanoan te kibunikoora anne:

“Ngai te nati te mwaane iroun te Atua ae tangiraki, ao iai Ana mwakuri ibukiu ae N na karaoia.

“Ma nanou, marurungiu, au iango, ao korakorau ni kabane, N na tangira te Atua, kawakin au berita, ao ni kabongana Ana nakoanibonga ni beku ibukiia tabeman, ni moanaki man mweengau.

“Ngkai I kekeiaki ni beku, ni kamwakura te onimaki, n rairannano, ao n rikirake ni katoa bong, N na kona n tau ni karekei kakabwaia n te tembora ao te kimwareirei n te euangkerio ae teimatoa.

“N na katauraoai n riki bwa te mitinare ae mwakuri korakora, te bumwaane ae karinerine, ao te karo ae tatangira man arou n riki bwa ana reirei ni koaua Iesu Kristo.

“N na ibuobuoki ni katauraoa te aonaaba ibukin okin te Tia Kamaiu man kaoakiia aomata ni kabane nakon Kristo ao ni karekei kakabwaia n Ana Mwakuri ni kamaiu.”

10.1.3

Kooram

Te bitiobi e na barongaia naake iai irouia te Nakoanibonga nakon kooram aika kabwarabwaraki i nano. (Taraa naba Reirei ao Berita aika Tabu 107:85–88.)

10.1.3.1

Kooram n Riikan

Ataenimwaane a kaaina te kooram n riikan ni moanaki man Tianuare n te ririki are koro iai 12 te ririki. N te tai anne are a tau naba ni katabuaki bwa riikan ngkana a tauraoi ao a tau.

Kaain te kooram aei are e a tia ni katabuaki bwa te riikan e beku bwa te beretitenti n te kooram. Ngkana e kona, temanna ke uoman kauntira ao te tia koroboki a kona n raonna ni beku. Kauntira ao tia koroboki bon taian riikan naba.

Taben te riikan a kabwarabwaraki i nanon Reirei ao Berita aika Tabu 20:57–59; 84:111. Tibwangaia ake tabeua bon kabutan te toa ao buokan te bitiobi n “karaoi bwaain te maiu n rabwata ni kabane” (Reirei ao Berita aika Tabu 107:68).

10.1.3.2

Aia Kooram Taan Reirei

Ataeinimwaane a kaaina aia kooram taan reirei ni moa man Tianuare n te ririki are koro iai 14 te ririki. N te tai anne are a tau naba ni katabuaki bwa taan reirei ngkana a tauraoi ao a tau.

Kaain te kooram are e katabuaki bwa te tia reirei ngaia ae beku bwa te beretitenti n te kooram. Ngkana e kona, temanna ke uoman kauntira ao te tia koroboki a kona n raonna ni beku. Kauntira ao tia koroboki bon tia reirei naba.

Taan reirei e na tii te arona tabeia ma riikan. A katauraoa naba te toa ao a beku bwa taari n ibuobuoki. Tabeia riki tabeua a kabwarabwaraki i nanon Reirei ao Berita aika Tabu 20:53–59; 84:111.

10.1.3.3

Aia Kooram Ibonga

Ataeinimwaane a kaaina te kooram ni ibonga ni moa man Tianuare n te ririki are e koro iai 16 te ririki. N te tai aei a tau naba ni katabuaki bwa ibonga ngkana a tauraoi ao a tau.

Te bitiobi bon te beretitenti n te kooram n ibonga (taraa Reirei ao Berita aika Tabu 107:87–88). E na wetea temanna ke uoman kaain te kooram ni beku bwa ana taan ibuobuoki. Te tia koroboki e kona naba ni weteaki. Taan ibuobuoki ao te tia koroboki bon ibonga ake a tia ni katabuaki.

Ibonga tii te arona tabeia ma riikan ao taan reirei. Tabeia riki tabeua a kabwarabwaraki i nanon Reirei ao Berita aika Tabu 20:46–52, 73–79.

10.1.4

Kiingin te Nakoanibonga

Kooram nako a kairaki iroun te beretitenti are iai irouna kiingin te nakoanibonga. Te beretitenti n aia kooram riikan, te beretitenti n aia kooram taan reirei, ao te bitiobi a taui kiingin te nakoanibonga. Ibukin riki rongorongon kiing aikai, taraa 3.4.1.

10.1.5

Kangaraoan Kooram nakon Kainnano n te Tabo

N te uoote ke te mwaanga are a karako iai ataeinimwaane, kooram n te nakoanibonga ae te Aaron a kona n ikotaki ibukin te reirei ao waaki ni kakukurei.

Ngkana e raka i aon 12 riikan n te uoote, e kona te bitiobi ni bwenaua te kooram n riikan anne. Ai arona naba ngkana e raka i aon 24 taan reirei (taraa Reirei ao Berita aika Tabu 107:85–86). Ngkana e karaoaki te babaire n aei, te bitiobi e taraa mwina nakoia kaain te kooram.

10.2

Irakin Ana Mwakuri te Atua Ibukin te Kamaiuaki ao te Karietataaki

E na kaoiia aomata ni kabane te Atua bwa a na nakon Kristo ao ni buoka Ana mwakuri man:

• Maiuakinan ana euangkerio Iesu Kristo.

• Tararuakiia naake iai kainnanoia.

• Kaoakiia ni kabane bwa a na karekea te euangkerio.

• Bootakiia utu n te tai ae akea tokiia.

Te bitiobiriki ao taan kairiiri n aia kooram kairake, ni boutokaki irouia aetuwaitia (taraa 10.5), a ibuoka n iango bwa e na kanga aron kakoroan nanon te mwakuri aei. Ibukin rongorongon riki Ana mwakuri te Atua ibukin te kamaiuaki ao te karietataaki, kamatebwaia mwakoro 1.

10.2.1

Maiuakinan Ana Euangkerio Iesu Kristo

10.2.1.1

Tabeia Kaaro ao Taan Kairiiri

Kaaro a katabeaki bwa a na reireiniia natiia te euangkerio ao ni buokiia bwa a na maiuakinna (taraa Reirei ao Berita aika Tabu 68:25–28). Te bitiobiriki ao taan kairiiri aika kairake n te kooram, n raonaki irouia taan ibuobuoki, a boutokaia kaaro n taabe aikai:

• Kaunga te reitaki i marenaia ataeinimwaane ao aia utu.

• Taraia raoi bwa waaki ni kakukurei ibukiia te roronrikirake a boutokaia ao a kakabwaiaia utu.

• Buokiia kaaro ni katauraoia natiia mwaane nakon katabuaia n te nakoanibonga ao ni karekean te Nakoanibonga ae te Merekitereka.

• Buokiia kaaro ni katauraoia natiia mwaane ibukin te entaumente n te tembora, mwakuri ni mitinare, mare n te temboira, ao te riki ni karo.

Taan kairiiri a riai naba ni tabenanoia kairake ake e memere boutokaia man aia utu nakon maiuakinan te euangkerio.

Kaaro ao taan kairiiri a kabanea aia kona n riki bwa banna aika tamaroa nakoia kairake. A reireiniia ataei n aia waaki bwa a na riki n ai aron Iesu Kristo. Te burokuraem ibukiia Ataei ao Kairake e kona ni ibuobuoki ni waaki akanne (taraa ChildrenandYouth.ChurchofJesusChrist.org).

10.2.1.2

Reirei n te Euangkerio

Te bitiobiriki, taan kairiiri irouia kairake, ao taan ibuobuoki a kaungaia ataeinimwaane ao aia utu bwa a na reirei te euangkerio ni mwengaia. Taan kairiiri ao taan ibuobuoki a na kamatebwaia te euangkerio ao tibwai baike a reiakin nakoia ataeinimwaane. A kaoiia kaain te kooram n tibwai n te taromauri baike a reiakin n te mweenga.

Kooram n te Nakoanibonga ae te Aaron a bootaki ni katoa Tabati ni kakorakora te onimaki, karekea te katiteuanaaki, ni kakorakoraia utu ao mweenga, ao ni karaoi babaire n ibuobuoki n ana mwakuri te Atua ibukin te kamaiuaki ao te karietataaki. Te bitiobiriki ao taan kairiiri n te kooram irouia kairake, ni boutokaki irouia aetuwaitia a bairea kanoan te bootaki n te Tabati.

Bootakin te kooram a karaoaki n te kauoua ao te kaaua n Tabati n te namwakaina. Maanna bon 50 te miniti. A riai bootaki nako ni moanaki ma te tataro. Te membwa n te beretitentii n te kooram (ke temanna te tia ibuobuoki nakon te bitiobi n aia kooram ibonga) e kairiiri. E na kaira te kooram n atonga te kibunikoora ao te uaia ni marooro i aon mwioko, taabe, ao bwaai riki tabeua.

Te membwa n te kooram ke te tia kairiiri ae ikawai e kaira ngkanne te reirei n te euangkerio. Taan kairiiri n te kooram a marooro ma taan ibuobuoki bwa antai ae e na anga reirei. Kabwarabwaraan Boowi a kuneaki inanon Nakomai, Iriirai. A riai bootaki nako ni kainaki ma te tataro.

N aron te waaki, taian kooram n te Nakoanibonga ae te Aaron a maenako (taraa 10.1.5 Ataeinimwaane ao ataeinnaine a kona n ikotaki tabeua te tai ibukin te reirei n Tabati, n aron barongana iroun te bitiobiriki ao te beretitentii n te Bootaki n Ataeinnaine.

Ataeinimwaane a kaungaaki bwa a na ira buakon te Tiemenari (taraa 15.1).

10.2.1.3

Mwakuri n Ibuobuoki ao Waaki ni Kakukurei

Te bitiobiriki ao taan kairiri irouia kairake, ni boutokaki irouia taan ibuobuoki, a na bairei mwakuri n ibuobuoki ao waaki ni kakukurei. Aikai a riai n ibuobuoki ni kakoroa nanon ana mwakuri te Atua ibukin te kamaiuaki ao te karietataaki. Mwakuri n ibuobuoki ao waaki ni kakukurei a riai ni kakorakora te koaua, ni kakorakoraia utu, buokan te inanoi n te kooram, ao e karekei aanga ni buokiia tabeman. A ria ni baeranti i nanon mwakoro ake aua ibukin te rikirake i bon iroum: maiu n tamnei, reitaki ma aomata, marurungin te rabwata, ao te wanawana.

Angiin aia waaki ni kakukurei kairake a karaoaki n taai are bon tiaki te Tabati ke tairikin te Moanibong. A kakaraoaki teuana n te wiiki. N aono tabeua, raroana, maurin temanna, ao bwaai riki tabeua a karika angabuakan karaoan waaki ni kakukurei. N aono aikai, e kona ni kauarerekeaki karaoan waaki ni kakukurei, ma a riai ni karaoaki teuana n te namwakaina. Waaki ni Kakukurei a kona ni baireaki i aon Sample Service ao Activity Planner, are tauraoi i aon ChurchofJesusChrist.org.

Tabeua mwakuri n ibuobuoki ao waaki ni kakukurei a riai ni botiia Ataeinimwaane ao Ataeinnaine, riki ibukiia kairake ake a ikawai riki.

A kona n reke kabwaiaia kairake man te reitaki i nanon kurubu aika bubura. Kairake i nanon uoua uoote ke e raka riki a kona n ikotaki tabeua te tai ibukin mwakuri n ibuobuoki ao waaki ni kakukurei. Titeiki ao mwakoro a kona ni bairei mwakuri n ibuobuoki ao waaki ni kakukurei ibukiia kairake (taraa 20.3.2).

Taan kairiiri aika a ikawai a taraia bwa a mano waaki ni kakukurei (taraa safety.ChurchofJesusChrist.org; taraa naba 20.7 inanon te aeniboki aei). E na iai uoman taan kairiiri aika mataikawai n tain waaki ni kakukurei n taainako (taraa 10.8.1

Ibukin rongorongona riki, taraa AaronicPriesthoodQuorums.ChurchofJesusChrist.org. Taraa naba JustServe.org ngkana e kona n reke. Bwaai n ibuobuoki aikai a katauraoi iango ibukin te mwakuri n ibuobuoki ao waaki ni kakukurei.

Waaki ni Kakukurei n te Ririki. N reita aia waaki ni kakukurei kairake are a kakaraoki, a kona naba ataeinimwaane ni karaoi baikai ni katoa ririki:

• Te bowi ibukiia kairake ma aia karo n uakaan ma moan te ririki. E kona ni karaoaki aei ibukiia ataeinimwaane ao ataeinnaine n ae maenako ke n ikotaki. E kona naba ni karaoaki n te uoote ke te titeiki. E baireaki ao e kairaki irouia taan ibuobuoki nakon te bitiobi n te kooram ni ibonga ao te beretitentii n aia kiraati Ataeinnaine ake tenaan kabanea n ikawai. Ataeinimwaane ake e koro 12 te ririki i nanon te ririki anne a kona ni karekea te bwai ni kanikinaa ibukin te kinaaki n te bowi aei (taraa 10.8.3). Ibukin rongorongona riki, taraa ChildrenandYouth.ChurchofJesusChrist.org.

• Aia kabane te kooram n te Nakoanibonga ae te Aaron (taraa Aaronic Priesthood Quorum Camp Guide). Ataeinimwaane a kona ni karaoi kabane are a matu iai n te tairiki, bootaki, ao waaki ni kakukurei i nanon te ririki, ngkana e riai.

• Aia maungatabu kairake n te uoote ke te titeiki ke Ibukin Kakorakoraia Kairake (IKK,). Ibukin rongorongon riki taekan aia maungatabu IKK, taraa FSY.ChurchofJesusChrist.org. Ibukin rongorongon taekan weteaia ao tibwangaia IKK, n te uoote ao titeiki, taraa FSYLeader.ChurchofJesusChrist.org (ibukin te U.S. ao Canada) ke te FSY Planning Guide (ibukiia ni kabane aono).

• E na tamaroa teuana te waaki ni kakukurei ni katuruturui moan reirei inanon Ibukin Kakorakoraia Kairake: Te Kairi ibukin Karaoan Rinerine. Te waaki aei e kona ni kaainaki irouia ataeinimwaane ao ataeinnaine. A kona naba ni kaoaki kaaro.

Te Ririki ae Katauaki. N aia kariaia aia karo, ataeinimwaane a kona ni kaea te kabane n te kooram n te Nakoanibonga ae te Aaron are e karaoaki iai te matu n te tairiki ni moanaki i nanon Tianuare are e koro iai 12 te ririki. A kona ni kaei mwaie, bwabwaro ibukiia kairake, ao bwabwaro n te IKK ni moanaki i nanon Tianuare n te ririki are e koro iai 14 te ririki.

Mwanenakin Waaki ni Kakukurei. Waaki ni kakukurei, n ikotaki ma bwaai ake a kainnanoaki, a kaboaki man ana kataumwane te uoote. Te mwananga ao kabanemwane a riai n aki riaon are katauaki.

N aron are e ti kona ni karaoaki, ngkana e a aki tau te kataumwane man te uoote ni kabwakai boon waaki ni kakukurei are riaon tebongina, n aron te kabane, taan kairiiri a kona n tuangiia kaain te kabane bwa a na ibuobuoki n te kabanemwane. Ma, te ataeinimwaane e riai n aki totokoaki man iran te bootaki ibukina bwa e aki kona ni buoka te kabanemwane. Ngkana e kainnanoaki riki te mwane, e kona te bitiobi n anga te kariaia ni karaoan teuana te karikirake ni katoa ririki (taraa 20.6.5).

Te bitiobiriki e taraia bwa te kataumwane ao waaki ni kakukurei ibukiia ataeinimwaane ao ataeinnaine a tau ao a aki tabeitera. Te kataumwane ibukiia kooram n te Nakoanibonga ae te Aaron e reke man mwaitiia ataeinimwaane n te uoote. Te kataumwane ibukiia ataeinnaine e reke naba man mwaitiia ataeinnaine n te uoote.

Taraa FSY.ChurchofJesusChrist.org ibukin rongorongon mwanenakin maungatabu n te IKK.

10.2.1.4

Karikirakean Arom Ibon Iroum

N aia waaki ni kan riki n ai aron te Tia Kamaiu, a kaoaki kairake bwa a na katei kouru ni karikirakea, maiuia n tamnei, reitakiia ma aomata, marurungin rabwataia, ao wanawanaia (taraa Ruka 2:52). Kairake a ukora te kaunganano ni kunei bwaai ake a riai ni mwakuri i aona. Man aia ibuobuoki kaaro, a karaoi babaire, a mwakurii aia baire, ao a kauringi baike a tia n reiakin. Taan kairii ao taan ibuobuoki a anga naba te boutoka n riaina. Ma e ngae n anne, a riai n aki tuoa mwiin aia kouru ataeinimwaane ke rikirakeia. Kaaro ao taan kairiiri a kona n anga kouru, ma a na angania kairake bwa a na bon kakaea oin aia kouru are a na karekei.

A kaungaaki kairake bwa a na kakoroi nanon uoua kouru inanon mwakoro ake aua ni katoa ririki. A kona ni kabongana Personal Development: Youth Guidebook ke te Gospel Living app ni katei ao n taui mwiin aia kouru.

Ibukin rongorongona riki, taraa ChildrenandYouth.ChurchofJesusChrist.org.

10.2.2

Tabeakinan Naake a Kainnano

Naake iai irouia te Nakoanibonga ae te Aaron a buoka te bitiobi ni “karaoi bwaain maiun n rabwata ni kabane” (Reirei ao Berita aika Tabu 107:68). A riai n tainako n iai aia tai ni beku irouia tabeman inanon ao ma aia utu, n tain waaki ni kakukurei ibukiia kairake, ao i bon irouia. Iango ibukin te mwakuri n ibuobuoki e tauraoi i aon ChildrenandYouth.ChurchofJesusChrist.org. Ngkana a na tauraoi, JustServe.org iangoi taai ibukin te ibuobuoki n te kaomuniti.

10.2.2.1

Mwakuri n Ibuobuoki

Te mwakuri n ibuobuoki ibukiia tabeman n aron are e na karaoia te Tia Kamaiu. Naake iai irouia te Nakoanibonga ae te Aaron a karekei tabeia n ibuobuoki ni moanaki i nanon Tianuare n te ririki are koro iai 14 aia ririki. Ibukin rongorongona riki, taraa mwakoro 21.

10.2.3

Kaoiia Ni Kabane Bwa a Na Karekea te Euangkerio

Naake iai irouia te Nakoanibonga ae te Aaron iai katabeaia bwa a na “kaoia ni kabane bwa a na nako nakon Kristo” (Reirei ao Berita aika Tabu 20:59). Tabeua kawai are a kona iai ni karaoa aei a kaotaki i nano:

• Katea te banna ae tamaroa n aron ae ana reirei Iesu Kristo.

• Tibwaua aia koaua ma raoraoia ao kaain aia utu.

• Ibuobuoki nakoia membwa ake aki bati n roroko n aia kooram.

• Kaoiia raoraoia nakon te taromauri ke waaki ni kakukurei.

• Kaoiia raoraoia n ira buakon te burokuraem ibukiia Ataei ao Kairake. Taan kairiiri a na uaia ni mwakuri ma aia karo kairake aikai ni buokiia ni kaotaia n te burokuraem ao ni baireia bwa tera aroia ngaiia ao natiia n ira buakon te waaki.

• Kaoia raoraoia bwa a na reireinaki irouia mitinare.

Kaaro ao taan kairiiri a kaungaia ataeinimwaane ni katauraoi n nako ni mitinare ao n tibwaua te euangkerio i nanon maiua. Tabeua kawai are a kona ni karaoa aei a kaotaki i nano:

• Kaungaiia ataeinimwaane ni karekea aia koaua n ana babaire ni kakukurei Tamara are i Karawa, Ana Mwakuri ni Kamaiu Iesu Kristo, ao kaokakin Ana Euangkerio.

• Reireiniia ataeinimwaane taekan kakabwaia man karaoan te mwakuri ni mitinare ao tera ae kataningaaki mai irouia.

• Karekei aanga bwa a na beku n te Ekaretia.

• Karekei aanga bwa a na anga reirein te euangkerio ni bowiin aia kooram ao n taai riki tabeua.

Bwa raon te katauraoi aei, te bitiobiriki ao te titeiki beretitentii a kona ni baronga te kiraati ni katauraoi nakon te mitinare. Boton bwaai ni ibuobuoki ibukin te kiraati aei bon koroboki aika tabu, Kainibaire ibukiia Mitinare ibukin Ana Reirei Iesu Kristo, ao Taetaekina Au Euangkerio: Te Kaetieti ibukin Tibwauan ana Euangkerio Iesu Kristo. Te kiraati aei e na aki karaoaki ni katoa tain bootaki n te Tabati.

Missionary.ChurchofJesusChrist.org e anga tabeua kanoa ake a kona ni buokiia ataeinimwaane ngkai a katauraoi ni beku bwa mitinare. Taraa mwakoro 23 ao 24 ibukin rongorongona riki.

10.2.4

Katiteuanaakiia Utu ibukin te Tai ae akea Tokina

Naake iai irouia te Nakoanibonga ae te Aaron a kona n ibuobuoki n katiteuanaia utu ibukin te tai ae akea tokina ni kawai aika mwaiti. Tabeua kawai a karinanaki inano:

• Ana karineia aia karo ao ni katea te katooto ni maiuakina maiun Kristo inanon mweengaia.

• Katauraoi ni karekea oin aia utu ae akea tokina.

• E na iai ana beba ni kariaia nakon te tembora ae tuai bane taina.

• Katauraoi ni karekei otenanti n te tembora, n ikotaki ma te mare ae akea tokina.

• Reiakina rongorongoia aia koraki ao aia bakatibu (taraa Au Utu: Karaki are A Bootiira

• Karekei araia aia bakatibu ake a kainnanoi otenanti n te tembora (taraa FamilySearch.org).

• Karaoi bwabetito ao kamatoa ibukiia maate n taai ake e angaraoi nakoia.

• Karaoa te intekiti (taraa FamilySearch.org/indexing).

• Beku bwa taan ibuobuoki n rongorongon te tembora ao te tabo n riki, ngkana a weteaki iroun te bitiobiriki (taraa 25.2.4).

10.3

Bitiobiriki

Te bitiobiriki bon te beretitentii n te Nakoanibonga ae te Aaron n te uoote (taraa Reirei ao Berita 107:13–15). A bairea te mwakuri ni kooram n te Nakoanibonga ae te Aaron. Taben te bitiobi ae moan te kakawaki bon tabeakinaia te roro ae rikirake inanon ana uoote. E na reiakina araia ao e kamataata n aron tein mwengaia. E na kaei n tainako aia waaki ni kakukurei ao aia kiraati n te Tabati.

Te bitiobi bon te beretitenti n te kooram n ibonga. Tabena bon “te mataniwi i aoia [taian] ibonga, ao te tekateka ni marooro ma ngaiia, n reireiniia tabeia n aia aobiti” (Reirei ao Berita aika Tabu 107:87).

Te moan kautira n te bitiobiriki iai tabena ibukin aia kooram taan reirei. Te kauoman ni kauntira iai tabena ibukin aia kooram riikan.

Ngkana kaain te bitiobiriki e kaea te kiraati, ngaia ae e na tararua n te kiraati anne.

Te bitiobiriki iai tabena aikai ibukin kooram n te Nakoanibonga ae te Aaron:

• Te tia reireiniia beretitentii ni kooram ao ana taan ibuobuoki te bitiobi n kooram n ibonga. E buokiia ni kamatataia ao ni kakoroa nanon tabeia bwa taan kairiiri. Ni karaoa aei, te bitiobiriki e kabonganai koroboki aika tabu ao “Aaronic Priesthood ao Young Women Class Presidency Orientation” (taraa AaronicPriesthoodQuorums.ChurchofJesusChrist.org). A kona naba ni kabongana mwakoro 4 n te aeniboki aei.

• Rereitaki ma ataeinimwaane n tatabemaniia tao n aki kee iaan uoua te tai n te ririki (taraa 31.3.1).

• E na tararua te anga reirei n kooram n te Nakoanibonga ae te Aaron.

• Buokiia ataenimwaane ni katauraoi ni karekea te Nakoanibonga ae te Merekitereka (taraa 10.6).

• E na tararuai rekooti, ribooti, ao te mwane n kooram n te Nakoanibonga ae te Aaron.

Aetuwaitia ao tibetioriti a ibuobuoki n taabe aikai ngkana a butiaki (taraa 10.5).

10.4

Taan Kairiiri n Aia Kooram Kairake

10.4.1

Weteaia, Kamatoaaia, ao Kaokoroaia

Te bitiobi e wetea temanna ke uoman ibonga n riki bwa ana tia ibuobuoki ni kairan te kooram n ibonga. Kaain te bitiobiriki e kona naba n wetea te tia koroboki n te kooram.

Kaain te bitiobiriki e weteia beretitenti n te kooram n riikan ao n tia reirei. Ngkana e tau mwaitiia naake iai irouia te Nakoanibonga ae te Aaron ni beku, ataeinimwaane aikai a tataroakinna bwa antai irouia kaain te kooram aika a kona ni beku bwa kauntira ao te tia koroboki. Te bitiobiriki e na taraa aia aara ake a korei ao e anga te wewete.

Imwain tuangan te ataeinimwaane bwa e na beku n nakoa aikai, kaain te bitiobiriki e na karekea te kariaia mai irouia ana karo te ataenimwaane anne.

Imwiin kanakoan wewete aikai, kaain te bitiobiriki e tabekarake araia taan kairiiri n te kooram aika kairake ibukin kamatoaia n tain aia bootaki n te kooram. Te bitiobi tabena bwa e na katabuia ni kaokoroia ana taan ibuobuoki ao beretitenti n te kooram n riikan ao n tia reirei. E na anga kiingin te nakoanibonga nakoia beretitenti ni kooram. E kona ni katabea ana kauntira n katabuia ni kaokoroiia kaain te beretitentii ake tabeman ao taan koroboki.

Kaain te bitiobiriki e katanoatai nakoa aikai n te bootaki n toa. E aki uotarake araia ibukin te kamatoa.

10.4.2

Taabe

Beretitenti ni kooram n te Nakoanibonga ae te Aaron, n ikotaki ma te bitiobi, iai tabeia aikai. Aia kauntira ao ana tia ibuobuoki te bitiobi n te kooram n ibonga, a na ibuobuoki n taabe aikai.

• A kairii ana waaki te kooram n ira ana mwakuri te Atua ibukin te kamaiuaki ao te karietataaki (taraa mwakoro 1).

• Kinaia ao ni beku ibukiia kaain te kooram, n ikotaki ma naake a aki kakaonimaki nakon bowin te kooram. A tarai kainnanoia ao aroia are a mena i nanona.

• Te Beku n te kauntira n te uoote ibukiia kairake (taraa 10.4.4).

• Irirakin ana kekeiaki te Uoote ibukin tibwauaan te euangkerio ao kakorakoraaia membwa aika boou ao ake a manga oki. Te tia ibuobuoki n te kooram n ibonga e irii boowi ni babaire (taraa 23.4).

• Irirakin ana mwakuri te Uoote n te tembora ao rongorongon te utu. Te tia ibuobuoki n kooram n ibonga e irii boowi n babaire (taraa 25.2.7).

• Reireinia kaain te kooram tabeia n nakoanibonga (taraa Reirei ao Berita aika Tabu 107:85–88). Boutokaia ni kakoroai nanon taabe akanne.

• Bairei ao ni kairii botakin te kooram (taraa 10.2.1.2).

• Bairei ao ni karaoi mwakuri n ibuobuoki ao waaki ni kakukurei n te kooram (taraa 10.2.1.3).

Ngkana a weteaki taan koroboki ni kooram, a katauraoi akenta ibukin bowi ao taui mwiin rongorongo. A buoka naba te kiraaka n te uoote ke te aetuwaitia n te kooram n tau mwiin rooroko.

Kaain te bitiobiriki a reireiniia ataeinimwaane tabeia (taraa 10.3 Aetuwaitia n taian kooram a riai ni marurung n ibuobuoki (taraa 10.5).

10.4.3

Aia bowi Beretentii ni Kooram

Beretitentii n te kooram n te Nakoanibonga ae te Aaron a na bowi n tainako. Te beretitenti n te kooram e kairi bowi aikai. E riai n uoman ikawai aika a iri—kaain te bitiobiriki, te atuwaitia, ke te tia rabakau. I nanon bowi aikai, taan kairiiri aika ana uaia ni marooro ao n ukorii kaotioti ibukin nanon te Uea ibukin aia kooram. Te akenta e kona n raonaki ma maroorokinan bwaai aikai:

• Ibuobuoki ni kakoroa nanon Ana mwakuri te Atua ibukin te kamaiuaki ao te karietataaki

• Beku irouia kaain te kooram, ma te taratara ae onoti nakon boutokakiia riki membwa aika boou ao n anga buokakiia naake aki bati ni kakaonimaki

• Tabenanoakiia naake e kaokoro aia aro ao aia onimaki

• Bairean bootakin te kooram, mwakuri n ibuobuoki, ao waaki ni kakukurei

• Reiakinaia taan kairiri ni kooram ao aetuwaitia

Te Katooto n Akentan Boowin te Beretitentii e tauraoi i aon ChurchofJesusChrist.org.

10.4.4

Kautira ibukiia Kairake n te Uoote

Oin te kantaninga n te bowi ni kauntira ibukiia kairake n te uoote bwa a na buokiia kairake ni uotiia tabeman nakon Iesu Kristo ao ni buokia ni katia Ana mwakuri te Atua ibukin te kamaiuaki ao te karietataaki.

Te bitiobi ngaia ae e na tararuaa aia kauntira kairake n te uoote. Kaain te kauntira aio bon:

• Te bitiobiriki.

• Temanna mai irouia ana taan ibuobuoki te bitiobi n te kooram n ibonga ao te beretitenti n aia kooram taan reirei ao riikan.

• Beretitenti n aia kiraati Ataeinnaine (ke ni kabane kaain te beretitentii n ataeinnaine ngkana te uoote iai tii teuana aia kiraati Ataeinnaine).

• Te Beretitenti n te Botaki n Ataeinnaine.

Te kauntira n kairake n te uoote aei e marooroakini kawai ni buokiia tabeman ni katea aia onimaki, ni karekei otenanti ni kamaiu, ao ni kawakin berita aika tabu, ao n riki bwa taan iriira Iesu Kristo (taraa Moronaai 6:4–5). A na uaia ni marooro i aon kainnanoia ataeinnaine ao ataenimwaane i nanon te uoote. A kona naba ni marooroakin waaki ni kakukurei ni tobwai kainnano akanne. Ma, bairean waaki ni kakukurei ae bwanin e riai ni karaoaki n bowin te kooram ke te kiraati.

Taraa 29.2.6 ibukin rongorongon riki te kauntira ni kairake n te uoote.

10.5

Aetuwaitia ao te Tia Rabakau

Kaain te bitiobiriki e wetea ao e katabuia ni kaokoroia mwaane bwa Aetuwaitia ni kooram n te Nakoanibonga ae te Aaron. Aetuwaitia aikai a boutoka te bitiobiriki n tabeia ibukiia kooram n te Nakoanibonga ae te Aaron. A katurua aia mwakuri ae e onoti n reiakinaia ataeinimwaane, n reireiniia bwa a na kanga ni kairiiri ma te kairi mai ieta, ao ni buokiia n riki n aron Iesu Kristo. N aron kainanoana ao ngkana e riai, e na weteaki n ae riaon temanna te aetuwaitia ibukin koorami nako.

Te bitiobiriki e na wetea naba te tibetioriti n te kooram bwa e na ibuobuoki ma waaki aika a onoti n aron te kaembwa, aia maungatabu roronrikirake, ke tatakaro.

E na riai n iai n taainako uoman mwaane aika ikawai n irii bowin ao n ana waaki ni kakukurei te kooram. Ngkana iai aetuwaitia ao tibetioriti ao kaain te bitiobiriki e kona n reke aia tai ni kawaria naba Ataeinnaine ao kiraati n te Moanrinan ao waaki ni kakukurei. Aetuwaitia ao te tia rabakau a riai ni kabwanina anaan te kataneiai i aon ProtectingChildren.ChurchofJesusChrist.org (taraa 10.8.1).

10.6

Buokaia Ataenimwaane ni Karekea te Nakoanibonga ae te Merekitereka

Ngkana ai 18 ana ririki te ataeinimwaane ke e ikawai riki, e a kona ni karekea te Nakoanibonga ae te Merekitereka ao ni katabuaki bwa te unimwaane ngkana e tauraoi man tau. E marooro ma ana karo ao te bitiobi ni karaoa te babaire aei.

Ni koron 19 ke imwain kitanan te mweenga ( tao ibukin te nako n reirei ke te nako n tautia), e riai ni katabuaki bwa te unimwaane ngkana e tau. Ngkana e aki katabuaki bwa te unimwaane n ana ririki ane 19, e kaoaki bwa e na irii bootakin te kooram n unimwaane.

Kaaro bon moan tabeia buokakiia natiia mwaane n tauraoi ni karekea te Nakoanibonga ae te Merekitereka. Te bitiobiriki ao aetuwaitia n te kooram a kona naba n ibuobuoki man anganakiia naake iai irouia te Nakoanibonga waaki ake a na katauraoiia ni maiuia n ibuobuoki bwa unimwaane. Te kabanea n tamaroa ni katauraoi ni karekean te Nakoanibonga ae te Merekitereka bon karaoan taabe n te Nakoanibonga ae te Aaron.

Naake a karekea te Nakoanibonga ae te Merekitereka a riai ni kabanea aia kona ni kaotaia n:

• Tuea ao berita aika tabu n te nakoanibonga (taraa Reirei ao Berita aika Tabu 84:33–44).

• Taben te unimwaane (Reirei ao Berita aika Tabu 20:38–45; 42:44; 107:11–12).

• Oin bukin te otenanti n te nakoanibonga ao kakabwaia ao aron karaoaia (taraa mwakoro 18).

• A na kanga mwaane ao aine n reitaki ni mwakuri ni kakoroa nanon ana mwakuri te Atua.

Ibukin rongorongon riki taekan atuun reirei aikai, taraa “Melchizedek Priesthood,” “Priesthood,” ao “Women in the Church” (Gospel Topics, topics.ChurchofJesusChrist.org).

Te beretitentii n aia kooram unimwaane ao taari n ibuobuoki a kona n ibuobuoki n anga te kaetieti aei. E kona ni karaoaki nakon temanna te ataeinimwaane n te mweenga ke n te kiraati i tinanikun bootaki n taromauri n te Tabati.

10.7

Aia Tia Kairiiri Ataeinimwaane man te Titeiki

Te beretitenti n te titeiki e na wetea ma ni kaokoroa te kauntira ae rietaata n riki bwa te beretitenti ibukiia Ataeinimwaane. Kaain te kauntira ae rietaata are a katabeaki nakon te Botaki n Ataeinnaine ao te Moanrinan a kona ni weteaki ao kaokoroaki ni beku bwa ana kauntira. Ke, ngkana e tau buburan te titeiki, tabeman kaain te Nakoanibonga ae te Merekitereka n te titeiki.a kona ni weteaki bwa kauntira. (Taraa 6.5.)

Te Beretitenti n te Botaki n Ataeinimwaane n te titeiki e beku iaan ana kairiiri te beretitentii n te titeiki. Ngaia ao ana kauntira ao te tia koroboki a beku i aon te waaki ni kairiiri ibukiia kairake n te titeiki (taraa 29.3.9). Ngaia ao ana kauntira a buokiia bitiobiriki man reiakinaia tabeia ibukiia kooram n te Nakoanibonga ae te Aaron.

Te tari man te titeiki e kona ni weteaki bwa te tia koroboki n te Botaki n Ataeinimwaane n te titeiki.

Ibukin rongorongon riki taben te beretitentii n te Botaki n Ataeinimwaane ao te tia koroboki n te titeiki, taraa 6.7.2 ao 6.7.3.

10.8

Kainibaire ao Kaetieti Riki Tabeua

10.8.1

Kamanoaia Kairake

Ngkana a reitaki ikawai ma kairake n ana waaki te Ekaretia, e riai n iai uoman ikawai ake a katabeaki ni mena irarikiia. E riai bwa kain te kooram a na bootaki bwa e aonga ni kona ni koro nanon aei.

Ni kabane ikawai ake a mwakuri ma kairake a riai ni kabwanina anaan te reirei ibukin kamanoaia ataei ao kairake teuana te namwakaina man te tai are a kamatoaaki iai (ProtectingChildren.ChurchofJesusChrist.org). A na kaokioka te reirei aei ni katoa teniua te ririki imwin aia moan kataneiai.

Ibukin te rongorongo bwa a na kanga kaetieti aikai ni irekereke nakoia taan ikatoatoa n ibuobuoki, taraa 21.2.2.

10.8.2

Ataeinimwaane ake Aki Toamau

Taan kairiiri n te Kooram a anga te tararua ae onoti nakoia ataeinimwanne ake aki toamau. Ibukin rongorongon aron reiakinaia ataeinimwaane aikai, taraa disability.ChurchofJesusChrist.org, taraa naba 38.8.27 inanon te aeniboki aei.

10.8.3

Kanikinaa Ibukiia Ataei ao Kairake

Ataeinimwaane a karekei kanikina bwa mwakoron kanoan te burokuraem ibukia Ataei ao Kairake. Ngkana te ataeinimwaane e moan kaaina te kooram n te Nakoanibonga ae te Aaron, e karekea te kanikina ibukin te kinaaki mairouia ana taan kairiiri n te kooram. E karekea naba kaobiin te Personal Development: Youth Guidebook. Aio e kona ni karaoaki n te tai are taan kairiiri n te kooram a kaitibo ma ngaia ni butimwaeia nakon te kooram. E kona naba ni karaoaki n tain te bowi ni katoa ririki ibukiia kairake ao aia karo (taraa 10.2.1.3).

I nanon Tianuare n te ririki are e a koro iai 18 ana ririki te ataeinimwaane, e karekea riki te kanikina ibukin te kinaaki.

Ataeinimwaane a kona ni karekei kanikina n tokanikai man kabanean aia kona n riki n ai aron te Tia Kamaiu.

Ibukin rongorongon riki taian kanikina, taraa ChildrenandYouth.ChurchofJesusChrist.org.

10.8.4

Rikoakin Angabwai n Aki Mamatam

N uoote are a mena kaaina n taabo aika uakaan, te bitiobi e kona n tuangiia kaain te Nakoanibonga ae te Aaron bwa a na kawaria membwa ni katoa namwakaina ao ni kaoiia bwa a na anga aia angabwai n aki mamatam. Ni karaon te babairei aei, te bitiobi e taraa mwaitiia naake iai irouia te Nakoanibonga ae te Aaron ake a tauraoi, mauriia, ao te kakabwaia nakoia memwba ake a aki kona n anga aia angabwai (taraa 34.3.2).

Kaain te Nakoanibonga a na nako ni kakauoman ngkana a rikoi angabwai n aki mamatam. Te koraki ake a riko angabwai n aki mamatam a na angan te membwa n te bitiobiriki n te tai ae waekoa.

A aki riai Membwa n anga aia angabwai riki tabeua, n aron te kabwianibwai nakoia naake a rikoi angabwai n aki mamatam.