« 10. Te mau pupu o te Autahu’ara’a a Aarona », Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 10. Te mau pupu o te Autahu’ara’a a Aarona », Buka arata’i rahi.
10.
Te mau pupu o te Autahu’ara’a a Aarona
10.1
Te ’ōpuara’a ’e te fa’anahonahora’a
E tauturu te Autahu’ara’a a Aarona i te mau tamari’i a te Atua ’ia fa’aineine nō te ho’i i mua i tōna ’aro. Tē mau nei te reira « i te mau tāviri nō te utuutura’a a te mau melahi, ’e nō te ’evanelia nō te tātarahapa, ’e nō te bāpetizo » (Te Ha’api’ira’a Tumu ’e te mau Fafaura’a 13 ; hi’o ato’a 3.3.2).
10.1.1
Te fā
E tauturu te mau pupu o te Autahu’ara’a a Aarona i te feiā ’āpī tamāroa ’ia rave ’e ’ia ha’apa’o i te mau fafaura’a mo’a, ’e ’ia fa’ahōhonu i tō rātou fa’afāriura’a ia Iesu Mesia ’e i tāna ’evanelia.
Hō’ē pupu autahu’ara’a o te hō’ē ïa pupu fa’anahonahohia o te mau taea’e tei mau i te autahu’ara’a. Te fā o te hō’ē pupu autahu’ara’a o te tauturura’a ïa i te mau ta’ata tei mau i te autahu’ara’a ’ia ’ohipa ’āmui nō te fa’aoti i te ’ohipa o te fa’aorara’a ’e o te fa’ateiteira’a. I roto i tā rātou mau pupu, e tāvini te mau taea’e tei mau i te Autahu’ara’a a Aarona i te tahi atu mau ta’ata, e fa’aoti i te mau ’ohipa a te autahu’ara’a, e patu i te tāhō’ēra’a, e ha’api’i mai ’e e ora i te ha’api’ira’a tumu.
10,1.2
Te parau tai’o a te pupu Autahu’ara’a a Aarona
E nehenehe te parau tai’o a te pupu o te Autahu’ara’a a Aarona e tauturu i te feiā ’āpī tamāroa tāta’itahi ’ia māramarama i tōna ti’ara’a hanahana, ’e tāna fā ’ei ta’ata tei mau i te autahu’ara’a. E tai’o te feiā ’āpī tamāroa ’e tō rātou feiā fa’atere i te parau tai’o i te ’ōmuara’a o te mau putuputura’a a te pupu, ’e i te tahi atu mau putuputura’a a te pupu. Teie te parau tai’o :
« E tamaiti here au nā te Atua, ’e e ’ohipa tāna nā’u.
« Ma tō’u ’ā’au ato’a ’e te itoito ’e te mana’o ’e te pūai, e here au i te Atua, e ha’apa’o vau i tā’u mau fafaura’a, ’e e fa’a’ohipa vau i tāna autahu’ara’a nō te tāvini ia vetahi ’ē, ma te ha’amata i roto i tō’u iho ’utuāfare.
« ’A tūtava ai au i te tāvini, i te fa’a’ohipa i te fa’aro’o, i te tātarahapa ’e i te ha’amaita’i atu ā iā’u i te mahana tāta’itahi, e ineine ïa vau nō te fāri’i i te mau ha’amaita’ira’a nō te hiero ’e te ’oa’oa mure ’ore o te ’evanelia.
« E fa’aineine au nō te riro ’ei misiōnare itoito mau, ’ei tāne fa’aipoipo ha’apa’o mau ’e ’ei metua tāne here ho’i, nā roto i te rirora’a ’ei pipi mau nā Iesu Mesia.
« E tauturu vau ’ia fa’aineine i te ao nei nō te ho’ira’a mai ’o te Fa’aora, nā roto i te anira’a i te mau ta’ata ato’a ’ia haere mai i te Mesia ’e ’ia fāri’i i te mau ha’amaita’ira’a o tōna tāra’ehara ».
10.1.3
Te mau pupu autahu’ara’a
E fa’anaho te ’episekōpo i te feiā e mau nei i te Autahu’ara’a a Aarona i roto i te mau pupu autahu’ara’a mai tei fa’a’itehia i raro nei. (Hi’o ato’a Te Ha’api’ira’a Tumu ’e te mau Fafaura’a 107:85–88.)
10.1.3.1
Te pupu o te mau diakono
E tomo te feiā ’āpī tamāroa i roto i te pupu o te mau diakono i te ’āva’e Tēnuare o te matahiti e ti’a ai tō rātou matahiti i te 12. I teie taime, e ti’a ato’a ia rātou ’ia fa’atōro’ahia ’ei diakono mai te mea ē, ’ua fa’aineinehia rātou ’e ’ua ti’amā.
E tāvini hō’ē melo diakono fa’atōro’ahia o te pupu ’ei peresideni nō te pupu. Mai te mea e nehenehe, e tāvini hō’ē ’aore rā, e piti tauturu ’e hō’ē pāpa’i parau i pīha’i iho iāna. E mau diakono ato’a nā tauturu ’e te pāpa’i parau.
’Ua fa’ata’ahia te mau ’ohipa a te hō’ē diakono i roto i Te Ha’api’ira’a Tumu ’e te mau Fafaura’a 20:57–59 ; 84:111. Te tahi atu mau ’ohipa, te ’ōperera’a i te ’ōro’a mo’a ’e te tāuturura’a i te ’episekōpo « nō te ha’apa’ora’a ïa i te mau mea tāhuti nei » (Te Ha’api’ira’a Tumu ’e te mau Fafaura’a 107:68).
10.1.3.2
Te pupu o te mau ha’api’i
E tomo te feiā ’āpī tamāroa i roto i te pupu o te mau ha’api’i i te ’āva’e Tēnuare o te matahiti e ti’a ai tō rātou matahiti i te 14. I teie taime, e ti’a ato’a ia rātou ’ia fa’atōro’ahia ’ei mau ha’api’i mai te mea ē, ’ua fa’aineinehia rātou ’e ’ua ti’amā.
E tāvini hō’ē melo ha’api’i fa’atōro’ahia o te pupu ’ei peresideni nō te pupu. Mai te mea e nehenehe, e tāvini hō’ē ’aore rā, e piti tauturu ’e hō’ē pāpa’i parau i pīha’i iho iāna. ’Ei mau ha’api’i ato’a te mau tauturu ’e te pāpa’i parau.
Hō’ē ā ’ohipa tā te mau ha’api’i ’e tā te mau diakono. E fa’aineine ato’a rātou i te ’ōro’a mo’a ’e e tāvini ’ei mau taea’e aupuru. ’Ua fa’ata’ahia te tahi atu mau ’ohipa i roto i Te Ha’api’ira’a Tumu ’e te mau Fafaura’a 20:53–59 ; 84:111.
10.1.3.3
Te pupu o te mau tahu’a
E tomo te feiā ’āpī tamāroa i roto i te pupu o te mau tahu’a i te ’āva’e Tēnuare o te matahiti e ti’a ai tō rātou matahiti i te 16. I teie taime, e ti’a ato’a ia rātou ’ia fa’atōro’ahia ’ei mau tahu’a mai te mea ’ua fa’aineinehia rātou ’e ’ua ti’amā.
’O te ’episekōpo te peresideni nō te pupu o te mau tahu’a (hi’o Te Ha’api’ira’a Tumu ’e te mau Fafaura’a 107:87–88). E pi’i ’oia hō’ē ’aore rā, e piti melo o te pupu ’ia riro ’ei nā tauturu nōna. E nehenehe ato’a e pi’i i te hō’ē pāpa’i parau. E fa’atōro’ahia nā tauturu ’e te pāpa’i parau ’ei tahu’a.
Hō’ē ā ’ohipa tā te mau tahu’a ’e tā te mau diakono ’e tā te mau ha’api’i. ’Ua fa’ata’ahia te tahi atu mau ’ohipa i roto i Te Ha’api’ira’a Tumu ’e te mau Fafaura’a 20:46–52, 73–79.
10.1.4
Te mau tāviri o te Autahu’ara’a
E fa’aterehia te pupu tāta’itahi e te hō’ē peresideni tei mau i te mau tāviri o te autahu’ara’a. E mau te peresideni o te pupu diakono, te peresideni o te pupu ha’api’i ’e te ’episekōpo, i te mau tāviri o te autahu’ara’a. Nō te tahi atu mau ha’amāramaramara’a nō ni’a i teie mau tāviri, hi’o 3.4.1.
10.1.5
Te fa’atanora’a i te mau pupu i te mau hina’aro o te fenua iho
I roto i te hō’ē pāroita ’e ’aore rā hō’ē ’āma’a, e mea iti te feiā ’āpī tamāroa, e nehenehe te mau pupu nō te Autahu’ara’a a Aarona e ’āmui hō’ē nō te mau ha’api’ira’a ’e nō te mau fa’a’oa’oara’a.
Mai te mea i roto i te hō’ē pāroita ’ua hau te rahira’a diakono i te 12, e nehenehe te ’episekōpo e vāhi i te pupu o te mau diakono. E au ato’a te reira nō te mau ha’api’i, mai te mea ’ua hau rātou i te 24 (hi’o Te Ha’api’ira’a Tumu ’e te mau Fafaura’a 107:85–86). ’Ia rave-ana’e-hia teie fa’aotira’a, e feruri te ’episekōpo i te mea tā te reira e fa’atupu i ni’a i te mau melo o te pupu.
10.2
’Āmuira’a i roto i te ’Ohipa nō te Fa’aorara’a ’e te Fa’ateiteira’a
Tē ani mai nei te Atua i te mau ta’ata ato’a ’ia haere mai i te Mesia ’e ’ia tauturu i roto i tāna ’ohipa nā roto i :
-
Te orara’a i te ’evanelia a Iesu Mesia.
-
Te ha’apa’ora’a i te feiā nava’i ’ore.
-
Te anira’a i te mau ta’ata ato’a ’ia fāri’i i te ’evanelia.
-
Te tāhō’ēra’a i te mau ’utuāfare nō te tau a muri atu.
E putuputu te ’episekōpora’a ’e te feiā ’āpī fa’atere pupu autahu’ara’a, pāturuhia e tō rātou mau tauturu ha’amāramarama (hi’o 10.5), nō te ’āparau nō ni’a e nāhea i te fa’atupura’a i teie ’ohipa. Nō te mau ha’amāramaramara’a hau atu nō ni’a i te ’Ohipa o te Fa’aorara’a ’e te Fa’ateiteira’a, ’a tuatāpapa i te pene 1.
10.2.1
Te orara’a i te ’evanelia a Iesu Mesia
10.2.1.1
Te ti’ara’a o te mau metua ’e te feiā fa’atere
E hōpoi’a nā te mau metua ’ia ha’api’i i tā rātou mau tamari’i i te ’evanelia ’e i te tauturu ia rātou ’ia ora i te reira (hi’o Te Ha’api’ira’a Tumu ’e te mau Fafaura’a 68:25–28). E pāturu te ’episekōpora’a ’e te feiā ’āpī fa’atere pupu, ma te tauturu a te mau tauturu ha’amāramarama, i te mau metua i roto i teie hōpoi’a mai teie i muri nei :
-
E fa’aitoito i te ’āparaura’a i rotopū i te feiā ’āpī tamāroa ’e tō rātou ’utuāfare.
-
E ha’apāpū ē, tē pāturu nei ’e tē ha’amaita’i nei te mau ’ohipa ri’i a te feiā ’āpī i te mau ’utuāfare.
-
E tauturu i te mau metua ’ia fa’aineine i tā rātou mau tamaiti nō te mau fa’atōro’ara’a autahu’ara’a ’e nō te fāri’i i te Autahu’ara’a a Melehizedeka.
-
E tauturu i te mau metua ’ia fa’aineine i tā rātou mau tamaiti nō te ’ōro’a hiero, nō te ’ohipa misiōnare rave tāmau, nō te fa’aipoipora’a hiero, ’e nō te ti’ara’a metua tāne.
E ti’a i te feiā fa’atere e ara i ni’a i te feiā ’āpī ’aita te ’utuāfare e pāturu nei ia rātou nō te ora i te ’evanelia.
E tūtava te mau metua ’e te feiā fa’atere ’ia riro rātou ’ei mau hi’ora’a maita’i nō te feiā ’āpī. E arata’i rātou i te mau tamari’i i roto i tā rātou mau tauto’ora’a ’ia riro hau atu mai ia Iesu Mesia. E nehenehe te fa’anahora’a a te mau tamari’i ’e a te feiā ’āpī e tauturu i roto i teie mau tauto’ora’a (hi’o ChildrenandYouth.ChurchofJesusChrist.org).
10.2.1.2
Te ha’api’ira’a mai i te ’evanelia
E fa’aitoito te ’episekōpora’a, te feiā fa’atere pupu feiā ’āpī, ’e te mau tauturu ha’amāramarama, i te feiā ’āpī tamāroa ’e i tō rātou ’utuāfare ’ia ha’api’i mai i te ’evanelia i te fare. E tuatāpapa te feiā fa’atere ’e te mau tauturu ha’amāramarama i te ’evanelia ’e e fa’a’ite atu i te feiā ’āpī tamāroa i te mea tā rātou i ’apo mai. E ani rātou i te mau melo o te pupu ’ia fa’a’ite i te ’ēkālesia i te mea tā rātou i ha’api’i mai i te fare.
E putuputu te mau pupu Autahu’ara’a a Aarona i te sābati nō te ha’apūai i te fa’aro’o, nō te patu i te hō’ēra’a, nō te ha’apūai i te mau ’utuāfare ’e te mau fare, ’e nō te rave i te mau fa’anahora’a nō te fa’atupu i te ’ohipa o te fa’aorara’a ’e te fa’ateiteira’a. E fa’anaho te ’episekōpora’a ’e te feiā ’āpī fa’atere pupu, pāturuhia e te mau tauturu ha’amāramarama, i te mau putuputura’a o te sābati.
E fa’atupuhia te mau putuputura’a pupu i te piti ’e i te maha o te sābati o te ’āva’e tāta’itahi. E 50 minuti noa. Nā te hō’ē melo o te peresidenira’a pupu (’aore rā, hō’ē o te mau tauturu o te ’episekōpo i roto i te pupu tahu’a) e arata’i. E arata’i ’oia i te pupu nā roto i te tai’ora’a i te parau tai’o ’e te ’āparau-’āmui-ra’a i ni’a i te mau fa’auera’a ’ohipa, te mau hōpoi’a, ’e te tahi mau ’ohipa ’ē atu.
I muri iho, e fa’atere te hō’ē melo o te pupu ’aore rā, hō’ē ta’ata pa’ari, i te ha’api’ira’a ’evanelia. E paraparau te feiā fa’atere pupu ’e te mau tauturu ha’amāramarama nō te fa’aoti e nā vai e ha’api’i. E ’itehia te mau arata’ira’a o te putuputura’a i roto i te Mai, pe’e mai—nō te mau pupu Autahu’ara’a a Aarona ’e te mau piha ha’api’ira’a a te Feiā ’Āpī Tamāhine (hi’o ComeFollowMe.ChurchofJesusChrist.org).
Te ti’ara’a mau, e putuputu fa’ata’a ’ē te pupu Autahu’ara’a a Aarona tāta’itahi (hi’o 10.1.5). E nehenehe te feiā ’āpī tamāroa ’e te feiā ’āpī tamāhine e ’āmui i te tahi taime nō te hō’ē ha’api’ira’a, mai te au i te arata’ira’a a te ’episekōpora’a.
E fa’aitoitohia te feiā ’āpī tamāroa ’ia haere i te ha’api’ira’a séminaire (hi’o 15.1).
10.2.1.3
Te tāvinira’a ’e te mau ’ohipa ri’i
Nā te ’episekōpora’a ’e te feiā fa’atere pupu feiā ’āpī, pāturuhia ’e te mau tauturu ha’amāramarama, e fa’anaho i te tāvinira’a ’e te mau ’ohipa ri’i. E tauturu te reira i te fa’atupura’a i te ’ohipa o te fa’aorara’a ’e te fa’ateiteira’a. E patu te tāvinira’a ’e te mau ohipa ri’i i te mau ’itera’a pāpū, e ha’apūai i te mau ’utuāfare, ’e fa’atupu i te hō’ēra’a o te pupu, ’e e hōro’a mai i te mau rāve’a nō te ha’amaita’i ia vetahi ’ē. ’Ia rave-fa’atano-hia te reira i roto e maha tuha’a nō te tupura’a o te ta’ata iho : te pae vārua, te pae tōtiare, te pae tino, ’e te pae ferurira’a.
E ravehia te rahira’a o te mau ohipa ri’i a te feiā ’āpī i te mau taime ta’a ’ē atu i te sābati ’aore rā, i te mau pō monirē. E fa’atupuhia te reira hō’ē taime i te hepetoma. I roto i te tahi mau fenua, nō te ātea, nō te pārurura’a, ’aore rā, nō te tahi atu mau tumu, ’aita te mau ’ohipa ri’i e fa’atupuhia. I roto i teie mau fenua, e nehenehe e fa’aiti mai te fa’atupura’a i te mau ohipa ri’i, terā rā, ’ia fa’atupuhia te reira hō’ē a’e taime i te ’āva’e. Enehenehe e fa’anaho i te mau ’ohipa ri’i i ni’a Sample Service and Activity Planner (Te hōho’a fa’anahora’a nō te tāvinira’a ’e te ohipa ri’i), e vai ra i ni’a i te ChurchofJesusChrist.org.
Tē vai ra te tahi tāvinira’a ’e te tahi mau ’ohipa ri’i e ’āmui te feiā ’āpī tamāroa ’e te feiā ’āpī tamāhine, nō te feiā ’āpī pa’ari ana’e rā.
E nehenehe te feiā ’āpī e fāna’o i te autahira’a i roto i te mau pupu rarahi a’e. E nehenehe te feiā ’āpī i roto e piti pāroita ’aore rā hau atu, e putuputu ’āmui i te tahi taime nō te tāvinira’a ’e te mau ’ohipa ri’i. E nehenehe te mau titi ’aore rā, te mau mata’eina’a e fa’anaho i te tahi taime i te tāvinira’a ’e te mau ’ohipa ri’i nā te feiā ’āpī.
E tauturu te feiā fa’atere pa’ari ’ia ha’apāpū ē, e mea pāruruhia te mau ’ohipa ri’i (hi’o safety.ChurchofJesusChrist.org ; hi’o ato’a 20.6.20). E tītauhia e piti a’e feiā fa’atere pa’ari ha’apa’o ’ia tae mai i roto i te mau ’ohipa ri’i ato’a (hi’o 10.8.1).
Nō te mau ha’amāramaramara’a hau atu, hi’o AaronicPriesthoodQuorums.ChurchofJesusChrist.org. Hi’o ato’a JustServe.org i te vāhi e roa’a te reira. E hōro’a mai teie mau rāve’a tauturu i te mau mana’o nō te tāvinira’a ’e te ’ohipa ri’i.
Te mau ’ohipa ri’i tāmatahiti. Ta’a ’ē atu te mau ’ohipa ri’i tāmau a te feiā ’āpī, e nehenehe ato’a te feiā ’āpī tamāroa e ’āmui atu i roto i teie mau ’ohipa ri’i i muri nei i te matahiti tāta’itahi :
-
Hō’ē purera’a piri atu i te ’ōmuara’a o te matahiti, nā te feiā ’āpī ’e tō rātou mau metua. E nehenehe te reira e fa’atupu-fa’ata’a-’ē-hia nō te feiā ’āpī tamāroa ’e te feiā ’āpī tamāhine, ’aore rā e fa’atupu-’āmui-hia. E nehenehe ato’a te reira e fa’atupuhia nā te pāroita ’aore rā, nā te titi. E arata’ihia ’e e fa’anahohia te reira nā te mau tauturu o te ’episekōpo i roto i te pupu o te mau tahu’a ’e te peresidenira’a o te piha feiā ’āpī tamāhine pa’ari a’e. Nō te feiā ’āpī tamāroa e ti’ahia tō rātou matahiti i te 12 i roto i te matahiti, e fāri’i rātou i tō rātou tāpa’o ti’ara’a i roto i taua putuputura’a ra (hi’o 10.8.3). Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
-
E pūhapara’a nā te pupu Autahu’ara’a a Aarona (hi’o Aaronic Priesthood Quorum Camp Guide). E nehenehe te feiā ’āpī tamāroa e ’āmui i roto i te tahi atu mau pūhapara’a, te mau tupura’a ’ohipa, ’e te mau ’ohipa ri’i i te pō, i te roara’a o te matahiti, i te vāhi e nehenehe e rave.
-
E ’āmuira’a feiā ’āpī nā te pāroita ’aore rā, nā te titi ’aore rā, e ’āmuira’a Nō te Pūai o te Feiā ’Āpī (JSF) (hi’o FSY.ChurchofJesusChrist.org).
-
Hō’ē a’e ’ohipa ri’i nō te ha’apāpū i te mau ture i roto i te Nō te Pūai o te Feiā ’Āpī. E nehenehe te feiā ’āpī tamāroa ’e te feiā ’āpī tamāhine e ’āmui atu i roto i teie tupura’a ’ohipa. E nehenehe ato’a e ani i te mau metua.
Te matahiti e tītauhia Ma te parau fa’ati’a a tō rātou mau metua, e nehenehe te feiā ’āpī tamāroa e haere i te pūhapara’a a te Autahu’ara’a a Aarona e ha’amata i te ’āva’e Tēnuare o te matahiti e ti’a ai tō rātou matahiti i te 12. E nehenehe rātou e haere i te mau orira’a, te mau ’āmuira’a feiā ’āpī, ’e te mau ’āmuira’a JSF e ha’amata i te ’āva’e Tēnuare o te matahiti e ti’a ai tō rātou matahiti i te 14. Terā rā, ’ia ti’ahia tō rātou e 16 a’e matahiti hou te arapaera’a (hi’o Nō te Pūai o te Feiā ’Āpī [2011], 4).
Aufaura’a i te mau ’ohipa ri’i. Nā te faufa’a moni pāroita e ’aufau i te mau ’ohipa ri’i, tae noa atu i te mau tauiha’a. ’Eiaha te mau rāterera’a ’e te mau ha’amāu’ara’a ’ia rahi roa.
Hō’ē ta’a-’ē-ra’a, mai te mea ’aita e rava’i te faufa’a moni a te pāroita nō te ’aufau i te mau ’ohipa ri’i e rave rahi mahana, mai te mau pūhapara’a, e nehenehe te feiā fa’atere e ani i te feiā e ’āmui atu i te reira ’ohipa ri’i ’ia ’aufau i tā rātou tuha’a. Teie rā, ’eiaha e ’ōpani i te hō’ē feiā ’āpī tamāroa ’ia haere atu mai te mea ’aita tāna e nehenehe e ’aufau. Mai te mea e hina’aro-noa-hia ā te tahi atu moni, e nehenehe te ’episekōpo e fa’ati’a ’ia ravehia te ’imi’imira’a moni i te matahiti tāta’itahi (hi’o 20.2.8).
E ha’apāpū te ’episekōpora’a ē, ’ua nava’i ’e ’ua tuea maita’i te faufa’a ’e te mau ’ohipa ri’i nā te feiā ’āpī tamāroa ’e nā te feiā ’āpī tamāhine. ’Ua fa’ata’ahia te faufa’a moni nō te mau pupu Autahu’ara’a a Aarona mai te au i te rahira’a o te feiā ’āpī tamāroa i roto i te pāroita. Ua fa’ata’ahia te faufa’a moni nō te feiā ’āpī tamāhine mai te au i te rahira’a o te feiā ’āpī tamāhine i roto i te pāroita.
Hi’o FSY.ChurchofJesusChrist.org nō te mau ha’amāramaramara’a nō ni’a i te ’aufaura’a i te mau ’āmuira’a JSF.
10.2.1.4
Te fa’ahotura’a iāna iho
I roto i tā rātou mau tauto’ora’a ’ia riro hau atu mai te Fa’aora te huru, e anihia i te feiā ’āpī ’ia ha’amau i te mau ’ōpuara’a nō te tupu i te rahi i te pae vārua, te pae tōtiare, te pae tino ’e te pae ferurira’a (hi’o Luka 2:52). E ’imi te feiā ’āpī i te fa’aurura’a nō te ’ite, e aha te ti’a ia rātou ’ia ha’amaita’i atu. Nā roto i te tauturu a te mau metua, e hāmani rātou i te mau fa’anahora’a, e ha’a i ni’a i tā rātou mau fa’anahora’a, ’e e feruri i ni’a i te mea tā rātou i ha’api’i mai. E hōro’a te feiā fa’atere ’e te mau tauturu ha’amāramarama i te tauturu mai te mea e hina’arohia. Teie rā, ’eiaha rātou e hi’opo’a i te mau ’ōpuara’a a te feiā ’āpī tamāroa. E nehenehe te mau metua ’e te feiā fa’atere e hōro’a i te mana’o nō te mau ’ōpuara’a, e vaiiho rā rātou i te feiā ’āpī ’ia ’imi i tā rātou iho fa’aurura’a nō ni’a i te mau ’ōpuara’a e rave.
E fa’aitoitohia te feiā ’āpī ’ia fa’aoti e piti a’e ’ōpuara’a i roto i nā tuha’a tāta’itahi e maha i te matahiti tāta’itahi. E nehenehe rātou e fa’a’ohipa i te Tupura’a o te ta’ata iho : Buka tauturu nō te feiā ’āpī ’aore rā, te fa’anahora’a ’āfa’ifa’i o te ’orara’a i te ’evanelia nō te fa’ata’a ’e nō te tāpa’o i te mau ’ōpuara’a.
Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
10.2.2
Ha’apa’o i te feiā nava’i ’ore
E tauturu te feiā tei mau i te Autahu’ara’a a Aarona i te ’episekōpo i roto i « te ha’apa’ora’a i te mau ’ohipa tāhuti nei »(Te Ha’api’ira’a Tumu ’e te mau Fafaura’a 107:68). E fāri’i rātou i te mau rāve’a tāmau nō te tāvini ia vetahi ’ē i roto, ’e nā muri iho i tō rātou ’utuāfare, i roto i te mau ’ohipa ri’i a te feiā ’āpī, ’e i tā rātou iho. Tē vai ra te mau mana’o nō te tāvinira’a i ni’a i te ChildrenandYouth.ChurchofJesusChrist.org. I te vāhi e roa’a, e hōro’a te JustServe.org i te mau rāve’a nō te tāvini i roto i te ’oire.
10.2.2.1
Aupururaʼa
Te aupurura’a, o te ha’apa’ora’a ïa ia vetahi ’ē mai tā te Fa’aora e nā reira. E fāri’i te feiā tei mau i te Autahu’ara’a a Aarona i te mau fa’auera’a ’ohipa aupuru ’o tē ha’amata i te ’āva’e Tēnuare o te matahiti e ti’a ai tō rātou matahiti i te 14. Nō te tahi atu mau ha’amāramaramara’a, hi’o pene 21.
10.2.3
Te anira’a i te mau ta’ata ato’a ’ia fāri’i i te ’evanelia
E ’ohipa nā te feiā tei mau i te Autahu’ara’a a Aarona « ’ia ani i te mau ta’ata ato’a ’ia haere mai i te Mesia » (Te Ha’api’ira’a Tumu ’e te mau Fafaura’a 20:59). ’Ua tāpurahia i raro nei te tahi mau rāve’a nō te rave i te reira :
-
Fa’a’ite i te hō’ē hi’ora’a maita’i ’ei mau pipi nā Iesu Mesia.
-
Fa’a’ite i tō rātou ’itera’a pāpū i te mau hoa ’e i te mau melo o te ’utuāfare.
-
Aupuru i te mau melo paruparu o tā rātou mau pupu.
-
Ani i te mau hoa ’ia haere mai i te purera’a ’aore rā, i te mau ’ohipara’a a te feiā ’āpī.
-
Ani i te mau hoa ’ia ’āmui mai i roto i te fa’anahora’a a te mau tamari’i ’e a te feiā ’āpī. E ha’a te feiā fa’atere piri roa i te mau metua o teie mau feiā ’āpī nō te tauturu ia rātou ’ia hāro’aro’a i te fa’anahora’a ’e ’ia fa’ata’a nāhea rātou ’e tā rātou mau tamari’i ’ia ’āmui mai i roto.
-
Ani i te mau hoa ’ia ha’api’ihia e te mau misiōnare.
E fa’aitoito te mau metua ’e te feiā fa’atere i te feiā ’āpī tamāroa ’ia fa’aineine nō te tāvini i te hō’ē misiōni rave tāmau ’e ’ia fa’a’ite i te ’evanelia i te roara’a o tō rātou orara’a. ’Ua tāpurahia i raro nei te tahi mau rāve’a nō te rave i te reira :
-
E fa’aitoito i te feiā ’āpī tamāroa ’ia noa’a tō rātou iho ’itera’a pāpū nō ni’a i te fa’anahora’a nō te ’oa’oa a te Metua i te ao ra, te tāra’ehara o Iesu Mesia, ’e te fa’aho’i-fa’ahou-ra’a-hia mai o tāna ’evanelia.
-
Ha’api’i i te feiā ’āpī tamāroa nō ni’a i te mau ha’amaita’ira’a o te tāvinira’a i te hō’ē misiōni, ’e e aha tē tīa’ihia ra ia rātou.
-
Hōro’a i te mau rāve’a nō te tāvini i roto i te ’Ēkālesia.
-
Hōro’a i te mau rāve’a nō te ha’api’i i te ’evanelia i roto i te mau putuputura’a a te pupu ’e i te tahi atu mau vāhi.
’Ei tuha’a nō teie fa’aineinera’a, e nehenehe te ’episekōpora’a ’aore rā, te peresidenira’a titi e fanahonaho i te hō’ē piha fa’aineinera’a misiōnare. Te mau rāve’a tumu nō teie piha ’o te mau pāpa’ira’a mo’a ïa, Missionary Standards for Disciples of Jesus Christ (Te mau ture misiōnare nō te mau pipi a Iesu Mesia), ’e ’Ia porohaere i tā’u nei ’evanelia. E’ita teie ha’api’ira’a e fa’aterehia i te mau putuputura’a mātarohia i te sābati.
Tē hōro’a mai nei te Missionary.ChurchofJesusChrist.org i te tahi atu mau rāve’a ’o tē nehenehe e tauturu i te feiā ’āpī tamāroa ’a fa’aineine ai rātou nō te tāvini ’ei misiōnare. Hi’o te mau pene 23 ’e te 24 nō te mau ha’amāramaramara’a hau atu.
10.2.4
Te tāhō’ēra’a i te mau ’utuāfare nō te tau a muri atu
E nehenehe te feiā tei mau i te Autahu’ara’a a Aarona e tauturu i te tāhō’ēra’a i te mau ’utuāfare nō te tau a muri atu nā roto i te mau rāve’a e rave rahi. ’Ua tāpurahia i raro nei te tahi o te reira mau rāve’a :
-
Fa’atura i tō rātou mau metua ’e e fa’a’ite i te hō’ē hi’ora’a nō te hō’ē orara’a mai tō te Mesia i roto i tō rātou fare.
-
Fa’aineine ’ia fāri’i i tō rātou iho ’utuāfare mure ’ore.
-
’Ia ti’amā nō te hō’ē parau fa’ati’a tā’ōti’ahia nō te hiero.
-
Fa’aineine nō te fāri’i i te mau ’ōro’a nō te hiero, tae noa atu i te fa’aipoipora’a mure ’ore.
-
Ha’api’i mai nō ni’a i tō rātou mau ’utuāfare fēti’i ’e te mau tupuna (hi’o
-
’Imi i te mau tupuna e hina’aro i te mau ’ōro’a hiero (hi’o
-
’Āmui pinepine i roto i te mau bāpetizora’a ’e te mau ha’amaura’a nō te feiā pohe, mai te mea e nehenehe.
-
’Āmui i roto i te ’ohipa fa’ahorora’a i’oa (indexation) (hi’o
-
Tāvini ’ei mau tauturu nō te hiero ’e nō te ’ā’amu ’utuāfare, ’ia pi’ihia e te ’episekōpora’a (hi’o 25.4.4).
10.3
’Ēpisekōpora’a
Te ’episekōpora’a ’o te peresidenira’a ïa o te Autahu’ara’a a Aarona i roto i te pāroita (hi’o Te Ha’api’ira’a Tumu ’e te mau Fafaura’a 107:13–15). Nā rātou e fa’atere i te ’ohipa a te mau pupu o te Autahu’ara’a a Aarona. Te hōpoi’a mātāmua a te ’episekōpo ’o te ha’apa’ora’a ïa i te feiā ’āpī tamāroa ’e te feiā ’āpī tamāhine i roto i tāna pāroita. E ha’api’i mai ’oia i tō rātou i’oa ’e e māramarama i te huru o tō rātou orara’a i te fare. E haere tāmau ’oia i tā rātou mau ’ohipa ri’i ’e i tā rātou mau putuputura’a i te sābati.
Te ’episekōpo ’o te peresideni ïa o te pupu o te mau tahu’a. Tāna ’ohipa « ’o te peresidenira’a ïa i ni’a i [te] mau tahu’a, e ’ia parahi i roto i te ’āpo’ora’a i pīha’i iho ia rātou ra, ’ia ha’api’i atu ia rātou i te mau ’ohipa nō tō rātou tōro’a » (Te Ha’api’ira’a Tumu ’e te mau Fafaura’a 107:87).
Tei te tauturu hō’ē i roto i te ’episekōpora’a te hōpoi’a nō te pupu o te mau ha’api’i. Tei te tauturu piti te hōpoi’a nō te pupu o te mau diakono.
’Ia pārahi ana’e te hō’ē melo o te ’episekōpora’a i roto i te putuputura’a a te hō’ē pupu, nāna e peresideni i te reira putuputura’a.
Teie i muri nei te tahi atu mau hōpoi’a a te ’episekōpora’a nō te mau pupu o te Autahu’ara’a a Aarona :
-
E arata’i i te mau peresidenira’a pupu ’e te mau tauturu o te ’episekōpo i roto i te pupu o te mau tahu’a. E tauturu ia rātou ’ia māramarama ’e ’ia rave i tā rātou mau ’ohipa ’ei feiā fa’atere. Nō te rave i te reira, e fa’a’ohipa te ’episekōpora’a i te mau pāpa’ira’a mo’a ’e « Te ha’api’ira’a a te Autahu’ara’a a Aarona ’e a te peresidenira’a pupu o te feiā ’āpī tamāhine » (hi’o AaronicPriesthoodQuorums.ChurchofJesusChrist.org). E nehenehe ato’a rātou e fa’a’ohipa i te pene 4 o teie buka arata’i.
-
E uiui i te feiā ’āpī tamāroa tāta’itahi e piti a’e taime i te matahiti (hi’o 31.1.7).
-
E hi’opo’a i te ha’api’ira’a i roto i te mau pupu Autahu’ara’a a Aarona.
-
E tauturu i te feiā ’āpī tamāroa ’ia fa’aineine nō te fāri’i i te Autahu’ara’a a Melehizedeka (hi’o 10.6).
-
E hi’opo’a i te mau parau, te mau parau fa’a’ite, ’e te faufa’a moni a te mau pupu Autahu’ara’a a Aarona.
E tauturu te mau tauturu ha’amāramarama o te pupu i teie mau hōpoi’a mai te mea e tītauhia (hi’o 10.5).
10.4
Te feiā fa’atere nō te pupu feiā ’āpī
10.4.1
Te pi’ira’a, te fa’atōro’ara’a ’e te fa’ata’ara’a
E pi’i te ’episekōpo hō’ē ’aore rā, e piti tahu’a ’ia riro ’ei tauturu nōna i te fa’aterera’a i te pupu tahu’a. E nehenehe ato’a hō’ē melo o te ’episekōpora’a e pi’i i te hō’ē pāpa’i parau.
E pi’i te hō’ē melo o te ’episekōpora’a i te peresideni o te pupu diakono, ’e o te pupu ha’api’i. Mai te mea ē, e nava’i te feiā tei mau i te Autahu’ara’a a Aarona nō te tāvini, e feruri teie feiā ’āpī tamāroa nā roto i te pure i te mau melo o te pupu e rave ’ei mau tauturu ’e ’ei pāpa’i parau. E feruri te ’episekōpora’a i tā rātou mā’itira’a ’e e hōro’a i te mau pi’ira’a.
Hou ’a ani ai i te hō’ē feiā ’āpī tamāroa ’ia tāvini i roto i te hō’ē o teie mau pi’ira’a, e ani te melo o te ’episekōpora’a i te parau fa’ati’a i te mau metua o te reira feiā ’āpī tamāroa.
I muri a’e i te hōro’ara’a i teie mau pi’ira’a, e tu’u te hō’ē melo o te ’episekōpora’a i te feiā fa’atere o te pupu nō te hō’ē pāturura’a i roto i tā rātou putuputura’a pupu. E fa’ata’a te ’episekōpo i tōna nā tauturu ’e i te mau peresideni o te pupu diakono ’e o te pupu ha’api’i. E hōro’a ’oia i te mau tāviri autahu’ara’a i ni’a i te mau peresideni pupu. E nehenehe ’oia e fa’aue i tōna nā tauturu ’ia fa’ata’a i te tahi atu mau melo o te peresidenira’a ’e te pāpa’i parau.
E fa’a’ara te hō’ē melo o te ’episekōpora’a i teie mau pi’ira’a i roto i te purera’a ’ōro’a. ’Aita ’oia e ani i te pāturura’a.
10.4.2
Te mau hōpoi’a
Teie i muri nei te mau hōpoi’a a te mau peresideni pupu Autahu’ara’a a Aarona, tae noa atu i te ’episekōpo. E ’ōpere māite tō rātou mau tauturu, ’e nā tauturu o te ’episekōpo i roto i te pupu tahu’a i teie mau hōpoi’a.
-
E arata’i i te mau tauto’ora’a a te pupu nō te ’āmui i roto i te ’ohipa o te fa’aorara’a ’e te fa’ateiteira’a (hi’o pene 1).
-
’Ia ’ite ’e ’ia tāvini i te melo tāta’itahi o te pupu, tae roa atu ia rātou ’aita e tae mai nei i te mau putuputura’a a te pupu. ’Ia ’ite i tō rātou mau hina’aro ’e tō rātou huru orara’a.
-
Tāvini i roto i te ’āpo’ora’a feiā ’āpī o te pāroita (hi’o 10.4.4).
-
Ha’api’i i te mau melo o te pupu i tā rātou mau ’ohipa nō te autahu’ara’a (hi’o Te Ha’api’ira’a Tumu ’e te mau Fafaura’a 107:85–88). Pāturu ia rātou i te ravera’a i teie mau ’ohipa.
-
Fa’anaho ’e arata’i i te mau putuputura’a a te pupu (hi’o 10.2.1.2).
-
Fa’anaho ’e e rave i te ’ohipa tāvinira’a ’e te mau ’ohipa ri’i a te pupu (hi’o 10.2.1.3).
’Ia pi’i-ana’e-hia te mau pāpa’i parau, e fa’aineine rātou i te mau tāpura ’ohipa nō te mau putuputura’a ’e e pāpa’i ato’a i te mau nota. E tauturu ato’a rātou i te pāpa’i parau o te pāroita ’aore rā, i te hō’ē tauturu ha’amāramarama o te pupu ’aore rā, te hō’ē ta’ata ta’a ’ē ’ia tāpa’opa’o i te taera’a mai.
E ha’api’i te mau melo o te ’episekōpora’a i te feiā ’āpī tamāroa i tā rātou mau hōpoi’a (hi’o 10.3). E tauturu maita’i te mau tauturu ha’amāramarama o te pupu ’e te mau ta’ata ta’a ’ē (hi’o 10.5).
10.4.3
Putuputura’a a te peresidenira’a pupu
E putuputu tāmau te mau peresidenira’a pupu Autahu’ara’a a Aarona. Nā te peresideni pupu e arata’i i teie mau putuputura’a. E ’āmui mai e piti a’e ta’ata pa’ari i roto—hō’ē melo o te ’episekōpora’a, hō’ē tauturu ha’amāramarama, ’aore rā, hō’ē ta’ata ta’a ’ē. I roto i teie mau rurura’a, e paraparau ’āmui te feiā fa’atere ’e e ’imi ho’i i te fa’aurura’a nō ni’a i te hina’aro o te Fatu nō tā rātou pupu. I roto i te tāpura ’ohipa , e nehenehe e ’āparau i te mau tumu parau i muri nei :
-
Te rave-fa’aoti-ra’a i te ’ohipa o te fa’aorara’a ’e te fa’ateiteira’a
-
Te tāvinira’a i te mau melo o te pupu, ma te ha’apa’o ta’a ’ē i te mau melo ’āpī ’e te fa’aorara’a i te mau melo paruparu.
-
Te torora’a i te rima i te feiā nō te tahi atu mau fa’aro’o ’e mau ti’aturira’a
-
Te fa’anahora’a i te mau putuputura’a a te pupu, te tāvinira’a ’e te mau ’ohipara’a
-
Ha’api’ira’a nō te fa’aterera’a nō roto mai i te feiā fa’atere pupu ’aore rā, te mau tauturu ha’amāramarama
Tē vai ra te Hōho’a nō te tāpura ’ohipa nō te putuputura’a a te peresidenira’a i ni’a ChurchofJesusChrist.org.
10.4.4
Te ’āpo’ora’a pāroita a te feiā ’āpī
Te fā o te ’āpo’ora’a pāroita a te feiā ’āpī, nō te tauturu ïa i te feiā ’āpī ’ia arata’i mai i te tahi atu mau ta’ata ia Iesu Mesia ra ’e ’ia rave i te ’ohipa o te fa’aorara’a ’e te fa’ateiteira’a.
Nā te ’episekōpo e peresideni i te ’āpo’ora’a pāroita a te feiā ’āpī. Teie te mau melo o teie ’āpo’ora’a :
-
Te ’episekōpora’a.
-
Hō’ē o nā tauturu o te ’episekōpo i roto i te pupu tahu’a ’e te peresideni o te pupu ha’api’i ’e te pupu diakono.
-
Te mau peresideni piha ha’api’ira’a a te feiā ’āpī tamāhine (’aore rā, te peresidenira’a tā’āto’a o te piha ha’api’ira’a mai te mea ē, hō’ē ana’e piha ha’api’ira’a feiā ’āpī tamāhine i roto i te pāroita).
-
Te peresideni nō te Feiā ’Āpī Tamāhine
E paraparau te ’āpo’ora’a feiā ’āpī a te pāroita i te mau rāve’a nō te tauturu ia vetahi’ē ’ia patu i te ’itera’a pāpū, ’ia fāri’i i te mau ’ōro’a o te fa’aorara’a, ’ia ha’apa’o i te mau fafaura’a, ’e ’ia riro ’ei mau pipi nā Iesu Mesia (hi’o Moroni 6:4–5). E paraparau ’āmui rātou nō ni’a i te mau hina’aro o te feiā ’āpī tamāroa ’e o te feiā ’āpī tamāhine i roto i te pāroita. E nehenehe rātou e paraparau i te mau ’ohipara’a nō te pāhono i teie mau hina’aro. Terā rā, e fa’anahohia te mau ’ohipara’a i roto i te mau putuputura’a a te pupu ’aore rā, a te piha.
Hi’o i te 29.2.9 nō te tahi atu mau ha’amāramaramara’a nō ni’a i te ’āpo’ora’a a te feiā ’āpī pāroita.
10.5
Te mau tauturu ha’amāramarama ’e te mau tahu’a ha’api’i
E pi’i ’e e fa’ata’a te hō’ē melo o te ’episekōpora’a i te mau tāne ’ei mau tauturu ha’amāramarama nō te pupu Autahu’ara’a a Aarona. E pāturu teie mau tauturu ha’amāramarama i te ’episekōpora’a i roto i tā rātou mau hōpoi’a nō te mau pupu Autahu’ara’a a Aarona. E ha’apa’o pāpū rātou i te parau nō te arata’ira’a i te feiā ’āpī tamāroa, te ha’api’ira’a ia rātou nāhea ’ia arata’i nā roto i te fa’aurura’a, ’e te tauturura’a ia rātou ’ia riro hau atu mai ia Iesu Mesia.
E nehenehe ato’a te ’episekōpora’a e pi’i i te ta’ata tahu’a ha’api’i nō te pupu nō te tauturu i te mau tauturu ha’amāramarama. I te tahi taime, e rave-noa-hia teie mau pi’ira’a nō te hō’ē ’ohipa ta’a ’ē, mai te hō’ē pūhapara’a, hō’ē ’āmuira’a feiā ’āpī, ’aore rā, nō te ’ohipa tū’aro. E nehenehe ato’a e pi’i i te hō’ē tahu’a ha’api’i nō te rave i te hō’ē ’ohipa ta’a ’ē, mai te tāpa’opa’ora’a i te rahira’a ta’ata tei tae mai.
E tītauhia e piti a’e ta’ata pa’ari ha’apa’o i roto i te putuputura’a a te pupu tāta’itahi ’e i te ’ohipa ri’i. Te parahira’a mai te mau tauturu ha’amāramarama ’e te mau tahu’a ha’api’i i roto, e nehenehe i te mau melo o te ’episekōpora’a e haere e hi’o i te mau piha ha’api’ira’a a te feiā ’āpī tamāhine ’e a te Paraimere ’e i te mau ’ohipa ri’i. E ti’a i te mau tauturu ha’amāramarama ’e i te mau tahu’a ha’api’i ’ia fāri’i i te ha’api’ipi’ira’a i ni’a ProtectingChildren.ChurchofJesusChrist.org (hi’o 10.8.1).
10.6
Te tāuturura’a i te feiā ’āpī tamāroa ’ia fa’aineine nō te fāri’i i te Autahu’ara’a a Melehizedeka
’Ia ti’a ana’e te matahiti o te hō’ē feiā ’āpī tamāroa i te 18 ’aore rā, hau atu, e ti’a ïa iāna ’ia fāri’i i te Autahu’ara’a a Melehizedeka ’e ’ia fa’atōro’ahia ’ei peresibutero mai te mea ’ua ineine ’oia ’e ’ua ti’amā. E paraparau ’oia i tōna nā metua ’e i te ’episekōpo nō te rave i teie fa’aotira’a.
I te 19 o te matahiti ’aore rā, hou ’a fa’aru’e ai i te fare (mai te haerera’a i te fare ha’api’ira’a tuarua, ’aore rā, i roto i te ’āua fa’ehau), e fa’atōro’ahia ’oia ’ei peresibutero mai te mea ’ua ti’amā ’oia. Noa atu ē, ’aita ’oia i fa’atōro’ahia ’ei peresibutero i te 19ra’a o te matahiti, e anihia ’oia ’ia haere i roto i te mau putuputura’a a te pupu peresibutero.
Tei te mau metua te hōpoi’a mātāmua nō te tauturu i tā rāua mau tamaiti ’ia fa’aineine nō te fāri’i i te Autahu’ara’a a Melehizedeka. E nehenehe ato’a te ’episekōpora’a ’e te mau tauturu ha’amāramarama o te pupu e tauturu nā roto i te hōro’ara’a i te feiā tei mau i te Autahu’ara’a a Aarona, i te mau ’itera’a ’o tē fa’aineine ia rātou nō te hō’ē orara’a tāvini ’ei mau peresibutero. Te fa’aineinera’a maita’i roa a’e nō te fāri’i i te Autahu’ara’a a Melehizedeka o te ravera’a ïa i te mau hōpoi’a a te Autahu’ara’a a Aarona.
E ti’a i te feiā tei fāri’i i te Autahu’ara’a a Melehizedeka ’ia tūtava i te hāro’aro’a i :
-
Te tapura’a ’e te fafaura’a o te autahu’ara’a (hi’o Te Ha’api’ira’a Tumu ’e te mau Fafaura’a 84:33–44).
-
Te mau hōpoi’a a te hō’ē peresibutero (Te Ha’api’ira’a Tumu ’e te mau Fafaura’a 20:38–45 ; 42:44 ; 107:11–12).
-
Te mau fā o te mau ’ōro’a o te autahu’ara’a ’e te mau ha’amaita’ira’a ’e e nāhea ’ia rave i te reira (hi’o pene 18).
-
Nāhea te mau tāne ’e te mau vahine ’ia ha’a ’āmui nō te fa’aoti i te ’ohipa a te Atua.
Nō te mau ha’amāramaramara’a nō ni’a i teie mau tumu parau, hi’o « Autahu’ara’a a Melehizedeka », « Autahu’ara’a », ’e « Te mau vahine i roto i te ’Ēkālesia » (Gospel Topics (Mau tumu parau o te ’evanelia), topics.ChurchofJesusChrist.org).
E nehenehe te peresidenira’a o te pupu peresibutero ’e te mau taea’e aupuru e tauturu i te hōro’ara’a i teie arata’ira’a. E nehenehe te reira e tupu nō te ta’ata hō’ē i roto i te fare o te feiā ’āpī tamāroa ’aore rā, i roto i te hō’ē piha ha’api’ira’a e fa’atupuhia i rāpae i te mau putuputura’a mātarohia o te sābati.
10.7
Te feiā fa’atere nō te feiā ’āpī tamāroa o te titi
E fa’aue te peresidenira’a titi i te hō’ē melo o te ’āpo’ora’a teitei ’ia riro ’ei peresideni nō te feiā ’āpī tamāroa nō te titi. E nehenehe te mau melo o te ’āpo’ora’a teitei tei fa’ata’ahia nō te feiā ’āpī tamāhine ’e nō te Paraimere e riro ’ei nā tauturu nōna. ’Aore rā, mai te mea e titi rahi, e nehenehe te tahi atu mau taea’e nō te Autahu’ara’a a Melehizedeka e pi’ihia ’ei mau tauturu (hi’o 5.3.1).
E tāvini te peresideni feiā ’āpī tamāroa nō te titi i raro a’e i te fa’aterera’a a te peresidenira’a titi. E tāvini ’oia ’e tōna nā tauturu ’e te pāpa’i parau i roto i te tōmite o te Autahu’ara’a a Aarona–Feiā ’Āpī Tamāhine o te titi (hi’o 29.3.9). E tauturu ’oia ’e tōna nā tauturu i te mau ’episekōpora’a nā roto i te ha’api’ira’a ia rātou i tā rātou mau hōpoi’a nō te mau pupu Autahu’ara’a a Aarona.
E nehenehe e pi’i i te hō’ē taea’e melo nō te titi ’ei pāpa’i parau nō te feiā ’āpī tamāroa nō te titi.
Te mau ha’amāramaramara’a hau atu nō ni’a i te mau hōpoi’a a te peresidenira’a o te feiā ’āpī tamāroa ’e te pāpa’i parau o te titi, hi’o 5.4.2 ’e 5.4.4.
10.8
Te mau arata’ira’a ’e te mau fa’aturera’a hau atu
10.8.1
Pārurura’a i te feiā ’āpī
’Ia ’ohipa ana’e te feiā pa’ari ’e te feiā ’āpī i roto i te mau fa’anahora’a a te ’Ēkālesia, e tītauhia e piti a’e ta’ata pa’ari ha’apa’o ’ia tae mai. E nehenehe e tītauhia i te mau pupu ’ia putuputu mai nō te fa’atupu i te reira.
Tītauhia i te mau ta’ata pa’ari ato’a e ha’a nei ’e te feiā ’āpī, ’ia fāri’i hope roa i te ha’api’ipi’ira’a nō ni’a i te pārurura’a i te mau tamari’i ’e i te feiā ’āpī, i roto i te hō’ē ’āva’e o tō rātou pāturu-ra’a-hia (ProtectingChildren.ChurchofJesusChrist.org). E fāri’i fa’ahou rātou i te reira ha’api’ipi’ira’a i te mau toru matahiti ato’a i muri a’e.
Nō te mau ha’amāramaramara’a nō ni’a e nāhea i te fa’a’ohipa i teie mau arata’ira’a nō te mau hoa aupuru, hi’o 21.3.
10.8.2
Feiā ’āpī tamāroa huma
E ha’apa’o ta’a ’ē te feiā fa’atere o te pupu i te feiā ’āpī tamāroa huma. Nō te mau ha’amāramaramara’a nō ni’a i te tauturura’a i teie feiā ’āpī tamāroa, hi’o disability.ChurchofJesusChrist.org.
10,8.3
Mau tāpa’o nā te mau tamari’i ’e te feiā ’āpī
E fāri’i te feiā ’āpī i te mau tāpa’o ’ei tuha’a nō te fa’anahora’a a te mau tamari’i ’e te feiā ’āpī. ’Ia riro ana’e te hō’ē feiā ’āpī tamāroa ’ei melo nō tāna pupu Autahu’ara’a a Aarona mātāmua, e fāri’i ’oia i te hō’ē tāpa’o nō te rirora’a ’ei melo, mai roto mai i tōna feiā fa’atere pupu. E fāri’i ato’a ’oia i te hō’ē buka Te tupura’a o te ta’ata iho : Buka arata’i nā te feiā ’āpī. E nehenehe teie ’ohipa e ravehia ’ia putuputu ana’e te feiā fa’atere pupu ’e ’ōna nō te fāri’i iāna i roto i te pupu. E nehenehe ato’a e rave i te reira i roto i te hō’ē putuputura’a matahiti nō te feiā ’āpī ’e tō rātou mau metua (hi’o 10.2.1.3).
I te ’āva’e Tēnuare e ti’ahia ai te matahiti o te hō’ē feiā ’āpī tamāroa i te 18, e fāri’i ’oia i te tahi atu tāpa’o nō te rirora’a ’ei melo.
E nehenehe te feiā ’āpī tamāroa e fāri’i i te hō’ē tāpa’o manuiara’a nā roto i te tūtavara’a ’ia riro hau atu mai te Fa’aora te huru.
Nō te tahi atu mau ha’amāramaramara’a nō ni’a i te mau tāpa’o, hi’o ChildrenandYouth.ChurchofJesusChrist.org.
10,8.4
Te ha’aputura’a i te mau ō ha’apaera’a mā’a
I roto i te mau pāroita e mea piri te fa’aeara’a o te mau melo, e nehenehe te ’episekōpo e fa’aue i te mau taea’e tei mau i te Autahu’ara’a a Aarona ’ia haere e fārerei i te mau melo i te ’āva’e tāta’itahi ’e ’ia ani ia rātou ’ia ’aufau i te mau ō ha’apaera’a mā’a. Nō te rave i te reira fa’aotira’a, e hi’o te ’episekōpo i te rahira’a o te feiā e mau ra i te Autahu’ara’a a Aarona e vai ra, tō rātou vai pārurura’a, ’e te ha’amaita’ira’a nō te mau melo e’ita e nehenehe e ’aufau nā roto i te tahi atu rāve’a.
E haere ’āpitipiti te mau taea’e o te autahu’ara’a nō te ’ohi i te mau ō ha’apaera’a mā’a. Te feiā e ’ohi ra i te mau ō ha’apaera’a mā’a, e hōro’a ’oi’oi rātou i te reira i te hō’ē melo o te ’episekōpora’a.
’Eiaha te mau melo e hōro’a i te tahi atu mau ō, mai te tuha’a ’ahuru ’aore rā, te tahi atu mau ō, i te feiā e ’ohi nei i te mau ō ha’apaera’a mā’a.