10.

Mga Korum sa Aaronic nga Pagkapari

10.1

Katuyoan ug Organisasyon

Ang Aaronic nga Pagkapari nagtabang sa mga anak sa Dios nga makaandam sa pagbalik ngadto sa Iyang presensya. Kini naghupot “sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag” (Doktrina ug mga Pakigsaad 13; tan-awa usab sa 3.3.2 niini nga tamdanan nga basahon).

10.1.1

Katuyoan

Ang mga korum sa Aaronic nga Pagkapari motabang sa mga batan-ong lalaki nga mohimo ug motuman sa sagrado nga mga pakigsaad ug mopalig-on sa ilang pagkakabig ngadto ni Jesukristo ug sa Iyang ebanghelyo.

Ang usa ka korum mao ang usa ka naorganisar nga grupo sa mga naghupot sa pagkapari. Ang katuyoan sa usa ka korum mao ang pagtabang sa mga naghupot sa pagkapari nga magtambayayong sa pag-apil sa buhat sa Dios sa kaluwasan ug kahimayaan. Sa ilang mga korum, ang mga naghupot sa Aaronic nga Pagkapari moserbisyo sa uban, motuman sa mga katungdanan sa pagkapari, mopalambo sa panaghiusa, ug mokat-on ug mosunod sa doktrina.

10.1.2

Tema sa Korum sa Aaronic nga Pagkapari

Ang tema sa korum sa Aaronic nga Pagkapari makatabang sa matag batan-ong lalaki nga makasabot sa iyang balaan nga pagkatawo ug sa iyang katuyoan isip usa ka naghupot sa pagkapari. Ang mga batan-ong lalaki ug ang ilang mga lider mosubli sa tema sa sinugdanan sa mga miting sa korum ug sa ubang mga panagpundok sa korum. Ang tema mabasa sama sa mosunod:

“Ako hinigugmang anak nga lalaki sa Dios, ug Siya adunay ipabuhat kanako.

“Sa akong tibuok kasingkasing, gahom, hunahuna, ug kusog, akong higugmaon ang Dios, motuman sa akong mga pakigsaad, ug mogamit sa Iyang pagkapari sa pagserbisyo sa uban, sugod sa kaugalingon nakong panimalay.

“Samtang maningkamot ko sa pagserbisyo, magbaton og hugot nga pagtuo, maghinulsol, ug maglambo sa matag adlaw, ako mahimong angayan sa pagdawat sa mga panalangin sa templo ug sa malungtarong kalipay sa ebanghelyo.

“Ako mag-andam nga mahimong kugihan nga misyonaryo, maun[o]ngon nga bana, ug mahigugmaong amahan pinaagi sa pagkahimong tinuod nga disipulo ni Jesukristo.

“Ako motabang sa pag-andam sa kalibotan alang sa pagbalik sa Manluluwas pinaagi sa pagdapit sa tanan nga moduol ngadto ni Kristo ug modawat sa mga panalangin sa Iyang Pag-ula.”

10.1.3

Mga Korum

Ang bishop mo-organisar sa mga naghupot sa Aaronic nga Pagkapari ngadto sa mga korum sumala sa gihulagway sa ubos. (Tan-awa usab sa Doktrina ug mga Pakigsaad 107:85–88.)

10.1.3.1

Korum sa mga Deacon

Ang mga batan-ong lalaki moapil sa korum sa mga deacon sugod sa Enero sa tuig nga sila mag-edad og 12. Niining higayona sila usab mahimo nang i-orden nga mga deacon kon sila andam ug takos.

Ang usa ka sakop sa korum kinsa usa ka na-orden nga deacon moserbisyo isip presidente sa korum. Kon posible, usa o duha ka magtatambag ug usa ka secretary mahimong moserbisyo uban kaniya. Ang mga magtatambag ug ang secretary kinahanglan usab nga mga deacon.

Ang mga katungdanan sa usa ka deacon gihulagway diha sa Doktrina ug mga Pakigsaad 20:57–59; 84:111. Ang ubang mga katungdanan naglakip sa pagpaambit sa sakramento ug pagtabang sa bishop sa “pagpangalagad sa tanan nga temporal nga mga butang” (Doktrina ug mga Pakigsaad 107:68).

10.1.3.2

Korum sa mga Teacher

Ang mga batan-ong lalaki moapil sa korum sa mga teacher sugod sa Enero sa tuig nga sila mag-edad og 14. Niining higayona sila usab mahimo nang i-orden nga mga teacher kon sila andam ug takos.

Ang usa ka sakop sa korum kinsa usa ka na-orden nga teacher moserbisyo isip presidente sa korum. Kon posible, usa o duha ka magtatambag ug usa ka secretary mahimong moserbisyo uban kaniya. Ang mga magtatambag ug ang secretary kinahanglan usab nga mga teacher.

Ang mga teacher adunay samang mga katungdanan sa mga deacon. Sila usab moandam sa sakramento ug moserbisyo isip tigpangalagad nga mga igsoong lalaki. Dugang nga mga katungdanan gihulagway sa Doktrina ug mga Pakigsaad 20:53–59; 84:111.

10.1.3.3

Korum sa mga Priest

Ang mga batan-ong lalaki moapil sa korum sa mga priest sugod sa Enero sa tuig nga sila mag-edad og 16. Niining higayona sila usab mahimo nang i-orden nga mga priest kon sila andam na ug takos.

Ang bishop mao ang presidente sa korum sa mga priest (tan-awa sa Doktrina ug mga Pakigsaad 107:87–88). Siya motawag og usa o duha ka sakop sa korum nga moserbisyo isip iyang mga kaabag. Ang usa ka secretary mahimo usab nga tawagon. Ang mga kaabag ug ang secretary kinahanglang i-orden nga mga priest.

Ang mga priest adunay samang mga katungdanan sa mga deacon ug mga teacher. Dugang nga mga katungdanan gihulagway diha sa Doktrina ug mga Pakigsaad 20:46–52, 73–79.

10.1.4

Mga Yawe sa Pagkapari

Ang matag korum gipangulohan sa usa ka presidente kinsa naghupot og mga yawe sa pagkapari. Ang presidente sa korum sa mga deacon, ang presidente sa korum sa mga teacher, ug ang bishop naghupot og mga yawe sa pagkapari. Alang sa dugang nga impormasyon mahitungod niini nga mga yawe, tan-awa sa 3.4.1.

10.1.5

Pagpahiangay sa mga Korum ngadto sa Lokal nga mga Panginahanglan

Sa usa ka ward o branch nga dunay pipila ka batan-ong lalaki, ang mga korum sa Aaronic nga Pagkapari mahimong maghiusa sa pagmiting alang sa instruksiyon ug mga kalihokan.

Kon ang usa ka ward adunay sobra sa 12 ka deacon, ang bishop mahimong mobahin sa korum sa mga deacon. Mao usab kon dunay sobra sa 24 ka mga teacher (tan-awa sa Doktrina ug mga Pakigsaad 107:85–86). Kon maghimo niini nga desisyon, ang bishop mokonsiderar sa epekto ngadto sa mga sakop sa korum.

10.2

Pag-apil sa Buhat sa Dios sa Kaluwasan ug Kahimayaan

Ang Dios nagdapit sa tanan nga moduol ngadto ni Kristo ug moabag sa Iyang buhat pinaagi sa:

• Pagsunod sa ebanghelyo ni Jesukristo.

• Pag-atiman niadtong nanginahanglan.

• Pagdapit sa tanan nga modawat sa ebanghelyo.

• Paghiusa sa mga pamilya alang sa kahangtoran.

Ang bishopric ug ang mga lider sa korum sa kabatan-onan, nga gisuportahan sa mga tigtambag (tan-awa sa 10.5), magtinambagay mahitungod kon unsaon sa pagtuman kini nga buhat. Alang sa dugang nga impormasyon mahitungod sa buhat sa Dios sa kaluwasan ug kahimayaan, tun-i ang kapitulo 1.

10.2.1

Pagsunod sa Ebanghelyo ni Jesukristo

10.2.1.1

Mga Tahas sa mga Ginikanan ug sa mga Lider

Ang mga ginikanan mao ang responsable sa pagtudlo sa ilang mga anak sa ebanghelyo ug pagtabang nila nga mosunod niini (tan-awa sa Doktrina ug mga Pakigsaad 68:25–28). Ang bishopric ug ang mga lider sa korum sa kabatan-onan, uban sa tabang gikan sa mga tigtambag, mosuporta sa mga ginikanan niini nga responsibilidad sumala sa mosunod:

• Moawhag og komunikasyon tali sa mga batan-ong lalaki ug sa ilang mga pamilya.

• Moseguro nga ang mga kalihokan sa kabatan-onan mosuporta ug mopanalangin sa mga pamilya.

• Motabang sa mga ginikanan sa pag-andam sa ilang mga anak nga lalaki alang sa mga ordinasyon sa pagkapari ug sa pagdawat sa Melchizedek nga Pagkapari.

• Motabang sa mga ginikanan sa pag-andam sa ilang mga anak nga lalaki alang sa pagtuga sa templo, full-time nga misyonaryo nga pagserbisyo, kaminyoon sa templo, ug pagkaamahan.

Ang mga lider kinahanglan nga sensitibo ngadto sa kabatan-onan nga kulang og suporta sa pamilya sa pagsunod sa ebanghelyo.

Ang mga ginikanan ug mga lider maningkamot nga mahimong maayong mga ehemplo ngadto sa kabatan-onan. Sila motudlo sa kabatan-onan sa ilang mga paningkamot nga mahimong mas sama ni Jesukristo. Ang programa sa Kabataan ug Kabatan-onan makatabang niini nga mga paningkamot (tan-awa sa ChildrenandYouth.ChurchofJesusChrist.org).

10.2.1.2

Pagkat-on sa Ebanghelyo

Ang bishopric, mga lider sa korum sa kabatan-onan, ug mga tigtambag moawhag sa mga batan-ong lalaki ug sa ilang mga pamilya sa pagkat-on sa ebanghelyo diha sa panimalay. Ang mga lider ug mga tigtambag magtuon sa ebanghelyo ug mopaambit sa mga batan-ong lalaki sa unsay ilang nakat-onan. Sila modapit sa mga sakop sa korum nga mopaambit diha sa simbahan unsay ilang nakat-onan sa panimalay.

Ang mga korum sa Aaronic nga Pagkapari magmiting ma-Dominggo aron mopalig-on sa hugot nga pagtuo, mopalambo sa panaghiusa, mopalig-on sa mga pamilya ug mga panimalay, ug mohimo og mga plano sa pag-apil sa buhat sa Dios sa kaluwasan ug kahimayaan. Ang bishopric ug ang mga lider sa korum sa kabatan-onan, nga gisuportahan sa ilang mga tigtambag, magplano og mga miting sa Dominggo.

Ang mga miting sa korum pagahimoon sa ikaduha ug ikaupat nga Dominggo matag bulan. Kini molungtad og 50 ka minuto. Ang mga miting sugdan sa pag-ampo. Usa ka sakop sa kapangulohan sa korum (o usa sa mga kaabag sa bishop diha sa korum sa mga priest) ang mopahigayon. Siya mangulo sa korum sa pag-recite sa tema ug magtinambagay mahitungod sa mga buluhaton, mga katungdanan, ug ubang mga butang.

Usa ka sakop sa korum o hamtong nga lider mangulo dayon sa instruksiyon sa ebanghelyo. Ang mga lider sa korum magpakitambag uban sa mga tigtambag mahitungod kon kinsa ang motudlo. Ang mga latid sa miting makita diha sa Dali, Sunod Kanako. Ang mga miting kinahanglan nga taposon uban sa usa ka pag-ampo.

Kasagaran, ang matag korum sa Aaronic nga Pagkapari maglahi sa pagmiting (tan-awa sa 10.1.5 Ang mga batan-ong lalaki ug mga batan-ong babaye mahimong magtipon panagsa alang sa leksiyon sa Dominggo, kon gisabotan sa bishopric ug sa kapangulohan sa Young Women.

Ang mga batan-ong lalaki giawhag sa pag-apil sa seminary (tan-awa sa 15.1).

10.2.1.3

Serbisyo ug mga Kalihokan

Ang bishopric ug ang mga lider sa korum sa kabatan-onan, nga gisuportahan sa mga tigtambag, magplano og serbisyo ug mga kalihokan. Kini makatabang sa pagtuman sa buhat sa Dios sa kaluwasan ug kahimayaan. Ang serbisyo ug mga kalihokan kinahanglan nga mopalambo og mga pagpamatuod, molig-on og mga pamilya, mopasiugda og panaghiusa sa korum, ug mohatag og mga oportunidad sa pagpanalangin sa uban. Kinahanglan kini nga mabalanse sa upat ka bahin sa personal nga kauswagan: espirituwal, sosyal, pisikal, ug intelektuwal.

Kadaghanan sa mga kalihokan sa kabatan-onan pagahimoon sa mga panahon nga dili Dominggo o kagabhion sa Lunes. Kini sa kasagaran pagahimoon matag semana. Sa ubang mga dapit, ang gilay-on, pagkaluwas, o ubang mga hinungdan makahimo sa sinemana nga mga kalihokan nga dili praktikal. Niini nga mga dapit, ang mga kalihokan mahimong dili himoon kanunay, apan kini sa kinatibuk-an pagahimoon dili mominos matag bulan. Ang mga kalihokan mahimong planohon sa Sample Service and Activity Planner, nga anaa sa ChurchofJesusChrist.org.

Ang pipila ka serbisyo ug mga kalihokan kinahanglang maglakip sa mga batan-ong lalaki ug mga batan-ong babaye, ilabi na sa mas taas og edad nga kabatan-onan.

Ang kabatan-onan makabenepisyo gikan sa pagpakig-uban diha sa mas dagko nga mga grupo. Ang kabatan-onan sa duha o daghan pa nga mga ward mahimong magkauban panagsa alang sa serbisyo ug mga kalihokan. Ang mga stake o mga district mahimong magplano panagsa og serbisyo ug mga kalihokan alang sa kabatan-onan (tan-awa sa 20.3.2).

Ang hamtong nga mga lider motabang sa pagseguro nga ang mga kalihokan luwas (tan-awa sa safety.ChurchofJesusChrist.org; tan-awa usab sa 20.7 niini nga tamdanan nga basahon). Dili mominos sa duha ka responsable nga hamtong nga mga lider ang kinahanglan nga anaa sa tanang kalihokan (tan-awa sa 10.8.1

Alang sa dugang nga impormasyon, tan-awa sa AaronicPriesthoodQuorums.ChurchofJesusChrist.org. Tan-awa usab sa JustServe.org kon diin kini anaa. Kini nga mga kapanguhaan maghatag og mga ideya sa serbisyo ug kalihokan.

Tinuig nga mga Kalihokan. Agig dugang sa regular nga mga kalihokan sa kabatan-onan, ang mga batan-ong lalaki mahimong moapil sa mosunod matag tuig:

• Usa ka miting alang sa kabatan-onan ug sa ilang mga ginikanan duol sa sinugdanan sa tuig. Kini mahimong himoon alang sa mga batan-ong lalaki ug mga batan-ong babaye nga magbulag o magtipon. Kini usab mahimong himoon sa ward o sa stake nga level. Kini planohon ug pangulohan sa mga kaabag sa bishop diha sa korum sa mga priest ug sa kapangulohan sa pinakataas og edad nga klase sa Young Women. Ang mga batan-ong lalaki nga mag-edad na og 12 nianang tuiga mahimong modawat sa ilang mga simbolo sa pagkasakop niini nga miting (tan-awa sa 10.8.3). Alang sa dugang nga impormasyon, tan-awa sa ChildrenandYouth.ChurchofJesusChrist.org.

• Usa ka kamping sa korum sa Aaronic nga Pagkapari (tan-awa sa Aaronic Priesthood Quorum Camp Guide). Ang mga batan-ong lalaki mahimong moapil sa dugang nga tibuok gabii nga mga kamping, ug mga kalihokan sa tibuok tuig, kon mahimo.

• Usa ka komperensiya sa kabatan-onan sa ward o stake o komperensiya sa Alang sa Kalig-on sa mga Kabatan-onan (AKK). Alang sa impormasyon mahitungod sa mga komperensiya sa FSY, tan-awa sa FSY.ChurchofJesusChrist.org. Alang sa impormasyon mahitungod sa ward ug stake nga mga calling ug mga responsibilidad sa FSY, tan-awa sa FSYLeader.ChurchofJesusChrist.org (alang sa U.S. ug Canada) o ang FSY Planning Guide (alang sa tanang ubang dapit).

• Dili mominos sa usa ka kalihokan nga naghatag og gibug-aton sa mga baroganan diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Kini nga kalihokan mahimong maglakip sa mga batan-ong lalaki ug mga batan-ong babaye. Ang mga ginikanan mahimo usab nga dapiton.

Mga Kinahanglanon sa Edad. Uban sa pagtugot sa ilang mga ginikanan, ang mga batan-ong lalaki motambong og tibuok gabii nga mga kamping sa Aaronic nga Pagkapari sugod sa Enero sa tuig nga sila mag-edad og 12. Sila mahimong motambong og mga sayaw, mga komperensya sa kabatan-onan, ug mga komperensya sa FSY sugod sa Enero sa tuig nga sila mag-edad og 14.

Pagbayad alang sa mga Kalihokan. Ang mga kalihokan, lakip na ang mga suplay, pagabayran gikan sa badyet sa ward. Ang pagbiyahe ug mga galastohan kinahanglan dili kaayo dako.

Isip usa ka eksepsiyon, kon ang badyet sa ward dili paigo nga ibayad alang sa mga kalihokan sa daghang mga adlaw, sama sa mga kamping, ang mga lider mahimong mohangyo sa mga partisipante nga motabang sa pagbayad niini. Bisan pa niana, ang usa ka batan-ong lalaki kinahanglan nga dili pugngan sa pag-apil kon siya dili makatabang sa pagbayad. Kon magkinahanglan gihapon og dugang nga kwarta, ang bishop mahimong motugot og usa ka kalihokan aron makakolekta og pundo matag tuig (tan-awa sa 20.6.5).

Ang bishopric moseguro nga ang badyet ug ang mga kalihokan alang sa mga batan-ong lalaki ug mga batan-ong babaye igo ug resonable. Ang badyet alang sa mga korum sa Aaronic nga Pagkapari gibase sa gidaghanon sa mga batan-ong lalaki diha sa ward. Ang badyet alang sa mga batan-ong babaye gibase sa gidaghanon sa mga batan-ong babaye diha sa ward.

Tan-awa sa FSY.ChurchofJesusChrist.org alang sa kasayoran mahitungod sa paggahin og pundo alang sa mga komperensiya sa FSY.

10.2.1.4

Personal nga Kalamboan

Sa ilang mga paningkamot nga mahimong mas sama sa Manluluwas, ang kabatan-onan gidapit sa paghimo og mga tumong aron motubo sa espirituwal, sa sosyal, sa pisikal, ug sa intelektuwal nga paagi (tan-awa diha sa Lucas 2:52). Ang kabatan-onan magtinguha og inspirasyon aron madiskobrehan unsay ilang kinahanglan nga trabahoon. Uban sa tabang gikan sa mga ginikanan, sila mohimo og mga plano, mobuhat sa ilang mga plano, ug mamalandong unsay ilang nakat-onan. Ang mga lider ug mga tigtambag motanyag usab og suporta kon gikinahanglan. Bisan pa niana, sila kinahanglang dili mosubay sa mga tumong o kauswagan sa mga batan-ong lalaki. Ang mga ginikanan ug mga lider mahimong mosugyot og mga tumong, apan sila motugot sa kabatan-onan sa pagpangita sa ilang kaugalingong inspirasyon mahitungod kon unsa nga mga tumong ang sundon.

Giawhag ang kabatan-onan sa pagkompleto og dili mominos sa duha ka tumong sa matag usa sa upat ka bahin kada tuig. Sila makagamit sa Personal nga Kalamboan: Giya nga Basahon sa Kabatan-onan o sa Gospel Living nga app sa paghimo ug pagrekord sa mga tumong.

Alang sa dugang nga impormasyon, tan-awa sa ChildrenandYouth.ChurchofJesusChrist.org.

10.2.2

Pag-atiman Niadtong Nanginahanglan

Ang mga naghupot sa Aaronic nga Pagkapari motabang sa bishop sa “pagpangalagad sa tanan nga temporal nga mga butang” (Doktrina ug mga Pakigsaad 107:68). Sila kinahanglang dunay regular nga mga oportunidad sa pagserbisyo sa uban diha ug kuyog sa ilang mga pamilya, atol sa mga kalihokan sa kabatan-onan, ug sa ilang kaugalingon. Ang mga ideya alang sa pagserbisyo anaa sa ChildrenandYouth.ChurchofJesusChrist.org. Kon anaa, ang JustServe.org nagsugyot og mga oportunidad sa pagserbisyo diha sa komunidad.

10.2.2.1

Pagpangalagad

Ang pagpangalagad mao ang pag-atiman sa uban sama sa buhaton sa Manluluwas. Ang mga naghupot sa Aaronic nga Pagkapari modawat og mga buluhaton sa pagpangalagad sugod sa Enero sa tuig nga sila mag-edad og 14. Alang sa dugang nga impormasyon, tan-awa sa kapitulo 21.

10.2.3

Pagdapit sa Tanan nga Modawat sa Ebanghelyo

Ang mga naghupot sa Aaronic nga Pagkapari adunay katungdanan nga “magdapit sa tanan sa pagduol ngadto kang Kristo” (Doktrina ug mga Pakigsaad 20:59). Ang pipila ka paagi nga kini ilang mahimo gilista sa ubos:

• Magpakita og maayong ehemplo isip mga disipulo ni Jesukristo.

• Mopakigbahin sa ilang mga pagpamatuod ngadto sa mga higala ug mga sakop sa pamilya.

• Mangalagad sa dili kaayo aktibo nga mga sakop sa ilang mga korum.

• Modapit sa mga higala nga motambong sa simbahan o sa mga kalihokan sa kabatan-onan.

• Modapit sa mga higala nga moapil sa programa sa Kabataan ug Kabatan-onan. Ang mga lider makigtambayayong pag-ayo sa mga ginikanan niini nga kabatan-onan aron sa pagtabang nila nga makasabot sa programa ug motino kon sa unsang paagi sila ug ang ilang mga anak makaapil.

• Modapit sa mga higala nga magpatudlo sa mga misyonaryo.

Ang mga ginikanan ug ang mga lider moawhag sa mga batan-ong lalaki nga mangandam sa pagserbisyo og full-time nga mga misyon ug sa pagpakigbahin sa ebanghelyo sa ilang tibuok kinabuhi. Ang pipila ka paagi nga kini ilang mahimo gilista sa ubos:

• Moawhag sa mga batan-ong lalaki nga moangkon og personal nga pagpamatuod sa plano sa Langitnong Amahan sa kalipay, sa Pag-ula ni Jesukristo, ug sa pagpahiuli sa Iyang ebanghelyo.

• Motudlo sa mga batan-ong lalaki mahitungod sa mga panalangin sa pagserbisyo og mga misyon ug unsay gipaabot gikan kanila.

• Mohatag og mga oportunidad sa pagserbisyo diha sa Simbahan.

• Mohatag og mga oportunidad sa pagtudlo sa ebanghelyo diha sa mga miting sa korum ug sa ubang mga sitwasyon.

Isip kabahin niini nga pagpangandam, ang bishopric o ang kapangulohan sa stake mahimong mo-organisar og klase sa pagpangandam alang sa misyonaryo. Ang nag-una nga mga kapanguhaan alang niini nga klase mao ang mga kasulatan, Mga Sumbanan sa Misyonaryo alang sa mga Disipulo ni Jesukristo, ug Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo. Kini nga klase dili himoon sa regular nga mga miting sa Dominggo.

Ang Missionary.ChurchofJesusChrist.org naghatag og dugang nga mga kapanguhaan nga makatabang sa mga batan-ong lalaki samtang sila mag-andam sa pagserbisyo isip mga misyonaryo. Tan-awa sa mga kapitulo 23 ug 24 alang sa dugang nga impormasyon.

10.2.4

Paghiusa sa mga Pamilya alang sa Kahangtoran

Ang mga naghupot sa Aaronic nga Pagkapari makatabang sa paghiusa sa mga pamilya alang sa kahangtoran sa daghang paagi. Ang pipila niini ka paagi gilista sa ubos:

• Pagtahod sa ilang mga ginikanan ug pagpakita og ehemplo sa Kristohanong pagpuyo diha sa ilang panimalay.

• Pagpangandam sa pagbaton og ilang kaugalingong mahangtorong pamilya.

• Adunay balido nga rekomend sa templo.

• Pag-andam sa paghimo ug pagtuman sa mga pakigsaad ug sa pagdawat sa mga ordinansa sa templo, lakip sa mahangtorong kaminyoon.

• Pagkat-on mahitungod sa ilang kaparyentihan ug mga katigulangan (tan-awa sa Akong Pamilya: Mga Istorya nga Naghiusa Namo).

• Pag-ila sa mga katigulangan nga nagkinahanglan og mga ordinansa sa templo (tan-awa sa FamilySearch.org).

• Pag-apil kanunay sa mga bunyag ug mga kompirmasyon alang sa mga patay kutob sa itugot sa sirkumstansiya.

• Pag-apil sa indexing (tan-awa sa FamilySearch.org/indexing).

• Pagserbisyo isip mga consultant sa templo ug family history, kon tawagon sa bishopric (tan-awa sa 25.2.4).

10.3

Bishopric

Ang bishopric mao ang kapangulohan sa Aaronic nga Pagkapari diha sa ward (tan-awa sa Doktrina ug mga Pakigsaad 107:13–15). Sila mogiya sa buhat sa mga korum sa Aaronic nga Pagkapari. Ang labing importante nga responsibilidad sa bishop mao ang pag-atiman sa bag-ong henerasyon diha sa iyang ward. Siya moila sa ilang mga ngalan ug mosabot sa mga sirkumstansiya sa ilang panimalay. Siya motambong sa ilang mga kalihokan ug sa mga miting sa Dominggo kanunay.

Ang bishop mao ang presidente sa korum sa mga priest. Ang iyang katungdanan “mao ang pagdumala [sa] mga priest, ug molingkod sa konseho uban kanila, sa pagtudlo kanila sa mga katungdanan sa ilang buhatan” (Doktrina ug mga Pakigsaad 107:87).

Ang unang magtatambag sa bishopric adunay responsibilidad alang sa korum sa mga teacher. Ang ikaduhang magtatambag adunay responsibilidad alang sa korum sa mga deacon.

Kon ang usa ka sakop sa bishopric motambong og miting sa korum, siya ang modumala sa miting.

Ang bishopric aduna sa mosunod nga dugang nga mga responsibilidad alang sa mga korum sa Aaronic nga Pagkapari:

• Motudlo sa mga kapangulohan sa korum ug sa mga kaabag sa bishop diha sa korum sa mga priest. Motabang kanila nga makasabot ug makatuman sa ilang mga katungdanan isip mga lider. Sa pagbuhat niini, ang bishopric mogamit sa mga kasulatan ug sa “Aaronic Priesthood and Young Women Class Presidency Orientation” (tan-awa sa AaronicPriesthoodQuorums.ChurchofJesusChrist.org). Sila usab mahimong mogamit sa kapitulo 4 niini nga tamdanan nga basahon.

• Makigkita sa matag batan-ong lalaki nga dili mominos kaduha sa usa ka tuig (tan-awa sa 31.3.1).

• Modumala sa pagtudlo sa mga korum sa Aaronic nga Pagkapari.

• Motabang sa mga batan-ong lalaki sa pag-andam sa pagdawat sa Melchizedek nga Pagkapari (tan-awa sa 10.6).

• Modumala sa mga rekord, mga report, ug mga panalapi sa mga korum sa Aaronic nga Pagkapari.

Ang mga tigtambag ug mga espesyalista sa korum motabang niini nga mga responsibilidad kon hangyoon (tan-awa sa 10.5).

10.4

Mga Lider sa Korum sa Kabatan-onan

10.4.1

Pagtawag, Pagpaluyo, ug Pag-set Apart

Ang bishop motawag sa usa o duha ka mga priest nga mahimo niyang mga kaabag sa pagdumala sa korum sa mga priest. Usa ka sakop sa bishopric mahimo usab nga motawag og secretary sa korum.

Usa ka sakop sa bishopric motawag og mga presidente sa korum sa mga deacon ug mga teacher. Kon adunay igo nga mga naghupot sa Aaronic nga Pagkapari nga makaserbisyo, kining mga batan-ong lalaki magmainampoong mokonsiderar og mga sakop sa korum nga irekomendar isip mga magtatambag ug secretary. Ang bishopric mokonsiderar sa ilang mga rekomendasyon ug mohatag sa mga calling.

Sa dili pa mohangyo og usa ka batan-ong lalaki nga moserbisyo sa bisan unsa niini nga mga calling, ang sakop sa bishopric mangayo og pagtugot gikan sa mga ginikanan sa batan-ong lalaki.

Human sa paghatag niini nga mga calling, ang usa ka sakop sa bishopric mopresentar sa mga lider sa korum sa kabatan-onan alang sa pagpaluyo diha sa ilang miting sa korum. Ang bishop mo-set apart sa iyang mga kaabag ug sa mga presidente sa korum sa mga deacon ug mga teacher. Siya motugyan sa mga yawe sa pagkapari ngadto sa mga presidente sa korum. Siya mahimong mosangon sa iyang mga magtatambag sa pag-set apart sa laing mga sakop sa kapangulohan ug sa mga secretary.

Ang usa ka sakop sa bishopric mopahibalo niini nga mga calling diha sa panagtigom alang sa sakramento. Siya dili mopresentar nila aron paluyohan.

10.4.2

Mga Responsibilidad

Ang mga presidente sa korum sa Aaronic nga Pagkapari, lakip sa bishop, aduna sa mosunod nga mga responsibilidad. Ang ilang mga magtatambag ug ang mga kaabag sa bishop diha sa korum sa mga priest, moambit niini nga mga responsibilidad.

• Mogiya sa mga paningkamot sa korum sa pag-apil sa buhat sa Dios sa kaluwasan ug kahimayaan (tan-awa sa kapitulo 1).

• Moila-ila ug moserbisyo sa matag sakop sa korum, lakip niadtong wala magtambong og mga miting sa korum. Makahibalo sa ilang mga panginahanglan ug mga sirkumstansiya.

• Moserbisyo diha sa konseho sa kabatan-onan sa ward (tan-awa sa 10.4.4).

• Pag-apil diha sa mga paningkamot sa ward sa pagpaambit sa ebanghelyo ug pagpalig-on sa bag-o ug mibalik nga mga miyembro. Usa ka kaabag diha sa korum sa mga priest motambong sa mga miting sa pagpakigsabot (tan-awa sa 23.4).

• Moapil sa buhat sa ward diha sa templo ug sa family history nga mga paningkamot. Usa ka kaabag diha sa korum sa mga priest moapil sa mga miting sa pagpakigsabot (tan-awa sa 25.2.7).

• Motudlo sa mga sakop sa korum sa ilang mga katungdanan sa pagkapari (tan-awa sa Doktrina ug mga Pakigsaad 107:85–88). Mosuporta kanila sa pagtuman niadtong mga katungdanan.

• Moplano ug mopahigayon sa mga miting sa korum (tan-awa sa 10.2.1.2).

• Moplano ug mopatuman sa serbisyo ug mga kalihokan sa korum (tan-awa sa 10.2.1.3).

Kon ang mga secretary sa korum tawagon, sila moandam sa mga agenda alang sa mga miting ug mosulat sa gihisgotan. Sila usab motabang sa klerk sa ward o sa usa ka tigtambag sa korum nga mosubay sa nanambong.

Ang mga sakop sa bishopric motudlo sa mga batan-ong lalaki mahitungod sa ilang mga responsibilidad (tan-awa sa 10.3 Ang mga tigtambag sa korum kinahanglang aktibong motabang (tan-awa sa 10.5).

10.4.3

Miting sa Kapangulohan sa Korum

Ang mga kapangulohan sa korum sa Aaronic nga Pagkapari regular nga magmiting. Ang presidente sa korum mopahigayon niini nga mga miting. Dili mominos sa duha ka hamtong ang motambong—usa ka sakop sa bishopric, usa ka tigtambag, o usa ka espesyalista. Atol niini nga mga miting, ang mga lider magtinambagay ug magtinguha og pagpadayag mahitungod sa kabubut-on sa Ginoo alang sa ilang korum. Ang agenda maglakip sa panaghisgotan sa mosunod nga mga butang:

• Pagtabang nga matuman ang buhat sa Dios sa kaluwasan ug kahimayaan

• Pagserbisyo sa mga sakop sa korum, uban ang espesyal nga pagtagad sa pagsuporta sa bag-ong mga miyembro ug pagtabang sa dili kaayo aktibo nga mga miyembro

• Pagtabang niadtong anaa sa laing mga relihiyon ug mga tinuohan

• Pagplano sa mga miting sa korum, serbisyo, ug mga kalihokan

• Instruksiyon sa pagpangulo gikan sa mga lider o mga tigtambag sa korum

Usa ka Sample Presidency Meeting Agenda anaa sa ChurchofJesusChrist.org.

10.4.4

Konseho sa Kabatan-onan sa Ward

Ang katuyoan sa konseho sa kabatan-onan sa ward mao ang pagtabang sa kabatan-onan sa pagdala sa uban ngadto ni Jesukristo ug sa pagtabang nga matuman ang buhat sa Dios sa kaluwasan ug kahimayaan.

Ang bishop modumala sa konseho sa kabatan-onan sa ward. Ang mga sakop niini nga konseho naglakip sa:

• Ang bishopric.

• Usa sa mga kaabag sa bishop diha sa korum sa mga priest, ang presidente sa korum sa mga teacher, ug ang presidente sa korum sa mga deacon.

• Mga presidente sa klase sa Young Women (o sa tibuok kapangulohan sa klase kon ang ward adunay usa lamang ka klase sa Young Women).

• Ang presidente sa Young Women.

Ang konseho sa kabatan-onan sa ward maghisgot og mga pamaagi sa pagtabang sa uban nga molambo ang mga pagpamatuod, modawat og makaluwas nga mga ordinansa, mohimo ug motuman sa mga pakigsaad, ug mahimong mga sumusunod ni Jesukristo (tan-awa sa Moroni 6:4–5). Sila magtinambagay mahitungod sa mga panginahanglan sa mga batan-ong lalaki ug sa mga batan-ong babaye diha sa ward. Sila mahimong maghisgot og mga kalihokan aron matubag kini nga mga panginahanglan. Hinoon, ang detalyado nga pagplano sa mga kalihokan kinahanglang mahitabo diha sa mga miting sa korum o sa kapangulohan sa klase.

Tan-awa sa 29.2.6 alang sa dugang nga impormasyon mahitungod sa konseho sa kabatan-onan sa ward.

10.5

Mga Tigtambag ug mga Espesyalista

Usa ka sakop sa bishopric motawag ug mo-set apart sa mga lalaki nga mahimong mga tigtambag sa korum sa Aaronic nga Pagkapari. Kini nga mga tigtambag mosuporta sa bishopric sa ilang mga responsibilidad alang sa mga korum sa Aaronic nga Pagkapari. Sila mohatag og espesyal nga gibug-aton sa pagtudlo sa mga batan-ong lalaki, pagtudlo kanila unsaon sa paggiya pinaagi sa inspirasyon, ug pagtabang nila nga mahimong mas sama ni Jesukristo. Sumala sa gikinahanglan ug praktikal, kapin sa usa ka tigtambag ang mahimong matawag alang sa matag korum.

Ang bishopric mahimo usab motawag og mga espesyalista sa korum aron makatabang sa usa ka piho nga mga kalihokan, sama sa kamping, usa ka komperensiya sa kabatan-onan, o mga sport.

Dili mominos sa duha ka responsable nga hamtong nga lalaki ang kinahanglang anaa sa matag miting ug kalihokan sa korum. Ang pagkaanaa sa mga tigtambag ug mga espesyalista makapahimong posible sa mga sakop sa bishopric sa pagbisita usab sa mga klase ug mga kalihokan sa Young Women ug Primary. Ang mga tigtambag ug mga espesyalista kinahanglang mokompleto sa pagbansay sa ProtectingChildren.ChurchofJesusChrist.org (tan-awa sa 10.8.1).

10.6

Pagtabang sa mga Batan-ong Lalaki nga Mangandam sa Pagdawat sa Melchizedek nga Pagkapari

Kon ang usa ka batan-ong lalaki nag-edad og 18 o pataas, siya makahimo na sa pagdawat sa Melchizedek nga Pagkapari ug maordinahan nga usa ka elder kon siya andam ug takos. Siya magpakitambag sa iyang mga ginikanan ug sa bishop sa paghimo niini nga desisyon.

Sa edad nga 19 o sa dili pa mobiya sa panimalay (sama sa pag-eskwela sa kolehiyo o pagserbisyo sa militar), siya kinahanglang i-orden nga usa ka elder kon siya takos. Bisan kon siya wala maordinahi nga elder sa edad nga 19, siya dapiton sa pagtambong sa mga miting sa korum sa mga elder.

Ang mga ginikanan adunay nag-unang responsibilidad sa pagtabang sa ilang mga anak nga lalaki nga makaandam sa pagdawat sa Melchizedek nga Pagkapari. Ang bishopric ug ang mga tigtambag sa korum makatabang usab pinaagi sa paghatag sa mga naghupot sa Aaronic nga Pagkapari og mga kasinatian nga makapaandam nila sa tibuok kinabuhi nga pagserbisyo isip mga elder. Ang labing maayong pagpangandam sa pagdawat sa Melchizedek nga Pagkapari mao ang pagtuman sa mga katungdanan sa Aaronic nga Pagkapari.

Kadtong kinsa modawat sa Melchizedek nga Pagkapari kinahanglang maningkamot nga masabtan:

• Ang panumpa ug pakigsaad sa pagkapari (tan-awa sa Doktrina ug mga Pakigsaad 84:33–44).

• Mga katungdanan sa usa ka elder (Doktrina ug mga Pakigsaad 20:38–45; 42:44; 107:11–12).

• Ang mga katuyoan sa mga ordinansa ug mga panalangin sa pagkapari ug unsaon sa pagpahigayon niini (tan-awa sa kapitulo 18).

• Sa unsa nga paagi nga ang mga lalaki ug mga babaye magtambayayong sa pagtuman sa buhat sa Dios.

Alang sa impormasyon mahitungod niini nga mga hilisgotan, tan-awa sa “Melchizedek Priesthood [Melchizedek nga Pagkapari],” “Priesthood [Pagkapari],” ug “Women in the Church” (Topics and Questions, topics.ChurchofJesusChrist.org).

Ang kapangulohan sa korum sa mga elder ug ang tigpangalagad nga mga igsoong lalaki makatabang sa paghatag niini nga instruksiyon. Kini mahitabo sa tinagsa-tagsa diha sa mga panimalay sa mga batan-ong lalaki o sa usa ka klase nga gihimo nga lahi sa regular nga mga miting sa Dominggo.

10.7

Mga Lider sa Young Men sa Stake

Ang kapangulohan sa stake motawag ug mo-set apart og usa ka high councilor aron mamahimong presidente sa Young Men sa stake. Ang mga sakop sa high council nga gisangonan sa Young Women ug Primary mahimong tawagon ug i-set apart aron moserbisyo isip iyang mga magtatambag. O, kon ang usa ka stake may igong gidak-on, laing mga naghupot sa Melchizedek nga Pagkapari gikan sa stake mahimong tawagon isip mga magtatambag. (Tan-awa sa 6.5.)

Ang presidente sa Young Men sa stake moserbisyo ubos sa direksyon sa kapangulohan sa stake. Siya ug ang iyang mga magtatambag ug secretary moserbisyo sa komitiba sa pagpangulo sa kabatan-onan diha sa stake (tan-awa sa 29.3.9). Siya ug ang iyang mga magtatambag motabang sa mga bishopric pinaagi sa pagtudlo kanila sa ilang mga katungdanan alang sa mga korum sa Aaronic nga Pagkapari.

Ang usa ka igsoong lalaki gikan sa mga miyembro sa stake mahimong tawagon isip secretary sa Young Men sa stake.

Alang sa dugang nga impormasyon mahitungod sa mga responsibilidad sa kapangulohan sa Young Men ug secretary sa stake, tan-awa sa 6.7.2 ug 6.7.3.

10.8

Dugang nga mga Lagda ug mga Palisiya

10.8.1

Pagpanalipod sa Kabatan-onan

Kon ang mga hamtong adunay mga pakig-inter-aksiyon sa kabatan-onan diha sa Simbahan, dili mominos sa duha ka responsable nga hamtong ang kinahanglan nga anaa. Gikinahanglan tingali alang sa mga korum nga magmiting aron mahimo kini nga posible.

Ang tanang hamtong nga naglihok uban sa kabatan-onan kinahanglang mokompleto sa pagbansay sa pagpanalipod sa kabataan ug kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Sila mosubli sa pagbansay matag tulo ka tuig human niana.

Alang sa impormasyon mahitungod kon sa unsa nga paagi nga kining mga lagda magamit sa tigpangalagad nga mga kompanyon, tan-awa sa 21.2.2.

10.8.2

Mga Batan-ong Lalaki nga adunay mga Kakulangan

Ang mga lider sa korum mohatag og espesyal nga pag-atiman sa mga batan-ong lalaki nga adunay mga kakulangan. Alang sa impormasyon mahitungod sa pagtabang niining mga batan-ong lalaki, tan-awa sa disability.ChurchofJesusChrist.org; tan-awa usab sa 38.8.27 niini nga tamdanan nga basahon.

10.8.3

Mga Simbolo sa Kabataan ug Kabatan-onan

Ang mga batan-ong lalaki modawat og mga simbolo isip kabahin sa programa sa Kabataan ug Kabatan-onan. Kon ang usa ka batan-ong lalaki mahimong sakop sa iyang unang korum sa Aaronic nga Pagkapari, siya makadawat og simbolo sa pagkasakop gikan sa iyang mga lider sa korum. Siya usab makadawat og kopya sa Personal nga Kalamboan: Giya nga Basahon sa Kabatan-onan. Kini mahimo kon ang mga lider sa korum makigkita kaniya aron sa pag-abi-abi kaniya ngadto sa korum. Mahimo usab kining himoon sa tinuig nga miting alang sa kabatan-onan ug sa ilang mga ginikanan (tan-awa sa 10.2.1.3).

Sa Enero sa tuig nga ang usa ka batan-ong lalaki mag-edad og 18, siya makadawat og dugang nga simbolo sa pagkasakop.

Ang mga batan-ong lalaki makaangkon og simbolo sa kalampusan pinaagi sa pagpaningkamot nga mahimong mas sama sa Manluluwas.

Alang sa dugang nga impormasyon mahitungod sa mga simbolo, tan-awa sa ChildrenandYouth.ChurchofJesusChrist.org.

10.8.4

Pagpangolekta sa mga Halad sa Puasa

Sa mga ward nga gamay ang hiyograpiya, ang bishop mahimong mosugo sa mga naghupot sa Aaronic nga Pagkapari sa pagbisita sa mga miyembro matag bulan ug pagdapit kanila nga moamot og mga halad sa puasa. Sa paghimo niini nga desisyon, ang bishop mokonsiderar sa gidaghanon sa mga naghupot sa Aaronic nga Pagkapari nga anaa, sa ilang seguridad, ug sa panalangin sa mga miyembro nga dili makahimo sa pag-amot sa laing paagi (tan-awa sa 34.3.2).

Ang mga naghupot sa pagkapari kinahanglang magtinagurha nga molakaw kon mangolekta og mga halad sa puasa. Kadtong nangolekta og mga halad sa puasa mohatag sa walay langan ngadto sa usa ka sakop sa bishopric.

Ang mga miyembro kinahanglang dili mohatag sa ubang kontribusyon, sama sa ikapulo o ubang mga halad, ngadto sa nangolekta og mga halad sa puasa.