11.

Ataeinnaine

11.1

Te Kaantaninga ao Bootaki n Ataeinnaine

Te Bootaki n Ataeinnaine e buokiia natin te Atua ni katauraoi n oki Nakoina. Ngkae a kabanea aia kona ni kawakin aia berita aika tabu ma te Atua, ataeinnaine a na “otanganiia n te raoiroi ma mwaakan te Atua ao te mimitong ae korakora” (1 Nibwaai 14:14).

11.1.1

Kantaninga

Te Bootaki n Ataeinnaine e buokiia ataeinnaine ni karaoi ao ni kawakin berita aika tabu ao ni kakorakora rairakiia nakon Iesu Kristo ao Ana Euangkerio.

Te kantaninga n aia kiraati Ataeinnaine bwa e na buokiia ataeinnaine ni uaia n ibuobuoki ni kakoroa nanon Ana mwakuri te Atua ibukin te kamaiuaki ao te karietataaki. N aia kiraati, ataeinnaine a beku ibukiia tabeman, a karaoi tibwangaia, a karekea te katiteuanaki, ao a reiakin ao a maiuakin reirei aika tabu.

11.1.2

Aia Kibunikoora Ataeinnaine

Aia kibunikoora Ataeinnaine e kona ni buokiia ataeinnaine n tatabemaniia n ataa rikiia mai ieta ao n rairaki nakon Iesu Kristo. Ataeinnaine ao aia taan kairiiri a tataekina aia kibunikoora ni moan bootakin aia kiraati ao n aia bootaki riki ake tabeua. Aio kanoan te kibunikoora anne:

“Ngai te nati aine ae tatangiraki irouia kaaro ake i karawa, ma rikiu mai karawa ao tokin kawaiu ae akea tokina.

“Ngkai ana reirei Iesu Kristo, I kataia n riki n ai Arona. I ukoukori ao ni mwakuriia oin au kaotioti ao ni buokiia tabeman n Arana ae tabu.

“N na tei bwa te tia kakoaua ibukin te Atua n taainako ao ni bwaai nako ao n taabo nako.

“Ngkai I kataia bwa N na tau ibukin te karietataaki, I kawakina te bwaintituaraoi ibukin te rairannano ao n ukoukora ae tamaroa riki ni katoa bong. Ma te onimaki, N na kakorakora mweengau ao au utu, ni karaoi ao ni kawakin berita aika tabu, ao ni karekei otenanti, ao kakabwaia man te tembora ae tabu.”

11.1.3

Taian Kiraati

Kairake n ataeinnaine a riki bwa kaain te Bootaki n Ataeinnaine ni moanaki man Tianuare n te ririki are koro iai 12 aia ririki.

Aia kiraati Ataeinnaine a baireaki nakon roroia n te ririki. Te kurubu n aia ririki bon ataeinnaine ake titebo koron aia ririki n te ririki anne. Te kiraati e kona n raka iaon teuana te kurubu. Ataeinnaine a mwaing nakon kiraati aika boou i nanon Tianuare n te ririki are e koro iai ana ririki te ataeinnaine ibukin te kiraati ane boou anne.

Bitiobiriki ao taan kairiiri irouia Ataeinnaine aika ikawai ana iangoia bwa a na kanga ni bairea aia kiraati nakon aia ririki. A iangoi waaki ni kairiiri ibukiia ataeinnaine. Kiraati nako, n aki tabe ma buburaia, a riai n iai aia beretitenti ao, ngkana e kona, temanna ke uoman kauntira ao te tia koroboki. Inanon iunite ma mwaitia ataeinaine ae bon tau, a riai n tau mwaitiia kaain te kiraati bwa aonga tenaan beretitentii ni kiraati n iai ae a na beku ibukiia.

Kiraati a ataaki n te ara ae a na katiteuanaaki iai “Ataeinnaine.” Ngkana e raka iaon teuana ana kiraati te uoote, kurubu n te ririki a kabonganaaki ni kaokokoroan taian kiraati.

11.2

Irakin Ana Mwakuri te Atua Ibukin te Kamaiu ao te Karietataaki

E na kaoiia aomata ni kabane te Atua bwa a na nakon Kristo ao ni buoka Ana mwakuri man:

• Maiuakinan ana euangkerio Iesu Kristo.

• Tararuakiia naake iai kainnanoia.

• Kaoakiia ni kabane bwa a na karekea te euangkerio.

• Bootakiia utu n te tai ae akea tokiia.

Beretitentii n taian kiraati, ni boutokaaki irouia taan kairiiri aika ikawai, a na uaia ni maroroakinna bwa a na kanga ni ibuobuoki ni kakoroa nanon te mwakuri aei. Ibukin rongorongon riki Ana mwakuri te Atua ibukin te kamaiuaki ao te karietataaki, kamatebwaia mwakoro 1.

11.2.1

Maiuakinan Ana Euangkerio Iesu Kristo

11.2.1.1

Tabeia Kaaro ao Taan Kairiiri

Kaaro iai tabeia n reireiniia natiia te euangkerio ao ni buokiia ni maiuakinna (taraa Reirei ao Berita aika Tabu 68:25–28). Te bitiobiriki, taan kairiiri irouia Ataeinnaine, ao beretitentii ni kiraati a boutokaia kaaro n te tabe aei n aron aikai:

• Kaungaa te reitaki imarenaia ataeinnaine ao aia utu.

• Taraia raoi bwa waaki ni kakukurei a boutokaia ao a kakabwaiaia utu.

• Buokiia kaaro ni katauraoia natiia aine ibukin te entaumente n te tembora, mwakuri ni mitinare (ngkana a tangiria ataeinnaine), te mare n te tembora, ao te nakoa n tina.

A riai taan kairiiri n rangin n tabeakiniia kairake ake a memere boutokaia man aia utu ibukin maiuakinan te euangkerio.

Kaaro ao taan kairiiri a kabanea aia kona n riki bwa banna aika tamaroa nakoia kairake. A reireiniia ataei n aia waaki bwa a na riki n ai aron Iesu Kristo. Te burokuraem ibukiia Ataei ao Kairake e kona ni ibuobuoki ni waaki akanne (taraa ChildrenandYouth.ChurchofJesusChrist.org).

11.2.1.2

Reiakinan te Euangkerio

Taan kairiiri irouia Ataeinnaine ao beretitentii ni kiraati a kaungaia ataeinnaine ao aia utu bwa a na reiakina te euangkerio ni mweengaia. Taan kairiiri a kamatebwaia te euangkerio ao a tibwauai baike a reiakin ma ataeinnaine. A kaoiia kaain te kiraati n tibwauai baike a reiakin n te mweenga n tain te taromauri.

Kiraati irouia Ataeinnaine a karaoaki ni katoa Tabati ni kakorakora te onimaki, karekea te inanoi, kakorakoraia utu ao mweenga, ao ni karaoi babaire ni ira Ana mwakuri te Atua ibukin te kamaiuaki ao te karietataaki. Beretitentii ni kiraati, ni boutokaaki irouia taan kairiiri aika ikawai, ni bairea kanoan te Tabati.

Bowin te kiraati a kakaraoaki n te kauoua ao te kaaua n Taabati n te namwakaina. A na kabanea 50 te miniti. A riai bootaki nako ni moanaki ma te tataro. Te membwa n te beretitentii n te kiraati ngaia ae e na kairia. E kaira te kiraati n taekina te kibunikoora ao te uaia ni marooro ibukin taabe ao bwaai riki tabeua.

Kaain te kiraati ke te tia kairiiri ae e ikawai e kaira te anga reirei. Beretitentii n te kiraati a marooro ma taan kairiiri ikawai bwa antai ae e na anga reirei. Kabwarabwaraan Boowi a kuneaki inanon Nakomai, Iriirai. A riai bootaki nako ni kainaki ma te tataro.

Ngkana te uoote e raka ana kiraati irouia Ataeinnaine iaon teuana, a na kaokoro ni bootaki. Ma, a kona naba n ikotaki ngkana iai riaina. Ataeinnaine ao ataeinimwaane a kona ni ikotaki ibukin te reirei n Tabati, n aron are e barongaaki iroun te bitiobiriki ma te beretitentii n te Bootaki n Ataeinnaine.

Ataeinnaine a kaungaaki bwa a na ira buakon te Tiemenari (taraa 15.1).

11.2.1.3

Mwakuri n Ibuobuoki ao Waaki ni Kakukurei

Beretitentii ni kiraati, ni boutokaaki irouia taan kairiiri ikawai, a bairei mwakuri n ibuobuoki ao waaki ni kakukurei. Aikai a riai n ibuobuoki ni kakoroa nanon ana mwakuri te Atua ibukin te mwakuri ni kamaiu ao te karietataaki. A riai mwakuri n ibuobuoki ao waaki ni kakukurei ni karikirakei koaua, ni kakorakoraia utu, ni karekea te inanoi, ao ni karekei aanga ni kakabwaiaia tabeman. A ria ni baeranti i nanon mwakoro ake aua ibukin te rikirake i bon iroum: maiu n tamnei, reitaki ma aomata, marurungin te rabwata, ao te wanawana.

Angiin aia waaki ni kakukurei kairake a karaoaki n taai are bon tiaki te Tabati ke tairikin te Moanibong. A kakaraoaki teuana n te wiiki. N aono tabeua, raroana, maurin temanna, ao bwaai riki tabeua a karika angabuakan karaoan waaki ni kakukurei. N aono aikai, e kona ni kauarerekeaki karaoan waaki ni kakukurei, ma a riai ni karaoaki teuana n te namwakaina. Waaki ni Kakukurei a kona ni baireaki i aon Sample Service ao Activity Planner, a tauraoi i aon ChurchofJesusChrist.org.

Tabeua mwakuri n ibuobuoki ao waaki ni kakukurei a riai ni botiia Ataeinimwaane ao Ataeinnaine, riki ibukiia kairake ake a ikawai riki.

A kona n reke kabwaiaia kairake man te reitaki i nanon kurubu aika bubura. Kairake i nanon uoua uoote ke e raka riki a kona n ikotaki tabeua te tai ibukin mwakuri n ibuobuoki ao waaki ni kakukurei. Titeiki ao mwakoro a kona ni bairei mwakuri n ibuobuoki ao waaki ni kakukurei ibukiia kairake (taraa 20.3.2).

Taan kairiiri aika a ikawai a taraia bwa a mano waaki ni kakukurei (taraa safety.ChurchofJesusChrist.org; taraa naba 20.7 n te aeniboki aei). E na iai uoman taan kairiiri aika ikawai n tain waaki ni kakukurei n taainako (taraa 11.6.1

Ibukin riki rongorongona, taraa YoungWomen.ChurchofJesusChrist.org. Taraa naba JustServe.org ngkana e kona n reke. Bwaai n ibuobuoki aikai a katauraoi iango ibukin te mwakuri n ibuobuoki ao waaki ni kakukurei.

Waaki ni Kakukurei n te Ririki. N reita aia waaki ni kakukurei kairake are a kakaraoki, a kona naba ataeinnaine ni karaoi baikai ni katoa ririki:

• Te bowi ibukiia kairake ma aia karo ni uakaan ma moan te ririki. E kona ni karaoaki aei ibukiia ataeinimwaane ao ataeinnaine n ae maenako ke n ikotaki. E kona naba ni karaoaki n te uoote ke te titeiki. E baireaki ao e kairaki irouia taan ibuobuoki nakon te bitiobi n te kooram ni ibonga ao te beretitentii n aia kiraati ataeinnaine ake tenaan kabanea n ikawai. Ataeinnaine ake e koro 12 te ririki i nanon te ririki anne a kona ni karekea te kanikinaa ibukin te kinaaki n te bowi aei (taraa 11.6.3). Ibukin rongorongona riki tabeua, taraa ChildrenandYouth.ChurchofJesusChrist.org.

• Aia Kabane Ataeinnaine (taraa Young Women Camp Guide). Ataeinnaine a kona ni karaoi waaki ake a kainanoa te matu iai n te tairiki, bootaki, ao waaki ni kakukurei i nanon te ririki, ngkana e riai.

• Aia maungatabu kairake n te uoote ke te titeiki Ibukin Kakorakoraia Kairake (IKK). Ibukin rongorongon riki taekan aia maungatabu IKK, taraa FSY.ChurchofJesusChrist.org. Ibukin rongorongon taekan weteaia ao tibangaia IKK, n te uoote ao titeiki, taraa FSYLeader.ChurchofJesusChrist.org (ibukin te U.S. ao Canada) ke te FSY Planning Guide (ibukiia ni kabane aono).

• E na tamaroa teuana te waaki ni kakukurei ni katuruturui moan reirei inanon Ibukin Kakorakoraia Kairake: Te Kairi ibukin Karaoan Rinerine. Te waaki aei e kona ni kaainaki irouia ataeinimwaane ao ataeinnaine. A kona naba ni kaoaki kaaro.

Te Ririki are Kainnanoaki. N aia kariaia aia karo, ataeinnaine a kona ni kaea te kabwakanako tai ibukiia Ataeinnaine are e karaoaki iai te matu n te tairiki ni moanaki i nanon Tianuare are e koro iai 12 te ririki. A kona ni kaei taenti, bwabwaro ibukiia kairake, ao bwabwaro n te IKK ni moanaki i nanon Tianuare n te ririki are e koro iai 14 te ririki.

Mwanenakin Waaki ni Kakukurei. Waaki ni kakukurei, n ikotaki ma bwaai ake a kainnanoaki, a kaboaki man ana kataumwane te uoote. Te mwananga ao kabanemwane a riai n aki riaon are katauaki.

N aron are e ti kona ni karaoaki, ngkana e a aki tau te kataumwane man te uoote ni kabooi kabane mwane iaon waaki ni kakukurei are riaon tebongina, n aron te kabane, taan kairiiri a kona n tuangiia kaain te kabane bwa a na ibuobuoki n te kabanemwane. Ma, te ataeinnaine e riai n aki totokoaki man iran te bootaki ti ibukina bwa e aki kona ni buoka te kabanemwane. Ngkana e kainnanoaki riki te mwane, e kona te bitiobi n anga te kariaia ni karaoan teuana te karikirake ni katoa ririki (taraa 20.6.5).

Te bitiobi e na taraia bwa te kataumwane ao aia waaki ni kakukurei ataeinnaine ao ataeinimwaane e tau ao aki tabeitera. Te kataumwane ibukiia ataeinnaine e reke man mwaitiia ataeinnaine n te uoote. Te kataumwane ibukiia kooram n te Nakoanibonga ae te Aaron e reke man mwaitiia ataeinimwaane n te uoote.

Taraa FSY.ChurchofJesusChrist.org ibukin rongorongon mwanenakin maungatabu n te IKK.

11.2.1.4

Rikirakem I bon Iroum

N aia waaki ni kan riki n ai aron te Tia Kamaiu, a kaoaki kairake bwa a na katei kouru ni karikirakea, maiuia n tamnei, reitakiia ma aomata, marurungin rabwataia, ao wanawanaia (taraa Ruka 2:52). Kairake a ukora te kaunganano ni kunei bwaai ake a riai ni mwakuri i aona. Ni buokaki irouia kaaro, a karaoi babaire, a mwakurii aia baire, ao a iangoi baike a reiakin. Taan kairirii naba a anga te boutoka ngkana e kainnanoaki. Ma, a riai n aki ririmwiin aia kouru ataeinnaine ke rikirakeia. Kaaro ao taan kairiiri a kona n anga kouru, ma a angania kairake bwa a na bon kakaea oin aia kouru are a kan karekei.

A kaungaaki kairake bwa a na kakoroi nanon uoua kouru inanon mwakoro ake aua ni katoa ririki. A kona ni kabongana Personal Development: Youth Guidebook ke te Gospel Living app ni katei ao n taui mwiin aia kouru.

Ibukin rongorongona riki tabeua, taraa ChildrenandYouth.ChurchofJesusChrist.org.

11.2.2

Tararuakiia Naake Iai Kainnanoia

Ataeinnaine a riai n iai aia tai ni beku ibukiia tabeman inanon ao ma aia utu, n tain aia waaki ni kakukurei kairake, ao i bon irouia. Iango ibukin te mwakuri n ibuobuoki e tauraoi i aon ChildrenandYouth.ChurchofJesusChrist.org. Ngkana a na tauraoi, JustServe.org iangoi taai ibukin te ibuobuoki n te kaomiuniti.

11.2.2.1

Te Mwakuri n Ibuobuoki

Te mwakuri n ibuobuoki bon tararuakiia tabeman n aron are e na karaoia te Tia Kamaiu. Ataeinnaine a karekei tabeia n ibuobuoki ni moanaki i nanon Tianuare n te ririki are koro iai 14 aia ririki. Ibukin riki rongorongona, taraa mwakoro 21.

11.2.3

Kaoiia Ni kabane ni Karekea te Euangkerio

Ataeinnaine a na kaoiia ni kabane ni karekea te euangkerio ngkai a “tei bwa taan kakoaua ibukin te Atua n taai nako ao ni bwaai nako, ao n taabo nako” (Motiaea 18:9). Tabeua kawai are a kona ni karaoa iai aei a kaotaki inano:

• Katea te banna ae tamaroa n aron ae ana reirei Iesu Kristo.

• Tibwaua aia koaua ma raoraoia ao kaain aia utu.

• Ibuobuoki nakoia membwa ake aki bati n roroko n aia kiraati.

• Kaoiia raoraoia nakon te taromauri ke waaki ni kakukurei.

• Kaoiia raoraoia n ira buakon te burokuraem ibukiia Ataei ao Kairake. Taan kairiiri a na uaia ni mwakuri ma aia karo kairake aikai ni buokiia ni kaotaia n te burokuraem ao ni baireia bwa tera aroia ngaiia ao natiia n ira buakon te waaki.

• Kaoiia raoraoia bwa a na reireinaki irouia mitinare.

Kaaro ao taan kairiiri a na kaungaia ataeinnaine ni katauraoi n tibwaua te euangkerio rinanon nako maiua. Aikai tabeua kawai are a kona ni karaoa aei:

• Kaungaiia ataeinnaine ni karekea aia koaua n ana babaire ni kakukurei Tamara are i Karawa, Ana Mwakuri ni Kamaiu Iesu Kristo, ao kaokakin Ana Euangkerio.

• Karekei aanga ake a na beku iai n te Ekaretia.

• Karekei aanga bwa a na anga reirei iaon te euangkerio ni bowin aia kiraati ao n taabo riki tabeua.

Ngkana ataeinnaine a tangiria n nako ni mitinare, kaaro ao taan kairiiri a buokiia ni katauraoiia. Kanoan aei bon reireinaia kakabwaia ao baika a kaantaningaaki n te mwakuri ni mitinare.

Bwa raon te katauraoi aei, te bitiobiriki ao te titeiki beretitentii a kona ni baronga te kiraati ni katauraoi nakon te mitinare. Boton bwaai n ibuobuoki ibukin te kiraati aei bon koroboki aika tabu, Kainibaire ibukiia Mitinare bwa Ana Reirei Iesu Kristo, ao Tataekina Au Euangkerio: Te Kaetieti ibukin Tibwauan ana Euangkerio Iesu Kristo. Te kiraati aei e na aki karaoaki ni katoa tain bootaki n te Tabati.

Missionary.ChurchofJesusChrist.org e anga tabeua kanoa ake a kona ni buokiia ataeinnaine ngkai a katauraoi ni beku bwa mitinare. Taraa mwakoro 23 ao 24 ibukin rongorongona riki.

11.2.4

Katiteuanaakiia Utu ibukin te Tai ae Akea Tokina

Ataeinnaine a kona n ibuobuoki n katiteuanaia utu ibukin te tai ae akea tokina ni kawai aika a mwaiti. Tabeua kawai a karinanaki inano:

• Ana karineia aia karo ao ni katea te katooto ni maiuakina maiun Kristo inanon mweengaia.

• Katauraoi ni karekea oin aia utu ae akea tokina.

• E na iai ana beba ni kariaia nakon te tembora ae tuai bane taina.

• Katauraoi ni karekei otenanti n te tembora, n ikotaki ma te mare ae akea tokina.

• Reiakina rongorongoia aia koraki ao aia bakatibu (taraa Au Utu: Karaki are A Bootiira).

• Karekei araia aia bakatibu ake a kainnanoi otenanti n te tembora (taraa FamilySearch.org).

• Karaoi bwabetito ao kamatoa ibukiia maate n taai ake e angaraoi nakoia.

• Karaoa te intekiti (taraa FamilySearch.org/indexing).

• Beku bwa taan ibuobuoki n rongorongon te tembora ao te tabo n riki, ngkana a wetekai iroun te bitiobiriki (taraa 25.2.4).

11.3

Aro ni Kairiiri ibukiia Ataeinnaine n te Uoote

11.3.1

Bitiobiriki

Taben te bitiobi ae moan te kakawaki bon tabeakinaia te roro ae rikirake inanon ana uoote. Ngaia ao ana kauntira a reiakina araia ao a kamataataia n aron tein mwengaia. Rereitaki ma ataeinnaine n tatabemaniia tao uatai n te ririki (taraa 31.3.1).

Te bitiobi iai tabena ibukin te Bootaki n Ataeinnaine n te uoote. E reitaki n tainako ma te beretitenti n te Bootaki n Ataeinnaine. E na ribooti iaon bwaai ni kaineti ma te bootaki n Ataeinnaine inanon bootakin te bitiobiriki.

Te bitiobi ao ana kauntira a na iriri n tainako n aia bootaki Ataeinnaine, mwakuri n ibuobuoki, ao waaki ni kakukurei. Ngkana e mwaiti kiraati n te Bootaki n Ataeinnaine, te bitiobi e katabea ana kauntira ao a kamaenakoia nakon taian kiraati.

11.3.2

Aia Beretitentii Ataeinnaine aika Ikawai

Te bitiobi e wetea ao e katabua te aine ae ikawai bwa e na beku bwa te beretitenti ibukin te Bootaki n Ataeinnaine n te Uoote. Ngkana e a tau buburan te iunite, e na anga aran temanna ke uoman aine aika a ikawai bwa ana weteaki bwa ana kauntira (taraa mwakoro 30). Te Bitiobiriki e na iangoi ana rinerine neienne ao ni kanakoa te wewete.

Inanon te iunite ae rangi ni uarereke, te beretitenti irouia Ataeinnaine e na kona n tii ngaia te ikawai ae te tia kairiiri inanon aia bootaki Ataeinnaine. N te keiti aio, e mwakuri ma kaaro ni bairea te reirei n tabati ao waaki ni kakukurei ibukiia ataeinnaine. E na taraia naba bwa e na iai uoman ikawai aika onimakinaki aika ana irii bootaki ni kabane ao waaki ni kakukurei. Ngkana e riai karaoana, a riai kauntira ao te tia koroboki ni weteaki.

Ngkana akea te beretitenti n te Bootaki n Ataeinnaine n te mwaanga, te beretitenti n te Bootaki n Aine e na kona ni bairea te reirei ibukiia ataeinnaine ni karokoa are e weteaki te beretitenti n te Bootaki n Ataeinnaine.

Te beretitenti n te Bootaki n Ataeinnaine iai tabena aikai. A na buokia ana kauntira.

• Ngaia kaain te kauntira n te uoote. E beku bwa (1) kaain kometen te uoote are tobwai kainnano n te uoote ao ni kakaei tobwaan kangaanga ao (2) te tia tei ibukin te Bootaki n Aine (taraa 29.2.5).

• E beku bwa kaain te kauntira ni kairake n te uoote. (taraa 29.2.6).

• Mwakuri n ibuobuoki nakoia ataeinnaine n tatabemaniia.

• E na anga aara nakon te bitiobiriki ibukiia aine bwa a na beku n te Bootaki n Ataeinnaine.

• E na reireiniia aia taan kairiiri Ataeinnaine ao beretitentii n te kiraati tabeia.

• Marooro ma ataeinnaine i aon kakaewenako ake aki kainnanoa te bitiobi ke are irekereke ma te mwakuri n iowawa (taraa 32.3, 31.3.1, ao 38.6.2).

• Reireiniia beretitentii ni kiraati n tabeia ni kairiiri. Kiraati nako e buokaki ao e tararuaaki iroun temanna kaain te beretitenti n te Bootaki n Ataeinnaine.

• Boutokaia ataeinnaine ake a beku bwa toaia aine inanon te mwakuri n ibuobuoki (taraa 21.2.2).

• Kakaonimaki karaoi bowin te beretitentii n te Bootaki n Ataeinnaine ao bowi ma te bitiobi.

• Tararuai rekooti, ribooti, kataumwane, ao mwanen te rabwata are te Bootaki n Ataeinnaine.

11.3.3

Te Tia koroboki

Ngkana e tau buburan te iunite, te beretitenti n te Bootaki n Ataeinnaine e anga araia aine nakon te bitiobi bwa a na beku bwa te tia koroboki n te Bootaki n Ataeinnaine. E kona ni karekei tibwanga aikai:

• Buoka te beretitentii n te Bootaki n Ataeinnaine ni katauraoi akenta ibukin bowin te beretitentii. E iri bootaki aikai, n taui mwiia, ao ni kawakin mwiin taian tabe.

• Anga te kairiri nakoia taan koroboki ni kiraati ao e buokiia ni tau mwiin rekooti.

• Ni kabonganaan LCR, mwakuri ma te tia koroboki n te Bootaki n Aine ni kawakin rekooti ibukin te roroko ibukiia aine ake a ikawai ake a beku n te Bootaki n Ataeinaine.

• Buoka te Beretitentii n te Bootaki n Ataeinnaine ni katauraoa te kataumwane ao akaunti ibukin kabanemwane.

11.3.4

Beretitentii ao Tia koroboki ni Kiraati

11.3.4.1

Weteaia, Kamatoaaia, ao Kaokoroaia

Kiraati nako n te Bootaki n Ataeinnaine e riai n iai aia beretitentii. Te beretitentii n te Bootaki n Ataeinnaine a kona n anga araia ataeinnaine bwa a na beku bwa beretitenti ni kiraati. Kaain te bitiobiriki a marooro ma te tataro bwa antai ae a na weteia.

Kaain te bitiobiriki e wetea te ataeinnaine are e na beku bwa te beretitenti n te kiraati. Ngkana e tau mwaitiia ataeinnaine ni beku, e tataroakinna bwa antai irouia kaain te Kiraati aika a kona ni beku bwa kauntira ao te tia koroboki. Te Bitiobiriki e na iangoi ana rinerine neienne ao ni kanakoa te wewete.

Imwain tuangan te ataeinnaine bwa e na beku n nakoa aikai, kaain te bitiobiriki e karekea te kariaia mai irouia ana karo te ataeinnaine anne.

Imwin kanakoan wewete aikai, te membwa n te bitiobiriki e na kaotiia ataeinnaine nakon aia kiraati ibukin kamatoakiia. Te bitiobi ke te kauntira are e katabeaki e na katabua ni kaokoroa te ataeinnaine.

Kaain te bitiobiriki e na katanoatai wewete aikai n bootakin te toa. E aki uotarake araia ibukin te kamatoa.

Bon imwiin kaokoroaia kaain te beretitentii n te kiraati, e riai kaain te bitiobiriki n kabwarabwarai tabeia. Taraa “Aaronic Priesthood Quorum ao Young Women Class Presidency Orientation” i aon YoungWomen.ChurchofJesusChrist.org; taraa naba mwakoro 4 n te aeniboki aei.

11.3.4.2

Taabe

Beretitenti ni kiraati a beku n te kauntira n te uoote (taraa 11.3.4.4). Beretitentii ni kiraati iai naba tabeia aikai:

• Kaira ana waaki te kiraati n karaoa ana mwakuri te Atua ibukin te kamaiuaki ao te karietataaki. (taraa mwakoro 1).

• Kinaia ao ni beku ibukiia ataeinnaine n tatabemaniia, n ikotaki ma naake a aki kakaonimaki nakon taian kiraati. A tarai kainnanoia ao aia kangaanga.

• Iriiri inanon ana mwakuri te Uoote n tibwauaan te euangkerio ao kakorakoraaia membwa aika boou ao ake a manga oki. Te membwa n te beretitentii ae te kabanea n ikawai n aia kiraati Ataeinnaine e irii n te boowi ni babaire (see 23.4).

• Iriiri n ana mwakuri te uoote ibukin te tembora ao rongorongon te utu. Te membwa n te beretitentii ae te kabanea n ikawai n aia kiraati Ataeinnaine e irii boowi ni babaire (taraa 25.2.7).

• Bairei ao ni kairii bootaki n te kiraati (taraa 11.2.1.2).

• Bairei ao ni karaoi mwakuri n ibuobuoki ao waaki ni kakukurei (taraa 11.2.1.3).

• Katoatai karaoa te bowi ibukiia beretitentii n te kiraati (taara 11.3.4.3).

Ngkana a weteaki taan koroboki, a na katauraoi akenta ibukin bowi, ao ni korei rongorongo, ao a tau mwiin te roroko.

Memwba n te beretitentii n te Bootaki n Ataeinnaine ni mwaitin te tai e reireiniia beretitentii ni kiraati taekan tabeia (taraa 11.3.2). Aetuwaitia ao te tia rabakau a riai ni marurung n ibuobuoki (taraa 11.3.5 ao 11.3.6).

11.3.4.3

Aia bowi Beretentii ni Kiraati

Beretitentii ni kiraati n te Bootaki n Ataeinnaine a kakaraoa aia bowi ni katoatai. Te beretitenti n te kiraati e kairi bootaki aikai. Taan kairiiri n te Bootaki n Ataeinnaine are a ikawai ake a katabeaki ni boutoka te beretitentii ni kiraati a iri naba. I nanon bootaki aikai, taan kairiiri a uaia ni marooro ao a ukora te kaotioti bwa tera nanon te Uea ibukin aia kiraati. Te akenta e kona ni karini maroorokinan bwaai aikai:

• Ibuobuoki ni katia Ana mwakuri te Atua Ibukin te Kamaiuaki ao te karietataaki

• Beku irouia kaain te kiraati, n taben nanoia riki membwa aika boou ao n anga te ibuobuoki nakoia naake a mamaara

• Tabenanoakia naake e kaokoro aia aro ao aia onimaki

• Bairean bootakin te kiraati, mwakuri n ibuobuoki, ao waaki ni kakukurei

• Reirei n te kairiiri mairouia taan kairiiri n te Bootaki n Ataeinnaine are a ikawaii ke temanna kaain te beretitentii n te kiraati

Te Katooto n Akentan Bowin te Beretitentii e tauraoi i aon ChurchofJesusChrist.org.

11.3.4.4

Kauntira ibukiia Kairake n te Uoote

Oin te kantaninga n te bowi ni kauntira ibukiia kairake n te uoote bwa a na buokiia kairake ni uotiia tabeman nakon Iesu Kristo ao ni buokia ni katia Ana mwakuri te Atua ibukin te kamaiuaki ao te karietataaki.

Te bitiobi ngaia ae e na tararuaa aia kauntira kairake n te uoote. Kaain te kauntira aio bon:

• Te bitiobiriki.

• Temanna mai irouia ana taan ibuobuoki te bitiobi n te kooram n ibonga ao te beretitenti n aia kooram taan reirei ao riikan.

• Beretitenti n aia kiraati Ataeinnaine (ke ni kabane kaain te beretitentii n ataeinnaine ngkana te uoote iai tii teuana aia kiraati Ataeinnaine).

• Te Beretitenti n te Bootaki n Ataeinnaine.

Te kauntira ni kairake n te uoote a na maroroakin kawai ni buokiia aomata ni karikirakei koaua, karekei otenanti ni kamaiu, kawakin taian berita, ao n riki bwa taan iriira Iesu Kristo (taraa Moronaai 6:4–5). A na uaia ni marooro n ikotaki iaon kainnanoia ataeinnaine ao ataenimwaane inanon te uoote. A kona naba ni marooroakin waaki ni kakukurei n tobwai kainnano akanne. Ma, bairean waaki ni kakukurei ae bwanin e riai ni karaoaki n bowin te kooram ke te kiraati.

Taraa 29.2.6 ibukin rongorongon riki te kauntira ni kairake n te uoote.

11.3.5

Aetuwaitia

Te Beretitenti n te Bootaki n Ataeinnaine e kona ni butia te bitiobiriki bwa a na weteaki atuwaitia n te botaki n ataeinnaine. Aetuwaitia nako a mwakuri ma te kurubu teuana irouia ataeinnaine.

Aetuwaitia iai tabeia aikai:

• Buoka te beretitenti n te Bootaki n Ataeinnaine ma tabeia.

• Boutokaia ao e kairiia beretitentii ni kiraati ngkai a reiakin ao ni karaoi tabeia.

• Anga Reirei n Tabati ngkana e kainnanoaki. E buokiia ataeinnaine ake a tia ni kaoaki bwa a na anga reirei ni kanakoaraoa aia katauraoi ao aia anga reirei.

• Kaei waaki ni kakukurei n te kiraati.

• Irii bowiin te beretitentii n te Bootaki n Ataeinnaine n te uoote ngkana e kaoaki.

E riai n iai uoman aine aika ikawai n tain bootakin ao waaki ni kakukurei ni kiraati nako. Aetuwaitia a riai ni karaoa te kataneiai i aon ProtectingChildren.ChurchofJesusChrist.org (taraa 11.6.1).

11.3.6

Taan Rabakau

Ngkana e kainnanoaki, te beretitentii n te Bootaki n Ataeinnaine e kona ni butiia te bitiobi bwa e na weteia taan rabakau n ibuobuoki inanon taai aika onoti, n aron te kaembwa, aia maungatabu roronrikirake, ke takakaro.

Taan rabakau aikai a na mwakuri iaan ana kairi te beretitentii n te Bootaki n Ataeinnaine n te uoote.

Aetuwaitia a riai ni karaoa te kataneiai i aon ProtectingChildren.ChurchofJesusChrist.org (taraa 11.6.1).

11.4

Buokiia Ataeinnaine ni Katauraoia ni Kaaina te Bootaki n Aine

Te ataeinnaine e kona ni kaaina te Bootaki n Aine ni koron 18 ana ririki. Ni koron 19 te ririki, ataeinnaine n tatabemaniia nako a riai ni kakaonimaki n iira te Bootaki n Aine. N taai tabetai, te ataeinnaine e kona ni kaaina te Bootaki n Aine imwain koron 18 ana ririki. E na marooro te Ataeinnaine ma ana karo ao te bitiobi ni motikia bwa tera ae te kabanea n tamaroa ae na buokia ni kakorakora ana onimaki iroun Iesu Kristo.

Kaaro ao Ataeinnaine ao taan kairiiri n te Bootaki n Aine a na kai ni uaia ni mwakuri ni buokiia ataeinnaine n tatabemaniia n tauraoi nakon te Bootaki n Aine. Taan kairiiri aikai a anga taai ibukin te ataeinnaine ao aine n te Bootaki n Aine ni karekea te reitaki ao te iraorao.

11.5

Taan Kairiiri n te Bootaki n Ataeinnaine n te Titeiki

Kaain te titeiki beretitentii e wetea temanna te aine ae ikawai ni beku bwa te beretitenti n te Bootaki n Aine. Ngkana te iunite e tau bubura, e anga aran temanna ke uoman aine bwa a na weteaki bwa ana kauntira ke temanna bwa e na beku bwa te tia koroboki. A weteaki aine aikai ao ni kaokoroaki iroun te membwa n te beretitentii n te titeiki ke te kauntira ae rietaata are e a tia ni mwiokoaki. Ibukin rongorongon tabeia beretitentii ao te tia koroboki n te Bootaki n Ataeinnaine n te titeiki, taraa 6.7.1, 6.7.1.2, ao 6.7.3.

Te kauntira n te titeiki beretitentii iai tabena ibukiia te rabwata ae te Bootaki n Ataeinnaine n te titeiki. Iai naba tabena ibukin ana mwakuri te beretitentii n te Bootaki n Ataeinnaine. E reireiniia naba bitiobi tabeia ibukiia ataeinnaine.

Te beretitentii n te titeiki e mwiokoa temanna te kauntira ae rietaata bwa e na mwakuri ma te beretitentii n Bootaki n Ataeinnaine n te titeiki (taraa 6.5).

Te beretitentii ao te tia koroboki n aia Bootaki Ataeinnaine n te titeiki a kaaina te komete n te titeiki ibukin waaki ni kairiiri ibukiia kairake (taraa 29.3.9).

11.6

Kainibaire ao Kaetieti Aika Karinaki

11.6.1

Kamanoaia Kairake

Ngkana ikawai a reireiniia ataei ke kairake n ana tabo te Ekaretia, e riai n iai uoman ikawai aika a na mena i rarikiia. E na kona n riai bwa a na ikotaki kiraaki bwa e aonga ni kona ni koro nanon aei.

Ni kabane ikawai ake a mwakuri ma kairake a riai ni kabwanina anaan te reirei ibukin kamanoaia ataei ao kairake teuana te namwakaina man te tai are a kamatoaaki iai (ProtectingChildren.ChurchofJesusChrist.org). A na kaokioka te reirei aei ni katoa teniua te ririki imwin aia moan kataneiai.

Ibukin te rongorongo bwa a na kanga kaetieti aikai ni irekereke nakoia taan ikatoatoa n ibuobuoki, taraa 21.2.2.

11.6.2

Ataeinnaine ake Aki Toamau

Beretitentii ni kiraati a anga te tabe ae onoti nakoia ataeinnaine ake iai aki toamauia. Ibukin rongorongon aron buokaia ataeinnaine aikai, taraa disability.ChurchofJesusChrist.org; taraa naba 38.8.27 inanon te aeniboki aei.

11.6.3

Bwaai ni Kanikinaa ibukiia Ataei ao Kairake

Ataeinnaine a karekei kanikina ba kanoan te burokuraem ibukiia Ataei ao Kairake. Ni kabane ataeinnaine a riai ni karekea te kanikina ibukin te kinaaki man ana beretitentii n te kiraati n te tai are e kaaina iai te Bootaki n Ataeinnaine. E na karekea naba kaobiin te Personal Development: Youth Guidebook. Aio e kona ni karaoaki n te tai are te kiraati beretitentii ao taan kairiiri irouia Ataeinnaine a kaitibo ma ngaia ni butimwaeia nakon te Bootaki n Ataeinnaine. E kona naba ni karaoaki n tain te bowi ni katoa ririki ibukiia kairake ao aia karo (taraa 11.2.1.3).

I nanon Tianuare n te ririki are te ataeinnaine e koro 18 ana ririki, e karekea riki te kanikina ni kinaaki.

Ataeinnaine a kona ni karekei kanikina n tokanikai man kabanean aia kona n riki n ai aron te Tia Kamaiu.

Ibukin rongorongon riki taian kanikina, taraa ChildrenandYouth.ChurchofJesusChrist.org.