15.

Tieminari ao Intitute n Taekan te Aro

15.0

Moantaeka

Tieminari ao Intitute n Taekan te Aro (T&I) e buokiia kaaro ao taan kairiiri n te Ekaretia ni buokiia kairake ao ikawai ni kananoa rairakiia nakon Iesu Kristo ao Ana euangkerio ae kaokaki. Aio e a tia ni karaoaki man boutokaan kamatebwaian koroboki aika tabu are e boboto n te mweenga ao aia taeka burabeti aika maiu ao tabeman riki taan kairiiri n te Ekaretia.

Ana burokuraem te tieminari ao te intitute a tararuaki man taian tua ake a kateaki man ana Baba n Tararua Reirein te Ekaretia. Te baba n tararua aio e bon tararuaaki iroun te Beretitenti n te Ekaretia. Te titeiki beretitentii e karaoi nanon burokuraem aikai i nanon te titeiki ao n uoote. Taan kairiiri n te titeiki ao uoote a kakaonimaki n rinanoa aia waaki kairake n te tieminari ao te intitute burokuraem.

Te tia tei n te T&I e katabeaki n titeiki nako ni buokiia taan kairiiri ni karaoi T&I burokuraem.

15.1

Tieminari

Te tieminari bon te burokuraem ae aua ririkina ike kairake a kamatebwaia Ana euangkerio Iesu Kristo ae kaokaki n aron are a kuneaki ni koroboki aika tabu ao n aia taeka burabeti ni bong aika kaitira. Ataein te tieminari a bwaka iaan 14–18 te ririki.

Taian kiraati a kakaraoaki ni boong n te wiiki ngkana e waaki te reirei. Mwaitin boong ake e na kakaraoaki iai te tieminari kiraati ni katoa wiiki e na kona ni kangaraoaki nakon aron te tabo. (Taraa Seminary Class Options ibukin rongorongona riki tabeua) Taian kiraati ke bwaai n reirei ake a toka aorain a riai n anaa aua te aoa te katautau ibukin katiaana ni katoa wiiki.

Te bitiobiriki, taan kairiiri irouia kairake, beretitentii ni kooram ao ni kiraati a kaungaia kairaike ni kabane bwa a na ira te tieminari. Te bitiobiriki e kaungaia kaaro bwa a na kabaei araia natiia ni katoa ririki imwain waakin kiraati n te tieminari. Ibukin riki rongorongona, taraa Seminary Registration i aon ChurchofJesusChrist.org.

Ana baba n tararua te reirei n te tabo e na kona ni kateaki ike tabeua titeiki ma aia kiraati n te tieminari (n raonaki ma kiraati ni kamatebwai n te mweenga) a na bon uakaan ao tii te arona aroia ni baika a kainnanoi ao aia kakaewenako. Taraa seminary.ChurchofJesusChrist.org.

15.1.1

Taan Reirei

Taan reirei n te tieminari bon kaain te Ekaretia are iai aia onimaki iroun Iesu Kristo ao aia koaua n Ana euangkerio are kaokaki. A riai ni maiuakin reirei ake a reiakin ao ni mwakuri raoi ma kairake. Ngkana e kona, a riai taan reirei ni iai aia beeba ni kariaia nakon te tembora ae tuai bane taina.

Te membwa n te beretitentii n te titeiki e na maroro ma te bitiobi, tubwawaitia n te titeiki, ao te tia tei n S&I ibukia taan reirei n te tieminari aika a bon tau. Te membwa n te beretitentii n te titeiki ke te kauntira ae rietaata ae katabeaki e wetea, kamatoa, ao ni kamotirawaia taan reirei n te tieminari ibukin te titeiki ao tubwawaitia n titieki. Imwiin are e weteaki ao e kaokoroaki te aomata anne, te tia tei n te S&I e reireinna ao e boutoka neienne ke teuanne.

Ni kamanoaia taan reirei ao ataei, uoman ikawai a riai ni mena n te kateitei ke te mweenga n te tabo are e boo iai te tieminari. Temanna riki te tia reirei e kona ni weteaki, ke temanna te ikawai ae onimakinaki e kona ni katabeaki bwa e na mena ikekei. Te kauoman ni ikawai e kona n ae buun te tia reirei ke ana karo temanna te ataei. Teuanne ke neienne a riai n titebo aroia ni mwaane ke n aine ma te tia reirei, tii ngkana te ikawai anne bon ana koraki te tia reirei. Te tia reirei e riai n aki tiku tii ngaia ma ataein te reirei tii ngkana te ataei anne bon natin te tia reirei. Aio e kaineti n taabo nako, n aron te umwanreirei, kateitei, ikoikotaki i aonrain, ke te bao ni mwamwananga.

15.1.2

Kateitei, Bwaai ni mwakuri, ao Bwaai n reirei

Taan kairiiri n titeiki ao uoote a taraia bwa taabo n aron taabo n taromauri ke mwengaia membwa a tauraoi ibukin karaoan te tieminari. Kateitei ke ruu a riai n aki kaboaki ibukin karaoan te tieminari. Ngkana te kiraati a kaitibo n te tabo n taromauri, taan reirei a riai ni kona ni kabonganai bwai ni mwakuri n te resource tienta.

Te tia tei n T&I e katauraoi bwaai n reirei ibukiia taan reirei ao ataei ni kiraati nako. Ataei a riai n roko ma oin aia boki aika tabu, boretiaki ke iaon bwaai n rabakau aika boou.

15.1.3

Aobitia n te kiraati ao Waaki ni kakukurei

Te tia reirei n te tieminari e kona n rineia aobitia n te kiraati, n aron te beretitenti, te kauoman, ao te tia koroboki. Te tia reirei e riai moa n reitaki ma ana karo te ataei ao te bitiobi ibukin te kariaia. Aobitia n te kiraati a riai n aki kamatoaki ao ni kaokoroaki. A kona ni buoka te tia reirei ni waaki inanon te kiraatiruum ao ni kaungaia ataei bwa a na kaea ao n ira te kiraati.

Taan reirei n te tieminari a riai n aki anga waaki ni kakukurei i tinanikun te tai ke n raroa ma te kiraatiruum. Tii ngkana iai te kariaia mairouia taan kairiiri n te tabo.

15.1.4

Bwii ao te Angabeba

Ataein te tieminari a kona n tamaroa aia reirei ao n nano rairakiia ngkana a kakaonimaki ni kaea te kiraati, n ira buakon, ao ni kamatebwai koroboki aika tabu i tinanikun te kiraati. Ngkai a karaoi bwaai aikai, a karekea naba aia bwii ni katoa ririki ao a kona n angabeba man te tieminari.

Tabeman ataei iai aia kangaanga ni karekea aia bwii n te tieminari n irekereke ma te kaanganga nakon aia wareware ao n tabeua riki bukina. Te tia reirei e kona ni kangaraoi baika a kainnanoaki nakon kainnanoia ataei. Te tia tei n te T&I e kona ni bubuti te katamaroa ibukin te buroukuram ae bwanin. Katamaroa aikai a riai ni kariaiakaki man te T&I aobiti.

N angabeba ma te tieminari, te ataei e riai ni karekea ana bwii n te aua n ririki ao ni karekea ana kariaia te tia kairiiri mairoun kaain te bitiobiriki. Te beba ni boutoka aei e kakoaua bwa te ataei e tau ao e nene ni maiuakinan ana kainibaire te euangkerio.

Ni katoa ririki te titeiki e karaoa te angabeba n tieminari. Te bootaki aei e baireaki man te titeiki beretitentii ke te kauntira ae rietaata. Te tia tei n te T&I e kona n ibuobuoki. Ibukin rongorongona riki, taraa A Guide to Seminary and Institute Graduation Exercises.

15.1.5

Booakin-Tieminari Itinanikun Taia

N taabo tabeua n te United States ao Canada, tuan te tabo a kariaia ataei bwa a na kitana aia reirei ao ni kaea te tieminari n aoan te reirei. Te Baba n Tararua ibukin te Reirei e kariaia te aeka n tieminari aei. Ibukin rongorongona riki tabeua, taraa Seminary Registration i aon ChurchofJesusChrist.org.

15.2

Te Intitute

Te intitiute e anga te kiraati ni kamatebwaian te euangkerio ni katoa wiiki are kakorakora te onimaki ao te koaua iroun Iesu Kristo ao Ana euangkerio ae kaokaki. Taan kairiiri n te Titeiki a na kakoaua raoi bwa te intitute e na tauraoi ibukiia kairake aika a tuai ni iein n aia ririki ae 18-30.

Ni kabane kairake n ikawai aika a tuai n iein a kaungaaki n irii kiraati n te intitute, n aki taraaki bwa e reirei ke e aki. A riai ni ira te kiraati ibukin te intitute ake a karaoaki n te kaembati (ngkana iai). A kona naba ni ira te kiraati ibukin te intitute akana a toka aonrain ke taian kiraati ni karaoaki n te titeiki.

Taraa Stake Institute ibukin te kainibaire iaon aika karinanaki:

• Katean ao kamwakuran taian kiraati n te intitute ni karaoaki n te titeiki

• Babaire ibukin auti

• Weteaia taan reirei

• Kinakin aia kekeiaki ataein te reirei

15.2.1

Kiraati n Taekan te Aro Ake Tabeua

Beretitentii n titeiki a tangiria ni kan katauraoa te kiraati n taekan te aro ibukiia ikawai ake a bwaka aia ririki n 31 ao iaona. Kiraati aikai bon tiaki raoi teS&I ao a aki aranaki bwa intitiute kiraati. Ma n anne, ana karikiram ibukin bwaai reirei n te intitiute a kona ni kabonganaaki ibukiia.

15.3

Reirein te Aro ao Ana Bootaki n Reirei te Ekaretia

Ibukin riki rongorongon ana Moanrinan ao ana kauarinan te Ekaretia, BYU–Pathway Worldwide, ao reirei ake a rietaata riki, taraa CES.ChurchofJesusChrist.org. Rongorongo ni kabwaninan kanakoan beba ni kariaia ibukiia ataein te reirei mairouia taan kairiiri ni kaei reirei aikai a kuneaki naba ikanne.

Irarikin anne, rongorongo i aon kanakoan kariaia n te mwakuri mairouia taan kairiiri rinanon te CES Ecclesiastical Clearance Office e kona ni kuneaki n help.ChurchofJesusChrist.org.