15.

Seminare ma Inisitituti o Mataupu Faalelotu

15.0

Faatomuaga

O Seminare ma Inisitituti o Mataupu Faalelotu (S&I) e lagolago atu i matua ma taitai o le Ekalesia i le fesoasoani ai i le autalavou ma talavou matutua ia faalolotoina lo latou liua ia Iesu Keriso ma Lana talalelei toefuataiina. E faia lenei mea e ala i le lagolagoina o se suesuega o tusitusiga paia ma upu a perofeta soifua ma isi taitai o le Ekalesia e faatotonugalemu-i-le-aiga.

O polokalama o le seminare ma le inisitituti e puleaina e ala i aiaiga faavae ua faavaeina e le Fono Faatonu o Aoga a le Ekalesia. O lenei fono faatonu e taitaia e le Peresitene o le Ekalesia. O le au peresitene o le siteki e faatinoina nei polokalama i totonu o le siteki ma uarota. E iloiloina e le aunoa e taitai o siteki ma uarota le auai ai o o latou talavou i polokalama o le seminare ma le inisitituti.

E tofia se sui o le S&I i siteki taitasi e fesoasoani i taitai e faatautaia polokalama a le S&I.

15.1

Seminare

O le seminare o se polokalama e 4-tausaga lea e suesue ai e le autalavou le talalelei a Iesu Keriso e pei ona maua i tusitusiga paia ma a’oa’oga a perofeta o aso e gata ai. O tamaiti a’oga o le seminare e masani lava o le 14–18 tausaga le matutua.

E faia vasega i aso o le vaiaso pe a o a’e aoga. O le aofai o aso e fai ai vasega seminare i vaiaso taitasi e mafai ona fetuunai i tulaga i le lotoifale. (Tagai i le Filifiliga mo Vasega Seminare mo nisi faamatalaga.) O vasega po o galuega atofaina i luga o le initoneti e tatau ona alu ai pe tusa ma le fa itula i le vaiaso e faamaea ai.

O le au epikopo, taitai o le autalavou, ma au peresitene o korama ma vasega e faamalosiauina talavou uma ia auai atoatoa i le seminare. E uunaia e le au epikopo ia matua e lesitala a latou fanau i tausaga taitasi a o le’i amataina vasega o le seminare. Mo nisi faamatalaga, tagai i le Lesitala mo le Seminare i luga o le ChurchofJesusChrist.org.

E mafai foi ona faatu se fono faatonu o a’oga i le lotoifale i nofoaga e i ai ni siteki o loo faia vasega seminare, (e aofia ai vasega o suesuega e fai i le fale) e felata’i ma e i ai ni popolega ma ni luitau e tutusa ai. Tagai i le seminary.ChurchofJesusChrist.org.

15.1.1

O Faiaoga

Ofaiaoga seminare e tatau o ni tagata o le Ekalesia e i ai le faatuatua i le Alii o Iesu Keriso ma se molimau i Lana talalelei toefuataiina. E tatau ona latou ola i mataupu faavae latou te a’oa’o atu ma galulue lelei ma le autalavou. Afai e mafai, e tatau i faiaoga ona i ai se pepa faataga o aoga o le malumalu.

O se uso o le au peresitene o le siteki e fefautuaai ma le epikopo, supavaisa i le siteki, ma le sui o le S&I e uiga i ē onomea ona avea ma faiaoga seminare. O se uso o le au peresitene o le siteki po o se fautua maualuga e tofia, e valaauina, vaetofia, ma faamalolo ia faiaoga seminare a le siteki ma supavaisa a le siteki. A uma ona valaauina le tagata ma vaetofia, o le sui o le S&I e a’oa’oina ma lagolagoina o ia.

Ina ia puipuia faiaoga ma tamaiti aoga, e tatau ona toalua ni tagata matutua e i ai i le nofoaga po o le fale i le mea o loo a’oa’o ai le vasega seminare. E mafai ona valaauina se faiaoga faaopoopo, pe tofia foi se isi tagata matua faatuatuaina e auai. O le tagata matua lona lua e mafai ona tofi i ai le toalua o le faiaoga po o se mātua o se tasi o le vasega. E tatau ona itupa tutusa ma le faiaoga, se’i vagana ai o lena tagata o se tagata matua o le aiga o le faiaoga. E le tatau lava ona tuua na o se faiaoga i le potuaoga ma se tamaitiiti a’oga se’i vagana o le tamaitiiti a’oga o se tama a le faiaoga. E faatatau lenei mea i soo se nofoaga, e pei o se potuaoga, fale, potopotoga i ala faatekinolosi, po o se taavale.

15.1.2

Fale, Masini, ma Anomea

E faamautinoa e taitai o le siteki ma uarota o nofoaga e pei o falelotu po o fale o aiga o loo avanoa mo vasega seminare. E le tatau ona totogi ni fale po o potu mo vasega seminare. Afai e fai vasega i se falelotu, e tatau ona mafai e faiaoga ona faaaoga masini i le nofoaga autu mo punaoa.

O le sui o le S&I e tuuina atu anomea mo faiaoga ma tamaiti aoga mo vasega taitasi. E tatau i tamaiti aoga ona aumai a latou lava tusitusiga paia, tusilolomi pe faatekinolosi.

15.1.3

Au Mautofi o Vasega ma Gaoioiga

E mafai e se faiaoga seminare ona filifili le au mautofi o le vasega, e pei o se peresitene, sui peresitene, ma se failautusi. E muamua ona faafesootai e le faiaoga matua o tamaiti a’oga taitasi ma le epikopo mo se faamaoniga. O le au mautofi o vasega e le tuuina atu mo le lagolagoina pe vaetofiaina foi. E mafai ona latou fesoasoani i le faiaoga i tiute masani i le potuaoga ma faamalosiau atu i isi tamaiti aoga e o mai ma auai ai.

E le tatau i faiaoga seminare ona faia ni gaoioiga i fafo atu o le taimi o vasega masani pe ō ese ai mai le potuaoga. O tuusaunoaga e manaomia ai le faamaoniga mai taitai i le lotoifale.

15.1.4

Togi ma Faauuga

E mafai e tamaiti a’oga seminare ona a’oa’o ma le mataalia atili ma faalolotoina lo latou liua pe afai latou te auai e le aunoa i le vasega, auai i fetufaaiga, ma suesue i tusitusiga paia i fafo atu o le vasega. A latou faia nei mea, latou te mauaina foi se togi o le seminare i tausaga taitasi ma mafai ona faauu mai le seminare.

O nisi tamaiti a’oga atonu e faigata ona maua se togi o le seminare ona o luitau tau le faitautusi po o isi mafuaaga. E mafai e le faiaoga ona fetuunai mea e manaomia i manaoga o nei tamaiti a’oga. E mafai e le sui o le S&I ona talosagaina ni fetuunaiga mo se polokalama atoa. O nei fetuunaiga e manaomia ai le faamaoniga mai le pulega o le S&I.

Ina ia faauu mai le seminare, e tatau i se tamaitiiti a’oga ona saili ia maua le fa tausaga o togi ma maua se faamaoniga faale-ekalesia mai se tasi o le au epikopo. O lea faamaoniga e faamaonia ai ua agavaa se tamaitiiti a’oga ma ua tautino e ola i tulaga faatonuina o le talalelei.

O tausaga taitasi e faia ai e le siteki se faauuga o le seminare. E fuafuaina lea gaoioiga e se tasi o le au peresitene o le siteki po o se fautua maualuga. E mafai ona fesoasoani i ai le sui o le S&I. Mo nisi faamatalaga, tagai i le O Se Taiala mo le Faatinoga o Faauuga o le Seminare ma le Inisitituti.

15.1.5

Seminare i le Taimi o le A’oga

I nisi eria i le Iunaite Setete ma Kanata, e faatagaina ai i tulafaono o le lotoifale ia tamaiti aoga e tuua le aoga ae ō i le seminare i le taimi o a’oga. O le Fono Faatonu o A‘oga a le Ekalesia e faamaoniaina po o fea e faaaoga ai lenei ituaiga o seminare. Mo nisi faamatalaga, tagai i le Seminare i Taimi o A’oga i luga o le ChurchofJesusChrist.org.

15.2

Inisitituti

O le inisitituti e saunia ai vasega mo le suesueina o le talalelei i se aso o le vaiaso, lea e faamalosia ai le faatuatua ma molimau ia Iesu Keriso ma Lana talalelei toefuataiina. E faamautinoa e taitai o le siteki o loo avanoa le inisitituti mo talavou nofofua matutua uma ua tai 18–35 tausaga.

E fautuaina talavou matutua nofofua uma e auai i vasega inisitituti, pe o aooga pe leai foi. E mafai ona latou auai i vasega inisitituti e faavae i le lotoa (pe afai o maua). E mafai foi ona latou auai i vasega inisitituti i le initoneti po o vasega e faavae i le siteki.

Tagai i le Inisitituti a le Siteki mo taiala i mea nei:

• Faavaeina ma le faagaoioia o vasega inisitituti e faavae i siteki

• Fuafuaga mo fale ma fanua

• Valaauina o faiaoga

• Aloaiaina o ausiaga a tamaiti aoga

15.2.1

O Isi Vasega Faalelotu

Atonu e mananao au peresitene o siteki e faia vasega faalelotu mo tagata matutua ua ta’i 36 tausaga ma luga atu. O nei vasega e le o se galuega a le S&I ma e le faaigoaina o ni vasega inisitituti. Peitai, e mafai ona faaaoga anomea o mataupu a’oa’oina a le inisitituti mo i latou.

15.3

Aoga a le Ekalesia ma le Ofisa o Aoga a le Ekalesia

Mo faamatalaga e uiga i a’oga tulagalua ma a’oga maualuga a le Ekalesia, BYU–Pathway Worldwide, ma faalapotopotoga o a’oga maualuluga atu, tagai i le CES.ChurchofJesusChrist.org. O faamatalaga e uiga i faamaoniga a taitai faale-ekalesia ina ia auai ai taimaiti aoga i nei a’oga o loo maua atu ai foi iina.

Ma le isi, o faamatalaga e uiga i faamaoniga faalegaluega mai taitai faalelotu e ala i le Ofisa o le Faatagaga Faalelotu a le Ofisa o Aoga a le Ekalesia e mafai ona maua i le help.ChurchofJesusChrist.org.