15.

Ha’api’ira’a ’evanelia Séminaire ’e te Institut

15.0

’Ōmuara’a

E tauturu te ha’api’ira’a ’evanelia Séminaire ’e te Institut (S&I) i te mau metua ’e i te feiā fa’atere o te ’Ēkālesia i roto i te tauturura’a i te feiā ’āpī ’e i te feiā ’āpī pa’ari ’ia fa’arahi i tō rātou fa’aro’o ia Iesu Mesia ’e i tāna ’evanelia i fa’aho’ihia mai. E ravehia te reira nā roto i te pāturura’a i te tuatāpapara’a i te pāpa’ira’a mo’a fa’atumuhia i ni’a i te ’utuāfare ’e te mau parau a te mau peropheta ora ’e te tahi atu feiā fa’atere o te ’Ēkālesia.

E fa’aterehia te mau fa’anahora’a o te Séminaire ’e te Institut ’ia au i te mau fa’aturera’a tei ha’amauhia ’e te piha fa’aterera’a o te ha’api’ira’a a te ’Ēkālesia, tei arata’ihia e te peresideni o te ’Ēkālesia. Nā te mau peresidenira’a titi e fa’a’ohipa i teie mau fa’anahora’a i roto i te titi ’e i te mau pāroita. E hi’opo’a tāmau te feiā fa’atere o te titi ’e o te pāroita i te taera’a mai o tā rātou feiā ’āpī i roto i te mau fa’anahora’a o te Séminaire ’e te Institut.

E fa’ata’ahia hō’ē ti’a nō te S&I nō te titi tāta’itahi nō te tauturu i te feiā fa’atere ’ia fa’a’ohipa i te mau fa’anahora’a o te S&I.

15.1

Séminaire

Te séminaire ’o te hō’ē ïa fa’anahora’a e maha matahiti te roa, i reira te feiā ’āpī e tuatāpapa ai i te ’evanelia a Iesu Mesia mai tei ’itehia i roto i te mau pāpa’ira’a mo’a ’e i te mau ha’api’ira’a a te mau peropheta nō te mau mahana hope’a nei. Te ti’ara’a mau, e 14–18 matahiti tō te mau pīahi nō te séminaire

E fa’aitoito te ’episekōpora’a, te feiā fa’atere o te feiā ’āpī, ’e te mau peresidenira’a pupu autahu’ara’a ’e te mau piha te feiā ’āpī tāta’itahi ’ia haere tamau i te séminaire. E fa’aitoito te ’episekōpora’a i te mau metua ’ia tāpa’o i tā rātou mau tamari’i i te matahiti tāta’itahi hou te ha’amatara’a o te séminaire Nō te mau ha’amāramaramara’a hau atu, hi’o Seminary Registration i ni’a ChurchofJesusChrist.org.

15.1.1

Te mau ’orometua ha’api’i

E melo te mau ’orometua séminaire nō te Ēkālesia, e fa’aro’o ho’i tō rātou i te Fatu ia Iesu Mesia, ’e e ’itera’a pāpū tō rātou nō tāna ’evanelia i fa’aho’ihia mai. E mea ti’a ia rātou ’ia ora i te mau parau tumu tā rātou e ha’api’i ra ’e e rohi maita’i rātou ’e te feiā ’āpī. Nā te hō’ē melo nō te peresidenira’a titi e pi’i, e fa’ata’a, ’e e ha’amāuruuru i te mau ’orometua nō te séminaire o te titi. E paraparau ’oia nā mua i te ’episekōpo ’e i te ti’a nō te S&I. ’Ia oti te ta’ata i te pi’ihia ’e i te fa’ata’ahia, e ha’api’ipi’i ’e e pāturu te ti’a nō te S&I iāna.

Nō te pāruru i te mau ’orometua ’e te mau pīahi, e mea tano ’ia vai e piti ta’ata pa’ari i roto i te fare purera’a ’aore rā i te fare i reira e fa’aterehia ai te séminaire. E nehenehe e pi’i i te hō’ē ’orometua pupu, ’aore rā, hō’ē ta’ata pa’ari ha’apa’o ’ia tae ato’a mai. Te piti o te ta’ata pa’ari, o te hoa fa’aipoipo ānei o te ’orometua ha’api’i ’aore rā, te metua o te hō’ē melo nō te piha ha’api’ira’a. Hō’ē ā ’āpeni tōna ’e tō te ’orometua, ’aore rā, e ta’ata pa’ari fēti’i ’oia i te ’utuāfare o te ’orometua. ’Eiaha te ’orometua e fa’aea ’oia ana’e i roto i te hō’ē piha ha’api’ira’a, i te fare purera’a, ’aore rā, i roto i te pere’o’o ’e te hō’ē pīahi, mai te mea e ’ere te pīahi i te tamari’i nā te ’orometua.

15.1.2

Mau mā’itira’a nō te ha’api’ira’a

Mea maita’i roa atu mai te mea e nehenehe te mau pīahi e putuputu ’e te hō’ē ’orometua i te mahana tāta’itahi i roto i te hepetoma. Teie rā, e’ita paha te reira e nehenehe nō te mau fifi pārurura’a, te ātea o te terera’a, ’e te tahi atu mau fifi. Teie te mau mā’itira’a tā te feiā fa’atere nō te fenua iho e nehenehe e rave nō te fa’atupu i te séminaire.

Mā’itira’a	Rahira’a ha’api’ira’a tāhepetoma i roto i te piha ha’api’ira’a	Rahira’a ha’api’ira’a tāhepetoma i te fare ’aore rā nā ni’a i te natirara
Mā’itira’a A	Rahira’a ha’api’ira’a tāhepetoma i roto i te piha ha’api’ira’a 5 (50 minuti)	Rahira’a ha’api’ira’a tāhepetoma i te fare ’aore rā nā ni’a i te natirara ’Aore
Mā’itira’a B	Rahira’a ha’api’ira’a tāhepetoma i roto i te piha ha’api’ira’a 4 (60 minuti)	Rahira’a ha’api’ira’a tāhepetoma i te fare ’aore rā nā ni’a i te natirara ’Aore
Mā’itira’a C	Rahira’a ha’api’ira’a tāhepetoma i roto i te piha ha’api’ira’a 4 (50 minuti)	Rahira’a ha’api’ira’a tāhepetoma i te fare ’aore rā nā ni’a i te natirara 1
Mā’itira’a D	Rahira’a ha’api’ira’a tāhepetoma i roto i te piha ha’api’ira’a 3 (50 minuti)	Rahira’a ha’api’ira’a tāhepetoma i te fare ’aore rā nā ni’a i te natirara 2
Mā’itira’a E	Rahira’a ha’api’ira’a tāhepetoma i roto i te piha ha’api’ira’a 2 (90 minuti)	Rahira’a ha’api’ira’a tāhepetoma i te fare ’aore rā nā ni’a i te natirara 1
Mā’itira’a F	Rahira’a ha’api’ira’a tāhepetoma i roto i te piha ha’api’ira’a 2 (50 minuti)	Rahira’a ha’api’ira’a tāhepetoma i te fare ’aore rā nā ni’a i te natirara 3
Mā’itira’a G	Rahira’a ha’api’ira’a tāhepetoma i roto i te piha ha’api’ira’a 1 (50 minuti)	Rahira’a ha’api’ira’a tāhepetoma i te fare ’aore rā nā ni’a i te natirara 4

E paraparau te feiā fa’atere o te ’Ēkālesia i tō rātou ti’a ha’apa’o i te S&I nō te fa’aoti e aha te mā’itira’a :

• E tauturu maita’i a’e i te mau pīahi ’ia ha’api’i mai i te ’evanelia ’e ’ia tupu i te rahi i te pae vārua.

• E pāruru māite i te mau pīahi.

• ’Eiaha e fa’ateimaha faufa’a ’ore noa i te mau ’utuāfare.

Mai te mea e mea fifi ’ia putuputu ’e te ’orometua i roto i te hepetoma, e nehenehe e feruri e fa’a’ohipa i te mau rāve’a ’itenati nō te fa’atupu i te putuputura’a.

’Eiaha e fa’atupu i te mau piha ha’api’ira’a i te mahana sābati. E tītauhia te parau fa’ati’a nā te piha fa’aterera’a o te ha’api’ira’a a te ’Ēkālesia nō te mau fa’anahora’a ta’a ’ē.

15.1.3

Te mau fare, te mau tauiha’a ’e te mau mātēria

E ha’apāpū te feiā fa’atere o te titi ’e o te pāroita ē, e vata te mau vāhi mai te mau fare purera’a ’aore rā, te mau fare o te melo nō te mau piha séminaire. ’Eiaha e tārahu i te mau fare ’aore rā, te mau piha nō te mau piha séminaire. Mai te mea e putuputu te mau piha i roto i te hō’ē fare purera’a, e ti’a i te mau ’orometua ’ia fāri’i i te rāve’a nō te fa’a’ohipa i te mau tauiha’a i roto i te piha vaira’a buka.

Nā te ti’a ha’apa’o i te S&I e hōro’a i te mau mātēria nā te mau ’orometua ’e nā te mau pīahi nō te piha tāta’itahi. E hōpoi mai te mau pīahi i tā rātou iho mau pāpa’ira’a mo’a, tei nene’ihia ’aore rā, tei ni’a i te ’itenati.

15.1.4

Te feiā fa’atere o te piha ha’api’ira’a ’e te mau ’ohipa ri’i

E nehenehe te hō’ē ’orometua séminaire e mā’iti i te feiā fa’atere nō te piha ha’api’ira’a, mai te hō’ē peresideni, te mau mono peresideni, ’e hō’ē pāpa’i parau. E fārerei te ’orometua nā mua roa i te mau metua o te pīahi tāta’itahi ’e i te ’episekōpo nō te parau fa’ati’a. ’Aita te feiā fa’atere nō te piha ha’api’ira’a e pāturuhia ’aore rā, e fa’ata’ahia. E nehenehe rātou e tauturu i te ’orometua i roto i te mau ’ohipa mātarohia o te piha ha’api’ira’a, ’e e fa’aitoito i te tahi atu mau pīahi ’ia tae mai ’e ’ia ’āmui mai.

’Eiaha te mau ’orometua séminaire e fa’atupu i te mau ’ohipa ri’i i rāpae i te taime ha’api’ira’a ’aore rā, i te vāhi ta’a ’ē atu i te piha ha’api’ira’a. Mai te mea tē vai ra te tahi atu ravera’a ta’a ’ē, e tītauhia te parau fa’ati’a a te feiā fa’atere o te autahu’ara’a.

15.1.5

Te tai’o ’e te ha’afeti’ara’a

E nehenehe te mau pīahi nō te séminaire e ha’api’i maita’i atu ā, ’e e fa’ahōhonu i tō rātou fa’afāriura’a, mai te mea e haere tāmau rātou i roto i te piha ha’api’ira’a, e paraparau ’āmui atu, ’e e tuatāpapa i te mau pāpa’ira’a mo’a i rāpae i te piha ha’api’ira’a. ’A rave ai rātou i teie mau mea, e roa’a ato’a ia rātou te mau tai’o i te matahiti tāta’itahi, ’e e nehenehe rātou e ha’afeti’ahia nō te séminaire.

E riro te tahi mau pīahi i te fifi nō te roa’a te tai’o i te séminaire nō te mau tītaura’a o te tai’ora’a ’aore rā, nō te tahi mau tumu. E nehenehe te ’orometua e fa’atano i te mau tītaura’a ’ia au i te mau fifi o te mau pīahi. E nehenehe te ti’a nō te S&I e ani i te mau fa’atanora’a nō te hō’ē fa’anahora’a tā’āto’a. E tītauhia te parau fa’ati’a a te piha fa’atere o te S&I nō teie mau fa’atanora’a.

Nō te fāri’i i te ha’afeti’ara’a nō te séminaire, tītauhia i te hō’ē pīahi ’ia roa’a iāna e maha matahiti tai’o, ’e e fāri’i i te hō’ē fāri’ira’a a te feiā fa’atere nō te ’Ēkālesia mai roto mai i te hō’ē melo nō te ’episekōpora’a. Nā teie fāri’ira’a e hi’opo’a ē, e mea ti’amā teie pīahi, ’e ’ua fafau ’ia ora i te mau ture o te ’evanelia.

E fa’atupu te titi i te hō’ē ha’afeti’ara’a sémaire i te matahiti tāta’itahi. Nā te hō’ē melo nō te peresidenira’a titi ’aore rā, hō’ē melo ’āpo’ora’a teitei, e fa’anaho i teie ’ohipa. E nehenehe te ti’a nō te S&I e tauturu. Nō te mau ha’amāramaramara’a hau atu, hi’o ’A Guide tō Seminary and Institute Graduation Exercises.

15.1.6

Hora haerera’a i te séminaire

I roto i te tahi mau ārea i te fenua Marite ’e Canada, e fāri’i te mau ture nō te fenua iho i te mau pīahi ’ia fa’aru’e i te fare ha’api’ira’a ’e ’ia haere i te séminaire i roto i te mau hora ha’api’ira’a. E fāri’i te piha fa’aterera’a ha’api’ira’a o te ’Ēkālesia i teie huru séminaire. Nō te mau ha’amāramaramara’a hau atu nō ni’a i te Hora haerera’a te séminaire, hi’o Released-Time Seminary i ni’a ChurchofJesusChrist.org.

15.2

Institut

E hōro’a te Institut i te mau ha’api’ira’a ’evanelia i roto i te hepetoma, nō te ha’apūai i te fa’aro’o ’e te ’itera’a pāpū nō Iesu Mesia ’e tāna ’evanelia i fa’aho’ihia mai. E fa’aitoitohia te feiā ’āpī pa’ari ’ōtahi ato’a nō te matahiti 18-30 ’ia haere i mau piha ha’api’ira’a institut, noa atu te haere noa ra ā rātou i te ha’api’ira’a ’aore rā, ’aita.

’Aita e vai ra te mau piha ha’api’ira’a institut i te fare ha’api’ira’a tuatoru i roto i te mau fenua ato’a. Nō te reira, e nehenehe te mau peresideni titi e ha’amau i te mau piha ha’api’ira’a institut nā te titi iho. Nā te feiā fa’atere o te autahu’ara’a ’e te feiā rave ’ohipa nō te S&I e fa’anaho i te reira.

Te tahi atu mau arata’ira’a nō te ha’amau ’e nō te fa’atere i te mau piha institut i roto i te titi, te fa’anahora’a nō te mau fare, te pi’ira’a i te mau ’orometua, ’e te hi’opo’ara’a i te ’ohipa a te pīahi, e ’itehia te reira i ni’a Stake Institute i ni’a ChurchofJesusChrist.org.

15.2.1

Te tahi atu mau piha ha’api’ira’a ’evanelia

E nehenehe te mau peresidenira’a titi e hina’aro e hōro’a i te mau ha’api’ira’a ’evanelia nō te feiā pa’ari mai te 31 matahiti ’e hau atu. E ’ere teie mau piha ha’api’ira’a i te hō’ē tuha’a nā te S&I ’e ’aita te reira e parauhia e piha ha’api’ira’a institut. Terā rā, e nehenehe te mau mātēria ha’api’ira’a nō te institut, e fa’a’ohipahia nō te reira mau piha ha’api’ira’a.

15.3

Te mau fare ha’api’ira’a a te ’Ēkālesia

Nō te mau ha’amāramaramara’a nō ni’a i te mau fare ha’api’ira’a tuatahi ’e te tuarua, BYU-Pathway nā te ao ato’a nei, ’e te mau fa’anahora’a ha’api’ira’a teitei, hi’o CES.ChurchofJesusChrist.org ’Ua hōro’a-ato’a-hia i reira te mau ha’amāramaramara’a nō te fāri’ira’a te ’Ēkālesia nō te haere i roto i te reira mau fare ha’api’ira’a.