“18. Ko Hono Fakahoko ʻo e Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (2024).
“18. Ko Hono Fakahoko ʻo e Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Tohi Tuʻutuʻuni Fakakātoá.
18.
Ko Hono Fakahoko ʻo e Ngaahi Ouau mo e Ngaahi Tāpuaki ʻo e Lakanga Fakataulaʻeikí
18.0
Talateu
Ko e ngaahi ouaú mo e ngaahi tāpuakí ko ha ngaahi ngāue toputapu ia ʻoku fakahoko ʻi he mafai ʻo e lakanga fakataulaʻeikí ʻi he huafa ʻo Sīsū Kalaisí. Ko e taimi ʻoku fakahoko ai ʻe he kau maʻu lakanga fakataulaʻeikí ʻa e ngaahi ouaú mo e ngaahi tāpuakí, ʻoku nau muimui ai ʻi he sīpinga ʻa e Fakamoʻuí ʻi hono tāpuakiʻi ʻo e niʻihi kehé. ʻOku ʻomi ʻe he ngaahi ouau mo e ngaahi tāpuaki ʻo e lakanga fakataulaʻeikí ha faingamālie ki he mālohi ʻo e ʻOtuá (vakai, Tokāteline mo e Ngaahi Fuakava 84:20).
Ko e ngaahi ouaú mo e ngaahi tāpuakí kuo pau ke fakahoko ia ʻi he tui ki he Tamai Hēvaní mo Sīsū Kalaisi pea fakatatau ki he fakahinohino ʻa e Laumālie Māʻoniʻoní. ʻE fakapapauʻi ʻe he kau takí ʻoku fakahoko kinautolu ʻi he fakangofua totonu (ʻi he feituʻu ʻe lava aí), ʻaki e mafai lakanga fakataulaʻeiki totonu ʻoku fiemaʻú, ʻi he founga totonu, ʻe he kakai moʻui taau (vakai, 18.3).
Ke maʻu e ngaahi tuʻutuʻuni ʻo e ngaahi ouau mo e ngaahi tāpuaki lakanga fakataulaʻeikí, vakai, 38.2.
18.1
Ngaahi Ouau ʻo e Fakamoʻuí mo e Hākeakiʻí
ʻOku kau ʻi he lakanga fakataulaʻeikí ʻa e mafai ke fakahoko e ngaahi ouau ʻo e ongoongoleleí ʻoku fiemaʻu ki he fakamoʻuí mo e hakeakiʻí. ʻOku fakahoko ʻe he kakaí ha ngaahi fuakava toputapu mo e ʻOtuá ʻi heʻenau maʻu ʻa e ngaahi ouau ko ʻení. ʻOku hiki atu ʻi lalo ʻa e ngaahi ouau ʻo e fakamoʻuí mo e hakeakiʻí:
-
Papitaiso
-
Hilifakinimá mo e me‘afoaki ʻo e Laumālie Māʻoniʻoní
-
Foaki ʻo e Lakanga Taulaʻeiki Faka-Melekisētekí mo e fakanofo ki ha tuʻungá (ki he houʻeiki tangatá)
-
ʻEnitaumeni temipalé
-
Sila ʻi he temipalé
Ko e fakamatala ki hono fakahoko e ngaahi ouaú ni kiate kinautolu ʻoku faingataʻaʻia fakaeʻatamaí, vakai ki he ngaahi meʻa ko ʻení:
-
Ki he papitaisó mo e hilifakinimá (38.2.8.1)
-
Ki he fakanofo ki ha tuʻunga ‘i he Lakanga Taulaʻeiki Faka-Melekisētekí (38.2.9.7)
-
Ki he ʻenitaumeni fakatemipalé mo e silá (27.2.1.3 mo e 27.3.1.2)
Kapau na‘e mate ha fānau naʻe fā‘eleʻi ‘i he fuakavá ʻoku teʻeki ai taʻu 8, ʻoku ʻikai fiemaʻu pe fakahoko ha ngaahi ouau ia. Kapau naʻe ʻikai fanauʻi ʻa e fānaú ʻi he fuakavá, ko e ouau pē ʻokú ne fiemaʻú ko e sila ki he mātuʻá. Koe‘uhi ko e Fakalelei ʻa e Fakamoʻuí, ko e fānau kotoa pē ʻoku mate teʻeki ke nau taʻu 8 ʻoku “fakamo‘ui [kinautolu] ʻi he puleʻanga fakasilesitiale ‘o e langí” (Tokāteline mo e Ngaahi Fuakava 137: 10; vakai foki, Molonai 8:8–12).
18.2
Ngaahi Ouaú mo e Ngaahi Tāpuaki Kehé
ʻOku hanga ʻe ha ngaahi ouau mo ha ngaahi tāpuaki kehe ʻo ʻai ke lava ʻe he fānau ʻa e ʻOtuá ʻo maʻu ʻa Hono mālohí, fakamoʻuí, fakafiemālié, mo e fakahinohinó. ʻOku hiki atu ʻi lalo ʻa e ngaahi ouau mo e ngaahi tāpuaki ko ʻení:
-
Ko hono fakahingoa mo tāpuakiʻi ʻo e fānaú
-
Ko e sākalamēnití
-
Foaki ʻo e Lakanga Taulaʻeiki Faka-ʻĒloné mo e fakanofo ki ha tuʻungá (ki he kau talavoú mo e houʻeiki tangatá)
-
Ko hono vaheʻi ʻo e kāingalotú ke nau ngāue ʻi ha ngaahi uiuiʻí
-
Ko hono fakatapui ʻo e loló
-
Ko e faingāue ki he mahakí
-
Ngaahi tāpuaki ʻo e fakafiemālie mo e faleʻi, kau ai e ngaahi tāpuaki fakaetamaí
-
Ko hono fakatapui ʻo e ngaahi ʻapi nofoʻangá
-
Ko hono tāpuakiʻi ʻo e faʻitoká
-
Ngaahi tāpuaki fakapēteliake ʻe ha pēteliake kuo ʻosi fakanofo
18.3
Ko e Kau ʻi ha Ouau pe Tāpuakí
Ko kinautolu ʻoku nau fakahoko pe kau ʻi ha ouau pe tāpuaki kuo pau ke nau maʻu ʻa e mafai lakanga fakataulaʻeiki totonú mo moʻui taau. Ko e angamahení, ko e tuʻunga moʻui tāú ʻoku tatau mo ia ʻoku fekauʻaki mo e maʻu ha lekomeni temipalé. Ka neongo ia, fakatatau mo e fakahinohino ʻa e Laumālié mo e ngaahi fakahinohino ʻi he vahe ko ʻení, ʻe lava ke fakangofua ʻe he kau pīsopé mo e kau palesiteni fakasiteikí ʻa e ngaahi tamai mo e ngaahi husepāniti ʻoku nau maʻu e tuʻunga lakanga fakataulaʻeiki ʻoku fiemaʻú ke nau fakahoko pe kau ʻi ha ngaahi ouau mo ha ngaahi tāpuaki ʻe niʻihi neongo kapau ʻoku ʻikai ke nau taau kakato mo e temipalé. ʻOku ʻikai totonu ke kau ha taha maʻu lakanga fakataulaʻeiki ʻoku ʻi ai haʻane ngaahi angahala mamafa kuo teʻeki fakaleleiʻi.
Ko e angamahení, ko e kau taki lakanga fakataulaʻeikí pē mo ha kau maʻu lakanga fakataulaʻeiki kehe ʻoku nau hoko ko ha kau mēmipa ofi ʻo e fāmilí mo ha ngaahi kaungāmeʻa, ʻe kau ʻi he ouaú pe tāpuakí.
ʻE fealēleaʻaki fakataha ʻa e tokotaha ʻokú ne maʻu ʻa e ouaú, kau mēmipa ʻo e fāmilí, mo e kau taki lakanga fakataulaʻeikí ke fakafuofuaʻi pe ko hai ʻe kaú pea ko e toko fiha ʻe kau aí. ʻOku totonu ke fakahoko ʻa e fili ko ʻení ʻi ha taimi lelei kimuʻa pea toki fakahoko ʻa e ouaú.
Ko e taimi ko ē ʻoku toko taha pe toko ua ai pē ʻa e ongo maʻu lakanga fakataulaʻeikí, te na takitaha hili fakamaʻamaʻa fakatouʻosi hona ongo nimá ki he ʻulu ʻo e tokotahá. Ka tokolahi ange, te nau tuʻu takatakai ʻi he tokotaha te ne maʻu e ouaú pe tāpuakí. Te nau takitaha hili fakamaʻamaʻa honau nima toʻomataʻú ʻi he ʻulu ʻo e tokotahá (pe hapai hake ʻa e pēpeé) pea ʻai honau nima toʻohemá ki he funga uma ʻo e tangata ʻi toʻohemá. ʻE lea leva ha tokotaha ʻo fakahoko ʻa e ouaú pe foaki ʻa e tāpuakí.
Ko hono fakahoko pe maʻu e ngaahi ouau mo e ngaahi tāpuaki ʻe niʻihi, ʻe fiemaʻu ki ai ha fakangofua mei he maʻu mafai pule ʻokú ne maʻu e ngaahi kī totonu o e lakanga fakataulaʻeikí (vakai, 3.4.1). Ka fiemaʻu, ʻe lava ke foaki ha fakangofua ʻe ha tokoni kuó ne fakamafaiʻi. Vakai ki he saati ko ʻení. Ko e fakamatala ki he kau palesiteni fakasiteikí ʻoku toe ʻuhinga pē ia ki he kau palesiteni fakamisioná. Ko e fakamatala ki he kau pīsopé ʻoku toe ʻuhinga pē ia ki he kau palesiteni fakakoló.
Ko hai ʻa e Kau Taki ʻOku Nau Maʻu ʻa e Ngaahi Kī ke Foaki ha Ngofua ke Fakahoko pe Maʻu e Ngaahi Ouau ʻo e Fakamoʻuí mo e Hakeakiʻí?
|
Ouaú |
Taha ʻOkú Ne Maʻu ʻa e Ngaahi Kií |
|---|---|
Ouaú Papitaisó | Taha ʻOkú Ne Maʻu ʻa e Ngaahi Kií Pisopé (ki he fānau taʻu 8 mo e kau mēmipa ʻo e lekōtí kuo taʻu 9 mo motuʻa ange naʻe toloi honau papitaisó koeʻuhí ko ha faingataʻaʻia fakaeʻatamai) Palesiteni fakamisioná (ki he kau papi uluí) |
Ouaú Hilifakinimá mo e me‘afoaki ʻo e Laumālie Māʻoniʻoní | Taha ʻOkú Ne Maʻu ʻa e Ngaahi Kií Pisopé (ki he fānau taʻu 8 mo e kau mēmipa ʻo e lekōtí kuo taʻu 9 mo motuʻa ange naʻe toloi honau papitaisó koeʻuhí ko ha faingataʻaʻia fakaeʻatamai) Palesiteni fakamisioná (ki he kau papi uluí) |
Ouaú Foaki ʻo e Lakanga Taulaʻeiki Faka-Melekisētekí mo e fakanofo ki ha tuʻungá (houʻeiki tangatá) | Taha ʻOkú Ne Maʻu ʻa e Ngaahi Kií Palesiteni fakasiteikí |
Ouaú ʻEnitaumeni temipalé | Taha ʻOkú Ne Maʻu ʻa e Ngaahi Kií Pīsopé mo e palesiteni fakasiteikí |
Ouaú Sila ʻi he temipalé | Taha ʻOkú Ne Maʻu ʻa e Ngaahi Kií Pīsopé mo e palesiteni fakasiteikí |
Ko Hai ʻa e Kau Taki ʻOku Nau Maʻu e Ngaahi Kī ke Foaki ha Ngofua ke Fakahoko pe Maʻu ha Ngaahi Ouau mo e Ngaahi Tāpuaki Kehé?
|
Ouau pe Tāpuaki |
Taha ʻOkú Ne Maʻu ʻa e Ngaahi Kií |
|---|---|
Ouau pe Tāpuaki Ko hono fakahingoa mo tāpuakiʻi ʻo e fānaú | Taha ʻOkú Ne Maʻu ʻa e Ngaahi Kií Pīsope |
Ouau pe Tāpuaki Ko e sākalamēnití | Taha ʻOkú Ne Maʻu ʻa e Ngaahi Kií Pīsope |
Ouau pe Tāpuaki Foaki ʻo e Lakanga Taulaʻeiki Faka-ʻĒloné mo e fakanofo ki ha tuʻunga (ki he kau talavoú mo e houʻeiki tangatá) | Taha ʻOkú Ne Maʻu ʻa e Ngaahi Kií Pīsope |
Ouau pe Tāpuaki Ko hono vaheʻi ʻo e kāingalotú ke nau ngāue ʻi ha ngaahi uiuiʻí | Taha ʻOkú Ne Maʻu ʻa e Ngaahi Kií Vakai, 30.8 |
Ouau pe Tāpuaki Ko hono fakatapui ʻo e loló | Taha ʻOkú Ne Maʻu ʻa e Ngaahi Kií ʻOku ʻikai fiemaʻu ha fakangofua |
Ouau pe Tāpuaki Ko e faingāue ki he mahakí | Taha ʻOkú Ne Maʻu ʻa e Ngaahi Kií ʻOku ʻikai fiemaʻu ha fakangofua |
Ouau pe Tāpuaki Ngaahi tāpuaki ʻo e fakafiemālie mo e faleʻi, kau ai e ngaahi tāpuaki fakaetamaí | Taha ʻOkú Ne Maʻu ʻa e Ngaahi Kií ʻOku ʻikai fiemaʻu ha fakangofua |
Ouau pe Tāpuaki Ko e fakatapui ʻo e ngaahi ʻapi nofoʻangá | Taha ʻOkú Ne Maʻu ʻa e Ngaahi Kií ʻOku ʻikai fiemaʻu ha fakangofua |
Ouau pe Tāpuaki Ko hono tāpuakiʻi ʻo e faʻitoká | Taha ʻOkú Ne Maʻu ʻa e Ngaahi Kií Taki lakanga fakataulaʻeiki ʻokú ne tokangaʻi ʻa e ouaú |
Ouau pe Tāpuaki Ngaahi tāpuaki fakapēteliaké | Taha ʻOkú Ne Maʻu ʻa e Ngaahi Kií Pīsope |
18.4
Ngaahi Ouau ki he Fānau Teʻeki Taʻu Fakalaó
Ko e ngaahi fakahinohino ki he maʻu ʻo ha fakangofua mei he ngaahi mātuʻá pe tauhi fānaú ki ha fānau ʻoku ʻikai taʻu fakalao ke ne maʻu ʻa e ngaahi ouau mo e ngaahi tāpuaki ko ʻení ʻoku ʻoatu ia ʻi he ngaahi konga ʻoku hiki atu ʻi laló:
-
Ki he papitaisó mo e hilifakinimá: 38.2.8.2
-
Ki he fakanofo ki ha tu‘unga ʻi he lakanga fakataula‘eikí: 38.2.9.2
Ki ha ngaahi fehuʻi fekauʻaki mo e ngaahi totonu fakalao ʻa e ngaahi mātuʻá pe kau tauhí, ʻe kumi faleʻi fakalao ʻa e pīsopé pe palesiteni fakasiteikí ki he ʻŌfisi Faleʻi Fakalūkufua ʻo e Siasí pe ʻōfisi fakaʻēliá (vakai, 38.8.23).
18.5
Ngaahi Ouau ne Fakahoko ki ha (pea) ʻe ha Kakai ʻOku Faingataʻaʻia Fakatuʻasino
18.6
Ko Hono Fakahingoa mo e Tāpuakiʻi ʻo e Fānaú
“Ko e kāingalotu kotoa pē ʻo e siasi ʻo Kalaisí ʻoku ʻi ai haʻane fānau ʻoku totonu ke ne ʻomi ʻa kinautolu ki he kaumātuʻá ʻi he ʻao ʻo e siasí, ʻa ia te nau hilifaki honau nimá kiate kinautolu ʻi he huafa ʻo Sīsū Kalaisí, ʻo tāpuakiʻi ʻa kinautolu ʻi hono huafá” (Tokāteline mo e Ngaahi Fuakava 20:70).
ʻOku angamaheni ke fakahingoa mo tāpuakiʻi ʻa e fānaú he lolotonga ʻo e houalotu ʻaukaí mo e fakamoʻoní, ʻi he uooti ʻoku nofo ai ʻenau ongomātuʻá. ʻOku moʻoni ʻeni ʻo tatau ai pē pe kuo ʻosi mali e ongomātuʻa ʻa e fānaú. Kapau ʻoku ʻikai nofo fakataha ʻa e ongomātuʻá, ʻoku meimei ke faʻa fakahoko ʻa e ouaú ʻi he uooti ʻoku lahi taha ke nofo ai ʻa e fānaú.
Ko e ngaahi fakaʻatā ki he taimi mo e feituʻu ʻe tāpuakiʻi ai ʻa e kiʻi pēpeé kuo pau ke toki fakangofua ia mei he pīsopé. ʻE lava ke kau ʻi he ngaahi fakaʻataá ha ngaahi tāpuaki ʻoku ʻikai fai ʻi he Sāpate ʻaukaí, tautautefito ʻi he ngaahi uooti ʻoku tokolahi ai ha ngaahi pēpē foʻou, mo e ngaahi tāpuaki ʻi ha uooti kehe ʻoku nofo ai e ongo kui ʻa e kiʻi pēpeé pe nofo ai ha kau mēmipa tokolahi ʻo e fāmilí. ʻE toe lava foki ke fakamafaiʻi ʻe he pīsopé ʻa e kau maʻu Lakanga Taulaʻeiki Faka-Melekisētekí ke nau tāpuakiʻi ʻa e pēpeé ʻi ʻapi. ʻE tokangaʻi ia ʻe ha mēmipa ʻo e kau pīsopelikí.
Ki ha fakamatala fekauʻaki mo hono fakahingoa mo tāpuakiʻi ʻo e fānaú ʻi ha ngaahi tūkunga makehe, vakai, 38.2.7.
18.6.1
Tokotaha ʻOkú Ne Fai ʻa e Tāpuakí
Ko e ouau ʻo e fakahingoa mo e tāpuakiʻi ʻo ha pēpeé ʻoku fakahoko ia ʻe ha kau maʻu Lakanga Taulaʻeiki Faka-Melekisēteki, ʻo fakatatau mo e Tokāteline mo e Ngaahi Fuakava 20:70. ʻE fakahā ʻeni ʻe he kau taki lakanga fakataulaʻeikí ki he kāingalotú kimuʻa pea toki fakahingoa mo tāpuakiʻi ʻenau fānaú. ʻOku totonu ke fai ʻe he kau takí ʻa e meʻa kotoa te nau lavá ke ʻoua naʻa fakamaaʻi pe fakatupu mamahi ki he fakafoʻituituí pe ngaahi fāmilí.
Ko ha taha pe fāmili ʻoku loto ke fakahingoa pe tāpuakiʻi haʻane fānau, te ne fakafekauʻaki ʻa e ouaú mo e pīsopé. ʻOkú ne maʻu e ngaahi kī ʻo e lakanga fakataulaʻeikí ke fakahingoa mo tāpuakiʻi ʻa e fānaú ʻi he uōtí.
ʻE lava ke fakangofua ʻe he pīsopé ha tamai ʻokú ne maʻu e Lakanga Taulaʻeiki Faka-Melekisētekí ke ne fakahingoa mo tāpuakiʻi haʻane fānau ʻo tatau ai pē kapau ʻoku ʻikai taau kakato mo e temipalé (vakai, 18.3). ʻE poupouʻi ʻe he kau pīsopé ʻa e ngaahi tamaí ke nau teuteu ke tāpuakiʻi ʻenau fānaú.
Ke lea ʻo fakahoko e tāpuakiʻi ha fānau, kuo pau ke fakahaaʻi ʻe ha taha ʻoku mavahe mei hono uooti totonú haʻane lekomeni temipale kei ʻaonga ki he taki maʻu mafai pulé. Pe te ne fakahā ha Fakaongoongolelei ke Fakahoko ha Ouau kuo ʻosi fakamoʻoni ai ha mēmipa ʻo ʻene kau pīsopelikí.
18.6.2
Ngaahi Fakahinohino
Fakatatau mo e fakahinohino ʻa e kau pīsopelikí, ʻe tuʻu takatakai ʻa e kau maʻu Lakanga Taulaʻeiki Faka-Melekisētekí ke fakahingoa mo tāpuakiʻi ha fānau. Te nau hapai hake ha pēpē ʻaki honau nimá, pe hilifaki fakamaʻamaʻa honau nimá he ʻulu ʻo ha fānau ʻoku lalahi ange. Ko e tokotaha te ne fai e leá:
-
Te ne fakataufolofola ki he Tamai Hēvaní ʻo hangē ko ia ʻi ha lotú.
-
Te ne fakahaaʻi ʻoku fakahoko ʻa e tāpuakí ʻi he mafai ʻo e Lakanga Taulaʻeiki Faka-Melekisētekí.
-
Foaki ki he fānaú ha hingoa.
-
Lea ki he fānaú.
-
Foaki ha tāpuaki ki he fānaú ʻo fakatatau mo e tataki ʻa e Laumālié.
-
Fakaʻosi ʻi he huafa ʻo Sīsū Kalaisí.
18.6.3
Foomu Lekooti ʻo e Fānaú mo e Tohi Fakamoʻoni ʻo e Tāpuakí
Kimuʻa pea tāpuakiʻi ha fānau, ʻe fakaʻaongaʻi ʻe ha kalake ʻa e Maʻuʻanga Tokoni ki he Takí mo e Kalaké (MTTK) ke teuteu ha Foomu Lekooti ʻo e Fānaú. Ka hili e tāpuakí, te ne faʻu ha lekooti mēmipasipi ʻi he polokalama ko iá pea teuteu ha Tohi Fakamoʻoni Tāpuaki. ʻOku fakamoʻoni ʻi he tohi fakamoʻoni ko ʻení ʻa e pīsopé pea ʻoku foaki ia ki he ongomātuʻa pe tauhi ʻo e fānaú.
ʻOku totonu ke tatau ʻa e hingoa ʻi he lekooti mēmipasipí mo e tohi fakamoʻoní pea mo e tohitaʻú, lesisita fāʻeleʻi fakapuleʻangá, pe hingoa fakalao lolotongá.
18.7
Papitaisó
ʻOku fiemaʻu ʻa e papitaiso fakauku ʻi he vaí ʻe ha taha ʻokú ne maʻu ʻa e mafaí, ke hoko ha taha ko ha mēmipa ʻo e Siasí mo maʻu ʻa e Laumālie Māʻoniʻoní. Kuo pau ke muimui ʻa e taha kotoa ʻoku feinga ki he hakeakiʻí ʻi he sīpinga ʻa e Fakamoʻuí, ʻaki haʻane maʻu ʻa e ngaahi ouau ko ʻení. (Vakai, Mātiu 3:13–17; Sione 3:3–7; Ngāue 2:37–38; 2 Nīfai 31:5–21.)
Ki ha fakamatala fekauʻaki mo e papitaisó ʻi ha ngaahi tūkunga makehé, vakai, 38.2.8.
18.7.1
Fakangofua ki ha Tokotaha ke Papitaiso mo Hilifakinima
18.7.1.1
Fānau ko e Mēmipa ʻo e Lekōtí
Ko e pīsopé ʻokú ne maʻu ʻa e ngaahi kī lakanga fakataulaʻeiki ki hono papitaiso e kau mēmipa taʻu 8 ʻo e lekōtí ʻi ha uooti. ʻOku totonu ke papitaiso mo hilifakinima ʻa e fānau ko ʻení ʻi he hokosia pe ʻosi pē hokosia honau taʻu 8, ʻi he fakapotopoto tahá (vakai, Tokāteline mo e Ngaahi Fuakava 68:27). Ko e fānau ʻeni kuo ʻosi ʻi ai honau lekooti mēmipasipi ʻi he Siasí (vakai, 33.6.2). Ko e taimi te nau taʻu 8 aí, ʻe fakapapauʻi ʻe he pīsiopé ʻoku nau maʻu e faingamālie kotoa ke nau tali e ongoongoleleí pea papitaiso mo hilifakinima.
Ko e fakamatala fekauʻaki mo e papitaiso mo e hilifakinima ʻo ha taha ʻoku faingataʻaʻia fakaeʻatamaí, vakai, 38.2.4 mo e 38.2.8.1.
ʻE ʻinitaviu ʻe he pīsopé pe ko hano tokoni ne vahe ki ai, ʻa e fānau ʻo e lekōtí ki he papitaisó mo e hilifakinimá. ʻOku ʻoatu ʻa e ngaahi fakahinohinó ʻi he 31.2.3.1.
Ki he fakahinohino ki hono fakafonu ʻo e Lekooti Papitaisó mo e Hilifakinimá, vakai ki he 18.8.3.
ʻE tokanga makehe ʻa e kau pīsopé ki he fānau taʻu 7 ʻi he uōtí, ʻo fakapapauʻi ʻoku tokoni ʻenau ngaahi mātuʻá, kau taki Palaimelí mo e kau faiakó, pea mo kinautolu ʻoku ngāue fakaetauhi ki honau ngaahi fāmilí, ke teuteu kinautolu ki he papitaisó mo e hilifakinima. ʻE poupouʻi foki ʻe he kau taki ʻo e kōlomu ʻo e kaumātuʻá mo e Fineʻofá ʻa e ngaahi mātuʻá ke teuteu ʻenau fānaú ki he ongo ouaú ni.
18.7.1.2
Kau Uluí
ʻOku maʻu ʻe he palesiteni fakamisioná ʻa e ngaahi kī lakanga fakataulaʻeiki ki hono papitaiso ʻo e kau ului ʻi ha misiona. ʻI he ʻuhingá ni, ʻe ʻinitaviu leva ʻe he kau faifekau taimi kakató ʻa e kau uluí ki he papitaisó mo e hilifakinimá. Ko e ngaahi fakahinohinó ʻoku ʻi he 31.2.3.2.
Ki he fakamatala ki hono fakafonu ʻo e Lekooti Papitaisó mo e Hilifakinimá, vakai ki he 18.8.3.
18.7.1.3
Fānau ʻOku Teʻeki Mali ʻEnau Ongomātuʻá (Kau ai e Veté)
Ki he ngaahi fakahinohino fekauʻaki mo e papitaiso mo e hilifakinima ʻo e fānau teʻeki taʻu fakalaó, vakai, 38.2.8.2.
18.7.2
Ouau Papitaisó
ʻOku totonu ke faingofua, nounou, pea mo langaki fakalaumālie e ouau papitaisó. ʻE lava ke kau ai e ngaahi meʻa ko ʻení:
-
Fasi talitali
-
Ko ha lea talitali nounou ʻe he tangata ʻokú ne tataki e ouaú
-
Himi kamata mo e fua lotu
-
Kiʻi pōpoaki nounou ʻe taha pe ua ʻi ha ongo kaveinga ʻo e ongoongoleleí, hangē ko e papitaisó mo e meʻafoaki ʻo e Laumālie Māʻoniʻoní
-
Hiva fili
-
Papitaiso
-
Taimi ʻapasia he lolotonga e fetongi ʻa kinautolu ne kau ʻi he papitaisó ki honau vala mōmoá (ʻe lava ke tā pe hivaʻi ha ngaahi himi pe hiva ʻa e Palaimelí he lolotonga ʻa e taimi ko ʻení)
-
Ko e hilifakinima ʻo e fānau taʻu 8 ko e kau mēmipa ʻo e lekōtí; hilifakinima ʻo e kau uluí (vakai, 18.8)
-
Fai ʻo ha fakamoʻoni ʻe he kau ului foʻoú, kapau ʻe fiemaʻu
-
Himi tuku mo e lotu tuku
-
Fasi mātuku
ʻI he taimi ʻoku teuteu ai ha fānau ʻo e lekōtí ke papitaisó, ʻe talanoa ha mēmipa ʻo e kau pīsopelikí mo e kau palesitenisī ʻo e Palaimelí pea mo e fāmilí ke palani mo fakataimi-tēpileʻi ʻa e ouau papitaisó. ʻE tataki ʻa e ouaú ʻe ha mēmipa ʻo e kau pīsopelikí. Kapau ʻe tokolahi ange he toko tahá ʻa e fānau ʻe papitaiso ʻi he māhina tatau pē, ʻe lava ke papitaiso fakataha pē kinautolu ʻi he ʻaho tatau.
ʻI he ngaahi siteiki ʻoku tokolahi ai ʻa e fānau ʻo e lekōtí, ʻe lava ke fakahoko fakataha ʻa e ouau papitaiso ʻo ha fānau mei ha ngaahi uooti kehekehe. ʻI he ngaahi tūkunga peheé, ʻe talanoa ha mēmipa ʻo e kau palesitenisī fakasiteikí pe kau palesitenisī fakasiteiki ʻo e Palaimelí pe ha aleaʻanga māʻolunga mo e ngaahi fāmili ʻo e fānau ʻoku papitaisó ke palani mo fakataimi-tēpileʻi ʻa e ouau papitaisó. ʻE tataki ʻe ha mēmipa ʻo e kau palesitenisī fakasiteikí pe ʻe ha aleaʻanga māʻolunga ne vahe ki ai, ʻa e ouaú. ʻE lava ke fakataha mavahevahe pē ʻa e ngaahi uōtí pe ngaahi fāmilí ʻi ha konga ʻo e ouaú koeʻuhí ke lava ʻo fakalāngilangiʻi fakafoʻituitui ʻa e fānaú takitaha. Hangē ko ʻení, ʻe lava ke fakahoko ʻeni ʻi he ouau ʻo e papitaisó, hilifakinimá, pe ko ha lea ʻa ha mēmipa ʻo e uōtí pe fāmilí. ʻE tataki ʻe ha mēmipa ʻo e kau pīsopelikí ʻa e konga ko ia ʻo e ouaú.
ʻOku totonu ke fakataimi-tēpileʻi e ouau papitaiso ʻo e kau papi uluí ʻi heʻenau lavaʻi pē ʻa e ngaahi fiemaʻu ʻi he 31.2.3.2. ʻOku ʻikai totonu ke toloi ha papitaiso ʻo ha mēmipa he fāmilí kae ʻoua kuo lava ʻe ha tamai ʻo maʻu e lakanga fakataulaʻeikí mo fakahoko ʻa e papitaisó.
Fakatatau mo e fakahinohino ʻa e kau pīsopelikí, ʻe hanga ʻe he taki faifekau fakauōtí (kapau kuo ʻosi ui) pe ʻe ha mēmipa ʻo e kau palesitenisī ʻo e kōlomu ʻo e kaumātuʻá ʻokú ne tokangaʻi e ngāue fakafaifekau ʻi he uōtí, ʻo palani mo tataki e ngaahi ouau papitaiso ki he kau uluí. Te ne palani foki e hilifakinima ʻo e kau uluí tukukehe ka hilifakinima kinautolu ʻi he houalotu sākalamēnití. Te ne fakafekauʻaki ia mo e kau faifekau taimi kakató.
18.7.3
Tokotaha ʻOkú ne Fakahoko ʻa e Ouaú
ʻOku fakahoko ʻa e ouau ʻo e papitaisó ʻe ha taulaʻeiki pe taha maʻu Lakanga Taulaʻeiki Faka-Melekisēteki. Ko e tokotaha te ne fakahoko ha papitaiso, kuo pau ke fakangofua ia ʻe he pīsopé (pe ʻe he palesiteni fakamisioná kapau ko ha faifekau taimi kakato ʻokú ne fakahoko ʻa e papitaisó).
ʻE lava ke fakangofua ʻe ha pīsope ha tamai ʻoku hoko ko ha taulaʻeiki pe maʻu Lakanga Taulaʻeiki Faka-Melekisēteki ke ne papitaiso haʻane fānau ʻo tatau ai pē kapau ʻoku ʻikai taau kakato ʻa e tamaí mo e temipalé (vakai, 18.3). ʻE poupouʻi ʻe he kau pīsopé ʻa e ngaahi tamaí ke nau teuteu ke papitaiso ʻa ʻenau fānaú.
Kuo pau ke fakahaaʻi ʻe ha taha ʻoku mavahe mei hono uōtí haʻane lekomeni temipale ʻoku kei ʻaongá ki he taki maʻu mafai pulé, ka ne toki fakahoko ha papitaiso. Pe te ne fakahā ha Lekomeni ke Fakahoko ha Ouau kuo ʻosi fakamoʻoni ai ha mēmipa ʻo ʻene kau pīsopelikí.
18.7.4
Feituʻu ke Fakahoko ai ʻa e Ouaú
ʻOku totonu ke fakahoko e papitaisó ʻi ha faiʻanga papitaiso kapau ʻoku maʻu. Kapau ʻoku ʻikai ke ʻi ai ha faiʻanga papitaiso, ʻe lava ke fakaʻaongaʻi ha vai ʻoku malú. ʻOku totonu ke lahi feʻunga ia ke tuʻu fakatouʻosi ai e taha ʻokú ne fakahoko e ouaú mo e taha ʻoku papitaisó. ʻOku ʻikai fakatapui e vai ki he papitaisó.
Kapau ʻoku fakaʻaongaʻi ha faiʻanga papitaiso, ʻe fakataimi-tēpileʻi ia ʻo fakafou ʻi ha mēmipa ne vahe ki ai, ʻi he uooti ʻo e pīsope fakafofongá.
Kuo pau ke ʻi ai ha taha lahi ʻoku tokangá ʻi he lolotonga hono fakafonú pea nofo ai kae ʻoua kuo fakatafe ki tuʻa, fakamaʻa, pea mo malu. ʻOku totonu ke fakatafe ki tuʻa ʻa e vaí ʻi he ʻosi pē ʻa e ouau papitaiso takitaha. ʻOku totonu ke lokaʻi ʻa e ʻū matapā ki he faiʻanga papitaisó ʻi he taimi ʻoku ʻikai fakaʻaongaʻi aí.
18.7.5
Valá
Ko e tokotaha ʻe faipapitaisó mo e tokotaha ʻoku teu ke papitaisó, te na tui ha vala hina he ʻikai aata ʻi he taimi ʻe viviku aí. ʻE tui loto pē ʻe ha taha ne ʻosi maʻu ʻenitaumeni hono kāmeni fakatemipalé he lolotonga ʻene fakahoko ha papitaiso. ʻE fakatau mai ʻe he ngaahi ʻiuniti fakalotofonuá ʻa e vala papitaisó ʻaki e paʻanga patisetí pea he ʻikai ke totongi hono fakaʻaongaʻí.
18.7.6
Kau Fakamoʻoní
ʻE siofi ʻe ha ongo fakamoʻoni ʻe toko ua, kuo fakangofua ʻe he taki maʻu mafaí, ʻa e papitaiso kotoa pē ke fakapapauʻi ʻoku fakahoko totonu ia. ʻE lava ke hoko e kāingalotu ʻo e Siasí, kau ai e fānaú mo e toʻu tupú, ko ha kau fakamoʻoni.
Kuo pau ke toe fakahoko ha papitaiso kapau ʻoku ʻikai lea ʻaki totonu ʻa e fakaleá hangē ko ia ʻoku ʻomi ʻi he Tokāteline mo e Ngaahi Fuakava 20:73. Kuo pau foki ke toe fakahoko kapau ʻoku ʻikai pulia kakato ha konga e sino, louʻulu, pe vala ʻo e tokotahá.
18.7.7
Ngaahi Fakahinohino
Ke fakahoko ʻa e ouau papitaisó, ʻe fakahoko ʻeni ʻe ha taulaʻeiki pe ko ha taha maʻu Lakanga Taulaʻeiki Faka-Melekisēteki:
-
Te ne tuʻu ʻi he loto vaí mo e tokotaha ʻe papitaisó.
-
Te ne puke ʻa e fasiʻanima toʻomataʻu ʻo e tokotahá ʻaki hono nima toʻohemá (ke tokoni mo malu). ʻE puke ʻe he taha ʻoku papitaisó ʻa e fasiʻanima toʻohema ʻo e taha maʻu lakanga fakataulaʻeikí ʻaki hono nima toʻohemá.
-
Hiki hono nima toʻomataʻú ke sikuea.
-
Ui e hingoa kakato ʻo e tokotahá mo pehē, “Kuo fakamafaiʻi au ʻe Sīsū Kalaisi, pea ʻoku ou papitaiso koe ʻi he huafa ʻo e Tamaí, pea mo e ʻAló, pea mo e Laumālie Māʻoniʻoní. ʻĒmeni” (Tokāteline mo e Ngaahi Fuakava 20:73).
-
ʻAi e tokotahá ke ne puke hono ihú ʻaki hono nima toʻomataʻú (ke fiemālie); pea hili leva ʻe he faipapitaisó ʻa hono nima toʻomataʻú ʻi ʻolunga he funga tuʻa ʻo e tokotahá pea fakauku kakato hifo ʻa e tokotahá, kau ai mo hono valá. ʻE faingofua ange hono fakaukú kapau ʻe peluki ʻe he tokotahá hono ongo tuí.
-
Tokoni ke tuʻu hake ʻa e tokotahá mei he vaí.
18.7.8
Lekooti Papitaisó
Ko e fakamatala fekauʻaki mo e faʻu ʻo e lekooti papitaisó, vakai ki he 18.8.3.
18.8
Hilifakinimá mo e Meʻafoaki ʻo e Laumālie Māʻoniʻoní
Ka hili hano papitaiso ʻo ha taha, ʻe fakamaʻu leva ia ko e mēmipa ʻo e Siasí mo ne maʻu ʻa e Laumālie Māʻoniʻoní ʻi he hilifaki ʻo e nimá (vakai, Tokāteline mo e Ngaahi Fuakava 20:41; Ngāue 19:1–6). ʻOku hoko ʻa e tokotahá ko ha mēmipa ʻo e Siasí ʻi he ʻosi hono fakahoko fakatouʻosi ʻo e ongo ouau ko ʻení mo lekooti fakalelei (vakai, Sione 3:5; Tokāteline mo e Ngaahi Fuakava 33:11; 3 Nīfai 27:20).
Ki ha fakamatala fekauʻaki mo e hilifakinima ʻi ha ngaahi tūkunga makehé, vakai, 38.2.8.
Ko e pīsopé ʻokú ne maʻu ʻa e ngaahi kī lakanga fakataulaʻeiki ki hono hilifakinima ʻo e kāingalotu taʻu 8 ʻo e lekōtí ʻi hono uōtí. Ko e palesiteni fakamisioná ʻokú ne maʻu ʻa e ngaahi kī ki hono hilifakinima ʻo e kau ului ʻi he misioná (ko e fakamatala ki he ʻuhinga ʻo e papi uluí, vakai, 31.2.3.2).
ʻOku tokangaʻi ʻe he pīsopé ʻa e hilifakinima ʻo e fānau taʻu 8 ʻo e lekōtí. ʻOku meimei ke hilifakinima pē ʻa e fānau ko ʻení ʻi he ʻaho ʻoku papitaiso ai kinautolú.
ʻE fakafekauʻaki ʻe he kau faifekau taimi kakató mo e kau taki fakauōtí ʻa e palani ki hono hilifakinima ʻo e kau uluí ʻo hangē ko ia ʻoku hā ʻi he 18.7.2. ʻE lava ke hilifakinima ʻa e kau uluí ʻi he ouau papitaisó pe ʻi he houalotu sākalamēnití ʻi he uooti ʻoku nau nofo aí ʻi he vave taha ʻe lavá, hili honau papitaisó.
ʻOku fakatokangaʻi mo talitali lelei ʻa e kāingalotu foʻoú ko ha mēmipa foʻou ʻo e uōtí ʻi he houalotu sākalamēnití hili honau hilifakinimá (vakai, 29.2.1.1).
18.8.1
Tokotaha ʻOkú Ne Fakahoko ʻa e Ouaú
Ko e ouau ʻo e hilifakinimá ʻoku fakahoko ia ʻe he kau maʻu Lakanga Taulaʻeiki Faka-Melekisētekí. Ko e taha ʻe lea ʻo fakahokó kuo pau ke fakangofua ia mei he pīsopé (pe ʻe he palesiteni fakamisioná kapau ko ha faifekau taimi kakato ʻokú ne fakahoko ʻa e hilifakinimá).
Ko ha taha maʻu Lakanga Taulaʻeiki Faka-Melekisēteki pē ʻoku taau mo e temipalé ʻe lava ke ne lea ʻo fakahoko ha hilifakinima. Ka neongo ia, ʻe lava ke fakangofua ʻe ha pīsope ha tamai ʻokú ne maʻu e Lakanga Taulaʻeiki Faka-Melekisētekí ke tuʻu ʻi he siakale ʻo e hilifakinima haʻane fānau ʻo tatau ai pē kapau ʻoku ʻikai taau kakato ʻa e tamaí ki he temipalé (vakai, 18.3).
Kuo pau ke kau ha taha ʻo e kau pīsopelikí ʻi he ouaú ni. Ko e taimi ne akoʻi ai ʻe he kau faifekau ʻeletaá ha taha ului, ʻe fakaafeʻi leva kinautolu ʻe he pīsopé ke nau kau ki ai.
Ke lea ʻo fakahoko ʻa e ouaú, kuo pau ke fakahaaʻi ʻe ha taha ʻoku mavahe mei hono uooti totonú ha lekomeni temipale ʻoku kei ʻaongá ki he taki maʻu mafaí. Pe te ne fakahā haʻane Lekomeni ke Fakahoko ha Ouau kuo ʻosi fakamoʻoni ai ha mēmipa ʻo ʻene kau pīsopelikí.
18.8.2
Ngaahi Fakahinohinó
ʻE lava ke kau ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange ʻi he hilifakinimá, ʻo fakatatau mo e fakahinohino ʻa e kau pīsopelikí. Te nau hilifaki fakamaʻamaʻa honau nimá ʻi he ʻulu ʻo e tokotahá. Ko e tokotaha te ne fai e leá:
-
Te ne ui e hingoa kakato ʻo e tokotahá.
-
Fakahaaʻi ʻoku fakahoko ʻa e ouaú ʻaki e mafai ʻo e Lakanga Taulaʻeiki Faka-Melekisētekí.
-
Fakamaʻu ʻa e tokotahá ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
-
Lea ʻo pehē “ke ke maʻu ʻa e Laumālie Māʻoniʻoní” (kae ʻikai ko e “ke ke maʻu ʻa e meʻafoaki ʻo e Laumālie Māʻoniʻoní”).
-
Foaki ha tāpuaki ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
18.8.3
Lekooti Papitaisó mo e Hilifakinimá mo e Tohi Fakamoʻoní
Kimuʻa pea ʻinitaviu ha fānau ko ha mēmipa ʻo e lekōtí ke papitaisó, ʻe fakaʻaongaʻi ʻe ha kalake ʻa e polokalama MTTK ke teuteuʻi ha Foomu Papitaiso mo e Hilifakinima. ʻE fakahoko ʻe he pīsopé, pe ko ha tokoni naʻe vahe ki ai, ʻa e ʻinitaviú mo fakamoʻoni ʻi he fōmú. Ka hili e papitaisó mo e hilifakinimá, ʻe fakaʻaongaʻi ʻe ha kalake ʻa e fōmú ni ke fakatonutonu e lekooti mēmipasipi ʻo e fānaú ʻi he MTTK.
ʻI he taimi ʻoku ʻinitaviu ai ʻe ha faifekau taimi kakato ha papi ului ke papitaisó, te ne fakafonu ʻa e Lekooti Papitaisó mo e Hilifakinimá ʻo fakaʻaongaʻi ʻa e polokalama Malanga ʻAki ʻEku Ongoongoleleí. Hili e papitaisó mo e hilifakinimá, ʻe lekooti ʻe he kau faifekaú ʻa e fakamatalá ʻi he polokalamá pea fakahū fakaʻilekitulōnika ia ki he kalake fakauōtí. ʻE toe vakaiʻi ʻe he kalake fakauōtí ʻa e fakamatalá ʻi he MTTK pea faʻu ʻa e lekooti mēmipasipí.
Ka hili hono faʻu ʻo e lekooti mēmipasipí, ʻe teuteu leva ʻe ha kalake ʻa e Tohi Fakamoʻoni ki he Papitaisó mo e Hilifakinimá. Ko e tohi fakamoʻoni ko ʻení ʻe fakamoʻoni ai ʻa e pīsopé pea ʻoange ki he tokotahá.
ʻOku totonu ke tatau ʻa e hingoa ʻi he lekooti mēmipasipí mo e tohi fakamoʻoní pea mo e hingoa ʻi he tohitaʻú, lesisita fāʻeleʻi fakapuleʻangá, pe hingoa fakalao lolotongá.
18.9
Ko e Sākalamēnití
ʻE fakataha ʻa e kau mēmipa ʻo e Siasí ʻi he ʻaho Sāpaté ke lotu ki he ʻOtuá mo maʻu ʻa e sākalamēnití (vakai, Tokāteline mo e Ngaahi Fuakava 20:75; 59:9; Molonai 6:5–6). ʻI he lolotonga ʻo e ouau ko ʻení, te nau maʻu ʻa e maá mo e vaí ko e fakamanatu ki he feilaulauʻi ʻe he Fakamoʻuí ʻa Hono sinó mo e taʻataʻá pea ke fakafoʻou ʻenau ngaahi fuakava toputapú (vakai, Mātiu 26:26–28; Liliu ʻa Siosefa Sāmitá, Maʻake 14:20–25; Luke 22:15–20; 3 Nīfai 18; Molonai 6:6). ʻOku totonu ke ʻapasia ʻa e taha kotoa he lolotonga hono tāpuakiʻi mo tufaki ʻa e sākalamēntí.
18.9.1
Fakangofua ke Fakahoko ʻa e Sākalamēnití
ʻOku maʻu ʻe he pīsopé ʻa e ngaahi kī ʻo e lakanga fakataulaʻeikí ki hono fakahoko ʻo e sākalamēnití ʻi he uōtí. Ko kinautolu kotoa ʻoku kau ʻi he teuteu, tāpuakiʻi, mo e tufa ʻo e sākalamēnití kuo pau ke nau maʻu ha fakangofua meiate ia pe mei ha taha ʻoku ʻi he malumalu ʻo ʻene fakahinohinó.
Kapau ʻoku ʻikai lava ha kāingalotu ʻi hono uōtí ʻo maʻu ʻa e sākalamēnití koeʻuhí he ʻoku ʻikai ke nau toe lava ʻo mavahe mei ʻapi, nofo ʻi ha senitā tauhiʻanga, pe falemahaki, ʻe lava ke fakamafaiʻi ʻe he pīsopé ha kau maʻu lakanga fakataulaʻeiki ke nau tufaki ʻa e sākalamēnití kiate kinautolu. Te ne lava ʻo fakamafaiʻi ʻeni ʻo tatau ai pē kapau ʻoku nau mavahe fakataimi pē ki tuʻa mei he ngatangataʻanga ʻo hono uōtí. Neongo ia, ka he ʻikai ke ne lava ʻo fakamafaiʻi ke ʻave ʻa e sākalamēnití ki ha kāingalotu ʻoku nau mavahe mei he ngatangataʻanga ʻo hono uōtí ʻi ha ngaahi tūkunga kehe.
ʻI ha ngaahi tūkunga hāhāmolofia, ʻe malava pē ke ʻoua naʻa fakahoko e sākalamēnití ʻi ha vahaʻataimi lōloa. ʻI he ngaahi tūkunga ko ʻení, ʻe lava ke fakamafaiʻi ʻe ha pīsope ha kau maʻu lakanga fakataulaʻeiki moʻui taau ʻi hono uōtí ke nau teuteu mo tāpuakiʻi ʻa e sākalamēnití ʻi honau ngaahi ʻapí he Sāpate kotoa. ʻE toe lava foki ke fakamafaiʻi ʻe he kau pīsopé ke nau teuteu mo tāpuakiʻi ʻa e sākalamēnití maʻá e kāingalotu ʻoku ʻikai ke ʻi ai ha kau maʻu lakanga fakataulaʻeiki ʻi honau ngaahi ʻapí.
Ko e taimi ʻoku fakamafaiʻi ai ʻe he pīsopé ke teuteu mo tāpuakiʻi ʻa e sākalamēnití mavahe mei he ngaahi houalotu angamaheni ʻa e Siasí, ʻoku kei ngāue ʻaki pē e ngaahi fakahinohino ʻi he 18.9.2 fekauʻaki mo e tokotaha ʻokú ne fakahoko e ouaú.
18.9.2
Tokotaha ʻOkú Ne Fakahoko ʻa e Ouaú
-
ʻE lava ke teuteu ʻe he kau akonakí, kau taulaʻeikí, mo e kau maʻu Lakanga Taulaʻeiki Faka-Melekisētekí ʻa e sākalamēnití.
-
ʻE lava ke tāpuakiʻi ʻe he kau taulaʻeikí mo e kau maʻu Lakanga Taulaʻeiki Faka-Melekisētekí ʻa e sākalamēnití.
-
ʻE lava ke tufa ʻe he kau tīkoní, kau akonakí, kau taulaʻeikí, mo e kau maʻu Lakanga Taulaʻeiki Faka-Melekisētekí ʻa e sākalamēnití.
Ko e taimi ʻoku tokolahi feʻunga ai e kau maʻu Lakanga Taulaʻeiki Faka-ʻĒloné, ʻoku meimei ko kinautolu ʻoku nau fakahoko e ngaahi fatongia ko ʻení. Ko e taimi ʻoku ʻikai tokolahi feʻunga ai e kau tīkoní ke tufa ʻa e sākalamēnití, ʻe talanoa leva ʻa e palesiteni ʻo e kōlomu ʻo e kau tīkoní mo e pīsopé pe ko hai ʻe fakaafeʻi ke tokoní. Ko e angamahení, te ne kole ki he kau akonakí mo e kau taulaʻeikí ke tokoni kimuʻa pea toki kole ki he kaumātuʻá mo e kau taulaʻeiki lahí.
18.9.3
Ngaahi Fakahinohino ki he Sākalamēnití
Tuʻunga ʻi he natula toputapu ʻo e sākalamēnití, ʻoku totonu leva ke teuteu fakalelei ʻa e kau taki lakanga fakataulaʻeikí koeʻuhí ke maau mo molumalu. Ko e tupenu ʻufiʻufi tēpile ʻo e sākalamēnití ʻoku totonu ke lanu hinehina, maʻa, pea mo haiane. Ko e ʻū laulau sākalamēnití ʻoku totonu ke maʻa. Ko e ʻū laulau mo e ʻū ipu sākalamēnití ʻoku totonu ke ʻota kei mamaʻo.
Ko kinautolu ʻoku nau fakahoko e sākalamēnití ʻoku totonu ke nau fai ia ʻi ha founga fakaʻeiʻeiki, ʻo ʻiloʻi ʻoku nau fakafofongaʻi ʻa e ʻEikí. ʻE poupouʻi kinautolu ʻe he kau pīsopelikí ke nau fakakaukau ki he Fakalelei ʻa e Fakamoʻuí ʻi heʻenau teuteu, tāpuakiʻi, mo tufaki ʻa e sākalamēnití.
Ko kinautolu ʻoku nau fakahoko e sākalamēnití ʻoku totonu ke nau teuteu lelei mo maʻa. ʻOku ʻikai totonu ke nau tui ha vala pe siueli te ne toʻo e tokangá mei he lotu mo e fuakava ʻoku faí ʻa ia ko e taumuʻa ʻo e sākalamēnití. Kapau ʻe fiemaʻu ʻe he pīsopé ke faleʻi ha taha maʻu lakanga fakataulaʻeiki fekauʻaki mo ha meʻa pehē, te ne fakahoko ia ʻi he ʻofa. Te ne toe fakakaukauʻi foki mo e tuʻunga matuʻotuʻa ʻo e tokotahá ʻi he Siasí.
Ko hono tufa ʻo e sākalamēnití ʻoku totonu ke fakanatula pē kae ʻikai fuʻu tuʻutuʻuni pau. Hangē ko ‘ení, ʻoku ʻikai totonu ke tuʻutuʻuni pau ha ngaahi tōʻonga ʻe niʻihi (hangē ko e ʻākituʻa ʻo e nima toʻohemá) pe fōtungá (hangē ko e teunga tataú).
ʻE hivaʻi ʻe he haʻofangá ha himi sākalamēniti he lolotonga hono pakipaki ʻo e maá. ʻOku ʻikai totonu ke fetongi ʻe ha kau hiva solo pe meʻalea ʻa e himi ko ʻení. ʻOku ʻikai totonu ke tā ha fasi ʻi he lolotonga hono tufa ʻo e sākalamēnití pe ʻi heʻene ʻosí pē.
Kapau ʻoku kovi ki he kāingalotú ha meʻakai pe ko e kulūtení (gluten), te nau talanoa mo ha mēmipa ʻo e kau pīsopelikí pe ko e hā ʻa e liliu ʻe fai ki he sākalamēnití. ‘O ka fiemaʻu, ‘e lava ke filioʻi ʻe he kau pīsopelikí e founga ki hono fakahoko ‘o e sākalamēnití kiate kinautolú.
Ko e angamahení, kuo pau ke pakipaki ʻa e maá, ko e konga ia ʻo e ouau sākalamēnití. Ka neongo ia, koeʻuhí ke fakapapauʻi e tuʻunga moʻui lelei mo e malu ʻa ha taha pau, ʻe lava ke ʻomi ʻe he mēmipa ko iá ha mā ʻoku ʻikai ke ʻi ai ha kulūteni, pe ko ha meʻa ʻoku faitatau mo e maá ke fetongi ʻaki ʻi ha pelesitiki malu pe ipu. Te nau ʻoange ʻeni ki ha taha maʻu lakanga fakataulaʻeiki ke tuku ʻi ha laulau mavahe. ʻE tokoni ʻa e kau pīsopelikí kiate kinautolu ʻoku nau tufa ʻa e sākalamēnití ke nau ʻiloʻi ʻa e kāingalotu ʻoku totonu ke tufa ki ai ʻa e mā ʻoku ʻikai ke ʻi ai ʻa e kulūtení.
Vakai, disability.ChurchofJesusChrist.org ki he fakahinohino fekauʻaki mo e meʻakai ʻoku kovi ki ha niʻihí.
Neongo ko e sākalamēnití maʻá e kāingalotu ʻo e Siasí, ka ʻoku ʻikai totonu ke fai ha meʻa ke taʻofi ai ha niʻihi mei haʻanau maʻu e sākalamēnití.
18.9.4
Ngaahi Fakahinohinó
-
Ko kinautolu ʻoku nau teuteu, tāpuakiʻi, pe tufa ʻa e sākalamēnití, ʻoku totonu ke ʻuluaki fanofano honau nimá ʻaki ha koa pe meʻa fanofano kehe.
-
ʻE fakapapauʻi ʻe he kau akonakí, kau taulaʻeikí, pe kau maʻu Lakanga Taulaʻeiki Faka-Melekisētekí, kuo ʻosi maau e ʻū laulau maá mo e mā ʻoku teʻeki pakipakí, laulau vaí mo e ʻū ipu vai maʻá, pea mo e tupenu ʻufiʻufi tēpile maʻá, kimuʻa pea toki kamata ʻa e houalotú.
-
Ko e taimi ʻe hivaʻi ai ʻe he kāingalotu ʻo e uōtí ʻa e himi sākalamēnití, ʻe tuʻu ʻi he loto-ʻapasia ʻa kinautolu te nau tāpuakiʻi ʻa e sākalamēnití, toʻo e tupenu ʻokú ne ʻufiʻufi e ʻū laulau maá, pea pakipaki ʻa e maá ke kongokonga iiki.
-
Ka hili ʻa e himí, ʻe tūʻulutui leva ʻa e tokotaha te ne tāpuakiʻi ʻa e maá ʻo lau e lotu sākalamēniti ki he maá (vakai, Tokāteline mo e Ngaahi Fuakava 20:77).
-
ʻE fakapapauʻi ʻe he pīsopé ʻoku lau mahino, mo tonu, pea mo fakaʻeiʻeiki ʻa e lotu tāpuaki ʻo e sākalamēnití. Kapau ʻoku fehalaaki ha taha ʻi he fakaleá peá ne fakatonutonu pē ʻe ia, ʻoku ʻikai fiemaʻu ha toe fakatonutonu. Kapau he ʻikai fakatonutonu ʻe he tokotahá ʻene fehalākí, ʻe kole fakalelei ange ʻe he pīsopé ke ne toe fai e lotú. ʻE fakaʻaongaʻi ʻe he pīsopé ʻene fakakaukau lelei tahá ʻi he taimi te ne kole ai ke toe fakahoko ʻa e lotú. Te ne fakapapauʻi ʻoku ʻikai fakatupu ʻe heʻene fai iá ha mā pe toʻo e molumalu ʻo e ouaú. ʻE lava ke tokoni ha taha kehe ʻi he tēpile sākalamēnití ʻo ka fiemaʻu.
-
Ka ʻosi e lotú, ʻe tufa leva ʻe he kau maʻu lakanga fakataulaʻeikí ʻa e maá ki he kāingalotú, ʻi he loto-ʻapasia. ʻE ʻuluaki maʻu ia ʻe he taki maʻu mafaí, ka hili ia, ʻoku ʻikai ke toe ʻi ai ha fakahokohoko. Ko e taimi pē ʻoku ʻoange ai ha laulau ki he kāingalotú, te nau lava ʻo paasi takai ia ʻiate kinautolu.
-
ʻE maʻu ʻe he kāingalotú ʻaki honau nima toʻomataʻú ʻo ka faingamālie.
-
Ka hili hono tufa ʻo e maá ki he kotoa ʻo e kāingalotú, ʻe fakafoki leva ʻe kinautolu ʻoku nau tufa ʻa e sākalamēnití ʻa e ʻū laulaú ki he tēpile sākalamēnití. ʻE ʻufiʻufi leva ʻe kinautolu ʻoku nau tāpuakiʻi ʻa e sākalamēnití e ʻū laulau maá ʻaki ha tupenu kae tatala e ʻufiʻufi ʻo e ʻū laulau vaí.
-
ʻE tūʻulutui leva e taha ʻokú ne tāpuakiʻi ʻa e vaí ʻo lau e lotu sākalamēniti ki he vaí (vakai, Tokāteline mo e Ngaahi Fuakava 20:79). ʻOkú ne fakaʻaongaʻi ʻa e foʻi lea ko e vaí kae ʻikai ko e uaine.
-
Ka hili ʻa e lotú, ʻe tufa leva ʻi he loto-ʻapasia ʻe he kau maʻu lakanga fakataulaʻeikí ʻa e vaí ki he kāingalotú. ʻE ʻuluaki maʻu ia ʻe he taki maʻu mafaí, ka hili ia, ʻoku ʻikai ke toe ʻi ai ha fakahokohoko.
-
Ka hili hono tufa ʻo e vaí ki he kotoa ʻo e kāingalotú, ʻe fakafoki leva ʻe kinautolu ʻoku nau tufa ʻa e sākalamēnití ʻa e ʻū laulaú ki he tēpile sākalamēnití. ʻE ʻufiʻufi leva ʻe kinautolu ʻoku nau tāpuakiʻi ʻa e sākalamēnití ʻaki ha tupenu ʻa e ʻū laulaú, pea ʻe foki loto-ʻapasia leva ʻa kinautolu ʻoku nau tāpuakiʻi mo tufa ʻa e sākalamēnití ki honau nofoʻangá.
-
Ka ʻosi e houalotú, ʻe fakamāʻopoʻopo leva ʻe kinautolu naʻa nau teuteu e sākalamēnití, pelupelu ʻa e ʻū tupenu ʻufiʻufi tēpilé, pea ʻave ha toenga mā ne ʻikai fakaʻaongaʻi.
18.10
Ko Hono Foaki ʻo e Lakanga Fakataulaʻeikí mo e Fakanofo ki ha Tuʻungá
ʻOku konga ua ʻa e lakanga fakataulaʻeikí: Lakanga Taulaʻeiki Faka-ʻĒloné mo e Melekisētekí (vakai, 3.3; Tokāteline mo e Ngaahi Fuakava 107:1, 6). Ko e taimi ʻoku foaki ai e lakanga fakataulaʻeikí ki ha taha, ʻoku toe fakanofo foki ia ki ha tuʻunga ʻi he lakanga fakataulaʻeiki ko iá. Ka hili hano foaki ha taha ʻo e ongo lakanga fakataulaʻeiki ko ʻení, ko e meʻa pē ʻoku fiemaʻú ke fakanofo ʻa e tangata ko iá ki he ngaahi tuʻunga ʻi he lakanga fakataulaʻeiki ko iá.
Ke maʻu ha fakamatala fekauʻaki mo e ngaahi fakanofo ki he lakanga fakataulaʻeikí ʻi ha ngaahi tūkunga makehé, vakai, 38.2.9.
18.10.1
Lakanga Taulaʻeiki Faka-Melekisētekí
ʻOku maʻu ʻe he palesiteni fakasiteikí ʻa e ngaahi kī ʻo e lakanga fakataulaʻeikí ki hono foaki ʻo e Lakanga Taulaʻeiki Faka-Melekisētekí pea mo hono fakanofo ki he tuʻunga ʻo e kaumātuʻá mo e taulaʻeiki lahí. Ka neongo ia, ko e pīsopé ʻoku meimei ke ne fai e ngaahi fakaongoongolelei ki he ngaahi fakanofo ko ʻení.
18.10.1.1
Kaumātuʻá
ʻE lava ke maʻu ʻe he houʻeiki tangata moʻui tāú ʻa e Lakanga Taulaʻeiki Faka-Melekisētekí mo fakanofo ko ha kaumātuʻa ʻi he taimi kuo nau taʻu 18 ai pe motuʻa ange. Makatuʻunga ʻi ha ngaahi tūkunga fakafoʻituitui, ʻe fakapapauʻi ʻe he pīsopé pe ʻoku totonu ke fakaongoongoleleiʻi ha talavou ke fakanofo ko ha kaumātuʻa ʻi he hili pē hono taʻu 18 pe toe nofo pē he kōlomu ʻo e kau taulaʻeikí ʻo lōloa ange. ʻOku kau ʻi he ngaahi tūkunga ko ʻeni ʻa e talavoú ʻa ʻene:
-
Fakamoʻoní mo e tuʻunga fakapotopotó.
-
ʻOsi mei he akó.
-
Fakaʻamu ke kei hoko atu mo hono toʻú.
-
Hū ki he ʻunivēsití.
ʻI hono fakahoko ʻo e fili ko ʻení, ʻe ʻuluaki talanoa ʻa e pīsopé mo ʻene ongomātuʻá pe tauhí. ʻOku totonu ke fakanofo ʻa e kakai tangata moʻui tāú ko e kaumātuʻa ʻi he taʻu 19 pe kimuʻa pea nau mavahe mei ʻapi ke hū ki he ʻunivēsití, ngāue fakafaifekau taimi kakato, ngāue fakakautau, pe tali ha ngāue paʻanga taimi kakato.
ʻOku fakanofo ʻa e houʻeiki tangata taʻu 18 mo motuʻa ange ne toki papitaisó ko ha kaumātuʻa hili ʻenau:
-
Maʻu ʻa e Lakanga Taulaʻeiki Faka-ʻĒloné pea hoko ko ha kau taulaʻeiki.
-
Fakatupulaki ha mahino feʻunga ki he ongoongoleleí.
-
Fakahaaʻi ʻenau moʻui tāú.
ʻOku ʻikai ke ʻi ai ha taimi tukupau ʻoku fiemaʻu ʻi heʻenau hoko ko e mēmipa ʻo e Siasí.
18.10.1.2
Kau Taulaʻeiki Lahí
ʻOku fakanofo ʻa e houʻeiki tangatá ko ha kau taulaʻeiki lahi ʻi he taimi ʻoku ui ai kinautolu ki he kau palesitenisī fakasiteikí, fakataha alēleaʻanga māʻolungá, pe kau pīsopelikí. ʻE toe lava pē foki ke fakanofo kinautolu ʻi ha ngaahi taimi kehe ʻo fakatatau mo e tuʻutuʻuni ʻa e palesiteni fakasiteikí ʻo fakafou ʻi hano fakakaukauʻi ʻi he faʻa lotu mo ha tataki fakalaumālie.
18.10.1.3
Ko e ʻInitaviú mo e Hikinimaʻí
ʻI hono fakangofua ʻe he kau palesitenisī fakasiteikí, ʻe ʻinitaviu ʻe he pīsopé ʻa e tangatá ʻo hangē ko e fakahinohino ʻi he Lekooti Fakanofo ʻo e Lakanga Taulaʻeiki Faka-Melekisētekí. Hili iá ʻe ʻinitaviu leva ia ʻe ha mēmipa ʻo e kau palesitenisī fakasiteikí. ʻI hano fakangofua mei he palesiteni fakamisioná, ʻe lava ke ʻinitaviu ʻe he palesiteni fakavahefonuá ha tangata ke fakanofo ko ha kaumātuʻa (vakai, 6.3). Ko e fakahinohino ki he ngaahi ʻinitaviu ko ʻení, vakai ki he 31.2.6.
Ka hili ʻa e ʻinitaviú, ʻe kole leva ʻe he kau palesitenisī fakasiteikí ki he fakataha alēlea māʻolungá ke nau hikinimaʻi ʻa e tuʻutuʻuni ko ʻeni ke fakanofo ʻa e tangatá. ʻE fokotuʻu ʻe ha mēmipa ʻo e kau palesitenisī fakasiteikí ke hikinimaʻi ʻi he fakataha lahi ʻo e konifelenisi fakasiteikí (vakai, 18.10.3). ʻI hano fakangofua mei he palesiteni fakamisioná, ʻe lava ke fakahā ʻe ha palesiteni fakavahefonua ha tangata ke hikinimaʻi ke fakanofo ko ha kaumātuʻa (vakai, 6.3).
18.10.2
Lakanga Taulaʻeiki Faka-ʻĒloné
ʻOku maʻu ʻe he pīsopé ʻa e ngaahi kī ʻo e lakanga fakataulaʻeikí ki hono foaki ʻo e Lakanga Taulaʻeiki Faka-ʻĒloné mo fakanofo ki he tuʻunga ʻo e tīkoní, akonakí, pea mo e taulaʻeikí. ʻOku angamaheni ke fakanofo ʻa e houʻeiki tangatá ki he ngaahi tuʻunga ko ʻení ʻi he taʻu motuʻa ko ʻení, kae ʻikai ke kimuʻa ange ai:
-
Tīkoní ʻi he kamataʻanga ʻo e taʻu ʻoku hoko ai honau taʻu 12.
-
Akonakí ʻi he kamataʻanga ʻo e taʻu ʻoku hoko ai honau taʻu 14.
-
Taulaʻeikí ʻi he kamataʻanga ʻo e taʻu ʻoku hoko ai honau taʻu 16.
ʻE ʻinitaviu ʻe he pīsopé pe ko ha tokoni naʻe vahe ki ai ʻa kinautolu ʻoku teu fakanofo ko e kau tīkoni pe kau akonakí, ke fakapapauʻi pe ʻoku nau mateuteu fakalaumālie. ʻE ʻinitaviu ʻe he pīsopé ʻa e houʻeiki tangata ʻoku ʻamanaki ke fakanofo ko e kau taulaʻeikí.
Kimuʻa pea ʻinitaviu ha talavou ke fakanofo ki he lakanga fakataulaʻeikí, ʻe maʻu ʻe he pīsopé ha fakangofua mei he ongomātuʻá pe tauhí. ʻOku ʻikai fiemaʻu ha ngofua ia mei ha mātuʻa pe tauhi fānau ʻoku ʻikai haʻanau kaunga fakalao ke fakafepakiʻi ʻa e ouaú.
Kapau ʻoku ʻilo ʻi he ʻinitaviú ʻoku moʻui taau ʻa e tangatá, ʻe fokotuʻu ia ʻe ha mēmipa ʻo e kau pīsopelikí ke hikinimaʻi ʻi he houalotu sākalamēnití (vakai, 18.10.3).
Ko e fakamatala fekauʻaki mo hono fakanofo ʻo e houʻeiki tangata ne toki papitaisó, vakai, 38.2.9.1.
18.10.3
Ko Hono Fokotuʻu ʻo ha Mēmipa ke Hikinimaʻi kimuʻa pea Fakanofó
Hili hano ʻinitaviu ha tangata pea ʻilo ʻoku moʻui taau ke fakanofo ki ha tuʻunga ʻi he lakanga fakataulaʻeikí, ʻe fokotuʻu ia ke hikinimaʻi (vakai, Tokāteline mo e Ngaahi Fuakava 20:65, 67). Ko e houʻeiki tangata ʻe fakanofo ko e kaumātuʻá pe taulaʻeiki lahí, ʻe fokotuʻu ia ʻe ha mēmipa ʻo e kau palesitenisī fakasiteikí ʻi he fakataha lahi ʻo e konifelenisi fakasiteikí (vakai, 6.3 ki he ngaahi fakahinohino ki he kau palesiteni fakavahefonuá). Ko e houʻeiki tangata ʻe fakanofo ko e kau tīkoni, akonaki, pe taulaʻeikí, ʻe fakahā ia ʻe ha mēmipa ʻo e kau pīsopelikí ʻi he houalotu sākalamēnití.
ʻE kole ʻe he tokotaha ʻokú ne fakahoko ʻa e hikinimaʻí ki he tangatá ke tuʻu ki ʻolunga. Te ne fakahā ʻa e fokotuʻu ke foaki ʻa e Lakanga Taulaʻeiki Faka-ʻĒloné pe Faka-Melekisētekí (ʻo ka fiemaʻu) pea mo fakanofo ʻa e tangatá ki he tuʻunga ʻo e lakanga fakataulaʻeikí. Te ne toki fakaafeʻi leva ʻa e kāingalotú ke nau poupouʻi ʻa e fokotuʻú. Hangē ko ʻení, ke fokotuʻu ha tangata ke fakanofo ko ha kaumātuʻa, te ne lava ʻo fakaʻaongaʻi ha ngaahi lea hangē ko ʻení:
“ʻOku mau fokotuʻu atu ke maʻu ʻe [hingoá] ʻa e Lakanga Taulaʻeiki Faka-Melekisētekí pea fakanofo ia ko ha kaumātuʻa. Ko kimoutolu ʻoku loto ki aí, fakahā ia ʻaki e hiki homou nimá ki ʻolunga. [Kiʻi longo taimi siʻi.] Kapau ʻoku ʻikai ha taha ʻe loto ki ai, fakahā mai. [Kiʻi longo taimi siʻi.]”
ʻOku totonu ke kau ʻi he hikinimá ʻa e tokotaha ʻoku fokotuʻú. Kapau ʻoku tokolahi ʻa kinautolu ʻoku fokotuʻú, ʻe lava ke fokotuʻu fakakulupu kinautolu.
Kapau ʻoku fakafepakiʻi ʻe ha mēmipa mālohi ʻa e fakanofó, ʻe talanoa fakataautaha ʻa e taki maʻu mafai pulé pe ko ha taki lakanga fakataulaʻeiki ne vahe ki ai, mo e tokotaha ko iá, ʻi he hili ʻa e fakatahá. ʻE feinga ʻa e takí ke mahino kiate ia ʻa e ʻuhinga ʻoku fakafepakiʻi ai ʻe he mēmipá. Te ne fehuʻi pe ʻoku ʻilo ʻe he mēmipá ha ʻulungaanga te ne lava ʻo fakataʻeʻaongaʻi ʻa e tokotahá mei hano fakanofo ki he tuʻunga he lakanga fakataulaʻeiikí.
Ko e kāingalotu pē ʻoku mālohí te nau lava ʻo kau ʻi he hikinimaʻí. Ka neongo ia, kapau ʻe ʻi ai ha mēmipa ʻoku ʻikai mālohi pe ko ha taha ʻoku ʻikai ko ha mēmipa ʻoku fakafepaki ki he fokotuʻú, ʻe lava ke fanongo fakataautaha ʻa e pīsopé pe palesiteni fakasiteikí ki he meʻa ʻokú ne hohaʻa ki aí ʻi ha feituʻu kehe mei he fakatahá.
ʻI ha ngaahi tūkunga ʻe niʻihi, ʻe ala fiemaʻu ai ke fakanofo ha tangata ko ha kaumātuʻa pe taulaʻeiki lahi kimuʻa pea toki fakahaaʻi ia ʻi he konifelenisi fakasiteikí. ʻI he taimi ʻe hoko ai ʻení, ʻe fokotuʻu leva ia ʻi he houalotu sākalamēniti ʻo hono uōtí ke hikinimaʻi. ʻE toki fokotuʻu leva ia ʻi he konifelenisi fakasiteiki hono hokó ke fakapapauʻi ʻa e fakanofó (ʻo fakafenāpasi ʻa e founga ke hikinimaʻí, ʻoku fakamatalaʻi atu ʻi ʻolungá). ʻOku kau heni hono ʻoange ki he kāingalotu ʻo e siteikí ha faingamālie ke nau poupouʻi pe fakafepakiʻi ʻa e fokotuʻú.
18.10.4
Tokotaha ʻOkú Ne Fakahoko ʻa e Ouaú
ʻE lava ʻe he palesiteni fakasiteikí pe ko ha taha maʻu Lakanga Taulaʻeiki Faka-Melekisēteki, ʻi he malumalu ʻo ʻene fakahinohinó, ʻo fakanofo ha tangata ki he tuʻunga ʻo e kaumātuʻá. ʻI hano fakangofua mei he palesiteni fakamisioná, ʻe lava ʻe he palesiteni fakavahefonuá pe ko ha taha ʻi he malumalu ʻo ʻene fakahinohinó ʻo fakahoko ʻa e fakanofó (vakai, 6.3). Ko e kau maʻu Lakanga Taulaʻeiki Faka-Melekisēteki pē ʻe lava ke tuʻu ʻi he siakalé.
ʻE lava ʻe he palesiteni fakasiteikí pe ʻe ha taulaʻeiki lahi, ʻi he malumalu ʻo ʻene fakahinohinó, ʻo fakanofo ha tangata ki he tuʻunga ʻo e taulaʻeiki lahí. Ko e kau taulaʻeiki lahi pē ʻe lava ke tuʻu ʻi he siakalé.
Ko ha taha ʻokú ne fakanofo ha tangata ki ha tuʻunga ʻi he Lakanga Taulaʻeiki Faka-Melekisētekí ʻoku totonu ke moʻui taau mo e temipalé. Kuo pau ke ʻi ai e palesiteni fakasiteikí pe ko ha taha naʻá ne vahe ki ai.
ʻE lava ke fakanofo ʻe ha taulaʻeiki pe taha maʻu Lakanga Taulaʻeiki Faka-Melekisēteki ha tangata ki he tuʻunga ʻo e tīkoní, akonakí, pe taulaʻeikí. Kuo pau ke fakamafaiʻi ia ʻe he pīsopé. Kuo pau ke ʻi ai e pīsopé pe ko ha taha naʻá ne vahe ki ai.
Ke kau ha taha ʻi ha fakanofo ki he Lakanga Taulaʻeiki Faka-ʻĒloné, kuo pau ko ha taulaʻeiki ia pe taha maʻu Lakanga Taulaʻeiki Faka-Melekisēteki.
ʻE lava ke fakangofua ʻe ha pīsope ha tamai ʻoku hoko ko ha taulaʻeiki pe ko ha taha maʻu Lakanga Taulaʻeiki Faka-Melekisēteki ke ne fakanofo hano foha ki he tuʻunga ʻo e tīkoní, akonakí, pe taulaʻeikí ʻo tatau ai pē kapau ʻoku ʻikai taau kakato ʻa e tamaí mo e temipalé (vakai, 18.3). ʻE poupouʻi ʻe he kau pīsopé ʻa e ngaahi tamaí ke nau teuteu ke fakanofo honau ngaahi fohá.
Ke lea ʻo fakahoko ʻa e ouaú, kuo pau ke fakahaaʻi ʻe ha taha ʻoku mavahe mei hono uooti totonú ha lekomeni temipale ʻoku kei ʻaongá ki he taki maʻu mafaí. Pe te ne fakahā haʻane Lekomeni ke Fakahoko ha Ouau kuo ʻosi fakamoʻoni ai ha mēmipa ʻo ʻene kau pīsopelikí.
18.10.5
Ngaahi Fakahinohinó
Ke foaki ʻa e lakanga fakataulaʻeikí mo fakanofo ha taha ki ha tuʻunga ʻi he lakanga fakataulaʻeikí, ʻe hilifaki fakamaʻamaʻa ʻe ha tokotaha pe kau maʻu lakanga fakataulaʻeiki tokolahi ange kuo ʻosi fakamafaiʻi, ʻa honau nimá ki he ʻulu ʻo e tokotahá. Pea ko e tokotaha te ne fakahoko ʻa e leá te ne:
-
Ui e tokotahá ʻaki hono hingoa kakató.
-
Fakahaaʻi ʻa e mafai ʻokú ne maʻu fakafoʻituitui ke fakahoko ʻa e ouaú (pe ko e Lakanga Taulaʻeiki Faka-ʻĒloné pe Faka-Melekisētekí).
-
Foaki ʻa e Lakanga Taulaʻeiki Faka-ʻĒloné pe Lakanga Taulaʻeiki Faka-Melekisētekí, tukukehe kapau naʻe ʻosi foaki.
-
Fakanofo ʻa e tokotahá ki ha tuʻunga ʻi he Lakanga Taulaʻeiki Faka-ʻĒloné pe Lakanga Taulaʻeiki Faka-Melekisētekí pea foaki ʻa e ngaahi totonu, ngaahi mālohi, pea mo e mafai ʻo e tuʻunga ko iá. (ʻOku ʻikai foaki e ngaahi kī lakanga fakataulaʻeikí ʻi he taimi ʻoku foaki ai ʻa e lakanga fakataulaʻeikí pe fakanofo ha taha ki ha tuʻunga, tukukehe ʻi hano fakanofo ʻo ha pīsope.)
-
Foaki ha tāpuaki ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
Ke fakanofo ha taha ki ha tuʻunga ʻi he lakanga fakataulaʻeikí hili hano ʻosi foaki kiate ia e lakanga fakataulaʻeiki totonú, ʻe toʻo ʻe he taha ʻokú ne fakahoko e fakanofó ʻa e sitepu hono 3.
Ko e fakanofó ko ha faingamālie ia ke foaki ai ha tāpuaki. Ko e faleʻi fakaʻāuliliki mo e fakahinohino fekauʻaki mo e ngaahi fatongia ʻo ha taha, ʻoku fai ia ʻi he kimuʻa pea mo e ʻosi ʻa e fakanofó. ʻOku ʻikai totonu ke hoko ia ko e meʻa mahuʻinga taha ʻo e tāpuakí. ʻOku ʻikai fiemaʻu ia ke fai ha lotu, fakamoʻoni, pe fakahinohino ʻi he taimi ʻoku fakanofo ai ha taha.
18.10.6
Lekooti mo e Tohi Fakamoʻoni ʻo e Fakanofó
Kimuʻa pea ʻinitaviu ha tangata ke fakanofo ki ha tuʻunga ʻi he Lakanga Taulaʻeiki Faka-Melekisētekí, ʻe fakaʻaongaʻi ʻe ha kalake ʻa e MTTK ke teuteu ha Lekooti Fakanofo ʻo e Lakanga Taula‘eiki Faka-Melekisētekí. ʻE fakahoko ʻe he palesiteni fakasiteikí pe ʻe ha tokoni ne vahe ki ai ʻa e ʻinitaviú mo fakamoʻoni ʻi he fōmú kapau ʻoku aʻusia kotoa ʻa e ngaahi fiemaʻu ki he tuʻunga moʻui tāú.
ʻI he ʻosi e fakanofó, ʻe fakafonu ʻe he palesiteni fakasiteikí pe ʻe hano fakafofonga ne vahe ki ai ʻa e fōmú pea ʻoange ia ki ha kalake. Te ne lekooti ʻa e fakanofó ‘i he MTTK mo teuteu ha tohi fakamoʻoni ʻo e fakanofó. Ko e tohi fakamoʻoní, ʻe fakamoʻoni ai ʻa e palesiteni fakasiteikí pea ʻoange ki he tokotahá.
Kimuʻa pea ʻinitaviu ha tangata ke fakanofo ki ha tuʻunga ʻi he Lakanga Taulaʻeiki Faka-ʻĒloné, ʻe fakaʻaongaʻi ʻe ha kalake ʻa e MTTK ke teuteuʻi ha Lekooti Fakanofo ʻo e Lakanga Taulaʻeiki Faka-ʻEloné. ʻE fakahoko ʻe he pīsopé pe ʻe ha tokoni naʻe vahe ki ai, ʻa e ʻinitaviú mo fakamoʻoni ʻi he fōmú kapau ʻoku aʻusia kotoa ʻa e ngaahi fiemaʻu ki he tuʻunga moʻui tāú.
Ka hili e fakanofó, ʻe fakakakato ʻe he pīsopé pe ʻe ha tokoni naʻe vahe ki ai, ʻa e fōmú pea ʻoange ia ki ha kalake. Te ne lekooti ʻa e fakanofó ‘i he MTTK mo teuteu ha tohi fakamoʻoni ʻo e fakanofó.
ʻOku totonu ke fakaʻaongaʻi e hingoa fakalao lolotonga ʻo e tokotahá ʻi he lekooti fakanofó mo e tohi fakamoʻoní.
18.11
Ko Hono Vaheʻi ʻo e Kāingalotú ke Ngāue ʻi ha Ngaahi Uiuiʻí
Ko e kāingalotu ʻoku ui mo hikinimaʻi ke nau ngāue ʻi he konga lahi ʻo e ngaahi lakanga faka-Siasí, ʻoku totonu ke vaheʻi ke nau ngāue ʻi he fatongia ko iá (vakai, Sione 15:16; Tokāteline mo e Ngaahi Fuakava 42:11; vakai foki, 3.4.3.1 ʻi he tohi tuʻutuʻuni ko ʻení). ʻI he lolotonga ʻo e vaheʻí, ʻoku foaki ai ki he tokotahá (1) ʻa e mafai ke ngāue ʻi he fatongiá mo ha (2) tāpuaki fakatatau mo e tataki ʻa e Laumālié.
ʻOku maʻu ʻe he kau palesiteni fakasiteikí, kau pīsopé, mo e kau palesiteni fakakōlomú ʻa e ngaahi kī ʻo e lakanga fakapalesitenisií ʻi he taimi ʻoku vaheʻi ai kinautolú (vakai, 3.4.1.1). Neongo ia, ka ʻoku ʻikai totonu ke fakaʻaongaʻi ʻa e foʻi lea ngaahi kií ʻi he taimi ʻoku vaheʻi ai ʻa e kāingalotú ke nau ngāue ʻi ha ngaahi uiuiʻi kehe, kau ai e ongo tokoni ʻi he kau palesitenisií.
Ko e fakamatala fekauʻaki mo hono ui, fakanofo, mo e vaheʻi ʻo e kau pīsopé, vakai, 30.7.
18.11.1
Tokotaha ʻOkú Ne Fakahoko ʻa e Vaheʻí
Ko e vaheʻí ʻoku fakahoko ia ʻe ha taha maʻu Lakanga Taulaʻeiki Faka-Melekisēteki. Kuo pau ke ne maʻu ha fakangofua mei he taki ʻokú ne maʻu ʻa e ngaahi kī totonu ʻo e lakanga fakataulaʻeikí. Ko kinautolu ʻoku fakamafaiʻi ke nau fakahoko ʻa e vaheʻí ʻoku fakamahino atu ia ʻi he 30.8. ʻOku ʻikai totonu ke fakahoko ʻe ha kaumātuʻa pe tuʻu ʻi he siakalé ʻi he taimi ʻoku vaheʻi ai ha tangata ki ha fatongia ʻoku fiemaʻu ai ʻa e tangatá ke ne hoko ko ha taulaʻeiki lahi.
Fakatatau ki he fakahinohino ʻa e taki maʻu mafai pulé, ʻe lava ke kau ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange ʻi ha vaheʻi. ʻOku ʻuluaki vaheʻi ʻa e kau palesitení kimuʻa pea toki vaheʻi honau kau tokoní.
ʻE lava ke fakangofua ʻe ha taki maʻu mafai pule ha husepāniti ʻokú ne maʻu ʻa e Lakanga Taulaʻeiki Faka-Melekisētekí ke tuʻu ʻi he siakalé ʻi hano vaheʻi hono uaifí pe fānaú ʻo tatau ai pē kapau ʻoku ʻikai taau kakato mo e temipalé (vakai, 18.3).
18.11.2
Ngaahi Fakahinohinó
ʻE hilifaki fakamaʻamaʻa ʻe ha taha pe kau maʻu Lakanga Taulaʻeiki Faka-Melekisēteki kuo ʻosi fakamafaiʻi, honau nimá ʻi he ʻulu ʻo e tokotahá. Pea ko e tokotaha te ne fakahoko ʻa e leá:
-
Te ne ui e hingoa kakato ʻo e tokotahá.
-
Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.
-
Vaheʻi ʻa e tokotahá ki he tuʻunga totonu ʻi he siteikí, uōtí, kōlomú pe kalasí.
-
Foaki ʻa e ngaahi kií ʻo kapau ʻoku totonu ke maʻu ia ʻe he tokotahá.
-
Foaki ha tāpuaki ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
Ko e vaheʻí ʻoku ʻikai ko ha fakatahaʻanga ke kau ai ha ngaahi lotu pe ngaahi fakamoʻoni. Pe ko ha taimi ke fai ai ha ngaahi fakahinohino fakaʻāuliliki. ʻOku fai e ngaahi meʻa ko iá ʻi he lolotonga ʻo e akoʻí, kae ʻikai ko ha konga ʻo e tāpuakí.
18.12
Ko Hono Fakatapui ʻo e Loló
Kuo pau ke fakatapui ʻe he kau maʻu lakanga Taulaʻeiki Faka-Melekisētekí ʻa e lolo ʻōlivé kimuʻa pea toki fakaʻaongaʻi ia ki hono tākai ʻo e taha puké pe faingataʻaʻiá (vakai, Sēmisi 5:14). He ʻikai lava ke ngāue ʻaki ha toe faʻahinga lolo kehe.
ʻOku ʻikai totonu ke inu ʻe he kāingalotú ʻa e lolo tapú pe ʻai ki he konga ʻo e sinó ʻoku uesiá.
18.12.1
Tokotaha ʻOkú Ne Fakahoko ʻa e Ouaú
ʻE lava ke fakatapui ʻa e loló ʻe ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange. ʻOku ʻikai fiemaʻu ke nau toe kole ha ngofua mei ha taki lakanga fakataulaʻeiki.
18.12.2
Ngaahi Fakahinohinó
Ke fakatapui ʻa e loló, ʻe hanga ʻe he taha maʻu Lakanga Taulaʻeiki Faka-Melekisētekí ʻo:
-
Pukepuke ʻa e meʻa ʻaiʻanga lolo ʻōlivé, kuo ʻosi fakaava.
-
Fakataufolofola ki he Tamai Hēvaní ʻi ha lotu.
-
Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.
-
Fakatapui ʻa e loló (ʻikai ko e hiná) pea vaheʻi ia ki he tākai mo e tāpuakiʻi ʻo e mahakí mo e faingataʻaʻiá.
-
Fakaʻosi ʻi he huafa ʻo Sīsū Kalaisí.
18.13
Ko e Faingāue ki he Mahakí
Ko e angamahení, ko e faingāue ki he mahakí ʻoku totonu ke fakahoko ia ʻi ha kole ʻa e tokotaha ʻoku faingāue ki aí pe ko ha kole ʻa ha niʻihi kehe ʻoku nau hohaʻa ki ai pea ʻe fakatatau leva ʻa e tāpuakí ki heʻenau tuí (vakai, Sēmisi 5:14; Tokāteline mo e Ngaahi Fuakava 24:13–14; 42:43–44, 48–52).
Ko e faingāue ki he mahakí, “i he hilifaki ʻo e nimá,” ʻoku konga ua: tākai ʻaki ʻa e loló mo e fakamaʻu ʻo e tākaí ʻaki ha tāpuaki. Kapau ʻoku ʻikai maʻu ha lolo kuo fakatapui, ʻe lava pē ke fai ha tāpuaki ʻi he mafai ʻo e Lakanga Taulaʻeiki Faka-Melekisētekí kae ʻikai fai ha tākai.
Kapau ʻe kole ʻe ha taha ha faingāue tuʻo lahi ʻi he puke tatau pē, he ʻikai fiemaʻu ha toe tākai. ʻE lava ke fakahoko ʻe ha taha maʻu lakanga fakataulaʻeiki ha toe faingāue ʻi he hilifaki ʻo e nimá mo e mafai ʻo e Lakanga Taulaʻeiki Faka-Melekisētekí. Pea ʻe lava pē ke toe fakahoko ha tākai.
ʻOku ʻikai totonu ke kole ʻe he kau maʻu lakanga fakataulaʻeiki ʻoku ʻaʻahi ki he ngaahi falemahakí ha faingamālie ke nau faingāue ai ki he mahakí.
18.13.1
Tokotaha ʻOkú Ne Fakahoko ʻa e Tāpuakí
Ko e kau maʻu Lakanga Taulaʻeiki Faka-Melekisētekí pē te nau lava ʻo faingāue ki he mahakí pe faingataʻaʻiá. ʻOku ʻikai fiemaʻu ke nau toe kole ha ngofua mei ha taki lakanga fakataulaʻeiki. Kapau ʻe lava, ʻe faingāue pē ʻa e tamai ʻokú ne maʻu e Lakanga Taulaʻeiki Faka-Melekisētekí ki he kau mēmipa ʻo hono fāmilí ʻoku puké.
Ko e angamahení, ʻe faingāue ha maʻu Lakanga Taulaʻeiki Faka-Melekisēteki ʻe toko ua pe tokolahi ange, ki he taha puké. Neongo ia, ka ʻe lava pē ʻe he toko taha ke ne fakahoko fakatouʻosi ʻa e tākaí mo e fakamaʻú.
18.13.2
Ngaahi Fakahinohinó
Ko e faingāue ki he mahakí ʻoku konga ua: ko hono tākai ʻaki ʻa e loló mo hono fakamaʻu ʻo e tākaí.
Ko e tākai ʻaki ʻa e loló ʻoku fakahoko ia ʻe ha taha maʻu Lakanga Taulaʻeiki Faka-Melekisēteki pē ʻe toko taha. Te ne:
-
ʻAi ha tulutā ʻe taha ʻo e lolo tapú ʻi he ʻulu ʻo e tokotahá.
-
Hili fakamaʻamaʻa hono ongo nimá ki he ʻulu ʻo e tokotahá pea ui e tokotahá ʻaki hono hingoa kakató.
-
Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.
-
Fakahaaʻi ʻokú ne tākai ʻaki ia e lolo kuo ʻosi fakatapui ki hono tākai mo tāpuakiʻi ʻo e mahakí mo e faingataʻaʻiá.
-
Fakaʻosi ʻi he huafa ʻo Sīsū Kalaisí.
Ke fakamaʻu ʻa e tākaí, ʻe hilifaki fakamaʻamaʻa ʻe ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange honau nimá ki he ʻulu ʻo e tokotahá. Ko e tokotaha leva te ne fakamaʻu ʻa e tākaí:
-
Te ne ui e hingoa kakato ʻo e tokotahá.
-
Fakahaaʻi ʻokú ne fakamaʻu ʻa e tākaí ʻaki e mafai ʻo e Lakanga Taulaʻeiki Faka-Melekisētekí.
-
Foaki ha tāpuaki ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
18.14
Ngaahi Tāpuaki ʻo e Fakafiemālie mo e Faleʻi, Kau ai mo e Ngaahi Tāpuaki Fakaetamaí
18.14.1
Tokotaha ʻOkú Ne Fakahoko ʻa e Tāpuakí
ʻE lava ʻe he kau maʻu Lakanga Taulaʻeiki Faka-Melekisētekí ke foaki ha ngaahi tāpuaki ʻo e fakafiemālie mo e faleʻi ki he kau mēmipa ʻo e fāmilí pea mo ha niʻihi kehe ʻoku nau kole ia. ʻOku angamaheni ʻaki ke foaki ʻa e ngaahi tāpuakí ni ʻe he kau mēmipa ʻo e fāmilí, kau tangata ngāue fakaetauhí, pe kau taki lakanga fakataulaʻeikí.
ʻE lava ke foaki ʻe ha tamai ʻokú ne maʻu e Lakanga Taulaʻeiki Faka-Melekisētekí ha ngaahi tāpuaki fakaetamai ki heʻene fānaú. ʻE ʻaonga ʻaupito ʻeni ʻi he taimi ke ō ai ʻa e fānaú ki he akó, ō ʻo ngāue fakafaifekau, mali, hū ki he ngāue fakakautaú, pe fepaki mo ha ngaahi faingataʻa makehe. ʻE poupouʻi ʻe he ngaahi mātuʻá ʻenau fānaú ke nau kolea e ngaahi tāpuaki fakaetamaí ʻi he taimi ʻo e faingataʻá. ʻE lava ke lekooti e ngaahi tāpuaki fakaetamaí ke fakaʻaongaʻi fakafoʻituitui.
ʻOku ʻikai fiemaʻu ha taha maʻu Lakanga Taulaʻeiki Faka-Melekisēteki ia ke ne kole ha ngofua mei ha taki lakanga fakataulaʻeiki ka ne foaki ha tāpuaki ʻo e fakafiemālie mo ha faleʻi pe tāpuaki fakaetamai.
18.14.2
Ngaahi Fakahinohinó
Ke foaki ha tāpuaki ʻo e fakafiemālie mo e faleʻí pe tāpuaki fakaetamai, ʻe hilifaki fakamaʻamaʻa ʻe ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange honau nimá ki he ʻulu ʻo e tokotahá. Pea ko e tokotaha te ne fakahoko ʻa e leá:
-
Te ne ui e hingoa kakato ʻo e tokotahá.
-
Te ne fakahaaʻi ʻoku fakahoko ʻa e tāpuakí ʻi he mafai ʻo e Lakanga Taulaʻeiki Faka-Melekisētekí.
-
Foaki ha tāpuaki, fakafiemālie, mo e faleʻi ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
18.15
Ko e Tāpuakiʻi ʻo e Ngaahi ʻApi Nofoʻangá
ʻE lava ke tāpuakiʻi e ngaahi ʻapi ʻo e kāingalotú ʻi he mafai ʻo e Lakanga Taulaʻeiki Faka-Melekisētekí. ʻOku ʻikai fiemaʻu ke maʻu ʻosi ʻa e ngaahi ʻapí pe ʻikai ke toe ʻi ai hano moʻua kae toki lava ke tāpuakiʻi. ʻOku ʻikai fakatapui ʻa e ngaahi ʻapi nofoʻangá ki he ʻEikí ʻo hangē ko e ngaahi falelotu ʻo e Siasí.
18.15.1
Tokotaha ʻOkú Ne Fakahoko ʻa e Tāpuakiʻí
Ko e ʻapí ʻoku tāpuakiʻi ia ʻe ha taha maʻu Lakanga Taulaʻeiki Faka-Melekisēteki. Kapau ʻoku ʻikai ha taha maʻu Lakanga Taulaʻeiki Faka-Melekisēteki ʻi he ʻapí:
-
ʻE lava ke fakaafeʻi ʻe he fāmilí ha kaungāmeʻa ofi, ko ha kāinga, pe tangata ngāue fakaetauhi ʻokú ne maʻu e Lakanga Taulaʻeiki Faka-Melekisētekí ke ne tāpuakiʻi ʻa e ʻapí. ʻOku ʻikai fiemaʻu ʻa e tokotahá ke ne kole ha fakangofua mei ha taki lakanga fakataulaʻeiki.
-
ʻE lava ke fakatahataha ha fāmili ʻo fakahoko ha lotu ʻo fakatatau mo e fakahinohino ʻa e Laumālié. ʻE lava ke kau ʻi he lotú ʻa e ngaahi meʻa ʻoku fakamatalaʻi ʻi he 18.15.2, fika 3.
18.15.2
Ngaahi Fakahinohinó
Ke tāpuakiʻi ha ʻapi, ko e tokotaha maʻu Lakanga Taulaʻeiki Faka-Melekisētekí, te ne:
-
Fakataufolofola ki he Tamai Hēvaní ʻo hangē ko ia ʻi he lotú.
-
Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.
-
Tāpuakiʻi ʻa e ʻapí ko ha potu toputapu ʻe lava ke ʻafio ai ʻa e Laumālie Māʻoniʻoní pea mo fakahoko ha ngaahi lea ʻo fakatatau mo e fakahinohino ʻe he Laumālié. Hangē ko ʻení, te ne lava ke tāpuakiʻi ʻa e ʻapí ke hoko ko ha feituʻu ʻe lava ke lotu ai ʻa e kau mēmipa ʻo e fāmilí, maluʻanga mei māmani, tupulaki fakalaumālie ai, mo teuteu ki he ngaahi feohi fakafāmili taʻengatá.
-
Fakaʻosi ʻi he huafa ʻo Sīsū Kalaisí.
18.16
Tāpuakiʻi ʻo e Faʻitoká
18.16.1
Tokotaha ʻOkú Ne Tāpuakiʻi ʻa e Faʻitoká
Ko e taha ʻokú ne tāpuakiʻi ʻa e faʻitoká ʻoku totonu ke ne maʻu ʻa e Lakanga Taulaʻeiki Faka-Melekisētekí mo ʻosi fakamafaiʻi ʻe he taki lakanga fakataulaʻeiki ʻokú ne tokangaʻi ʻa e ouaú.
Kapau ko e loto ʻo e fāmilí, pea ʻe lava pē ke fakahoko ha lotu ʻi he faʻitoká kae ʻikai ko ha lotu tāpuakiʻi. ʻE lava ke fakahoko ia ʻe ha taha pē ʻe fili ʻe he fāmilí.
Ke fakahoko ʻa e tāpuakiʻi ʻo ha faʻitoka, kuo pau ke fakahaaʻi ʻe ha taha ʻoku mavahe mei hono uooti totonú haʻane lekomeni temipale ʻoku kei ʻaongá, ki he taki lakanga fakataulaʻeiki ʻokú ne tokangaʻi ʻa e ouaú. Pe te ne fakahaaʻi ange haʻane Lekomeni ke Fakahoko ha Ouau kuo ʻosi fakamoʻoni ai ha mēmipa ʻo ʻene kau pīsopelikí.
18.16.2
Ngaahi Fakahinohinó
Ke tāpuakiʻi ha faʻitoka, ko e tokotaha maʻu Lakanga Taulaʻeiki Faka-Melekisētekí te ne:
-
Fakataufolofola ki he Tamai Hēvaní ʻo hangē ko ia ʻi he lotú.
-
Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.
-
Tāpuakiʻi mo fakatapui ʻa e konga kelekele ʻoku telio aí ko ha mālōlōʻanga ki he sino ʻo e pekiá.
-
Lotua ke fakatapui mo maluʻi ʻa e feituʻú kae ʻoua kuo hoko ʻa e Toetuʻú (ʻi he feituʻu ʻe taau aí).
-
Kole ki he Tamai Hēvaní ke fakafiemālieʻi ʻa e fāmilí mo fakahaaʻi ha ngaahi fakakaukau ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.
Kapau ʻoku fakamomofi ha sino ʻo ha mēmipa ʻo e Siasí, ʻe fakaʻaongaʻi ʻe he taki maʻu mafai pulé ʻa ʻene fakakaukau leleí, ke fili pe ʻe tāpuakiʻi ʻa e feituʻu ʻoku tauhi ai ʻa e efuefú. Te ne fakakaukauʻi foki e fakaʻamu ʻa e fāmilí fakataha mo e ngaahi anga fakafonuá pea mo e laó. ʻE hanga ʻe he tangata ʻokú ne tāpuakiʻí ʻo fakafeʻungaʻi ʻa e ngaahi fakahinohino ki hono tāpuakiʻi ha faʻitoká.
18.17
Ngaahi Tāpuaki Fakapēteliaké
ʻOku ʻi ai e totonu ʻa e mēmipa moʻui taau kotoa pē kuo ʻosi papitaiso ke maʻu ha tāpuaki fakapēteliake, ʻa ia te ne ʻomi ha fakahinohino fakalaumālie mei he Tamai Hēvaní (vakai, Sēnesi 48:14–16;49; 2 Nīfai 4:3–11). ʻE poupouʻi ʻe he ngaahi mātuʻá mo e kau taki ʻo e Siasí ʻa e kāingalotú ke nau mateuteu fakalaumālie ke maʻu honau tāpuaki fakapēteliaké.
ʻE ʻinitaviu ʻe he pīsopé pe ʻe ha tokoni naʻe vahe ki ai, ʻa e kāingalotu ʻoku fakaʻamu ke maʻu hanau tāpuaki fakapēteliaké. Kapau ʻoku moʻui taau ʻa e mēmipá, ʻe teuteu ʻe he taha fakahoko ʻinitaviú ha Fakaongoongolelei Tāpuaki Fakapēteliake. Te ne fakahū ia ki he Polokalama ʻo e Tāpuaki Fakapēteliaké ʻi he ChurchofJesusChrist.org.
ʻE fakapapauʻi ʻe he tokotaha ʻokú ne foaki ha Fakaongoongolelei ki ha Tāpuaki Fakapēteliaké ʻoku fakapotopoto feʻunga ʻa e tokotahá ke mahino kiate ia ʻa e mahuʻinga mo e natula toputapu ʻo e tāpuakí. Ko hono moʻoní ʻoku totonu ke kei taʻu siʻi feʻunga pē ʻa e mēmipá ke kei ʻi ai ha ngaahi fili mahuʻinga lahi ʻi he kahaʻu ʻo ʻene moʻuí. Neongo ia, ka ʻoku poupouʻi foki mo e kakai lalahi matuʻotuʻa angé ke nau maʻu honau tāpuaki fakapēteliaké. ʻOku ʻikai totonu ke fokotuʻu ʻe he kau taki lakanga fakataulaʻeikí ha faʻahinga taʻu fakangatangata ki ha mēmipa ka ne toki maʻu hono tāpuaki fakapēteliaké.
ʻOku totonu ke mahino ki ha taha ului foʻou ʻa e ngaahi tefitoʻi tokāteline ʻo e Siasí kimuʻa pea toki maʻu hono tāpuaki fakapēteliaké.
Ko e fakamatala fekauʻaki mo e ngaahi tāpuaki fakapēteliake ʻi he ngaahi tūkunga makehé, vakai, 38.2.10.
18.17.1
Ko Hono Maʻu ʻo ha Tāpuaki Fakapēteliaké
Ka hili hano maʻu ʻo ha fakaongoongolelei, ʻe fetuʻutaki leva ʻa e mēmipá ki he pēteliaké ke fokotuʻu ha taimi ke maʻu ai hono tāpuaki fakapēteliaké. ʻI he ʻaho ne alea ki aí, ʻoku totonu ke ʻalu ʻa e mēmipá ki he pēteliaké ʻi he loto faʻa lotu pea ʻi he teunga ʻo e Sāpaté. ʻE lava pē ke ʻaukai ʻa e mēmipá, ka ko e ʻaukaí ʻoku ʻikai ko ha meʻa pau ʻoku fiemaʻu.
Ko e tāpuaki fakapēteliake kotoa pē ʻoku toputapu, ʻikai fakahāhāholo, pea ʻoku fakafoʻituitui. Ko ia ai, ʻoku foaki fūfūnaki ia tukukehe pē ha kau mēmipa tokosiʻi ʻo e fāmilí ʻe lava ʻo fakaafeʻi.
ʻOku totonu ke mataʻikoloa ʻaki ʻe he taha ʻoku maʻu hono tāpuaki fakapēteliaké ʻa hono fakaleá, fakalaulauloto ki ai, pea moʻui taau ke ne maʻu ʻa e ngaahi tāpuaki kuo talaʻofá, ʻi he moʻuí ni mo ʻitāniti.
ʻOku ʻikai totonu ke fakafehoanaki ʻe he kāingalotu ʻo e Siasí ʻa e ngaahi tāpuakí pea ʻoku ʻikai totonu ke fakamatalaʻi ia tukukehe pē ki he kau mēmipa ofi ʻo e fāmilí. ʻOku ʻikai totonu ke lau ʻa e ngaahi tāpuaki fakapēteliaké ʻi he ngaahi houalotu ʻa e Siasí pe ko ha ngaahi fakataha fakatokolahi kehe.
Kapau ʻoku ʻikai ʻasi ʻi ha tāpuaki fakapēteliake ʻa e hakó, ʻe lava ke tānaki atu ʻe he pēteliaké ʻamui ange ʻa e hakó.
18.17.2
Ko Hono Maʻu ha Tatau ʻo e Ngaahi Tāpuaki Fakapēteliaké
ʻOku totonu ke maluʻi fakalelei ʻe ha taha kuo maʻu hano tāpuaki fakapēteliake ʻa e tatau kuo pākí. Ka neongo ia, kapau ʻe mole pe ʻauha ʻa e tatau ko ʻení, ʻe lava ke kole ʻe he tokotahá ni ha tatau foʻou. Te ne lava ʻo fakahoko ʻa e kolé ni ʻi he Ngaahi Tāpuaki Fakapēteliaké ʻi he ChurchofJesusChrist.org. Kapau ʻoku ʻikai malava ʻeni, ʻe lava ke fetuʻutaki ʻa e tokotahá ki heʻene pīsopé ke maʻu ha tokoni.
18.17.3
Fakamatala Lahi Ange
Ki ha fakamatala lahi ange fekauʻaki mo e tāpuaki fakapēteliaké, vakai, 38.2.10 mo e “Ngaahi Tāpuaki Fakapēteliaké.”
18.18
ʻEnitaumeni Fakatemipalé mo e Silá
Ko e fakamatala ki he ʻenitaumeni fakatemipalé mo e ouau silá, vakai ki he vahe 27.
18.19
Saati ʻo e Ngaahi Fakanofó
|
Tuʻungá |
Fakaongoongoleleiʻi ʻe |
Fakangofua ʻe |
Hikinimaʻi ʻe he |
ʻInitaviu mo fakanofo ʻe he |
|---|---|---|---|---|
Tuʻungá Pēteliake | Fakaongoongoleleiʻi ʻe Kau palesitenisī fakasiteiki | Fakangofua ʻe Kōlomu ʻo e Kau ʻAposetolo ʻe Toko Hongofulu Mā Uá | Hikinimaʻi ʻe he Kāingalotú ʻi he konifelenisi fakasiteiki | ʻInitaviu mo fakanofo ʻe he Palesiteni fakasiteiki hili ʻene maʻu ha fakangofua mei he Kōlomu ʻo e Kau ʻAposetolo ʻe Toko Hongofulu Mā Uá; pe ko ha mēmipa ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá |
Tuʻungá Taulaʻeiki lahi | Fakaongoongoleleiʻi ʻe Pīsopé mo e kau palesitenisī fakasiteikí | Fakangofua ʻe Kau palesitenisī fakasiteikí mo e fakataha alēleaʻanga māʻolungá | Hikinimaʻi ʻe he Kāingalotu ʻi he konifelenisi fakasiteikí | ʻInitaviu mo fakanofo ʻe he ʻInitaviu ʻe he pīsopé mo e palesiteni fakasiteikí pe ko ha tokoni ne vahe ki ai; fakanofo ʻo fakatatau mo e fakahinohino ʻa e palesiteni fakasiteikí |
Tuʻungá Kaumātuʻá | Fakaongoongoleleiʻi ʻe Pīsope | Fakangofua ʻe Kau palesitenisī fakasiteikí mo e fakataha alēleaʻanga māʻolungá | Hikinimaʻi ʻe he Kāingalotú ʻi he konifelenisi fakasiteikí pe konifelenisi fakavahefonuá | ʻInitaviu mo fakanofo ʻe he ʻInitaviu ʻe he pīsopé pea mo e palesiteni fakasiteikí pe ʻe ha tokoni ne vahe ki ai (ʻi ha vahefonua, ʻinitaviu ʻe ha mēmipa ʻo e kau palesitenisī fakamisioná pe ko e palesiteni fakavahefonuá kapau ʻe vahe ki ai; vakai, 6.3) Fakanofo ʻi he malumalu ʻo e fakahinohino ʻa e palesiteni fakasiteikí (ʻi ha vahefonua, fakanofo ʻi he malumalu ʻo e fakahinohino ʻa e palesiteni fakamisioná pe palesiteni fakavahefonuá kapau ʻe vahe ki ai) |
Tuʻungá Pīsopé | Fakaongoongoleleiʻi ʻe Kau palesitenisī fakasiteikí, ʻo fakaʻaongaʻi e MTTK | Fakangofua ʻe Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá | Hikinimaʻi ʻe he Kāingalotú ʻi he houalotu sākalamēnití | ʻInitaviu mo fakanofo ʻe he Palesiteni fakasiteikí, hili ʻene maʻu ha fakangofua mei he Kau Palesitenisī ʻUluakí (vakai, 30.7) |
Tuʻungá Taulaʻeikí | Fakaongoongoleleiʻi ʻe Pīsope | Fakangofua ʻe Kau Pīsopelikí | Hikinimaʻi ʻe he Kāingalotú ʻi he houalotu sākalamēnití | ʻInitaviu mo fakanofo ʻe he ʻInitaviu ʻe he pīsopé; fakanofo ʻi he malumalu ʻo e fakahinohino ʻa e pīsopé |
Tuʻungá Akonaki pe tīkoni | Fakaongoongoleleiʻi ʻe Pīsope | Fakangofua ʻe Kau Pīsopelikí | Hikinimaʻi ʻe he Kāingalotú ʻi he houalotu sākalamēnití | ʻInitaviu mo fakanofo ʻe he ʻInitaviu ʻe he pīsopé pe ko ha tokoni ne vahe ki ai; fakanofo ʻo fakatatau mo e fakahinohino ʻa e pīsopé |