« 18. Te mau ’ōro’a ’e te mau ha’amaita’ira’a o te autahu’ara’a » Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 18. Te mau ’ōro’a ’e te mau ha’amaita’ira’a o te autahu’ara’a », Buka arata’i rahi.
18.
Te mau ’ōro’a ’e te mau ha’amaita’ira’a o te autahu’ara’a
18.0
’Ōmuara’a
E mau ’ohipa mo’a te mau ’ōro’a ’e te mau ha’amaita’ira’a e ravehia nā roto i te ha’amanara’a o te autahu’ara’a ’e nā roto i te i’oa o Iesu Mesia. ’Ia rave ana’e te mau taea’e o te autahu’ara’a i te mau ’ōro’a ’e te mau ha’amaita’ira’a, tē pe’e ra ïa rātou i te hi’ora’a o te Fa’aora i te ha’amaita’ira’a i te tahi atu mau ta’ata. E hōro’a mai te mau ’ōro’a ’e te mau ha’amaita’ira’a o te autahu’ara’a i te mana o te Atua (hi’o Te Ha’api’ira’a Tumu ’e te mau Fafaura’a 84:20).
E ravehia te mau ’ōro’a ’e te mau ha’amaita’ira’a nā roto i te fa’aro’o i te Metua i te ao ra ’e ia Iesu Mesia ’e ma te arata’ihia e te Vārua Maita’i. E ha’apāpū te feiā fa’atere ē, tē ravehia ra te reira nā roto i te parau fa’ati’a (i te vāhi e tītauhia), nā roto i te ha’amanara’a o te autahu’ara’a i tītauhia, mai te au i te ravera’a ti’a, ’e nā te feiā ti’amā (hi’o 18.3).
Nō te mau ture arata’i nō ni’a i te mau ’ōro’a ’e te mau ha’amaita’ira’a o te autahu’ara’a, hi’o 38.2.
18.1
Te mau ’ōro’a nō te fa’aorara’a ’e te fa’ateiteira’a
Tei roto i te autahu’ara’a te ha’amanara’a nō te fa’atere i te mau ’ōro’a o te ’evanelia e tītauhia nō te fa’aorara’a ’e te fa’ateiteira’a. E rave te ta’ata i te mau fafaura’a mo’a ’e te Atua i te taime ’a fāri’i ai rātou i teie mau ’ōro’a. Teie i raro nei te mau ’ōro’a nō te fa’aorara’a ’e te fa’ateiteira’a :
-
Bāpetizora’a
-
Ha’amaura’a ’e te hōro’a o te Vārua Maita’i
-
Te hōro’ara’a i te Autahu’ara’a a Melehizedeka ’e te fa’atōro’ara’a i te hō’ē tōro’a (nō te mau tāne)
-
’Ōro’a hiero
-
Tā’atira’a hiero
’Aita e ravehia te mau ’ōro’a nō te fa’aorara’a ’e te fa’ateiteira’a nō te mau ta’ata huma roro, e fa’ariro ho’i te reira fifi ia rātou ’ei ta’ata ti’a’au ’ore, ’aita e nehenehe e rave i te mau fafaura’a i mua i te Atua. ’Aita ato’a teie mau ’ōro’a e ravehia nō te mau tamari’i tei pohe nā mua a’e i te 8 o te matahiti. Teie mau ta’ata « ’ua fa’aorahia ïa i roto i te bāsileia tiretiera nō te ao ra » (Te Ha’api’ira’a Tumu ’e te mau Fafaura’a 137:10 ; hi’o ato’a Moroni 8:8–12).
18.2
Te tahi atu mau ’ōro’a ’e mau ha’amaita’ira’a
Nā roto i te tahi atu mau ’ōro’a ’e mau ha’amaita’ira’a e ti’a ai i te mau tamari’i a te Atua ’ia fāri’i i tōna mana, te fa’aorara’a, te tāmāhanahanara’a ’e te arata’ira’a. Teie i raro nei te reira mau ’ōro’a ’e mau ha’amaita’ira’a :
-
Hōro’ara’a i te i’oa ’e te ha’amaita’ira’a i te mau tamari’i
-
Te ’ōro’a mo’a
-
Hōro’ara’a i te Autahu’ara’a a Aarona ’e te fa’atōro’ara’a i te hō’ē tōro’a (nō te feiā ’āpī tamāroa ’e te mau tāne)
-
Fa’ata’ara’a i te mau melo nō te tāvini i roto i te mau pi’ira’a
-
Ha’amo’ara’a i te hinu
-
Ha’amaita’ira’a i te feiā ma’i
-
Mau ha’amaita’ira’a nō te tāmāhanahana ’e nō te a’o, ’e tae noa atu te mau ha’amaita’ira’a a te metua tāne
-
Ha’amo’ara’a i te mau fare
-
Ha’amoara’a i te mau mēnema
-
Mau ha’amaita’ira’a pātereāreha nā te mau pātereāreha tei fa’atōro’ahia
18.3
’Āmuira’a i roto i te hō’ē ’ōro’a ’aore rā, hō’ē ha’amaita’ira’a
Te feiā e rave ’aore rā, e ’āmui i roto i te hō’ē ’ōro’a ’aore rā, te hō’ē ha’amaita’ira’a, e ti’a ia rātou ’ia mau i te ha’amanara’a i tītauhia ’e ’ia ti’amā. Te ti’ara’a mau, te fāito ti’a o te ti’amā, ’o te ti’amā ïa e au nō te maura’a i te hō’ē parau fa’ati’a nō te hiero. Terā rā, ma te arata’ihia e te Vārua ’e te mau arata’ira’a i roto i teie pene, e nehenehe te mau ’episekōpo ’e te mau peresideni titi e fa’ati’a i te mau metua tāne ’e te mau tāne fa’aipoipo tei mau i te tōro’a autahu’ara’a i tītauhia, nō te rave ’aore rā, nō te ’āmui i roto i te tahi mau ’ōro’a ’e mau ha’amaita’ira’a, noa atu ē, ’aita rātou i ti’amā hope roa nō te hiero. Te hō’ē taea’e tei mau i te autahu’ara’a, ’aita i fa’atītī’aifarohia tāna mau hara teimaha, ’eiaha ’oia e ’āmui i roto.
Te ti’ara’a mau, te feiā fa’atere ana’e o te autahu’ara’a ’e te tahi atu mau taea’e tei mau i te autahu’ara’a e mau melo ’utuāfare fātata ’e e mau hoa, ’o tē ’āmui i roto i te hō’ē ’ōro’a ’aore rā, hō’ē ha’amaita’ira’a.
Mai te mea hō’ē ana’e ’aore rā, e piti taea’e nō te autahu’ara’a o tē ’āmui i roto, e tu’u ha’amāmā noa rāua tāta’itahi i tō rāua rima i ni’a i te upo’o o te ta’ata. Mai te mea e rave rahi ’o tē ’āmui i roto, e ti’a ïa rātou i roto i te hō’ē ha’amenemenera’a ’āti a’e i te ta’ata e fāri’i ra i te ’ōro’a ’aore rā, i te ha’amaita’ira’a. E tu’u ha’amāmā noa te ta’ata tāta’itahi i tōna rima ’atau i ni’a i te upo’o o te ta’ata (’aore rā, i raro a’e i te ’aiū) ’e tōna rima aui i ni’a i te tapono o te taea’e i tōna pae ’aui. Nā te hō’ē e fa’ahiti i te parau nō te rave i te ’ōro’a ’aore rā, nō te hōro’a i te ha’amaita’ira’a.
Te ravera’a ’aore rā, te fāri’ira’a i te tahi mau ’ōro’a ’e mau ha’amaita’ira’a, e tītauhia te parau fa’ati’a a te ti’a fa’atere rahi tei mau i te mau tāviri i tītauhia (hi’o 3.4.1). E roa’a ato’a mai te parau fa’ati’a nā roto mai i te hō’ē ta’ata tāna i fa’ati’a, mai te hō’ē o tōna nā tauturu. Hi’o i te tāpura i muri nei.
’O vai te feiā fa’atere tei mau i te mau tāviri nō te hōro’a i te parau fa’ati’a nō te rave ’aore rā, nō te fāri’i i te mau ’ōro’a o te fa’aorara’a ’e te fa’ateiteira’a ?
|
’Ōro’a |
’O vai tei mau i te mau tāviri |
|---|---|
’Ōro’a Bāpetizora’a | ’O vai tei mau i te mau tāviri Te ’episekōpo (nō te mau tamari’i e 8 matahiti e melo tāpa’ohia) Te peresideni misiōni (nō te mau ta’ata fa’afāriuhia) |
’Ōro’a Ha’amaura’a ’e te hōro’ara’a o te Vārua Maita’i | ’O vai tei mau i te mau tāviri Te ’episekōpo (nō te mau tamari’i e 8 matahiti e melo tāpa’ohia) Te peresideni misiōni (nō te mau ta’ata fa’afāriuhia) |
’Ōro’a Te hōro’ara’a o te Autahu’ara’a a Melehizedeka ’e te fa’atōro’ara’a i te hō’ē tōro’a (nō te mau tāne) | ’O vai tei mau i te mau tāviri Peresideni titi |
’Ōro’a ’Ōro‘a hiero | ’O vai tei mau i te mau tāviri ’Episekōpo ’e te peresideni titi |
’Ōro’a Tā’atira’a hiero | ’O vai tei mau i te mau tāviri ’Episekōpo ’e te peresideni titi |
’O vai te feiā fa’atere tei mau i te mau tāviri nō te hōro’a i te parau fa’ati’a nō te rave ’aore rā, nō te fāri’i i te mau ’ōro’a o te fa’aorara’a ’e te fa’ateiteira’a ?
|
’Ōro’a ’aore rā, ha’amaita’ira’a |
’O vai tei mau i te mau tāviri |
|---|---|
’Ōro’a ’aore rā, ha’amaita’ira’a Hōro’ara’a i te i’oa ’e te ha’amaita’ira’a i te mau tamari’i | ’O vai tei mau i te mau tāviri ’Episekōpo |
’Ōro’a ’aore rā, ha’amaita’ira’a Te ’ōro’a mo’a | ’O vai tei mau i te mau tāviri ’Episekōpo |
’Ōro’a ’aore rā, ha’amaita’ira’a Te hōro’ara’a i te Autahu’ara’a a Aarona ’e te fa’atōro’ara’a i te hō’ē tōro’a (nō te feiā ’āpī tamāroa ’e te mau tāne) | ’O vai tei mau i te mau tāviri ’Episekōpo |
’Ōro’a ’aore rā, ha’amaita’ira’a Te fa’ata’ara’a i te mau melo nō te tāvini i roto i te mau pi’ira’a | ’O vai tei mau i te mau tāviri Hi’o te « tāpura nō te mau pi’ira’a » (30.7) |
’Ōro’a ’aore rā, ha’amaita’ira’a Ha’amo’ara’a i te hinu | ’O vai tei mau i te mau tāviri ’Aita e tītauhia te parau fa’ati’a |
’Ōro’a ’aore rā, ha’amaita’ira’a Te ha’amaita’ira’a i te feiā ma’i | ’O vai tei mau i te mau tāviri ’Aita e tītauhia te parau fa’ati’a |
’Ōro’a ’aore rā, ha’amaita’ira’a Te mau ha’amaita’ira’a nō te tāmāhanahana ’e nō te a’o, ’e tae noa atu i te mau ha’amaita’ira’a a te metua tāne | ’O vai tei mau i te mau tāviri ’Aita e tītauhia te parau fa’ati’a |
’Ōro’a ’aore rā, ha’amaita’ira’a Ha’amo’ara’a i te mau fare | ’O vai tei mau i te mau tāviri ’Aita e tītauhia te parau fa’ati’a |
’Ōro’a ’aore rā, ha’amaita’ira’a Ha’amo’ara’a i te mau mēnema | ’O vai tei mau i te mau tāviri Te ti’a fa’atere nō te autahu’ara’a e fa’atere i te tāvinira’a |
’Ōro’a ’aore rā, ha’amaita’ira’a Mau haʼamaitaʼiraʼa pātereāreha | ’O vai tei mau i te mau tāviri ’Episekōpo |
18.4
Te mau ’ōro’a nō te mau tamari’i ’aita i nae’ahia te matahiti
E nehenehe te hō’ē tamari’i ’aita i nae’ahia te matahiti e ha’amaita’ihia, e ha’amauhia, ’e e fa’atōro’ahia i te hō’ē tōro’a o te autahu’ara’a, ’aore rā, e fa’ata’ahia i roto i te hō’ē pi’ira’a, nā roto ana’e i te parau fa’ati’a a (1) te mau metua e ti’ara’a mana tō rāua nō te ’āmui i roto i te fa’aotira’a, ’aore rā, (2) te tīa’i i ha’amanahia. Nō te mau uira’a nō ni’a i te mau ti’ara’a mana o te mau metua e ’ere te mau tīa’i, e ’imi te ’episekōpo ’aore rā, te peresideni titi i te parau mana mai roto mai i te piha tōro’a o te ’Ēkālesia nō te parau a’o rahi ’aore rā, mai roto mai i te piha tōro’a o te retioni (hi’o 38.8.26).
Nō te mau arata’ira’a nō ni’a i te bāpetizora’a ’e te ha’amaura’a i te mau tamari’i ’aita i nae’ahia te matahiti, hi’o 38.2.3.6.
18.5
Mau ’ōro’a e ravehia nō ’e nā te mau ta’ata huma
18.6
Hōro’ara’a i te i’oa ’e te ha’amaita’ira’a i te mau tamari’i
« Te mau melo ato’a nō te ’ēkālesia a te Mesia e tamari’i tā rātou, e ’āfa’i mai ïa rātou ia rātou i te mau peresibutero i mua i te ’ēkālesia, ’e nā rātou e tu’u i tō rātou pu’e rima i ni’a iho ia rātou nā roto i te i’oa o Iesu Mesia, ’e e ha’amaita’i ho’i ia rātou i roto i tōna ra i’oa » (Te Ha’api’ira’a Tumu ’e te mau Fafaura’a 20:70
E ha’amaita’ihia te mau tamari’i ’e e hōro’ahia te i’oa i roto i te purera’a ha’apaera’a mā’a ’e te ’īritira’a mana’o i roto i te pāroita tei reira te mau metua i te nohora’a. Mai te mea ’aita nā metua e noho ’āmui ra, e ravehia te ’ōro’a i roto i te pāroita i reira te tamari’i e ora ai i te ha’amatara’a.
Nā te ’episekōpo e hōro’a i te parau fa’ati’a nō te vāhi ha’amaita’ira’a o te tamari’i ta’a ’ē atu i te vāhi tumu. Teie te mau ta’a-’ē-ra’a, ’oia ho’i, te ha’amaita’ira’a i te hō’ē sābati e ’ere i te sābati ha’apaera’a mā’a, i roto iho ā rā i te mau pāroita e rave rahi mau ’aiū ’āpī ; te mau ha’amaita’ira’a i roto i te tahi atu pāroita tei reira te orara’a o nā metua pa’ari o te tamari’i ’aore rā, e rave rahi melo o te ’utuāfare e ora ra i reira ; ’e te mau ha’amaita’ira’a i roto i te fare.
18.6.1
Nā vai e hōro’a i te ha’amaita’ira’a
Nā te mau taea’e tei mau i te Autahu’ara’a a Melehizedeka e rave i te ’ōro’a o te hōro’ara’a i’oa ’e te ha’amaita’ira’a i te hō’ē tamari’i, mai te au i tei fa’a’itehia i roto i Te Ha’api’ira’a Tumu ’e te mau Fafaura’a 20:70. E hōro’a te feiā fa’atere o te autahu’ara’a i teie mau ha’amāramaramara’a i te mau melo hou tā rātou mau tamari’i e hōro’ahia ai te i’oa ’e e ha’amaita’ihia ai. E ’imi te feiā fa’atere i te mau rāve’a ato’a ’eiaha te mau ta’ata ’aore rā, te mau ’utuāfare ’ia huru ’ē ’e ’ia fa’a’inohia.
Te hō’ē ta’ata ’aore rā, te hō’ē ’utuāfare ’o tē hina’aro ’ia fāri’i te hō’ē tamari’i i te hō’ē i’oa ’e te hō’ē ha’amaita’ira’a, e fa’anahonaho ’oia i te reira ’e te ’episekōpo. Tei iāna te mau tāviri nō te autahu’ara’a nō te hōro’a i te i’oa ’e te ha’amaita’ira’a i te mau tamari’i i roto i te pāroita.
E nehenehe te hō’ē ’episekōpo e fa’ati’a i te hō’ē metua tāne tei mau i te Autahu’ara’a a Melehizedeka ’ia hōro’a i te i’oa ’e ’ia ha’amaita’i i tāna tamari’i noa atu ē, e ’ere te metua tāne i te mea ti’amā hope roa nō te hiero (hi’o 18.3). E fa’aitoito te mau ’episekōpo i te mau metua tāne ’ia fa’aineine ia rātou iho nō te ha’amaita’i i tā rātou iho mau tamari’i.
Nō te fa’ahiti i te pure i roto i te ha’amaita’ira’a i te hō’ē tamari’i, tītauhia i te hō’ē ta’ata i rāpae i tāna pāroita ’ia fa’a’ite i te hō’ē parau fa’ati’a mana nō te hiero i te ti’a fa’atere rahi. ’Aore rā, e nehenehe ’oia e fa’a’ite i te hō’ē Parau fa’ati’a nō te rave i te hō’ē ’ōro’a tei tu’urimahia e te hō’ē melo o tāna ’episekōpora’a.
18.6.2
Mau arata’ira’a
I raro a’e i te arata’ira’a a te ’episekōpora’a, te mau taea’e tei mau i te autahu’ara’a, e ha’aputuputu rātou i roto i te hō’ē ha’amenemenera’a nō te hōro’a i te i’oa ’e nō te ha’amaita’i i te hō’ē tamari’i. E tu’u rātou i tō rātou rima i raro a’e i te ’aiū, ’aore rā, e tu’u ha’amāmā noa rātou i tō rātou rima i ni’a i te upo’o o te hō’ē tamari’i pa’ari ri’i a’e. I muri iho, te ta’ata e fa’ahiti i te pure :
-
E paraparau ’oia i te Metua i te ao ra mai te hō’ē pure te huru.
-
E fa’ahiti ’oia ē, tē ravehia nei te ha’amaita’ira’a nā roto i te mana o te Autahu’ara’a a Melehizedeka.
-
E hōro’a i te i’oa o te tamari’i.
-
E paraparau ’oia i te tamari’i.
-
E hōro’a ’oia i te hō’ē ha’amaita’ira’a i te tamari’i ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
18.6.3
Parau pāpa’ira’a nō te tamari’i ’e te parau fa’a’itera’a nō te ha’amaita’ira’a
Hou ’a ha’amaita’ihia ai te hō’ē tamari’i, e fa’a’ohipa te pāpa’i parau i te fa’anahora’a rāve’a tauturu a te ti’a fa’atere ’e te pāpa’i parau nō te fa’aineine i te hō’ē Parau nō te tamari’i. I muri a’e i te ha’amaita’ira’a, e hāmani ’oia i te parau melora’a i roto i te reira fa’anahora’a ’e e fa’aineine i te hō’ē Parau fa’a’itera’a nō te ha’amaita’ira’a. E tu’urima te ’episekōpo i teie parau fa’a’itera’a, ’e e hōro’a atu i te mau metua ’aore rā, i te mau tīa’i o te tamari’i.
Te i’oa i ni’a i te parau melora’a ’e i ni’a i te parau fa’a’itera’a, hō’ē ā ïa i tei ni’a i te parau fānaura’a, te parau tīvira, ’aore rā, te i’oa mana i teienei.
18.7
Bāpetizora’a
Nō te riro mai ’ei melo nō te ’Ēkālesia ’e ’ia fāri’i i te Vārua Maita’i tītauhia te bāpetizora’a utuhi i roto i te pape ravehia e te hō’ē ta’ata ’o tei mau i te ha’amanara’a. E tītauhia i te feiā ato’a e ’imi i te fa’ateiteira’a, ’ia pe’e i te hi’ora’a o te Fa’aora nā roto i te fāri’ira’a i teie mau ’ōro’a. (Hi’o Mataio 3:13–17 ; Ioane 3:3–7 ; Te mau ’Ohipa 2:37–38 ; 2 Nephi 31:5–10.)
18.7.1
Parau fa’ati’a nō te hō’ē ta’ata e bāpetizohia ’e e ha’amauhia
18.7.1.1
Mau tamari’i melo i tāpa’ohia
Tei te ’episekōpo ra i te mau tāviri o te autahu’ara’a nō te bāpetizo i te mau tamari’i e 8 matahiti te pa’ari, e melo tāpa’ohia i roto i te hō’ē pāroita. E bāpetizohia ’e e ha’amauhia teie mau tamari’i i te 8ra’a ’aore rā, ’eiaha ’ia maoro roa, ’ia tano noa rā, i muri a’e i tō rātou mahana fānaura’a (hi’o Te Ha’api’ira’a Tumu ’e te mau Fafaura’a 68:27). E mau tamari’i teie ’ua oti a’e na tō rātou parau melora’a nō te ’Ēkālesia i te hāmanihia (hi’o 33.6.2). ’Ia ti’a ana’e tō rātou matahiti i te 8, e ha’apāpū te ’episekōpo ē, e ti’a ia rātou ’ia fāri’i i te ’evanelia ’e ’ia bāpetizohia ’e ’ia ha’amauhia.
Nā te ’episekōpo ’aore rā, nā te hō’ē tauturu e fa’atere i te mau uiuira’a nō te bāpetizora’a ’e nō te ha’amaura’a nō :
-
Te mau tamari’i e 8 matahiti e melo tāpa’ohia.
-
Te mau tamari’i e 8 matahiti e ’ere te melo tāpa’ohia, tē vai ra rā hō’ē a’e metua ’aore rā, hō’ē ta’ata ha’apa’o, e melo.
Tē vai ra te mau arata’ira’a nō te mau uiuira’a, i roto i te 38.2.3.3. Nō te mau ha’amāramaramara’a nō ni’a i te fa’a’īra’a i te parau bāpetizora’a ’e te ha’amaura’a, hi’o 18.8.3.
E ha’apa’o ta’a ’ē te mau ’episekōpo i te mau tamari’i e 7 matahiti te pa’ari i roto i te pāroita, ma te hi’opo’a ē, tē tauturu nei tō rātou mau metua ia rātou, te feiā fa’atere ’e te mau ’orometua Paraimere, ’e te feiā tei fa’ata’ahia nō te aupuru i tō rātou ’utuāfare, nō te fa’aineine ia rātou nō te bāpetizora’a ’e te ha’amaura’a. E fa’aitoito ato’a te feiā fa’atere nō te Autahu’ara’a a Melehizedeka ’e nō te Sōtaiete Tauturu i te mau metua ’ia fa’aineine i tā rātou mau tamari’i nō teie mau ’ōro’a.
18.7.1.2
Feiā fa’afāriuhia
Tei te peresideni misiōni i te mau tāviri o te autahu’ara’a nō te bāpetizo i te feiā fa’afāriu i roto i te hō’ē misiōni. E parauhia te mau bāpetizora’a fa’afāriu, ’o te bāpetizora’a ïa o :
-
Te mau ta’ata mai te 9 matahiti e hau atu, ’aitā i bāpetizohia ’e i ha’amauhia a’e nei.
-
Te mau tamari’i mai te 8 matahiti e hau atu, (1) e ’ere te mau metua i te melo, ’aore rā, (2) e bāpetizo ’e e ha’amau-ato’a-hia ra te mau metua hō’ē ā taime ’e te mau tamari’i.
E uiui te mau misiōnare rave tāmau i te feiā fa’afāriu nō te bāpetizora’a ’e te ha’amaura’a. Tē vai ra te mau arata’ira’a i roto i te 38.2.3.3. Nō te mau ha’amāramaramara’a nō ni’a i te fa’a’īra’a i te parau bāpetizora’a ’e te ha’amaura’a, hi’o 18.8.3.
18.7.2
Purera’a bāpetizora’a
E rave-’ōhie-noa-hia te purera’a bāpetizora’a, ma te poto ’e te ’ī i te vārua. Teie te mau mea e ravehia i roto :
-
Pehe marū hou te ha’amatara’a
-
Arohara’a poto nā te taea’e e arata’i ra i te purera’a
-
Hō’ē hīmene ’e hō’ē pure ha’amatara’a
-
Hō’ē ’aore rā, e piti a’ora’a poto nō ni’a i te mau tumu parau o te ’evanelia, mai te bāpetizora’a ’e te hōro’a o te Vārua Maita’i
-
Hō’ē hīmene ta’a ’ē
-
Te bāpetizora’a
-
Hō’ē taime fa’aea-hau-ra’a, ’a taui ai nā ta’ata bāpetizo i tō rāua ’ahu (e nehenehe e fa’ata’i i te pehe ’aore rā, e hīmene i te mau hīmene ’aore rā, te mau hīmene Paraimere, i roto i taua taime ra)
-
Te ha’amaura’a i te mau melo tāpa’ohia e 8 matahiti ; te ha’amaura’a i te feiā fa’afāriu, mai te mea e fa’aoti te ’episekōpo (hi’o 38.2.3.2)
-
Te fa’a’itera’a i te mau ’itera’a pāpū nā te feiā fa’afāriu ’āpī, mai te mea e hina’aro rātou
-
Te hīmene ’e te pure hōpe’a
-
Te pehe i muri a’e i te fa’aotira’a
Mai te mea hō’ē ana’e pāroita i roto i te purera’a bāpetizora’a nō te mau tamari’i e 8 matahiti, e melo tāpa’ohia, nā te hō’ē melo o te ’episekōpora’a e fa’anaho ’e e arata’i i te reira. E nehenehe tāna e ani atu i te feiā fa’atere o te Paraimere nō te tauturu i te fa’anahonahora’a.
Mai te mea e hau atu i te hō’ē pāroita i roto i te hō’ē purera’a bāpetizora’a nō teie mau tamari’i, nā te hō’ē melo o te peresidenira’a titi, ’aore rā, hō’ē melo nō te ’āpo’ora’a teitei e fa’anaho ’e e arata’i i te reira. E nehenehe tāna e ani atu i te feiā fa’atere o te Paraimere nō te tauturu i te fa’anahonahora’a. E ti’a i te hō’ē melo o te ’episekōpora’a nō te pāroita tāta’itahi e tamari’i te bāpetizohia ra, ’ia tae mai.
’Eiaha te mau melo e tītau i tā rātou iho taime nō te bāpetizora’a i te hō’ē tamari’i. ’Eiaha ato’a rātou e hōro’a i te tāpura ’ohipa nō te purera’a.
E tārenahia te mau purera’a bāpetizora’a nō te feiā fa’afāriuhia i muri noa iho i tō rātou pāhono-ti’a-ra’a i te mau tītaura’a i roto i te 38.2.3.3. ’Eiaha e fa’ataime i te bāpetizora’a o te hō’ē melo o te ’utuāfare e tae roa atu i te taime e nehenehe ai te metua tāne e fāri’i i te autahu’ara’a nō te rave ’oia iho i te bāpetizora’a.
I raro a’e i te arata’ira’a a te ’episekōpora’a, nā te fa’atere misiōni o te pāroita (mai te mea ē, ’ua pi’ihia te hō’ē) ’aore rā, nā te melo o te peresidenira’a o te pupu peresibutero ha’apa’o i te ’ohipa misiōnare i roto i te pāroita, e fa’anaho ’e e arata’i i te mau purera’a bāpetizora’a nō te feiā fa’afāriu.
18.7.3
Nā vai e rave i te ’ōro’a
Nā te hō’ē tahu’a ’aore rā, te hō’ē ta’ata tei mau i te Autahu’ara’a a Melehizedeka e rave i te ’ōro’a bāpetizora’a. E ti’a i te ta’ata e rave i te bāpetizora’a, ’ia fāri’ihia e te ’episekōpo (’aore rā, nā te peresideni misiōni mai te mea ē, nā te hō’ē misiōnare rave tāmau e rave i te bāpetizora’a).
E nehenehe te ’episekōpo e fa’ati’a i te hō’ē metua tāne, e tahu’a ’aore rā, tei mau i te Autahu’ara’a a Melehizedeka, nō te bāpetizo i tāna tamari’i, noa atu ē, e ’ere te metua tāne i te mea ti’amā hope roa nō te hiero (hi’o 18.3). E fa’aitoito te mau ’episekōpo i te mau metua tāne ’ia fa’aineine ia rātou iho nō te bāpetizo i tā rātou iho mau tamari’i.
Nō te rave i te hō’ē bāpetizora’a, e tītauhia i te hō’ē ta’ata i rāpae i tāna pāroita, ’ia fa’a’ite i te hō’ē parau fa’ati’a mana nō te hiero i te ti’a fa’atere rahi. ’aore rā, e nehenehe ’oia e fa’a’ite i te hō’ē Parau fa’ati’a nō te rave i te hō’ē ’ōro’a tei tu’urimahia e te hō’ē melo o tōna ’episekōpora’a.
18.7.4
I hea e rave ai i te ’ōro’a
E ravehia te mau bāpetizora’a i roto i te hō’ē ha’apuna pape bāpetizora’a mai te mea ē, tē vai ra hō’ē. Mai te mea ’aita e ha’apuna pape bāpetizora’a, e nehenehe e fa’a’ohipa i te hō’ē vāhi tē vai ra te pape. E ti’a i te reira ’ia āteatea maita’i ’ia nehenehe i te ta’ata e rave i te ’ōro’a ’e te ta’ata e bāpetizohia, ’ia ti’a i roto. ’Aita te pape e ha’amo’ahia nō te mau bāpetizora’a.
Mai te mea e fa’a’ohipahia te hō’ē ha’apuna pape, e fa’anahohia te reira ’e te hō’ē melo i roto i te pāroita a te ’episekōpo e ti’a’au.
Nō te pārurura’a, e mea ti’a i te hō’ē ta’ata pa’ari ti’a’au ’ia tae mai i te taime fa’a’īra’a o te ha’apuna pape, ’e tae roa atu i te taime e fa’aru’ehia ai te pape, ’e tāmāhia ai, ’e e pāruruhia ai. E fa’aru’ehia te pape i muri noa iho i te purera’a bāpetizora’a. E pōnaohia te mau ’ōpani o te vāhi bāpetizora’a mai te mea ’aita te reira e fa’a’ohipahia.
18.7.5
’Ahu
Te ta’ata e bāpetizo ’e te ta’ata e bāpetizohia, e ’ō’omo rāua i te ’ahu ’uo’uo, te ’ahu e’ita e ’itehia i roto mai, ’ia rari ana’e. Te ta’ata haere hiero, e ’ō’omo ’oia i te ’ahu hiero nā roto mai i teie ’ahu ’a rave ai ’oia i te hō’ē bāpetizora’a. E ho’o mai te mau pāroita i te ’ahu bāpetizora’a i te moni ’āfata pāroita, ’e ’eiaha e fa’a’aufau i te fa’a’ohipara’a i te reira.
18.7.6
Mau ’ite
E piti ’ite, e fa’ati’ahia e te ti’a fa’atere rahi, nō te hi’ohi’o i te bāpetizora’a tāta’itahi nō te ha’apāpū ē, ’ua rave-maita’i-hia te reira. Te mau melo bāpetizohia o te ’Ēkālesia, tae noa atu i te mau tamari’i ’e i te feiā ’āpī, e nehenehe rātou e riro ’ei mau ’ite.
E rave-fa’ahou-hia te bāpetizora’a mai te mea ē, ’aita te mau parau i fa’ahiti-ti’a-hia mai tei hōro’ahia mai i roto i Te Ha’api’ira’a Tumu ’e te mau Fafaura’a 20:73. E rave-fa’ahou-ato’a-hia mai te mea ē, ’aita te hō’ē tuha’a o te tino o te ta’ata, te rouru, ’aore rā, te ’ahu, i mo’e roa i roto i te pape.
18.7.7
Mau arata’ira’a
Nō te rave i te ’ōro’a o te bāpetizora’a, te tahu’a ’aore rā, te ta’ata tei mau i te Autahu’ara’a a Melehizedeka :
-
E ti’a ’oia i roto i te pape ’e te ta’ata e bāpetizohia.
-
E tāpe’a ’oia i te fatira’a rima ’atau o te ta’ata i tōna rima ’aui (nō te au-maita’i-ra’a ’e te pārurura’a). Te ta’ata e bāpetizohia, e tāpe’a ’oia i te fatira’a rima ’aui o te ta’ata tei mau i te autahu’ara’a i tōna rima ’aui.
-
E ’āfa’i fa’atuea ’oia i tōna rima ’atau i ni’a.
-
E fa’ahiti ’oia i te i’oa tā’āto’a o te ta’ata ’a parau ai ē, « nō te mana i tu’uhia mai iā’u e Iesu Mesia, tē bāpetizo nei au ia ’oe i te i’oa o te Metua, ’e nō te Tamaiti, ’e nō te Vārua Maita’i. ’Āmene » (Te Ha’api’ira’a Tumu ’e te mau Fafaura’a 20:73).
-
’A vaiiho i te ta’ata ’ia tāpe’a i tōna ihu i te rima ’atau (nō te au maita’i) ; i muri iho, e tu’u ’oia i tōna rima ’atau i te pae i ni’a o te tua o te ta’ata, ’e ’a utuhi hope roa ai iāna, tae roa atu i te ’ahu. E ’ōhie a’e te utuhira’a mai te mea e ha’afefe ri’i te ta’ata i tōna nā turi ’āva’e.
-
E tauturu ’oia i te ta’ata ’ia ti’a mai i rāpae i te pape.
18.7.8
Parau tāpa’ora’a bāpetizora’a
Nō te mau ha’amāramaramara’a nō ni’a i te hāmanira’a i te hō’ē parau tāpa’ora’a bāpetizora’a, hi’o 18.8.3.
18.8
Ha’amaura’a ’e te hōro’a o te Vārua Maita’i
’Ia oti te hō’ē ta’ata i te bāpetizohia, e ha’amauhia ’oia ’ei melo nō te ’Ēkālesia ’e e fāri’i ho’i i te Vārua Maita’i nā roto i te tu’ura’a rima (hi’o Te Ha’api’ira’a Tumu ’e te mau Fafaura’a 20:41 ; Te mau ’Ohipa 19:1–7). E riro mai te ta’ata ’ei melo nō te ’Ēkālesia ’ia oti ana’e teie nā ’ōro’a to’opiti i te ravehia ’e i te pāpa’ihia (hi’o Ioane 3:5 ; Te Ha’api’ira’a Tumu ’e te mau Fafaura’a 33:11 ; 3 Nephi 27:20).
Tei te ’episekōpo te tāviri o te autahu’ara’a nō te ha’amau i te mau melo tāpa’ohia o te pāroita, e 8 matahiti te pa’ari. Tei te peresideni misiōni te mau tāviri nō te ha’amau i te feiā fa’afāriuhia i roto i te hō’ē misiōni (nō te tātarara’a o te hō’ē bāpetizora’a fa’afāriu, hi’o 18.7.1.2). Terā rā, nā te ’episekōpo e hi’opo’a i teie ’ōro’a nō te mau tamari’i tāpa’ohia e 8 matahiti ’e nō te feiā fa’afāriuhia.
E ha’amauhia te mau tamari’i e va’u matahiti i te mahana e bāpetizohia ai rātou. E ha’amauhia te feiā fa’afāriuhia i roto i te hō’ē purera’a ’ōro’a i roto i te pāroita tei reira rātou te orara’a, te mea tano, i te sābati i muri noa iho i tō rātou bāpetizora’a. Terā rā, e nehenehe te ’episekōpo e hōro’a i te mau parau ta’a ’ē nō te feiā fa’afāriuhia, ’ia ha’amauhia rātou i roto iho i te purera’a bāpetizora’a mai tei fa’ata’ahia i roto i te 38.2.3.2. E ti’a i te mau ’episekōpo ’ia pe’e i te mau arata’ira’a i roto i te 29.2.2.8 ’ia fa’a’ite ana’e rātou i te mau melo ’āpī.
18.8.1
Nā vai e rave i te ’ōro’a
Nā te feiā tei mau i te Autahu’ara’a a Melehizedeka e rave i te ’ōro’a ha’amaura’a. E ti’a i te ta’ata e fa’ahiti i te parau, ’ia fa’ati’ahia e te ’episekōpo (’aore rā, nā te peresideni misiōni, mai te mea ē, nā te hō’ē misiōnare rave tāmau e rave ra i te ha’amaura’a.)
Te hō’ē ana’e ta’ata tei mau i te Autahu’ara’a a Melehizedeka ’e tei ti’amā nō te hiero, te nehenehe e fa’ahiti i te pure nō te ha’amaura’a. Terā rā, e nehenehe te ’episekōpo e fa’ati’a i te hō’ē metua tāne tei mau i te Autahu’ara’a a Melehizedeka ’ia ti’a i roto i te ha’amenemenera’a nō te ha’amaura’a o tāna mau tamari’i, noa atu ē, ’aita te metua tāne i ti’amā hope roa nō te hiero (hi’o 18.3).
E ’āmui hō’ē a’e melo nō te ’episekōpora’a i roto i teie ’ōro’a. Mai te mea ’ua ha’api’i te mau misiōnare i te hō’ē ta’ata fa’afāriuhia, e ani te ’episekōpo ia rāua ’ia ’āmui mai i roto.
Te ta’ata e fa’ahiti i te pure i roto i teie ’ōro’a, e tītauhia iāna ’ia fa’a’ite i te hō’ē parau fa’ati’a nō te hiero i te ti’a fa’atere rahi. ’Aore rā, e nehenehe ’oia e fa’a’ite i te hō’ē Parau fa’ati’a nō te rave i te hō’ē ’ōro’a tei tu’urimahia e te hō’ē melo o tōna ’episekōpora’a.
18.8.2
Mau arata’ira’a
I raro a’e i te fa’aterera’a a te ’episekōpora’a, e ’āmui hō’ē melo nō te Autahu’ara’a a Melehizedeka, ’aore rā, hau atu, i roto i te hō’ē ha’amaura’a. E tu’u māmā noa rātou i tō rātou rima i ni’a i te upo’o o te ta’ata. I muri iho, te ta’ata e fa’ahiti i te pure :
-
E pi’i ’oia i te ta’ata nā tōna i’oa tā’āto’a.
-
E fa’ahiti ’oia ē, tē ravehia nei te ’ōro’a nā roto i te ha’amanara’a o te Autahu’ara’a a Melehizedeka.
-
E ha’amau ’oia i te ta’ata ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.
-
E parau ’oia ē, « ’A fāri’i mai i te Vārua Maita’i » (’eiaha « ’a fāri’i mai i te hōro’a o te Vārua Maita’i »).
-
E hōro’a ’oia i te mau parau ha’amaita’ira’a ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
18.8.3
Parau tāpa’ora’a bāpetizora’a ’e te ha’amaura’a ’e te parau ha’apāpūra’a
Hou e uiuihia ai te hō’ē tamari’i melo tāpa’ohia nō te bāpetizora’a, e fa’a’ohipa te pāpa’i parau i te fa’anahora’a rāve’a tauturu a te ti’a fa’atere ’e te pāpa’i parau nō te fa’aineine i te hō’ē Parau fa’abāpetizora’a ’e te ha’amaura’a. Nā te ’episekōpo ’aore rā, te hō’ē tauturu e fa’atere i te uiuira’a ’e e tu’urima i te parau. I muri a’e i te bāpetizora’a ’e te ha’amaura’a, e fa’a’ohipa te pāpa’i parau i teie parau nō te fa’a’ī i te parau melora’a o te tamari’i i roto i te fa’anahora’a rāve’a tauturu a te ti’a fa’atere ’e te pāpa’i parau.
’Ia uiui ana’e te hō’ē misiōnare rave tāmau i te hō’ē ta’ata fa’afāriu nō te bāpetizora’a, e fa’a’ī ’oia i te parau tāpa’ora’a bāpetizora’a ’e te ha’amaura’a, ’eiaha rā te ha’amāramaramara’a nō ni’a i te ha’amaura’a. I roto i te purera’a bāpetizora’a, e hōro’a te mau misiōnare i teie ’api parau i te ’episekōpo ra, ’aore rā, i te hō’ē o tōna nā tauturu. I muri a’e i te ha’amaura’a, e fa’a’ī te ’episekōpo, te tauturu e ’aore rā te hō’ē pāpa’i parau i te mau ha’amāramaramara’a o te ha’amaura’a, ’e e hōro’a e piti ’api parau i te mau misiōnare. E hāpono te mau misiōnare hō’ē ’āpī i te piha tōro’a o te misiōni, ’ia ti’a i te hō’ē parau melora’a ’ia hāmanihia.
’Ia oti te parau melora’a i te hāmanihia, e fa’aineine te hō’ē pāpa’i parau i te hō’ē parau ha’apāpūra’a nō te bāpetizora’a ’e te ha’amaura’a. E tu’urima te ’episekōpo i teie parau fa’a’itera’a ’e e hōro’a atu i te ta’ata ra.
Te i’oa i ni’a i te parau melora’a ’e i ni’a i te parau ha’apāpūra’a, hō’ē ā ïa i ni’a i te parau fānaura’a, te parau tīvira, ’aore rā, te i’oa mana i teienei.
18.9
Te ’ōro’a mo’a
E putuputu te mau melo o te ’Ēkālesia i te mahana sābati nō te ha’amori i te Atua ’e nō te rave i te ’ōro’a mo’a (hi’o Te Ha’api’ira’a Tumu ’e te mau Fafaura’a 20:75 ; 59:9 ; Moroni 6:5–6). I roto i teie ’ōro’a, e rave rātou i te faraoa ’e te pape nō te ha’amana’o i te tusia a te Fa’aora o tōna tino ’e te toto, ’e nō te fa’a’āpī i tā rātou mau fafaura’a mo’a (hi’o Mataio 26:26–28 ; ’Īritira’a a Iosepha Semita, Mareko 14:20–25 ; Luka 22:15–20 ; 3 Nephi 18 ; Moroni 6:6). E ti’a i te mau ta’ata ato’a ’ia fa’atura i te taime nō te ha’amaita’ira’a ’e te ’ōperera’a i te ’ōro’a mo’a.
18.9.1
Parau fa’ati’a nō te fa’atere i te ’ōro’a mo’a
Tei te ’episekōpo te mau tāviri autahu’ara’a nō te fa’atere i te ’ōro’a mo’a i roto i te pāroita. Nō reira, e ti’a i te feiā ato’a e fa’aineine, e ha’amaita’i, ’e e ’ōpere i te ’ōro’a mo’a, ’ia fa’ati’ahia e āna ’aore rā, te tahi atu ta’ata i raro a’e i tāna fa’aterera’a.
Mai te mea ’aita e ti’a i te tahi mau melo o tāna pāroita ’ia rave i te ’ōro’a mo’a nō te mea ’ua ’ōpanipanihia rātou i roto i te hō’ē fare, hō’ē pū aupurura’a, ’aore rā, i te fare ma’i, e nehenehe te ’episekōpo e fa’ati’a i te mau ta’ata tei mau i te autahu’ara’a, ’ia fa’atere i te ’ōro’a mo’a nō rātou. E nehenehe tāna e fa’ati’a i te reira noa atu ē, tei rāpae rātou i te mau ’ōti’a o tāna pāroita nō te hō’ē tau poto. Terā rā, ’eiaha ’oia e fa’ati’a ’ia hōro’ahia te ’ōro’a mo’a i te mau melo i rāpae i te mau ’ōti’a o tāna pāroita nō te tahi atu mau tumu.
E nehenehe te purera’a ’ōro’a e’ita e fa’aterehia nō te hō’ē tau roa, e mea varavara rā. I roto i te reira vaira’a, e nehenehe te hō’ē ’episekōpo e fa’ati’a i te mau ta’ata ti’amā tei mau i te autahu’ara’a i roto i tāna pāroita, ’ia fa’aineine ’e ’ia fa’atere i te ’ōro’a mo’a i roto i tō rātou fare i te sābati tāta’itahi. E nehenehe ato’a te ’episekōpo e fa’ati’a ia rātou ’ia fa’aineine ’e ’ia fa’atere i te ’ōro’a mo’a nā te mau melo o te pāroita ’aita e ta’ata tei mau i te autahu’ara’a i roto i tō rātou fare.
’Ia fa’ati’a ana’e te ’episekōpo ’ia fa’aineinehia ’e ’ia fa’aterehia te ’ōro’a mo’a i rāpae i te mau purera’a mātarohia a te ’Ēkālesia, e fa’a’ohipahia te mau arata’ira’a i roto i te 18.9.2 mai tei mātarohia.
18.9.2
Nā vai e rave i te ’ōro’a
-
E fa’aineine te mau ha’api’i, te mau tahu’a ’e te feiā tei mau i te Autahu’ara’a a Melehizedeka i te ’ōro’a mo’a.
-
Nā te mau tahu’a ’e te mau taea’e tei mau i te Autahu’ara’a a Melehizedeka e ha’amaita’i i te ’ōro’a mo’a.
-
Nā te mau diakono, te mau ha’api’i, te mau tahu’a ’e te mau taea’e tei mau i te Autahu’ara’a a Melehizedeka e ’ōpere i te ’ōro’a mo’a.
E mai te mea e nava’i te feiā tei mau i te Autahu’ara’a a Aarona, ’ua mātarohia ē, nā rātou e rave i teie mau ’ohipa. Mai te mea ē, ’aita i nava’i te diakono nō te ’ōpere i te ’ōro’a mo’a, e paraparau te peresideni o te pupu diakono i te ’episekōpo nō te fa’aoti ē, ’o vai te anihia nō te tauturu. I te rahira’a o te taime, e ani ’oia i te mau ha’api’i ’e te mau tahu’a ’ia tauturu, hou ’a ani ai i te mau peresibutero ’e te mau tahu’a rahi.
18.9.3
Mau arata’ira’a nō te ’ōro’a mo’a
Nō te nātura mo’a o te ’ōro’a mo’a, e fa’aineine maita’i te feiā fa’atere o te autahu’ara’a, ’ia nahonaho maita’i te reira ’e ’ia tura ho’i. E mea ’uo’uo te mau ’ahu tāpo’i, e mea mā, ’e e mea ’āurihia. E mea mā te mau fa’ari’i ’ōro’a. ’Ia poro’i-’oi’oi-hia mai te mau fa’ari’i ’e te mau hāpaina ’ōro’a.
Te feiā e fa’atere i te ’ōro’a mo’a, e ti’a ia rātou ’ia rave i te reira ma te hanahana, ma te feruri ē, tē mono nei rātou i te Fatu. E fa’aitoito te ’episekōpo ia rātou ’ia feruri i te tāra’ehara a te Fa’aora ’a fa’aineine ai, ’a ha’amaita’i ai, ’e ’a ’ōpere ai rātou i te ’ōro’a mo’a.
Te feiā e fa’atere i te ’ōro’a mo’a, e ti’a ia rātou ’ia fa’anehehene maita’i ia rātou ’e ’ia mā. ’Eiaha rātou e ’ō’omo i te ’ahu ’aore rā, e ’ō’omo i te tao’a piru ’o tē nehenehe e ha’ape’ape’a i te ha’amorira’a ’e te ravera’a i te fafaura’a, ’o te reira ho’i te fā o te ’ōro’a mo’a. Mai te mea e tītauhia i te ’episekōpo ’ia a’o i te hō’ē ta’ata tei mau i te autahu’ara’a nō ni’a i te reira mau mea, e rave ’oia i te reira nā roto i te here. E hi’o ato’a ’oia i te pa’arira’a o te ta’ata i roto i te ’Ēkālesia.
’Ia ravehia te ’ōperera’a i te ’ōro’a ma te au māite, ’eiaha ma te tura rahi roa. ’Ei hi’ora’a, te tahi mau peu, (mai te tāpe’ara’a i te rima i muri i te tua) ’e ’aore rā, te huru o te ta’ata (mai te huru o te ’ahura’a) ’eiaha e tītau i te reira.
E hīmene te ’āmuira’a i te hō’ē hīmene ’ōro’a, ’a ’ōfatifatihia ai te faraoa. ’Eiaha te mau ta’ata hīmene ’ōtahi ’aore rā, te pehe upa e mono i teie hīmene. ’Eiaha te hō’ē pehe e ha’utihia i te taime ’a ’ōperehia ai te ’ōro’a mo’a ’aore rā, i muri noa iho.
Mai te mea e fifi te mau melo ’ia ’amu i te gluten, e nehenehe rātou e paraparau i te hō’ē melo o te ’episekōpora’a nō te fa’a’āfaro i te reira fifi. E nehenehe te mau melo e hōpoi mai i te faraoa e au ia rātou i roto i te hō’ē fa’ari’i urina ’aore rā, i te hō’ē ’au’a. E hōro’a rātou i te reira i te hō’ē ta’ata nō te autahu’ara’a nō te tu’u i te reira i roto i te hō’ē fa’ari’i ta’a ’ē. E tauturu te ’episekōpora’a i te feiā ’ōpere ’ōro’a ’ia ’ite ē, ’o vai te mau melo e hōro’a ia rātou i te faraoa ta’a ’ē. E nehenehe te ’episekōpora’a e taui ri’i i te fa’anahora’a mai te mea e tītauhia.
Noa atu ē, nō te mau melo o te ’Ēkālesia te ’ōro’a mo’a, ’eiaha roa e ’ōpani i te tahi atu mau ta’ata ’ia rave i te reira.
18.9.4
Mau arata’ira’a
-
Te feiā e fa’aineine, e ha’amaita’i, ’aore rā, e ’ōpere i te ’ōro’a mo’a, e horoi rātou nā mua i tō rātou rima i te pu’a ’aore rā, i te tahi atu rāve’a tāmā.
-
E ha’apāpū te mau ha’api’i, te mau tahu’a ’aore rā, te mau ta’ata tei mau i te Autahu’ara’a a Melehizedeka ē, ’ua nahonaho maita’i te mau fa’ari’i faraoa ’e te faraoa ’ōfatifati-’ore-hia i roto, te mau fa’ari’i hāpaina ’e te pape mā i roto, ’e te mau tāpo’i mā, hou te purera’a.
-
’A hīmene ai te ’āmuira’a i te hīmene ’ōro’a, te feiā e ha’amaita’i i te ’ōro’a mo’a, e ti’a rātou i ni’a ma te tura, ’e ’īriti i te ’ahu e tāpo’i ra i te fa’ari’i faraoa, ’e e ’ōfatifati rātou i te faraoa.
-
’Ia hope te hīmene, e tūturi te ta’ata e ha’amaita’i i te faraoa, ’a fa’ahiti ai i te pure ’ōro’a nō te faraoa (hi’o Te Ha’api’ira’a Tumu ’e te mau Fafaura’a 20:77).
-
E ha’apāpū te ’episekōpo ē, e mea māramarama maita’i, e mea tano, ’e e mea tura te mau pure nō te ’ōro’a mo’a. Mai te mea e hape te hō’ē ta’ata i te fa’ahitira’a i te hō’ē parau ’e e fa’a’āfaro ’oia iāna iho, ’aita ïa e tītauhia te tahi atu fa’a’āfarora’a. Mai te mea ’aita te ta’ata e fa’atītī’aifaro i tāna hape, e ani marū noa te ’episekōpo iāna ’ia pure fa’ahou. E ara maita’i te ’episekōpo ’ia ani ’oia ma te ’ōmo’e ’ia pure fa’ahou. E ara ’oia ’eiaha te reira ’ia fa’atupu i te au ’ore ’aore rā, ’ia fa’a’ino i te ’ōro’a. E nehenehe te tahi atu ta’ata i pīha’i iho i te ’amura’a mā’a o te ’ōro’a mo’a, e tauturu, mai te mea e hina’arohia.
-
I muri a’e i te pure, e ’ōpere te mau taea’e o te autahu’ara’a, ma te tura, i te faraoa i te mau melo. Te ti’a fa’atere rahi te fāri’i i te reira nā mua, ’e i muri iho, ’aita e fa’anahora’a ta’a ’ē nō te ’ōpere. ’Ia hōro’a-ana’e-hia te hō’ē fa’ari’i i te mau melo ra, nā rātou e hōro’a i te reira i te tahi atu ta’ata.
-
E rave te mau melo i te ’ōro’a i tō rātou rima ’atau mai te mea e nehenehe.
-
’Ia oti te faraoa i te hōro’ahia i te mau melo ato’a, e fa’aho’i te feiā ’ōpere ’ōro’a mo’a i te mau fa’ari’i i tō rātou vāhi vaira’a. Te feiā e ha’amaita’i i te ’ōro’a mo’a, e tu’u rātou i te hō’ē ’ahu nā ni’a iho i te mau fa’ari’i faraoa, ’e e ’īriti i te tāpo’i o te mau fa’ari’i pape.
-
Te ta’ata e ha’amaita’i i te pape, e tūturi ’oia i raro ’e e fa’aoti i te pure nō te pape (hi’o Te Ha’api’ira’a Tumu ’e te mau Fafaura’a 20:79). E mono ’oia i te ta’o uaina i te ta’o pape.
-
I muri a’e i te pure, e ’ōpere te feiā tei mau i te autahu’ara’a i te pape i te mau melo, ma te tura. Te ti’a fa’atere rahi te fāri’i i te reira nā mua, ’e i muri iho, ’aita e fa’anahora’a ta’a ’ē nō te ’ōpere.
-
’Ia oti te pape i te ’ōperehia i te mau melo ato’a, e fa’aho’i te feiā ’ōpere ’ōro’a mo’a i te mau fa’ari’i i te vāhi vaira’a. E tāpo’i te feiā ha’amaita’i ’ōro’a mo’a i te mau fa’ari’i, ’ei reira te feiā tei ha’amaita’i ’e tei ’ōpere i te ’ōro’a mo’a e ho’i ai ma te tura i tō rātou pārahira’a.
-
I muri a’e i te purera’a, te feiā tei fa’aineine i te ’ōro’a mo’a, e tāmā rātou, e tūfetu i te mau ’ahu tāpo’i, ’e e tātara i te mau faraoa ’aita i fa’a’ohipahia.
18.10
Hōro’ara’a i te autahu’ara’a ’e te fa’atōro’ara’a i te hō’ē tōro’a
E piti tuha’a i roto i te parau nō te autahu’ara’a : Aarona ’e Melehizedeka (hi’o Te Ha’api’ira’a Tumu ’e te mau Fafaura’a 107:1, 6). ’Ia hōro’a-ana’e-hia te autahu’ara’a i te hō’ē ta’ata, e fa’atōro’a-ato’a-hia ’oia i te hō’ē tōro’a i roto i te reira autahu’ara’a. ’Ia oti teie nā autahu’ara’a i te hōro’ahia, e fa’atōro’ahia te hō’ē tāne i roto i te tahi atu mau tōro’a i roto i taua autahu’ara’a ra.
Tei te peresideni titi te mau tāviri autahu’ara’a nō te hōro’a i te Autahu’ara’a a Melehizedeka ’e nō te fa’atōro’a i te mau tōro’a peresibutero ’e te tahu’a rahi. Terā rā, ’ua mātarohia ē, nā te ’episekōpo e hōro’a i te mau parau fa’ati’a nō teie mau fa’atōro’ara’a.
Tei te ’episekōpo te mau tāviri autahu’ara’a nō te hōro’a i te Autahu’ara’a a Aarona ’e nō te fa’atōro’a i te mau tōro’a diakono, ha’api’i ’e tahu’a. Te mau taea’e ti’amā ana’e o tē fa’atōro’ahia i teie mau tōro’a ’ia au i te mau matahiti i muri nei, ’eiaha rā nā mua a’e :
-
Diakono i te ’ōmuara’a o te matahiti e ti’ahia ai tō rātou e 12 matahiti
-
Ha’api’i i te ’ōmuara’a o te matahiti e ti’ahia ai tō rātou e 14 matahiti.
-
Tahu’a i te ’ōmuara’a o te matahiti e ti’ahia ai tō rātou e 16 matahiti.
Te mau arata’ira’a nō te fa’atae i te hō’ē anira’a ’ia pāturuhia ’e ’ia fa’atōro’ahia te hō’ē ta’ata, ’ua hōro’ahia ïa i roto i te 38.2.5.1 ’e 38.2.5.2.
18.10.1
Nā vai e rave i te ’ōro’a
Nā te peresideni titi ’aore rā, hō’ē ta’ata tei mau i te Autahu’ara’a a Melehizedeka i raro a’e i tāna fa’aterera’a, e fa’atōro’a i te hō’ē tāne i te tōro’a peresibutero. Te mau ta’ata ana’e tei mau i te Autahu’ara’a a Melehizedeka te ti’a i roto i te ha’amenemenera’a.
Nā te peresideni tit ’aore rā, hō’ē tahu’a rahi i raro a’e i tāna fa’aterera’a e fa’atōro’a i te hō’ē tāne i te tōro’a tahu’a rahi. Te mau tahu’a rahi ana’e te ti’a i roto i te ha’amenemenera’a.
E ti’a i te ta’ata e fa’atōro’a i te hō’ē tāne i te hō’ē tōro’a o te Autahu’ara’a a Melehizedeka ’ia riro ’ei ta’ata ti’amā nō te hiero. Tītauhia ’ia tae mai te peresideni titi ’aore rā, hō’ē ta’ata tāna e fa’ata’a.
E nehenehe te hō’ē tahu’a ’aore rā, te hō’ē ta’ata tei mau i te Autahu’ara’a a Melehizedeka e fa’atōro’a i te hō’ē taea’e i te tōro’a diakono, ha’api’i ’aore rā, tahu’a. E ti’a iāna ’ia fa’ati’ahia e te ’episekōpo. Tītauhia ’ia tae mai te ’episekōpo ’aore rā, hō’ē ta’ata tāna e fa’ata’a.
Nō te ’āmui i roto i te hō’ē fa’atōro’ara’a Autahu’ara’a a Aarona, e tītauhia ’ei tahu’a te ta’ata, ’aore rā, ’ei ta’ata tei mau i te Autahu’ara’a a Melehizedeka.
E nehenehe te ’episekōpo e fa’ati’a i te hō’ē metua tāne tahu’a ’aore rā, tei mau i te Autahu’ara’a a Melehizedeka, ’ia fa’atōro’a i tāna tamaiti i te tōro’a diakono, ha’api’i, ’aore rā, tahu’a, noa atu ē ’aita te metua tāne i ti’amā hope roa nō te hiero (hi’o 18.3). E fa’aitoito te mau ’episekōpo i te mau metua tāne ’ia fa’aineine ia rātou iho ’ia fa’atōro’a i tā rātou iho mau tamaiti.
Te ta’ata e fa’ahiti i te pure i roto i teie ’ōro’a, e tītauhia iāna ’ia fa’a’ite i te hō’ē parau fa’ati’a nō te hiero i te ti’a fa’atere rahi. ’Aore rā, e nehenehe ’oia e fa’a’ite i te hō’ē Parau fa’ati’a nō te rave i te hō’ē ’ōro’a tei tu’urimahia e te hō’ē melo o tōna ’episekōpora’a.
18.10.2
Mau arata’ira’a
Nō te hōro’a i te autahu’ara’a ’e nō te fa’atōro’a i te hō’ē ta’ata i roto i te hō’ē tōro’a o te autahu’ara’a, e tu’u ha’amāmā noa hō’ē ta’ata ’aore rā, hau atu, i tō rātou rima i ni’a i te upo’o o te ta’ata. I muri iho, te ta’ata e fa’ahiti i te pure :
-
E pi’i ’oia i te ta’ata ma tōna i’oa tā’āto’a.
-
E fa’ahiti ’oia i te mana tāna e mau ra nō te rave i te ’ōro’a (Autahu’ara’a a Aarona ’aore rā, a Melehizedeka).
-
E hōro’a ’oia i te Autahu’ara’a a Aarona ’aore rā, te Autahu’ara’a a Melehizedeka, mai te mea e aitā i hōro’ahia.
-
E fa’atōro’a ’oia i te ta’ata i te hō’ē tōro’a i roto i te Autahu’ara’a a Aarona ’aore rā, te Autahu’ara’a a Melehizedeka ’e e hōro’a ho’i i te mau ti’ara’a, te mau pūai, ’e te ha’amanara’a o taua tōro’a ra. (’Aita te mau tāviri o te autahu’ara’a e hōro’ahia ’ia hōro’a-ana’e-hia te autahu’ara’a ’aore rā, ’ia fa’atōro’a-ana’e-hia i te hō’ē tōro’a, ’eiaha rā nō te fa’atōro’ara’a i te hō’ē ’episekōpo.)
-
E hōro’a ’oia i te mau parau ha’amaita’ira’a ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
Nō te fa’atōro’a i te hō’ē ta’ata i te hō’ē tōro’a autahu’ara’a i muri a’e i tōna fāri’i-a’e-na-ra’a i te autahu’ara’a ti’a, te ta’ata e rave ra i te fa’atōro’ara’a, e vaiiho ’oia i te ta’ahira’a 3.
E riro te fa’atōro’ara’a ’ei taime nō te hōro’a i te hō’ē ha’amaita’ira’a. E hōro’ahia te a’o ’e te arata’ira’a ta’a maita’i nō ni’a i te mau ’ohipa a te hō’ē ta’ata, i mua a’e, ’e i muri iho i te fa’atōro’ara’a. ’Eiaha te reira ’ia riro ’ei tuha’a tumu nō te ha’amaita’ira’a. ’Aita e tītauhia te mau pure, te mau ’itera’a pāpū, ’aore rā, te arata’ira’a ’ia fa’atōro’a-ana’e-hia te hō’ē ta’ata.
18.10.3
Parau tāpa’ora’a o te fa’atōro’ara’a ’e te parau ha’apāpūra’a
Hou e uiuihia ai te hō’ē tāne nō te fa’atōro’a iāna i te hō’ē tōro’a o te Autahu’ara’a a Melehizedeka, e fa’a’ohipa te pāpa’i parau i te fa’anahora’a rāve’a tauturu a te ti’a fa’atere ’e te pāpa’i parau nō te fa’aineine i te hō’ē Parau tāpa’ora’a o te fa’atōro’ara’a i te Autahu’ara’a a Melehizedeka. Nā te peresideni titi ’aore rā, te hō’ē tauturu e fa’atere i te uiuira’a ’e e tu’urima i te hō’ē ’api parau mai te mea ’ua ti’amā te ta’ata.
I muri a’e i te fa’atōro’ara’a, nā te peresideni titi ’aore rā, te ti’a mono i fa’ata’ahia, e fa’a’ī i te parau ’e e hōro’a atu i te reira i te pāpa’i parau ra. E tāpa’o ’oia i te fa’atōro’ara’a i roto i te fa’anahora’a rāve’a tauturu a te ti’a fa’atere ’aore rā, te pāpa’i parau ’e e fa’aineine ’oia i te hō’ē parau ha’apāpūra’a o te fa’atōro’ara’a. E tu’urima te peresideni titi i teie parau fa’a’ite ’e e hōro’a atu i te ta’ata ra.
Hou ’a uiuihia ai te hō’ē taea’e nō te fa’atōro’a iāna i roto i te hō’ē tōro’a i roto i te Autahu’ara’a a Aarona, e fa’a’ohipa te pāpa’i parau i te fa’anahora’a rāve’a tauturu a te ti’a fa’atere ’e te pāpa’i parau nō te fa’aineine i te hō’ē Parau tāpa’ora’a o te fa’atōro’ara’a i te Autahu’ara’a a Aarona. Nā te ’episekōpo ’aore rā, te hō’ē tauturu e fa’atere i te uiuira’a ’e e tu’urima i te ’api parau mai te mea ’ua ’āfaro te mau mea ato’a i tītauhia.
’Ia oti te fa’atōro’ara’a, e fa’a’ī te ’episekōpo ’aore rā, te tauturu i te ’api parau ’e e hōro’a atu i te reira i te pāpa’i parau ra. E tāpa’o ’oia i te fa’atōro’ara’a i roto i te fa’anahora’a rāve’a tauturu a te ti’a fa’atere ’aore rā, te pāpa’i parau ’e e fa’aineine ’oia i te hō’ē parau ha’apāpūra’a nō te fa’atōro’ara’a. E tu’urima te ’episekōpo i teie parau ha’apāpūra’a ’e e hōro’a atu i te ta’ata ra.
E fa’a’ohipahia te i’oa ti’a o te ta’ata i ni’a i te parau tāpa’ora’a o te fa’atōro’ara’a ’e te parau ha’apāpūra’a.
18.11
Fa’ata’ara’a i te mau melo nō te tāvini i roto i te mau pi’ira’a
Te mau melo e pi’ihia ’e e pāturuhia i roto i te rahira’a o te mau ti’ara’a o te ’Ēkālesia, e fa’atōro’ahia rātou nō te tāvini i roto i te reira ti’ara’a (hi’o 3.4.3.1 ; Ioane 15:16 ; Te Ha’api’ira’a Tumu ’e te mau Fafaura’a 42:11). I roto i te fa’ata’ara’a, e hōro’ahia i te ta’ata (1) te mana nō te ’ohipa i roto i te ti’ara’a ’e (2) te mau parau ha’amaita’ira’a ma te arata’ihia e te Vārua.
E fāri’i te mau peresideni titi, te mau ’episekōpo, ’e te mau peresideni pupu autahu’ara’a i te mau tāviri o te peresidenira’a ’ia fa’ata’a-ana’e-hia rātou (hi’o 3.4.1.1). Terā rā, e’ita te ta’o ra tāviri e fa’a’ohipahia ’ia fa’ata’a ana’e i te mau melo nō te tāvini i roto i te tahi atu mau pi’ira’a, e tae noa atu i te mau tauturu i roto i te mau peresidenira’a.
Nō te mau ha’amāramaramara’a nō ni’a i te pi’ira’a, te fa’atōro’ara’a ’e te fa’ata’ara’a i te mau ’episekōpo, hi’o 30.6.
18.11.1
Nā vai e rave i te fa’ata’ara’a
E ravehia te hō’ē fa’ata’ara’a nā te hō’ē ta’ata tei mau i te Autahu’ara’a a Melehizedeka. E ti’a iāna ’ia fāri’i i te parau fa’ati’a mai roto mai i te ti’a fa’atere tei mau i te mau tāviri ti’a o te autahu’ara’a. Te feiā tei fāri’ihia nō te rave i te hō’ē fa’ata’ara’a, ’ua fa’a’itehia ïa i roto i te « Tāpura o te mau pi’ira’a » (30.7). ’Eiaha te peresibutero e pure ’aore rā, e ti’a i roto i te ha’amenemenera’a ’ia fa’ata’a-ana’e-hia te hō’ē tāne i te hō’ē tōro’a o te tītau iāna ’ia riro ’ei tahu’a rahi.
I raro a’e i te fa’aterera’a a te ti’a fa’atere rahi, e nehenehe hō’ē ta’ata ’aore rā, hau atu, tei mau i te Autahu’ara’a a Melehizedeka, e ’āmui i roto i te hō’ē fa’ata’ara’a. E fa’ata’ahia te mau peresideni nā mua i tō rātou mau tauturu.
E nehenehe te hō’ē ti’a fa’atere rahi e fa’ati’a i te hō’ē tāne fa’aipoipo ’aore rā, te hō’ē metua tāne tei mau i te Autahu’ara’a a Melehizedeka ’ia ti’a i roto i te ha’amenemenera’a o te fa’ata’ara’a o tāna vahine ’aore rā, o tāna mau tamari’i, noa atu ē, ’aita ’oia i ti’amā hope roa nō te haere i te hiero (hi’o 18.3).
18.11.2
Mau arata’ira’a
E tu’u ha’amāmā noa hō’ē ta’ata ’aore rā, hau atu, tei fa’ati’ahia, ’e tei mau i te Autahu’ara’a a Melehizedeka, i tō rātou rima i ni’a i te upo’o o te ta’ata. I muri iho, te ta’ata e fa’ahiti i te pure :
-
E pi’i ’oia i te ta’ata nā tōna i’oa tā’āto’a.
-
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
-
E fa’ata’a ’oia i te ta’ata i te tōro’a i roto i te titi, te pāroita, te pupu autahu’ara’a, ’aore rā, te piha ha’api’ira’a.
-
E hōro’a ’oia i te mau tāviri mai te mea e tītauhia i te reira ta’ata ’ia fāri’i i te reira.
-
E hōro’a ’oia i te mau parau ha’amaita’ira’a ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
E ’ere te fa’ata’ara’a i te hō’ē putuputura’a mātarohia, i reira e ravehia ai te mau pure ’aore rā, te mau ’itera’a pāpū. E ’ere ato’a i te hō’ē taime nō te hōro’a i te mau arata’ira’a pāpū. E hōro’ahia te reira i roto i te ha’api’ipi’ira’a, ’eiaha rā i roto i te ha’amaita’ira’a.
18.12
Ha’amo’ara’a i te hinu
E ti’a i te ta’ata tei mau i te Autahu’ara’a a Melehizedeka ’ia ha’amo’a i te hinu ’ōlive hou ’a fa’a’ohipa ai i te reira nō te fa’atāhinu i te feiā ma’i ’aore rā, tei ’ati (hi’o Iakoba 5:14). ’Eiaha e fa’a’ohipa i te tahi atu hinu.
’Eiaha te mau melo e inu i te hinu ha’amo’ahia ’aore rā, e parai i ni’a i te mau vāhi pēpē o te tino.
18.12.1
Nā vai e rave i te ’ōro’a
E nehenehe hō’ē ta’ata ’aore rā, hau atu, tei mau i te Autahu’ara’a a Melehizedeka, e ha’amo’a i te hinu. ’Aita e tītauhia ia rātou ’ia ani i te parau fa’ati’a a te hō’ē ti’a fa’atere o te autahu’ara’a.
18.12.2
Mau arata’ira’a
Nō te ha’amo’a i te hinu, te ta’ata tei mau i te Autahu’ara’a a Melehizedeka :
-
E tāpe’a ’oia i te hō’ē fa’ari’i hinu ’ōlive tei tātarahia te tāpo’i.
-
E paraparau ’oia i te Metua i te ao ra nā roto i te hō’ē pure.
-
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
-
E ha’amaita’i ’oia i te hinu (’eiaha te fa’ari’i) ’e e fa’ata’a i te reira nō te fa’atāhinu ’e nō te ha’amaita’i i te feiā ma’i ’e tei ’ati.
-
E fa’aoti ’oia nā roto i te i’oa o Iesu Mesia.
18.13
Ha’amaita’ira’a i te feiā ma’i
Tei mātarohia, e ravehia te ha’amaita’ira’a i te feiā ma’i nā roto i te anira’a a te ta’ata e fāri’i i te ha’amaita’ira’a ’aore rā, nā roto i te anira’a a te tahi atu mau ta’ata e ha’ape’ape’a ato’a ra, ’ia tupu ho’i te ha’amaita’ira’a ’ia au i tō rātou fa’aro’o (hi’o Iakobo 5:14 ; Te Ha’api’ira’a Tumu ’e te mau Fafaura’a 24:13–14 ; 42:43–44, 48–52).
E piti tuha’a i roto i te ha’amaita’ira’a i te feiā ma’i « nā roto i te tu’ura’a rima » : te fa’atāhinura’a i te hinu ’e te ha’amaura’a i te fa’atāhinura’a nā roto i te hō’ē ha’amaita’ira’a. Mai mea ’aita e vai ra te hinu ha’amaita’ihia, e nehenehe e hōro’a i te hō’ē ha’amaita’ira’a nā roto i te ha’amanara’a o te Autahu’ara’a a Melehizedeka ma te fa’atāhinu ’ore.
Mai te mea e tītau te hō’ē ta’ata hau atu i te hō’ē ha’amaita’ira’a nō taua ma’i noa nei ā, ’aita e tītauhia te tahi atu fa’atāhinura’a. E nehenehe te hō’ē ta’ata tei mau i te autahu’ara’a e hōro’a i te tahi atu ha’amaita’ira’a nā roto i te tu’ura’a rima ’e te ha’amanara’a o te Autahu’ara’a a Melehizedeka. Terā rā, e nehenehe e rave i te tahi atu fa’atāhinura’a.
Te mau taea’e tei mau i te Autahu’ara’a a Melehizedeka, ’o tē haere i te fare ma’i, ’eiaha rātou e tītau i te mau rāve’a nō te ha’amaita’i i te ta’ata ma’i.
18.13.1
Nā vai e hōro’a i te ha’amaita’ira’a
Te mau taea’e ti’amā ana’e tei mau i te Autahu’ara’a a Melehizedeka te nehenehe e ha’amaita’i i te feiā ma’i ’aore rā, i te feiā tei ’atihia. ’Aita e tītauhia ia rātou ’ia ani i te parau fa’ati’a a te hō’ē ti’a fa’atere o te autahu’ara’a. Mai te mea e nehenehe, nā te hō’ē metua tāne tei mau i te Autahu’ara’a a Melehizedeka e ha’amaita’i i te mau melo ma’i o tōna ’utuāfare.
Tei mātarohia, e piti taea’e ’aore rā hau atu nō te Autahu’ara’a a Melehizedeka, ’o tē ha’amaita’i i te ta’ata ma’i. Terā rā, e nehenehe hō’ē e rave i te fa’atāhinura’a ’e te ha’amaura’a.
18.13.2
Mau arata’ira’a
E piti tuha’a i roto i te ha’amaita’ira’a i te ta’ata ma’i : te fa’atāhinura’a i te hinu ’e te ha’amaura’a i te fa’atāhinura’a.
Nā te hō’ē ta’ata tei mau i te Autahu’ara’a a Melehizedeka e rave i te fa’atāhinura’a. Ōna :
-
E tu’u ’oia i te hō’ē tōpata hinu ha’amo’ahia i ni’a i te upo’o o te ta’ata.
-
E tu’u māmā noa ’oia i tōna nā rima i ni’a i te upo’o o te ta’ata, ’e e pi’i i te ta’ata nā tōna i’oa tā’āto’a.
-
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
-
E fa’ahiti ’oia ē, tē fa’atāhinu nei ’oia i te hinu tei ha’amo’ahia nō te fa’atāhinu ’e nō te ha’amaita’i i te feiā ma’i ’e tei ’atihia.
-
E fa’aoti ’oia nā roto i te i’oa o Iesu Mesia.
Nō te ha’amau i te fa’atāhinura’a, e tu’u ha’amāmā noa hō’ē taea’e ’aore rā, hau atu, tei mau i te Autahu’ara’a a Melehizedeka, i tō rātou rima i ni’a i te upo’o o te ta’ata. Te ta’ata nāna e ha’amau i te fa’atāhinura’a :
-
E pi’i ’oia i te ta’ata nā tōna i’oa tā’āto’a.
-
E fa’ahiti ’oia ē, tē ha’amau nei ’oia i te fa’atāhinura’a nā roto i te ha’amanara’a o te Autahu’ara’a a Melehizedeka.
-
E hōro’a ’oia i te mau parau ha’amaita’ira’a ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
18.14
Te mau ha’amaita’ira’a tāmāhanahana ’e te a’o, e tae noa atu i te mau ha’amaita’ira’a a te Metua
18.14.1
Nā vai e hōro’a i te ha’amaita’ira’a
E nehenehe te mau taea’e o te Autahu’ara’a a Melehizedeka e hōro’a i te mau ha’amaita’ira’a tāmāhanahana ’e te a’o i te mau melo o te ’utuāfare ’e i te tahi atu mau ta’ata ’o tē ani mai i te reira. E hōro’ahia te rahira’a o teie mau ha’amaita’ira’a e te mau melo o te ’utuāfare, te mau taea’e aupuru ’aore rā, te feiā fa’atere o te autahu’ara’a.
E nehenehe te hō’ē metua tāne tei mau i te Autahu’ara’a a Melehizedeka e hōro’a i te mau ha’amaita’ira’a a te metua tāne i tāna mau tamari’i. E nehenehe teie mau ha’amaita’ira’a e riro ’ei tauturu ta’a ’ē nō te mau tamari’i ’ia haere rātou i te ha’api’ira’a, ’ia haere i te misiōni, ’ia fa’aipoipo, ’ia ō i roto i te ’āua fa’ehau, ’aore rā, ’ia fārerei rātou i te mau tītaura’a ta’a ’ē. E fa’aitoito te mau metua i tā rātou mau tamari’i ’ia ’imi i te mau ha’amaita’ira’a a te metua tāne i te mau taime fifi. E nehenehe e haruharu i te mau ha’amaita’ira’a a te metua tāne nō te fa’a’ohipara’a a te ta’ata iho.
’Aita te hō’ē ta’ata tei mau i te Autahu’ara’a a Melehizedeka e tītauhia ’ia ani i te parau fa’ati’a a te feiā fa’atere o te autahu’ara’a nō te hōro’a i te hō’ē ha’amaita’ira’a tāmāhanahana ’e te a’o e ’aore rā, te hō’ē ha’amaita’ira’a a te metua tāne.
18.14.2
Mau arata’ira’a
Nō te hōro’a i te hō’ē ha’amaita’ira’a tāmāhanahana ’e te a’o, ’aore rā, hō’ē ha’amaita’ira’a a te metua tāne, e tu’u hō’ē ta’ata ’aore rā, hau atu, tei mau i te autahu’ara’a a Melehizedeka, i tō rātou rima, ha’amāmā noa, i ni’a i te upo’o o te ta’ata. I muri iho, te ta’ata e fa’ahiti i te pure :
-
E pi’i ’oia i te ta’ata nā tōna i’oa tā’āto’a.
-
E fa’ahiti ’oia ē, tē ravehia nei te ha’amaita’ira’a nā roto i te ha’amanara’a o te Autahu’ara’a a Melehizedeka.
-
’A hōro’a i te mau parau ha’amaita’ira’a, te tāmāhanahanara’a, ’e te a’o ma te arata’ihia e te Vārua.
-
E fa’aoti ’oia nā roto i te i’oa o Iesu Mesia.
18.15
Ha’amo’ara’a i te mau fare
E nehenehe te mau melo o te ’Ēkālesia e ha’amo’a i tō rātou fare nā roto i te ha’amanara’a o te Autahu’ara’a a Melehizedeka. ’Aita e tītauhia ’ia fatu i te fare, ’aore rā, ’ia pe’e te tārahu nō te ha’amo’a i te fare. Te vāhi ta’a ’ē i te mau fare o te ’Ēkālesia, ’aita te mau fare nohora’a e ha’amo’ahia i te Fatu.
18.15.1
Nā vai e rave i te ha’amo’ara’a
Nā te hō’ē ta’ata tei mau i te Autahu’ara’a a Melehizedeka e ha’amo’a i te hō’ē fare. Mai te mea ’aita e ta’ata tei mau i te Autahu’ara’a a Melehizedeka i roto i te fare :
-
E nehenehe te ’utuāfare e tītau i te hō’ē hoa, fēti’i, e ’aore rā te taea’e aupuru tei mau i te Autahu’ara’a a Melehizedeka nō te ha’amo’a i te fare. ’Aita e tītauhia i te reira ta’ata ’ia ani i te parau fa’ati’a a te hō’ē ti’a fa’atere o te autahu’ara’a.
-
E nehenehe te ’utuāfare e putuputu ’e e hōro’a i te hō’ē pure ma te arata’ihia e te Vārua. E nehenehe e fa’ahiti i roto i te pure i te mau mea tei fa’a’itehia i roto i te 18.15.2, number 3.
18.15.2
Mau arata’ira’a
Nō te ha’amo’a i te hō’ē fare, te ta’ata tei mau i te Autahu’ara’a a Melehizedeka :
-
E paraparau ’oia i te Metua i te ao ra nā roto i te hō’ē pure.
-
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
-
E ha’amo’a ’oia i te fare ’ei vāhi i reira te Vārua Maita’i e nehenehe ai e pārahi, ’e e hōro’a ’oia i te tahi atu mau parau ma te arata’ihia e te Vārua. ’Ei hi’ora’a, e nehenehe ’oia e ha’amaita’i i te fare ’ia riro ’ei vāhi i reira te mau melo o te ’utuāfare e nehenehe ai e ha’amori, e fāri’i i te pārurura’a i te mau mea o te ao nei, e tupu i te rahi i te pae vārua, ’e e fa’aineine nō te mau autā’atira’a ’utuāfare mure ’ore.
-
E fa’aoti ’oia nā roto i te i’oa o Iesu Mesia.
18.16
Ha’amaita’ira’a i te mau mēnema
18.16.1
Nā vai e ha’amo’a i te mēnema
E ti’a i te ta’ata e ha’amo’a i te mēnema ’ia mau ’oia i te Autahu’ara’a a Melehizedeka ’e ’ia fa’ati’ahia e te ti’a fa’atere o te autahu’ara’a e fa’atere ra i te purera’a.
Mai te mea e hina’aro te ’utuāfare, e nehenehe e hōro’a noa i te hō’ē pure ’eiaha rā te hō’ē pure ha’amo’ara’a. E hōro’ahia te reira nā te hō’ē ta’ata tā te ’utuāfare e mā’iti.
Nō te fa’ahiti i te pure ha’amo’ara’a i te hō’ē mēnema, e ti’a i te ta’ata nō te tahi atu pāroita ’ia fa’a’ite i te hō’ē parau fa’ati’a mana nō te hiero i te ti’a fa’atere o te autahu’ara’a e fa’atere ra i te purera’a. ’Aore rā, e nehenehe ’oia e fa’a’ite i te hō’ē Parau fa’ati’a nō te rave i te hō’ē ’ōro’a tei tu’urimahia e te hō’ē melo o tōna ’episekōpora’a.
18.16.2
Mau arata’ira’a
Nō te ha’amo’a i te hō’ē mēnema, te ta’ata tei mau i te Autahu’ara’a a Melehizedeka :
-
E paraparau ’oia i te Metua i te ao ra nā roto i te hō’ē pure.
-
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
-
E ha’amo’a ’e e fa’ata’a ’oia i te vāhi hunara’a ’ei vāhi fa’aeara’a nō te tino o te ta’ata pohe.
-
E pure ’oia ’ia fa’aturahia ’e ’ia pāruruhia te reira vāhi ē tae noa atu i te ti’afa’ahoura’a (i te vāhi e tano).
-
E ani i te Metua i te ao ra ’ia tāmāhanahana i te ’utuāfare ’e e fa’ahiti i te mau mana’o ma te arata’ihia e te vārua.
-
E fa’aoti ’oia nā roto i te i’oa o Iesu Mesia.
Mai te mea e tūtu’ihia te tino o te hō’ē melo o te ’Ēkālesia, nā te ti’a fa’atere e fa’aoti ē, e ha’amo’a ānei i te vāhi i reira e vaiihohia ai te rehu. E hi’o ’oia i te hina’aro o te ’utuāfare ’e i te mau peu ’e te mau ture o te fenua. Te taea’e e rave i te reira, nāna e fa’a’au i te mau arata’ira’a nō ha’amo’ara’a i te hō’ē mēnema.
18.17
Mau ha’amaita’ira’a pātereāreha
Te mau melo ti’amā ato’a tei bāpetizohia, e ti’ara’a tō rātou ’ia fāri’i i te hō’ē ha’amaita’ira’a pātereāreha, ’o tē hōro’a mai i te arata’ira’a fa’auruhia nō ’ō mai i te Metua i te ao ra (hi’o Genese 48:14 ; 49 ; 2 Nephi 4:3–11). E fa’aitoito te mau metua ’e te feiā fa’atere o te ’Ēkālesia i te mau melo ’ia fa’aineine ia rātou i te pae vārua nō te fāri’i i tō rātou ha’amaita’ira’a pātereāreha.
Nā te ’episekōpo ’aore rā, nā te hō’ē tauturu i fa’ata’ahia e uiui i te mau melo o te hina’aro e fāri’i i te hō’ē ha’amaita’ira’a pātereāreha. Mai te mea e mea ti’amā te melo, e hāmani te ta’ata uiui i te hō’ē parau fa’ati’a nō te ha’amaita’ira’a pātereāreha. E hāpono ’oia i te reira nā roto i te Fa’anahora’a nō te ha’amaita’ira’a pātereāreha i ni’a i te ChurchofJesusChrist.org.
18.17.1
Fāri’ira’a i te hō’ē ha’amaita’ira’a pātereāreha
I muri a’e i te fāri’ira’a i te hō’ē parau fa’ati’a, e fārerei te melo i te pātereāreha nō te fa’ata’a i te hō’ē fārereira’a nō te fāri’i i te hō’ē ha’amaita’ira’a pātereāreha. I te mahana o te fārereira’a, ’ia haere te mau melo i te patereareha ra i te hō’ē huru i roto i te pure ’e i roto i te mau ’ahu nō te sābati. E nehenehe te mau melo e ha’apae i te mā’a, ’aita rā te reira i tītauhia.
E mea mo’a te ha’amaita’ira’a pātereāreha tāta’itahi, e mea ’ōmo’e, ’e nō te ta’ata iho. Nō reira, e hōro’ahia te reira i te vāhi ’ōmo’e, maori rā e nehenehe te hō’ē fāito iti o te mau melo o te ’utuāfare e ’āmui i roto.
Hō’ē ta’ata e fari’i i te hō’ē ha’amaita’ira’a patereareha, ’ia fa’aherehere noa i te reira mau parau, ’ia feruri i te reira, e ora ’ia vai ti’amā noa nō te fari’i i te mau ha’amaita’ira’a tei fafauhia i roto i teie orara’a e a muri noa atu.
’Eiaha te mau melo o te ’Ēkālesia e fa’a’au i te mau ha’amaita’ira’a, ’e ’eiaha ato’a e fa’a’ite i te reira maori rā, i te mau melo fātata o te ’utuāfare. ’Eiaha e tai’o i te mau ha’amaita’ira’a pātereāreha i roto i te mau putuputura’a a te ’Ēkālesia ’aore rā, i roto i te tahi atu mau rurura’a ta’ata.
Mai te mea ’aita i fa’a’itehia i roto i te ha’amaita’ira’a pātereāreha te rēni tupuna, e nehenehe te pātereāreha e tu’u mai ’a muri a’e i te hō’ē parau nō te fa’a’ite i te rēni tupuna.
18.17.2
Fāri’ira’a i te mau ’api parau nō te mau ha’amaita’ira’a pātereāreha
Te hō’ē ta’ata tei fāri’i i te hō’ē ha’amaita’ira’a pātereāreha, e ti’a ïa iāna ’ia ha’apa’o maita’i i te hōho’a tāna i fāri’i. Terā rā, mai te mea ’ua mo’e teie parau ’aore rā, ’ua ’ino, e nehenehe te ta’ata e ani fa’ahou i te hō’ē ’api. E nehenehe tāna e ani i te Patriarchal Blessings (Ha’amaita’ira’a pātereāreha} i ni’a ChurchofJesusChrist.org. Mai te mea e’ita e nehenehe, e fārerei te ta’ata i tōna ’episekōpo nō te tauturu.
18.17.3
Te tahi atu mau ha’amāramaramara’a
Nō te tahi atu mau ha’amāramaramara’a nō ni’a i te mau ha’amaita’ira’a pātereāreha, hi’o 38.2.12 ’e « Ha’amaita’ira’a pātereāreha ».
18.18
Te ’ōro’a hiero ’e te tā’atira’a
Nō te mau ha’amāramaramara’a nō te mau ’ōro’a hiero ’e te tā’atira’a, hi’o pene 27.