“18. Kōm̧m̧ani Kain̄i ko im Kōjeraam̧m̧an ko an Priesthood,” Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata (2024).
“18. Kōm̧m̧ani Kain̄i ko im Kōjeraam̧m̧an ko an Priesthood,” Bok in Bōk Meļeļe Eļap.
“18.
Kōm̧m̧ane Kain̄i ko im Kōjeraam̧m̧an ko an Priesthood
18.0
Kadkad In
Kain̄i ko im kōjeraam̧m̧an ko rej jerbal ko rekwojarjar kar kōm̧m̧ani kōn kajoor eo an priesthood im ilo etan Jisōs Kraist. Ilo an rikabwijer priesthood ro kōm̧m̧ani kain̄i ko im kōjeram̧man ko, rej ļoor waanjon̄ak eo an Rilo̧mo̧o̧r n̄an kōjeraam̧m̧an ro jet. Kain̄i ko im kōjeraam̧m̧an ko an priesthood repād n̄an bōk kajoor eo an Anij (lale Katak im Bujen Ko 84:20).
Kain̄i ko im kōjeram̧man ko rej kōm̧m̧an kōn tōmak ilo Jemādwōj Ilan̄ im Jisōs Kraist im ekkar n̄an tōl eo an Jetōb Kwojarjar. Ritōl ro rej lukkuun lale bwe rej kōm̧m̧ani kōn mālim eo ekkar (ijo ekkar), kōn mālim in priesthood eo ekkar, ilo wāween ekkar im jān ro rerreeo rej bōk kūņaer (lale 18.3).
N̄an kien ko an kain̄i ko im kōjeraam̧m̧an ko an priesthood, lale 38.2.
18.1
Kain̄i ko an Lo̧mo̧o̧r im Mour ilo Aiboojoj eo Eutiejtata
Priesthood ekoba mālim eo n̄an kwaļo̧k kain̄i ko an gospel me rej mennin aikuj n̄an lo̧mo̧o̧r im mour ilo aiboojoj eo eutiejtata. Armej rej kōm̧m̧ani bujen ko rekwojarjar ippān Anij ilo aer bōk kain̄i kein. Kain̄i ko an lo̧mo̧o̧r im mour ilo aiboojoj eo eutiejtata rej elaajrak ilaļ:
-
Peptaij
-
Kapen im menin letok eo an Jetōb Kwojarjar
-
Leļo̧k im ekkapit n̄an juon opiij ilo Melkisedek Priesthood (n̄an em̧m̧aan ro)
-
Bōk menin letok kwojarjar ilo tampeļ
-
Ļiāp ilo tampeļ
N̄an meļeļe ko kōn kōm̧m̧ani kain̄i kein n̄an ro rej wōtame ilo kōļmenļo̧kjeņ, lale laajrak in:
-
N̄an peptaij im kapene (38.2.8.1)
-
N̄an ekkapit n̄an juon opiij an Melkisedek Priesthood (38.2.9.7).
-
N̄an bōk menin letok kwojarjar ilo tampeļ im liāp (27.2.1.3 im 27.3.1.2)
Eļan̄n̄e juon ajri eo ekar ļotak ilo bujen im mej m̧okta jān an 8 iiō, ejjab menin aikuj bwe kain̄i ko ren kōm̧m̧an. Eļan̄n̄e ajri eo ekar jab ļotak ilo bujen eo, kain̄i eo wōt enaaj aikuj ej liāp n̄an ro jinen im jemān. Kōnke kōn Pinmuur eo an Rilo̧mo̧o̧r eo, aolep ajri ro rej mej m̧okta jān an 8 aer iiō “remour ilo aelōn̄ selestial in lan̄” (Katak im Bujen Ko 137:10; bar lale Moronai 8:8–12).
18.2
Kain̄i ko im Kōjeraam̧m̧an ko Jet an Priesthood
Kain̄i ko im kōjeraam̧m̧an ko jet an priesthood ekkōm̧m̧an bwe ro nejin Anij ren bōk kajoor eo An, kōmour, aenōm̧m̧an, im tōl. Kain̄i ko im kōjeraam̧m̧an ko rej elaajrak ilaļ:
-
Leļo̧k etan im kōjeraam̧m̧an ajri ro
-
Kwojkwoj eo
-
Leļo̧k im ekkapit n̄an juon opiij n̄an Priesthood eo an Aron (n̄an likao im em̧m̧aan ro.)
-
Kōjeno̧lo̧k membōr ro n̄an jerbal ilo kūr ko
-
Oil in kōjeraam̧m̧an
-
Kōjeraam̧m̧an ro rej nan̄inmej
-
Kōjeraam̧m̧an ko an kaenōm̧m̧an im ko̧o̧njeļ, ekoba kōjeraam̧m̧an ko an juon jemān.
-
Aje im̧ōko
-
Aje lōb ko
-
Kōjeraam̧m̧an ko an Petriak jān patriak ro em̧ōj aer ekkapit.
18.3
Bōk Koņaan ilo juon Kain̄i ak Kōjeraam̧m̧an
Ro rej kōm̧m̧an ak bōk koņaan ilo juon kain̄i ak kōjeraam̧m̧an eaikuj in wōr an mālim in priesthood eo ekkar im en erreeo. Eitien aolep iien, jon̄ak eo an erreeo ej aikuj ekeijelļo̧k n̄an kabwijer juon peba in mālim n̄an deļo̧n̄e tampeļ. Ijoke, āinwōt tōl jān Jetōb im kōmeļeļe ko ilo jepta in, bisop ro im stake būreejtōn ro remaron̄ kōtļo̧k an baba ro im ļōm̧aro pālele ro rej kabwijer opiij eo an priesthood ekkar n̄an kōm̧m̧an ak an pād ilo jet kain̄i ko im kōjeram̧m̧an ko men̄e rejjab lukkuun erreeo n̄an tampeļ. Juon rikabwijer priesthood eo ejjan̄in dedeļo̧k an kajim̧we jerawiwi ko reļļap ejjab aikuj bōk koņaan.
Eitōn aolep iien, ritōl ro wōt an priesthood im rikabwijer priesthood ro jet ro repaake ro uwaan baam̧le eo im ro m̧ōttāer remaron̄ bōk koņaer ilo juon kain̄i ak kōjeraam̧m̧an.
Armej eo ej bōk kain̄i eo, ro uwaan baam̧le eo, im ritōl ro an priesthood eo rej ko̧o̧njeļ ippān doon n̄an kāālet wōn eo im jet eo renaaj bōk koņaer. Kāālet in ej aikuj kōm̧m̧an m̧okta jān an kain̄i eo kōm̧m̧an.
N̄e juon wōt ak ruo rikabwijer priesthood ro rej bōk koņaer, kajjojo rej kōmeraik aer likūt pā ko pāier ioon bōran armej eo. N̄e elōn̄ ro rej bōk koņaer, rej jutak ilo juon doulul ipeļaakin armej eo ej bōk kain̄i ak kōjeraam̧m̧an eo. Kajjojo rej kōmeraik aer likūt pā ko ioon bōran armej eo (ak ium̧win nin̄nin̄ eo) im tuanbwij maron̄ pein ioon aeran būratōr eo ituanbwijin. Juon ej ņa ainikien eo n̄an kōm̧m̧ane kain̄i eo ak leļo̧k kōjeraam̧m̧an eo.
Kōm̧m̧an ak bōk jet iaan kain̄i ko im kōjeraam̧man ko reaikuj mālim jān ritōl eo ej tōl eo ej kabwijer ki ko rekkar an priesthood (lale 3.4.1). N̄e emenin aikuj, mālim emaron̄ jān juon rikakpilōklōk eo ej kōmālimi. Lale jaat kein rej elaajrak. Meļeļe ko kōn rej stake būreejtōn ro rej barāinwōt n̄an mijen būreejtōn ro. Meļeļe ko kōn rej bisop ro rej barāinwōt n̄an branch būreejtōn ro.
Wōn Ritōl ro Rej Kabwijer Ki ko n̄an Leļo̧k Mālim n̄an Kōm̧m̧an ak Bōk Kain̄i ko an Lo̧mo̧o̧r im Mour ilo Aiboojoj eo Eutiejtata?
|
Kain̄i ko |
Wōn eo Ej Kabwijer Ki ko |
|---|---|
Kain̄i ko Peptaij | Wōn eo Ej Kabwijer Ki ko Bisop eo (n̄an ajri ro 8 aer iiō im n̄an membōr ro ewōr aer rekoot me 9 aer iiō rūttoļo̧k me kar karum̧wijļo̧k aer peptaij kōn wōt utam̧we ko an kōļmenļo̧kjeņ) Mijen būreejtōn (n̄an ri oktak tok ro) |
Kain̄i ko Kapen im menin letok eo an Jetōb Kwojarjar | Wōn eo Ej Kabwijer Ki ko Bisop eo (n̄an ajri ro 8 aer iiō im n̄an membōr ro ewōr aer rekoot me 9 aer iiō rūttoļo̧k me kar karum̧wijļo̧k aer peptaij kōn wōt utam̧we ko an kōļmenļo̧kjeņ) Mijen būreejtōn (n̄an rioktak ro) |
Kain̄i ko Leļo̧k im ekkapit n̄an juon opiij ilo Melkisedek Priesthood (n̄an em̧m̧aan ro) | Wōn eo Ej Kabwijer Ki ko Stake būreejtōn |
Kain̄i ko Menin letok kwojarjar an tampeļ | Wōn eo Ej Kabwijer Ki ko Bisop im stake būreejtōn |
Kain̄i ko Ļiāp ilo tampeļ | Wōn eo Ej Kabwijer Ki ko Bisop im stake būreejtōn |
Wōn Ritōl ro Rej Kabwijer Ki ko n̄an Leļo̧k Mālim n̄an Kōm̧m̧an ak Bōk Kain̄i ko im Kōjeraam̧m̧an ko?
|
Kain̄i ak Kōjeraam̧man |
Wōn eo Ej Kabwijer Ki ko |
|---|---|
Kain̄i ak Kōjeraam̧man Leļo̧k etan im kōjeraam̧m̧an ajri ro | Wōn eo Ej Kabwijer Ki ko Bisop |
Kain̄i ak Kōjeraam̧man Kwojkwoj eo | Wōn eo Ej Kabwijer Ki ko Bisop |
Kain̄i ak Kōjeraam̧man Leļo̧k im ekkapit n̄an juon opiij n̄an Priesthood eo an Aron (n̄an likao im em̧m̧aan ro.) | Wōn eo Ej Kabwijer Ki ko Bisop |
Kain̄i ak Kōjeraam̧man Kōjeno̧lo̧k membōr ro n̄an jerbal ilo kūr ko | Wōn eo Ej Kabwijer Ki ko Lale 30.8 |
Kain̄i ak Kōjeraam̧man Oil in kōjeraam̧m̧an | Wōn eo Ej Kabwijer Ki ko Mālim ejjab aikuj |
Kain̄i ak Kōjeraam̧man Kōjeraam̧m̧an ro rej nan̄inmej | Wōn eo Ej Kabwijer Ki ko Mālim ejjab aikuj |
Kain̄i ak Kōjeraam̧man Kōjeraam̧m̧an ko an kaenōm̧m̧an im ko̧o̧njeļ, ekoba kōjeraam̧m̧an ko an juon jemān. | Wōn eo Ej Kabwijer Ki ko Mālim ejjab aikuj |
Kain̄i ak Kōjeraam̧man Aje im̧ōko | Wōn eo Ej Kabwijer Ki ko Mālim ejjab aikuj |
Kain̄i ak Kōjeraam̧man Aje lōb ko | Wōn eo Ej Kabwijer Ki ko Priesthood ritōl eo ej tōl ilo jar eo |
Kain̄i ak Kōjeraam̧man Kōjeraam̧m̧an ko an petriak | Wōn eo Ej Kabwijer Ki ko Bisop |
18.4
Kain̄i ko n̄an Ajri ro Reddik
Unin tōl ko n̄an bōk mālim jān ro jinen im jemen ajri ro ak ro ribōk eddo in juon ajri edik n̄an bōk kain̄i im kōjeraam̧m̧an kein kar litok ilo jekjōn ko kar kōllaajrakin itulaļ:
Kōn kajjitōk ko kōn maron̄ ko (legal right) an ro jinen im jemen ak ro ribōk eddo in, bisop eo ak stake būreejtōn eo rej pukot kapilōk (legal advice) jān Church Office of General Counsel ak jān eria opiij eo (lale 38.8.23).
18.5
Kain̄i ko Kōm̧m̧ani n̄an im jān Armej ro Ewōr Utam̧we Āinbwinier
18.6
Leļo̧k Etan im Kōjeraam̧m̧an Ajri ro
“Aolep uwaan kabun̄ eo an Kraist ro ewōr nejier ren bōktok er n̄an elder ro im̧aan kabun̄ eo, ro ren likūt peier ioer ilo etan Jisōs Kraist, im kōjeraam̧m̧an er ilo Etan” (Katak im Bujen Ko 20:70).
Ajri ro ekkā ņaetaer im kōjeraam̧m̧an er ilo iien kweilo̧k in jitlo̧k im kwaļo̧k naan in kam̧ool ilo ward eo ijo im ro jinen im jemān rej pād ie. Menin ejim̧we jekdo̧o̧n n̄e jinen im jemān ajri ro rekar m̧are. Eļan̄n̄e ro jinen im jemān rejjab jokwe ippān doon, kain̄i eo ekkā an kōm̧m̧an ilo ward eo ijo ajri eo ej jokwe ie.
Kōm̧m̧an oktak ko n̄an ijo ajri eo ej kōjeraam̧m̧an eaikuj in bōk mālim jān bisop eo. Kōm̧m̧an oktak ko rekkar ekoba kōjeraam̧m̧an ko reban kōm̧m̧an ilo Jabōt in jitlo̧k, eļaptata ilo ward ko ekanuuj lōn̄ nin̄nin̄ ko ie, im kōjeraam̧m̧an ilo bar juon ward ijo ro jibūn im jim̧m̧aan ajri eo ak elōn̄ ro uwaan baam̧le eo rej jokwe ie. Bisop eo emaron̄ bar kōmālim rikabwijer Melkisedek Priesthood eo ro n̄an kōjeraam̧m̧an ajri eo ilo m̧weeo. Juon membōr in bisoprik eo en pād n̄an tōl.
N̄an meļeļe kōn leļo̧k juon āt im kōjeraam̧m̧an ajri ro ilo jekjek ko rejenoļo̧k, lale 38.2.7.
18.6.1
Wōn eo ej Leļo̧k Kōjeraam̧m̧an eo
Kain̄i eo n̄an leļo̧k āt im kōjeraam̧m̧an juon ajri ej kōm̧m̧an jān rikabwijer Melkisedek Priesthood ro, n̄an ekkeijelļo̧k ippān Katak im Bujen Ko 20:70). Ritōl priesthood ro reaikuj in karon̄ membōr ro m̧okta jān an ajri ro nejier leļo̧k āt im kōjeraam̧m̧an. Ritōl ro reaikuj in kōm̧m̧an aolep kijejeto n̄an bōbrae jook ak inepata n̄an kajjojo armej ak baam̧le ko.
Armej eo ak baam̧le eo ekōņaan bwe juon ajri en bōk juon āt im juon kōjeraam̧m̧an ej lolorjake kain̄i eo ippān bisop eo. Ej kabwijer ki ko an priesthood n̄an leļo̧k āt im kōjeraam̧m̧an ajri ro ilo ward eo.
Juon bisop emaron̄ kōtļo̧k juon baba eo ej kabwijer Melkisedek Priesthood eo n̄an leļo̧k āt im kōjeraam̧m̧an ajri eo nejin men̄e baba eo ejjab erreeo n̄an tampeļ (lale 18.3). Bisop eo ej rōjan̄ baba ro n̄an kōpooj er make n̄an kōjeraam̧m̧an ajri ro nejin make.
N̄an kōjeraam̧m̧an juon ajri, armej eo ejjab jān ward eo an eaikuj kwaļo̧k juon peba in mālim n̄an deļo̧n̄e tampeļ ekāāl n̄an ritōl eo ej tōl. Ak emaron̄ kwaļo̧k juon Recommend to Perform an Ordinance kar jain jān juon iaan membōr in bisoprik eo an.
18.6.2
Kōmeļeļe ko
Ium̧win tōl eo an bisoprik eo, rikabwijer Mekisedek Priesthood ro rej aiindoon ilo juon doulul n̄an leļo̧k etan im kōjeraam̧m̧an juon ajri. Rej likūt pāier ium̧win nin̄nin̄ eo, ak rej likūt pā remera pāier ioon bōran ajri eo. Innām armej eo ej kōm̧m̧ane kōjeraam̧m̧an eo:
-
Ba Jemedwōj Ilan̄ āinwōt ilo jar.
-
Ba bwe kōjeraam̧m̧an eo ej kōm̧m̧an kōn mālim eo an Melkisedek Priesthood.
-
Leļo̧k etan ajri eo.
-
Ba kōn ajri eo.
-
Leļo̧k juon kōjeraam̧m̧an n̄an ajri eo āinwōt an Jetōb tōl.
-
Kili ilo etan Jisōs Kraist.
18.6.3
Rekoot Boom̧ an Ajri ro rej Membōr im Peba in Kōjeraam̧m̧an
M̧okta jān an juon ajri kōjeraam̧m̧an, juon kūļōk ej kōjerbal Leader and Clerk Resources (LCR) n̄an kepooj juon Child Record Form. Ālkin kōjeraam̧m̧an eo, ej kōm̧m̧ane juon rekoot membōr ilo jejtōm̧ eo im kōpooj juon Blessing Certificate. Peba in ej jain jān bisop eo im leļo̧k n̄an jinen im jemān ajri eo ak ribōk eddoin ajri eo.
Āt eo ilo rekoot an membōr eo im peba eo eaikuj jejjet n̄an peba in ļōtak eo, jikin ļōtak, ak jejjet in etan.
18.7
Peptaij
Peptaij kōn tulo̧k ilo dān jān juon eo ewōr mālim ej mennin aikuj n̄an juon armej bwe en erom̧ juon membōr in Kabun̄ in im bōk Jetōb Kwojarjar. Aolep ro rej pukot mour ilo aiboojoj eo eutiejtataj eaikuj ļoor waanjon̄o̧k eo an Rilo̧mo̧o̧r n̄an būki kain̄i kein. (Lale Matu 3:13–17; Jon 3:3–7; Jerbal 2:37–38; 2 Nipai 31:5–21.)
N̄an eļapļo̧k meļeļe kōn peptaij ilo wāween ko rejenoļo̧k, lale 38.2.8.
18.7.1
Mālim bwe juon Armej en Peptaij im Kapen
18.7.1.1
Ajri ro Ewōr Aer Rekoot
Bisop eo ej kabwijer priesthood ki ko n̄an peptaij ajri ro rej 8 aer iiō im ej waļo̧k ilo rekoot eo ilo juon ward. Ajri rein reaikuj peptaij im kapen ilo tōre eo wōt ālikin raan in ļōtak eo aer bwe en 8 aer iiō ej juon un ekkar (lale Katak im Bujen Ko 68:27). Ajri rein rej membōr ro me ekadede uwaanļo̧k rekoot an Kabun̄ in (lale 33.6.2). N̄e retōpar 8 iiō, bisop eo ej lale bwe ren bōk aolep iien ko rem̧m̧an n̄an bōk gospel eo im peptaij im kapen.
N̄an meļeļeļe ko kōn peptaij im kapen an juon armej eo ewōr juon utam̧we ak jorreen ilo kōļmenļo̧kjeņ, lale 38.2.4 im 38.2.8.1.
Bisop eo ak juon iaan rikakpilōklōk eo kar jitōn̄e ej intōrpiuik ajri ro ralitōk aer iiō n̄an peptaij im kapene. Kōmeļeļe ko rej waļo̧k ilo 31.2.3.1.
N̄an kōmeļeļe kōn kanne Rekoot in Peptaij im Kapen, lale 18.8.3)
Bisop ro rej leļo̧k aer n̄an ajri ro 7-iiō rittoier ilo ward eo, lukkuun lale bwe jinen im jemān ajri ro, ritōl ro an Būraimere im rūkaki ro, im ro kar jitōn̄e er n̄an baam̧le ko aer n̄an jipan̄ er kōpooje er n̄an peptaij im bōk kwojarjar. Ritōl ro an doulul eo an elder ro im Doulul eo an Kōrā ro rej bar rōjan̄ jinen im jemān ajri ro n̄an kepooj ajri ro nejier n̄an kain̄i kein.
18.7.1.2
Rioktak ro
Mijen būreejtōn eo ej kabwijer priesthood ki ko n̄an peptaiji rioktak ro ilo juon mijen. Kōn un in, mijenede ro rej jerbal aolep raan rej intōrpiuik rioktak ro n̄an peptaij im kapene. Kōmeļeļe ko rej waļo̧k ilo 31.2.3.2.
N̄an kōmeļeļe kōn kanne Rekoot in Peptaij im Kapen, lale 18.8.3
18.7.1.3
Ajri ro Me Ro Jineer im Jemeer Rejjab M̧are (Ekoba Jepel)
N̄an bōk unin tōl ko kōn peptaij im kapene ajri ro reddik, lale 38.2.8.2
18.7.2
Kweilo̧k in Peptaij eo
Kweiļo̧k in peptaij ko reaikuj in pidodo, kadu, im kōketak ilo jetōb. Emaron̄ koba men kein ilaļ:
-
Kōjan̄jan̄ ainikien al ko im̧aan kōppeļo̧k eo
-
Juon naan in karuwainene ekadu brother eo me ej kōjeikik kweiļo̧k eo
-
Juon al im jar in kōppeļļo̧k.
-
Juon ak ruo kōnono ko rekkadu kōn unin kōnono ko an gospel, ko āinwōt peptaij im menin letok eo an Jetōb Kwojarjar.
-
Juon jokāālet in al ko
-
Peptaij
-
Juon iien kautiej ilo an armej ro rej bōk koņaer ilo peptaij eo jānij n̄an nuknuk ko rem̧ōrā (al in jar ak al in Būraimere ko remaron̄ kōjan̄i ak al kake ilo iien in)
-
Kapene eo an membōr ro jān rekoot ko im 8 aer iiō; im kapene an rioktak ro (lale 18.8)
-
Kwaļo̧k naan in kam̧ool jān rioktak ro rekāāl, eļan̄n̄e rekōņaan.
-
Juon al im jar in ikkilōk
-
Kōjan̄jan̄ ainikien kōjan̄jan̄ wōt ālkin kweilo̧k eo
N̄e juon ajri ewōr an rekoot ej pojak in peptaij, juon uwaan bisoprik eo im būreejtōnji eo an Būraimere ej ko̧o̧ņjeļ ippān baam̧le eo n̄an karōk im jikejuuļ juon iien petaij. Juon membōr in bisoprik eo ej kōjeikik iien eo. Eļan̄n̄e elōn̄ļo̧k jān juon ajri enaaj peptaij ilo ejja allōn̄ eo wōt, rej aikuj kōm̧m̧ane peptaij eo ippān doon.
Ilo stake ko elōn̄ ajri ro ewōr aer rekoot, ajri ro jān elōn̄ ward ko maron̄ kōm̧m̧ane peptaij eo ippān doon. Ilo kain jekjek in, juon membōr in stake būreejtōnji eo ak stake Būraimere būreejtōnji eo ak juon high ko̧o̧njeļ ej ko̧o̧ņjeļ ippān baam̧le ko an ajri ro ren tin peptaij n̄an karōke im jikejuuļi iien peptaij ko. Juon membōr in stake būreejtōnji eo ak juon high ko̧o̧njeļ kar jitōn̄e ej kōjeikik iien peptaij eo. Ward ko ak baam̧le ko remaron̄ jenolo̧k ilo jidik in iien eo bwe kajjojo ajri ren kile. Menin emaron̄, n̄an waanjon̄ak, n̄an kain̄i eo an peptaij, kapene, ak jidik katak jān juon uwaan ward eo ak baam̧le eo. Juon membōr in bisoprik eo ej kōjeikik m̧ōttan jab in an iien eo.
Iien peptaij ko an rioktak ro eaikuj in jikejuuļ ilo iien eo em̧ōkaj ilo iien eo em̧ōj aer bōk aolep ekkar ko n̄an peptaij ilo 31.2.3.2. Peptaij ko an ro uwaan baam̧le rejjab aikuj rum̧wijļo̧k m̧ae iien juon baba emaron̄ bōk priesthood eo im kōm̧m̧ani peptaij eo kōn e make.
Ium̧win tōl eo an bisoprik eo, ritōl mijen eo an ward (eļan̄n̄e juon kar kūr) ak eo uwaan būreejtōnji eo an doulul eo an elder ro eo ej tōl jerbal in mijenede ilo ward eo ej karōk im kōjeikik iien kōpeptaij ko n̄an rioktak ro. Ej barāinwōt lale iien kapene eo an ro rej oktaktok ijelo̧kin n̄e renaaj kapen ilo iien kweilo̧k in kwojkwoj eo. Ej lolorjake menin ippān mijenede ro rej jerbal aolep raan.
18.7.3
Wōn eo ej Kōm̧m̧ane Kain̄i eo
Kain̄i eo an peptaij ej kōm̧m̧an jān juon pris ak juon rikabwijer Melkisedek Priesthood. Armej eo ej kōm̧m̧ane peptaij eo eaikuj bōk mālim jān bisop eo (ak jān mijen būreejtōn eo eļan̄n̄e juon mijenede eo ej jerbal aolep raan ej kōm̧m̧ane peptaij eo).
Juon bisop emaron̄ kōtļo̧k an juon baba eo ej juon pris ak juon rikabwijer Melkisedek Priesthood eo n̄an peptaiji ajri eo nejin men̄e baba eo ejjab lukkuun erreeo n̄an tampeļ (lale 18.3). Bisop eo ej rōjan̄ baba ro n̄an kepooj er make n̄an kōjeraam̧m̧an ajri ro nejier make.
N̄an kōm̧m̧ane juon peptaij, armej eo ejjab jān ward eo an eaikuj kwaļo̧k juon peba in mālim n̄an deļo̧n̄e tampeļ ekāāl n̄an ritōl eo ej tōl. Ak emaron̄ kwaļo̧k juon Recommend to Perform an Ordinance kar jain jān juon iaan membōr in bisoprik eo an.
18.7.4
Ia eo n̄an Kōm̧m̧an Kain̄i eo
Peptaij ko reaikuj in kōm̧m̧an ilo jikin peptaij eo eļan̄n̄e ewōr juon. Eļan̄n̄e ejjeļo̧k juon jikin peptaij, ijo ebwe dān ie maron̄ kōjerbale. Ej aikuj in ļap dān n̄an jim̧or armej eo ej kōm̧m̧ane kain̄i eo im armej eo ej itōn peptaij bwe ren jutak ie. Dān eo ejjab aje n̄an peptaij ko.
Eļan̄n̄e rej kōjerbal jikin peptaij eo ej karōke ilo jikejuuļ jān juon membōr eo kar jitōn̄ e ilo ward eo an bisop eo. .
N̄an kōjparok, juon rūtto eo ej eddoiki ej aikuj in pād ilo iien an jikin peptaij eo ettein̄ im bar pād ilo iien eo ej lutōkļo̧k kobban, em̧ōj karreoki, im koņ. Jikin paptaij eo eaikuj in lutōklo̧k im karreoiki ilo iien eo emōkaj ālkin kajjojo iien peptaij. Kōjem ko n̄an jikin peptaij eo reaikuj in ļak n̄e ejjab jerbal.
18.7.5
Nuknuk
Armej eo ej kōm̧m̧ane peptaij eo im armej eo ej peptaij reaikuj kōņak nuknuk mouj ko me rejjab alikkar n̄e retutu. Juon armej eo em̧ōj an bōk menin letok kwojarjar eo ej kōņak kaarmen eo ium̧win nuknuk in peptaij eo ilo iien kōm̧m̧ane juon peptaij. Iunit eo ijo jokwe ej wiaiki nuknuk in petaij ko kōn bajet eo im jab kōbajet kake n̄an kōjerbale.
18.7.6
Rikam̧ool ro
Ruo rikam̧ool, kōmālim jān ritōl eo ej tōl, lale kajjojo peptaij n̄an lukkuun lale ejejjet kōm̧m̧ane. Membōr ro em̧ōj aer peptaij, ekoba ajri im jodikdik ro, remaron̄ jerbal āinwōt rikam̧ool ro.
Juon peptaij emaron̄ in bar āliji eļan̄n̄e naan ko kar ba rejjab jejjet āinwōt an waļo̧k ilo Katak im Bujen Ko 20:73). Eaikuj bar āliji eļan̄n̄e m̧ōttan ānbwinin armej eo, kooļin bōran, ak nuknuk eo ejjab lukkuun tuļo̧k ilo dān.
18.7.7
Kōmeļeļe ko
N̄an kōm̧m̧ane kain̄i in peptaij eo, juon pris ak rikabwijer Melkisedek Priesthood eo:
-
Ej Jutak ilo dān eo ippān armej eo ej itōn peptaij.
-
Bōk pein armej eo ej itōn peptaij ilo jemlo̧kin lo̧pwiden pein ituanbwijmaron̄ (Bwe en mem̧ak im ejjeļo̧k jorrāān). Armej eo ej itōn peptaij en dāpij jemļo̧kin lo̧pwiden pein tuanbwijmaron̄ in pein rikabwijer priesthood eo ak tuanbwijmaron̄ in pein.
-
Kotak pein anbwijimaron̄ bwe en jōkjōk in jikuwae.
-
Ba likieo in etan armej eo im ba, “Bwe em̧ōj kōmālim eō kōn Jisōs Kraist, Ij peptaij eok ilo etan Jemān, im Nejin, im Jetōb Kwojarjar. Amen” (Katak im Bujen Ko 20:73).
-
Armej eo ej peptaij en dāpij bo̧tin kōn pein anbwijmaron̄ (bwe en meļak); innem rikabwijer priesthood eo ej likūt pein itulikin armej eo im katulo̧k e aolepān, ekoba nuknuk eo. Tuļo̧k epidodo n̄e armej eo ej nukuj bukien.
-
Jipan̄ armej eo waļo̧ktok jān dān eo.
18.7.8
Rekoot in Peptaij
N̄an meļeļe n̄an kōm̧m̧ane juon rekoot in peptaij, lale 18.8.3.
18.8
Kapene im Menin Letok eo an Jetōb Kwojarjar
Ālkin an armej eo peptaij, ļeo ak lieo rej aikuj kapen āinwōt juon membōr in Kabun̄ in im bōk Jetōb Kwojarjar jān likūt pā ko ioon (lale Katak im Bujen Ko 20:41; Jerbal 19:1–6). Armej eo ej erom juon membōr in Kabun̄ in ālkin an kain̄i kein jimor dedeļo̧k im kar jejjet rekooti (lale Jon 3:5; Katak im Bujen Ko 33:11; 3 Nipai 27:20).
N̄an eļapļo̧k meļeļe kōn kapene im jekjek ko rejenoļo̧k, lale 38.2.8.
Bisop eo ej kabwijer priesthood ki ko n̄an kapen uwaanļo̧k rekoot an 8 iiō ilo ward eo an. Mijen būreejtōn eo ej kabwijer ki ko n̄an kapen rioktak ro (n̄an juon kōmeļeļe kōn peptaij an juon rioktak, lale 31.2.3.2).
Bisop eo ej bōk eddo in kapene ko an ajri ro elōn̄ aer rekoot im 8 aer iiō rūttoon. Ajri rein rej aikuj kapene er ilo raan eo wōt rej peptaij.
Mijenede ro rej jerbal aolep raan rej lolorjake menin ippān ritōl ro an ward n̄an karōke kapene eo an rioktak ro āinwōt an jeje ilo 18.7.2. Rioktak ro remaron̄ in kapene ilo iien peptaij eo ak ilo kweilo̧k in kwojkwoj eo ilo ward eo rej jokwe ie iien eo em̧ōkajtata ālkin aer peptaij.
Membōr ro rekāāl rej maron̄ kile er im karuwaineneik tok er āinwōt juon membōr ekāāl an ward eo ilo kweilo̧k in kwojkwoj eo ālkin wōt aer kapene er (lale 29.2.1.1).
18.8.1
Wōn eo ej Kōm̧m̧ane Kain̄i eo
Kain̄i eo an kapene ej kōm̧m̧an jān rikabwijer Melkisedek Priesthood ro. Armej eo ej kōm̧m̧ane eaikuj in kar kōmālim jān bisop eo (ak jān mijen būreejtōn eo eļan̄n̄e juon mijenede eo rej jerbal aolep raan ej kōm̧m̧ane kapene eo).
Rikabwijer Melkisedek Priesthood eo wōt eo ej erreeo n̄an tampeļ emaron̄ kōm̧m̧an kapene eo. Ijoke, juon bisop emaron̄ kōtļo̧k juon baba eo ej kabwijer Melkisedek Priesthood eo n̄an jutak ilo doulul eo n̄an kapene ajri eo nejin men̄e ejjab lukkuun erreeo n̄an tampeļ (lale 18.3).
Juon iaan membōr in bisoprik eo ej bōk koņan ilo kain̄i in. N̄e elder mijenede ro rekar katakin rioktak, bisop eo eaikuj in karuwaineneik tok er n̄an bōk koņaer.
N̄an eo ej ņa ainikien kain̄i in, armej eo ejjab jān ward eo an eaikuj kwaļo̧k juon peba in mālim n̄an deļo̧n̄e tampeļ ekāāl n̄an ritōl eo ej tōl. Ak emaron̄ kwaļo̧k juon Recommend to Perform an Ordinance kar jain jān juon iaan membōr in bisoprik eo an.
18.8.2
Kōmeļeļe ko
Ium̧win tōl eo an bisoprik eo, juon ak lōn̄ļo̧k in rikabwijer Melkizedek Priesthood eo maron̄ in bōk koņaer ilo juon kapene. Rej likūt peier emerā ioon bōran armej eo. Innām armej eo ej kōm̧m̧ane kōjeraam̧m̧an eo:
-
Ba likieo in etan ļeo ak lio.
-
Ba bwe ej kōm̧mane kōn mālim eo an Melkisedek Priesthood eo.
-
Kapene armej eo āinwōt juon membōr in Kabun̄ eo an Jisōs Kraist im Armej ro Rekwōjarjar ilo Raan Ko Āliktata.
-
Ba kwōn “bōk Jetōb Kwojarjar” (ejjab “bōk menin letok eo an Jetōb Kwojarjar”).
-
Leļo̧k naan in kōjeraam̧m̧an āinwōt tōl jān Jetōb Kwojarjar
-
Kili ilo etan Jisōs Kraist.
18.8.3
Rekoot boom̧ in Peptaij im Kapene
M̧okta jān an juon ajri eo ej juon uwaanļo̧k rekoot intōrpiu n̄an peptaij, juon kūļōk ej kōjerbal LCR n̄an kepooj juon Baptism and Confirmation Form. Bisop ak juon rikakpilōklōk eo kar jitōn̄e ej kōjekiik intōrpiu eo im jaini boom̧ eo. Ālkin peptaij im kapene eo, kūļōk eo ej kōjerbal boom̧ in n̄an kōkāāl rekoot eo an ajri eo ilo LCR.
N̄e mijenede eo ej jerbal aolep raan ej intōpiuik juon rūkatak n̄an peptaij, ej kanne Rekoot in Peptaij im Kapene eo ilo an kōjerbal Preach My Gospel app eo. Ālkin peptaij im kapene eo, mijinede ro rej rekoote meļeļe ko ilo app eo im jilkinļo̧k n̄an kūļōk eo an ward eo ilo online. Ward kūļōk ej etale meļeļe eo ilo LCR im ejaake juon rekoot an ro uwaan.
Ālkin an kōm̧m̧an uwaanļo̧k rekoot eo, kūļōk eo ej kōpooj Peba in Peptaij im Kapene eo. Peba in ej jain jān bisop eo im leļo̧k n̄an armej eo.
Āt eo ilo rekoot an membōr eo im peba eo eaikuj jejjet n̄an peba in ļōtak eo, jikin ļōtak, ak jejjet in etan.
18.9
Kwojkwoj eo
Membōr ro an Kabun̄ in rej kuk ippān doon ilo raan in Jabōt n̄an kabun̄jar n̄an Anij im bōk m̧ōttan kwojkwoj eo (lale Katak im Bujen ko 20:75; 59:9; Moronai 6:5–6) Ilo iien kain̄i in, rej bōk m̧ōttan pilawā im dān n̄an keememej en̄taan eo an Rilo̧mo̧o̧r ilo Ānbwinin im bōtōktōkin im n̄an kōkāāl bujen ko rekwojarjar aer (lale Matu 26:26–28; Josep Smith Ukook, Mark 14:20–25; Luk 22:15–20; 3 Nipai 18; Moronai 6:6). Kajjojo reaikuj kautiej ilo iien kōjeraam̧m̧an im leto letak kwojkwoj eo.
18.9.1
Mālim n̄an Kōjeraam̧m̧an Kwojkwoj eo
Bisop eo ej kabwijer priesthood ki ko n̄an kōjeraam̧m̧an kwojkwoj ilo ward eo. Aolep ro rej bōk koņaer ilo kōpooje, kōjeraam̧m̧ane, im leto letak kwojkwoj eo reaikuj bōk mālim jān e ak juon eo ium̧win tōl eo an.
Eļan̄n̄e membōr ro ilo ward eo an rejjab maron̄ bōk m̧ōttan kwojkwoj eo kōnke rejjab maron̄ em̧akūtkūt jān m̧weeo, jikin kōjparok, ak aujpitōļ, bisop eo emaron̄ ejaake rikabwijer priesthood ro n̄an kōjeraam̧m̧an kwojkwoj eo n̄an er. Emaron̄ kōmālim menin eļan̄n̄e rej repād jidik iien itulikin ward eo aer. Ijoke, emaron̄ jab kōmālim kwojkwoj n̄an leļo̧k n̄an membōr ro ilikin ward eo an ilo jet jekjek.
Ilo jekjek ko rekkar, kweilo̧k in kwojkwoj eo emaron̄ in jab kōm̧m̧an ilo jidik iien. Ilo jekjek rot kein, bisop eo emaron̄ kōmālim rikabwijer priesthood ro rereeo ilo ward eo an n̄an keppooje im kōjeraam̧m̧an kwojkwoj eo ilo im̧ōko kajjojo Jabōt. Bisop ro remaron̄ bar kōmālim er n̄an kepooje im kōjeraam̧m̧an kwojkwoj eo n̄an membōr in ward eo ro ejjeļo̧k rikabwijer priesthood ro ilo m̧oko m̧weer.
N̄e bisop eo ej kōmālim kwojkwoj eo bwe en pojak im kōjeraam̧m̧an ilikin jon̄ak in kweilo̧k ko an Kabun̄ in, kōmeļeļe ko ilo 18.9.2 ej bar jerbal n̄an ro rej kōm̧m̧ane kain̄i in.
18.9.2
Wōn eo ej Kōm̧m̧ane Kain̄i eo
-
Rūkaki ro, pris ro, im rikabwijer Melkisedek Priesthood remaron̄ kōpooj kwojkwoj eo.
-
Pris ro im rikabwijer Melkisedek Priesthood ro remaron̄ kōjeraam̧m̧an kwojkwoj eo.
-
Tikōn ro, rūkaki ro, pris ro, im rikabwijer Melkisedek Priesthood ro remaron̄ leto letak kwojkwoj eo.
N̄e ebwe rikabwijer Priesthood eo an Aron, ekkā aer kōm̧m̧ane kain̄i kein. N̄e ejabwe tikōn ro n̄an leto-letak kwojkwoj eo, būreejtōn eo an doulul eo an tikōn ro ej kapilōk ippān bisop eo kōn wōn ro remaron̄ in jipan̄. Eitien aolep iien, ej kajjitōk ippān rūkaki ro im pris ro n̄an jipan̄ m̧okta jān an kajjitōk ippān elder ro ak pris ro routiej.
18.9.3
Unin Tōl ko n̄an Kwojkwoj eo
Kōn wōt kwojarjar eo an kwojkwoj eo, priesthood ritōl ro reaikuj lukkuun kōpooje bwe en jejjet im kautiej. Nuknuk in tebōļ eo an kwojkwoj eaikuj in mouj,, erreo, im metaltōl. Tōre in kwojkwoj ko reaikuj in erreeo. Tōre in kwojkwoj im kab ko reaikuj in pojak m̧oktaļo̧k.
Ro rej kōjeraam̧m̧an kwojkwoj eo reaikuj in kōm̧m̧ane ilo juon wāween ekkar, keememej bwe rej bōk jikin Irooj. Bisoprik eo ej rōjan̄ rikabwijer priesthood ro n̄an lōmnak kōn Pinmuur eo an Rilo̧mo̧o̧r āinwōt aer kōpooje, kōjeraam̧m̧ane, im leto letak kwojkwoj eo.
Ro rej kōjeram̧m̧an kwojkwoj eo reaikuj in karbab im erreeo. Rejjab aikuj kōņake nuknuk ko ak m̧arm̧ar ko me renaaj bōk jikier make ak kōmād membōr ro jān kabun̄jar im kōm̧m̧ani bujen eo me rej jibadbad eo an kwojkwoj eo. Eļan̄n̄e bisop eo eaikuj kapilōk rikabwijer priesthood eo kōn jekjek rot in, ej kōm̧m̧ane menin ilo iakwe. Ej bar bar ļōmņak kōn jon̄an kāāl in armej eo ilo Kabun̄ in.
Leto letak kwojkwoj eo eaikuj in kōm̧m̧an ilo likkuun piktokin im jab lap jān jon̄an. . N̄an waanjon̄o̧k, jet m̧akūtkūt ko (āinwōt likūt pā eo tuanmiin̄ tulik) ak paaktokin (āinwōt juon wōt kain wāween aer nuknuk) ejjab ekkar.
Jarlepju eo rej al al in kwojkwoj eo ilo an pilawā eo ruje. Ainikien ko ak kōjan̄jan̄ in al ejjab aikuj bōk jikin al in. Ejjeļo̧k al eaikuj in jan̄ ilo iien leto-letak kwojkwoj eo ak dedeļo̧kin wōt an m̧ōj.
Eļan̄n̄e membōr eo ej kadōk m̧ōn̄ā ak kadōk m̧ōn̄ā ko elōn̄ gluten ie, rej kōnono kake ippān juon uwaan bisoprik eo ta okoktak ko n̄an kōm̧m̧an n̄an kwojkwoj eo. N̄e emenin aikuj, bisoprik eo emaron̄ kōkm̧anm̧anļo̧k kilen kōpooj kwojkwoj eo n̄an er.
Ilo m̧ool, rej aikuj kajidikdiki bilawe ko āinwōt m̧ōttan kain̄i eo an kwojkwoj eo. Ijoke, n̄an lukkun lale bwe ājmour im kōjparok an juon membōr, membōr eo emaron̄ bōktok bilawe ko me rejjab kadōki ak bar juon men eo me enej bōk tarin bilawe ilo juon būļāājtiik pāāk ak kap. Rej leļo̧k menin n̄an rikabwijer priesthood eo n̄an likūti ilo juon bar tōre ejenolo̧k. Bisoprik eo ej jipan̄ ro rej leto-letak kwojkwoj eo jeļā kajjien membōr ro pilawe eo rejjab kadōke en etal n̄an er.
Lale disability.ChurchofJesusChrist.org n̄an unin tōl ko ikkijeen m̧ōn̄ā ko rejjōkar aer kan̄n̄i.
Men̄e kwojkwoj eo ej n̄an membōr ro an Kabun̄ in, ejjeļo̧k juon men eaikuj bōbrae an ro jet bōk m̧ōttan.
18.9.4
Kōmeļeļe ko
-
Ro rej kepooje, kōjeraam̧m̧an, ak leto-letak kwojkwoj eo rej reaikuj in kwaļ pāier m̧okta kōn joop ak kein karreo ko jet.
-
Rūkaki ro, pris ro, ak rikabwijer Melkisedek Priethood ro ren lukkuun lale bwe ren kanne tōre in pilawe ko kōn pilawe rejjan̄in rūji, tein̄i tōre in dān eo kōn kab ko in dren erreeo, im nuknuk in tābōļ eo en erreeo im pojak m̧okta jān kweilo̧k eo.
-
Ilo an membōr ro al al in kwojkwoj eo, ro renaaj kōjeram̧m̧an kwojkwoj eo renaaj jutak ilo kautiej, kōm̧akūt nuknuk eo me ej pinej tōre in pilawā eo, im ruje pilawe eo ilo m̧ōttan ko reddik.
-
Ālkin al eo, armej eo ej kōjeraam̧m̧an pilawe eo ej pukwelōlō im ba jar in kwojkwoj eo (lale Katak im Bujen Ko 20:77).
-
Bisop eo ej lukkuun lale bwe jar in kwojkwoj eo en alikkar, jim̧we, im ba ilo kautiej. Eļan̄n̄e juon ej kōm̧m̧an bōd ilo an ba naan ko im ej kajim̧we e make, ejjeļo̧k bar kajjim̧we aikuji. Eļan̄n̄e armej eo ejjab kajim̧we bōd eo, bisop eo ej kajjitōk ippān bwe en bar āliji jar eo. Bisop eo ej kōjerbal bōklekōt n̄e kajjitōk bwe jar eo en bar āliji. Ej lukkuun lale bwe kōm̧m̧an āindein en jab kōm̧m̧an jook im kabweer jān kain̄i in. Bar armej eo juon ilo tābōļ in kwojkwoj eo emaron̄ jipan̄ n̄e aikuji.
-
Ālkin jar eo, rikabwijer priesthood ro rej leto-letak kwojkwoj eo n̄an membōr ro ilo kautiej. Ritōl eo ej tōl ej bōke jinoin, ālkin ejjeļo̧k bar juon karōk. Ilo an membōr ro bōk tōre eo, remaron̄ bar leļo̧k n̄an bar eo juon.
-
Membōr ro rej bōk kōn tuanbwijmaron̄in pāier n̄e ekkar.
-
N̄e em̧ōj an pilawe eo letok-letak n̄an aolep membōr ro, ro rej leto-letak kwojkwoj eo rej kōro̧o̧l tōre ko n̄an tabōļ in kwojkwoj eo. Ro rej kōjeraam̧m̧an kwojkwoj eo rej likūt nuknuk eo im kalpupuik tōre in pilawe ko im joļo̧k an kōbar tōre in dān ko.
-
Armej eo ej bukwelōlō im kōjeraam̧m̧an dān eo im ba jar in kwojkwoj eo an dān (lale Katak im Bujen Ko 20:79. E ej kōjerbal naan eo dān ijello̧kin wain.
-
Ālkin jar eo, rikabwijer priesthood ro rej leto-letak kwojkwoj eo n̄an membōr ro ilo kautiej. Ritōl eo ej tōl ej bōke jinoin, ālkin ejjeļo̧k bar juon karōk.
-
N̄e em̧ōj leto letak dān eo n̄an aolep membōr ro, ro rej leto letak kwojkwoj eo rej kōro̧o̧l tōre ko n̄an tabōļ in kwojkwoj eo. Ro rej kōjeraam̧m̧an kwojkwoj eo rej likūt nuknuk eo im kalpupuik tōre ko, im ro raar kōjeraam̧m̧an im leto letak kwojkwoj rej bōk jikier ilo kautiej.
-
Ālkin kweilo̧k eo, ro raar kepooj kwojkwoj eo rej karreoiki, limi eran tābōļ eo, im joļo̧k jabdewōt pilawe kar jab kōjerbale.
18.10
Leļo̧k Priesthood eo im Ekkapit n̄an juon Opiij
Ewōr ruo m̧ōttan priesthood eo: Aron im Melkisedek (lale 3.3; Katak im Bujen Ko 107:1, 6). N̄e priesthood in ej leļo̧k ioon juon armej, ej bar ekkapit n̄an juon opiij ilo priesthood in. Ālkin an juon iaan priesthood kein jim̧ōr leļo̧k, juon em̧m̧aan eaikuj in wōt ekkapit n̄an opiij ko ilo priesthood in.
N̄an eļapļo̧k meļeļe kōn kain̄i ko an priesthood ilo jekjek ko rejenoļo̧k, lale 38.2.9.
18.10.1
Melkisedek Priesthood eo
Stake būreejtōn eo ej kabwijer prieshood ki ko n̄an leļo̧k Melkisedek Priesthood im ekkapit n̄an opiij ko an elder im pris eo eutiej. Ijoke, bisop eo emmakijkij an leļo̧k mālim ko n̄an ekkapit kein.
18.10.1.1
Elder ro
Em̧m̧aan ro rerreo remaron̄ ibōk preisthood eo an Melkisedek im ekabit n̄an elder ro n̄e rej 18 iiō ak rūttoļo̧k. Pedped ioon jekjek ko an kajjojo armej, bisop eo ej karōke n̄e ļaddik eo eaikuj kōmālimi n̄an ekkapit n̄an juon elder ālkin wōt an 18 an iiō ak pād wōt ilo doulul eo an pris ro. Jekjek kein ekoba kein ippān ļaddik eo:
-
Naan in kam̧ool im rūttoon.
-
kadiwōjļo̧k jen jikuuļ.
-
Ikideleel im iiao̧ ippān ro m̧ōttan.
-
Jikuuļ ilo kaļōj (college).
Ilo kōm̧m̧ane jokālōt in, bisop eo ej m̧ōktata kōnono ippan likao eo im ippān ro jinen im jemen ak ro rej bōk eddoin. Em̧m̧aan ro rereeo reaikuj ekkapit n̄an elder ilo 19 iiō ak m̧okta jen aer em̧m̧akūt jen kapijuknen ilo jikuuļ ilo kaļōj (college), jerbale juon mijen aolep raan, jerbal ilo jikin tariņae, ak bōk juon jerbal aolep raan.
Em̧m̧aan ro 18 aer iiō ro ej kab m̧ōj aer peptaij im rūttoļo̧k remaron̄ ekkapit n̄an elder ālkin wōt aer:
-
Kar bōk Priesthood eo an Aron im kar jerbal āinwōt pris ro.
-
Kōļapļo̧k jeļāļo̧kjeņ ebwe kōn gospel in.
-
Kwaļo̧k aer erreeo.
Ejjeļo̧k jon̄an membōr in Kabun̄ in eaikuji.
18.10.1.2
Pris ro Routiej
Em̧m̧aan ro rej ekkapit n̄an pris eutiej n̄e rej kūr n̄an juon stake būreejtōnji, ko̧o̧njeļ eo eoutiej, ak bisoprik. Remaron̄ barāinwōt ekkapit n̄an iien ko jet āinwōt kālet jen stake būreejtōn eo kōn lukkuun jar im im̧we an jetōb.
18.10.1.3
Intōrpiu im Rejetak
Kōn mālim eo an stake būreejtōnji eo, bisop eo ej intōrpiuiki būratōr eo āinwōt an kōmelōte wāween eo ilo Rekootin Ekkapit eo n̄an Melkisedek Priesthood. Innem juon membōr in stake būreejtōnji eo ej bar intōrpiuik e. Ippān mālim eo jen mijen būreejtōn, district būreejtōn emaron̄ intōrpiuiki būratōr eo n̄an ekkapit āinwōt juon elder (lale 6.3). N̄an eļapļo̧k meļeļe kōn intōrpiu kein, lale 31.2.6.
Ālikin intōrpiu eo, stake būreejtōnji eo kajitōk ippān ko̧onjeļ eo eutiej n̄an rejetake kālōt eo n̄an kapiti būratōr eo. Juon membōr in stake būreejtōnji eo ej kwaļo̧k etan n̄an rejetake ilo m̧wen̄an eo eļap in kweilo̧k eo eļap an stake eo (lale 18.10.3). Jān mālim eo an mijen būreejtōn eo, juon district būreejtōn emaron̄ kwaļo̧k etan būratōr eo n̄an rejetak n̄an ekkapit n̄an juon elder (lale 6.3).
18.10.2
Priesthood eo an Aron
Bisop eo ej kabwijer priesthood ki ko n̄an leļo̧k Priesthood eo an Aron im ekkapit n̄an opiij ko an tikōn, rūkaki, im pris. Em̧m̧aan ro rōreeo ekkā aer ekkapit n̄an opiij kein ilo iiō kein ilaļ, ak ejjab m̧oktaļo̧k:
-
Tikōn ilo jino in iiō eo rej tōpar 12
-
Rukaki ilo jino in iiō eo rej tōpar 14
-
Pris ilo jino in iiō eo rej tōpar 16
Bisop eo ak juōn iaan rikapilōklōk ro an im em̧ōj jittōn̄e n̄an intōrpiuk ro em̧ōj kapit er n̄an tikōn ak rūkaki n̄an lale n̄e repojak ilo mour in jetōb. Bisop eo ej intōrpiuiki būratōr ro im rej aikuj ekapit n̄an pris.
M̧okta jān intōrpiuki juon likao n̄an an ekkapit n̄an priesthood eo, bisop eo ej bōk mālim jān ippān pāāren ro ak ro ribōk eddo in. Mālim eo ejjab aikuji jān juon pāāren ak eo ribōk eddo in me ejjeļo̧k an legal basis ie n̄an jum̧ae jerbal eo.
N̄e loe ke būratōr in erreeo ilo intōrpiu eo, juon membōr in bisoprik eo ej kwaļo̧k etan n̄an rejetake ilo kweilo̧k in kwojkwoj eo (lale 18.10.3).
N̄an eļapļo̧k meļeļe n̄an kapit em̧m̧aan ro rej kab peptaij, lale 38.2.9.1.
18.10.3
Kwaļo̧k etan Membōr eo N̄an Rejetak m̧okta jen An Ekkapit.
Ālkin an būratōr eo intōrpiu im kar loe ke erreeo n̄an ekkapit n̄an opiij eo an priesthood, ej aikuj waļo̧k etan n̄an rejetak (lale Katak im Bujen Ko 20:65, 67). Em̧m̧aan ro kar ekkapit elder ak pris eutiej rej kwaļo̧k etaer jen juon membōr in stake būreejtōnji eo ilo m̧wen̄an eo eļap an kweilo̧k eo eļap an stake (lale 6.3 n̄an eļapļo̧k meļeļe n̄an district būreejtōn ro). Likao ro kar ekkapit n̄an tikōn, rūkaki, ak pris rej kwaļo̧k etaer jān juon membōr in bisoprik eo ilo kweilo̧k in kwojkwoj eo.
Armej eo ej kōjekiiki rejetake eo ej kajjitōk bwe būratōr eo bwe en jutak. Ej kōjjeļāik rejetak eo n̄an ekkapit n̄an Priesthood eo an Aron ak Melkisedek (n̄e ekkar) im n̄an kapit būratōr eo n̄an opiij eo an priesthood. Innām ej kōtļo̧k an membōr ro kōm̧m̧ane rejetake eo. N̄an waanjon̄ak, ej kwaļo̧k etan būratōr eo n̄an ekkapit juon elder, emaron̄ kōjerbal naan kein āinwōt:
“Jej kile bwe [āt eo] en bōk Melkisedek Priesthood im ekkapit n̄an juon elder. Ro rej errā remaron̄ kwaļo̧k ilo aer kotak tuanbwijmaron̄ in peir. [Bōjrak ilo jidik iien.] Ro rej jum̧ae, eļan̄e ewōr, maron̄ barāinwōt kwalo̧ke. [Bōjrak ilo jidik iien.]”
Armej eo me kar kwaļo̧ke aikuj bōk koņaan ilo rejtake eo. Eļan̄n̄e elōn̄ļo̧k jān juon armej rej kwaļo̧ke, remaron̄ rejtake er āinwōt juon kumi.
Eļan̄n̄e juon membōr ej jum̧aik ekkapit eo, ritōl eo ej tōl ak bar ritōl priesthood eo juon kar jitōn̄e enaaj kweilok ippān armej in makeļo̧k ālkin kweilo̧k eo. Ritōl eo ej pukōt n̄an meļeļe etke membōr eo ej jum̧ae. Ej kajjitōk eļan̄n̄e membōr eo ejeļā kōn m̧wil eo me emaron̄ kōm̧m̧an bwe armej eo en jab ekkar n̄an ekkapit ilo opiij eo.
Membōr ro wōt rej mour kōn kien im bujen ko aer maron̄ bōk koņaan ilo rejtak eo. Ijoke, eļan̄n̄e membōr eo ejjab pād ilo jekjek eo em̧m̧an ak armej eo me ejjab membōr ej jum̧aeik jerbal eo, bisop eo ak stake būreejtōn eo emaron̄ ron̄jake n̄ūrbōktake eo jen armej eo make ālkin wōt kweilo̧k eo.
Ilo jekjek ko jet, juon būratōr emaron̄ ekkapit juon elder ak pris eutiej m̧okta jen an waļo̧k etan ilo kweilo̧k eo eļap an stake. N̄e menin ewaļo̧k, etan ej waļo̧k ilo kweilo̧k in kwojkwoj eo ilo ward eo an n̄an rejetak. Innām etan ej waļo̧k ilo kweilo̧k eo eļap an stake tok ālik n̄an kapen ekkapit eo (rejetak eo kar kobaiktok, kōmeļeļe eo ilōn̄). Menin ekoba leļo̧k iien em̧m̧an bwe membōr ro ilo stake ren rejetak ak jum̧ae jerbal eo.
18.10.4
Wōn eo ej Kōm̧m̧ane Kain̄i eo
Stake būreejtōn eo ak juon rikabwijer Melkisedek Priesthood eo ium̧win tōl eo an emaron̄ kapit juon em̧m̧aan n̄an opiij eo an elder. Mālim eo jān mijen būreejtōn eo, district būreejtōn eo ak juon eo jen ium̧win tōl eo an emaron̄ kōm̧m̧ane kain̄i eo (lale 6.3). Rikabwijer ro an Melkisedek Priesthood wōt remaron̄ jutak ilo doulul eo.
Stake būreejtōn eo ak juon pris eo eutiej ium̧win tōl eo an emaron̄ kapit juon em̧m̧aan n̄an opiij eo an pris eo eutiej. Pris ro reutiej wōt remaron̄ jutak ilo doulul eo.
Armej eo ej kapit em̧m̧aan eo n̄an juon opiij an Melkisedek Priesthood eaikuj in erreeo n̄an tampeļ. Stake būreejtōn eo ak juon eo eaar jitōn̄e eaikuj in pād.
Juon pris ak rikabwijer Melkisedek Priesthood emaron̄ kapit armej eo n̄an opiij eo an tikōn, rūkaki, ak pris. Ej aikuj bōk mālim jān bisop eo. Bisop eo ak juon eo eaar jitōn̄e eaikuj in pād.
N̄an bōk koņaan ilo juon ekkapit ilo Priesthood eo an Aron, armej eo eaikuj in juon pris ak rikabwijer Melkisedek Priesthood.
Bisop eo emaron̄ kōtļo̧k an juon baba eo ej juon pris ak juon rikabwijer Melkisedek Priesthood eo n̄an kapit ļaddik eo nejin n̄an opiij eo an tikōn, rūkaki, ak pris men̄e baba eo ejjab erreeo n̄an tampeļ (lale 18.3). Bisop eo ej rōjan̄ baba ro n̄an kepooj er make n̄an kapit ļaddik ro nejier make.
N̄an eo ej ņa ainikien kain̄i in, armej eo ejjab jān ward eo an eaikuj kwaļo̧k juon peba in mālim n̄an deļo̧n̄e tampeļ ekāāl n̄an ritōl eo ej tōl. Ak emaron̄ kwaļo̧k juon Recommend to Perform an Ordinance kar jain jān juon iaan membōr in bisoprik eo an.
18.10.5
Kōmeļeļe ko
N̄an leļo̧k priesthood im ekkapit juon armej n̄an juon priesthood opiij, juon ak elōn̄ļo̧k rikabwijer priesthood ro kar kōmālim rej kōmeraik aer likūt peir ioon ioon bōran armej eo. Innām armej eo ej kōm̧m̧ane kōjeraam̧m̧an eo:
-
Kūr likieo in etan armej eo.
-
Ba kōn mālim eo ej kabwijere make n̄an kōm̧m̧ane kain̄i eo (emaron̄ Aron ak Melkisedek Priesthood eo).
-
Leļo̧k Aronic ak Melkisedek Priesthood, ijeļo̧kin n̄e ekar bōke m̧okta.
-
Kapit armej eo n̄an juon opiij eo ilo Aaronic ak Melkisedek Priesthood im likūt ioon jim̧we ko, kajoor ko, im maron̄ eo an opiij eo. (Ki ko an Priesthood rejjab leļo̧k n̄e eļo̧k priesthood eo ak ekkapit n̄an juon opiij, ijeļo̧kin n̄e ekkapit n̄an juon bisop.)
-
Leļo̧k naan in kōjeraam̧m̧an āinwōt tōl jān Jetōb Kwojarjar
-
Kili ilo etan Jisōs Kraist.
N̄an kapit juon armej n̄an juon priesthood opiij ālkin an kar leļo̧k priesthood eo ekkar ioon e, armej eo ej kōm̧m̧ane ekkapit eo en ļoor bun̄ten 3.
Juon ekkapit ej juon iien em̧m̧an n̄an leļo̧k juon kōjeraam̧m̧an. Laajrakin kapilōk im kōmeļeļe kōn eddo eo an armej eo rej leļo̧k m̧okta im ālkin ekkapit eo. Rejjab aikuj pedped ioon kōjeraam̧m̧an eo. Ejjab ekkar bwe en wōr jar ko, naan in kam̧ool ko, ak kōmļeļe n̄e juon ej ekkapit.
18.10.6
Rekoot in Ekkapit eo im Peba in Kam̧ool eo
M̧okta jān an juon em̧m̧aan intōrpiu n̄an ekkapit n̄an juon opiij ilo Melkisedek Priesthood eo, juon kūļōk ej kōjerbal LCR n̄an kepooj juon Melchizedek Priesthood Ordination Record. Stake būreejtōn ak juon rikakpilōklōk eo kar jitōn̄ e ej kōjekiiki intōrpiu eo im jaini boom̧ eo eļan̄n̄e armej eo ej erreeo.
Ālkin ekkapit eo, stake būreejtōn eo ak juon rikakpilōklōk eo kar jitōn̄ e ej kadedeļo̧k boom̧ eo im leļo̧k n̄an kūļōk eo. Ej rekoote ekkapit eo ilo LCR im kepooj juon peba in ekkapit. Peba in kam̧ool eo ej jain jān stake būreejtōn eo im leļo̧k n̄an armej eo.
M̧okta jān an juon būratōr intōrpiu n̄an ekkapit n̄an juon opiij ilo Priesthood eo an Aron, juon kūļōk ej kōjerbal LCR n̄an kepooj juon Aaronic Priesthood Ordination Record. Bisop ak juon rikakpilōklōk eo kar jitōn̄ e ej kōjekiiki intōrpiu eo im jaini boom̧ eo eļan̄n̄e armej eo ej erreeo.
Ālkin ekkapit eo, bisop eo ak juon rikakpilōklōk eo kar jitōn̄ e ej kadedeļo̧k boom̧ eo im leļo̧k n̄an kūļōk eo. Ej rekoote ekkapit eo ilo LCR im kepooj juon peba in ekkapit.
Lukkuun et eo etan armej eo eaikuj kōjerbale ilo rekoot in ekkapit eo im peba in kam̧ool eo.
18.11
Kōjeno̧lo̧k Membōr ro n̄an Jerbal ilo Kūr ko
Membōr ro rekar kūr im kar rejetak n̄an jerbal ko ilo Kabun̄ in reaikuj in kōjenolo̧k er n̄an jerbal ilo jerbal eo (lale Jon 15:16; Katak im Bujen Ko 42:11; bar lale 3.4.3.1 ilo bok in bōk meļeļe in). Ilo iien kōjeno̧lo̧k eo, armej eo ej leļo̧k (1) mālim n̄an jerbal ilo kūr eo im (2) naan in kōjeraam̧m̧an āinwōt an Jetōb tōl
Stake Būreejtōn ro, bisop ro, im būreejtōn ro an doulul ko rej bōk ki ko an būreejtōnji n̄e rej kōjenolo̧k (lale 3.4.1.1). Ijoke, naan eo ki ko eaikuj in jab jerbal n̄e rej kōjenolo̧k membōr ro n̄an jerbal ilo kūr ko jet, ekoba rikakpilōklōk ro ilo būreejtōnji ko.
Kōn meļeļe eo kōn kūr, kapit, im kōjenolo̧k bisop ro, lale 30.7.
18.11.1
Wōn eo ej Kōm̧m̧ane Kōjenolo̧k eo
Juon kōjenolo̧k ej kōm̧m̧an jān juon eo ej kabwijer Melkisedek Priesthood eo. Ej aikuj in bōk mālim jān ritōl eo ej kabwijer ki ko rekkar an priesthood. Ro me kar kōmālim er n̄an kōm̧m̧ane juon kōjenolo̧k rej waļo̧k ilo 30.8. Juon elder ejjab aikuj jerbal āinwōt ainikien eo ak jutak ilo doulul eo n̄e juon em̧m̧aan ej kōjenolo̧ke n̄an juon kūr me ej aikuji em̧m̧aan eo n̄an an juon pris eutiej.
Ium̧win tōl eo an ritōl eo ej tōl, juon ak lōn̄ļo̧k in rikabwijer Melkizedek Priesthood ro remaron̄ in bōk koņaer ilo juon kōjenolo̧k. Būreejtōn ro rej kōjenolo̧k m̧okta jān rikakpilōklōk ro aer.
Juon ritōl eo ej tōl emaron̄ kōtļo̧k ļeo pālele ak juon baba eo ej kabwijer Melkisedek Priesthood eo n̄an jutak ilo doulul eo n̄an kōjenolo̧k kōrā eo ippān ak ajri eo nejin men̄e ejjab lukkuun erreeo n̄an tampeļ (lale 18.3).
18.11.2
Kōmeļeļe ko
Juon ak lōn̄ļo̧k rikabwijer Melkisedek Priesthood ro em̧ōj kar kōmālim rej kōmeraik aer likūt pā ko peir ioon bōran armej eo. Innām armej eo ej kōm̧m̧ane ņa ainikien kōjeraam̧m̧an eo:
-
Ba likieo in etan ļeo ak lio.
-
Ba bwe ej kōm̧mane kōn mālim eo an Melkisedek Priesthood eo.
-
Kōjenolo̧k armej eo n̄an opiij eo ekkar ilo stake, ward, doulul, ak kūlaaj.
-
Leļo̧k ki ko eļan̄n̄e armej eo ej aikuj bōki.
-
Leļo̧k naan in kōjeraam̧m̧an āinwōt tōl jān Jetōb Kwojarjar
-
Kili ilo etan Jisōs Kraist.
Iien kōjenolo̧k eo ejjab juon kweilo̧k ewōr jar ak naan in kam̧ool rej kōm̧m̧an ie. Ebarāinwōt ejjab juon iien n̄an leļo̧k laajrakin kōmeļeļe ko. Iien kein rej leļo̧k ilo iien kamminene, ejjab m̧ōttan kōjeraam̧m̧an eo.
18.12
Oiļ in Kōjeram̧m̧an
Rikabwijer Melkesidek Priesthood ro reaikuj kōjeraam̧m̧an olive oilļ eo m̧okta jān an jerbal n̄an kōjeraam̧m̧an rinan̄inmej ak rej metak ak jorāān (lale Jemes 5:14). Ejjeļo̧k bar oiļ maron̄ kōjerbale.
Mem̧bōr ro rejjab aikuj in daake oiļ in kōjeraam̧m̧an eo ak kapiti n̄an ioon ijoko rej metak ak jorāān.
18.12.1
Wōn eo ej Kōm̧m̧ane Kain̄i eo
Juon ak lōn̄ļo̧k rikabwijer ro an Melkisedek Priesthood eo remaron̄ kōjeraam̧m̧an oiļ eo. Rejjab aikuj kajjitōk mālim jān juon priesthood ritōl.
18.12.2
Kōmeļeļe ko
N̄an kōjeraam̧m̧an oiļ eo, juon rikabwijer Melkisedek Priesthood:
-
Kotake nien olive oil eo epellok.
-
Ba Jemedwōj Ilan̄ āinwōt ilo jar.
-
Ba bwe ej kōm̧mane kōn mālim eo an Melkisedek Priesthood eo.
-
Kōjeram̧m̧an oil eo (jab nien oil eo) im kōjeno̧lok e n̄an kapit im kōjeraam̧m̧an rinan̄inmej im liaajļo̧ļ.
-
Kili ilo etan Jisōs Kraist.
18.13
Kōjeraam̧m̧an ro rej Nan̄inmej
Ekkā, kōjeraam̧m̧an rinan̄inmej eo eaikuj in kōm̧m̧an ilo an armej eo kajjitōk n̄an bōk kōjeraam̧m̧an eo ak an ro jet kajjitōk ro rej kōņaan bwe kōjeraam̧m̧an eo en kōm̧m̧an ekkar n̄an tōmak eo aer (lale Jemes 5:14; Katak im Bujen ko 24:13–14; 42:43–44, 48–52).
Kōjeraam̧m̧an rinan̄inmej ro “jān likūt pā ko ioon” ewōr ruo m̧ōttan ko: kapit kōn oiļ im liāpe ekkapit eo kōn juon kōjeraam̧m̧an. Eļan̄n̄e ejjeļo̧k oil, juon kōjeraam̧m̧an maron̄ in leļo̧k jān mālim eo an Melkisedek Priesthood ijjelo̧kin ekkapit.
Eļan̄n̄e juon armej ej kajjitōk elōn̄ļo̧k jān juon kōjeraam̧m̧an n̄an ejja nan̄inmej eo wōt, bar juon alen ekkapit ejjab aikuj. Juon rikabwijer priesthood eo emaron̄ bar leļo̧k kōjeraam̧m̧an kōn likūt pā ko ioon im jān mālim eo an Melkisedek Priesthood eo. Ijoke, bar ekkapit eo emaron̄ in kōm̧m̧an.
Rikabwijer priesthood ro rej loļo̧k aujpitōļ eo rejjab aikuj in kappukot iien em̧m̧an n̄an kōjeraam̧m̧an rinan̄inmej eo.
18.13.1
Wōn eo ej Leļo̧k Kōjeraam̧m̧an eo
Rikabwijer Melkisedek Priesthood ro wōt remaron̄ kōjeraam̧m̧an rinan̄inmej ak liaajļo̧ļ. Rejjab aikuj kappukotmālim jān juon priesthood ritōl. N̄e ekkar, juon baba eo ej kabwijer Melkisedek Priesthood eo emaron̄ kōjeraam̧m̧an ro uwaan baam̧le eo n̄e renan̄inmej.
Ekkā, ruo ak elōn̄ļo̧k rikabwijer Melkisedek Priesthood ro rej kōjeraam̧m̧an rinan̄inmej eo. Ijoke, juon emaron̄ kōm̧m̧ane ekkapit eo im liāp eo.
18.13.2
Kōmeļeļe ko
Kōjeram̧m̧an ro rinan̄inmej ewōr ruo mōttan ko: kapiti kōn oil eo im kapen ekkapit eo.
Kapit oil eo ej kōm̧m̧an jān juon rikabwijer Melkisedek Priesthood eo. Ļeo ej:
-
Likūt jidik oil eo em̧ōj kōjeraam̧m̧ane ioon bōran armej eo.
-
Likūt pein emera ioon bōran armej eo im kūr likieo in etan armej eo.
-
Ba bwe ej kōm̧mane kōn mālim eo an Melkisedek Priesthood eo.
-
Ba bwe e ej kapit kōn oil eo em̧ōj kōjeraam̧m̧ane n̄an kapit im kōjeraam̧m̧an rinan̄inmej im liaajļo̧ļ.
-
Kili ilo etan Jisōs Kraist.
N̄an kōm̧m̧ane juon ekkapit ilo priesthood, juon ak lōn̄ ļo̧k rikabwijer priesthood ro em̧ōj kar kōmālim rej kōmeraik aer likūt pā ko peir ioon bōran armej eo. Juon eo me ej kapen ekkapit eo:
-
Ba likieo in etan ļeo ak lio.
-
Ba bwe ej kōm̧mane kōn mālim eo an Melkisedek Priesthood eo
-
Leļo̧k naan in kōjeraam̧m̧an āinwōt tōl jān Jetōb Kwojarjar
-
Kili ilo etan Jisōs Kraist.
18.14
Kōjeraam̧m̧an ko an Kaenōm̧m̧an im Ko̧o̧njeļ, Ekoba Kōjeraam̧m̧an ko an juon Baba
18.14.1
Wōn eo ej Leļo̧k Kōjeraam̧m̧an eo
Rikabwijer Melkisedek Priesthood ro remaron̄ barāinwōt leļo̧k kōjeraam̧m̧an ko an kaenōm̧m̧an im kapilōk n̄an ro jet uwaan baam̧le eo im ro jet me rej kajjitōk kaki. Kōjeraam̧m̧an kein ekkā an leļo̧k jān ro uwaan baam̧le ko, jerbal in karejar jeiū im jatū em̧m̧aan, ak priesthood ritōl ro.
Juon jemān me ej kabwijer Melkisedek Priesthood eo emaron̄ leļo̧k kōjeraam̧m̧an ko an juon jemān n̄an ro nejin. Kōjeraam̧m̧an kein maron̄ jipan̄ eļaptata n̄e ajri ro rej etal n̄an jikuuļ, etal n̄an mijen ko, deļo̧n̄e jerbal in tariņae, ak jelm̧ae apan̄ ko. Ro jemān im jinen rej aikuj rōjan̄ ajri ro nejier n̄an pukot kōjeraam̧m̧an ko an jemeer ilo iien ko aikuji. Kōjeraam̧m̧an ko an jemān maron̄ rekooti n̄an jerbal ko an juon make.
Juon rikabwijer Melkisedek Priesthood eo ejjab aikuj in kappukot mālim jān juon priesthood ritōl n̄an leļo̧k juon kōjeraam̧m̧an in kaenōm̧m̧an im kapilōk ak juon kōjeraam̧m̧an an jemān.
18.14.2
Kōmeļeļe ko
N̄an leļo̧k kōjeraam̧m̧an ko an jemān ak kōjeraam̧m̧an ko jet n̄an kaenōm̧m̧an im kapilōk, juon ak lōn̄ ļo̧k in rikabwijer Melkisedek Priesthood ro rej kōmeraik aer likūt pā ko peir ioon bōran armej eo. Innām armej eo ej kōm̧m̧ane kōjeraam̧m̧an eo:
-
Ba likieo in etan ļeo ak lio.
-
Ba bwe kōjeraam̧m̧an eo ej kōm̧m̧an kōn mālim eo an Melkisedek Priesthood.
-
Leļo̧k naan in kōjeraam̧m̧an āinwōt an Jetōb tōl.
-
Kili ilo etan Jisōs Kraist.
18.15
Aje Im̧ōko
Membōr ro an Kabun̄ in maron̄ kōjeraam̧m̧an im̧ōko im̧weer jān mālim eo an Melkisedek Priesthood eo. Im̧ōko rejjab aikuj in wōr kobban ak ejjeļo̧k an m̧ūri n̄an aer kōjeraam̧m̧ane. . Ejjab āinwōt im̧ōn Kabun̄ ko, im̧ōko rejjab kōjeraam̧m̧an n̄an Irooj.
18.15.1
Wōn eo ej Kōm̧m̧ane Aje eo
Im̧ōko ej aje jān juon rikabwijer Melkisedek Priesthood eo. Eļan̄n̄e ejjeļo̧k juon rikabwijer Melkisedek Priesthood ilo m̧weeo:
-
Baam̧le eo emaron̄ kūr tok juon epaake m̧ōttāer, nukun, ak jerbal in karejar jeiū ak jatū em̧m̧an eo ej kabwijer Melkisedek Priesthood eo n̄an aje m̧weeo. Rejjab aikuj kappukot mālim jān juon priesthood ritōl.
-
Baam̧le eo emaron̄ aiindoon im kōm̧m̧ane juon jar āinwōt an Jetōb tōl. Jar eo emaron̄ kobaik men ko rewaļo̧k ilo 18.15.2, nōm̧ba 3.
18.15.2
Kōmeļeļe ko
N̄an kōjeraam̧an juon em̧, rikabwijer Melkisedek Priesthood eo:
-
Ba Jemedwōj Ilan̄ āinwōt ilo jar.
-
Ba bwe ej kōm̧m̧ane kōn mālim eo an Melkisedek Priesthood eo.
-
Aje m̧weeo āinwōt juon jikin ekwojarjar ijo Jetōb Kwojarjar emaron̄ pād ie im leļo̧k naan ko jet āinwōt an Jetōb tōl. N̄an waanjon̄o̧k, emaron̄ kōjeraam̧m̧an m̧weeo n̄an juon jikin ijo ro uwaan baam̧le eo remaron̄ kabun̄jar, lo jokne jān laļin, eddōk ilo jetōb, im keppopo n̄an jemjerā eo an baam̧le indeeo.
-
Kili ilo etan Jisōs Kraist.
18.16
Aje Lōb ko
18.16.1
Wōn eo ej Aje Lōb eo
Juon armej eo ej aje juon lōb eaikuj kabwijer Melkisedek Priesthood im kar bōkmālim jān ritōl eo an priesthood eo ej pād ilo iien kōm̧m̧ane kallib eo.
Eļan̄n̄e baam̧le eo ekōņaan, jar itūrin ļōb eo maron̄ in kōm̧m̧an ijeļo̧kin juon jar in aje. Emaron̄ aje jān jabdewōt jān kālet eo an baam̧le eo.
N̄an jar in aje juon lōb, armej eo ejjab jān ward eo an make eaikuj kwaļo̧k peba in mālim kāāl eo an n̄an deļo̧n̄e tampeļ n̄an priesthood ritōl eo im ej tōl ilo kweilo̧k eo. Ak emaron̄ kwaļo̧k juon Recommend to Perform an Ordinance kar jain jān juon iaan membōr in bisoprik eo an.
18.16.2
Kōmeļeļe ko
N̄an kōjeraam̧m̧an juon ļōb, rikabwijer Melkisedek Priesthood eo:
-
Ba Jemedwōj Ilan̄ āinwōt ilo jar.
-
Ba bwe ej kōm̧m̧ane kōn mālim eo an Melkisedek Priesthood eo.
-
Aje im kōjeraam̧m̧an jikin kallip eo āinwōt juon jikin kakkije n̄an ānbwin eo emej.
-
Jar bwe jikin eo enaaj ekwojarjar im naaj oņake m̧ae iien Jerkakpeje (ijo ekkar).
-
Kajjitōk ippān Irooj n̄an kaenōm̧m̧an baam̧le eo im kōnono ļōmņak ko āinwōt an Jetōb tōl.
-
Kili ilo etan Jisōs Kraist.
Eļan̄n̄e juon membōr in Kabun̄ eo kar tile ānbwinin, ritōl eo ej tōl maron̄ in kōjerbal ekajet eo an ilo ļōmņake n̄an aje jikin eo ijo menkwaarar ko kar kako̧ni. Ej bōk ilo kōmeļeļe in kōņaan eo an baam̧le eo, m̧anit ko, im kien ko. Em̧m̧aan eo ej kōm̧m̧ane kōjeraam̧m̧an eo ej kwaļo̧k kakobaba ko n̄an aje juon lōb.
18.17
Kōjeraam̧m̧an ko an Petriak
Kajjojo ro rōreeo, membōr ro rekar peptaij rej maron̄ bōk juon kōjeraam̧m̧an an petriak, eo ej letok tōl jān Jemedwōj Ilan̄ (lale Jenesis 48:14–16; 49; 2 Nipai 4:3–11). Ro jinen im jemān im ritōl ro an Kabun̄ rej rōjan̄ membōr ro n̄an pojak ilo jetōb n̄an bōk kōjeraam̧m̧an ko an petriak.
Bisop eo ak juon rikakpilōklōk eo emōj ej jitōn̄e etale membōr ro me rekōnaan bōk kōjeraam̧m̧an ko an petriak. N̄e juon membōr eo ej erreeo, armej eo ej kōm̧m̧ane intōrpiu eo ej kepooj juon Patriarchal Blessings Recommend. Ej jilkinļo̧k n̄an Patriarchal Blessings System ilo ChurchofJesusChrist.org.
Armej eo im ej jeikļo̧k juōn Peba in Kōjeraam̧man an Petriak ej aikuj in lale bwe membōr eo en lukkuun meļeļe aorōk eo im kwojarjar eo an kōjeraam̧man in. Membōr eo eaikuj in em̧m̧an ded bwe elōn̄ jokālet raorōk ilo mour repād im̧aan. Ijoke, ro rōrūtto kar bar rōjan̄ er n̄an bōk aer kōjeraam̧m̧an ko an petriak. Ritōl ro an preisthood rejjab aikuj in kōm̧m̧ane juon jon̄an iiō n̄an membōr eo n̄an bōk juon kōjeram̧m̧an an petriak.
Juon eo ekāāļ ej aikuj meļeļe pedped in katak ko an gospel m̧okta jān bōk juon kōjeram̧m̧an an petriak.
N̄an eļapļo̧k meļeļe kōn kōjeraam̧m̧an ko an petriak ilo jekjek ko rejenoļo̧k, lale 38.2.10.
18.17.1
Bōk juon Kōjeram̧m̧an an Petriak
Ālkin bōk juon peba, membōr eo ej kūrļo̧k petriak eo n̄an karōk juon iien n̄an bōk juon kōjeraam̧m̧an an petriak. Ilo raan eo kar karōke, membōr eo eaikuj in etal ippān petriak eo kōn juon m̧wiļ juon m̧wil in jar im kōņaki nuknuk in jar ko ilo Jabōt. Membōr ro remaron̄ jitlo̧k, ak jitlo̧k ejjab mennin aikuj.
Kajjojo kōjeraam̧m̧an an petriak rej kwojarjar, ņojak, im ad make. Kōn mein, kar leļo̧k ilo ittiņo ijello̧kin wōt n̄e ebwe oran uwaan baam̧le eo remaron̄ in pād.
Armej eo ej bōk juon kōjeraam̧m̧an an petriak eaikuj in kaorōk naan ko, kōļmenļo̧kjeņ kaki, im mour erreeo n̄an bōk kōjeraam̧m̧an ko kar kallim̧ur kaki ilo mour in im indeeo.
Mem̧bōr ro an Kabun̄ reaikuj jab keidi kōjeraam̧m̧an ko im jamin kwaļo̧ki ijelokin wōt ro uwaan baam̧le ko repaake. Kōjeram̧m̧an ko an petriak rejjab aikuj in riit ilo kweiļo̧k ko an Kabun̄ ak ippād doon ko jet.
Eļan̄n̄e juon kōjeraam̧m̧an an petriak ejjab kobaiki juon bwij, petriak eo emaron̄ tok ālik leļo̧k n̄an kalikar juon kobain bwij.
18.17.2
Bōk Kape ko in Kōjeraam̧m̧an ko an Petriak
Armej eo me ekar bōk juon kōjeraam̧m̧an an petriak eaikuj lukkuun kōjparoke kape eo kar būriini. Ijoke, n̄e kape in ejako ak ejorrāān, armej eo emaron̄ kajjitōke juon kāāl. Ļeo ak lieo remaron̄ kōm̧m̧ane kajjitōk in ilo Patriarchal Blessings ilo ChurchofJesusChrist.org. N̄e ejjab ekkar, armej eo ej kūrļo̧k bisop eo an n̄an jipan̄.
18.17.3
Meļeļe ko rellōn̄
N̄an meļeļe ko reļļapļo̧k kōn kōjeraam̧m̧an ko an petriak, lale 38.2.10 im “Patriarchal Blessings.”
18.18
Menin Letok Kwojarjar an Tampeļ im Liāp
N̄an meļeļe ko ikkijeen mennin letok kwojarjar an tampeļ im kain̄i ko an liāp, lale jepta 27.
18.19
Jaat in Kain̄i ko
|
Opiij |
Kar elmakote jān |
Kar kōmālim jān |
Kar rejetake jān |
Kar Intōrpiu im kar ekkapit jān |
|---|---|---|---|---|
Opiij Petriak | Kar elmakote jān Stake būreejtōnji | Kar kōmālim jān Doulul eo an Jon̄oulruo Rijilōk ro | Kar rejetake jān Membōr ro ilo kweilo̧k eo eļap an stake | Kar Intōrpiu im kar ekkapit jān Stake būreejtōn eo ālkin bōk mālim jān Doulul eo an Jon̄oulruo Rijilōk ro; ak juon membōr in Būreejtōnji eo Kein Kajuon ak Doulul eo an Jon̄oulruo Rijilōk ro |
Opiij Pris eo Eutiej | Kar elmakote jān Bisop im stake būreejtōnji | Kar kōmālim jān Stake būreejtōnji im high ko̧o̧njeļ eo | Kar rejetake jān Membōr ro ilo kweilo̧k eo eļap an stake | Kar Intōrpiu im kar ekkapit jān Kar intōrpiuiki jān bisop eo im jān ippān stake būreejtōn ak juon rikapilōklōk eo emōj jitōn̄e; kapiti ium̧win wōt tōl eo an stake būreejtōn |
Opiij Elder | Kar elmakote jān Bisop | Kar kōmālim jān Stake būreejtōnji im high ko̧o̧njeļ eo | Kar rejetake jān Membōr ro ilo kweilo̧k eo eļap an stake ak kweilo̧k eo eļap an district | Kar Intōrpiu im kar ekkapit jān Kar intōrpiu jān bisop eo im jen stake būreejtōn eo ak juon rikakpilōklōk eo kar jitōn̄e (ilo juon district, kar intōrpiu jen juon membōr in mijen būreejtōnji eo ak jen district būreejtōn eo n̄e kar jitōn̄e; lale 6.3) Kar ekkapit jen ium̧win tōl eo an stake būreejtōn eo (ilo juon district, kar ekkapit jen ium̧win tōl eo an mijen būreejtōn eo ak district būreejtōn eo n̄e kar jitōn̄e). |
Opiij Bisop eo | Kar elmakote jān Stake būreejtōnji eo, ej kōjerbal LCR | Kar kōmālim jān Būreejtōnji eo Kein Kajuon im Doulul eo an Jon̄oulruo Rijilōk ro | Kar rejetake jān Membōr ro ilo kweilo̧k in kwojkwoj | Kar Intōrpiu im kar ekkapit jān Stake būreejtōn eo ālkin bōk mālim jān Būreejtōnji eo Kein Kajuon (lale 30.7) |
Opiij Pris | Kar elmakote jān Bisop eo | Kar kōmālim jān Bisoprik | Kar rejetake jān Membōr ro ilo kweilo̧k in kwojkwoj | Kar Intōrpiu im kar ekkapit jān Kar intōrpiu jān bisop eo; kar ekapit ium̧win tōl eo an bisop eo |
Opiij Rūkaki ak tikōn | Kar elmakote jān Bisop eo | Kar kōmālim jān Bisoprik | Kar rejetake jān Membōr ro ilo kweilo̧k in kwojkwoj | Kar Intōrpiu im kar ekkapit jān Kar intōrpiu jān bisop eo ak juon rikapilōklōk eo emōj jitōn̄e; kar kapiti ium̧win tōl eo an bisop eo |