2.

Stap Sapotem Wanwan Man, Woman mo Famli insaed long Wok blong God blong Fasin blong Sevem Man mo Fasin blong Kam Olsem Wan God

2.0

Fas Toktok

Olsem wan lida insaed long Jos Ia blong Jisas Kraes, yu stap sapotem wanwan man, woman mo famli blong oli mekem wok ia blong God blong fasin blong sevem man, mo fasin blong kam olsem wan god (luk long 1.2). Bigfala stamba tingting blong wok ia hem i blong helpem evriwan long ol pikinini blong God blong oli kasem ol blesing blong laef we i no save finis mo wan glad we i fulwan.

Plante wok blong God blong fasin blong sevem man mo fasin blong kam olsem wan god, i stap hapen tru long famli. Long evri memba blong Jos, senta blong wok ia i stap insaed long hom. Japta ia bae i helpem yu blong kasem wan visen abaot:

• Rol blong famli insaed long plan blong God.

• Wok blong God blong fasin blong sevem man mo fasin blong kam olsem wan god insaed long hom.

• Rilesensip bitwin hom mo Jos.

2.1

Rol blong Famli Insaed long Plan blong God

God i odenem famli, mo famli i stap long medel blong plan blong Hem. Wanwan long yumi, “i wan spirit pikinini boe o spirit pikinini gel blong papa wetem mama long heven we oli laekem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem god.” (“Famli: Wan Ofisol Toktok I Go long Wol,” ChurchofJesusChrist.org). Yumi pat blong famli blong olgeta. Yumi bin laef wetem Tufala bifo yumi bon i kam long wol ia.

Olsem pat blong plan blong Hem, Papa long Heven i bin stanemap ol famli long wol ia. Hem i wantem se ol famli oli tekem hapines i kam long yumi. Ol famli oli givim ol janis blong oli lan, blong oli groap, blong oli givim seves, blong oli sakem sin, mo stap fogiv. Oli save helpem yumi blong rere from laef we i no save finis.

Long laef ia, plante pipol oli gat samfala janis ia nomo blong gat ol famli rilesensip we i gat lav. I no gat wan famli we i fri long ol jalenj, sobodi mo harem nogud. Wanwan man, woman mo famli i praktisim fet long Lod mo i traehad blong laef folem ol trutok we Hem i bin talemaot long saed blong famli. Sevya i bin promesem se bambae Hem i help blong tekem ol hevi samting blong evriwan we oli go long Hem (luk long Matiu 11:28–30).

Plan blong hapines we i kam long Papa long Heven i meksua se evriwan long ol pikinini blong Hem bae oli gat janis ia blong akseptem gospel blong Hem mo kasem ol blesing blong Hem we oli moa hae (luk long Doktrin mo Ol Kavenan 137:7–10). Evriwan we i mekem mo kipim ol kavenan wetem God i save filim glad mo “pis long wol ia, mo laef we i no save finis long wol we bae i kam” (Doktrin mo Ol Kavenan 59:23; luk tu long Mosaea 2:41).

Insaed long promes blong God long saed blong laef we i no save finis, i gat mared we i no save finis, ol pikinini, mo evri nara blesing blong wan famli we i no save finis. Promes ia, hem i blong olgeta tu we oli no mared i stap naoia, o oli no gat wan famli insaed long Jos (luk long 38.1.4). Ol blesing ia i sua long evriwan we i traehad blong laef olsem ol disaepol blong Jisas Kraes.

2.1.1

Ol Famli we Oli No Save Finis

Ol famli we oli no save finis, oli mekem olgeta taem ol memba blong Jos oli mekem ol kavenan long taem we oli kasem ol siling odinens insaed long tempol. Ol blesing blong wan famli we i no save finis oli stap hapen taem we ol memba oli kipim olgeta kavenan ia mo oli sakem sin taem we oli stap foldaon. Ol lida blong Jos oli helpem ol memba blong rere blong kasem olgeta odinens ia mo stap ona long ol kavenan ia blong olgeta.

Wanwan man o woman i mas mekem samfala rol insaed long famli we i no save finis. Evri rol blong famli oli tabu mo impoten. Olgeta rol ia, insaed i gat hemia blong mama mo papa, gel mo boe, sista mo brata, anti mo anggel, mo bubuwoman mo bubuman. Blong mekem ol rol ia wetem lav i helpem ol pikinini blong God blong progres i go from laef we i no save finis.

Wan moa saed blong stap stanemap ol famli we oli no save finis, hem i blong mekem ol odinens insaed long tempol we i letem ol memba blong oli sil wetem ol bubu blong olgeta we oli ded finis.

Stamba tingting blong plan blong God, i blong lidim ol pikinini blong Hem blong kasem wan famli we i no save finis.

2.1.2

Hasban mo Waef

Mared bitwin wan man mo wan woman, God nao i odenem (luk long Doktrin mo Ol Kavenan 49:15). Wan hasban mo wan waef i gat tingting blong progres tugeta blong go from wan laef we i no save finis (luk long 1 Korin 11:11).

Wan long ol samting blong mas mekem blong kasem laef we i no save finis, hem i blong wan man mo wan woman blong mekem kavenan ia blong selestial mared (luk long Doktrin mo Ol Kavenan 131:1–4). Wan kapol i mekem kavenan ia taem we tufala i kasem mared siling odinens insaed long tempol. Kavenan ia, i fandesen blong wan famli we i no save finis. Taem tufala i fetful blong kipim, i letem mared ia i stap strong blong oltaem. Long en, tufala i kam olsem God (luk long Doktrin mo Ol Kavenan 132:19–20).

God i bin givim komanmen long hasban mo waef blong tufala i stap strong long wanwan long tufala (luk long Jenesis 2:24; Doktrin mo Ol Kavenan 42:22). Long komanmen ia, toktok ia, stap strong, i minim blong yu givim yu fulwan, mo yu stap fetful long wan. Ol mared kapol oli stap strong tugeta taem tufala i lavlavem mo tufala i givim seves long wanwan long tufala.

Blong stap strong i minim tu blong fasin blong stap tru fulwan i stap bitwin hasban mo waef. Fasin blong gat seks bitwin hasban mo waef, hem i stap wetem tingting se bae hem i wan naesfala samting, mo i tabu. God i odenem blong oli krietem ol pikinini, mo blong hasban mo waef, tufala i sosoemaot lav long wanwan long tufala. Fasin blong stap kaen fulwan mo respek—i no selfis fasin—i mas lidim praevet rilesensip blong tufala.

God i bin givim komanmen se praevet fasin blong gat seks, hem i blong yusum nomo bitwin wan man mo wan woman insaed long mared. Blong stap klin long saed blong seks bifo mared mo blong stap fetful insaed long mared, i helpem wanwan long tufala blong stap hapi tru, mo i mekem se i no gat tumas soa long saed blong spirit, long saed blong filing, mo long saed blong bodi. Oli stap leftemap tingting blong ol papa mo mama, mo ol lida blong Jos blong mas mekem evri samting we oli save mekem, blong mekem tijing ia i kam strong moa. (Luk long 38.6.5.)

Wan kapol i lukaotem blong tufala i wan taem tufala i stanemap famli blong tufala (luk long Jenesis 2:24). Blong tufala i wan insaed long mared, i nidim wan ful patnasip, o blong tufala i serem ol responsabiliti. Wan hasban mo wan waef, tufala i ikwol long ae blong God. I no gat wan i rul ova long narawan. Desisen blong tufala, tufala i mas mekem wetem yuniti mo lav, mo tufala tugeta i mas tekpat long ol desisen ia.

Adam mo Iv, tufala i givim eksampol blong ol hasban mo ol waef. Tufala i wok, i prea, mo wosip tugeta (luk long Moses 5:1, 4). Tufala i bin tijim gospel long ol pikinini blong tufala, mo tufala i bin krae sore tugeta from ol tes blong tufala (luk long Moses 5:12, 27). Tufala i bin yunaet wetem wanwan long tufala mo wetem God.

2.1.3

Ol Papa mo Mama, mo Ol Pikinini

Fas komanmen blong Adam mo Iv, olsem hasban mo waef, i blong gat ol pikinini (luk long Jenesis 1:28). Ol lata-dei profet oli bin tijim se “komanmen blong God long ol pikinini blong Hem blong kam plante mo fulumap wol ia, i stap yet naoia.” (“Famli: Wan Ofisol Toktok I Go long Wol”; luk tu long Doktrin mo Ol Kavenan 49:16–17).

Hem i wan tabu spesel janis mo responsabiliti blong wan hasban mo waef, blong tufala i kea long ol pikinini we tufala i save tekem i kam long wol ia, o tufala i save adoptem. Olgeta papa mo mama we oli adoptem ol pikinini, oli gat ol semfala blesing mo responsabiliti olsem stret papa mo mama we i bonem pikinini i kam long wol ia.

Tugeta, wan hasban mo waef we tufala i gat lav, oli givim wan bes ples blong resemap mo lukaotem ol pikinini. Sam situesen bae i stopem ol papa mo mama blong resemap ol pikinini blong tufala tugeta. Be, Lod bae i blesem olgeta taem oli stap lukaotem help blong Hem mo taem oli stap traehad blong kipim ol kavenan blong olgeta wetem Hem.

Ol papa mo mama oli gat strong mo impoten responsabiliti ia blong helpem ol pikinini blong olgeta blong rere blong kasem ol blesing blong wan laef we i no save finis. Oli tijim ol pikinini blong tufala blong lavem mo wok blong God mo ol narawan (luk long Matiu 22:36–40). Tufala i tijim olgeta blong prea long Papa long Heven mo blong stadi long toktok blong God (luk long Alma 37:36–37, 44–46). Tufala i helpem tu ol pikinini blong tufala blong andastanem doktrin blong fet long Jisas Kraes, fasin blong sakem sin, baptaes, mo presen ia we i Tabu Spirit (luk long Doktrin mo Ol Kavenan 68:25). Tufala i help tu blong mekem olgeta oli rere blong mekem ol kavenan taem we tufala i kasem ol odinens blong fasin blong sevem man mo fasin blong kam olsem wan god.

“Ol papa oli mas lidim ol famli blong olgeta wetem lav mo fasin blong stap stret mo gud oltaem. Oli gat wok ia tu, blong luk se ol famli blong olgeta i gat proteksen mo evri samting we oli nidim long laef” (“Famli: Wan Ofisol Toktok I Go long Wol”). Taem we i no gat wan hasban o papa insaed long hom, mama nao i prisaed ova long famli.

Blong prisaed insaed long famli, hem i responsabiliti blong help lidim ol memba blong famli blong gobak stap long ples we God i stap long hem. Oli mekem hemia taem oli givim seves, oli wok mo tij wetem fasin we i kaen, fasin i no flas, mo wetem wan lav we i klin evriwan, we i stap folem Jisas Kraes (luk long Matiu 20:26–28). Blong stap prisaed insaed long famli, i minim tu blong stap lidim ol memba blong famli blong stap prea oltaem, gat gospel stadi, mo ol nara eria blong wosip. Ol papa mo mama oli wok long yuniti blong mekem ol responsabiliti ia oli hapen.

“Ol fas wok blong wan mama hem i blong fidim ol pikinini blong tufala long saed blong spirit mo long saed blong bodi.” (“Famli: Wan Ofisol Toktok I Go long Wol”). Blong fidim, hem i minim blong givim kaekae, blong tijim, mo sapotem, blong stap folem eksampol blong Sevya (luk long 3 Nifae 10:4). Mama i yunaet wetem hasban blong hem, nao i helpem famli blong hem blong lanem ol trutok blong gospel, mo developem fet long Papa long Heven mo Jisas Kraes. Tugeta, tufala i givim mo tekem lid blong gat wan envaeromen o ples we i gat lav insaed long famli.

“Long ol tabu wok ia, papa mo mama, tufala i mas helpem wanwan long tufala, olsem we tufala i semmak” (“Famli: Wan Ofisol Toktok I Go long Wol”). Tufala i prea mo toktok tugeta, mo wetem Lod.

2.2

Wok blong God blong Fasin blong Sevem Man mo Fasin blong Kam Olsem Wan God Insaed long Hom

Fas Presidensi i talem: “Hom i stamba blong wan stret mo gud laef” (leta blong Fas Presidensi, 11 Febwari 1999). Insaed long hom blong olgeta, wanwan man, woman mo famli, oli putum olgeta insaed blong help blong mekem wok blong God blong fasin blong sevem man mo fasin blong kam olsem wan god i hapen.

Blong sapotem ol memba blong mekem wok blong God blong fasin blong sevem man mo fasin ia blong kam olsem wan god insaed long hom, ol lida blong Jos oli stap leftemap ol tingting blong olgeta famli blong stanemap wan hom we Spirit i stap insaed long hem. Mo tu, oli stap leftemap tingting blong ol memba blong ona long Sabat dei, blong stadi mo lanem gospel insaed long hom, mo blong holem ol haos naet evri wik. Ol lida oli givim spesel tingting mo lukluk blong stap sapotem olgeta wanwan we memba blong famli blong olgeta i no stap helpem olgeta tumas.

2.2.1

Wan Hom we Spirit I Stap Insaed long Hem

Oli leftemap tingting blong ol memba blong Jos blong mekem hom blong olgeta i wan ples blong kasem paoa long saed blong spirit mo gat glad. Oli save invaetem Spirit blong Lod insaed long hom blong olgeta tru long ol simpol hadwok nomo.

2.2.2

Kipim Sabat dei

God i bin givim komanmen long ol pikinini blong Hem blong “tingbaot sabat dei, blong holem i tabu” (Eksodas 20:8). Ol memba blong Jos oli kam tugeta long Sabat blong tekem mo kaekae sakramen blong save tingbaot Jisas Kraes mo Atonmen blong Hem (luk long Doktrin mo Ol Kavenan 59:12). Sabat i wan dei blong stap lanem mo tijim gospel long jos mo long hom. Ol memba oli save kam strong moa long Sabat taem oli joenem ol aktiviti olsem:

• Wosip blong olgetawan tru long prea mo fasin blong livim kakae.

• Stap stadi mo stap lanem gospel.

• Givhan mo seves long ol narawan.

• Famli histri.

• Famli taem we i gat glad long hem.

• Gat ol narafala taem blong kam tugeta we oli stret.

2.2.3

Stap Stadi mo Stap Lanem Gospel long Hom

Blong stap tijim mo stap lanem gospel, hem i hapen long hom we i senta mo Jos i sapotem. Ol lida blong Jos oli leftemap tingting blong evri memba blong stadi long gospel long hom long Sabat dei mo truaot long wik. Stadi blong gospel long hom i mekem wanwan man, woman mo famli i kam strong moa. Hem i mekem se wan i jenisim laef blong hem i bigwan moa, i go long Papa long Heven mo long Lod Jisas Kraes.

Fasin blong stadi long ol skripja, olsem we oli putum long aotlaen insaed long, Kam Folem Mi i stret kos we oli givim blong stadi long gospel long hom.

Be, wanwan man, woman mo famli i mas lukaotem insperesen taem oli jusum blong stadi wanem we bae i lukluk moa long nid blong olgeta. Antap long ol skripja we oli putum i stap long Kam Folem Mi, maet bae i gud blong oli tingting hevi mo prea blong stap stadi long:

• Buk blong Momon mo ol nara skripja.

• Ol mesej blong Jeneral Konfrens.

• Ol magasin blong Jos mo ol nara buk we oli gat samting we i leftemap man.

2.2.4

Haos Naet mo Ol Nara Aktiviti

Ol profet blong lata-dei oli bin givim kaonsel o advaes long ol memba blong Jos blong oli holem wan haos naet long evri wik. Hemia i wan tabu taem blong wanwan man, woman mo famli blong lanem gospel, blong mekem ol testemoni oli kam strong moa, blong oli bildim yuniti, mo stap glad long wanwan long olgeta.

Haos naet i save hapen i folem ol situesen blong wanwan memba. Bae oli save holem long Sabat o ol nara dei mo taem. Insaed i save gat:

• Gospel stadi mo instraksen (oli save yusum ol samting insaed long Kam Folem Mi sapos oli wantem).

• Givim seves long ol narawan.

• Singsing, o plei ol hym mo singsing blong Praemeri (luk long japta 19).

• Stap sapotem ol memba blong famli long Ol Pikinini mo Ol Yut Divelopmen.

• Wan famli kaonsel i setem ol gol, i stretem ol problem, mo i kodinetem ol taemtebol.

• Ol aktiviti blong Pleiplei.

Ol memba we oli singgel mo ol narawan oli save kam tugeta long ol grup aotsaed long nomol Sabat wosip seves blong tekpat long haos naet mo mekem wanwan long olgeta i kam strong moa tru long gospel stadi. Kam Folem Mi bae i wan risos blong olgeta we oli wantem blong stadi tugeta.

Blong putum wan taem blong ol famli oli stap tugeta, ol lida oli mas mekem se ol Mandei naet oli fri, i no gat miting o aktiviti blong Jos.

Ol lida oli leftemap tingting blong ol memba blong oli mas strong blong holem haos naet oltaem mo spendem taem tugeta olsem ol famli (luk long Doktrin mo Ol Kavenan 64:33). Ol taem ia, sam long olgeta i gat blong ol taem blong serem kaekae o kaekae tugeta, blong wok mo givim seves tugeta, mo ol taem blong pleiplei, o gud fri taem.

2.2.5

Stap Sapotem Wanwan Man mo Woman

Ol lida blong Jos oli helpem ol memba we oli nidim sam moa sapot we i kam long famli. Ol lida oli save helpem ol memba ia mo famli blong olgeta blong gat ol janis blong gat felosip, gat ol gudfala sosol eksperiens, mo blong oli groap long saed blong spirit. Ol lida oli leftemap tingting mo oli helpem olgeta long ol hadwok blong olgeta blong lanem mo stap laef folem gospel blong Jisas Kraes. Ol lida oli givim ol janis tu long olgeta blong oli givim seves insaed long Jos.

2.3

Rilesensip bitwin Hom mo Jos

Wok blong God blong fasin blong sevem man mo fasin blong kam olsem wan god, i stap long hat blong hom, mo Jos i sapotem. Olgeta prinsipol ia oli blong rilesensip we i stap bitwin hom mo Jos.

• Ol lida mo ol tija oli givim ona long rol blong ol papa mo mama, mo oli helpem olgeta. Ol lida mo ol tija oli stanemap mo oli holemtaet wan komunikesen we i wok gud wetem papa mo mama.

• Samfala miting blong Jos oli wan mas long wanwan wod o branj. Oli ol miting olsem sakramen miting, mo ol klas mo ol miting blong kworom we oli stap holem long Sabat. Plante narafala miting, aktiviti mo program oli no wan mas. Ol lida oli wok tugeta, olsem we i nid, blong help mo lukluk long ol nid blong wanwan man, woman mo famli. Ol lida oli lukluk long ol lokol situesen mo ol risos we oli stap.

• Wanwan man, woman, mo famli oli tingting long ol situesen blong olgeta taem oli stap mekem ol desisen se bae oli tekpat long ol program blong Jos we oli no wan nid.

• Lod i blesem ol memba taem we oli stap givim seves mo mekem sakrifaes insaed long Jos blong Hem. Be, hamas taem bae wan i givim long seves blong Jos i no mas pulumaot paoa blong memba blong mekem ol responsabiliti blong olgeta long hom, long wok mo long ol nara ples. Ol lida mo ol memba oli no mas hevi tumas wetem tumas responsabiliti blong Jos. Mo tu, oli no save askem olgeta blong mekem ol bigfala sakrifaes blong givim sapot long ol program o ol aktiviti blong Jos.

Taem ol memba oli stap folem olgeta prinsipol ia, mo stap folem tu ol kwaet toktok blong Spirit, Papa long Heven bae i blesem ol hadwok blong olgeta.