« 2. Te pāturura’a i te ta’ata hō’ē ’e te mau ’utuāfare i roto i te ’ohipa nō te fa’aorara’a ’e te fa’ateiteira’a » Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020).

« 2. Te pāturura’a i te ta’ata hō’ē ’e te mau ’utuāfare », Buka arata’i rahi.

Te pāturura’a i te ta’ata hō’ē ’e te mau ’utuāfare i roto i te ’ohipa nō te fa’aorara’a ’e te fa’ateiteira’a

2.0

’Ōmuara’a

’Ei feiā fa’atere i roto i te ’Ēkālesia a Iesu Mesia, e pāturu ’outou i te ta’ata hō’ē ’e te mau ’utuāfare i roto i te ravera’a i te ’ohipa nō te fa’aorara’a ’e te fa’ateiteira’a a te Atua (hi’o 1.2). Te fā hope’a o teie ’ohipa o te tauturura’a ïa i te mau tamari’i ato’a a te Atua ’ia fāri’i i te mau ha’amaita’ira’a o te ora mure ’ore ’e te ’īra’a o te ’oa’oa.

E ravehia te rahira’a o te ’ohipa nō te fa’aorara’a ’e te fa’ateiteira’a nā roto i te ’utuāfare. Nō te mau melo ato’a o te ’Ēkālesia, ’ua fa’atumuhia teie ’ohipa nā roto i te ’utuāfare. E tauturu teie pene ia ’outou ’ia roa’a te hō’ē ’itera’a nō :

Te ’ohipa a te ’utuāfare i roto i te fa’anahora’a a te Atua.
Te ’ohipa nō te fa’aorara’a ’e te fa’ateiteira’a i roto i te fare.
Te autā’atira’a i rotopū i te fare ’e i te ’Ēkālesia.

2.1

Te ’ohipa a te ’utuāfare i roto i te fa’anahora’a a te Atua

’Ua ha’amauhia te ’utuāfare e te Atua ’e ’ua riro ’ei pū nō tāna fa’anahora’a. Tātou tāta’itahi « ’ua riro tātou tāta’itahi ’ei tamaiti ’e ’ei tamāhine vārua herehia e nā metua i te ra’i ra [’e] e huru ’e e hope’a hanahana » (« Te ’Utuāfare : E Poro’i i tō te Ao nei », ChurchofJesusChrist.org). E tuha’a tātou nō tō rāua ’utuāfare. ’Ua ora nā tātou i pīha’i iho ia rāua hou tātou ’a fānauhia mai ai i ni’a i te fenua nei.

’Ei tuha’a nō tāna fa’anahora’a, ’ua ha’amau te Metua i te ao ra i te mau ’utuāfare i ni’a i te fenua nei. ’Ua hina’aro ’oia ē ’ia hōpoi mai te mau ’utuāfare i te ’oa’oa ia tātou. E hōro’a mai te mau ’utuāfare i te mau rāve’a nō te ha’api’i mai, nō te tupu i te rahi, nō te tāvini, nō te tātarahapa, ’e nō te fa’a’ore i te hara. E nehenehe te reira e tauturu ia tātou ’ia fa’aineine nō te ora mure ’ore.

I roto i teie orara’a, e rave rahi ta’ata e mea iti roa tā rātou mau rāve’a nō te here i te mau autā’atira’a ’utuāfare. ’Aita e ’utuāfare e ’ore e fāri’i i te mau tāmatara’a, te māuiui, ’e te ’oto. E fa’a’ohipa te ta’ata hō’ē ’e te mau ’utuāfare i te fa’aro’o i te Fatu ’e e tūtava ’ia ora mai te au i te mau parau mau tāna i heheu mai nō ni’a i te ’utuāfare. ’Ua fafau mai te Fa’aora ē, e tauturu ’oia ’ia amo i te mau hōpoi’a a te mau ta’ata ato’a e haere mai iāna ra (hi’o Mataio 11:28–30).

E ha’apāpū te fa’anahora’a nō te ’oa’oa a te Metua ē, e fāri’i tāna mau tamari’i pā’āto’a i te rāve’a nō te fāri’i i tāna ’evanelia ’e nō te fāri’i i tāna mau ha’amaita’ira’a rahi a’e (hi’o Te Ha’api’ira’a Tumu ’e te mau Fafaura’a 137:7–10). Te mau ta’ata ato’a e rave ’e e ha’apa’o i te mau fafaura’a ’e te Atua, e nehenehe rātou e fāri’i i te ’oa’oa ’e « te hau i roto i teie nei ao, ’e te ora mure ore i roto i te ao a muri atu ra » (Te Ha’api’ira’a Tumu ’e te mau Fafaura’a 59:23 ; hi’o ato’a Mosia 2:41). I roto i te parau fafau a te Atua nō te ora mure, tē vai ra te fa’aipoipora’a mure ’ore, te mau tamari’i, ’e te tā’āto’ara’a o te tahi atu mau ha’amaita’ira’a o te hō’ē ’utuāfare mure ’ore.

2.1.1

Te mau ’utuāfare mure ’ore

E tupu te mau ’utuāfare mure ’ore i te taime ’a rave ai te mau melo o te ’Ēkālesia i te mau fafaura’a ’a fāri’i ai rātou i te mau ’ōro’a nō te tā’atira’a i roto i te hiero. E tupu te mau ha’amaita’ira’a o te hō’ē ’utuāfare mure ’ore ’ia ha’apa’o ana’e te mau melo i te reira mau fafaura’a ’e ’ia tātarahapa ana’e rātou mai te mea ē, ’aita rātou i ha’apa’o. E tauturu te feiā fa’atere o te ’Ēkālesia i te mau melo ’ia fa’aineine nō te fāri’i i teie mau ’ōro’a ’e ’ia fa’atura i tā rātou mau fafaura’a.

E nehenehe te ta’ata tāta’itahi e rave i te tahi atu mau ’ohipa i roto i te hō’ē ’utuāfare mure ’ore. E mea mo’a ’e te faufa’a te mau ’ohipa ’utuāfare ato’a. I roto i teie mau ’ohipa tē vau ra te metua vahine ’e te metua tāne, te tamāhine ’e te tamaiti, te tuahine ’e te taea’e, te metua fēti’i vahine ’e te metua fēti’i tāne, ’e te māmā rū’au ’e te pāpā rū’au. Te ravera’a i teie mau ’ohipa ma te here, e tauturu te reira i te mau tamari’i a te Atua ’ia haere i mua e tae atu i te ora mure ’ore.

Te tahi atu huru nō te ha’amaura’a i te mau ’utuāfare mure ’ore ’o te ravera’a ïa i te mau ’ōro’a i roto i te hiero, i reira ho’i te mau melo e tā’atihia ai i tō rātou mau tupuna tei pohe.

Ma te hāro’aro’a i te fa’anahora’a a te Atua, e ’imi te mau melo i te mau ha’amaita’ira’a nō te hō’ē ’utuāfare mure ’ore. ’Oia ho’i, te fa’aineinera’a ’ia riro ’ei hoa fa’aipoipo ’e ’ei metua ti’amā ’e te here.

2.1.2

Te tāne ’e te vahine fa’aipoipo

’Ua ha’apa’ohia e te Atua te fa’aipoipora’a i rotopū i te tāne ’e te vahine (hi’o Te Ha’api’ira’a Tumu ’e te mau Fafaura’a 49:15). ’Ua ’ōpuahia ’ia tupu ’āmui te tāne ’e te vahine fa’aipoipo e tae atu i te ora mure ’ore (hi’o 1 Korinetia 11:11).

Hō’ē o te mau tītaura’a e noa’a ai te ora mure ’ore, nō te hō’ē tāne ’e te hō’ē vahine, ’o te tomora’a ïa i roto i te fafaura’a o te fa’aipoipora’a tiretiera (hi’o Te Ha’api’ira’a Tumu ’e te mau Fafaura’a 131:1–4). E rave nā ta’ata fa’aipoipo i teie fafaura’a i te taime ’a fāri’i ai rāua i te ’ōro’a tā’atira’a o te fa’aipoipora’a i roto i te hiero. ’O te niu teie fafaura’a nō te hō’ē ’utuāfare mure ’ore. Mai te mea e ha’apa’o-māite-hia te reira, e vai ïa tō rāua fa’aipoipora’a e a muri noa atu. I te hope’a, e nehenehe rāua e riro mai mai te Atua te huru (hi’o Te Ha’api’ira’a Tumu ’e te mau Fafaura’a 132:19–20).

’Ua fa’aue mai te Fatu i te mau tāne ’e te mau vahine fa’aipoipo ’ia ’ati te tahi i te tahi (hi’o Genese 2:24 ; Te Ha’api’ira’a Tumu ’e te mau Fafaura’a 42:22). I roto i teie parau, te aura’a nō te ta’o ’ati ’oia ho’i ’ia hōro’a ’e ’ia ha’apa’o maita’i hope roa i te hō’ē ta’ata. E ’ati ’āmui te mau ta’ata fa’aipoipo nā roto i te herera’a ’e te tāvinira’a i te tahi ’e te tahi.

Tei roto ato’a i te ’atira’a te parau nō te ha’apa’o maita’i hope roa i rotopū i te tāne ’e te vahine fa’aipoipo. ’Ua ’ōpuahia te hereherera’a i rotopū i te tāne ’e te vahine fa’aipoipo ’ia riro ’ei ’ohipa nehenehe ’e te mo’a. ’Ua ha’amauhia te reira e te Atua nō te hāmanira’a i te mau tamari’i ’e nō te fa’a’itera’a i te here i rotopū i te tāne ’e te vahine fa’aipoipo. Nā te here ’e te fa’atura—’eiaha te peu pipiri—e arata’i i tā rāua peu hereherera’a.

’Ua fa’aue mai te Atua ē, ’ua fa’ata’ahia te hereherera’a ’āpeni nō te fa’aipoipora’a i rotopū i te hō’ē tāne ’e te hō’ē vahine. Te fa’aeara’a ma te vi’ivi’i ’ore i te pae ’āpeni hou te fa’aipoipora’a, ’e te ha’apa’o-maita’i-ra’a i roto i te fa’aipoipora’a, e tauturu te reira i te ta’ata hō’ē ’ia ’oa’oa mau, ’e ’ia ’ape i te mau ha’afifira’a i te pae vārua, i te pae ’āehuehu, ’e i te pae tino. Tē fa’aitoitohia nei te mau metua ’e te feiā fa’atere nō te ’Ēkālesia ’ia ’imi i te mau rāve’a ato’a nō te ha’apūai atu i teie ha’api’ira’a (hi’o 38.6.5).

E ’imi nā ta’ata fa’aipoipo i te rāve’a ’ia hō’ē rāua i te ha’amaura’a i tō rāua ’utuāfare (hi’o Genese 2:24). Nō te hō’ēra’a i roto i te fa’aipoipora’a, e tītauhia te hō’ē ’āpitira’a hope roa, te ’ōpere-māite-ra’a i te mau hōpoi’a. ’Ua ’aifāito te tāne ’e te vāhine fa’aipoipo i mua i te ’aro o te Atua. ’Eiaha te hō’ē e ha’avī i te tahi. E ti’a i tā rāua mau fa’aotira’a ’ia ravehia i roto i te hō’ēra’a ’e te here, ma te ’āmui hope roa rāua to’opiti.

’Ua fa’a’ite ’o Adamu ’e ’o Eva i te hō’ē hi’ora’a nō te mau tāne ’e te mau vahine fa’aipoipo. ’Ua ’ohipa, ’ua pure, ’e ’ua ha’amori ’āmui rāua (hi’o Mose 5:1, 4). ’Ua ha’api’i rāua i tā rāua mau tamari’i i te ’evanelia ’e ’ua ’oto ’āmui rāua i roto i tā rāua mau tāmatara’a (hi’o Mose 5:12, 27). ’Ua hō’ē rāua te tahi ’e te tahi ’e i te Atua.

2.1.3

Te mau metua ’e te mau tamari’i

Hou e ti’a ai i te mau tamari’i a te Atua ’ia fāri’i i te « tāhuti ’ore ’e te ora mure ’ore », tītauhia ia rātou ’ia fāri’i i te hō’ē tino tāhuti (Mose 1:39). Te fa’auera’a mātāmua a te Atua ia Adamu ’e ia Eva ’ei tāne ’e ’ei vahine fa’aipoipo, ’o te fānaura’a ïa i te tamari’i (hi’o Genese 1:28). ’Ua ha’api’i mai te mau peropheta nō te mau mahana hope’a nei, « te fa’auera’a a te Atua i tāna mau tamari’i nō te fānau fa’arahi ’e nō te fa’a’ī i te fenua nei, tē mana noa nei ā ïa » (« Te ’Utuāfare : E poro’i i tō te ao nei » ; hi’o ato’a Te Ha’api’ira’a Tumu ’e te mau Fafaura’a 49:16–17).

E ha’amaita’ira’a ’e e hōpoi’a mo’a nō te tāne ’e te vahine fa’aipoipo ’ia ’atu’atu i te mau tamari’i ’o tē ti’a ia rāua ’ia fānau ’aore rā, ’ia fa’a’amu. Nō te mau metua fa’a’amu ato’a te reira mau ha’amaita’ira’a ’e te mau hōpoi’a mai te mau metua fānau.

E hōro’a ’āmui te tāne ’e te vahine fa’aipoipo here, i te hō’ē vāhi maita’i roa a’e nō te ha’apa’o ’e nō te fa’a’amu i te mau tamari’i. E nehenehe te orara’a o te ta’ata hō’ē e tāpe’a i te mau metua ’ia fa’a’amu ’āmui i tā rāua mau tamari’i. Terā rā, e ha’amaita’i te Fatu ia rāua mai te mea e ’imi rāua i tāna tauturu ’e e tūtava ’ia ha’apa’o i tā rāua mau fafaura’a iāna ra.

Tei te mau metua te hōpoi’a faufa’a rahi i te tauturu i te mau tamari’i ’ia fa’aineine nō te fāri’i i te mau ha’amaita’ira’a o te ora mure ’ore. E ha’api’i rāua i tā rāua mau tamari’i ’ia here ’e ’ia tāvini i te Atua ’e ia vetahi ’ē (hi’o Mataio 22:36–40). E ha’api’i rāua ia rātou ’ia pure i te Metua i te ao ra ’e ’ia tuatāpapa i te parau a te Atua (hi’o Alama 37:36–37, 44–46). E tauturu rāua i tā rāua mau tamari’i ’ia hāro’aro’a i te ha’api’ira’a tumu o te fa’aro’o ia Iesu Mesia, te tātarahapa, te bāpetizora’a, ’e te hōro’a o te Vārua Maita’i (hi’o Te Ha’api’ira’a Tumu ’e te mau Fafaura’a 68:25). E tauturu ato’a rāua ia rātou ’ia fa’aineine nō te rave i te mau fafaura’a i te taime e fāri’i ai rātou i te mau ’ōro’a nō te fa’aorara’a ’e te fa’ateiteira’a.

« ’Ua tītauhia te mau metua tāne ’ia fa’atere i tō rātou ’utuāfare nā roto i te here ’e te parauti’a, ’e e hōpoi’a nā rātou ’ia ’imi i te ora ’e te pārurura’a nō tō rātou ’utuāfare » (« Te ’Utuāfare : E Poro’i i tō te Ao nei »). Mai te mea ’aita e tāne fa’aipoipo ’aore rā e metua tāne i roto i te fare, nā te metua vahine e peresideni i te ’utuāfare.

Te peresidenira’a i roto i te ’utuāfare e hōpoi’a ïa nō te tauturu i te arata’ira’a i te mau melo o te ’utuāfare ’ia ho’i e pārahi i pīha’i iho i te Atua. E ravehia te reira nā roto i te tāvinira’a ’e te ha’api’ira’a ma te maita’i, te marū, ’e te here mau, ma te pe’era’a i te hi’ora’a o Iesu Mesia (hi’o Mataio 20:26–28). Te peresidenira’a i roto i te ’utuāfare ’o te arata’ira’a ïa i te mau melo o te ’utuāfare i roto i te pure tāmau, te tuatāpapara’a i te ’evanelia, ’e te tahi atu mau huru o te ha’amorira’a. E ’ohipa te mau metua ma te hō’ē nō te rave i teie mau hōpoi’a.

« Tei te mau metua vahine te hōpoi’a mātāmua roa nō te aupuru i tā rāua mau tamari’i » (« Te ’Utuāfare : E Poro‘i i tō te Ao nei »). Te aura’a nō te parau aupuru, te fa’a’amura’a ïa, te ha’api’ira’a, ’e te pāturura’a, ma te pe’e i te hi’ora’a o te Fa’aora (hi’o 3 Nephi 10:4). I roto te hō’ēra’a ’e tāna tāne fa’aipoipo, e tauturu te metua vahine i tōna ’utuāfare ’ia ha’api’i mai i te mau parau mau o te ’evanelia ’e ’ia fa’ahotu i te fa’aro’o i te Metua i te ao ra ’e ia Iesu Mesia. E rave ’āmui rāua nō te fa’atupu i te hō’ē vāhi nō te here i roto i te ’utuāfare.

« I roto i teie mau hopoi’a mo’a, e mea ti’a i te mau metua tāne ’e i te mau metua vahine ’ia tauturu te tahi i te tahi ’ei mau hoa ’aifāito » (« Te ’Utuāfare : E Poro‘i i tō te Ao nei »). Nā roto i te pure, e paraparau ’āmui rāua ’e te Fatu. E rave ’āmui rāua i te mau fa’aotira’a i roto i te hō’ēra’a ’e te here, ma te ’āmui hope roa rāua to’opiti.

2.2

Te ’ohipa nō te fa’aorara’a ’e te fa’ateiteira’a i roto i te fare

’Ua parau te Peresidenira’a Mātāmua, « Te ’utuāfare ’o te niu ia nō te hō’ē orara’a parauti’a » (Rata nā te Peresidenira’a Mātāmua, 11 nō Fepuare 1999). I roto i tō rātou fare, e fafau te ta’ata hō’ē ’e te mau ’utuāfare ’ia rave i te ’ohipa nō te fa’aorara’a ’e te fa’ateiteira’a. E maha hōpoi’a i fa’ata’a-hanahana-hia i roto i teie ’ohipa :

Te orara’a i te ’evanelia a Iesu Mesia (hi’o 1.2.1)
Te utuutura’a i te feiā nava’i ’ore (hi’o 1.2.2)
Te anira’a i te mau ta’ata ato’a ’ia fāri’i i te ’evanelia (hi’o 1.2.3)
Te tāhō’ēra’a i te mau ’utuāfare nō te tau a muri atu (hi’o 1.2.4)

Nō te pāturu i te mau melo i roto i te ravera’a i te ’ohipa nō te fa’aorara’a ’e te fa’ateiteira’a i te fare, e fa’aitoito te feiā fa’atere o te ’Ēkālesia ia rātou ’ia ha’amau i te hō’ē fare i reira e pārahi ai te Vārua. E fa’aitoito ato’a rātou i te mau melo ’ia fa’atura i te mahana sābati, ’ia tuatāpapa ’e ’ia ha’api’i mai i te ’evanelia i te fare, ’e ’ia fa’atupu i te pō ’utuāfare i te mau hepetoma ato’a. E hōro’a te feiā fa’atere i te hō’ē tauto’ora’a ta’a ’ē nō te pāturura’a i te ta’ata hō’ē ’aita paha e fāri’i nei i te pāturura’a ’aore rā, i te fa’aitoitora’a mai roto mai i te mau melo o te ’utuāfare.

2.2.1

E fare i reira e pārahi ai te Vārua

E fa’aitoitohia te mau melo o te ’Ēkālesia ’ia fa’ariro i tō rātou fare ’ei vāhi pūai i te pae vārua ’e te ’oa’oa. E nehenehe rātou e ani i te Vārua o te Fatu i roto i tō rātou mau fare nā roto i te mau tauto’ora’a ’ōhie roa. E nehenehe te mau fare ato’a e riro « ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te ha’api’ira’a, ’ei fare nō te hanahana, ’ei fare nō te ha’apa’o, ’ei fare ho’i nō te Atua » (Te Ha’api’ira’a Tumu ’e te mau Fafaura’a 88:119).

2.2.2

Te ha’amo’ara’a i te mahana sābati

’Ua fa’aue te Atua i tāna mau tamari’i « e ha’amana’o i te mahana sābati ’ia ha’apa’ohia ’ei mahana mo’a » (Exodo 20:8). E ha’aputuputu te mau melo o te ’Ēkālesia i te sābati nō te rave i te ’ōro’a mo’a ’ei ha’amana’ora’a ia Iesu Mesia ’e i tāna tāra’ehara (hi’o Te Ha’api’ira’a Tumu ’e te mau Fafaura’a 59:12). Te sābati e mahana ïa nō te ha’api’ira’a mai ’e nō te ha’api’ira’a atu i te ’evanelia i te fare purera’a ’e i te fare. E nehenehe te mau melo e ha’apūaihia i te sābati ’a fa’aō ai rātou i roto i te mau ’ohipa ri’i mai teie :

Te ha’amorira’a a te ta’ata iho i roto i te pure ’e te ha’apaera’a mā’a.
Te tuatāpapara’a ’e te ha’api’ira’a mai i te ’evanelia.
Te aupurura’a ’e te tāvinira’a ia vetahi ’ē.
’Ā’amu ’utuāfare
Taime e ’oa’oa te ’utuāfare.
Te tahi atu mau putuputura’a tano.

2.2.3

Te tuatapapara’a ’e te ha’api’ira’a mai i te ’evanelia i te fare

’Ua fa’atumuhia te ha’api’ira’a ’e te ’apora’a mai i te ’evanelia i ni’a i te ’utuāfare ’e e pāturuhia e te ’Ēkālesia. E fa’aitoito te feiā fa’atere o te ’Ēkālesia i te mau melo ato’a ’ia tuatāpapa i te ’evanelia i te fare i te mahana sābati ’e i te roara’a o te hepetoma. E ha’apūai te tuatāpapara’a ’evanelia i te fare i te ta’ata hō’ē ’e i te ’utuāfare. E fa’ahōhonu te reira i te fa’afāriura’a i te Metua i te ao ra ’e i te Fatu ia Iesu mesia.

Te tuatāpapara’a i te pāpa’ira’a mo’a mai tei vauvauhia i roto i te Mai, pe’e mai—nō te mau ta’ata hō’ē ’e te ’utuāfare o te reira te ha’api’ira’a i mana’ohia nō te tuatāpapa i te ’evanelia i te fare. E fa’a’au māite te Mai, pe’e mai i te mau ha’api’ira’a i roto i te Paraimere, te Ha’api’ira’a Sābati, te Feiā ’Āpī Tamāhine, te mau pupu Autahu’ara’a a Aarona, ’e te séminaire ’e te tuatāpapara’a i te ’evanelia i te fare.

Nā te ta’ata hō’ē ’e te ’utuāfare e ’imi i te fa’aurura’a, ’a mā’iti ai rātou i te tuatāpapa e aha te mea e pāhono maita’i a’e i tō rātou mau hina’aro. Ta’a ’ē atu te mau tuha’a o te pāpa’ira’a mo’a i hōro’ahia i roto i te Mai, pe’e mai, nā roto i te pure, e nehenehe rātou e tuatāpapa :

Te Buka a Moromona ’e te tahi atu mau pāpa’ira’a mo’a.
Te mau parau poro’i o te ’āmuira’a rahi.
Te mau ve’a pāpa’i a te ’Ēkālesia ’e te tahi atu mau nene’ira’a maita’i.

2.2.4

Te pō ’utuāfare ’e te tahi atu mau ’ohipa ri’i

’Ua a’o mai te mau peropheta nō te mau mahana hope’a nei i te mau melo nō te ’Ēkalesia ’ia fa’atupu i te pō ’utuāfare i te mau hepetoma ato’a. E taime mo’a roa teie nō te ta’ata hō’ē ’e nō te mau ’utuāfare nō te ha’api’i mai i te ’evanelia, nō te ha’apūai i te ’itera’a pāpū, nō te patu i te hō’ēra’a, ’e nō te ’oa’oa te tahi ’e te tahi.

E mea fa’a’au ’ōhie te pō ’utuāfare, tei te huru o te orara’a o te mau melo. E nehenehe e fa’atupuhia i te sābati ’aore rā, i te tahi atu mahana ’e te taime. Teie te ’ohipa e rave :

Tuatāpapara’a ’e te ha’api’ira’a i te ’evanelia (e nehenehe e fa’a’ohipa i te mau materia mai te Mai, pe’e mai mai te mea e hina’arohia).
Tāvinira’a ia vetahi ʼē.
Te hīmenera’a ’aore rā, te ha’utira’a i te mau hīmene ’e te mau hīmene a te Paraimere (hi’o pene 19).
Te pāturura’a i te mau melo o te ’utuāfare i roto i Te fa’ahotura’a o te mau tamari’i ’e te feiā ’āpī.
Hō’ē ’āpo’ora’a ’utuāfare nō te ha’amau i te mau ’ōpuara’a, nō te fa’atītī’aifaro i te mau fifi, ’e nō te fa’a’au i te mau tārena ’ohipa.
’Ohipa ri’i fa’a’oa’oara’a.

E nehenehe te mau melo ’ōtahi ’e te tahi atu e putuputu ’ei mau pupu, i rāpae i te mau taime purera’a i mātarohia i te sābati, nō te ’āmui i roto i te pō ’utuāfare ’e nō te fa’aitoito i te tahi ’e te tahi i roto i te tuatāpapara’a i te ’evanelia. E nehenehe te Mai, pe’e mai e riro ’ei rāve’a tauturu nō te feiā e hina’aro e tuatāpapa ’āmui.

E tauturu ta’a ’ē te feiā fa’atere i te feiā a tahi ra rātou e fa’atupu ai i te pō ’utuāfare ’e ’a tuatāpapa ai i te ’evanelia.

Ta’a ’ē atu te pō ’utuāfare, e fa’aitoito te feiā fa’atere i te mau ’utuāfare ’ia ha’afaufa’a i te mau taime e pārahi ’āmui ai ’ei ’utuāfare i te roara’a o te hepetoma. Mai te taime tāmā’ara’a, te rave-’āmui-ra’a i te ’ohipa ’e te tāvini-’āmui-ra’a, ’e te mau ’ohipa ri’i fa’a’oa’oara’a.

Nō te hōro’a i te taime nō te mau ’utuāfare ’ia ’āmui rātou, e ti’a i te feiā fa’atere ’ia vaiiho i te mau pō monirē ’eiaha e fa’atupu i te mau putuputura’a ’e te mau ’ohipa ri’i nā te ’Ēkālesia.

E fa’aitoito te feiā fa’atere i te mau melo ’ia tāmau noa i te fa’atupu i te pō ’utuāfare ’e ’ia pārahi ’āmui ’ei ’utuāfare (hi’o Te Ha’api’ira’a Tumu ’e te mau Fafaura’a 64:33).

2.2.5

Te pāturura’a i te ta’ata hō’ē

E tauturu te feiā fa’atere o te ’Ēkālesia i te mau melo ’aita rātou e pāturuhia e te ’utuāfare. Teie te mau melo e hina’aro i te pāturura’a hau atu :

Te mau tamari’i, te feiā ’āpī, ’e te mau ta’ata pa’ari e ’ere tō rātou ’utuāfare i te mea itoito i te ’āmui mai i roto i te mau putuputura’a ’e te mau ’ohipa ri’i a te ’Ēkālesia.
Te feiā pa’ari ’ōtahi nō te mau huru matahiti ato’a, tae noa atu i te mau metua ’ōtahi ’e te mau melo ivi.

E tauturu te feiā fa’atere i teie mau melo ’e tō rātou mau ’utuāfare ’ia fāri’i i te mau rāve’a nō te fa’ahoara’a, ’ia fāri’i i te mau ’itera’a pae turu’uta’a maita’i ’e te tupura’a i te rahi i te pae vārua. E fa’aitoito ’e e tauturu te feiā fa’atere ia rātou i roto i tā rātou mau tūtavara’a ’ia ha’api’i mai ’e ’ia ora i te ’evanelia a Iesu Mesia. E hōro’a ato’a te feiā fa’atere ia rātou i te mau rāve’a nō te tāvini i roto i te ’Ēkālesia.

2.3

Te autā’atira’a i rotopū i te fare ’e i te ’Ēkālesia

’Ua fa’atumuhia te ’ohipa nō te fa’aorara’a ’e te fa’ateiteira’a i roto i te fare ’e ma te pāturuhia e te ’Ēkālesia. Teie i muri nei te mau parau tumu e fa’a’ohipahia i roto i te autā’atira’a i rotopū i te fare ’e i te ’Ēkālesia.

E fa’atura te feiā fa’atere ’e te mau ’orometua i te ’ohipa a te mau metua ’e e tauturu ho’i ia rātou. E ha’amau ’e e tāpe’a noa te feiā fa’atere ’e te mau ’orometua i te ’āparaura’a maita’i ’e te mau metua.
E hi’o te feiā fa’atere nō te ha’apāpū ē, tē pāturu ra te mau putuputura’a, te mau ’ohipa ri’i ’e te mau fa’anahora’a a te ’Ēkālesia i te ta’ata hō’ē ’e i te mau ’utuāfare i roto i te ravera’a i te ’ohipa nō te fa’aorara’a ’e te fa’ateiteira’a i roto i tō rātou mau fare.
E mea faufa’a te tahi mau putuputura’a a te ’Ēkālesia i roto i te pāroita ’aore rā, te ’āma’a tāta’itahi. ’Oia ho’i, te purera’a ’ōro’a ’e te mau putuputura’a a te mau piha ha’api’ira’a ’e a te mau pupu autahu’ara’a e fa’atupuhia i te sābati. E rave rahi mau putuputura’a, mau ’ohipa ri’i ’e te mau fa’anahora’a ’ē atu, e ’ere i te mea faufa’a. E fa’anaho te feiā fa’atere i te reira mai te mea e hina’arohia nō te tauturu i te pāhono i te mau hina’aro o te ta’ata hō’ē ’e o te mau ’utuāfare. E ha’apa’o ato’a te feiā fa’atere i te huru orara’a ’e te mau rāve’a tauturu o te fenua iho.
E feruri te ta’ata hō’ē ’e te mau ’utuāfare i tō rātou huru orara’a ’a rave ai rātou i te mau fa’aotira’a nō ni’a i te ’āmuira’a i roto i te mau fa’anahora’a a te ’Ēkālesia, e ’ere i te mea faufa’a.
I roto i te tāvinira’a ’e te ’āmuira’a mai i roto i te ’Ēkālesia, tē vai ra ïa te tahi fāito fa’atusiara’a. E ha’amaita’i te Fatu i te mau melo ’a tāvini ai ’e ’a fa’atusia ai rātou i roto i tāna ’Ēkālesia. Teie rā, ’eiaha te fāito taime tā te mau melo e hōro’a i roto i te ’ohipa a te ’Ēkālesia e ha’afifi i te ravera’a i tā rātou mau hōpoi’a i te fare, i te ’ohipa, ’e i te tahi atu vāhi. ’Eiaha te feiā fa’atere ’e te mau melo ’ia teimaha rahi roa i te mau hōpoi’a a te ’Ēkālesia. ’Eiaha ato’a e anihia ia rātou ’ia fa’atusia rahi roa nō te pāturu i te mau fa’anahora’a ’aore rā, i te mau ’ohipa ri’i a te ’Ēkālesia.

Mai te mea e ha’apa’o te mau melo i teie mau parau tumu ’e i te mau muhumuhura’a a te Vārua, e ha’amaita’i te Metua i te ao ra i tā rātou mau tūtavara’a.